ክርስትና “አክራሪነት”ን የሚያበቅል ነገረ ሃይማኖታዊ መሠረት የለውም

ነሐሴ 21 ቀን 2005 ዓ.ም.
 
ከቅርብ ጊዜ ወዲህ በሀገራችን የሃይማኖት “አክራሪነት” ስጋት እንዳለ በተለያዩ ወገኖች የሚነሣ ሐሳብ አለ፡፡ የ “ሃይማኖት አክራሪነት” በሀገራችን የለም የሚል እምነት አይኖርም፡፡ “አክራሪነት” የሚተረጎመውም የራስን የሃይማኖት የበላይነት ለማስፈን ሲባል ሌላው የሃይማኖት ሐሳቡን እንዳይ ገልጥ፣ ተግባራዊ የአምልኮ ሥርዓቱን እንዳይፈጽም ማድረግ፣ በኃይል ወይም በዐመፅ ቦታ ማሳጣት ተደርጎ ሊወሰድ ይችላል፡፡ አንድ ቤተ እምነት ራሱ ከሚከተለው እምነት ውጪ ያሉ በቁጥር ትንሽ ወይም ብዙ ተከታይ ያሏቸው እምነቶች በአንድ ሀገር ወይም ቦታ መኖር የለባቸውም ብሎ ማመን ወይም ማድረግ ነው ማለት ይቻላል፡፡ ይህ ደግሞ የሰዎችን የፈቃድ ነጻነት፣ ምርጫ አለማክበር፤ አለመጠበቅ ነው፡፡

ከላይ የተጠቀሰው አስተሳሰብ ደግሞ በምንም መስፈርት ቢመዘን ክርስትና ሊሸከመው የሚችለው አይደለም፡፡ የሚጋጨውም ከክርስትና መሠረታዊ ባሕርይና አካሔድ ጋር ነው፡፡ ክርስትና ወደ ሰዎች የመጣው በራሱ በሥግው አምላክ ኢየሱስ ክርስቶስ ሥራና ቃል ነው፡፡ ጌታችን ወደ ሰዎች ቀርቦ ወደ እርሱ እንዲመጡ የሳባቸው የፈቃድ ነጻነታቸውን ጠብቆ ነው፡፡ በደዌ ነፍስ የተያዙትን በትምህርቱ፣ በደዌ ሥጋ የተያዙትን በተኣምራቱ ሲፈውስ ሁሉንም “ልትድን ትወዳለህን” እያለ ፈቃዱን ጠይቆ የፈጸመው ነበር፡፡ ልባቸው ወደ እርሱ ያዘነበሉትን “ተከተሉኝ” ብሎ ወደ መንግሥቱ እየጋበዘ ከእርሱ ኅብረት ደምሯቸዋል፡፡ “ሸክማችሁ የከበደ ወደ እኔ ኑ፤ እኔም ዐሳርፋችኋለሁ” ብሏቸዋል፡፡

ጌታችን ያለፈቃዳቸው ከጉባኤው የደመራቸው ወገኖች አልነበሩም፡፡ ተሰብስበውም ከነበሩት የሚያስተምረው ኃይለ ቃል ከምስጢሩ ታላቅነት የተነሣ የጸነናቸው ታዳሚዎች እንኳን ጥለውት በሔዱ ጊዜ አልተቃወመም፡፡ በእግሩ ስር የቀሩ ሐዋርያቱንም “እናንተስ ልትሔዱ ትወዳላችሁን” እያለ ደቀመዛሙርቱን እንኳን ፈቃዳቸውን ያረጋግጥ ነበር እንጂ፤ ከዋልኩበት ውላችሁ፣ ካደርኩበት አድራችሁ፤ አበርክቼ አብልቼ፣ በፍቅሬ ረትቼ፤ በተአምራቴ ፈውሼ፣ ተኣምራት የምትሠሩበትን ኃይል አልብሼ ካቆየኋችሁ በኋላ ስለምን ትተውኛላችሁ ብሎ አምላካዊ ሥልጣኑን ተጠቅሞ ሊጫናቸው አላሰበም፡፡ በመሆኑም ክርስትና “ከአንተ ወደ ማን እንሔዳለን” ያሉ ቅዱሳን ሐዋርያትና በሐዋርያት ትምህርት የጸኑ፣ እስከ ዓለም ፍጻሜ የሚነሡ ምእመናን በፈቃዳቸው የሚኖሩበት ሃይማኖት ነው፡፡   

ጌታችን እንድንቃወም ያስተማረን ሌሎችን በኃይል ወደ እርሱ መሳብን ብቻ ሳይሆን ሊያስገድዱን የሚመጡ፣ መልካሙን እንዳንፈጽም የሚከለክሉንንም ቢሆን በኃይል ለመቋቋም መሞከርንም ነው፡፡ ጌታችን ለጴጥሮስ “ሰይፍን የሚያነሡ በሰይፍ ይጠፋሉ፤ ሰይፍህን ወደ ሰገባው መልስ” ያለው ለዚህ ነበር፡፡ ለዚህም ነው ክርስትና በባሕርዩ “አክራሪነት”ን የሚያስተ ናግድበት መስክ የለውም፤ በጽኑም ይቃወመዋል፡፡

ክርስትና ሰዎች የእምነት ሐሳባቸውን እንዳይገልጹ አይገ ድብም፡፡ ሌሎች በእምነቱ ላይ ያላቸውን ጥያቄ እንዳያቀርቡም አይከለክልም፡፡ ስለያዘው እውነት በራሱ የሚተማመን ሃይማኖት ነው፡፡ ስለሆነም እርሱም ይሔንኑ መብት በጽኑ ይፈልገዋል፡፡ ለሚጠይቁት ሁሉ መልስ ለመስጠት የተዘጋጀ፣ የራሱን የድኅነት መንገድ ለመመስከር የተሰማራ ሃይማኖት ነው፡፡ የክርስቶስን መንግሥቱንና ጽድቁን ለሚሹ ሁሉ “መንግሥተ ሰማያት ቀርባለችና ንስሐ ግቡ” እያለ ይጮኻል፡፡ ስለዚህ ክርስትና የ “አክራሪነት” ሐሳብ ከመሠረቱ ሊበቅልበት የማይችል ሃይማኖት ነው፡፡

በተግባርም ቢሆን ከቤተልሔም ዋሻ አንሥቶ እስከ ምድር ጥግ እንዲስፋፋ ያስቻለው በረድኤተ እግዚአብሔር ተደግፎ፣ በፍቅር ስቦ፣ በመግደል ሳይሆን በመሞት የብዙዎችን ነፍስ ለመታደግ የሚኖር ሃይማኖት በመሆኑ ነው፡፡ ስለዚህ የቃለ ሃይማኖቱን ኃይል የተአምራቱን ብዛት የአማኞቹን ጽናት አይተው የራሳቸውን እምነትና ፍልስፍና ለመጫን የሞከሩበትን አምልኮ ባዕዳንን ይከተሉ ከነበሩ ወገኖች ጀምሮ ሃይማኖትን የዕድገት፣ የነጻነት፣ የፍትሕ፣ የእኩልነት ወዘተ ጸር አድርገው እስከሚያስቡ የማርክሲዝም ሌኒንዝም ተከታዮች ድረስ የነበሩ “አክራሪዎች” ክርስትናን ሊያጠፉት ሲሞክሩ ታይቷል፡፡ ነገር ግን ሰይፋቸውን በትዕግስት ተቋቁሞ፣ እነርሱ እያለፉ እርሱ ሳያልፍ ዘላለማዊ ሆኖ እዚህ የደረሰ ሃይማኖት ሆኗል፡፡

ክርስትና በ“አክራሪነት” ሲመላለስ አልኖረም፡፡ በክር ስትና ስም የሚፈጸሙ ወይም በታሪክ ወስጥ የተፈጸሙ አሁን “አክራሪነት” ያልነው ጠባይ የተንጸባረቀባቸው አጋጣሚዎች ቢኖሩ እንኳን በክርስትና ስም ልንቀበለው የምንችለው አይሆንም፡፡ ቅዱሳን ሐዋርያትም “ቢቻላችሁስ ከሰው ሁሉ ጋር በሰላም ኑሩ” የሚል የፍቅር ቃል ሰጥተውናል፡፡

የኢትዮጵያ ኦርቶዶክስ ተዋሕዶ ቤተክርስቲያንም ሐዋርያዊ ውርስ ያላት ጥንታዊ ቤተክርስቲያን ስትሆን እነዚህ ከላይ የተሰጡ፣ ጌታችን መድኅኒታችን ኢየሱስ ክርስቶስ ያስተማረውን ትምህርትና ቅዱሳን ሐዋርያት ያስተላለፉትን መልእክት ታከብራለች፤ ትጠብቃለች፤ ነገረ ሃይማኖታዊ መሠረቷም ይኸው ነው፡፡

ስለዚህ ቤተክርስቲያን የእኔ ናቸው በምትላቸው ሕጋዊ መዋቅሮቿ፣ በመዋቅሮቿም ላይ የሚያገለግሉ አገልጋይ ካህናትና ምእመናን ሰንበት ትምሀርት ቤቶችና ማኅበራት ሁሉ ከላይ ከተጠቀሰው ክርስቲያናዊ መንገድ የወጣ በ”አክራሪነት” የሚታሰብባቸውን ተግባራት ሊፈጽሙ አይችሉም፤ ካደረጉም ቤተ ክርስቲያኒቱ ባላት ቀኖናዊ ሕግ መሠረት ይዳኛሉ፡፡ ይታረማሉ፤ ካልሆነም ይለያሉ፡፡

ቤተክርስቲያን ያላት ነገረ ሃይማኖታዊ ሐሳብ ይህ መሆኑን ከተስማማን፣ በዚህ መሠረታዊ አስተምህሮዋ ላይ ቅሬታ የሌለን ከሆነ፣ መልካምነቱን የምንረዳ ከሆነ፣ በዚህ ላይ ያልበቀለ፣ ያላፈራ፣ መልካም ያልሆነ የቤተክርስቲያን እንቅስቃሴ ካለ መመርመር ይገባል፡፡ በዚህ ጊዜ ጌታችን መድኀኒታችን ኢየሱስ ክርስቶስ “መልካም ዛፍ ሁሉ መልካም ፍሬን ያፈራልና፤ ክፉ ዛፍም ክፉ ፍሬን ያፈራል፤ መልካም ዛፍ ክፉ ፍሬን ማፍራት፣ ክፉ ዛፍም መልካም ፍሬን ማፍራት አይችልም፤ መልካም ፍሬን የማያፈራ ዛፍ ሁሉ ይቆረጣል፤ ወደ እሳትም ይጣላል እግዲህ ከፍሬያቸው ታውቋቸዋላችሁ” /ማቴ 7፥17/ ያለው ቃሉን እናስባለን፡፡ 

 
ማኅበረ ቅዱሳንም ከዚህ የወጣ አካሒድ ሊኖረው አይችልም፡፡ በቤተክርስቲያኒቱ መዋቅር ውስጥ ያለ ሓላፊነት የሚሰማው የአገልግሎት ማኅበር ነውና፡፡ “አክራሪነት”ን በመቃወምና የሃይማኖቶችን መከባበር ተገቢነት አስመልክቶ በተደጋጋሚ በገለጻቸው አቋሞቹ አስታውቋል፡፡ ለዚህም በሐመር መጽሔት በግንቦት ወር 2001 ዕትም፣ ስምዐ ጽድቅ በርእሰ አንቀጹ በጥቅ ምትና በኅዳር 1999 ዕትም፣ መጽሔተ ተልእኮ ዘማኅበረ ቅዱሳን በምንለው የማኅበሩ የሕዝብ ግንኙነት መጽሔት በነሐሴ 2004 ዓ.ም ዕትም በዚሁ ጉዳይ ያለውን አቋም ገልጿል፡፡  

ይሁን እንጂ ከቅርብ ጊዜ ወዲህ የኦርቶዶክስ ተዋሕዶ ቤተክርስቲያን ውስጥ “አክራሪነት” እንዳለና አልፎ አልፎም “ማኅበረ ቅዱሳን” ብለው በስም ጠቅሰው ለመፈረጅ የሞከሩ በአንዳንድ አካባቢ ያሉ መንግሥት ያዘጋጀውን የውይይት መድረክ የተጠቀሙ አስፈጻሚዎች ነበሩ፡፡ እነዚህ አልፎ አልፎ መንግሥት “አክራሪነት”ን ለመከላለከል ለሚወስዳቸው እርምጃዎች አጋዥ የሚሆን ውይይት በየደረጃው በሚያደርግበት አጋጣሚ የማኅበረ ቅዱሳንን ስም በኦርቶዶክስ ተዋሕዶ ቤተክርስቲያን ውስጥ ይታያል ላሉት “አክራሪነት” ማሳያ አድርገው ማቅረባቸው ለማኅበሩ አባላት ደስ የሚያሰኝ አልነበረም፡፡

“አክራሪነት” ከላይ በጠቀስነው እሳቤ መሠረት የሚታይ ከሆነ የማኅበረ ቅዱሳን አባላት ላሳዩት የ‹‹አክራሪነት›› ጠባይ ግልጽና ተጨባጭ ማስረጃ ማቅረብ ያሻል፡፡ ማኅበረ ቅዱሳን ከዚህ ቀደምም ከማንም በፊት በሀገራችን የአክራሪነት ዝንባሌዎች እንዳሉ በማመልከት በኩል ግንባር ቀደም ሚና ተጫውቷል፡፡ “አክራሪዎች” በተለያዩ አካባቢዎች አብያተክርስቲያናትን ሲያቃጥሉ ክርስቲያኖችን ሲያርዱ አካሔዱ መልካም አለመሆኑን በመጠቆም እርምጃ መውሰድ እንደሚገባ በማሳሰብ ሀገራዊ ሓላፊነቱን ለመወጣት ሞክሯል፡፡ የሃይማኖቶች መከባበር በመላው ሀገሪቱ እንዲሰፍን ያለውን ቁርጥ አቋምም አንጸባርቋል፡፡

