የቃለ ዓዋዲው ማሻሻያ ረቂቅ ይመከርበት!

መስከረም 30 ቀን 2005

ሰበካ ጉባኤ በካህናትና በምእመናን ኅብረት ላይ የቆመ መሠረታዊ የቤተ ክርስቲያናችን አስተዳደራዊና መዋቅራዊ ሥርዐት ነው፡፡ ከመንበረ ፓትርያርክ እስከ አጥቢያ አብያተ ክርስቲያናት ባሉት መንፈሳዊና አስተዳደራዊ ጉዳዮች ላይ በየደረጃው አመራር ይሰጣል፣

 

ዕቅድ ያወጣል፣ ውሳኔ ያሳልፋል፡፡ ጉባኤው ቤተ ክርስቲያናችን ከመሬት ስሪት ተነሥታ በሕዝብ ባለቤትነት ላይ የተመሠረተችበትና ሕጋዊ ሰውነት ያገኘችበትም የሕግ አካል ነው፡፡

 

በየደረጃው በሚያወጣቸው ዕቅዶች፣ በሚሰጣቸው አመራርና በሚያሳልፋቸው ውሳኔዎቹ ቅድስት ቤተ ክርስቲያንን ይጠብቃል፡፡ አገልግሎቷንም የተሟላ እንዲሆን ያደርጋል፡፡ የቤተ ክርስቲያን አገልጋዮች በሐዋርያዊ ተግባር እንዲደራጁ በማድረግ ችሎታቸውን ተጠቅሞ ኑሮአቸውን ያሻሽላል፡፡ ምእመናንን ለማብዛትና በመንፈሳዊ ዕውቀት ጎልምሰው በምግባርና በሃይማኖት ጸንተው በክርስቲያናዊ ሕይወት እንዲኖሩ ያደርጋል፡፡

 

እነዚህን ዓላማዎቹን ከማስፈጸም አኳያ ጾታ ካህናትና ጾታ ምእመናን /ጳጳሳት፣ ቀሳውስት፣ ሊቃውንት፣ ወጣቶች/ በምልዐት የተወከሉበትም በመሆኑ አሳታፊ ነው፡፡

 

ይሁንና በአጥቢያ ሰበካ ጉባኤ ደረጃ የምእመናን ንቃተ ሕሊና እየዳበረ ቢሆንም ተሳትፎው በሚፈለገው ደረጃ እያደገ አይደለም፡፡ ሰበካ ጉባኤ በወረዳ ቤተ ክህነትና በመንበረ ጵጵስና አካባቢ የተረሳም ይመስላል፡፡ በየዓመቱ የመንበረ ፓትርያርክ አጠቃላይ ሰበካ መንፈሳዊ ጉባኤ ቢካሔድም፤ በጉባኤውም አልፎ አልፎ ሥልጠናዎች መስጠታቸው ቢበረታቱም ወደ መሬት የማይወርዱ ወደ ተግባር የማይለወጡ መሆናቸውን እንረዳለን፡፡

 

ዘንድሮም ከጥቅምት 6-11 ቀን 2005 ዓ.ም ጀምሮ ሠላሳ አንደኛው የመንበረ ፓትርያርክ አጠቃላይ ሰበካ መንፈሳዊ ጉባኤ በጽርሐ መንበረ ፓትርያርክ ይካሔዳል፡፡ እናም ተገቢ /የካህናት፣ የወጣቶችና የምእመናን/ የውክልና ተሳትፎው እንዲጠበቅ፣ ከተለመደው ሪፖርታዊ መግለጫ በዘለለ ቁም ነገራዊ አጀንዳ ተኮር ቢሆን፤ አጀንዳዎቹ በወቅታዊና ዘላቂ በሆኑ ጉዳዮች ላይ ያተኮሩ፣ አወያይና አሳታፊ ሊሆኑ ይገባል እንላለን፡፡

 

ከሪፖርት አቀራረብ ጋር በተያያዘም የአህጉረ ስብከት ሪፖርት በጠቅላይ ሥራ አስኪያጁ ተጠቃሎ ቢቀርብና የቁጥጥር አገልግሎት ሪፖርት ተጠያቂነትንና ግልጽነትን ከማስፈን አኳያ ራሱን ችሎና ለብቻው ተለይቶ ቢቀርብና ተገቢ የሆነ ውይይትም ሊደረግበት ይገባል፡፡

 

በዘንድሮው የመንበረ ፓትርያርክ አጠቃላይ ሰበካ መንፈሳዊ ጉባኤ በቃለ ዐዋዲው ማሻሻያ ረቂቅ፣ ተቋማዊ ማሻሻያ (Structural Reform)፣ በዕርቀ ሰላሙ እውንነት ላይ፣ በፓትርያርክ ምርጫ አፈጻጸም ሥርዐት ላይ አተኩሮ እንዲወያይና የውሳኔ አሳብ ለቅዱስ ሲኖዶስ እንዲያሳልፍ ቢደረግ፤ ከአምስተኛው ፓትርያርክ ዕረፍት በኋላ ቤተ ክርስቲያኒቱ ያለችበትን ነባራዊ ሁኔታ የሚያሳይና በቀጣይነት ሊደረጉ የሚገባቸውን የሚጠቁም ሰነድ በዐቃቤ መንበሩ የሚመራው ኮሚቴ አዘጋጅቶ የጉባኤው ተሳታፊ እንዲወያይበት ሊደረግ ይገባል፡፡ ጉባኤው ዕቅድና በጀት መትከል ቢጀምር፣ የክትትልና ቁጥጥር ሥልትን አቅጣጫ ቢበይን ለቤተ ክርስቲያን ሁለንተናዊ ዕድገት ጠቃሚ መሆኑን እናምናለን፡፡

 

ሌላው ቢቀር እንኳን የቃለ ዓዋዲው ማሻሻያዎች ላይ የመንበረ ፓትርያርክ ሠላሳ አንደኛ አጠቃላይ ሰበካ መንፈሳዊ ጉባኤ ተሳታፊዎች እንዲመክሩበትና እንዲያዳብሩት ዕድሉ ሊሰጣቸው ይገባል፡፡

 

ይህን ስንል የቃለ ዓዋዲው መሻሻል የአሁኑንና የቀጣዩን ዘመን የቤተ ክርስቲያናችንን ሐዋርያዊ አገልግሎት፣ ርምጃ ለማስቀጠል የላቀ አዎንታዊ ተፅዕኖ ያለው መሆኑን በመገንዘብ ነው፡፡

 

በዚህ መልኩ የቃለ ዓዋዲው መሻሻል ተግባራዊ መሆን ለመዋቅር ማሻሻያችን መርሕ ይሆናል፤ የሕግ አውጪውን፣ ሕግ አስፈጻሚውንና የሕግ ተርጓሚውን ተግባር፣ ሥልጣንና ሓላፊነት በመለየት፡-

 

  • ተጠያቂነትና ግልጽነት እንዲሰፍን፣
  • የቤተ ክርስቲያናችን ሀብት /የሰው ኀይል፣ የገንዘብና ንብረት/ በአግባቡ ጥቅም ላይ እንዲውል፣
  • ቤተ ክርስቲያናችን በመንፈሳዊነት ምሳሌያዊ የሆነችና ሞራላዊ የበላይነት ያላት ተቋም እንድትሆን /በብኩንነት፣ ምዝበራና ዘረፋ ላይ/ ያስችላታል፡፡

 

በዓለም አቀፍም ደረጃ /በውጭው ዓለም/ ላለችው ቅድስት ቤተ ክርስቲያናችንም የበለጠ የመስፋፋትና የአንድነት በርን ይከፍታል እንላለን፡፡

 

ስለዚህ የዘንድሮ የመንበረ ፓትርያርክ አጠቃላይ ሰበካ መንፈሳዊ ጉባኤ በቃለ ዓዋዲው ማሻሻያ ላይ ለመምከር ባለቤትም፣ ባለሥልጣንም ነውና ይመለከተዋል፡፡ አሁን ባለንበት ሁኔታ ከዚህም የተለየ፣ ከዚህም የበለጠ አጀንዳ ሊኖረው አይገባም፡፡ ቢያንስ ቢያንስ በቃለ ዐዋዲው ማሻሻያዎች ላይ ይምከር! ማሻሻያዎቹን ያዳብር! እንላለን፡፡

 

  • ምንጭ፡- ስምዐ ጽድቅ ጋዜጣ 20ኛ ዓመት ቁጥር 2  ከጥቅምት 1-15 ቀን 2005 ዓ.ም.

 

ወስብሐት ለእግዚአብሔር

ለቤተ ክርስቲያናችን አንድነት ዕርቅና ሰላም መሠረት ናቸው

መስከረም 22 ቀን 2005 ዓ.ም.


የኢትዮጵያ ኦርቶዶክስ ተዋሕዶ ቤተ ክርስቲያን በየዘመኑ የተለያዩ ፈተናዎች የተፈራረቁባት ሲሆን ቤተ ክርስቲያኒቱ የእግዚአብሔር ማደሪያ ነችና የመጣውን የፈተና ጎርፍና ነፋስ ሁሉ ተቋቁማ አሁን ላለንበት ዘመን ደርሳለች፡፡ የዐላውያን ገዢዎችን ሰይፍ ከውስጥም ከውጭም የነበሩ መናፍቃንን ቅሰጣ ተሻግራ እስከአሁን የሐዋርያትን፣ የቅዱሳን ሊቃውንትን የአትናቴዎስን የቄርሎስን ሃይማኖት ይዛ ተገኝታለች፡፡፡ ስለዚህም ቤተ ክርስቲያን የሚመጡባትን ፈተናዎች የምታደንቅ፣ በዚያም ተስፋ የምትቆርጥ አይደለችም፡፡ ሁል ጊዜም ቢሆን የገሃነም ደጆች የሚሰብቁት ግልጽና ስውር ጦር እንዳለ ስለምታውቅ ከሚመጣው ፈተና ሁሉ አሸንፋ ትወጣ ዘንድ ወደ አምላኳ ትለምናለች እንጂ፡፡

 

በዚህ ባለንበትም ዘመን ቤተ ክርስቲያናችን ካጋጠሟት ከባድ ፈተናዎች አንዱ ለሃያ ዓመታት ያህል የቆየው የአባቶች መለያየት ጉዳይ ነው፡፡ እንዲህ ያሉ ታሪኮች በቤተ ክርስቲያን ታሪክ ውስጥ እንግዳ ነገር ባይሆኑም የሚያስከትሉት ጉዳት ግን ቀላል የማይባል ነው፡፡ በማወቅም ባለማወቅም ከውስጥ ወይም ከውጪ በሆኑ ምክንያቶች እንዲህ ያሉ መለያየቶች ሊከሰቱ ይችላሉ፡፡ ዋናው ነጥብ ግን ከርስትና በሃይማኖት ምክንያት ካልሆነ በቀር ለመለያየት፣ መንጋን ለመበተን ወይም ለመከፋፈል የሚያበቃ ሥነ ኅሊና /ሞራል/ የሚሰጥ ሃይማኖት አይደለም፡፡ ሃይማኖታችን ተስፋ እንድናደርግ የሚነግረንን የእግዚአብሔር ጸጋ ሁሉ መንግሥቱንም ማግኘት የሚቻለው የዕርቅና ሰላም ሕይወት ሲኖረን ነው፡፡ ጌታችን “እኔ እንደወደድኳችሁ እርስ በእርሳችሁ ትዋደዱ ዘንድ ትእዛዜ ይህች ናት” እንዳለ የሕጉ ሁሉ ፍጻሜ ነው፡፡ /ዮሐ.15፥12/ እርስ በእርስ ብቻም ሳይሆን ብንችል ከሁሉም ጋር በሰላም እንድንኖር ታዘናል፡፡ ያለሰላምና ፍቅር ቤተ ክርብስቲያንን ማነጽ ማጽናትም አይቻልም፡፡

 

በ1983 ዓ.ም. ጀምሮ ቤተ ክርስቲያናችን ያጋጠማት መከፋፈል ከግብጽ ቤተ ክርስቲያን ሞግዚት አስተዳደር ነጻ ወጥተን እንደ እግዚአብሔር ፈቃድ በተመሠረተው መንበረ ፓትርያርክ ጥንካሬ እና አሠራር ላይ ጥያቄም የሚያስነሣ ሆኗል፡፡ በቤተ ክርስቲያን የውጪና የሀገር ውስጥ የአገልግሎት እንቅስቃሴዎችም ላይ ተፅዕኖ ማሳደሩ አልቀረም፡፡ ቤተ ክርስቲያን የሲኖዶሱ፣ የስደተኛው፣ የገለልተኛው ወዘተ እየተባለች ሁሉም እንደፈቃዱ የሚኖርባት ሆና ቆይታለች፡፡

 

እነዚህ ነገሮች ዕረፍት የነሧቸው የተለያዩ ወገኖችም በአባቶች መካከል ያሉ ችግሮች እንዲፈቱ የተለያዩ ጥረቶች ሲያደርጉ ቆይተዋል፡፡ ይሁን እንጂ ችግሮቹ እልባት አግኝተው ቤተ ክርስቲያኒቱ ወደቀድሞው አንድነቷ ሳትመለስ በሂደት ላይ ብፁዕ ወቅዱስ አቡነ ጳውሎስ ዐረፉ፡፡ የእርሳቸው ዕረፍትን ተከትሎም ችግሮቹ የበለጠ እንዳይወሳሰቡና መቋጫ ሳያገኙ ወደባሰ ቀውስ፣ አለመረጋጋትና ማባሪያ ወደሌለው መወጋገዝ እንዳይገባ እስከቀጣዩ ፓትርያርክ ሢመት ድረስ አስፈላጊውን ሁሉ ጥረት ከመቼው ጊዜ በላቀ ሁኔታ እንዲቀጥል ብፁዓን አባቶችን ጨምሮ ሁሉም ወገን ግፊት እያደረገ ነው፡፡

 

አገልግሎቱን አጠናክሮ የቤተ ክርስቲያኒቱን መልካም ነገር ሁሉ ማየት ዋነኛ ግቡ የሆነው ማኅበረ ቅዱሳንም የቤተ ክርስቲያናችን አንድነት ጉዳይ በእጅጉ ያሳስበዋል፡፡ መለያየቱ በሚሰጠው አገልግሎት ላይ ከፍተኛ ጫና ማሳደሩን በተጨባጭ ያየው ማኅበረ ቅዱሳን ለሁሉም የቤተ ክርስቲያን የአገልግሎት ቤተሰቦች ጉዳዩ አንገብጋቢ መሆኑን ይረዳል፡፡

 

በዚህ መለያየት ውስጥ ዓላማቸውን ለመፈጸም ይጥሩ የነበሩ ግለሰቦችና ቡድኖች በቤተ ክርስቲያናችን መዋቅር ውስጥ ለመንሰራፋትም ይውተረተሩ እንደነበር ይታወቃል፡፡ አገልግሎታችንም በሚፈለገው ደረጃ በፍጥነት ሄዷል ማለት አይቻልም፡፡ በርካታ ምእመናን በመናፍቃን ተወስደዋል፡፡ ቤተ ክርስቲያን የሚፈለገውንም ያህል ሀገራዊ አስተዋጽኦ ስታደርግ ቆይታለች ለማለት አያስደፍርም፡፡

 