በእርግጥ ማኅበረ ቅዱሳን ቤተክርስቲያናችን ጠንካራ የአስተዳደር፣ የአሠራር፣ የአገልግሎት አካሔድ እንዲኖራት አቋም ይዞ የሚያገለግል ማኅበር ነው፡፡ ማኅበረ ቅዱሳን ካህናትና ምእመናን ሁሉ የጌታችን መድኀኒታችን ኢየሱስ ክርስቶስን ቃል አክብረው፤ የሐዋርያትን የሊቃውንት አባቶችን የሃይማኖት ትምህርት፣ ሥርዓት፣ ታሪክና ትውፊት አውቀው እንደ ሃይማኖቱ ሕግና ሥርዓት እንዲመላለሱ ያተጋል፡፡ የተዘጉ አብያተ ክርስቲ ያናት እንዲከፈቱ፣ ሊቃውንቱ በረሃብ በችግር ተፈተው ከአገልግሎት እንዳይቦዝኑ ለማድረግ ይተጋል፡፡ የሌላ ቤተእምነት ተከታዮች በቤተክርስቲያን ትምህርት ላይ ለሚያነሧቸው ጥያቄዎች መልስ በመስጠት የዕቅበተ እምነት ሥራ ይሠራል፡፡

 

በኮሌጅና በዩኒቨርሲቲ ትምህርታቸውን እየተከታተሉ ያሉ የከፍተኛ ትምህርት ተቋማት ተማሪዎች ካደጉበት መንደር /ቀዬ/ ርቀው ወደ ተለያዩ ትምህርት ተቋማት ሲመጡ በአቅራቢያ በሚገኙ አጥቢያዎች ሰብስቦ በሃይማኖታቸው ተጠብቀው እንዲኖሩ፣ በመልካም ሥነምግባር ታንጸው ሀገራቸውንና ቤተክርስቲ ያናቸውን በታማኝነት እንዲያገለግሉ፣ ከሱስና ከዝሙት ተጠብቀው ከደዌ ሥጋ ደዌ ነፍስ እንዲርቁ ያደርጋል፡፡ በጠረፋማ አካባቢዎች ስብከተ ወንጌልን ያስፋፋል፡፡ በጤናና ትምህርት ጉዳዮችም በማኅበራዊ አገልግሎት ተሳትፎ እንዲኖረው እየጣረ ነው፡፡ እነዚህ ተግባራቱ ሁሉ ከቤተክርስቲያኒቱ የአገልግሎት መንፈስ የተቀዱ ናቸው፡፡ ለየትኛውም ወገን ቢሆን የሚጠቅሙ እንጂ ስጋት የሚሆኑ ተግባራት አይደሉም፡፡ በሃያ ዓመት የአገልግሎት ቆይታውም ያስመዘገባቸው ውጤቶች በስጋት ሳይሆን በአስፈላጊነት ሊያስፈርጀው የሚችል ነው፡፡

ስለዚህ የትኛውም ወገን ቢሆን እውነታውን ለመረዳት ጥረት ማድረግ ይገባዋል፡፡ ቸግሮች አሉ ቢባሉ እንኳን ተገቢነት ከሌላቸው ዘመቻዎች ቆጠብ ብሎ ከቤተክርስቲያኒቷ አባቶችና ጉዳዩ ከሚመለከታቸው አካላት ጋር አግባብነት ያላቸው ውይይ ቶችን ማድረግ በቂ ይሆናል፡፡ ማኅበሩ የቤተክርስቲያኒቱ ሉዓላዊ ሥልጣን ባለቤት የሆነው ቅዱስ ሲኖዶስ እንዲሠራ ከሰጠው ተግባራት ውስጥ ወደ ‹‹አክራሪነት›› አምባ ያስገባውን ወሰን አለፈ ያስባሉትን ነጥቦች ነቅሶ ማሳየት፣ እንዲህ የሚያስብሉ የተፈጸሙ ተግባራትንና ተግባራቱን ማኅበሩ ሓላፊነት ወስዶ የፈጸመው ተግባር መሆኑን የሚያሳዩ ማስረጃዎችን ማቅረብ አግባብ ይሆናል፡፡ ማኅበረ ቅዱሳን ሁልጊዜም ቢሆን የሃይማኖት አባቶች የሚያዙትን እንጂ ከዚያ ተላልፎ በራሱ ፈቃድ የሚፈጽመው አንዳችም ተግባር አለመኖሩን መረዳት ይገባል፡፡

ወስብሐት ለእግዚአብሔር

  • ምንጭ፡- ሐመር መጽሔት 21ኛ ዓመት ቁጥር 4 ነሐሴ 2005 ዓ.ም.

 

ብዙ ከተሰጠው ከእርሱ ብዙ ይፈለግበታል

ሐምሌ 4 ቀን 2005 ዓ.ም.

የአዲስ አበባ ሀገረ ስብከት ቤተ ክርስቲያናችን ካሏት አህጉረ ስብከት ሁሉ ለየት የሚልበት ባሕርያት አሉት፡፡ ሀገረ ስብከቱ የሀገሪቱ ዋና ከተማ እንደመሆኑ በተለያዩ ምክንያቶች ከሁሉም አህጉረ ስብከት የሚመጡ ክርስቲያኖች አገልግሎት የሚያገኙባቸው ገዳማትና አድባራት ያሉበት ሀገረ ስብከት ነው፡፡ በተለያዩ ቋንቋዎች የሚናገሩ የተለያዩ ባህሎች ያሏቸው የቤተ ክርስቲያን ቤተሰቦች ተገናኝተው በአንድነት መንፈስ አገልግሎት የሚያገኙበትና የሚቀበሉበት ሀገረ ስብከትም ነው፡፡

ሀገረ ስብከቱ በርካታ የቤተ ክርስቲያናችን መምህራን ሊቃውንት የሚገኙበትም ሀገረ ስብከት ነው፡፡ በመንፈሳዊው ትምህርት ብቻ ሳይሆን በዓለሙ የሚሰጠውን ማኅበራዊና የተፈጥሮ ሳይንስ፣ የሙያና የቀለም ትምህርቶች የተማሩ አንቱ የተባሉ የቤተ ክርስቲያኒቱ ልጆችም የሚገኙበት ሀገረ ስብከት ነው፡፡ ከሁሉም በላይ ደግሞ ቤተ ክርስቲያንን በታላቅ ፍቅር የሚጠብቃት፣ አገልግሎቷን ዕለት ዕለት የሚሻ ቸርና የዋህ ሕዝበ ክርስቲያን ያለበት ነው፡፡ በዚህም ምክንያት ቤተ ክርስቲያን የምትተዳደርበትን ብዙ የገንዘብ የቁሳቁስና የሰው ኃይል ሀብት ይዞ የሚገኝ ነው፡፡ ከዚህም የተነሣ አርአያነት ያለው አግልግሎትን ሊሰጥም እንደሚችል የሚታሰብ ነው፡፡

እነዚህ ከላይ የተጠቀሱት ሀገረ ስብከቱን ልዩ የሚያደርጉ ባሕርያቱ፤ ሀገረ ስብከቱ ያሉትን ብዙ ሀብቶች የሚያሳይ ነው፡፡ ብዙ ካለው ደግሞ ብዙ ይፈለግበታል የሚለው መጽሐፋዊ ቃል ከሀገረ ስብከቱ የምንሻውን ነገር በተሰጠው ልክ እንድንጠብቅ ያስገድዳል፡፡ ከሁሉም በላይ ደግሞ በነገር ሁሉ ለሌሎች አህጉረ ስብከት የሚኖረውን አርአያነት፡፡

ሀገረ ስብከቱ ብዙ ገንዘብ የሚያንቀሳቅስ እንደመሆኑ ለቤተ ክርስቲያኒቱ ሌሎች አህጉረ ስብከት ምሳሌ የሚሆን የገንዘብ አስተዳደርና አጠቃቀም ሥርዓት ሊኖረው ይገባል፡፡ ብዙ የገንዘብ አስተዳደር ሊቃውንት የሆኑ በርካታ የቤተ ክርስቲያን ልጆች ባለሙያዎች ያሉበት ሀገረ ስብከት በመሆኑ ቀጥሮ በማሠራትም ይሁን የነጻ አገልግሎት ሥርዓት በመዘርጋት አሠራሩን ዘመናዊ፣ ግልጽነት ያለው፣ ተጠያቂነት ያለበት፣ ለሙስና በር የማይከፍት ማድረግ ይቻለዋል፡፡ በአጠቃቀም ረገድም በግልጽነት በተሠራ ዕቅድና የዕቅድ አፈጻጸም ሥርዓት፣ አጠቃላይ አገልግሎቱን ባገናዘበ ሁኔታ፣ አሳማኝ በሆነ መንገድ ሊተገበር ይገባዋል፡፡ የንብረት አስተዳደሩም በተመሳሳይ መቃኘት ይገባዋል፡፡

ሀገረ ስብከቱ ያሉት ቅርሶች አያያዝና ጥበቃ ጉዳይም እንዲሁ መሻሻል ያለበትና በተሻለ አያያዙም ለሌሎች በቅርስ ሀብታቸው ለበለጸጉ አህጉረ ስብከት ምሳሌ ሊሆን ያስፈልጋል፡፡ ያለውን ለአገልግሎት የሚያስፈልግ የሰው ኃይልም ወጥ በሆነ ሥርዓት መምራት አለበት፡፡ አድባራትና ገዳማት ከልክ በታች ወይም ከልክ በላይ መያዝ አለመያዛቸውን፣ ለአገልግሎቱ የሚያስፈልገውን ሙያ ይዘው መገኘት አለመገኘታቸውን፣ ተገቢ እና ወጥነት ባለው የቅጥርና የዝውውር ሥርዓት እየተመራ መሆኑን፣ ከዚያ ጋር ተያይዘው የሚመጡ ሙስናና የአድልዎ አሠራሮች መኖር አለመኖራቸውን መመርመርና ማረጋገጥ ሀገረስብከቱ ወደፊት በአሠራር የለውጥ ሂደቱ ውስጥ ሊመረምራቸው የሚገቡ ነጥቦች ናቸው፡፡ በሀሜት ደረጃ የሚነሡትን የጎጠኝነት፣ የጎሰኝነት እና የቤተሰባዊ አሠራሮች መኖር አለመኖራቸውን መመርመር እንዳይከሠቱም የሚያደርግ ግልጽነት ያለው አሠራር ተግባራዊ ማድረግ ይገባል፡፡

ሀገረ ስብከቱ አርአያ ሊሆን የሚገባው በውስጥ አስተዳደራዊ ሥርዓቱ ብቻ አይደለም በስብከተ ወንጌልና በሌሎችም መንፈሳዊ አገልግሎቶችም ጭምር መሆን አለበት፡፡ በርካታ ሰባክያነ ወንጌልን ማሠልጠን፣ ማፍራት ጊዜው የሚጠይቀውን የትምህርትና ሥልጠና ዘዴዎች ተግባራዊ ለማድረግ መንቀሳቀስ አለበት፡፡ በቂና ብቁ አገልጋይ ካህናትን ማፍራት አለበት፤ ወይም ያሉትን በዚያ ደረጃ ማድረስ ይገባዋል፡፡ በዚህም ላይ ተመሥርቶ ለሃይማኖት ቤተሰቦች ለእንግዶችና መጻተኞች ተፈላጊውን የምስጢራት አገልግሎት ሊሰጥ፣ አርኪ የስብከተ ወንጌል ዐውድማ ሊሆን ይገባል፡፡ ሌሎች አህጉረ ስብከቶችንም ተንቀሳቅሰው የሚያስተምሩ የሚመክሩ ሊቃውንትን ማፍራት አለበት፡፡ ዘመናዊ የሆኑ የመገናኛ ቴክኖሎጂዎችን በመጠቀም ስብከተ ወንጌልን ማስፋፋት ይጠበቅበታል፡፡ በቂ የሚዲያ አውታሮች ያስፈልጉታል፡፡ በርካታ የብቃት ማእከሎችን ሊገነባ ይፈለግበታል፡፡

ከላይ ከተጠቀሱ መንፈሳዊ አገልግሎቶች በተጓዳኝ የልማትና ማኅበራዊ አገልግሎቶችን በማስፋፋት ለሕዝበ ክርስቲያኑም ብቻ ሳይሆን ለሀገሪቱ ዘርፈ ብዙ አስተዋጽኦ ሲያደርግ መታየት አለበት፡፡ ቢያንስ ትምህርት ቤቶችንና የሕክምና ማእከላትን ከዚህ በፊት የነበሩ መልካም ጅምሮችን መነሻ አድርጎ በዓይነት፣ በቁጥርና በጥራት ማሳደግና ማስፋፋት ከዚህ ሀገረ ስብከት በእጅጉ ይጠበቃል፡፡  

ይህ ሁሉ እንዲሆን ግን ሀገረ ስብከቱ የሚሰጣቸውን አገልግሎቶችና የአሠራር ሥርዓቱን በመላና ግምት ሳይሆን በጥናት አስደግፎ በምክክርና አሳማኝ በሆኑ አካሔዶች እንዲመራ ይጠበቅበታል፡፡ ማኅበረ ካህናቱ እርስ በእርስ የሚኖራቸው ግንኙነት ከምእመናን ጋር የሚኖራቸው ትስስር በየጊዜው ሊያድግ ሊሻሻል ይገባል፡፡ ምእመናን በሰበካ ጉባኤያት ያላቸው ተሳትፎ እንዲያድግና ቤተክርስቲያናቸውን በቅርበት የሚያገለግሉበት በቤተክርስቲያናቸው አሠራር ውስጥ አስተያየት እንዲሰጡ እንዲወስኑም ሆነው ሊታቀፉ ይገባል፡፡ በሀገረ ስብከቱ የሚገኙ ገዳማትና አድባራት ከሚታሙበት የሙስናና አድሏዊ አሠራር መጽዳት አለባቸው፡፡ አገልጋይ ካህናቱ በትምህርተ ወንጌልና በተለያዩ ዘርፈ ብዙ ሙያዎች ሊታነጹ ይገባል፡፡ ሕግ የጸናበት ሥርዓት የሚከበርበት ሀገረስብከት መሆን አለበት፡፡

ሀገረ ስብከቱ የማሻሻያ እርምጃ ለመውሰድ አሁን የጀመራቸው ጥረቶች የሚበረታቱ ናቸው፡፡ ከላይ እንደጠቀስነው በጥናትና በጥንቃቄ ለመፈጸም ጥረት የሚደረግ ከሆነ ውጤት እንደሚኖረው ይታመናል፡፡ ለዚህም የሚመለከታቸው ሁሉ ማለትም የሀገረ ስብከቱ ሠራተኞች የአድባራትና ገዳማት አስተዳዳሪዎች፣ ማኅበረ ካህናቱ፣ የሰንበት ትምህርት ቤት አባላትና ምእመናን፤ የኢትዮጵያ ኦርቶዶክስ ተዋሕዶ ቤተክርስቲያን ቤተሰብ የሆኑ ሁሉ አገልግሎት ማግኛ የሆነው የአዲስ አበባ ሀገረ ስብከት በሚፈለገው አርኪ የአገልግሎት ደረጃ ላይ እንዲደርስ የየድርሻቸውን ሊወጡ ይገባል፡፡ የማኅበረ ቅዱሳን አባላትም ሀገረስብከቱ የሚሻውን አስፈላጊ ድጋፍ ሁሉ ለማድረግ ያላቸውን ዝግጁነት ለመግለጽ ይወዳሉ፡፡

 ወስብሐት ለእግዚአብሔር 

 

  • ምንጭ፡- ሐመር መጽሔት 21ኛ ዓመት ቁጥር 2 ሰኔ 2005 ዓ.ም.