ሌሎች ምክንያቶችም እንዳሉ ሆነው ይኸው በአባቶች መካከል ያለው መለያየትም ከላይ ለዘረዘርናቸው ውስንነቶች የራሱ አስተዋጽኦ ነበረው፡፡ መንበረ ፓትርያርክና ቅዱስ ሲኖዶስ ከአንድ ሺሕ ስድስት መቶ ዓመታት በኋላ ከግብጽ ቤተ ክርስቲያን አስተዳደራዊ ቁጥጥር ተላቀው ያገኙትን መንፈሳዊ ሥልጣንና መንበር በተሻለ አሠራር ወደላቀ የአገልግሎት አቅም የሚያደርሱበትን ሁነኛ ጊዜዎች በእነዚህ መለያየቶች ምክንያት አባክነዋል ማለት ይቻላል፡፡ የተሻለ የስብከተ ወንጌል አገልግሎት መስፋፋት ማሳየት ሲቻል ወደ ኋላ ለመመለሱ አስተዋጾኦ አድርጓል፡፡ ይህ በሁሉም ልብ ያለ ሐዘን እንዲቀረፍ አባቶች ጥረት ሲያደርጉ ቢቆዩም በቀላሉ ተፈቶ ቤተ ክርስቲያንን አንድ ማድረግ ሳንችል መዘግየታችን ትውልዳችንንም የሚያስወቅስ ሆኗል፡፡

 

ይሁን እንጂ ብፁዕ ወቅዱስ አቡነ ጳውሎስ በሕይወት እያሉ ተጀምሮ የነበረው የዕርቅና ሰላም ሂደት አሁን እልባት እንዲሰጠው የሚያስገድድ ሁኔታ ውስጥ መግባታችንን ማኅበረ ቅዱሳን ያምናል፡፡ ማኅበራችን የዕርቅና ሰላሙ ጉዳይ አስተዳደራዊ ጉዳይ ብቻም ሳይሆን የክርስቲያናዊ ሕይወትና ሥነ ምግባር ጉዳይ መሆኑ እንዲታሰብበት ይሻል፡፡ ስለዚህ አፋጣኝ እርምጃ መውሰድና ችግሩን ለመፍታት በሚያሳምን ደረጃ መንቀሳቀስ ይጠይቃል፡፡ ጉዳዩም ክብደት እንዲሰጠው ይፈልጋል፡፡ የምናገለግላት ቤተ ክርስቲያን በየምክንያቱ እየተለያየች ባለብዙ መዋቅር ስትሆን ማየት የማይታገሱት ነገር ነው፡፡ የዕርቅና የሰላም ሂደቶቹም ውጤት በግልጽ እየቀረቡ ሕዝበ ክርስቲያኑም ግፊት እንዲየደርግባቸው ይሻል፡፡

 

ለዚህም በደሙ የዋጃትን ቤተ ክርስቲያን እንዲጠብቁ ለመንጋውም እንዲጠነቀቁ አደራ የተሰጣቸው ብፁዓን አባቶች ድርሻ የጎላ ነው፡፡ ዕርቅና ሰላምን በቤተ ክርስቲያን አስፍኖ የቤተ ክርስቲያንን አንድነት ማጽናት ይጠበቅባቸዋል፡፡ ለአገልግሎት የሚመች ስልታዊ አካሄድ አሠራርና አደረጃጀት እንዲሰፍን መፍቀድ ይጠበቅባቸዋል፡፡ ይህንንም ከእግዚአብሔር የሆነውን አደራ ከመጠበቅ አንጻር፣ ለአገልግሎቱ ስኬት ከማምጣት፣ ምእመናን በአገልግሎቱ ረክተው እንዲጸኑ ከማድረግ፣ በታሪክ ውስጥ ተጠያቂ ካለመሆን አንጻር ሁሉ ሓላፊነትን ሊወጡ ይገባል፡፡

 

ሁሉም የክርስቲያን ወገን ቢሆን ሊረዳው የሚገባው የሰበሰበችን ቤተ ክርስቲያን እጅግ ታሪካዊ ባዕለጸጋና አኩሪ መሆኗን ነው፡፡ የሊቃውንቱ የቅዱስ ያሬድ የአባ ጊዮርጊስ ዘጋስጫ፣ የእነ አቡነ ተክለሃይማኖት የእነ አቡነ ኤዎስጣቴዎስ ቤተ ክርስቲያን መሆኗን ልንረዳ ይገባል፡፡ ብዙ ዋጋ ተከፍሎባታል፡፡ ስለዚህ ክብርና አንድነቷን ዕርቅና ሰላምን በማስፈን ልናጸና ይገባል፡፡ ላለብን ችግር መፍትሔ የሚሰጠውም ፈጣሪ መሆኑን በማመን ብፁዓን አባቶችን በጸሎት መርዳት ይገባል፡፡ የቤተ ክርስቲያኒቱን አንድነት በጥብቅ እንደምንፈልገውም በተገኘው አጋጣሚ ሁሉ መግለጽ ግፊትም ማድረግ ይገባናል፡፡ ለሚፈለገው አንድነት ደግሞ መሠረቱ ዕርቅና ሰላም ነው፡፡

 

ቤተ ክህነቱም እግዚአብሔር ያለፈውን ይቅር እንዲለን፣ ከሚመጣውም እንዲጠብቀን ስለ አንድነታችን በጸሎት ሊተጋ ይገባል፡፡ ያለፈው መልካም ያልሆነው ነገር ሁሉ ሊረሳ፣ በጎው ደግሞ ሊወሳ ይገባል፡፡ በጎ ፈቃድና ሰላምን መውደድ ከሊቀ ካህናት ኢየሱስ ክርስቶስ የተማርነው የተረዳነው ነውና ሁሉም ወገን ያንኑ እንዲያጸና መምከር ይጠበቅበታል፡፡

 

ማኅበረ ቅዱሳንም በበኩሉ ከዚህ ቀደም ይዞት የቆየውን ይህንኑ አቋም አሁንም ለማስተጋባት የተገደደው ከችግሩ ወቅታዊነትና ከጊዜው አንገብጋቢነት የተነሣ ነው፡፡ ስለዚህ ችግሩ ከምንም ዓይነት መዘዝ በጸዳ ሁኔታ፣ ቀኖናዊና ሃይማኖታዊ መሠረቶች ተጠብቀው ዕርቅና ሰላምን የማስፈን እንቅስቃሴው በሚያሳምን ደረጃ ሊኬድበት ይገባል፡፡ የአባቶችና የሀገር ሽማግሌዎችም ጥረት ሊመሰገን እንደሚገባው ማኅበረ ቅዱሳን ያምናል፡፡ ውጤት እስከሚገኝ ለሂደቱ አስፈላጊውን ሁሉ አስተዋጽኦ ሊያበረክት መዘጋጀቱን ለሁሉም ወገን ሊገልጽ ይወዳል፡፡

ወስብሐት ለእግዚአብሔር

  • ምንጭ፡- ሐመር መጽሔት 20ኛ ዓመት ቁጥር 5 2005 ዓ.ም.

ማኅበረ ቅዱሳን ትእምርተ ሰላም

መስከረም 21 ቀን 2005 ዓ.ም.


በኢትዮጵያ ከጥቂት ዓመታት ወዲህ ከሃይማኖት አክራሪነት ጋር በተያያዘ አንዳንድ ግጭቶች መከሰታቸው ይታወቃል፡፡ መንግሥትም ለችግሩ  መፍትሔ ለመስጠት ጥረት እያደረገ ይገኛል፡፡ የአብዛኛዎቹ የ”ግጭት” ጠባይ ግን የተለየ ነበር፡፡ የሁለት እምነት ተከታዮች በመፎካከርና በመወዳደር ወይም ደግሞ ከተራ ጥላቻና ግለሰባዊ ግጭት አንሥተው ሃይማኖታዊ ያደረጉት አልነበረም፡፡

 

ከዚያ ይልቅ በአንድ ወገን ያሉት በማያውቁትና ባላሰቡት ሰዓት የደረሰ ድንገተኛ አደጋ ነበር ማለት ይቻላል፡፡ ጥቃቱን የፈጸሙትም የሚከተሉትን ሃይማኖት አባቶች ወካዮችና ከዚያው ከቤተ እምነታቸው ተከታዮች ሙሉ ይሁንታ አግኝተው የተላኩ አልነበሩም፡፡ ይህን የማድረግ ዓላማ ብቻ ሳይሆን በቂ ዝግጅትና ጥናት ያደረጉ የሃይማኖት አክራሪዎች መሆናቸው ከድርጊታቸውም፤ ከተገኘውም ማስረጃ ግልጽ ነበር፡፡

 

በተከታታይ በኢትዮጵያ ኦርቶዶክስ ተዋሕዶ ምእምናንና አብያተ ክርስቲያናት ላይ በአርሲ ዞን ቆሬ ወረዳ በአንሻ ቀበሌ፣ በጅማና ኢሉአባቦራ ጥቃት ሲያደርስ የነበረው የአክራሪ እስልምና ቡድን ኢትዮጵያዊ መልኩን አሽቀንጥሮ ጥሎ እስላማዊ ዓለም ዓቀፋዊ ግዛትን ለማፋጠንና የምሥራቅ አፍሪካ ስልቱን ለመፈጸም እንደመሰናክል ያያትን የኢትዮጵያ ቤተ ክርስቲያንን ለማስወገድ ያለመው እንቅስቃሴው አካል እንደነበረም እንገነዘባለን፡፡

 

ይህን ተከትሎም በሕዝቡ መካከል ለዘመናት አብሮ የመኖር ባህላችንን የሚፃረር ድርጊት እየተስተዋለ ነበር፡፡ በተለይ ደግሞ በክርስቲያኑና በሙስሊሙ ማኅበረሰብ መካከል በወቅቱ ተፈጥረው የነበሩት አዳዲስ ክስተቶች በሁለቱ ሃይማኖት ተከታዮች መካከል የማያባሩና መቆሚያ የሌላቸው ግጭቶች መፍጠር ዓላማ አድርገው የሚንቀሳቀሱ ባዕዳን ኀይሎች በአምሳላቸው የወለዷቸው አክራሪዎች የሚመሩት እኩይ ድርጊት መሆኑም ድርስ ነበር፡፡ ከጥቃቱ በኋላም መንግሥት ተገቢውን ትኩረት በመስጠት የተለያዩ የማስተማርና ሕግ የማስከበር ሥራዎችንም ሲሠራ እንደነበረም በሚገባ እናውቃለን፡፡

 

ትናንትም ሆነ ዛሬ ምልክቱ ሰላም እንጂ “አክራሪነት” ያልሆነው ማኅበረ ቅዱሳን ሀገራዊ ድርሻውን በሦስት መልኩ ተወጥቷል፡፡ የመጀመሪያው ከመጀመሪያው ጀምሮ ምእመናን አክራሪውን፣ ነባሩንና ሰላማዊውን እስልምና ነጥለው እንዲመለከቱ ከፍተኛውን ድርሻ ተወጥቷል፡፡ ሁለተኛ አክራሪዎቹ ለሚያነሷቸው ታሪካዊና ዶግማዊ ጥያቄዎች በተጻፉት ጽሑፎች መጠንና ቁጥር ጋር ሊነጻጸር ቀርቶ እዚህ ግባ የሚባል ባይሆንም መጠነኛ ምላሾችን ሰጥቷል፡፡ ሦስተኛ ተቻችሎና ተከባብሮ ስለመኖር ከየትኛውም አካል በፊትና በከፍተኛ ሽፋን ሠርቷል፡፡ ስለ አክራሪ እስልምናና ስለትንኮሳው እጅግ አነስተኛና ክስተት ተኮር የሆኑ መረጃዎችን በመስጠት ችግሩ ሲያጋጥም ለመንግሥት ማመልከት እንደሚገባ አቅጣጫ ለማሳየት ሞክሯል፡፡

 

ማኅበሩ ይህን በወቅቱ ያደረገው አንድን ነገር እየሰሙ እንዳልሰሙና እንደሌለ ከመቁጠር ይልቅ ችግሩን በትክክል አሳውቆ ለመፍትሔው መሥራት ይገባል ብሎ ስለሚያምንና መንግሥት በወቅቱ አክራሪነትን ለመግታትና ግጭቶችን ለማስወገድ እያደረገ የነበረውንም ጥረት የማገዝ ሀገራዊ ግዴታንም ከመወጣት አንጻር መሆኑንም ለመግለጽ እንወዳለን፡፡

 

ይሁንና ለቤተ ክርሰቲያኒቱ ተጨማሪ አስተዋጽኦ አበረክታለሁ ብሎ የተደራጀውንና ከሰላማዊ ባሕርይው በመነጨ የሃይማኖት አክራሪነት በጽናትና በአቋም እየታገለ ያለውን ማኅበረ ቅዱሳንን በተሳሳተ መረጃ በአክራሪነት የመፈረጅ አዝማሚያዎች በአንዳንድ አካላት እየታዩ መሆናቸውንም እንረዳለን፡፡

 

በማያወላዳ ሁኔታ ማኅበረ ቅዱሳን ትናንትም ሆነ ዛሬ የሃይማኖት አክራሪ አለመሆኑንና ማንንም ወደ ሃይማኖት አክራሪነት የሚመራ ተቋም አለመሆኑን ለመግለጽ እንወዳለን፡፡ የሃይማኖት ሥርዓታችንን አጥብቀን በመፈጸማችን እንታወቅ ይሆናል እንጂ የአክራሪነት ውጤት በሆኑት ጸብና ግጭት አንታወቅም፡፡ ያለ ስም ስም መስጠትና በተሳሳተ መረጃ መፈረጁ አንዳች መፍትሔ ሊሰጠው እንደሚገባ በጽኑ እናምናለን፡፡

 

ክቡር ጠቅላይ ሚኒስትር መለስ ዜናዊ በሕዝብ ተወካዮች ምክር ቤት የሃይማኖት አክራሪነትን አስመልክተው ለምክር ቤቱ አባላት ሲገልጹ ከሕዝብና ቤት ቆጠራ ውጤት ጋር አያይዘው “….አንዳንድ የማኅበረ ቅዱሳን አባላት….” ብለው መጥራታቸውን እንደምቹ አጋጣሚ የወሰዱ የማኅበሩን አገልግሎት የማይወዱና ምናልባትም ማኅበሩ ባይኖር በቤተ ክርስቲያኒቱ መሠረተ እምነት፤ ሥርዓተ አምልኮና ትውፊት ላይ የፈለጉትን ማድረግ የሚቻላቸው የሚመስላቸው አካላት የማኅበሩን ስም ማጥፋታቸውን እንደቀጠሉ ናቸው፡፡

 

እነዚህ ወቅታዊ ፓለቲካዊ ሁኔታዎችን የሚንተራሱ የተሐድሶ መናፍቃን አቀንቃኞች ከዚህ በፊት ከቅዱስ ሲኖዶስ ጋር ለማጣለት፣ ከሌሎችም አካላት ጋር በማጋጨት እየደከሙ ሳይሳካላቸው ሲቀር ደግሞ የወቅቱን የፓለቲካ ነፋስ ተጠቅመው መንግሥታዊ አካላትን በማሳሳት በማኅበረ ቅዱሳን መቃብር ላይ ቆመው ቅዠታቸው እውን ሆኖ ለማየት ሲባዝኑ እያስተዋልንም ነው፡፡ ስለዚህም መንግሥታዊ አካላት በእነዚህ አካላት በደረሳቸው የተሳሳተ መረጃ ተመሥርተው ማኅበሩን ከመፈረጃቸው በፊት በቂ ጥናትና አስፈላጊውን ጥንቃቄ እንደሚያደርጉም እምነታችን ነው፡፡

 

ማኅበረ ቅዱሳን በግልጽና በይፋ ከሚሠራው ሥራ ውጭ በስውር የሚሠራው አንዳች ነገር የለም፡፡ ሥራዎቹን ከሌሎች ሥራዎች ጋር ማጥናትና በንጽጽር መመልከት እውነታውን ለመረዳት በእጅጉ ይጠቅማል፡፡ ከዚህ አልፎ ግን በቤተ ክርስቲያኒቱ ላይ በግልጽም ሆነ በስውር ሊያደርሱት የፈለጉትን የሃይማኖት ብረዛና ክለሳ ያልተሳካላቸው አጽራረ ቤት ክርስቲያን በሚሰጡት የተሳሳተ መረጃ ተመሥርቶ ትእምርተ ሰላም /የሰላም ምልክት/ የሆነውን ማኅበር መፈረጅ አይገባም፡፡

 

ማኅበረ ቅዱሳን በቤተ ክርስቲያኒቱ መዋቅር ሥር ያለ የቤተ ክርስቲያኒቱን አስትምህሮና መሠረተ እምነት የሚጠብቅ፣ በራሱ አቅምም መሠረት የማስጠበቅ ድርሻውን የሚያበረክት፣ በቅዱስ ሲኖዶስ የጸደቀ ደንብ የተሰጠውና በእርሱም መሠረት ብቻ የሚሠራ ማኅበር እንጂ ራሱን የቻለ የእምነት ሴክትም አይደለም፡፡

 

አባላቱም በአብዛኛው ከፍተኛ ትምህርት የተማሩ፣ በሀገሪቱ ተቋማት ውስጥ ታላቅ ሀገራዊ ሓላፊነትን የሚወጡ፣ ከፊሎቹም በከፍተኛ የሓላፊነት ቦታዎች ላይ ያሉ፣ ለሀገርና ለሕዝብ በሚሰጠው አገልግሎትም ሓላፊነት የሚሰማቸው ዜጎች እንጂ ከክርስትናው አስተምህሮም ሆነ ከኅሊና የተነሣ የማያደርጉትንና ሊያደርጉም የማይችሉትን አክራሪነት ለማኅበሩ አባላት መስጠት አይገባም እንላለን፡፡

 

መንግሥት እንደ ሀገር መሪነቱ የእምነት መሪዎችን ቀርቦ ማወያየቱ፣ ብቅ ጥልቅ፣ ብልጭ ድርግም የሚሉ የእምነት ነክ “ግጭቶች” ለማስወገድ የሚያደርገው ጥረት በሚያስመሰግነውም የችግሩ ሰበዝ ከየት እንደሚመዘዝና የተፈጠረውንም ችግር ከመሠረቱ ለመፍታት ጉዳዩን በጥልቀት ከሚያውቁት ወገኖች መረጃ የመሰብሰቡን ሥራ አጠናክሮ ሊቀጥል ይገባል፡፡

 

በሀገራችን አሁን ምልክቱ በጉልህ እየታየ ያለው የሃይማኖት አክራሪነት እንቅስቃሴ በብዙኃኑ የክርስትናውም ሆነ የእስልምናው ተከታይ ዘንድ ተቀባይነት የሌለው ተግባር ነው፡፡ የዚሁ አካል የሆነው ማኅበረ ቅዱሳንም እንደ ትናንቱ ሁሉ ዛሬም ጥብዓት በተሞላው ቁርጠኝነት የሚታገለው ነው፡፡ በመሆኑም መንግሥት አሁን እያደረገ ያለው የፀረ አክራሪነት ትግል እንደተጠበቀ ሆኖ በትክክል የአክራሪነት ጠባዩ ከየትኛው አቅጣጫ እንደመጣና ምንጩ የትና ምን እንደሆነ በመለየት ትክክለኛውን ብያኔ ሊሰጥ ይገባል እንላለን፡፡

 

በአንዳንድ አካላት የተሳሳተ አቻ ለመፍጠር ሲባል በጥቅል ለሃይማኖት ተቋማትና ተከታዮቹ የሚቀመጠውም ፍርጃ ሊስተካከል እንደሚገባውና በተገቢው አካል ተገቢውን ሥዕል ማግኘት እንዳለበትም እምነታችን ነው፡፡

 

በመጨረሻም ማኅበረ ቅዱሳን አክራሪነትን እንደሚያወግዝ አበክረን እንገልጻለን፡፡ በተጨማሪም ማኀበሩ ከዚህ በፊት እንዳደረገው ሁሉ ሰላምን አንግቦ ስለ ሰላም ከመንግሥትና መንግሥታዊ ካልሆኑም ሆነ ከሌሎች የሃይማኖት ተቋማት ጋር ለመሥራት ከመቼውም ጊዜ በላይ ዝግጁ መሆኑን ለመገለጽ እንወዳለን፡፡ በዚህም ትልቅ ሀገራዊ ሓላፊነትንና የዜግነት ድርሻውን በመወጣት አመርቂ ውጤት እንደሚያስመዘግብም ያምናል፡፡

 

ወስብሐት ለግእግዚአብሔር


  • ምንጭ፡- ስምዐ ጽድቅ 19ኛ ዓመት ቁጥር 23 2004 ዓ.ም.

መጪውን ጊዜ በሃይማኖት “ብሔርተኝነት” መዋጀት

መስከረም 18 ቀን 2005 ዓ.ም.


ጊዜ ይመጣል ጊዜ ይሄዳል፡፡ ጊዜ መጥቶ ሲሄድ ግን እንደው ዝም ብሎ አይደለም፡፡ የጊዜውን አሻራ አሳርፎ ነው፡፡ አሻራው ግን አዎንታዊም አሉታዊም ሊሆን ይችላል፡፡ በዚህ ሂደት ውስጥ ምርጫው በጊዜ መጠነ ክበብ ውስጥ ያለው የሰው ልጅ ነው፡፡

 

የሰው ልጅ ደግሞ በጊዜያት ውስጥ የረቀቀና የገዘፈ ዓለም ባለቤት ሆኖ የተፈጠረና ጊዜ የማይቆጠሩላቸው የሥሉስ ቅዱስ ፍጡር ነው፡፡ በሕያውነቱ ረቂቁን ዓለም- ዓለመ ነፍስን መስሎና ሆኖ ሲኖር፤ በምድራዊነቱ ግዙፉን ዓለም- ዓለመ ሥጋን በተዋሕዶ ነፍስ መስሎና ሆኖ ይኖራል፡፡ በዚህም የሁለት ዓለም ባለቤት ነው፡፡ የሰማያዊና ምድራዊ ወይም የመንፈሳዊና ዓለማዊ፡፡

 

እንዲህ ሆኖ ሲፈጠር በነጻ ምርጫው እንዲኖር የሚያስችለው ነጻ አእምሮ የተቸረው ብቻ ሳይሆን የምርጫውን ተገቢነትና ትክክለኛነት የሚያረጋግጥበት አእምሮ የተሰጠውም ባለጸጋ ፍጡር መሆኑን መገንዘብ ያስፈልጋል፡፡

 

በረጅሙ የጊዜ ሂደት ውስጥ ከግዙፉ ዓለም- ዓለመ – ሥጋ፤ ግፊት አንጻር መውደቅ መነሣቱ አይቀሬም ነው፡፡ ትልቁ ቁም ነገርም መውደቁ ሳይሆን ወድቆ አለመቅረቱ – መነሣቱ ነው፡፡ ሃይማኖተኛ የሚያሰኘውም ይኼው የመነሣት ጉዞ አካል የሆነው መንፈሳዊነቱ ነው፡፡

 

ቅድስት ቤተ ክርስቲያን የምትገለገለውም የምትጎዳውም በዚሁ ፍጡር ነው፡፡ የመውደቅ መነሣቱም ሰንኮፍ አሐቲ፣ ቅድስት፣ ሐዋርያዊት፣ ኲላዊት ቤተ ክርስቲያናችን ላይ በአዎንታዊም ሆነ በአሉታዊ ጥላውን ማሳረፉ አይቀሬ ነው፡፡

 

በዚህ ወቅት በምድር ያለችው ሰማያዊ ቤታችን ቅድስት ቤተ ክርስቲያን በልዩ ልዩ ሰብዓዊ ግፊት በወለዳቸው እኲያት እየተፈተነች ነው፡፡ ከውጪ ከሥጋ በሆኑ በሉላዊነትና የዚህ ውጤት በሆኑት በዘመናዊነት፣ ዓለማዊነት፣ ለዘብተኝነት እየተፈተነች መሆኑን እንገነዘባለን፡፡

 

በተለይ ከሰሞኑ ከፓትርያርክ አሰያየም ጋር ተያይዞ ለአስቀመጡት የጥፋት ግብ አባቶችን፣ ሊቃውንቱንና ምእመኑን ለመከፋፈል ዓላማ እንዲረዳቸው አጽራረ ቤተ ክርስቲያን ወንዛዊነትን – ጎጣዊነትንና – ዘውገኝነት የቤተ ክህነነቱ ባሕርያዊ ቁመና ለማድረግ ሲውተረተሩ መገንዘብ ችለናል፡፡

 

እነዚህ የክፍፍልና የልዩነት ዐውድማዎች የከፋ ጥፋት ከማድረሳቸው በፊት የሃይማኖት “ብሔርተኝነት” በወለደው ጥብዓት በቃችሁ ሊባሉ ይገባል፡፡ የሃይማኖት ብሔርተኝነት መነሻው አገራችን በሰማይ፤ ኑሮአችን በዓለመ ነፍስ ከመሆኑ ላይ ነው፡፡ የሃይማኖት ብሔርተኝነት ሲባልም ሃይማኖትን በሃይማኖት እናት፣ አባትና ብሔር አድርጎ መውሰድ ወይም በአጭሩ የሃይማኖት ወገንተኛ ማለት ነው፡፡ ከዚህም የተነሣ የሃይማኖት “ብሔርተኝነት” ወንዝ- ጎጥና- ዘውግ ዘለል መሆኑን መገንዘብ ያስፈልጋል፡፡

 

የሃይማኖት “ብሔርተኝነት” በቤተ ክርስቲያናችን የነበረና የቆየ ማእከለ አንድነት እንጂ አዲስ ክስተት አይደለም፡፡ ለዚህም ትንታኔያችን ማሳያው ሁለት ነው፡፡

 

የመጀመሪያው ምድረ ሙላዱ /መካነ ሙላዱ/ ከኢትዮጵያ ያልሆነው እና ከኢትዮጵያ ተልኮ ሄዶ ከእስክንድርያው ፓትርያርክ በቅዱስ አትናቴዎስ ዘንድ ኤጲስ ቆጶስ ሆኖ ተሾሞ የመጣው ቅዱስ ፍሬምናጦስ አባ ሰላማ ከሣቴ ብርሃን ነው፡፡ በአራተኛው መቶ ዓመት “ቅዱስና ያለ ተንኮል የሚኖር ነውርም የሌለበት ከኀጢአተኞችም የተለየ ከሰማያትም ከፍ ያለ እንደዚህ ያለ ሊቀ ካህናት ይገባናል” /ዕብ.7፥26/ ብሎ ሐዋርያው ቅዱስ ጳውሎስ ስለ ክርስቶስ ሊቀ ካህንነት እንደተናገረው፤ ሊቀ ካህናት ኢየሱስ ክርስቶስ ከሾማቸው ከሐዋርያት ሐረገ ክህነት ተያይዞ የመጣ የሐዋርያት ተከታይ የሆነ ሊቀ ካህናት ማግኘት ይገባል ብላ የኢትዮጵያ ቤተ ክርስቲያን ጳጳስ እንዲያስመጣላት ቅዱስ ፍሬምናጦስ አባ ሰላማን ወደ እስክንድርያ ስትልክ በሃይማኖት “ብሔርተኝነት” እንጂ በወንዛዊ- በጎጣዊ- በዘውጋዊ ብሔርተኝነት አይደለም፡፡ ቅዱስ አትናቴዎስ የእስክንድርያው ፓትርያርክም ራሱኑ /ቅዱስ ፍሬምናጦስን/ ሾሞ የላከው በጎጠኝነት- በዘውገኝነት- በወንዘኝነት ሳይሆን በሃይማኖት ብሔርተኝነት መሆኑን ማስታወስ እንወዳለን፡፡

 

ሁለተኛው ምድረ ሙላዳቸው ከኢትዮጵያ ያልሆኑ በአምስተኛው መቶ ክፍለ ዘመን /479 ዓ.ም. አካባቢ/ የሮማ ግዛት ከነበሩ ልዩ ልዩ አገሮች ዘጠኝ ቅዱሳን ወደ አገራችን መምጣት ነው፡፡ ተሰዐቱ ቅዱሳን በእምነት መሰሎቻቸው የሆኑ ክርስቲያኖች ወደሚኖሩባት ሀገር ወደ ኢትዮጵያ ተሰደው ሲመጡ ከነትምህርታቸው ቅድስናቸውን የተቀበልነው፤ እነርሱም በስደት በሚኖሩበት አገር ሥርዐተ ምንኩስናን ያስፋፉት፤ ገዳማዊ ሕይወትንና ምናኔን ያስተማሩት፣ ገዳማትን በየቦታው ያቋቋሙትና ያልተተረጎሙትን መጻሕፍት ወደ ግእዝ የተረጎሙት በሃይማኖት “ብሔርተኝነት” እንጂ በወንዛዊ- ጎጣዊና- ዘውጋዊ ብሔርተኝነት አለመሆኑን ማስታወስ እንፈልጋለን፡፡

 

በዚህ መልኩ የመጣውን ሥርዐተ ሢመት በሥጋዊና በደማዊ ፍላጎት ማጉደፍ ሥርየት የሌለው በደል ነው፡፡ ትናንት አባቶቻችን በሃይማኖት “ብሔርተኝነት” ቤተ ክርስቲያናችን በግብጽ ቤተ ክርስቲያን የአስተዳደር ጥገኝነት ተላቃ ራሷን እንድትችልና ከራሷ የቤተ ክርስቲያን መሪዎችን እንድትሾም ብርቱ ተጋድሎ ያደረጉት በወንዛዊ- ጎጣዊና- ዘውጋዊ ብሔርተኝነት እንድንራኮትበት ሳይሆን በሃይማኖት ብሔርተኝነት ወደ ተሻለ ምዕራፍ እንድናሸጋግራት ነበር፡፡

 

ትናንት አባቶቻችን በወንዝ- በጎጥ- በዘውግና ቋንቋ ሳይቧደኑና ሳይደራጁ በሃይማኖት ብሔርተኝነት ጳጳሳትን ሾመዋል፤ ሞያና ሞያተኛን አገናኝተው የአገልግሎት ምደባ አድርገዋል፡፡ ከብሔርና ነገድ በላይ ለሃይማኖት ብሔርተኝነት ተገቢውን ዋጋና ክብር ሰጥተው ቤተ ክርስቲያናቸውንና መንጋቸውን በጥብዓት በመንኖ ጥሪትና በትግሃ ሌሊት አገልግለው ላያልፉ አልፈዋል፡፡

 

አስቀድመን ለመግለጽ እንደሞከርነው ዛሬ ከሃይማኖት “ብሔርተኝነት” ይልቅ ወንዛዊ- ጎጣዊ- ዘውጋዊ ብሔርተኝነቱ ገንኖ ወጥቷል፡፡ ብርቱ የተባሉትን ሁሉ እየቆረጠ ሲጥል እያስተዋልንም ነው፡፡ በዚህም የተነሣ ለቤተ ክርስቲያኒቱ ከፍተኛ ሢመት የሚታጩ አበው መንፈሳዊ ሕይወታቸው፣ ሞያዊ ብቃታቸው፣ የአመራር ክሂሎታቸው፣ ዐቃቤ ሃይማኖተኝነታቸው ሳይሆን ወንዛዊ- ጎጣዊ- ዘውጋዊ ተክለ ቁመናቸው መስፈርት እስኪመስል አባቶችን፣ ሊቃውንተ ቤተ ክርስቲያንና ምእመናን አቧድኖ ለማፋጀት የተዘጋጁ ወገኖች ብቅ ብቅ ማለት መጀመራቸውንም እንገነዘባለን፡፡