የቅዱስ ፓትርያርኩ መልእክት ቤተ ክርስቲያኒቱ በአንገብጋቢነት የምትሻውን ወቅታዊ ጥያቄ የሚመልስ አሳብ የያዘ ነው

 በስመ አብ ወወልድ ወመንፈስ ቅዱስ አሐዱ አምላክ

 
ከአራት ዓመት በፊት 2001 ዓ.ም የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ቤተ ክርስቲያኒቱን ወደ ተሻለ የአገልግሎት ደረጃ ለማድረስ በመከረበት ጉባኤው ቤተ ክርስቲያኒቱ ያሉባትን ለአገልግሎቱ እንቅፋት የሆኑ ተገቢ ያልሆኑ ድርጊቶችን ለማስወገድ ያሳለፋቸው ውሳኔዎች፣ የተያዙ አቋሞች ነበሩ፡፡ ቅዱስ ሲኖዶስ በጊዜው በቤተ ክርስቲያኒቱ “የአስተዳደር ችግሮች፣ የሙስናና የቤተሰብ አስተዳደር” በቤተ ክርስቲያኒቱ የአገልግሎት መስመሮች ውስጥ ሁሉ መንሰራፋቱን አምኖ ያንን ለማጥራት፣ ዘመኑን የዋጀ በተጠና ዕቅድና አፈጻጸም የሚከናወን፣ ሓላፊነትና ተጠያቂነት የሰፈነበት ዘመናዊ የአስተዳደር ሥርዓት ለመዘርጋት ውሳኔ ማስተላለፉ የሚታወስ ነው፡፡ 

ይሁን እንጂ ወደ ተግባር ለመግባት የተደረገው እንቅስቃሴ ግን ወዲያውኑ ፈተና ገጥሞት ነበር፡፡ ውዥንብር ለመፍጠር፣ አለመግባባትን ለማስፈን የአባቶችን ስም በማጥፋት ለማሸማቀቅ በተለያዩ መንገዶች ጥረት የሚያደርጉ፣ በተናጠልና በቡድን የሚን ቀሳቀሱ የተለያዩ አካላት ስለነበሩ ርምጃው ሳይሳካ ቀርቷል፡፡ በመሠረተ አሳቡ ግን የቤተ ክርስቲያኒቱን የአገልግሎት አካሄድ የማሳደግና የሚያስወቅሱ ነገሮችን የማስወገድ ብርቱ ፍላጎት እንደነበረው ቅዱስ ሲኖዶስ በአቋሙ አሳይቶ አልፏል፡፡

ይህ የነበረ የቅዱስ ሲኖዶስ ሐሳብ ዛሬ ብፁዕ ወቅዱስ አቡነ ማትያስ በግልጽ የተግባራቸው መጀመሪያ፣ የትኩረት አቅጣጫዎቻቸው ሁሉ ራስ እንደሆነ በቅርቡ ለበዓለ ትንሣኤ ባስተላለፉት ይፋዊ መልእክትና ለእንኳን አደረሰዎ በተዘጋጀው መርሐ ግብር ላይ  ባንጸባረቁት አቋም ከላይ አስቀድመን ያነሣናቸውን የቅዱስ ሲኖዶስ አቋሞች አስተጋብተዋል፡፡ ሃይማኖት በምግባር መገለጽ እንዳለበትና ከሃይማኖቱ አሳብ ጋር ስምሙ የሆነ አካሄድ እንዲኖረን የመከሩት ቅዱስነታቸው “ያረጀው ነገር ሁሉ በክርስቶስ ደም ተቀድሶና ነጽቶ ሐዲስ ሆኗል፡፡ አምላካችን ኢየሱስ ክርስቶስ ሠርቶ የሚያሠራ የመልካም ነገር ሁሉ አርአያ መሪ እንደመሆኑ መጠን አዲሱን መንገድ ከፍቶ እንድንጓዝበት ሲያደርግ እኛም በአዲስ መንፈስ በአዲስ ሕይወት ልንመላለስበት እንጂ እንደገና ወደ አረጀውና ወደ አፈጀው ሕይወት ተመልሰን ልንዘፈቅ አይደለም” ብለዋል፡፡

መልእክታቸው የቤተ ክርስቲያን ልጆችና አገልጋዮች ሁሉ በየደረጃው ያሉ ፍጹም ክርስቲያናዊ ምግባር እንዲላበሱ ያላቸውን አባታዊ ፍላጎት አንጸባርቀዋል፡፡ ይህ የቅዱስነታቸው ምክር በቤተ ክርስቲያን አስተዳደር አካላትም ዘንድ ሊተኮርበት የሚገባ ነው፡፡ ለመልካም ምግባር እንድንሰለፍ በሥራችንም ሁሉ እንድንበረታ ባስተላለፉት በዚሁ ምክራቸው መሠረት የትኞቹም አገልጋዮች መመላለስ ቢችሉ ቤተ ክርስቲያን አሉባት ከሚባሉ ችግሮች ሁሉ መላቀቅ የሚያስችላት አቅም ይሆናል፡፡

ቅዱስነታቸው በተለይም በዕለተ ማዕዶት ብፁዓን ሊቃነ ጳጳሳት፣ የቤተ ክህነቱ ከፍተኛ የሥራ ሓላፊዎች፣ የአድባራትና ገዳማት አስተዳዳሪዎች በተገኙበት ባስተላለፉት መልእክት በዓሉ ከዲያብሎስ ቁራኛነት ከሞት አገዛዝ ከአሮጌው እርሾ የተላቀቅንበት መሆኑን ካወሱ በኋላ በዚያው አንጻር የቤተ ክርስቲያን አገልጋዮች ከብልሹ አስተሳሰብ፣ ከብልሹ ምግባር ከሙስና፣ ከብልሹ አሠራር መጽዳት እንደሚገባቸው አሳስበዋል፡፡ ቤተ ክርስቲያን ያላትን ቅድስና ጠብቃ እንድትኖር ልጆቿ በተለይም አርአያ ሊሆኑ የሚገባቸው ካህናት በጎ ካልሆኑና ቤተ ክርስቲያንን ከሚያስተቹ አስተሳሰብና ተግባር እንዲላቀቁ መክረዋል፡፡ ይህም ቀድሞም የነበረው የቅዱስ ሲኖዶስ ቀርጥ አሳብ ተግባራዊ ምላሽ ሊያገኝ የሚችልበት ዕድል እንዳለ ተስፋ ሰጪ ሆኗል፡፡

ማኅበረ ቅዱሳን የቅዱስነታቸው መልእክት ተገቢና ወቅታዊ መሆኑን የሚያምን ሲሆን ለቤተ ክርስቲያኒቱ አገልግሎት ዕድገት በቀና መንፈስ ለሚያስቡ የቅዱስነታቸው የአገልግሎት ጅማሬ ተስፋ ሰጪ እንደሆነ ያስባል፡፡ ይህ የቅዱስነታቸው አቋም በዚሁ ወቅት በሚካሄደው የቅዱስ ሲኖዶስ ጉባኤ ብርቱ ድጋፍ እንደሚያገኝና ጠንከር ያሉ መመሪያዎችን በየደረጃው ላሉ የቤተ ክህነቱ አገልጋዮች ያስተላልፋል ተብሎ ይታመናል፡፡

ከሁሉም በላይ ግን የቅዱስነታቸው መልእክትም ሆነ የቅዱስ ሲኖዶስ አቋም በየደረጃው ባሉ አካላት ተግባራዊ ምላሽ ይፈልጋሉ፡፡ እንደ ከዚህ ቀደሙ ተወስነው የማይተገበሩ ውሳኔዎች፣ ሊራመዱ የማይችሉ አቋሞች ሊሆኑ አይገባም፡፡ ለተግባራዊነቱ ደግሞ ከብፁዓን አባቶች ጀምሮ በርካታ የቤተ ክህነቱ አካላት ድጋፍ እንዳላቸው ቅዱስነታቸው አቋማቸውን በንግግራቸው ባንጸባረቁበት ወቅት በሰጡት ሞቅ ያለ የድጋፍ ምላሽ መረዳት ይቻላል፡፡ ከጥቂት ራስ ወዳዶች በስተቀር የቤተ ክርስቲያኒቱ አገልግሎት ማሻሻያን በብርቱ የማይፈልግ የለም፡፡ በአስቸኳይና በጥብቅ ይፈልገዋል፡፡ የቤተ ክርስቲያኒቱ ገጽታ እንዲጎድፍ የሚሻ የለም፡፡ የጎደፈም ነገር ካለ በፍጥነት ማስተካከያ ለማድረግ መረባረብ ይገባል፡፡ የእርምጃው ቁልፍ ያለው ግን በቅዱስ ሲኖዶስ ጥብቅ አቋም ላይና በቅዱስ ፓትርያርኩ የአስተውሎት ርምጃ ውስጥ ነው፡፡

ለውጥን ምእመናንን በመላው፣ ማኅበረ ካህናቱ በየደረጃው፣ ሰንበት ትምህርት ቤቶችና ማኅበራት፣ አድባራትና ገዳማቱ፣ ተማሪዎችና መምህራኑ፣ ደቀመዛሙርቱና መዘምራኑ ሁሉ በብርቱ ይፈልጋሉ፡፡ ቤተ ክርስቲያን የዕረፍት ወደብ መሆን አለባት፡፡ እንደ ቅዱስነታቸው ንግግርም ለቤተ ክርስቲያን ብቻ ሳይሆን ለሀገርም አርአያ መሆን፣ ለዓለሙ ጨው መሆን አለባት፡፡ አሮጌው ነገር ሁሉ ማለፍ አለበት፤ አዲሱ መልካሙ ነገር ሁሉ ሊመጣ ይገባል፡፡ በዚያን ጊዜ ሁሉም አንድ ሆኖ ያስባል፡፡ መንፈሳዊው ሥራ ይሠለጥናል፤ የሥጋው ሥራ ወደ ቤቱ ይመለሳል፡፡

ዛሬ በየአህጉራቱ ያሉ የኦርቶዶክስ አብያተ ክርስቲያናት በብርቱ ተነቃቅተው የዓለምን ብልሹ ነገር ሁሉ እየተዋጉ ነው፡፡ ጠንካራ አደረጃጀትና የአግልግሎት አድማስ ፈጥረው እየተንቀሳቀሱ ይገኛሉ፡፡ የታሪክ፣ የሞራል፣ የዕውቀት፣ የሥነ ምግባርም መሠረት ያላት የኢትዮጵያ ኦርቶዶክስ ተዋሕዶ ቤተ ክርስቲያን ይሔንን አቅም ፈጥሮ ለመንቀሳቀስ የሚያግዳት አንዳችም ነገር የለባትም፡፡ ዋናውና ወሳኙ ነገር የእግዚአብሔርን ቡራኬ ማስገኘት የሚችል በጎ ምግባር፣ ቀና ሐሳብ ቤተ ክህነቱ ይዞ የመገኘቱ ነገር ነው፡፡ ከዚያ በኋላ ጥቂቱ ብዙ፣ ጥቁሩ ነጭ፣ ክፉው ሁሉ ለመልካም የማይሆንበት ምክንያት እንደማይኖር ማኅበረ ቅዱሳን የጸና አቋም አለው፡፡

በአጠቃላይ ቅዱስነታቸው ያመላከቱንን በጎ መንገድ መከተል ቤተክርስቲያን ያለ አማራጭ ይዛው ልትገኝ የሚገባት አካሄድ ነው፡፡ ለዚህ ጥሪ ምላሽ መስጠት ደግሞ የሁሉም የቤተ ክርስቲያን ቤተሰብ ሓላፊነት ነው፡፡ የማኅበረ ቅዱሳን አባላትም ለዚሁ ጥሪ በጎ ምላሽ ለመስጠት መዘጋጀታቸውን በዚሁ አጋጣሚ ለመግለጽ እንወዳለን፡፡

 

ምንጭ፡- ሐመር መጽሔት 21ኛ ዓመት ቁጥር 1 ግንቦት 2005 ዓ.ም.

ወስብሐት ለእግዚአብሔር           

ብፁዓን ገባርያነ ሰላም

ጥር 3 ቀን 2005 ዓ.ም.


በፍጡርና በፈጣሪ፤ በፍጡርና በፍጡር መካከል ችግሮችና አለመግባባቶች መፈጠራቸው የዚህ ዓለም ባሕርያዊ ግብር ነው፡፡ በተለይም የሰው ልጅ አለመግባባቶችን ዕለታዊ ባሕርዩ ወደ ማድረግ የደረሰም ይመስላል፡፡ ቅዱሳት መጻሕፍትም የእነዚህን ችግሮች ክሡትነት መጠቆማቸውም የሚሰወር አይደለም፡፡

 

አስቀድመን እንደገለጽነው ሰው በሰብአዊነቱ ከራሱ ጋር፣ ከፈጣሪው ጋርና ከሌሎቹም ሥነ ፍጥረታት ጋር የሚያጋጩት ብዙ ምክንያቶች አሉ፡፡ ከዚህም የተነሣ “ለምን ግጭት ተከሠተ” ብሎ መሞገት ጊዜ መጨረስ ሲሆን “ለምን አልታረቅሁም” ብሎ ራስን መጠየቅ ግን አግባብ ነው፡፡ ምክንያቱም የዕርቀ ሰላም መንገዶች እንደ ግጭቱ መንገድ የተንዛዙ ሳይሆኑ የተቆጠሩና የተሰፈሩ የተለኩ ሃይማኖታዊ እሴቶች ናቸውና፡፡

እነዚህ የተለኩ እሴታዊ የዕርቀ ሰላም መንገዶች ከየትኛውም አቅጣጫ ሊጀምሩ ይችላሉ፡፡ ምንም እንኳን ይቅርታ መጠየቅ ከአዳም ቢጀመርም የዕርቁ ሂደት የተጀመረው ግን ከእግዚአብሔር ነው፡፡ በፈራጅነቱ የሚታወቀው እግዚአብሔር በቸርነቱ፣ በከሃሊነቱና በምሕረቱ ሰውን ሊታረቅ ፈቃዱ ሆኗልና፡፡

 

በዚህ መልኩ የሚመሩ የዕርቀ ሰላም ጉዞዎች ሁለት ነገር ያስፈልጋቸዋል እንላለን፡፡ የመጀመሪያው ሁሉንም ነገር ስለ እግዚአብሔር ብሎ ያለ አንዳች ቅድመ ሁኔታና ስሌት ወይም ድርድር ይቅር ማለት ነው፡፡ “ይቅር ለእግዚአብሔር” የሚለው ኀይለ ቃል ዐረፍተ ነገሩ እንደማጠሩ ሳይሆን ሃይማኖታዊ ውሳኔን የሚጠይቅ የታላላቅ ሰዎች መገለጫም ነው፡፡

 

እንደሰማይ ከዋክብት እንደ ምድር አሸዋዎች የበዙ የግጭት ምክንያቶችን ሁሉ ስለ እግዚአብሔር ወይም ስለ ማምነው ፈጣሪ ስል ትቼዋለሁ ብሎ ወደ ዕርቀ ሰላም ዐደባባይ መዝለቅ የመንፈሳውያን ሰዎች ቁርጠኛ ውሳኔ መሆኑን መገንዘብ ተገቢ ነው፡፡

 

ሁለተኛው ለቅድስት ቤተ ክርስቲያን አንድነት፣ ለምንኖርባት ምድር በጎነት፣ ለምእመን ፍቅር ስንል “ይቅር ለእግዚአብሔር” ማለት በእጅጉ ይገባናል፡፡ ይህን ማድረግ በራሱ የቸር እረኛነት ማሳያ መነጽር ነው፡፡ ይህን ስንል በግጭትና በጭቅጭቅ ከሚገኝ ትርፍ ይልቅ በይቅርታና በሰላም የሚያጋጥም ኪሣራ/ ካለም/ የበለጠ ትርፋማ መሆኑን ስለምናምን የበለጠም መንፈሳዊ ፍሬ እንደሚገኝ ለሁላችንም ግልጽ ነው፡፡

 

እንደነዚህ ዓይነቶችን የዕርቀ ሰላም ማውረጃ መንፈሳዊ እሴቶች ወደ ጎን በመግፋታችን አንዲቷ ቅድስት ቤተ ክርስቲያናችን ከተፈጥሮአዊ ባሕርይዋ ውጭ ተከፈለች መባሉ በራሱ አንገት አስደፊ መርዶ ነው፡፡

 

ከዚህ አኳያ ቅድስት ቤተ ክርስቲያናችን በብዙ ምክንያቶች ላለፉት ሁለት ዐሥርት ዓመታት በአንድነቷ፣ በአገልግሎቷ፣ በሥርዐቷና በቀኖናዋ ላይ ጥቂት የማይባሉ ችግሮቹ በዚሁ እንዲቀጥሉ ከፈቀድንላቸው አሁን ከምንገኝበት የበለጠና የከፋ ችግር ተሸክመው ሊመጡ እንደሚችሉ መገመቱን ቀላል ያደርገዋል፡፡

 

በተለይም ቅድስት ቤተ ክርስቲያንን “ስደተኛ ሲኖዶስ” እና “የአገር ቤቱ ሲኖዶስ” በማለት የነገር ብልት ለሚያወጡ አፅራረ ቤተ ክርስቲያን ጀርባዋን ለግርፋት አመቻችታ እንድትሰጥ ማድረግ ነውና ዕርቀ ሰላሙን ማስቀደም የሁላችንም ተግባር ሊሆን ያስፈልጋል፡፡ እንዲህ መሆኑ ደግሞ በመንፈሳዊነትና በአሳታፊነት እናከናውነዋለን ለምንለው የፓትርያርክ ምርጫውም ሆነ ለተቋማዊ ለውጥ የተመቻቸና የተሻለ መንገድ እንደሚሆን እናምናለን፡፡

 

በይበልጥ ጉዳዩ የሚመለከታቸው ብፁዓን አበው የአንድነቱን ሁለንተናዊ ጥቅም በመመልከትና የዕርቀ ሰላሙ ድርድር ውጤት አልባነት ክትያዎች በምእመኑ መካከል የሚያስከትሉትን ጉዳቶች በማስተዋል ለዕርቀ ሰላሙ ቅድሚያ ሊሰጡ ይገባል፡፡

 

አንድ ቦታ ላይ አቁመን የትናንቱን የውዝግብ አጀንዳ እንዝጋው፡፡ መቃቃርና መገፋፋት በተጠናወተው መንፈስ ስለትናንት ጥፋት ብቻ መነጋገር አቁመን ስለ ነገም የቤተ ክርስቲያን ዕድገት እንምከር፡፡ ትናንት በታሪክ አጋጣሚ ብንቀያየምም ዛሬ ግን በዕርቀ ሰላም በአንድነት መጓዝ እንችላለን፡፡ ይህም ሊሆን የሚችለው ነገ ዛሬ ሳንል በጨዋነትና በግልጽ ተወያይተን፣ ችግሮቻችንን ለይተን ስለ ሰላም ይቅር ስንባባል ብቻ መሆኑን ከአባቶቻችን ይሰወራል ብለን አናምንም፡፡

 

ከይቅርታና ከይቅር ባይነት የበለጠ ነገር በቅዱሳት መጻሕፍትም ሆነ በቤተ ክርስቲያናችን ትውፊት ስለሌሉና ስለማይኖሩ ለዕርቀ ሰላሙ ድርድር ውጤታማነት ትኩረት ሰጥተው ቢሠሩበት እንላለን፡፡

 

ማኅበረ ካህናትና ማኅበረ ምእመናንም እስከአሁን እየተከናወነ ያለውን በጎ ተግባር በመደገፍ ለወደፊቱም ለቤተ ክርስቲያናችንና ለምእመናን አንድነትና ሰላም በጸሎት መበርታት ይገባናል፡፡ የተጀመረው የዕርቀ ሰላም ድርድር ከውጤት እንዲደርስ የድርሻቸውን እያበረከቱ የሚገኙ በሁለቱም በኩል ያሉትን ተደራዳሪ አባቶች፣ አደራዳሪ ሽማግሌዎችና የተለያዩ ግለሰቦችን በምንችለው ሁሉ ልንደግፋቸው ይገባል፡፡

 

በወንጌል እንደተጻፈው ሰላምን የሚያደርጉ ብፁዓን፣ ንዑዳን ናቸው መባሉ ሁላችንንም የሚመለከት የበጎ ተግባር ምስክርነት ስለሆነ ለዕርቀ ሰላሙ ድርድር ውጤታማነት የድርሻችንን ልንወጣ ያስፈልሪጋል እንላለን፡፡

ወስብሐት ለእግዚአብሔር

  • ምንጭ፡- ጽምዐ ጽድቅ ጋዜጣ 20ኛ ዓመት ቁ.8 2005 ዓ.ም.

አስቀድመህ ከወንድምህ ጋር ታረቅ /ማቴ. 5፥24/

ታኅሣሥ 10 ቀን 2005 ዓ.ም.

  • ለቤተ ክርስቲያናችን አገልግሎት ስኬት የአባቶቻችን ስምምነት ወሳኝ ነው

ብፁዕ ወቅዱስ አቡነ ጳውሎስ በሥጋ ሕይወት በነበሩበት ባለፉት ዓመታት “ስደተኛ ሲኖዶስ” ተብሎ ከተጠራው በሰሜን አሜሪካ ከሚገኙ አባቶች ጋር ዕርቅ ለመፈጸም ጥረት ይደረግ እንደነበር ይታወቃል፡፡ ይሁን እንጂ ተጨባጭ ለውጥ መመዝገብ ሳይችል በእንጥልጥል እንዳለ ቅዱስነታቸው ዐረፉ፡፡

 

የእርሳቸው ዕረፍት ቀጣዩ የቤተ ክርስቲያኒቱ ፓትርያርክ ከመመረጣቸው በፊት በሰሜን አሜሪካ ከሚገኙ ተለይተው ከሚኖሩ አባቶች ጋር ውይይት ለመጀመር አስገዳጅ ሁኔታ አምጥቷል፡፡ ይህ እንዲታሰብ ግድ የሚያደርገውም ቀጣዩ ፓትርያርክ የሚሰየሙበት መንገድ ሁሉን የማያስማማ ከሆነ የነበረውን ልዩነት የሚያሰፋ ውዝግብ በዚህች ታሪካዊ ቤተ ክርስቲያን ውስጥ ሊያስከትል እንደሚችል ከወዲሁ መገመት ስለሚቻል ነው፡፡ ይህንን ከግምት አስገብቶ የወቅቱን አንገብጋቢነት ተረድቶ ወደ ዕርቅ የሚያደርስ ውይይት ማድረግ ደግሞ የቤተ ክርስቲያኒቱን ወሳኝ አገልግሎቶች በብቃትና በስፋት ለመስጠት፣ ጠንካራ መሠረትም ለመገንባት ስለሚያስችል ነው፡፡

 

በመሠረቱ ሲኖዶስ ከሐዋርያት ዘመን ጀምሮ በጉልህ የተገለጠ ተግባሩ መለያየቶችን መፍታት ዘመኑን የዋጀ የአገልግሎት አሰጣጥ ሥርዓት መትከል ነው፡፡ ስለዚህ ሲኖዶስ ሲታሰብ ሰላምና አንድነት ይታሰባሉ፡፡ ትሕትናና ፍቅር ይነግሣሉ፡፡ ይህ የሚሆንበት ዋናው ምክንያት ጌታችን መድኀኒታችን ኢየሱስ ክርስቶስ የሰጠውን የሐዋርያዊ አገልግሎት አደራ መንጋውን የመጠበቅ ሓላፊነት ከመወጣት ሌላ ለሚሰበሰበው መንጋ አርአያነት ያለው ሕይወት አባቶቻችን እንዲኖራቸው፣ ብርሃናቸውም በዓለም እንዲያበራ ስለታዘዙም ነው፡፡

 

እነዚህ የክርስትና ዐበይት ተግባራት በአባቶቻችን ደግሞ ጎልተው እንዲገለጹ ይፈለጋል፡፡ አባቶች የክርስቶስን መልክ /እርሱን መምሰልን/ እንደያዙ በሚያስበው የእግዚአብሔር መንጋ፣ እንዲሁም የምድር ጨው ሆነን ሕይወታቸውን ለማጣፈጥ እንድንበቃ አደራ በተሰጡን የምድር አሕዛብ ሁሉ ላይ በጎ ተፅዕኖ ለማሳረፍ ብፁዓን አባቶች መልካሙን ጎዳና ሁሉ ሲከተሉ መገኘታቸው ታላቅ ሚና አለው፡፡

 

ከዚህ ጎዳና ወጥተን ፍቅርን በማጣት፣ በጠብ በክርክር ጸንተን ብንገኝ ፍቅር ከሆነ እግዚአብሔር ጋር ለመኖር ባለመፍቀዳችን ብቻ ሳይሆን ሌሎች ከእርሱ ጋር እንዳይኖሩ ማሰናከያ በመሆናችንም ጭምር ያዝናል፤ ይፈርዳል፡፡ ስለዚህ ለብፁዐን አባቶች ብቻ ሳይሆን በክርስቲያኖች ሕይወትም በፍቅር ጸንቶ መኖር፣ ከበደልንም በይቅርታና በዕርቅ ሕይወት ውስጥ ማለፍ ሃይማኖታዊ ግዴታ ነው፡፡ የዚህ ሕይወት መሠረቱ ከሞት ወደ ሕይወት የተሸጋገርንበት እግዚአብሔር ከእኛ ጋር ያደረገው ዕርቅ ነው፡፡ ጠላቶቹ ከሆነው ከእኛ ጋር እግዚአብሔር ታረቀ መባሉ የሕይወታችን መሠረት ፍቅር መሆኑን የሚያመለክት ነው፡፡ ስለ ዕርቅ ሕይወት በብዙ ምሳሌና በብዙ ኃይለ ቃል ራሱ ጌታችን መድኀኒታችን ኢየሱስ ክርስቶስ ያስተማረንም በመሆኑ በጉልሕ በሕይወታችን መንጸባረቅ የሚገባው የጽድቅ ሥራ ነው፡፡

 

ለእግዚአብሔር ከምናቀርበው ከየትኛውም ዓይነት መባዕ አገልግሎታችን በፊት ከወንድሞቻችን መታረቅ እንደሚገባ ጌታችን አበክሮ ያስተማረው የሕይወት ቃል ነው፡፡ “አስቀድመህም ከወንድምህ ጋር ታረቅ” ያለው የጌታ ቃል ይልቁንም በቤተ መቅደሱ ዕለት ዕለት መሥዋዕት ለሚያቀርቡ፣ ብዙዎችን በጸጋ እግዚአብሔር ባዕለ ጸጋ ለሚያደርጉ፣ ምስጢራትንም ሁሉ ለሚፈጽሙ፣ የሃይማኖትና የሥነ ምግባር ምልክት ለሆኑ ከሁለቱም ወገን ላሉ ብፁዐን አባቶች የሚያስተምሩት ብቻ ሳይሆን ዘወትር እንዲኖሩት የሚጠበቅ ክርስቲያናዊ ሕይወት ነው፡፡

 