 

የሃይማኖት “ብሔርተኝነት” ደፍቀው ወንዛዊ- ጎጣዊና- ዘውጋዊ ብሔርተኝነት የሚያቀነቅኑ እነዚህ ወገኖች ለቤተ ክርስቲያናችን ልዕልና፣ ዕድገትና ልማት እንዲሁም ለምእመናን መብዛትና መጽናናት የሚያስቡ አለመሆናቸውን ከዚሁ ድርጊታቸው መረዳት ችለናል፡፡ ይልቁንስ ለእነርሱ ቀኝ እጅ ሆኖ፤ የእነርሱን ፍላጎት የሚያስፈጽም “የተረኞች” አባት ፍለግ ውስጥ የገቡ ሰዎች ቁመናን ገንዘብ ያደረጉ መሆናቸውንም ተረድተናል፡፡

 

ቤተ ክርስቲያኒቱ በቀኖናዋ የ”ተረኞች ፓትርያርክ” ሥርዐተ ሢመት የላትም፤ እንዲኖራትም አልተፈቀደም፡፡ ፕትርክና በወንዛዊ- ጎጣዊና- ዘውጋዊ ተረኝነት የሚገኝ ሳይሆን እግዚአብሔር ባወቀው በግብረ መንፈስ ቅዱስ የሚገኝ ሢመት መሆኑን መገንዘብ ያስፈልጋል፡፡ ሐዋርያው ቅዱስ ጳውሎስ “አንዱ እኔ የጳውሎስ ነኝ፤ ሁለተኛውም እኔ የአጵሎስ ነኝ ቢል ሰዎች ብቻ መሆናችሁ አይደለምን? አጵሎስ እንግዲህ ምንድር ነው? ጳውሎስስ ምንድር ነው? በእነርሱ እጅ ያመናችሁ አገልጋዮች ናችሁ፤ ለእያንዳንዳቸውም ጌታ እንደሰጣቸው ያገለግላሉ፡፡ እኔ ተከልሁ አጵሎስም አጠጣ፤ ነገር ግን እግዚአብሔር ያሳድግ ነበር፡፡ እንግዲያስ የሚያሳድግ እግዚአብሔር እንጂ የሚተክል ቢሆን ወይም የሚያጠጣ ቢሆን አንዳች አይደለም፡፡ የሚተክልና የሚያጠጣ አንድ ናቸው፤ ነገር ግን እያንዳንዱ እንደራሱ ድካም መጠን የራሱን ደመወዝ ይቀበላል” 1ኛ ቆሮ.3፥4-81 ያለውን በዕዝነ ልቡና መያዝናም ተገቢ ነው፡፡

 

ከዚህ አኳያ የ”ተረኝነት ሥርዐተ ፕትርክና” አስተሳሰብ ፍጹም ሥጋዊ ከመሆኑም በላይ ለቅድስት ቤተ ክርስቲያናችን እጅግ አዋራጅና ጎጂ ነው፡፡ የዚህ ፍጹም ሥጋዊ አስተሳሰብ አቀንቃኞች ከወዲሁ ራሳቸውን ተረኛ ጥቅመኛ አድርገው የሰየሙ ናቸው፡፡ መቼ ነው እኛ ደግሞ አስወጪ አስገቢ የምንሆነው? ተረኛ አሿሚ፣ አሻሪ ሆነን ቤት የምንሠራው፤ መኪና የምንገዛው ባዮች መሆናቸውንም መገንዘብ ያስፈልጋል፡፡

 

እንዲህ ዐይነቱ ፍጹም ሥጋዊ ቅኝት የሚያመለክተው አንድ ነገር ነው፡፡ የሃይማኖት “ብሔርተኝነት” እያጸጸ መምጣቱንና ውስጡ ጥቅመኝነት ሆኖ ሽፋኑ ወንዛዊ- ጎጣዊ- ዘውጋዊ የሆነ ብሔርተኝነት መሠረት እየያዘ መሆኑን ነው፡፡

 

እናም መጪውን ጊዜ ለቤተ ክርስቲያን የተሻለና በጎ ከማድረግ አኳያ የጊዜውን አበው፣ ሊቃውንትና ምእመን በሃይማኖት “ብሔርተኝነት” ዋጅቶ ከወንዛዊ- ጎጣዊ- ዘውጋዊ ብሔርተኝነት ደዌ መፈወስ አማራጭ የሌለው መፍትሔ ነው፡፡

 

የመጪውን ጊዜ ፓትርያርክ አሰያየምም በሃይማኖት “ብሔርተኝነት” መዋጀት በመንፈሳዊነታቸው እና በአመራር ክሂሎታቸው እንጂ በጎጣዊ- ወንዛዊ- ዘውጋዊ ማንነታቸው መሆን የለበትም እንላለን፡፡ አባቶቻችን ለቤተ ክርስቲያኒቱ ከፍተኛ ሢመት መብቃት ያለባቸው በአባትነታቸው እንጂ መልክዐ ምድራዊ ብሔርተኝነት በወለደው ወንዛዊነት- ጎጣዊነት- ዘውገኝነት አይደለም፡፡

 

ለተግባራዊነቱ ደግሞ በመንፈስ ቅዱስ የሚመራው፣ የመንበረ ሐዋርያት ወራሽና የቤተ ክርስቲያኒቱ የበላይ አካል የሆነው የቅዱስ ሲኖዶስ አባላት የአንበሳውን ድርሻ መውሰድ አለባቸው እንላለን፡፡

 

“አባ እገሌ “እገሌ ፓትርያርክ ይሁን” ሲል ሌላኛው ደግሞ ሞቼ እገኛለሁ አለ” እያሉ የሚያናፍሱትን ክፉ ወሬ አሉባልታ የሚያደርግ ቁርጠኝነት ከአባቶቻችን ይጠበቅባቸዋል፡፡ ከራስ ይልቅ ለቤተ ክርስቲያን ቅድሚያ እየሰጡ በሥልጣን የሚጣሉ አባቶች ሳይሆኑ ለአንዲት፣ ቅድስት፣ ሐዋርያዊትና ኲላዊት ቤተ ክርስቲያን ዓላማ በጋራ የሚሠሩ አባቶች እንደአሉን እንደሚያረጋግጡ ጽኑ እምነታችን ነው፡፡

 

ብፁዓን አበው ለሢመተ ፕትርክና ዕጩ ሆነው የሚቀርቡት አባቶቻችን መንፈሳዊ፣ ለመምራት ብቃት ያላቸውና ዐቃቤ ሃይማኖት እስከ አሁኑ ድረስ ወንዛዊ- ጎጣዊ- ዘውጋዊ ማንነታቸው ከየትም ሊሆን ይችላል የሚል ተጨባጭ መልእክት እንደሚያስተላልፉም ባለሙሉ ተስፋ ነን፡፡

 

ቤተ ክርስቲያን በቀጣይ ከባድ ግን ልትወጣው የምትችለው ፈተና አለባት፡፡ በቃላት የሚፈታና የሚነገር ሳይሆን በተግባራዊ እንቅስቃሴ የሚፈተነው፡፡ ከዚህ አኳያ ቀጣዩ ጉዞ በሃይማኖት “ብሔርተኝነት” እጅ ለእጅ መያያዝንና ጠንካራ አንድነትን የሚጠይቅ ነው፡፡ ለምን አልተጣሉም? ለምን አልተከፋፈሉም? የሚሉ አጽራረ ቤተ ክርስቲያን አርፈው የሚቀመጡበትም ሁኔታ እንደሌለ መገንዘብ ይቻላል፡፡

 

ይህን የጥፋት ሕልማቸውን እውን ለማድረግ አባቶችን ለመከፋፈል፣ በምእመናን መካከል ልዩነትን ለመፍጠር፣ ሊቃውንቱን ለማጥላላትና ቤተ ክርስቲያኒቱን ለማዳከም ጥረታቸውን እንደሚቀጥሉም ይታመናል፡፡ ብፁዓን አበውም፣ ሊቃውንተ ቤተ ክርስቲያንም ምእመናንም ይህን አውቀው በሃይማኖት “ብሔርተኝነት” ጠንክሮ መጓዝ ይጠበቅባቸዋል እንላለን፡፡

 

ወስብሐት ለእግዚአብሔር


  • ምንጭ፡- ስምዐ ጽድቅ ጋዜጣ 20ኛ ዓመት ቁጥር 1 2005 ዓ.ም.

ከምርጫው ይልቅ ለቅድመ ምርጫው!!

መስከረም 8 ቀን 2005 ዓ.ም.


በስመ አብ ወወልድ ወመንፈስ ቅዱስ አሐዱ አምላክ

 

የረጅም ዘመን ታሪክ ያላት የኢትዮጵያ ኦርቶዶክስ ተዋሕዶ ቤተ ክርስቲያን ይህን ያህል ዘመን ተጉዛ ከዚህ የደረሰችው በተአምር ብቻ አይደለም፡፡ ሁል ጊዜ በጽኑ እምነትና ምግባር እግዚአብሔርን በማመስገንና ሰውን በማገልገል የታወቁ እልፍ አእላፍ ቅዱሳን ካህናትና ምእመናን በውስጧ በመኖራቸው ነው፡፡ በእነዚህ ቅዱሳን አበው በየቦታው ትምህርት ቤቶች እንዲስፋፉና መጻሕፍትም እንዲበዙ የተደረገውም ጥረት ለዚህ ታሪካዊ ዕድገት ያበረከተው አስተዋፅኦ የታሪክ ትዝታ ብቻ ሳይሆን አሁንም በተግባር የሚታይ ሐቅ ነው፡፡

 

በዚህ የታሪክ ጉዞ ውስጥ ሢመተ ጵጵስና በኢትዮጵያ የክርስትና ሕይወት መንፈሳዊና ማኅበራዊ የታሪክ ጉዞ ዘመናትን ያስቆጠረ ታሪክ አለው፡፡ በአራተኛው ምዕት ዓመት ሀገራችን የሙሉ ምሥጢረ ቤተ ክርስቲያን ባለቤት በመሆን ፍጹም በረከተ መንፈስ ቅዱስን ተቀበለች፡፡ በዚህም ወቅት ዛሬ ያለችው ኦርቶዶክሳዊት ተዋሕዶ ቤተ ክርስቲያናችን በመንበረ ጵጵስና ደረጃ ተቋቋመች፡፡

 

ከዚያን ጊዜ ጀምሮ ኢትዮጵያና የኢትዮጵያ ቤተ ክርስቲያን እንደ ቀለምና ብራና እንደ ቃልና አንደበትም ተዋሕደው “ከኀይል ወደ ኀይል” ከክብር ወደ ክብር፣ ከበረከትም ወደ በረከት ሲጓዙም ኖረዋል፡፡ እንደገናም “በጸጋ ላይ ጸጋን ተቀበልን” እንደተባለው ከ1951 ዓ.ም. አንሥቶ ላለፉት 53 ዓመታት በታላቅ መንፈሳዊ ሥነ ሥርዐት የምናከብረውን ፓትርያርካዊ ክብር ተጎናጸፈች፡፡ አክሊለ በረከትን ተቀዳጀች፤ ፓትርያርካዊ በትረ ክህነትን ጨበጠች፤ መንበረ ፓትርያርክንም ዘረጋች፡፡ ይህን የረጅም ጊዜ ጉዞ ስንመለከት የቤተ ክርስቲያናችን ዕድገትና ልዕልና በከፍተኛ ጥረትና መሥዋዕትነት የተገኙ መሆናቸውን እንረዳለን፡፡

 

ቤተ ክርስቲያናችን ምን ጊዜም አገልግሎቷን ሳታቋርጥ ለሀገርና ለሕዝብ ጠቃሚ የሆኑ መንፈሳዊና ማኅበራዊ አገልግሎቷን ስታበረክት ኖራለች፡፡ ይሁን እንጂ ቤተ ክርስቲያን በዓለም ያለች እንደመሆንዋ በዚህ ጉዞ ውስጥ ሙሉ በሙሉ ከተፅዕኖ ነጻ አልነበረችም፡፡ በእግዚአብሔር ኀይል ያጋጠሟትን ፈተናዎች እየተቋቋመች እዚህ ደርሳለች፡፡

 

ከዚህ ተጨባጭ ሐቅ ስንነሣ ያካሄድናቸው ሢመተ ፕትርክናዎች ሁሉ በተቀመጠው ቀኖናዊ አግባብና በሚፈለገው አቋምና ብቃት ሥሉጣን /የተፋጠኑ/ ሆነው የተጓዙ ነበሩ ብለን በሙሉ ድፍረት መናገር አንችልም፡፡ በርግጥ በሥጋዊውም ሆነ በመንፈሳዊው ዓለም የሰው ልጆች ከመካከላቸው ብልጫ ያለውን ሰው ለከፍተኛ ሓላፊነት ይመርጣሉ፡፡ አንዱን ሰው ከሌላው የበለጠ የሚያደርገው ለመንፈሳዊና ማኅበራዊ አገልግሎት ያለው ቅንና ቆራጥ አስተሳሰብ፣ አቅም ያለው የሥራ አፈጻጸምና የመሳሰለው መልካም ሥራ ሚዛን ሲደፋ እንደሆነም እንገነዘባለን፡፡

 

በዕለታዊ የሥራ አፈጻጸምና በማኅበራዊ አገልግሎት ከሁሉ የበለጠ አስተዋፅኦ በማድረግ የተመሰከረለትን ሰው ለከፍተኛ ሓላፊነት መምረጥ ተመራጩን ለመጥቀም ሳይሆን ሥራውን በማክበር ተገልጋዩን ወገን በበለጠ ለማገልገል ነው፡፡ ይህም የመራጮችን አስተዋይነትና ለትክክለኛ ዓላማ የቆሙ መሆናቸውን ይገልጣል፡፡ የተጓዝንበትም መንገድ መመዘን ያለበት አንዱ ከዚህ መሆን እንደአለበትም እናምናለን፡፡

 

ከዚህ አኳያ ለኢትዮጵያ ኦርቶዶክስ ተዋሕዶ ቤተ ክርስቲያን በአሁኑ ጊዜ የሚያስፈልጋት ፓትርያርክ ምን ዓይነት አባት ነው የሚለው ጥያቄ የመላው ሕዝበ ክርስቲያን ቢሆንም ይህን ጥያቄ ሊመልስ የሚችለው ምርጫው በራሱ ሳይሆን የምርጫው መደላደል መሆኑን መረዳት ያስፈልጋል፡፡ ስለዚህ ከምርጫው ይልቅ ለቅድመ ምርጫው ቅድሚያ መስጠት የወቅቱ ግዴታ ሊሆን ይገባል፡፡

 

በቅዱስ ሲሄዶስ መሪነት፣ ሊቃውንት ካህናትና ምእመናን በነጻ አሳብና በመንፈሳዊ ትብብር እየተመካከሩ ያለምንም አድልዎና ተፅዕኖ መንፈሳዊ አባታቸውን መምረጥ እንዲችሉና ተመራጩም የቀኖና ቤተ ክርስቲያን ጥያቄ ሳይነሣበት ቤተ ክርስቲያኒቱን በሰላምና በአንድነት እንዲመራ ከምርጫው ይልቅ አሁንም ለምርጫው የሚያስፈልጉ መደላድሎች ቅድሚያ ሊሰጣቸው ይገባል እንላለን፡፡