ይህ በመሆኑም በኢትዮጵያ ኦርቶዶክስ ተዋሕዶ ቤተ ክርስቲያን አባቶች መካከል “ክርክርና መለያየት አለ” መባሉ ሳይሆን ክርክሩን መፍታት፣ ልዩነትን ወደ አንድነት ስምምነት ማምጣት አለመቻል ከላይ የጠቀስነውን ወሳኝ የሕይወት ቃል የሚፈታተን ይሆናል ማለት ነው፡፡ ከዚያም አልፎ ቤተ ክርስቲያኒቱን ለመምራት ባለን አቅምና በጎ ፈቃድ ላይ ጥያቄ የሚያሥነሣ ይሆናል፡፡ በዚህ የማይደሰተው እግዚአብሔርም ብቻ አይደለም፡፡ ከሕፃን እስከ አዋቂ ያሉ የክርስቶስ ቤተሰቦችም ናቸው፡፡

 

ስለዚህ ቤተ ክርስቲያናችንን ወደ አንድነት የሚያመጣ ዕርቀ ሰላም መፈጸም ከሃይማኖታዊ ሥነ ምግባር አንጻር፣ ለቤተ ክርስቲያን ደኅንነት ከማሰብ አንጻር፣ መንጋውን ከማነጽና ሐዋርያዊ አገልግሎትን ከማቅናት አንጻር ለአባቶቻችን ግዴታ ይሆንባቸዋል፡፡ የሚፈለገው ዕርቀ ሰላም እውን እንዲሆንም ለእግዚአብሔር ፈቃድ፣ ለእውነት፣ ለኅሊና ምስክርነት መገዛት አግባብ ይሆናል፡፡

 

ከዚህ በፊትም ማኅበረ ቅዱሳን እንዳስገነዘበው አባቶች ሰላሙን ለማምጣት የሚያስችሉ ቀኖናዊ ጉዳዮችም ላይ ለመወሰን ለማጽናትም መንፈሳዊ ሥልጣንን የተጎናጸፉ በመሆናቸው ዕንቅፋትን ማራቅ ይችላሉ፡፡ የዕርቅ ሒደቱ ሲፈጸምም ሃይማኖታዊ መልክ ያጡ እና የኢትዮጵያ ኦርቶዶክስ ተዋሕዶ ቤተ ክርስቲያን ሊቃውንትና ምእመናንን የማያሳምኑ ቅድመ ሁኔታዎችን ከመደርደር መታቀበ ከተቻለ በተስፋ የተሞላ ሒደት እንደሚሆን ይታመናል፡፡

 

ከማንምና ከምንም በላይ የቤተ ክርስቲያናችንን ቤተሰብ ማሳመን የማያስችሉ እርምጃዎች ውስጥ መግባት ተአማኒነትን ሊያሳጡ ይችላሉ፡፡ ለዓመታት የዘለቀውን መለያየት /ውዝግብ/ ለመፍታት በሚደረገው ጥረት ውስጥም የካህናቱ የሰንበት ትምህርት ቤቶች የአገልግሎት ማኅበራትና በአጠቃላይ የሕዝበ ክርስቲያኑ ሐሳብና አስተያየቶች ከግምት የሚገቡበት አካሔድ ሊኖር ይገባል፡፡ ሕዝበ ክርስቲያኑ ካልተሰማ በቀጣዩ ጊዜ በቤተ ክርስቲያናችን አስተዳደር አካላት ላይ የሚኖረው አመኔታ ይላላል፡፡ በመሆኑም በዚህ በዕርቁ ሒደት ክርስቲያኖች ያላቸው ሐሳብ ሊመረመር ይገባል፡፡ ስለዚህ ሁሉም የሃይማኖት ቤተሰብ ደስ የሚሰኝበት ምዕራፍ ላይ ለመድረስ መትጋት ከአባቶቻችን ይጠበቃል፡፡

 

ስለዚህም ሊቃውንተ ቤተ ክርስቲያን ለሰላሙ መስፈን አስፈላጊ የሆነ ዋጋ እንዲከፈል ግፊት በማድረግ ሊረባረቡ ይገባል፡፡ ምእመናንም ከካህናት አባቶች ጋር በጸሎት በመትጋት ለዚህ ችግር ዘላቂ መፍትሔ እግዚአብሔር እንዲሰጠን መማጸን ይገባናል፡፡ የተጀመሩትን ሒደቶች ሁሉ በእውነተኛነት በሚዛናዊነት እየተከታተሉ በጎ ተጽዕኖ ማሳደር ይገባናል፡፡ ቤተ ክርስቲያን ያሳለፈችው ያለፉት ዓመታት ኣሳዘኝ ሁኔታዎች እንዳይቀጥሉ ዛሬ ላይ ማድረግ የሚገባንን ሁሉ ማድረግ እንደሚገባን ማኅበረ ቅዱሳን ያምናል፡፡ ለዚህም ይሠራል፡፡

ወስብሐት ለእግዚአብሔር

 

  • ምንጭ፡- ሐመር መጽሔት 20ኛ ዓመት ቁጥር 8 ታኅሣሥ 2005 ዓ.ም.

ገዳሞቻችንን ለሁሉ ዓቀፍ ልማት አናዘጋጃቸው፡፡

ታኅሣሥ 5 ቀን 2005 ዓ.ም.

 

የኢትዮጵያ ኦርቶዶክስ ተዋሕዶ ቤተ ክርስቲያን የበርካታ ገዳማት ባለቤት ነች፡፡ በፈቃደ እግዚአብሔር ከ5ተኛው መቶ ክፍለ ዘመን ጀምሮ በመላው ሀገሪቱ እየተስፋፉና እያደጉ የመጡት እነዚሁ ገዳማት የምናኔና የጸሎት እንዲሁም ድኀነተ ሥጋ ወነፍስ የሚገኝባቸው ቦታዎች ናቸው፡፡ ለቤተ ክርስቲያናችን ዘርፈ ብዙ አገልግሎት ከመስጠት ጎን ለጎን የሊቃውንት መፍለቂያና የበርካታ ቅዱሳን ምንጭ በመሆንም ሲያገለግሉ እንደኖሩ ይታወቃል፡፡ በሀገሪቱ ፖለቲካዊ፣ ኢኮኖሚያዊና ማኀበራዊ እንቅስቃሴዎች ውስጥ አዎንታዊ ተፅዕኖ ከመፍጠራቸውም በላይ የሀገሪቱ የትምህርትና የሥልጣኔ ማእከላት በመሆን አገልግለዋል፡፡

 

የብዝኀ ሕይወት መገኛና መጠበቂያ ማእከላት መሆናቸው በተጨባጭ የሚታይ ሲሆን ለሥጋም ለነፍስም ስንቅ የሆኑ ትምህርቶች መቅሰሚያ ሕያዋን ትምህርት ቤቶች ሆነው ይገኛሉ፡፡ ለኪነ ጥበብና ሥነ ጽሑፍ ዕድገት መሠረት ከመሆናቸውም በተጨማሪ ለኢትዮጵያ ሁለንተናዊ ብልጽግና በቱሪስት መስህብነትና በምጣኔ ሀብት ምንጭነት ከፍተኛ አስተዋጽኦ እያደረጉ እንደሚገኙ መላው ዓለም የሚያውቀው እውነታ ነው፡፡

 

ይህ በዚህ እንዳለ የኢትዮጵያ ኦርቶዶክስ ተዋሕዶ ቤተ ክርስቲያን ገዳማት በተለያዩ አዝማናት በሀገሪቱና በቤተ ክርስቲያኒቱ ላይ በደረሱ ውጪያዊና ውስጣዊ የጥፋት ዘመቻዎች ቀጥተኛ ተጠቂዎችም ነበሩ፡፡ ተፈጥሮአዊ በሆኑ ችግሮችም እንደየአካባቢው መልክአ ምድራዊ አቀማመጥ ተጋላጭ ሆነው ኖረዋል፡፡ አጽራረ ቤተ ክርስቲያንም በየጊዜው በተለያየ ስልት የገዳማውያኑን አኗኗር፣ ሥርዓትና ትውፊት ለመበረዝ ሲንቀሳቀሱና ገዳማቱን ሲዋጉ እንደኖሩ ግልጽ ነው፡፡

 

በእኛ ዘመንም ገዳማቱ በሀገሪቱ ሕዝብና መንግሥት የነበራቸውን መልካም ስምና ታሪክ ለማደብዘዝ እያበረከቱት ያለውን መንፈሳዊና ሀገራዊ አስተዋፅኦ ወደጎን በማለት በረቀቀ ስልት በኢትዮጵያ ገዳማት ላይ ዘርፈ ብዙ ዘመቻ እንደተከፈተባቸውም እንገነዘባለን፡፡ ከዘመቻውም በተጻራሪ የዘመኑን ችግር በዘመኑ ጥበብና ዕውቀት እየፈቱ እግዚአብሔር በሰጣቸው ጸጋ ሁሉ አገልግለው በክብር ያረፉ መንፈሳውያን አርበኞች ቁጥር ቀላል አልነበረም፡፡ ቤተ ክርስቲያናችን ከጥንት ጀምሮ ይልቁንም በወሳኝና አስቸጋሪ ወቅቶች እግዚአብሔር እያነሣሣ ሥራ የሠራባቸውንና የሚሠራባቸውን አባቶች፣ እናቶችና ተተኪ ልጆች ያጣችበት ጊዜ እንደሌለም በሚገባ እንረዳለን፡፡

 

በዘመነ ሉላዊነት ዓለማዊነት በገነነበት በዚህ እጅግ አስቸጋሪ ወቅት የገዳሞቻችን ተግዳሮቶችም የዚያኑ ያህል የረቀቁ፣ በቀላሉ ለመለየት የሚያስቸግሩና የተወሳሰቡ እንደሚሆኑ እሙን ነው፡፡ ከዚሁ አንጻር የመንፈሳዊ ሕይወት፣ የመልካም ሥነ ምግባራት፣ የልማት፣ የትምህርትና የዕድገት መሠረትነታቸውንና ማእከልነታቸውን ጠብቆ ለማስቀጠል፣ ብሎም ይህን ገዳማዊ እሴት አጥተው በስም ብቻ የሚጠሩትን ገዳሞቻችንን ስምና ግብራቸው የተጣጣመ እንዲሆን ለማድረግ የዚያኑ ያህል በአግባቡ የታሰበበት፣ የተደራጀ፣ በዕቅድ የሚመራ፣ ሁሉንም ባለድርሻ አካላት ያሳተፈ፣ በየደረጃው ያሉ ወገኖችን ተጠቃሚነት ያረጋገጠና ቀጣይነት ያለው ተግባር ለማከናወን ቆርጦ መነሣት ጊዜው የሚጠይቀው ሰማዕትነት እንደሆነ እናምናለን፡፡

 

ከዚህ አንጻር በገዳማት ዙሪያ ከቅዱስ ሲኖዶስ ጀምሮ በተዋረድ ባሉ የቤተ ክርስቲያናችን መዋቅር ሥር ያሉ የቤተ ክርስቲያን አባቶችና ምእመናን በተደራጀ መንገድም ሆነ በተናጠል ያደረጉት፣ እያደረጉት ያለውና ለማድረግ ያቀዷቸው በርካታ ተግባራት የሚያስመሰግኑ ቢሆኑም ከችግሩ ስፋት፣ ግዝፈትና ጥልቀት አኳያ ሲታይ ደግሞ በቂ ሥራ ሠርተናል የሚያሰኝ አለመሆኑን መረዳት ያስፈልጋል፡፡

 

እናም ዕውቀታችንን፣ ሙያችንን፣ ጉልበታችንንና ገንዘባችንን ከምንም በላይ ደግሞ በጎ ፈቃዳችንንና ጊዜያችንን አቀናጅተን በዘመናት ርዝመት በገዳሞቻችን ላይ የሚታዩትን ተጨባጭ ችግሮች ለመቅረፍ ረጅምና አድካሚውን ጉዞ በጋራ መጀመር ይጠበቅብናል እንላለን፡፡ ይህን ስንል ደግሞ በአንድ ጊዜ የገዳማቱን ችግሮች ሁሉ ማስወገድ ይቻላል በማለት ሳይሆን፤ ቅድሚያ የሚሰጣቸውን እየመረጡ በተለይ ወሳኝ ችግሮች ላይ ስልታዊ በሆነ መንገድ እያነጣጠሩ ተራ በተራ መፍትሔ እንዲያገኙ ማድረግ ያስፈልጋል ማለታችን እንደሆነ መገንዘብ ይገባል፡፡ ገዳማቱም ከጸሎቱ፣ ከውስጥ አገልግሎቱና ከትህርምቱ (ከተጋደሎው) ጎን ለጎን ዘመኑን እየዋጁ ምእመናንን ከኋላቸው አሰልፈው የበረከተ ሥጋ ወነፍስ ተቋዳሽ ለማድረግ የፊት አውራሪነቱን ድርሻ መወጣት ይጠበቅባቸዋል፡፡

 

በዚህ ረገድ ከኢትዮጵያ ኦርቶዶክስ ተዋሕዶ ቤተ ክርስቲያን ታላላቅ ገዳማት አንዱ የሆነው ታላቁና ታሪካዊው የደብረ ሊባኖስ ገዳም ለቤተ ክርስቲያን፣ ለሀገርና ለወገን ጠቃሚ የሆኑና የገዳሙን መንፈሳዊ እሴት የሚያስጠብቁ ሰፋፊ ፕሮጀክቶችን አስቀርፆ ለተግባራዊነቱ እየተንቀሳቀሰ መሆኑ በእጅጉ የሚያስደስት ጅምር ሥራ ነው፡፡ ይህም ድርጊት ገዳሙን በአርአያነት የሚያስጠቅሰው ከመሆኑም በላይ በአረንጓዴ ልማትና በብዝኃ ሕይወት ጥበቃም (ሀገሪቱ ከምታራምደው ፖሊሲ ጋር የተዛመደ ሆኖ ቦታውን በዚህ ዘርፍ) ከሀገሪቱ ተመራጭ ቦታዎች አንዱ እንደሚያደርገው ጽኑ እምነታችን ነው፡፡

 