 

ከእነዚህም መደላድሎች ውስጥ ዋናዎቹ ሦስት ናቸው፡፡ የመጀመሪያውና ዋነኛው የአራተኛውን ፓትርያርክ የብፁዕ ወቅዱስ አቡነ መርቆርዮስን መሰደድና የአምስተኛው ፓትርያርክ የብፁዕ ወቅዱስ አቡነ ጳውሎስን ሢመተ ፕትርክና ተከትሎ የተከሰተው የቤተ ክርስቲያን ለሁለት መከፈል ነው፡፡ ከዚህ አኳያ የተጀመረው ቤተ ክርስቲያንን አንድ የማድረግ ጥረት በእርቀ ሰላም እንዲቋጭ ተገቢውን ርብርብ ማድረግ ቅድሚያ ሊሰጠው ይገባል፡፡ በሁለቱ አባቶች መካከል ተፈጥሯል የተባለው የቀኖና ቤተ ክርስቲያን ችግር በቤተ ክርስቲያኒቱ በራስዋ ሕጎች፣ ደንቦችና መመሪያዎች መሠረት በመዋቅራዊ አካላቷ ተቋማዊ አሠራር እንዲፈታ መደረግ አለበት፡፡

 

ሁለተኛው የቅድመ ምርጫ መደላድል፤ ሕጎችን፣ ደንቦችንና መመሪያዎችን ማውጣት ወይም ማሻሻል የሚያስፈልግ ከሆነ ተገቢነታቸው በሊቃውንቱ ተሳትፎ እየተጠና ጉዳዩ በቀጥታ በሚመለከተው በቅዱስ ሲኖዶስ እየተወሰነ ተግባራዊ ማድረግ ነው፡፡ ሦስተኛው መደላድል ደግሞ የጠቅላይ ቤተ ክህነቱን ድርጅታዊ አወቃቀር ለማሻሻል የቀረቡና የሚቀርቡ ጥናቶችን በማዳበር የለውጥ ሂደቱን ለመምራት የሚችልና መንፈሳዊነት ሞያዊነት፣ ግልጽነት፣ ተጠያቂነትና ፍትሐዊነት የጠቅላይ ቤተ ክህነቱ የአሠራር መርሕ መሆኑን በተጨባጭ ሊያረጋግጥ የሚችል የቴክኒክ ኮሚቴ በይፋ ማቋቋም ነው፡፡

 

የእነዚህ ሦስት መደላድሎች መቅደም የቤተ ክርስቲያኒቱን አስተዳደራዊ ነጻነት ከማጎናጸፍና የተለያዩ ሕገ ወጥ ቡድኖችን በዘለቄታዊነት ከአስተዳደራዊ ጣልቃ ገብነት እንዲታቀቡ ከማድረጋቸውም በላይ የተከፈለችውን አሐቲ ቅድስት ቤተ ክርስቲያንን ወደ አንድነት ይመራል የሚል ጽኑ እምነት አለን፡፡

 

ስለሆነም ብፁዓን አበው ሊቃነ ጳጳሳት፣ ሊቃውንተ ቤተ ክርስቲያን፣ ምእመናን የቤተ ክርስቲያኒቱ ጉዳይ ያገባናል የምትሉ ምሁራን፣ ሰንበት ትምህርት ቤቶች፣ የመንፈሳዊ ኮሌጆቻችን ደቀ መዛሙርትና ልዩ ልዩ ማኅበራት ለቤተ ክርስቲያኒቱ እግዚአብሔር ጥሩ መሪ እንዲሰጥ ቅዱስ ሲኖዶስ ያወጀውን የሁለት ሱባኤ ጸሎተ ምኅላ ከመፈጸም ጎን ለጎን ለመደላድሎቹ ስኬት ሁላችንም የድርሻችንን ልንወጣ ይገባል፡፡ ከዚህ አንጻርም የግል ጥቅማቸውን የሚያሳድዱ አንዳንድ ግለሰቦችንና ቡድኖችን ሕገ ወጥ እንቅስቃሴ በንቃት መከታተል ያስፈልጋል፡፡

 

ከዚሁ ጋር ለእነዚህ ሕገ ወጥ አካሄዶች ሽፋን የሚሆኑና በመሠረቱም ተገቢም ትክክለኛም ያልሆኑ መግለጫዎች፣ ቃለ ምልልሶችና ጽሑፎች እንዲታረሙና በቀጣይም እንዲቆጠቡ መደረግ ይኖርበታል እንላለን፡፡

 

በመንፈስ ቅዱስ የሚመራው፣ የመንበረ ሐዋርያት ወራሽና የቤተ ክርስቲያኒቱ የሥልጣን መዋቅር ሁሉ የበላይ አካል የሆነው ቅዱስ ሲኖዶስ ለምርጫው ሳይቸኩል ለቅድመ ምርጫው ትኩረት ሰጥቶ እንደሚሠራ ጽኑ እምነታችን ነው፡፡

 

ወስብሐት ለእግዚአብሔር


ስምዐ ጽድቅ 19ኛ ዓመት ቁጥር 24 2005 ዓ.ም.


አርአያነት ያለው ተግባር

ነሐሴ 3 ቀን 2004 ዓ.ም.


በስመ አብ ወወልድ ወመንፈስ ቅዱስ አሐዱ አምላክ


አሁን ያለው የክርስትናው ዓለም ከአለመኖር ወደ መኖር የመጣው ቅድስት ቤተ ክርስቲያን ዓለም አቀፍም፤ ሀገር አቀፍም መንፈሳዊ ተቋም በመሆን ስትፈጽመው በኖረችው ሐዋርያዊ አገልግሎት ነው፡፡ ይህን ዓለም አቀፍና ሀገር አቀፍ መንፈሳዊ አገልግሎት ስትፈጽም የኖረችበት ዘመንም በአኃዝ ሲቀመር ከሁለት ሺሕ ዓመታት በላይ አስቆጥሯል፡፡

 

ቤተ ክርስቲያን ከዚህ ዘመን የደረሰችው ያለ ርእይና ዕቅድ በዘፈቀደ በመጓዝ አይደለም፡፡ አባቶቻችን ዘመንን እየቀደሙ እያቀዱና እየተገበሩ፤ አተገባበራቸውንም እግዚአብሔርን አጋዥ አድርገው እየገመገሙ የተዛነፈውንም እያቀኑ ለቤተ ክርስቲያንም ሆነ ለትውልድ የሚሆነውን በጎ ነገር ሁሉ ሠርተው ቀምረው አስተላልፈዋል፡፡

 

ይህን የአባቶቻችን ዓቅዶ መሥራት፣ አፈጻጸሙን ቆም ብሎ ማየትን የሚዘክር ተግባር በጅማ ሀገረ ስብከት እያስተዋልን ነው፡፡ የሀገረ ስብከቱ ራስን የመገምገም ተግባርም ለሎሎችም አህጉረ ስብከት አርአያነት ያለው ነው፡፡

 

በአንዳንድ አህጉረ ስብከት እየደበዘዘ ወይም እየጠፋ ያለውን በዕቅድ መሥራትና አፈጻጸሙን የመገምገም ባህል ከማጎልበት አኳያ የጅማ ሀገረ ስብከት ተግባር ተስፋ ሰጪ ነው፡፡ ሀገረ ስብከቱ በየዓመቱ ጠቅላላ ጉባኤ ማካሔዱ ደግሞ ይበል የሚያሰኝ አካሄድ ነው፡፡

 

በዚህ ዓመታዊ ጠቅላላ ጉባኤ ላይ በሀገረ ስብከቱ ውስጥ የሚገኙ የወረዳ ቤተ ክህነት ሥራ አስኪያጆች፣ የአድባራትና ገዳማት አስተዳዳሪዎች የሰበካ ጉባኤ አባላት፣ የሰንበት ትምህርት ቤቶች ተወካዮችና የማኅበራት ተወካዮች እንዲሳተፉ ከመደረጉም በላይ የእርስ በርስ የልምድ ልውውጥ መደረጉ በራሰ እጅግ ጠቃሚ መሆኑን እንገነዘባለን፡፡

 

ጠቅላላ ጉባኤው በጨዋነት፣ በመደማመጥና በመከባበር መንፈስ ችግሮችን ነቅሶ በማውጣት በግልጽ ተወያይቶ ለመፍትሔው ሁሉም የድርሻውን እንዲያበረክትና በጠቅላላ ጉባኤው የተላለፉትን ውሳኔዎች አተገባበር መከታተል መቻሉ፣ ያልተተገበሩ ሥራዎች ለምን አልተሠሩም ብሎ መጠየቅ ላይ መደረሱ፣ የሀገረ ስብከቱ ሊቀ ጳጳስም ሆኑ የሀገረ ስብከቱ ሠራተኞች በሥራቸው ያሉትን ካህናትንም ሆነ ምእመናንን ገንቢ ሂስ በሆደ ሰፊነት መቀበላቸው፤ ሌሎች አህጉረ ስብከት በአርአያነቱ ሊወስዷቸው የሚገቡ በጎ ተግባራት ናቸው እንላለን፡፡

 

በዕቅድ ተመርቶ መሥራትን፣ የዕቅድን አተገባበር መከታተልና የመቆጣጠርን አሠራርን ምን ታቀደ ምን ተሠራ ለምን አልተሠራም ብሎ የዓመቱን የአገልግሎት ጉዞ መለስ ብሎ መመልከትን እንደ ጅማ ሀገረ ስብከት ሁሉ ሌሎችም አህጉረ ስብከት ሊዘምቱበት ይገባል፡፡

 

ዐቅዳ የምትሠራ የሠራችውንም ሥራ ቆም ብላ የምትገመግም ቤተ ክርስቲያን፤ ምንም ጊዜ ቢሆን በየትኛውም ሁኔታ ድል አድራጊ ናት፡፡ ግልጸኝነትና ተጠያቂነትም ተቋማዊ መሠረት እንዲይዙ ያስችላታል፡፡ ለብልሹና አድሏዊ አሠራሮች የተጋለጡ የልማትም ሆነ አስተዳደራዊ ተቋማቶቿን ወደተሻለ ምዕራፍ እንድታሸጋግር ያግዛታል፡፡

 

ከዚህም በላይ ቤተ ክርስቲያናችን ተከታይይዋን ሕዝብ በሰበካ ጉባኤ በማደራጀትና በዚህም ውጤት በተገኘው የገቢ አቅም ጥንካሬ ስብከቷ፣ ትምህርቷ ሕልውናዋ ተጠናክሮ እንዲቀጥል፤ የቤተ ክርስቲያን ችግር ሆነው የኖሩትንም ሆነ የሚሆኑትን አጽራረ ቤተ ክርስቲያን ለመመከት የጅማ ሀገረ ስብከት አርአያነት ለትልቋ ቤተ ክርስቲያናችን ወሳኝ ነው፡፡

 

አጽራረ ቤተ ክርስቲያን ዛሬ ጉዟቸውን ወደ ቤተ ክርስቲያናችን በማድረግና በእኛዋ ቤተ ክርስቲያን ላይ ቀስታቸውን በማነጣጠር ወደ መንጋችን በረት ዘልቀው ለመግብት እያደረጉት ያለውን ሙከራ በሙከራ ደረጀ ለማስቀረት ብሎም እንዳይታሰብ ለማድረግ እንደ ጅማ ሀገረ ስብከት አቅዶ ለመሥራትንና አፈጻጸምን ገምግሞ ለቀጣይ ሥራ መዘጋጀት ይገባል እንላለን፡፡

 

ወስብሐት ለእግዚአብሔር


ምንጭ፡- ስምዐ ጽድቅ ጋዜጣ 19ኛ ዓመት ቁጥር 22 ከነሐሴ 1-15 ቀን 2004 ዓ.ም.

“ከሁሉ በላይ በምትሆን፤ ሐዋርያት በሰበሰቧት፤ በአንዲት፤ ቅድስት ቤተ ክርስቲያንም እናምናለን”

ሐምሌ 10 ቀን 2004 ዓ.ም.


ይህ አንቀጸ ሃይማኖት የጉባኤ ቁስጥንጥንያ አንቀጸ ሃይማኖት ነው፡፡ የእውነተኛዋ ቅድስት ቤተ ክርስቲያን መታወቂያ ትእምርትም ነው፡፡ ይህን አጉድሎ መገኘት የቤተ ክርስቲያንን ሕግና ሥርዐት ማፍረስ ብቻ ሳይሆን እምነትንም እንደማጉደል ይቆጠራል፡፡ እንዲህ ዐይነት ማንነታዊ ተክለ ቁመናን ገንዘብ ያደረገ ግለሰብም ሆነ ማኅበር ራሱን የክርሰቶስ አካልና አባል አድርጎ አለመቀበሉን ያሳየናል፡፡ በክርስቶስ ብቻ አምኖ በግለኝነት መኖር በቂ አይደለም፡፡ የክርስቶስ አካል በሆነችው ሐዋርያት በሰበሰቧት፣ በአንዲት፣ ቅድስት ቤተ ክርስቲያንም አምኖ አባል መሆን ሃይማኖታዊ ግዴታ ነው፡፡

 

ይሁንና ይህን አንቀጸ ሃይማኖት ያለ ዐውዱና ከተሸከመው መልእክት ውጪ በመለጠጥና አዲስ የትርጓሜ ቅርጽ በመስጠት በፕሮቴስታንታዊ ተሐድሶ መናፍቃን ቅላጼና ወዝ “ማኅበራት አያስፈልጉም” የሚል እና ራሱን “ጉባኤ አርድእት ዘኦርቶዶክስ ተዋሕዶ” ብሎ የሚጠራ የቤተ ክርስቲያናችን ሕመም የሆነ ቡድን ያለ ቤተ ክርስቲያኒቱ ዕውቅናና ይሁንታ ከሰሞኑ በመንበረ ፓትርያርክ ጠቅላይ ቤተ ክህነት መሽጎና የተለያዩ ስብሰባዎችን እያካሄደ እንደሚገኝ ማረጋገጥ ችለናል፡፡

 

ይህን ተከትሎም ከሰሞኑ የመንበረ ፓትርያርኩ ጠቅላይ ቤተ ክህነት ምንም ዓይነት ስብሰባ ያለ ቤተ ክርስቲያኒቱ ዕውቅና በግቢ ውስጥ እንዳይካሄድ የሚከለክል ደብዳቤም ለሚመለከታቸው አካላት ማሰራጨቱንም ለማወቅ ችለናል፡፡

 

የዚህ የጥፋት ቡድን ዋነኛ ዓላማም ራሱን የቤተ ክርስቲያኒቱ ተቆርቋሪ አድርጎ በመሰየም እና በተቆርቋሪነት ሽፋን ሐዋርያት የሰበሰቧትን አንዲት፤ ቅድስት ቤተ ክርስቲያን መከፋፈልና የዚሁ ግብር ተዳባይ የሆኑትን እውነተኛ ማኅበራት ህልውና ማክሰምና ጥብዓት ያላቸውን ብፁዓን አበውንና ሊቃውንተ ቤተ ክርስቲያን መገዳደር ነው፡፡

 

እንዲህ ዐይነቱን የጥፋት ዓላማ ያነገበው እና “ማኅበር አያስፈልግም” እያለ ራሱን ወደ ማኅበርነት ለማሳደግ ዕቅድ ይዞ የሚንሳቀሰው ቡድን የጠቅላይ ቤተ ክህነቱን ጥቂት የመምሪያ ሓላፊዎችንንና ሠራተኞችን እንዲሁም በከፍተኛ ትምህርት ተቋማት የሚሠሩ ግለሰቦችን በመሰብሰብ በመመሥረቻ ሰነዱ ላይ ማስፈረሙንም ከሰነዱ ለማወቅ ችለናል፡፡ በአንጻሩ ደግሞ አብዛኞቹ ስብሰባው ላይ በመገኘት የጥፋት ግንባሩ የተደራጀበት መንገድና ዓላማ ለቤተ ክርስቲያን አደጋ እንዳለው አቋማቸውን ገልጠው የወጡ እንዳሉም መገንዘብ ችለናል፡፡

 

የአደራጆቹን ማንነት ስንመለከት ደግሞ ያው መልኩንና ስልቱን በየጊዜው የሚቀያይረው የፕሮቴስታንታዊ ተሐድሶ ኑፋቄ ሰለባ የሆኑ ግለሰቦች መሆናቸውንም አረጋግጠናል፡፡ እየተጓዙበት ያለው የጥፋት መንገድም የተለመደው የተሐድሶ መናፍቃን ስልተ መንገድ ነው፡፡

 

እናም የኢትዮጵያ ቤተ ክርስቲያን የሁለት ሺሕ ዓመት ታሪክ ያላት ጥንታዊት ቤተ ክርሰቲያን ትሁን እንጂ መንበሯን ከሊቀ ጵጵስና ወደ ፕትርክና ለማሳደግ አንድ ሺሕ ስድስት መቶ መራራ ዓመታትን ገፍታለች፡፡ በዚህ ማለፏ ደግሞ ሌሎች አኀት አብያተ ክርስቲያናት የደረሱበት የአደረጃጀት ችግር እንዳጋጠማትና ልጆቿን ጊዜው በሚጠይቀው መንገድ ለመሥራት የሚያስችላትን አካሄድ እንዳትጠቀም አድርጓት መቆየቱን በሚገባ እንገነዘባለን፡፡

 

ያለማቋረጥ የተደራረበባት ችግር ሐዋርያዊ ተልእኮዋን እንዳዳከመውና ሊቃውንቷንም ተጠራጣሪና ተከላካይ ብቻ እንዳደረጋቸው ሁሉ የራሷ ሲኖዶስ ሳይኖራት ለረጅም ዓመታት መምጣቷም አሁን ያሉባት ችግሮች የአሁን ብቻ ላለመሆናቸው ጠቋሚ መሆናቸውንም እንረዳለን፡፡

 

እነዚህን ዘመናትን ተሻግረው የመጡ ችግሮች ደግሞ ገና ለጋ ለሆነውና የሃምሳ ዓመታት ተሞክሮ ላለው ቤተ ክህነት ብቻ ትቶ “ብትችል ተወጣው፣ ባትችል የራስህ ጉዳይ” የሚያሰኝ አለመሆኑንም መረዳት ያስፈልጋል፡፡

 

እንኳን የእኛ ቤተ ክርሰቲያን በጠንካራ ሲኖዶስ በመምራትና በሠለጠኑና በተማሩ አማኞቿ የምትታወቀው የግብጽ ቤተ ክርስቲያን በሃያኛው መቶ ክፍለ ዘመን መጀመሪያ ላይ ለተደቀነባት የዓለማዊነትና የፕሮቴስታንት ተሐድሶ ፈተና፣ የርእይ ብዥታና የአስተዳደር ለውጥ ታላቁን አዎንታዊ ድጋፍ ያገኘችው በዘመኑ በነበረው ሊቀ ሐቢብ ጊዮርጊስ አደራጅነት ከተቋቋሙት ማኅበራት እንደነበረም መገንዘብ ያስፈልጋል፡፡

 

ይህ ሊቅ አሁን ባለው የግብጽ ሲኖዶስም ታላቅ ከበሬታ ያለውና እርሱ ባስጀመረው እንቅስቃሴ ቤተ ክርስቲያኒቱ በአሁኗ የኢስላም ሀገር ግብጽ ላይ ታላቅ ሚና እንድትጫወትና ከዓለም ሁሉ የሚመጡባትን ፈተናዎች ተቋቁማ ብቻ ሳይሆን ድል እያደረገች እንድትጓዝ አስችሏታል፡፡

 

በተሳሳተና በፈጠራ መረጃ የተሳከሩት የዚህ የጥፋት ቡድን አደራጆች ሊረዱት የሚገባው ነጥብ፤ ለጠንካራዋ የግብጽ ቤተ ክርስቲያን የማኅበራት አስፈላጊነት ይህን ያህል ከሆነና የሶርያና የሕንድ አብያተ ክርስቲያናት ከመቶ ዓመት በፊት ጀምረው ማኅበራትን በዘመናዊ መንገድ እያቋቋሙ ተጠቃሚ ከሆኑ የኢትዮጵያ ቤተ ክርስቲያንማ እንዴት አያስፈልጓት? አንድ ብቻ አይደለም ገና ብዙ ማኅበራት ያስፈልጓታል፡፡

 

ማኅበራቱም ከሁሉ በላይ በምትሆን ሐዋርያት ለሰበሰቧት፤ ለአንዲት ቅድስት ቤተ ክርስቲያን ግብ የሚንቀሳቀሱ፣ ተልእኮአቸውና ዓላማቸው ተለይቶ የሚታወቅ፣ መንፈሳዊ ተግባርን ብቻ የሚፈጽሙ፣ የሚናበቡና በስልት ለአንድ ውጤት የሚተጉ ሊሆኑ እንደሚገባም እናምናለን፡፡

 

ቤተ ክርስቲያኒቱ ዕውቅና ሰጥታቸው የሚንቀሳቀሱ ማኅበራትም አስፈላጊነትም የሚነሣው ከዚሁ ነጥብ መሆኑን መረዳት ያስፈልጋል፡፡ የኢትዮጵያ ኦርቶዶክስ ተዋሕዶ ቤተ ክርስቲያን በምትመራበት ቃለ ዓዋዲ የተገለጡትን የወጣቶች ተግባራት መፈጸም እንደተጠበቀ ሆኖ የቤተ ክርስቲያኒቱ መዋቅር ያልሸፈናቸውን ክፍተቶች ለመሙላት ከማገዝ አንጻር አይደለም አንድና ሁለት ማኅበራት የሌሎች ተጨማሪ ማኅበራት አስፈላጊነት ለድርድር የሚቀርብ አለመሆኑን መገንዘብ ተገቢ ነው፡፡

 

ሐዋርያት የሰበሰቧት አንዲት፣ ቅድስትና ኲላዊት የሆነችው ቤተ ክርስቲያናችን ሦስተኛውን ሺሕ ዘመን እንድትዘልቅ፣ ገዳማትንና አድባራትን የልሂቃን ምንጭ እና የልማት ማእከላት ለማድረግ የሚሠሩ፣ የአብነት ትምህርት ቤቶችንና መንፈሳዊ ኮሌጆቻችን ዘመናዊ ትምህርትን በመጨመር የሚሰጡ የእውቀት ማእከላት ለማድረግ የሚጥሩ፣ ሁለገብ ዕውቀት ያላቸውና ችግር ፈቺ ካህናትን ለማፍራት የሚደረገውን ጥረት የሚያግዙ፣ ዘመናዊ አስተዳደርን በቤተ ክህነቱ በመዘርጋት ተየያዥ ችግሮችን ሁሉ ለመፍታትና ግንዛቤው ያደገና በዕውቀት የበለጸገ ምእመን ማፍራት ግባቸው ያደረጉ በርካታ ማኅበራት ለቤተ ክርሰቲያን ያስፈልጓታል እንላለን፡፡

 

በአንጻሩ ደግሞ “ከሁሉም በላይ በምትሆን፤ ሐዋርያት በሰበሰቧት፤ በአንዲት ቅድስት ቤተ ክርሰቲያን” ሳያምኑ እኲይ ዓላማቸውን ለማስፈጸም ቤተ ክርስቲያኒቷን ጥግ ያደረጉትን እንደ ሰሞኑን የተሐድሶ መናፍቃን መልክ ያሉትን የጥፋት ቡድኖች ደግሞ እንደ ትናንቱ ሁሉ ዛሬም በሃይማኖታዊ ጥብዓት የምንታገላቸው መሆኑን ለማስገንዘብ እንወዳለን፡፡

 

ብፁዓን አባቶቻችንም ቀኖና ቤተ ክርስቲያንን እና ሕገ ቤተ ክርስቲያንን መሠረት አድርገው በፕሮቴስታንታዊ የተሐድሶ ኑፋቄ አራማጆችና እንዲሁም አቀንቃኝ ድርጅቶችና ግለሰቦች ላይ የማያዳግም ውሳኔ ይወስናሉ ብለን እንጠብቃለን፡፡

 

በተለይ ያለ ይሁንታችሁ እና ባለማወቅ የዚሁ የጥፋት ግንባር አባላት ተደርጋችሁ ስማችሁ የተዘረዘረ የቤተ ክርሰቲያናችን ሊቃውንትም ሆነ የመምሪያ ሓላፊዎች ጊዜው ሳይረፍድ ከዚህ የጥፋት ቡድን ራሳችሁን ነጻ በማድረግ ለቤተ ክርስቲያናችሁ ጥብቅና ትቆሙ ዘንድ ጥሪያችንን እናስተላልፋለን፡፡

 

ምእመናንም በየሰነዶቻቸው “ከሁሉም በላይ በምትሆን ሐዋርያት በሰበሰቧት፤ በአንዲት፤ ቅድስት ቤተ ክርስቲያን እናምናለን” እያሉ ግብራቸው እንደማያምኑ ከገለጠባቸው የጥፋት ቡድኖች ራሳችሁን፣ ቤተሰቦቻችሁንና አጥቢያ ቤተ ክርስቲያናችሁን ትጠብቁ ዘንድ ጊዜ አሁን ነው እንላለን፡፡

 

ማኅበረ ቅዱሳን እንደ መንፈሳዊ ተቋምነቱ፤ አባላቱ ደግሞ እንደ አማኝነታቸው ትናንትም ሆነ ዛሬ እንዲሁም ነገ “ከሁሉ በላይ በምትሆን፤ ሐዋርያት በሰበሰቧት በአንዲት፤ ቅድስት ቤተ ክርስቲያን ማመን ብቻ ሳይሆን መስዋዕትነት እየከፈሉና የሚከፍሉባት ቤታቸው መሆኗንም ጠንቅቀው እንደሚያውቁ መረዳት ያስፈልጋል፡፡

 

ማኅበሩም ሆነ አባላቱ ቤተ ክርስቲያናቸውን በዕውቀታቸውም ሆነ በገንዘባቸው የሚያገለግሉ እንጂ እንደ  ጥፋት ቡድኑ አፈ ቀላጤዎች የቤተ ክርስቲያኒቱን ገንዘብ እየበሉ ቤተ ክርስቲያኒቱን በገዛ ገንዘቧ ለማፍረስ በመናፍቃን ደጅ የሚጠኑ አለመሆናቸውን እነዚሁ አካላት /እውነቱ እየመረራቸውም ቢሆኑ/ ሊያውቁ ይገባል፡፡

 

እንግዲህ ቤተ ክርስቲያን አማኞች እንዲድኑባት ያዘጋጀ እግዚአብሔር ነው፡፡ በክርስቶስ መሠረትነት፣ በመንፈስ ቅዱስ አደራጅቶና ቀድሶ እውነተኛይቱን ቤተ ክርስቲያን ሠርቷታል፤ አቋቁሟታል፡፡፡ ስለዚህ እኛም እንደ ዝግጅት ክፍልም ሆነ እንደ አማኝ ከሁሉም በላይ በምትሆን ሐዋርያት በሰበሰቧት፤ በአንዲት፤ ቅድስት ቤተ ክርስቲያንም እናምናለን፡፡

 

ወስብሐት ለእግዚአብሔር

 

ምንጭ፡- ስምዐ ጽድቅ 19ኛ ዓመት ቁጥር 20/2004 ዓ.ም.

20 021

የማኅበረ ቅዱሳን 20ኛ ዓመት ምሥረታ በመከበር ላይ ነው

ግንቦት 2/2004 ዓ.ም.

በ እንዳለ ደምስስ

20 021የእመቤታችን ቅድስት ድንግል ማርያም በዓለ ልደትና የማኅበረ ቅዱሳን 20ኛ ዓመት ምሥረታ እሑድ ሚያዚያ 28 ቀን 2004 ዓ.ም. በጠቅላይ ቤተ ክህነት ስብከተ ወንጌል አዳራሽ በድምቀት ተከበረ፡፡ “ለሁለንተናዊ የቤተ ክርስቲያን እድገት አብረን እንሥራ በሚል መሪ ቃል በማኅበረ ቅዱሳን ህዝብ ግንኙነት ክፍል የተዘጋጀው መርሐ ግብር በብፁዓን ሊቃነ ጳጳሳት በጸሎት ተጀምሮ በዝማሬ በስብከተ ወንጌል አገልግሎትና በብፁዓን ሊቃነ ጳጳሳት ምክር ተካሒዷል፡፡

በመርሐ ግብሩ ላይ ብፁዕ አቡነ ሉቃስ የምዕራብ ትግራይ ሴቲት ሁመራ ሀገረ ስብከት ሊቀ ጳጳስ፣ ብፁዕ አቡነ ቀውስጦስ የአዲስ አበባና የሰሜን ሸዋ ሰላሌ ሀገረ ስብከት ሊቀ ጳጳስ፣ ብፁዕ አቡነ ኤልያስ የጋሞ ጎፋ ሀገረ ስብከት ሊቀ ጳጳስ፣ ብፁዕ አቡነ ሔኖክ የምዕራብ ወለጋ ጊምቢና አሶሳ ሀገረ ስብከት ሊቀ ጳጳስ፣ ብፁዕ አቡነ ዲዮስቆሮስ የደቡብ ትግራይ ማይጨው ሀገረ ስብከት ሊቀ ጳጳስ ተገኝተዋል፡፡

 

በዕለቱ የተጉኙት ሊቃነ ጳጳሳት ማኅበረ ቅዱሳን አስመልክቶ እንዲህ በማለት ገልጸው ነበር፡፡ “የፈተና ጊዜ ነው ፈተናውን የምናልፈው በእግዚአብሔር ረድኤት ነው እግዚአብሔርን በመከተል ነው፡፡ ሌላ ኀይል የለንም፡፡…. እናንተ እግዚአብሔርን መከተል መርጣችኋልና መጨረሻችሁን እግዚመብሔር ያሳመርላችሁ፡፡ በርቱ፡፡” ብፁዕ አቡነ ቀውስጦስ፡፡/

 

“የዚህ ታላቅ፣ ታሪካዊ፣ ሃይማኖታዊ፣ ሥርዓታዊ፣ መንፈሳዊና ሰዋዊ ማኅበር አካላት ሁሉ ሥራ እየሠራችሁ ነው እዚህ የደረሳችሁት ምርት እያመረታችሁ ያላችሁባቸው ዓመታት ምርታችሁንም እያያችሁና እየተጠቀማችሁበት የምትገኙበት ዕለት ነውና እንኳን አደረሳችሁ” /ብፁዕ አቡነ ሉቃስ/

 