ከማኅበረ ቅዱሳን ጋር በመተባበር ኅዳር 9 ቀን 2005 ዓ.ም በተዘጋጀው የምክክር መርሐ ግብር ላይ ገዳሙ ይፋ ያደረጋቸው ሰፋፊ ፕሮጀክቶች የገዳሙን ዘርፈ ብዙ ችግሮች ከመፍታት አንጻር ታላቅ ተስፋ ተጥሎባቸዋል፡፡ በየገዳማቱና በየአብነት ትምህርት ቤቶቹ የተጀመሩ የመታደግና የማልማት ፕሮጀክቶች እየቀጠሉ እንዲህ ያለውን መጠነ ሰፊ ፕሮጀክት ከማስፈጸም አንጻር ከገዳሙ ጋር አብሮ መሰለፍ ጊዜ ሊሰጠው የማይገባ ሥራ ነው እንላለን፡፡ በቀጣይም በየአህጉረ ስብከቱ ለሌሎች ገዳማትና አድባራት ምሳሌ የሚሆኑ ቢያንስ አንዳንድ ገዳማትን በቤተ ክርስቲያናችን ሥርዓትና ደንብ መሠረት ማደራጀት፣ ማልማትና በሁለንተናዊ ዘርፍ ማብቃት ይዋል ይደር የማይባል ጉዳይ እንደሆነም እናምናለን፡፡

 

በጻድቁ አባታችን አቡነ ተክለሃይማኖት ገዳም የኖሩትንና አሁንም ያሉትን ችግሮች በቅደም ተከተል ለመፍታትና ገዳሙን ለመታደግ በመንፈሳውያን አባቶቻችንና በቤተ ክርስቲያኒቱ ባለሙያ ልጆች «ብዝኃ ሕይወትና ሁሉን ዐቀፍ መሪ ዕቅድ» በሚል ስያሜ መጠነ ሰፊ ፕሮጀክት መዘጋጀቱ ተገቢ ነው፡፡ በዚህ መሪ ዕቅድ የገዳሙን ብዝኃ ሕይወት ባሕላዊ አጠባበቅ ማጥናት፣ መጠበቅና ለቱሪዝም ያለውን ዋጋ ማስተዋወቅ፣ ለገዳሙ ማኅበረሰብ አማራጭ የኀይል አጠቃቀም አሳብ ማቅረብ፣ የተደራጀና የተቀናጀ የገዳም አስተዳደርን ማጠናከር፣ ገዳሙን ለምናኔ ሕይወት አመቺና ተመራጭ የሚያደርጉና የመሳሰሉት ተግባራት ተካተውበት የቀረበ መሆኑ መልካም ነው፡፡ ይህ መሪ ዕቅድ ወደ ተግባር ሲተረጎም የሚያስጠብቀው የገዳሙን ጥቅም ብቻ ሳይሆን የኢትዮጵያ ኦርቶዶክስ ተዋሕዶ ቤተ ክርስቲያንና የመላው ሀገሪቱን ብሎም የአህጉሪቱንና የዓለምን ጥቅም ጭምር መሆኑን በቅድሚያ መገንዘብ ያስፈልጋል፡፡ መሪ ዕቅዱ በሥራ ተተርጉሞ የታሰበውን ሁሉ ዐቀፍ ጠቀሜታ ያስገኝ ዘንድም የሚመለከታቸው የቤተ ክርስቲያኒቱ፣ የመንግሥትና መንግሥታዊ ያልሆኑ አካላት እንዲሁም መላው የቤተ ክርስቲያን ልጆች ሁሉ ቀርቦ በማየትና በመረዳት የድርሻችንን ለመወጣት በቁርጠኝነት ልንነሣ ያስፈልጋል፡፡

 

ማኅበረ ቅዱሳንም እንደ ቤተ ክርስቲያን አካልነቱ በቅዱሳት መካናት ልማትና ማኅበራዊ አገልግሎት ዋና ክፍል አማካኝነት ባለፉት 10 ዓመታት ባካሄዳቸው ጥናቶች መሠረት የተለያዩ ፕሮጀክቶችን ቀርፆ በ105 ገዳማት እንደየችግሮቻቸው ዓይነትና መጠን እያየ ለአብነት ትምህርት ቤች የመማሪያና የመኖሪያ ግንባታ፣ የንጹሕ መጠጥ ውኃ አቅርቦት፣ የዕደ ጥበብ ማእከላት ግንባታና ሥልጠና እንዲሁም የወፍጮ አገልግሎት እንዲያገኙ አድርጓል፡፡ በእርሻ ፕሮጀክት ዘርፍም የንብ ማነብ፣ የወተት ከብት እርባታ፣ የከብት ማድለብ፣ የዶሮ ዕርባታና የመስኖ አገልግሎትን በሳይንሳዊና ዘመናዊ መንገድ እንዲጠቀሙና ምርታማነትን በማሳደግ ራሳቸውን ችለው ለሌሎችም እንዲተርፉ ለማድረግ የበኩሉን ሲወጣ ቆይቷል፡፡ ለተለያዩ ገዳማትና የአብነት ትምህርት ቤቶች ስምንት ፕሮጀክቶች በአሁኑ ወቅት በመተግበር ላይ ሲሆኑ ጥናታቸው ያለቀላቸው ዘጠኝ ፕሮጀክቶችን ደግሞ የበጎ አድራጊ ማኅበራትንና ምእመናንን ድጋፍ በመጠባበቅ ላይ ይገኛሉ፡፡ ማኅበራችን እየተገበራቸው ያሉትንና የሚተገብራቸውን ቀጣይ ሥራዎች ሳያጓድል በሙያ አገልግሎትና አቅም ማጎልበቻ ዋና ክፍል በኩል ከገዳሙ አስተዳደር ጋር ያጠናውን ይህን ሰፊ ሥራ ለመጀመርና ከዳር ለማድረስ የልጅነቱን ድርሻ የሚወጣ መሆኑን በዚህ አጋጣሚ ይገልጻል፡፡

 

ስለዚህ የኢትዮጵያ ኦርቶዶክስ ተዋሕዶ ቤተ ክርስቲያን ገዳማት ሰው ሠራሽና ተፈጥሮአዊ ችግሮች በሂደት እየተቀረፉ የልማት፣ የትምህርት፣ የመንፈሳዊ ሕይወት፣ የምናኔና የመልካም ሥነ ምግባራት ማእከልነታቸው እንዲጠበቅ ከማድረግ አኳያ ከልሂቅ እስከ ደቂቅ ሁላችንም በመንፈሳዊ ቅንዓት መረባረብ አለብን፡፡ ይህን ማድረግ የምንችል ከሆነ የጸሎት፣ የዕውቀትና የበረከት ምንጭ ከሆኑት ገዳሞቻችን ሀገሪቱም ሆነች ሕዝቦቿ ተጠቃሚዎች እንሆናለን፡፡ የኢትዮጵያን ቀደምት ታሪክ በማስተዋወቅ የጽሑፍና ታሪካዊ፤ የሚዳሰሱና የማይዳሰሱ ቅርሶች ተጠብቀው እንዲቆዩ ከማድረግ አንጻርም የሚያበረክቱትን አስተዋጽኦ ዘላቂና አስተማማኝ ማድረግ እንችላለን፡፡ በቱሪዝም ኢንዱስትሪው ከሚያስገኙት የማይነጥፍ ገቢ ጎን ለጎን በእርሻና በዕደ ጥበብ ምርታቸው የሀገሪቱን አጠቃላይ ዕድገት ደግፈው በምግብ ራስን የመቻል መርሐ ግብር ዕውን ከማድረግ አንጻር የበኩላቸውን ድርሻ እንዲወጡ እናግዛቸዋለን፡፡ ገዳማቱ ጧሪ ቀባሪ ለሌላቸው ወገኖቻችንና ለዕጓለማውታ ሕፃናት የሚሰጡትን አገልግሎት ለማቀላጠፍና ቅዱሳን አባቶቻችን የደነገጉት /የሠሩት/ ሥርዐተ ገዳም በሚመለከታቸው ሁሉ በአግባቡ እንዲፈጸም ለማስቻል ሁለንተናዊ አቅማቸውን በተቀረፁና በሚቀረፁ ፕሮጀክቶች አማካኝነት እንዲያሳድጉ መደገፍ ከሁላችንም የሚጠበቅ መንፈሳዊ ግዴታ ነው እንላለን፡፡

 

  • ምንጭ፡- ጽምዐ ጽድቅ 20ኛ ዓመት ቁጥር 6 ከታኅሣሥ 1-15 ቀን 2005 ዓ.ም.

በእኛ ዘመን ምንጮቻችን እንዳይነጥፉ

ኅዳር  17 ቀን 2005 ዓ.ም.


የቅድስት ቤተ ክርስቲያን ዘርፈ ብዙ መንፈሳዊ አገልግሎት መሠረት የሆኑት፤ የአባቶች ካህናት፣ ሊቃውንት መምህራን፣ ጳጳሳት የአገልጋዮቿ መፍለቂያ፤ ለዘመናት የማይነጥፉ ምንጮች ሆነው የኖሩት አብነት ትምህርት ቤቶቻችን፤ በዚህ ዘመንና ትውልድ ህልውናቸውን ጥያቄ ውስጥ ያስገባ ፈተና እንደተጋረጠባቸው የዐደባባይ ምስጢር ከሆነ ቆይቷል፡፡

 

ከቅዱስ ሲኖዶስ ጀምሮ የሚመለከታቸው የቤተ ክርስቲያን አካላት እንዲሁም ቅን አሳቢ እውነተኛ ልጆቿ ሁሉ ለጉዳዩ ትኩረት ሰጥተው የተግባራዊ መፍትሔው አካል በመሆን ሲንቀሳቀሱም ይታያል፡፡

 

እንዲህም ሆኖ ግን ከጊዜ ወደ ጊዜ ችግሩ እየተደራረበ መጥቶ በወቅቱ መሠረታዊ ለውጥና የተሻለ እድገት የሚያስገኝ መፍትሔ ባለመሰጠቱ የአብነት ትምህርት ቤቶቻችን ፈተና ከፍቷል /ተባብሷል/፡፡

 

የትምህርት አሰጣጥ ሥርዓቱ ጊዜና አካባቢያዊ ሁኔታዎችን ከመንፈሳዊና ቁሳዊ ሀብቶች ጋር በማገናዘብ ዘመኑን የዋጀ እንዲሆን አለመደረጉ፤ በተቀላጠፈና ወጥ በሆነ መንገድ ተደራጅቶ አለመሰጠቱ፤ የአብነት ትምህርት ቤቶች አደረጃጀት የመማሪያ ክፍሎች፣ የትምህርቱ መርጃ መሣሪያዎች፣ መጻሕፍት ወዘተ በፍጹም አለመሟላታቸው፤ የሊቃውንት መምህራኑ የኑሮ ችግርና በቂ መተዳደሪያ ድጋፍ አለማግኘት፤ የደቀ መዛሙርቱ ለረኃብና ለዕርዛት መዳረግ፤ መጠለያ ማጣት፤ የጤና ክብካቤና ትምህርት የሚያገኙበትና በዝቅተኛ ደረጃም ቢሆን የሕክምና አገልግሎት አለመኖር፤ በአንጻሩ ደግሞ ይህንን ሁሉ ችግርና መከራ ተቋቁመው ለዓመታት ደክመው ከሊቃውንት መምህራን አባቶቻቸው የዕውቀት ማዕድ የቀሰሙትን ዕውቀትና ሙያ ለቤተ ክርስቱያኒቱ አገልግሎት የሚያውሉበት የሥራ ዋስትና ማጣታቸው ከሌሎችም ውጫዊ ተግዳሮቶች ጋር ሲደመር ለመማር ማስተማሩ ትልቅ ፈተና ስለሆነ ወዘተ…. አፋጣኝ ተግባራዊ መፍትሔ የሚፈልግ በቅድስት ቤተ ክርስቲያን የአብነት ትምህርት ሕልውናና ቀጣይነት ላይ የተደቀነ ገሐድ አደጋም ስጋትም ነው፡፡

 

ሁለንተናዊ ፈተናዎቹን በሚፈታ መልኩ መሠረታዊ መፍትሔ በአፋጣኝ ባይታይም፤ ይህንን ችግር በመቅረፍ የአብነት ትምህርት ቤቶቻችንን ከተደቀነባቸው አደጋ ለመታደግ ተስፋ ሰጪ ጥረቶች እየተደረጉ እንደሆነ ይታወቃል፡፡

 

ባለፈው የጥቅምት ወር 2005 ዓ.ም በተካሄደው የቅዱስ ሲኖዶስ ምልዓተ ጉባኤ፤ የአብነት ትምህርት ቤቶችን ለማጠናከር የተወሰነው የዐሥር ሚሊዮን ብር በጀት ለችግሩ የተሰጠውን ትኩረት የሚያመለክት፤ ለአስተማማኝ ቀጣይነቱም የተስፋ ብርሃን የሚፈነጥቅ ነው፡፡

 

ይህንን በድርሻው ለማጠናከር በማኅበረ ቅዱሳን የቅዱሳት መካናት ልማትና ማኅበራዊ አገልግሎት ዋና ክፍል አማካኝነት፤ “የጥንቱ ከሐዲሱ ጋር በደጃችሁ አለ” በሚል መሪ ቃል ኅዳር 2 ቀን 2005 ዓ.ም በጠቅላይ ቤተ ክህነት አዳራሽ ይፋ የሆነው፤ “አባ ጊዮርጊስ ዘጋስጫ የነጻ ትምህርትና ሥልጠና ዕድል” የአብነት ትምህርቱን ዘመኑን በዋጀ መልኩ በትውልዱ ቀጣይነት እንዲኖረው የሚያስችል መርሐ ግብር ነው፡፡

 

እንዲህ ዓይነቶቹ ተጠቃሽ የመፍትሔ እርምጃዎች ለቤተ ክርስቲያን የአብነት ትምህርት ቀጣይነት ዋስትና ሰጪ ጥረቶች ናቸው፡፡ አፈጻጸማቸውን በተመለከተም የተቀናጀ አሠራር፤ የቅርብ ክትትልና ቁርጠኛ አገልግሎት ይፈልጋሉ፡፡ ችግሩ እየከፋ ከመምጣቱ አኳያም ቀዳሚ ትኩረትና አፋጣኝ የተግባር ክንውን እንደሚያስፈልግ የታወቀ ነው፡፡

 

አብነት ትምህርት ቤቶች ወቅቱና ትውልዱን እንዲሁም አካባቢያዊ ሁኔታዎችን በማገናዘብ ከዘመናዊው ትምህርት ጋር ተቀናጅተው የሚያድጉበትና የሚቀጥሉበትን መፍትሔ መፈለግና በተግባር ማረጋገጥ ለነገ የሚባል ጉዳይ አይደለም፡፡

 

በተለይም በገጠሩ አካባቢ የሕዝቡ የኑሮ ሁኔታና ለአብነት ትምህርቱ ያለው አመለከካከት እየተለወጠ መምጣቱን ተከትሎ ለመምህራኑና ለተማሪዎቹ የሚያደርገው ድጋፍ መቅረት ዐቢይ ችግር ነው፡፡ ይህንን ችግር ተረድቶ መፍትሔ የሚሆኑ ተተኪ አሠራሮችን መቀየስና በአፋጣኝ ተግባራዊ ማድረግ የግድ ይላል፡፡ ደቀመዛሙርቱ የነገይቷን ቅድስት ቤተ ክርስቲያን አገልግሎት መስፋፋት ተስፋ አድርገው፤ ለዓመታት በችግርና መከራ ውስጥ እያለፉ በአብነት ትምህርቱ የቀሰሙትን ዕውቀትና ሙያ ይዘው ከተመረቁ በኋላ፤ በቤተ ክርስቲያን አገልግሎት ተመድበው መተዳደሪያ አግኝተው ቤተ ክርስቲያንንም የሚያገለግሉበት አስተማማኝ የሥራ ዋስትና ሊሰጣቸው ይገባል፡፡ ዓለም አቀፋዊውንና አካባቢያዊ ሁኔታዎችን የሚገነዘቡበት፣ ማኅበራዊና ኢኮኖሚያዊ አጠቃላይ ለውጦችን በማስተዋል በቀላሉ ተረድተው የሚያዘጋጁበትና በነገ አገልግሎታቸው የትውልድ መሪ የምእመናን አለኝታ ሆነው እንዲቀጥሉ የሚያስችሏቸውን ተጨማሪ ትምህርቶች የሚያገኙበትን መንገድ ማመቻቸትና ተግባራዊ ማድረግ አስፈላጊ ነው፡፡

 

የአብነት ት/ቤቶች ባልተስፋፉባቸው አህጉረ ስብከት የገጠርና ጠረፋማ አካባቢዎችም፤ የወቅቱን ተጨባጭ ሁኔታ ያገናዘቡና በሚገባ የተደራጁ የአብነት ትምህርት ቤቶችን ማቋቋም ያስፈልጋል፡፡ በየአካባቢው ቋንቋ ሊያስተምሩና ሊያገለግሉ የሚችሉ መምህራነ ወንጌልና አገልጋይ ካህናትን ማውጣት (ማፍራት) ቅድሚያ ከሚሰጣቸው ተግባራት አንዱ ነው፡፡

 

አለበለዚያ አገልጋይ ካህናትና መምህራነ ወንጌል በማጣት ከዕለት ወደ ዕለት የሚዘጉት በየገጠሩና በየበረሐው እንዲሁም በየጠረፉ የሚገኙ አብያተ ክርስቲያናት ቁጥር በከፍተኛ ፍጥነት እየጨመረ መምጣቱ አይቀርም፡፡ ከቤተ ክርስቲያን እቅፍ እየወጡ በሌሎች የሚነጠቁት ምእመናንም ቁጥር የዚያኑ ያህል እየጨመረ እነሱን ለመታደግ አስቸጋሪ ይሆናል፡፡

 

ተተኪ ሊቃውንተ ቤተ ክርስቲያን እያነሱ፣ በየገዳማቱ የሚያገለግሉ እውነተኛ መነኰሳት እየቀነሱ፤ ቅድስት ቤተ ክርስቲያንም በሁለንተናዊ መንፈሳዊ አገልግሎቷ እየተዳከመች፤ በማኅበራዊና ኢኮኖሚያዊ ዘርፍ የሚኖራት ተሳትፎ እየጠበበ፤ እስተዳደራዊ መዋቅሯና አሠራሯ ብቃት እያነሰው፤ ምእመናኗም በመንፈሳዊ ሕይወታቸው፣ በዕለት ተዕለት ኑሮአቸውና ማኅበራዊ ግንኙነታቸው የሚያበረታቸው፣ የሚመክራቸው፣ የሚከታተላቸው፣ የሚያጸናቸውና የሚያመላክታቸው እያጡ በዘመኑ ሥልጣኔ የባሕል ወረርሽኝ እየተዋጡ፣ ለማንነት ጥያቄያቸው ምላሽ እያጡ፣ ለሃይማኖታዊና ማኅበራዊ ቀውስ እየተዳረጉ ይመጣሉ፡፡ የዚህ ሁሉ ድምር ውጤት የሚያስከትለውን የከፋ ችግር ከወዲሁ ለመገንዘብ ከሁላችንም የሚሰወር እንዳል ሆነ ይታወቃል፡፡

 

ስለዚህ ዘርፈ ብዙ ለሆነው የቅድስት ቤተ ክርስቲያን መንፈሳዊ አገልግሎት መሠረት የሆኑት፤ የሊቃውንቱ፣ የጳጳሳቱ፣ የአገልጋይ ካህናቱ፣ የመምህ ራነ ወንጌሉ ሁሉ መፍለቂያ ምንጮች አብነት ትምህርት ቤቶቻችን በእኛ ዘመንና ትውልድ ሳይነጥፉ እንዲቀጥሉ በተጠናና ችግር ፈቺ በሆነ መንገድ ጥረት የሚያደርጉትን አካላት በሚቻለን ሁሉ በማገዝ ከሁላችንም ተጨባጭነት ያለው ተሳትፎ ይጠበቅብናል፡፡

 

ወስብሐት ለእግዚአብሔር

ቅድስት ቤተ ክርስቲያን በጎቿን ይዛ እንድትዘልቅ …

ጥቅምት 26 ቀን 2005 ዓ.ም.


በየዓመቱ በጥምቀት ወር በቅድስት ቤተ ክርስቲያን የአስተዳደርና ዘርፈ ብዙ አገልግሎት ላይ የሚመክረው አጠቃላይ የሰበካ መንፈሳዊ ጉባኤ ለሠላሳ አንደኛ ጊዜ ተካሂዷል፡፡ በዚህ ጉባኤ ላይ የእናት ቤተ ክርስቲያናቸውን የአገልግሎት ጥሪ የተቀበሉ ምሁራን ልጆቿ፤ በልዩ ልዩ ርእሰ ጉዳዮች ላይ ያተኮሩ ጥናት ጽሑፎቻቸውን አቅርበው ውይይት ተደርጎባቸዋል፡፡ በእንደዚህ ዓይነቱ ታላቅ ጉባኤ ላይ፤ ለቅድስት ቤተ ክርስቲያን ሁለንታዊ አገልግሎት መቃናት የሚበጁ፣ በየሙያ ዘርፉ ዕውቀትና ልምድ ባካበቱ ምሁራን ልጆቿ የሚቀርቡ የጥናት ጽሑፎችና የሚካሄዱ ውይይቶች፤ እናት ቤተ ክርስቲያን ትውልዱን ይዛ ዘመኑን እየዋጀች ጸንታ እንድትቀጥል በማድረግ ረገድ ጠቀሜታቸው የጎላ ነው፡፡

 

በቅድስት ቤተ ክርስቲያን የአገልግሎት ዘርፎች የተቀላጠፈና ዘመናዊ የአስተዳደር መዋቅርና አሠራር እንዲኖር ማድረግ ወቅቱም ሆነ ትውልዱ የሚጠይቀው ጉዳይ ነው፡፡ በዕቅድ ላይ የተመሠረተ በሪፖርትና ትክክለኛ ክትትል ባልተለየው ግምገማ የተደገፈ፣ ሓላፊነትና ተጠያቂነት ያለበት ማእከላዊ የፋይናንስ አስተዳ ደር ሥርዐት እንዲሰፍን ተጨባጭ ጥረት ያስፈልጋል፡፡ ቤተ ክርስቲያኒቷ መንፈሳዊ ፍርድ ቤቷ ተጠናክሮ አስተዳደሯ፣ ሥርዐተ ከህነቷም ሆነ ሁለንተናዊ አገልግሎቷን የሚመለከቱ እንዲሁም የምእመናን መንፈሳዊ ጉዳ ዮች የሚዳኙበት አስተምህሮና ቀኖናዋን የጠበቀ መንፈሳዊ የፍትሕ ሥርዓት ተግባራዊ እንዲሆን ማድረግ ችላ የሚባልበት ወቅት አይደለም፡፡

 

ከሐዋርያዊ ተልእኮዋ ባሻገር በማኅበራዊ አገልግሎቷም የበለጠ እንድትሠራ፤ በልማት ሥራ እንድትበለጽግ፣ ገዳማቷና አድባራቷ በገቢ ራሳቸውን ችለው ከልመና እንዲላቀቁ በማድረግ ረገድ ከፍተኛ ሥራ ይጠበቅባታል፡፡ በእነዚህ ሁሉ መስኮች ቅድስት ቤተ ክርስቲያን ምሁራን ልጆቿን በማሳተፍ በጥናትና ምርምር የተደገፈ ውጤታማ ሥራ ለመሥራት ቀዳሚ ትኩረት መስጠት እንዲሁም ሁኔታዎችን ማመቻቸትና የበለጠ ጥረት ማድረግ አለባት፡፡

 

አጠቃላይ ሰበካ መንፈሳዊ ጉባኤ ያለው ታላቅ መድረክ፤ በተራዘመ ሪፖርትና በተደጋገመ መልእክት የሚባክነው ጊዜ፤ በዓመት አንድ ጊዜ ከሚገኘው ጉባኤ ለቤተ ክርስቲያን የሚበጅ አሳብ፣ ዕቅድና መፍትሔ የሚቀርብበትን ምቹ ሁኔታ በማሳጣት ያለጥቅም እንዲያልፍ ያደርጋል፡፡ ለተሻለ አሠራርና ለበለጠ ውጤት የሚያበቃ የውይይት መድረክ የሚሆንበትን ዕድል ይነፍጋል፡፡

 

ስለዚህ እንዲህ ዓይነቶቹን ክፍተቶች በመገንዘብ ለቅድስት ቤተ ክርስቲያን ሁለን ተናዊ አገልግሎት የሚበጅ የጥናት ጽሑ ፎች እንዲቀርቡ ሐሳብ በመስጠት፣ ዕቅድ በማውጣት፣ ጊዜ፣ በጀትና የሰው ኀይል መድቦ ውይይቱ እንዲካሄድ የተደረገው ጥረትና የተከናወነው ሥራ የሚመሰገን ሲሆን ወደፊትም በተሻለ ሁኔታ ሊቀጥል የሚገባው ተግባር ነው፡፡

 

የቅድስት ቤተ ክርስቲያንን ጥሪ ተቀብለው እውቀታቸውንና ሙያዊ ልምዳቸውን ለቤተ ክርስቲያን አገልግሎት በሚበጅ ተግባር ላይ ለማበርከት በቀናነት የተሳተፉት ምሁራን ልጆቿ የሚመሰገኑ ናቸው፡፡ አገልግሎታቸው ለቅድስት ቤተ ክርስቲያን ሐዋርያዊ ተልእኮ መቃናት፣ በዘመናዊ አሠራር በተደራጀ አስተዳደራዊ መዋቅር ዘርፈ ብዙ አገልግሎቷ የተሳካ አፈጻጸም እንዲኖረውና በልማት እንድትበለጽግ ከፍተኛ አስተዋጽኦ ያበረክታል፡፡ እንዲህ ዓይነቱ አገልግሎት በልዩ ልዩ የሥራ መስኮችና ቦታዎች የተሰማሩት ምሁራን ልጆቿ በየተሰጣቸው ጸጋና ሞያ ለቤተ ክርስቲያን የሚጠበቅባቸውን አገልግሎት እንዲያበረክቱ በማነሣሣት ረገድ በአርአያነት የሚጠቀስ ነው፡፡

 

በየደረጃው ያሉት የቤተ ክህነቱ መዋቅርና አካላት ይህንኑ በጎ ልምድ መነሻ በማድረግ፤ በተለያየ ሙያና የሥራ መስክ የተሰማሩ ምሁራን በቤተ ክርስቲያን ልጅነታቸው ድርሻቸውን እንዲያበረክቱ በራቸውን ክፍት ማድረግና የአገልግሎት መድረኮችን ማመቻቸት እንደሚጠበቅባቸው ያመላክታል፡፡

 

በሠላሳ አንደኛው አጠቃላይ የሰበካ መንፈሳዊ ጉባኤ ላይ ከቀረቡት ጽሑፎች መካከል፤ ለምሳሌ “የዘመናችንን ትወልድ ለቤተ ክርስቲያን አገልግሎት ለማብቃት የአባቶች ሚና” በሚል ርእስ የቀረበው ጽሑፍም ከላይ ያነሣና ቸውን ነጥቦች በአጽንዖት የጠቆመ ነው፡፡

 

በጥናት ወረቀቱ እንደተጠቀሰው፤ የሕዝብ ብዛት እየጨመረ በመምጣቱ ምክንያት ጎልቶ አይታይ ይሆናል እንጂ በየጊዜው ሃይማኖታቸውን የሚተው፣ ከቤተ ክርስቲያናቸው የሚኮበልሉ ምእመናን ቁጥር ቀላል አይደለም፡፡ ምእመናንን ወደ ውጪ የሚገፉ በርካታ ውስጣዊና ውጫዊ ምክንያቶች አሉ፡፡ ከእነዚህም ምክንያቶች አንዱና ዋነኛው ከቤተ ክርስቲያን አገልግሎት ጋር የሚያያዝ ነው፡፡ የቤተ ክርስቲያን መንፈሳዊና ማኅበራዊ አገልግሎቶች ይበልጥ እየተሻሻሉ ዘመኑን መዋጀት ካልቻሉ ውጤቱ ያማረ አይሆንም፡፡ ለዚህም ነው የዛሬውን ትውልድ ለቤተ ክርስቲያን አገልግሎት ብቁ እንዲሆን ማድረግ ወሳኝ ጉዳይ የሚሆነው በማለት የቀረበው ሐሳብ ትኩረት ሊሰጠው የሚገባ ነው፡፡

 

ምናልባትም በታላላቅ ከተሞች ባሉ ገዳማትና አድባራት የሚታየው እንቅስቃሴ፤ በወርና በዓመት የንግሥ ወይም ዐበይት በዓላት የሚታየው የሕዝበ ክርስቲያኑ ብዛትና ድምቀት በየገጠሩና በየበረሐው ያለውን አገልግሎት እንቅስቃሴና የምእመናኑን መጠን የሚያሳይ ነው የሚል የተሳሳተ ግምት ካለ፤ ገሐድ እውነቱ ከተሳሳተው ግምት የተለየ መሆኑን መገንዘብ ያስፈልጋል፡፡