ይህ ማኅበር 20 ዓመታት ሲጓዝ እግዚአብሔር ስለረዳው እግዚአብሔር ከማኅበሩ ጋር ስለሆነ እንደ ኤማሁስ መንገደኞች እግዚአብሔር ስለመራው ነው ዛሬ 20ኛውን ዓመት ለማክበር የበቃው በርቱ፡፡ /ብፁዕ አቡነ ዲዮስቆሮስ/

 

20 037ብፁዕ አባታችን አቡነ ጎርጎርዮስ ሊሞቱ ሲሉ ካስተማሯቸው ተማሪዎቻቸው /ማኅበረ ቅዱሳንን ከመሠረቱት/ መካከል ሁለቱን፣ አንዱን በቀኝ አንዱን በግራ አቅፈው፣ ጸሎት አድርገው የሁለቱን ራስ አጋጭተው በመያዝ” በሉ ልጆቼ መቃብሬ ላይ እናንተ ናችሁ የምታለቅሱት እኔ ለኩሼዋለሁ እናንተ አንድዱት አሏቸው ለአትክልተ ጎርጎርዮስ፡፡ የቤተ ክርስቲያናችን መሠረታዊ ምንጭና ግንድ ኢየሱስ ክርስቶስ ቢሆንም የማኅበረ ቅዱሳን ግንድ ደግሞ አቡነ ጎርጎርዮስ ናቸው፡፡ ቅዱስ ሲኖዶስ የሚገባውን ምግብ እያበላና እያጠጣ እዚህ ያደረሰው ማኅበር ነው፡፡” /ብፁዕ አቡነ ኤልያስ/

 

የማኅበሩ ሰብሳቢ  ሊቀትጉሃን ቀሲስ ዶ/ር ሙሉጌታ ስዮም እንደገለጹት ከ1980 ዓ.ም. ጀምሮ በብፁዕ አቡነ ጎርጎርዮስ20 022 ካልዕ በዝዋይ ካህናት ማሠልጠኛ ተተኪ ሰባኪያንን ለማፍራት ባደረጉት ጥረት ለመጀመሪያ ጊዜ ከግቢ ጉባኤያት 12 ተማሪዎችን በማሠልጠን ጀመረ፡፡ ዛሬ ይህ ጥረት አድጎ በጅማ፣ በአዋሳ፣ በድሬዳዋ፣ በባሕርዳርና በማይጨው ሥልጠናው ተጠናክሮ በመቀጠል በሺዎች የሚቆጠሩ መምህራንን ማፍራት ተችሏል፡፡ ብለዋል፡፡ አያይዘውም በመላው ዓለም በአገር ውስጥና በውጪ  የማኅበረ ቅዱሳንን እንቅስቃሴ ሲገልጹ ማኅበረ ቅዱሳን 44 ማዕከላት፣ 333 ወረዳ ማዕከላት 181 ግንኙነት ጣቢያዎች 325 የከፍተኛ ትምህርት ተቋማት ግቢ ጉባኤያትን በማስተባበርና በመምራት ላይ እንደሚገኝ ገልጸዋል፡፡ ከምዕመናን ማኅበረ ቅዱሳንን አስመልክቶ ለተጠየቁ ጥየቄዎች የማኅበሩ ዋና ጸሓፊ ዲ/ን ሙሉጌታ ኃ/ማርያም ምላሽ ሰጥተዋል፡፡

 

በመርሐ ግብሩ ላይ ከመምህር ቀሲስ እሸቱ ታደሰ ትምህርተ ወንጌል የተሰጠ ሲሆን  የማኅበሩ መዝሙር ክፍል አባላት የአቡነ ጎርጎርዮስ የትምህርት ማዕከል ሕፃናት ተማሪዎች፣ እንዲሁም የከፍተኛ ትምህርት ተቋማት ግቢ ጉባኤያት መዘምራን ያሬዳዊ ዝማሬ በየተራ አቅርበዋል፡፡ በመጨረሻም በብፁዕ አቡነ ኤልያስ ቡራኬ የመርሐ ግብሩ ፍፃሜ ሆኗል፡፡

ማሩ አይምረር፤ ወተቱ አይጥቆር

ሚያዚያ 24/2004 ዓ.ም.

በኢትዮጵያ ኦርቶዶክስ ተዋሕዶ ቤተ ክርስቲያን በሰንበት ት/ቤቶች ማደራጃ መምሪያ ሥር ተዋቅሮ መንፈሳዊና ማኅበራዊ አገልግሎት በመስጠት ላይ የሚገኘው ማኅበረ ቅዱሳን በእግዚአብሔር ፈቃድ አገልግሎቱን ከጀመረ እነሆ ሃያ ዓመታት ተቆጠሩ፡፡ ምንም እንኳን ማኅበሩን በራሳቸው ፈቃደኝነት የተሰባሰቡ ኦርቶዶክሳውያን ቢመሠርቱትም የማኅበሩ መሠረታዊ ዓላማ ግን ቤተ ክርስቲያን ተልእኮዋን ለማሳካት በምታከናውናቸው ተግባራት የልጅነት ድርሻውን ለመወጣት በመሆኑ ወደ ቤተ ክርስቲያን መዋቅር በመግባት መተዳደሪያ ደንቡ በቅዱስ ሲኖዶስ ጸድቆ በተቀመጠለት ተግባርና ሓላፊነት መሠረት አገልግሎቱን እያከናወነ ያለ ማኅበር ነው፡፡ አባላቱም በሀገር ውስጥም ሆነ በውጪ ሀገራት በቤተ ክርስቲያኗ አጥቢያዎች በሚገኙ ሰበካ ጉባኤያት እና ሰንበት ት/ቤቶች ተመዝግበው የሚጠበቅባቸውን ክርስቲያናዊ ግዴታ እየተወጡ ይገኛሉ፡፡ እነዚህ አባላት አብዛኛዎቹ ቤተ ክርስቲያናቸውን በገንዘብ፣ በዕውቀትና በጉልበት ለማገልገል በፈቃዳቸው ቃል የገቡ ቤተ ክርስቲያንና ሀገሪቷ ካሏት ልዩ ልዩ ከፍተኛ የትምህርት ተቋማት ተመርቀው ቤተ ክርስቲያናቸውን አገራቸውንና ወገናቸውን በልዩ ልዩ ሙያ እያገለገሉ የሚገኙ ናቸው፡፡

ማኅበሩ በዋናነት አገልግሎቱን የሚያከናውነው በመተዳደሪያ ደንቡ እንደተቀመጠው አባላቱ በገቡት ቃል መሠረት በየወሩ ከሚሰበሰበው ወርኃዊ አስተዋጽኦ ሲሆን ስብከተ ወንጌል ባልተስፋፋባቸው አካባቢዎች ስብከተ ወንጌልን ለማስፋፋት ቅዱሳት መካናትና አብነት ት/ቤቶችን በዘላቂነት በልማት ራሳቸውን ለማስቻል የሚሠሩ ኘሮጀክቶችን በጎ አድራጊ የቤተ ክርስቲያኗ ልጆች ከሆኑ ምእመናንና ማኅበራት ጋር በጋራ በመተባበር ይተገብራል፡፡ ማኅበራችን ባለንት ሃያ የአገልግሎት ዓመታት በእግዚአብሔርም በሰውም ሊታዩና ሊዳሰሱ የሚችሉ በጎ አስተዋጽኦዎችን ለሀገርም ሆነ ለቤተ ክርስቲያን እንዳበረከተ ቢያምንም መሥራት ከሚገባው በጣም ጥቂቱን ብቻ እንደሠራና ገና ብዙ እንደሚጠበቅበትም ይገነዘባል፡፡

እስካሁን ያከናወናቸውን መንፈሳዊና ማኅበራዊ ተግባራት ሲያከናውን ሁሉ ነገር አልጋ በአልጋ ሆኖለት ያለችግርና ውጣውረድ አይደለም፡፡ በእርግጥ አገልግሎቱ መንፈሳዊ አገልግሎት ነውና ሁሉ ነገር ምቹ እንዲሆንም አይጠብቅም፡፡ በየጊዜው የሚገጥሙት ችግሮችና ፈተናዎች የተለያየ መልክ ያላቸው ቢሆኑም የፈተናዎቹ ምንጮች ግን ሁለት ናቸው፡፡ የመጀመሪያው ማኅበሩ የቆመለትን ዓላማና የሚያከናውናቸውን በጎ ተግባራት በዓላማ ከመቃወም የሚመነጭ ሲሆን፤ ሁለተኛው ደግሞ በተሳሳተ መረጃ ምክንያት ወይም ቀርቦ ባለማየት ከሚፈጠር የተዛባ አመለካከት የሚመነጭ ነው፡፡ ከዚህ አንጻር ከቅርብ ዓመታት ወዲህ የማኅበሩን አገልግሎት እየገጠሙት ካሉት ችግሮች አንዱ በዘመናችን መላው ዓለምን እያወከው ያለው የአክራሪነት አደጋ በአገራችንም ያለውን አሉታዊ ተፅዕኖ ለማሳየት በሚደረጉ ገለጻዎችና የውይይት መድረኮች ግልጽ ባልሆነና በማይወክለው መንገድ የማኅበሩን ስም በመጥቀስ በበጎ አስተዋጽኦው ላይ ጥላ የሚያጠላ ስሜት መፈጠሩ ነው፡፡ ይህ የተዛባ ሥዕል በተለያዩ የአገሪቱ ክፍሎች በተለያየ መጠንና በተለያየ መንገድ ሲገለጽ መቆየቱና አሁንም እየተገለጸ መሆኑ በአባላቱም ሆነ በሌሎች ምእመናን ዘንድ መደነጋገርን መፍጠሩ አልቀረም፡፡ ምክንያቱም አባላቱም ሆኑ ሌሎች ምእመናን ከከተማ እስከ ገጠር የሚያውቁት የማኅበረ ቅዱሳን ማንነትና ምንነት አሁን እየተባለ ካለው ጋር ፍፁም የማይገናኝ በመሆኑ ነው፡፡

በመግቢያው ላይ እንደተገለጸው ማኅበረ ቅዱሳን በኢትዮጵያ ኦርቶዶክስ ተዋሕዶ ቤተ ክርስቲያን ከፍተኛ የመጨረሻ መዋቅር በሆነው ቅዱስ ሲኖዶስ መተዳደሪያ ደንብ ጸድቆለት፣ የቤተ ክርስቲያኗን መዋቅራዊ አሠራር ተከትሎ እየሠራ ያለ፣ በርቀት ላሉ በሚሠራቸው ሥራዎች ራሱን የሚገልጥ፣ ቀርበው ማየትና ማወቅ ለሚፈልጉ የሚዳሰስና የሚጨበጥ አካል ያለው መንፈሳዊ ማኅበር ነው፡፡ በመተዳደሪያ ደንቡ ላይ ባለው ግልጽ አቋሙ እንዳስቀመጠው በማንኛውም የፖለቲካ እንቅስቃሴ ውስጥ ጣልቃ አይገባም፡፡ ከተሰጠው ዓላማና ተግባር እና ከቤተ ክርስቲያን ሁለንተናዊ አገልግሎት አንጻር አቋሙን መግለጽ ሲያስፈልገው የሚገልጽባቸው የራሱ ሚዲያዎች ያሉት ማኅበር ነው፡፡ የአክራሪነት አደጋ በሀገርም ሆነ በቤተ ክርስቲያን ላይ ስለሚያደርሰው ጥፋት፣ መልካም የሆነው የሰዎች እርስ በርስ ተከባብሮ የመኖርን የቆየ አገራዊ እሴት ስለማስቀጠል፣ አገራቸውንና ወገናቸውን በታማኝነትና በቅንነት የሚያገለግሉ ዜጎችን ስለማፍራት እንደ ቤተ ክርስቲያኗ አስተምህሮ ሓላፊነት በተሞላው መንገድ ሲያስተምርና ሲሠራ ኖሯል፤ አሁንም እየሠራ ነው፡፡ ወደፊትም ያስተምራል ይሠራልም፡፡ እንኳን እምነትን ያህል ታላቅ ነገር ይቅርና አንድ ሰው የሚከተለውን ፍልስፍና ሊከተለው የሚችለው ትክክል ነው ብሎ ሲያምን ብቻ ነው፡፡ አንድ ሰው ዛሬ በምድር ላይ ሲኖር የሕይወቴ መርሕ አድርጌ የምጓዝበት ከሞት በኋላም ዘላለማዊ ሕይወት የምወርስበት እምነት /ሃይማኖት/ ትክክል ነው ብሎ ማመኑ በምንም መስፈርት አክራሪነት ሊባል አይችልም፤ ምክንያቱም የእኔ ትክክል ነው ማለት የሌላው ትክክል አይደለም ወይም የእኔ ብቻ መኖር አለበት የሌላው መኖር የለበትም ማለት ሊሆን አይችልምና፡፡

ማኅበረ ቅዱሳን የኢትዮጵያ ኦርቶዶክስ ተዋሕዶ ቤተ ክርስቲያን ትክክል ናት ብሎ ያምናል፤ እንዴት ትክክል እንደሆነች በንግግርም በግብርም ይገልጣል፤ ይህ ትክክል የሆነው ሁለንተናዊ ማንነቷ ተጠብቆ እንዲኖርም የድርሻውን ይወጣል፡፡ ይህ አስተሳሰብ በምንም መንገድ ሌላውን የማጥፋት መንፈስን ያዘለ አክራሪነት ተብሎ ሊተረጎም አይችልም፡፡ ቤተ ክርስቲያን ለአገሪቱ ሁለንተናዊ ማንነትና ዕድገት የነበራትን በጎ አስተዋጽኦ መግለጽም ሆነ ዛሬም ይህንን አስተዋጽኦዋን እንድትቀጥል ማድረግ እንደ ክርስቲያንም ሆነ እንደ ዜጋ የሚጠበቅበት ተግባር መሆኑን ማኅበራችን ያምናል፡፡ በመሆኑም ዓለምን የሁከትና የሰቆቃ መናኸሪያ እያደረጋት ያለው አክራሪነት ማኅበራችንን አይገልጠውም፡፡ ይልቁንም ሙስና፣ አለመታመን፣ ወንጀለኝነት፣ በሽታ ፣ ወዘተ  እያተራመሳት ባለችው ዓለም ከተለያዩ ከፍተኛ ትምህርት ተቋማት ተመርቀው በልዩ ልዩ ሙያ አገራቸውንና ወገናቸውን በቅንነት፣ በታማኝነትና በእውነት የሚያገለግሉ ዜጎችን በማፍራት በራሱ ፈቃድ፣ በራሱ ገንዘብና ጉልበት የበኩሉን እያበረከተ የሚገኝ ማኅበር አገራዊ አስተዋጽኦው በሁሉም ዘንድ በበጎነቱ ጎልቶ ሊበረታታ ሊደገፍ ይገባዋል እንጂ ገጽታውን የሚያጠቁር ማንነቱን የሚያዛባ ሥዕል በመሳልና መደነጋገርን መፍጠር ተገቢ አይመስለንም፡፡

በመጨረሻም ማኅበረ ቅዱሳን ጉድለት ካለበትም ስለ ጉድለቱ በምድራዊም ሆነ በሰማያዊ ሕግጋት ሊጠየቅ የሚችል ሕጋዊ መንፈሳዊ ተቋም እንጂ ምንም የተሠወረ ነገር እንደሌለ አምነን አባላቱም ሆነ ምእመናን ዛሬም እንደ ትላንቱ አገልግሎታችንን አጠናክረን እንድንቀጥል አደራ በማለት በማወቅም ሆነ ባለማወቅ ማኅበሩን በማይገልጸው ማንነት እየሣልን ያለን አካላት ደግሞ ማሩን ባለማምረር ወተቱን ባለማጥቆር የማኅበሩን አገራዊ አስተዋጽኦ እናበረታታ ዘንድ ማኅበራችን መልእክቱን ያስተላልፋል፡፡

ሕገ ወጥ ሕግ አስከባሪዎች

ሚያዝያ 24/2004 ዓ.ም.

ከሰሞኑ ለሰሚ የሚያሳፍር፤ አንድ ጉዳይ በጠቅላይ ቤተ ክህነት ተፈጽሟል፡፡ ጉዳዩን በአንክሮ ለተመለከተው በእጅጉ ያሳስባል፡፡ የሰላ አንደበት ይዘው ያልኾኑትን ነን በማለት የሌላቸውን ሥልጣንና ዕውቀት እንዳላቸው በማስመሰል ደግ አባቶችን የሚያታልሉ፤ ከቤተ ክርስቲያን ጥቅም ይልቅ የራሳቸውን የሚያስቀድሙ ወረበሎች አሉ፡፡ እነዚህ ጆቢራዎች በደጋግ አባቶቻችን አእጋር ሥር እየተርመሰመሱ፤ ዕውቀት መንፈሳዊ ሳያቋርጥ የሚያፈሰውን የእናት ቤተ ክርስቲያን ጡት እየጠቡ አድገውና ጐልምሰው ሊያገለግሉ በተሰበሰቡ ሊቃውንት መካከል እየተሹለከለኩ ተንኮላቸውን ያለድካም ለመፈጸም ሲኳትኑ ይታያሉ፡፡ ከሰሞኑ የሰማነው ግብዝነትን ከአላዋቂነት ጋር አስተባብሮ የያዘ ከንቱ ተግባር፤ እነዚሀን መሰሪዎች አበው በበሰለ አመራራቸው ለይተው በመጠረቅ ከጉያቸው የሚያባርሩበት፤ ሊቃውንተ ቤተ ክርስቲያንም በዕውቀት ሚዛን መዝነው ማኔ ቴቄል ፋሬስ ብለው ለይተው የሚጥሉበት ሰዓት ከመቼውም ጊዜ በበለጠ መድረሱን የሚያመለክት ነው፡፡ ጊዜ ለሚሰጠው እንጂ ለማይሰጠው ጉዳይ መዘግየት ጉዳቱ ለራስ ነውና፡፡

ጉዳዩ በማኅበረ ቅዱሳን እንቅስቃሴ ጥቅማቸው የተነካ ወይም የሚነካ በመሰላቸው ሰዎች ተቀነባብሮ የነበረ ሴራ ነው፡፡ እነዚህ ግለሰቦች ማኅበሩ በአባቶች መመሪያና ምክር እንዲሁም ጸሎት እየታገዘ የነበረ አገልግሎቱን በተጠናከረ መንገድ ቀጥሎ ባለበት በአሁኑ ጊዜ ከሕግና ትእዛዝ ፍጹም እንደወጣ አድርገው በማቅረብ በአገልግሎቱ ላይ አሉታዊ ተጽዕኖ የሚያመጣ ደብዳቤ ተፈርሞ እንዲበተን ለማድረግ ያደረጉት ከንቱ ሙከራ ነው፡፡ ግለሰቦቹ ይህንን እኩይ፣ በእግዚአብሔርና በሰው ሕግጋት የሚያስጠይቅ ተግባር ለማሳካት ያላደረጉት ጥረት ለአባቶችም ያልቀባጠሩት ማሳመኛ የሚመስል ነገር የለም፡፡ የእኩይ ተግባራቸው መነሻ ያደረጉት ለማኅበሩ እንዲደርስ ያሉትን ማሩን የሚያመር ወተቱን የሚያጠቁር የክስ ደብዳቤ ማርቀቅ ነው፡፡ ለደብዳቤው ርዕሰ ጉዳይነት የመረጡት ዐረፍተ ነገር «ለሕግ የበላይነት ሥልጣን ታዛዥ ሆኖ አለመገኘትን በሚመለከት ይሆናል» የሚል የአማርኛ ሰዋስው ሀሁን ያላለፈ በዚህም የጆቢራዎቹን ማንነት የገለጠ ያልተሟላ ዐረፍተ ነገር ነው፡፡ በዚህ ርዕሰ ጉዳይነት የታሠረው ከንቱ ደብዳቤ በወግ ባልተጻፈ፤ ርዝመታቸው በትልልቅ አናቅጽ ማሠሪያ የተገታ ከሳሽ ዐረፍተ ነገሮች ታጅሏል፡፡ የደብዳቤው ፍሬ ሐሳብ በቅዱስ ሲኖዶስ ምልዐተ ጉባኤ ፊርማ በጸደቀ ደንብ የተቋቋመው፤ በደንቡም ብቻ ሳይኾን በየዕለቱ በብፁዕ ወቅዱስ ፓትርያርኩና ብፁዐን አበው ተግሣጽ፣ ምክርና መመሪያ እየታገዘ አገልግሎቱን እየፈጸመ ያለው ማኅበረ ቅዱሳን ከቤተ ክርስቲያኗ ማእከላዊ አስተዳደር ቁጥጥር ውጪ ነው፤ በዚህም የሚሰጠውን መመሪያ ለመቀበል ፈቃደኛ አልኾነም የሚል ነው፡፡ ደብዳቤው ይኽንኑ እንቢተኝነት ለመቀልበስ በቤተ ክርስቲያኗ አስተዳደርና በማኅበሩ መካከል «በዕለት፣ በሳምንት፣ በወርና በዓመት ያልተገደበ የመጻጻፍ ተግባር» ሲካሔድ እንደቆየ ያትታል፡፡ ደብዳቤ መጻጻፉ አሁንም «ከመቼውም ጊዜ ጐልቶ የታየበት ወቅት» እንደኾነም ያስረግጣል፡፡ ይህም የማኅበሩን «የበላይ ተጠሪ የሆነውን የሰንበት ት/ቤቶች ማደራጃ መምሪያን» ለወቀሳ የዳረገ መኾኑን ይጠቅስና፤ ማኅበሩ በዚህ ተግባሩ የመምሪያውንም ኾነ የቤተ ክርስቲያን ማእከላዊ አስተዳደር ህልውና እየተፈታተነ እንደኾነ በሬ ወለደ አሉባልታውን ይነዛል፡፡ ለዚህም ማሥረጃ ይጠቅሳል፡፡

መስከረም 12 ቀን 2002 ዓ.ም «ብፁዕ ወቅዱስ ፓትርያርኩ፣ ብፁዓን ሊቃነ ጳጳሳት፣ ከፍተኛ የመንግሥት ባለሥልጣናት፣ በጠቅላይ ቤተክህነት የየመምሪያውና ድርጅቶች ሓላፊዎች እንዲሁም የማኅበሩ ሥራ አመራርና ሥራ አስፈጻሚዎች ወዘተ በተገኙበት የተሰጠውን ባለ 6 ነጥብ «የሥራ አፈጻጸም መመሪያ» ተግባራዊ ለማድረግ ፈቃደኛ አይደለም ይላል፡፡ በማከልም በዚህ የተነሣ ለደረሰው ችግር ማኅበሩን ተጠያቂ በማድረግ፤ ጉዳዩ በቤተ ክርስቲያኗ «ሊኖር የሚገባውን የሥልጣን ተዋረድ የሚሸራርፍ ሆኖ ከመታየቱም በላይ የማእከሉን አስተዳደርና ኃላፊነት ድርሻ የሚጐዳ አካሔድ ያለው» ነው ይልና፤ የማኅበሩ አልታዘዝ ባይነትና ሕጋዊ ያልኾነ እንቅስቃሴ በፍጥነት መታረም እንዳለበት ታምኖበታል ይላል፡፡ ደብዳቤው ይህንን ሁሉ ካለ በኋላ መመሪያ ወደ ማውረድ ይገባል፡፡ «ስለዚህ ይህ ደብዳቤ በደረሳችሁ ከ10 ቀናት ባልበለጠ ጊዜ ውስጥ ቀደም ሲል መስከረም 12 ቀን 2002 ዓ.ም በምልዓተ ጉባኤ ተወስኖ በተላለፈላችሁ ቃለ ጉባኤ የተቀመጡትን ስድስት ነጥቦች ተግባራዊ እንድታደርጉ እያስገነዘብን በተሰጠው የጊዜ ገደብ ተጠናቆ ካልቀረበ ግን በቤተ ክርስቲያኒቱ መመሪያዎች የተቀመጠውን ድንጋጌ ለማስከበር ሲባል አስተዳደራዊ እርምጃ እንዲወሰድ የሚደረግ መሆኑን እናስታውቃለን» በማለት መመሪያውን በማዥጐድጐድ  ያጠቃልላል፡፡

ጆቢራዎቹ ይህንን ደብዳቤ አርቅቀው በኮምፒውተር ከጨረሱ በኋላ ቀጣይ ከይሲያዊ ተግባራቸው ያደረጉት፤ ደብዳቤው በማደራጃ መምሪያው ሓላፊ ፊርማ ለማኅበሩ እንዲሰጠው ነውና ዓላማው፤ የመምሪያው ሓላፊ ላይ ተጽዕኖ የሚያደርግ ድምጽ ወደ መፈለግ ገቡ፡፡ አወጡ አወረዱ፡፡ ተጽዕኖ ሊፈጥሩ ይችላሉ ወዳሏቸው አባትም ምላሳቸውን አስረዝመው፣ አለባበሳቸውን አሳምረው፣ ያሳምናል ያሉትን ውሸት ቀምረው ቀረቡ፡፡ ቀመራቸው ቅዱስ ፓትርያርኩ ደብዳቤ እንዲጻፍ አዝዘዋልና የመምሪያ ሓላፊው በተዘጋጀው ደብዳቤ እንዲፈርሙ ትእዛዝ ይስጡ የሚል ነበር፡፡ ደጉ አባትም የጆቢራዎቹን ቃል ሰምተው የሰንበት ት/ቤቶች ማደራጃ መምሪያ ሓላፊን ጠርተው እንዲህ ዓይነት ደብዳቤ ተዘጋጅቷልና ይፈርሙ ይሏቸዋል፡፡ በጉዳዩ ግራ የተጋቡት የመምሪያው ሓላፊም ደብዳቤውን ሲያነቡ በእሳቸው ስም ሊወጣ የማይችል መኾኑንና ለጉዳዩም እውቅና እንደማይሰጡ መመሪያውን ለሰጧቸው አባት ይገልጻሉ፡፡ በዚህ ሂደት ጆቢራዎቹ ያሰብነው ተሳካ በሚል በመረጡት ሆቴል ፌስታ ያደርጋሉ፡፡ ሁለቱ አባቶች ግን ተመካክረው ጉዳዩ እንዲዘገይ ያደርጋሉ፡፡ በዚህ ሒደት ሌሎች የቤተ ክርስቲያኗ ከፍተኛ ባለሥልጣናት ይሰሙና ጉዳዩን አዝዘው እንደኾነ ቅዱስ ፓትርያርኩን ይጠይቃሉ፡፡ በአሁኑ ወቅት ማኅበሩን ዕለት ዕለት እያቀረቡ በመምከር ላይ ያሉት ቅዱስነታቸውም በእሳቸው ስም በተሠራው ወንጀል አዝነው ደብዳቤው ተሠራጭቶ እንደኾነ በአስቸኳይ እንዲሰበሰብ ያዝዛሉ፡፡ የጆቢራዎቹ ከይሲያዊ እንቅስቃሴ በዚህ መንገድ ተኮላሸ፡፡ እውነት የለውምና፡፡

ለመኾኑ ጆቢራዎቹ እነማን ናቸው?

ይህ ከባድ ወንጀል በማኅበሩ ላይ ስለተፈጸመ ሳይኾን ድርጊቱ በቤተ ክህነታችን ውስጥ እየተፈጸመ ስላለውና ወደፊትም ሊፈጸም ከሚችለው ከባድ ጥፋት አንጻር ስለነዚህ ግለሰቦች ወደፊት በዝርዝር እናሳውቃለን፡፡

በመሠረቱ ማኅበረ ቅዱሳን በሁሉም የቤተ ክህነት ደረጃ ሕግ እንዲከበር ይፈልጋል፡፡ ለዚህም ለሕግና ሥርዓት መከበር ቀዳሚ ሓላፊነት ካለባቸው አባቶች ጋር በየጊዜው ይመካከራል፡፡ ቢኾን የሚለውንም በልጅነት ያቀርባል፡፡ ማኅበሩ ይህንን የሚያደርገው ራሱ አባቶች በሰጡት መመሪያ መሠረት ለመሄድ የቻለውን ሁሉ በማድረግ ነው፡፡ በዚህም ጆቢራዎቹ መደረግ አለበት ብለው ያወረዱትን «ትእዛዝ» ቀድሞም ሲያደርገው የነበረው፣ አሁንም እያደረገ ያለው ነው፡፡ ለዚህ ደግሞ ምስክሮቹ ማኅበሩን መመሪያ በመስጠትና እንቅስቃሴውን በመከታተል የሚያሠሩት አባቶች ናቸው፡፡

ማኅበሩ ዘወትር እንደሚለው፤ የቤተ ክርስቲያኗን ማእከላዊ አስተዳደር ጠብቆ በአባቶች መመሪያና ቁጥጥር እንደሚሠራ ምንም ዓይነት ብዥታ ሊኖር አይገባም፡፡ ሕግን አክብሮ በቤተ ክርስቲያኗ ሕግ እንዲከበር በተግባር የሚታገል ነውና፡፡ አሁንም ቤተ ክርስቲያኗ በምትጠይቀው አግባብ ሁሉ ራሱን ለማሳየት ዝግጁ ነው፡፡ በቤተ ክርስቲያን ለቤተ ክርስቲያን የተቋቋመ ነውና፡፡ ነገር ግን በማይመለከታቸው እየገቡ አባቶችን በማታለል ለሚሠነዘርበት ጥቃት አበውን ምስክር በማድረግ ምላሹን እየሠጠ ይሄዳል፡፡

ከማኅበሩ አልፎ ለዚህ ጽሑፍ መነሻ የኾነው የሰሞኑ የማታለል ተግባር በቤተ ክህነታችን እየኾነ ያለው አሳሳቢ H#ኔታ መገለጫ ነው፡፡ አባቶቻችን የነገርን ሁሉ በጐ ገጽታ መመልከትን ሀብት ያደረጉ እንደኾነ ይታወቃል፡፡ ወንጌል ለአነዋወራቸው ሁሉ መመሪያ ነውና፡፡ ነገር ግን ይህንን የዋሕነታቸውን ተጠቅመው በረዘመ ምላሳቸውና ራሳቸውን ለራሳቸው በሚፈጥሩት ከፍ ያለ ማንነታቸው በስማቸውና በፊርማቸው ወንጀል እንዳያሠሯቸው እንሰጋለን፡፡ ለዚህ ተግባራቸውም እውነትን ይዘው ከቆሙ ሊቃውንት ጋር ራሳቸውን አመሳስለው በአበው እግር ሥር መርመስመሳቸውን እናያለን፡፡ ይህ በቤተ ክህነታችን ሥር እያንዣበበ ያለው አደጋ በሁለም ጥረት በኖ ሊጠፋ ያስፈልጋል፡፡ ይህንን ዕውን ለማድረግ በሚደረግ ማንኛውም እንቅስቃሴ ማኅበራችን ንቁ ተሳትፎውን ይቀጥላል፡፡ ለዚህም የአባቶቻችን ምክርና መመሪያ እንደማይለየው ያምናል፡፡

ወስብሐት ለእግዚአብሔር