 

ስለዚህ ትውልዱን በቤተ ክርስቲያን እቅፍ ሰብስቦ ለአገልግሎት በማብቃት የቅድስት ቤተ ክርስቲያን ሁለንተናዊ አገልግሎት ዘመኑን በዋጀ ውጤታማ አሠራር በተሳካ ሁኔታ ማፋጠን የወቅቱ ጥያቄ ነው፡፡ አሁን ባለው ዘመንና ትውልድ ደግሞ ሉላዊነትን (Globalization) መሠረትና ጉልበት ያደረገ ሥልጣኔ የተስፋፋበት፣ ዘመናዊነት የነገሠበት እንደመሆኑ፤ በዓለማችን የሚከሠቱ ተጨባጭ ሁኔታዎች በአንድም ሆነ በሌላ መንገድ አሉታዊም ሆነ አዎንታዊ ተጽዕኖ አቸው እያየለ ለቅድስት ቤተ ክርስቲያን ሕልውናና አገልግሎት ፈተናዎች እየሆኑ ይታያል፡፡

 

ከዘመኑ የኑሮ ሁኔታ፣ የሥልጣኔ ውጤቶች፣ በተዛባ የዘመናዊነት ግንዛቤ የሚከሠቱት ዓለም አቀፋዊ ተጽዕኖዎች በተለይ በመንፈሳዊ ሕይወቱ የሚያሳድሩበትን ጫና እንዲቋቋም አድርጎ ለጥያቄዎቹ ምላሽ በመስጠት ትውልዱን ይዞ ለመቀጠል ቅድስት ቤተ ክርስቲያን አፋጣኝ መፍትሔ ልትሰጠው የሚገባ ተግባር ነው፡፡

 

ስለዚህ በየአጥቢያው የስብከተ ወንጌል አገልግሎትን ማስፋፋት፣ ጉባዔያትን ማጠናከር፤ ለሰንበት ትምህርት ቤቶች ልዩ ትኩረት ሰጥቶ በቅርበት ዕለት ዕለት መከታተል፣ መምህራነ ወንጌል መመደብ፣ ቅዱሳት መጻሕፍትን ማሟላት፣ ሰንበት ትምህርት ቤቶችን በማጠናከርና በማስፋፋት አገልግሎታቸውም በበለጠ ጥረት የተሻለ ውጤት እንዲኖረው በማድረግ ረገድ ከፍተኛ ሥራ ይጠበቃል፡፡

 

ከፍተኛ የመንፈሳዊ ትምህርት ተቋማቱን በተሟላ አደረጃጀትና ዘመናዊ አሠራር እያጠናከሩ ማስፋፋት እውነተኛ የቤተ ክርስቲያን ልጆች በቀና ዓላማ ገብተው በቂ ዕውቀት ቀስመው ለአገልግሎት እንዲዘጋጁ ያስችላቸዋል፡፡ ሌሎችም የስብከተ ወንጌል ማስፋፊያ መንገዶችን የቴክኖሎጂውን እድገትና ዕድል በመጠቀም፤ በሀገር ውስጥም ሆነ በውጭ በመላው ዓለም በየቦታው ላይ ለምእመናን፤ በመገናኛ ብዙኃን ቃለ እግዚአብሔርን ማድረስ የግድ ይላል፡፡

 

አብነት ትምህርት ቤቶቻችን በብዙ ችግሮች ተተብትበው መምህራኑም ሆኑ ደቀ መዛሙርቱ ፈተና ላይ ወድቀዋል፡፡ የትምህርት አሰጣጥ ዘዴው ጊዜን፣ ቁሳዊ ሃብትን፣ ወቅትንና ሌሎችም አካባቢያዊ ሁኔታዎችን ባገናዘበ ሁኔታ ተመቻችቶ ባለመካሄዱ በቀጣይነቱ ላይ የተጋረጠ ትልቅ ፈተና ነው፡፡ ችግሮቹን አዝሎ ያንዣበበው አደጋ ከቀጠለ የካህናትና ሊቃውንት አገልጋዮቿ ምንጭ እየተዳከመ የነገይቱ ቤተ ክርስቲያን አገልግሎት ስኬትም አጠያያቂ መሆኑን ከወዲሁ ማሰብ፤ አፋጣኝ መፍትሔ መፈለግና በተግባር ማረጋገጥ አስፈላጊ ነው፡፡ ሊቃውንቱ እንዲያስተምሩ፣ የተካበተ ዕውቀታቸው ለምእመናን እንዲደርስ መርሐ ግብር ማዘጋጀት፣ መድረኮችን ማመቻቸትና እንዲሳተፉ ማድረግ ይገባል፡፡ ከዚህም በላይ ሰፊ የዕውቀት ሀብታቸው፣ ከመንፈሳዊው አገልግሎትና ሕይወታቸው ልምድ ጋር ለትውልድ እንዲተላለፍ ምእመናን እንዲጠቀሙበት ሊቃውንተ ቤተ ክርስቲያን እንዲጽፉ ማበረታታት፣ የሚያስፈልጋቸውን ማገዝ ማሳሰብ ትኩረት ሊሰጠው የሚገባ ጉዳይ ነው፡፡

 

የቅድስት ቤተ ክርስቲያን አባቶችና አገልጋዮች ትውልዱን ከማስተማር ጎን ለጎን የዕለት ተዕለት ክትትልና መንፈሳዊ ጥበቃ ማድረግ እንዳለባቸው ዋነኛ የአባትነት ሓላፊነታቸው እንደሆነ የታወቀ ነው፡፡ ከዚሁ ጋር በሕይወታቸው መልካም አርአያ በመሆን ለቤተ ክርስቲያን አገልግሎት መትጋትና ሃይማኖታዊ ሓላፊነታቸውን በሚገባ መወጣት አለባቸው፡፡

 

በአጠቃላይ በጎቹን በቃለ እግዚአብሔርና በመንፈሳዊ ሕይወት ጠብቆ በእናት ቤተ ክርስቲያን እቅፍ እንዲዘልቅ፤ በቀና መንፈስ በአገልግሎት እንዲሳተፍ ማስቻል፣ በፍቅርና በመልካም የአባትነት አርአያ መቅረብ፣ መከታተል ትኩረት ሊሰጠው የሚገባ ቀዳሚ ሥራ ነው እንላለን፡፡

 

ወስብሐት ለእግዚአብሔር

  • ምንጭ፡- ስምዐ ጽድቅ ጋዜጣ 20ኛ ዓመት ቁጥር 4 2005 ዓ.ም.

የቅዱስ ሲኖዶስ ምልዐተ ጉባኤ ቢያደርገው የምንላቸው ነጥቦች

ጥቅምት 12 ቀን 2005 ዓ.ም.

 

ቅዱስ ሲኖዶስ ኤጲስ ቆጶሳት የያዘውን፣ የታወቀ ሕጋዊ መንበር፣ ታሪካዊና ሕጋዊ መሠረት እንዲኖረው ሆኖ የተደራጀውን የኢትዮጵያ ኦርቶዶክስ ተዋሕዶ ቤተ ክርስቲያን ምልዐተ ጉባኤ ነው፡፡ ይህ ምልዐተ ጉባኤ ለአንዲቷ ቅድስት ቤተ ክርስቲያናችን አንድነትና ልዕልና እጅግ አስፈላጊና አንድ ነው፡፡

 

አስፈላጊነቱም የሚመነጨውና የሚረጋገጠው በመንፈስ ቅዱስ የሚመራ፣ የመንበረ ሐዋርያት ወራሽ በመሆኑና ውሳኔዎች ሁሉ ይግባኝ የሌለባቸው ከመሆኑ ላይ ነው፡፡ ሐዋርያት ከክርስቶስ፤ ሐዋርያነ አበውና ሊቃውንት ከሐዋርያት፣ እኛም ከእነዚህ ሁሉ የወረስናቸውን መሠረተ እምነት፣ ሥርዐተ አምልኮና ትውፊት የሚጠብቅና የሚያስጠብቅ ዐቃቤ ሃይማኖት ነው፡፡

 

በዚህ መነሻነት የመንበረ ሐዋርያት ወራሽ የሆነው የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ምልዐተ ጉባኤ በቀኖና ቤተ ክርስቲያን መሠረት በዓመት ሁለት ጊዜ ይሰበሰባል፡፡ በጥቅምትና በግንቦት ርክበ ካህናት፡፡ በሁለቱም ጉባኤያት በመንፈስ ቅዱስ መመራቱንና የመንበረ ሐዋርያት ወራሽ መሆኑን የሚያረጋግጡ ውሳኔዎች እንዲያሳልፍ ይጠበቃል፡፡ የሚወሰነውም ውሳኔ እንከን እንዳይኖርበት በፍጹም መንፈሳዊነት ተገቢ ጥንቃቄም እንዲያደርግ ይጠበቃል፡፡

 

የቅዱስ ሲኖዶስ ምልዐተ ጉባኤ በዓመት ሁለት ጊዜ መደበኛ ስብሰባ እንዲሁም እንደ አስፈላጊነቱ ልዩ ስብሰባ በማካሄድ በኢትዮጵያ ኦርቶዶክስ ተዋሕዶ ቤተ ክርስቲያን ቀኖና፣ አመራር፣ አስተዳደር፣ እርምጃና ፖሊሲ ሁሉ የሚወሰን የመጨረሻው አካል እንደመሆኑ ምልዐተ ጉባኤው ፍሬያማና ውጤታማ ተግባራት የሚከናወኑበት ሊሆን እንደሚገባም ይታመናል፡፡

 

በዚሁ መሠረት ቤተ ክርስቲያናችን በምልዐተ ጉባኤው ውሳኔና የውሳኔ አፈጻጸም ተጠቃሚ መሆኗ እንዲረጋገጥ አጥብቀን እንሻለን፡፡ በተነጻጻሪም ከጥቅምት 12 ቀን 2005 ዓ.ም ጀምሮ እንደሚካሔድ የሚጠበቀው የቅዱስ ሲኖዶስ ምልዐተ ጉባኤ ይህን እውን ሆኖ እንዲያሳየን ይጠበቃል፡፡ አጀንዳውም ከዚህ አንጻር ቢቃኝ ተገቢ ነው፡፡

 

በዚህ የአጀንዳ ቅኝት ተገቢነትና ወቅታዊነት አግባብ በአጀንዳነት ተወያይቶበት ውሳኔ እንዲያሳልፍባቸው እንደ ልጅነት የምንሻቸው አጀንዳዊ ውሳኔዎች ውስጥ ዐበይቶቹ በአምስት ሊቀመጡ ይችላሉ፡፡ እርቀ ሰላምና የስድስተኛው ፓትርያርክ ሹመት አጠቃላይ አፈጻጸም፣ ሕገ ቤተ ክርስቲያን የሚሻሻልበትንና ቤተ ክርስቲያናችን ቋሚ የምርጫ ሕግ ባለቤት የምትሆነበትን አገባብ መወሰን፤ ተግባሩና ሓላፊነቱ በግልጽ የተቀመጠለት የቴክኒክ አካል መሰየምና በአምስተኛ ዘመነ ፕትርክና በይደር በተያዙ አጀንዳዎች ላይ ተወያይቶ እንዲወሰን የቤተ ክርስቲያን ልጅነት አሳባችንን እናቀርባለን፡፡

 

ከእነዚህም በተጨማሪ ከአምስተኛው ፓትርያርክ ከብፁዕ ወቅዱስ አቡነ ጳውሎስ ዕረፍት በኋላ በዐቃቤ መንበረ ፓትርያርክነት የተሾሙት ብፁዕ አቡነ ናትናኤልም ሆኑ የቋሚ ሲኖዶሱን አፈጻጸም መገምገምና ውሳኔ ሊሰጥባቸው የሚገቡ ክስተቶች ላይም ውሳኔ ከመስጠትም በላይ ቀጣዩን የአተገባበር ፍኖተ ካርታ /Roadmap/ ተጠያቂነት በሚያጎናጽፍ አግባብ ቢያስቀምጥ ለቤተ ክርስቲያን ዕድገት ገንቢ ሚና ይኖረዋል ብለን እናምናለን፡፡

 

ምእመኑም ትናንት የቅዱስ ሲኖዶስን የምሕላ ዓዋጅ ተቀበሎ እንደመፈጸሙ ቀጣዩንም ውሳኔዎቹን መፈጸም ይገባዋል፡፡ ከአባቶቻችን ጎን በመሆን የልጅነት ድርሻውን ቢወጣ እንላለን፡፡

 

ቤተ ክርስቲያናችን በኲለንታዋ ወደቀደመ ክብሯና ልዕልናዋ እንድትመለስ የምልዐተ ጉባኤው ድርሻ በሙቀተ መንፈስ ቅዱስ ዘመኑን የዋጀ ውሳኔ መወሰንና አተገባበሩን መከታተል፤ የቤተ ክህነቱ መዋቅር ድርሻ ውሳኔዎቹን ማስፈጸምና ምቹ መደላድል መፍጠር ሲሆን የምእመኑ ድርሻ ደግሞ ለውሳኔው ተፈጻሚነት ምልዐተ ጉባኤውንም ሆነ የቤተ ክህነቱን መዋቅር በሁሉም መደገፍ ያስፈልጋል፡፡

 

ስለዚህ የቅዱስ ሲኖዶስ ምልዐተ ጉባኤ ውሳኔን መቀበል የቤተ ክርስቲያናችን የአንዲትነት፣ ሐዋርያነት፣ ቅድስትነትና ኲላዊነት መገለጫ ነውና ውሳኔዎቹን ተግባራዊ ከማድረግ አኳያ ሁላችንም የድርሻችንን ለመወጣት ዝግጁ እንድንሆን ያስፈልጋል፡፡

 

ወስብሐት ለእግዚአብሔር


  • ምንጭ፡- ጽምዐ ጽድቅ ጋዜጣ 20ኛ ዓመት ቁጥር 3 ከጥቅምት 16-30 2005 ዓ.ም.

ቤተ ክርስቲያንን ማገልግል አክራሪነት አይደለም !

መጽሔተ ተልዕኮን ለማንበብ እዚህ ይጫኑ