Archive for year: 2016

ጳጕሜን ፩ ቀን ፳፻፰ ዓ.ም

በዝግጅት ክፍሉ

የተወደዳችሁ ምእመናን! ማኅበረ ቅዱሳን ከነሐሴ ፳፯-፳፱ ቀን ፳፻፰ ዓ.ም ድረስ ፲፪ኛ ጠቅላላ ጉባኤውን በጠቅላይ ቤተ ክህነት ስብከተ ወንጌል አዳራሽና በማኅበሩ ሕንጻ ፫ኛ ፎቅ ለሦስት ቀናት አካሒዷል፡፡ ከዓርብ ምሽት እስከ እሑድ ሌሊት ድረስ የነበረውን የጉባኤውን አጠቃላይ ይዘት በአጭሩ እናስቃኛችሁ!

ከነሐሴ ፳፮ ቀን ፳፻፰ ዓ.ም ጀምሮ የማኅበሩ መደበኛ አገልጋዮች ለአገልግሎት የሚጠቀሙባቸውን ልዩ ልዩ ንብረቶቻቸውን በተዘጋጀላቸው ጊዜያዊ ቦታ በማስቀመጥ ቢሮዎቻቸውን ለእንግዶች ማረፊያ ለቀዋል፡፡ ከዚያች ሰዓት በኋላ የመግቢያ መለያ ከተሰጣቸው አባላት በስተቀር ማንኛውም አባል ወደ ሕንጻው እንዲገባ አይፈቀድለትም፡፡ በዚህ ጉባኤ ለመሳተፍ ከአሜሪካ፣ ከአውሮፓ፣ ከዐረብ አገሮችና ከአፍሪካ አህጉር፤ ከአገር ውስጥ ደግሞ ከአራቱም የኢትዮጵያ አቅጣጫዎች የመጡ በርካታ ወንድሞችና እኅቶች በአዲስ አበባ ከተማ ከመንበረ ፓትርያርክ ቅድስተ ቅዱሳን ማርያም ገዳም በስተምዕራብ አቅጣጫ በተገነባው የማኅበረ ቅዱሳን ሕንጻ ተሰባስበዋል፡፡

በዕለተ ዓርብ ነሐሴ ፳፯ ቀን ፳፻፰ ዓ.ም ለጉባኤው ተሳታፊዎችና ጥሪ ለተደረገላቸው እንግዶች አቀባበል ከተደረገላቸው በኋላ ምሽት ፲፪ ሰዓት ላይ ጠቅላላ ጉባኤው በማኅበር ጸሎት ተጀምሮ በጸሎት እስከ ተጠናቀቀበት ነሐሴ ፳፱ ቀን ፳፻፰ ዓ.ም ድረስ የነበሩ መርሐ ግብራት የቀኖቹ በጠቅላይ ቤተ ክህነት ስብከተ ወንጌል አዳራሽ፤ የማታዎቹ ደግሞ በማኅበሩ ሕንጻ ተከናውነዋል፡፡ ለተሳታፊዎቹ አቀባበል በተደረገበት ዕለትም ፈቃደ ሥጋን ለፈቃደ ነፍስ ማስገዛት እንደሚገባ የሚያስገነዝብ ትምህርተ ወንጌል በመምህር ቸርነት አበበ ተሰጥቷል፡፡

በዚህ ጠቅላላ ጉባኤ የጠቅላይ ቤተ ክህነት ዋና ሥራ አስኪያጅ ብፁዕ አቡነ ዲዮስቆሮስን ጨምሮ ብፁዕ አቡነ ሉቃስ፣ ብፁዕ አቡነ ሰላማ፣ ብፁዕ አቡነ ገብርኤልና ብፁዕ አቡነ እንጦንስ ተገኝተው ቃለ ምዕዳንና ጸሎተ ቡራኬ ሰጥተዋል፡፡ ኹሉም የማኅበረ ቅዱሳን አባላት በእግዚአብሔር ጥበብ ለአገልግሎት የተጠሩ መኾናቸውን ተረድተው፣ የተሰጣቸውን ልዩ ልዩ ጸጋ ተጠቅመው፣ በፈተና ጸንተው ቅድስት ቤተ ክርስቲያንን በትዕግሥትና በትጋት ማገልገል እንደሚገባቸው የሚያተጋ መልእክት ያለው ትምህርተ ወንጌል ‹‹በወንዝ ዳር ጣለችው›› በሚል ኃይለ ቃል በዲያቆን ዶ/ር ያረጋል አበጋዝ ተሰጥቷል፡፡

በተጨማሪም የተሳታፊዎችን ግንዛቤ የሚያዳብሩ ጥናቶችም ቀርበዋል፡፡ ከእነዚህ መካከልም ኦርቶክሳዊነትን የሚፈታተኑ ዓለም ዓቀፍ ችግሮች በምእመናን ላይ የሚያደርሷቸውን ተጽዕኖዎችና መፍትሔዎቻውን በስፋት የዳሰሰ ጥናት ‹‹በፈታኝ ነባራዊ ኹኔታዎች እየኖሩ ኦርቶዶክሳዊ ተቋማዊ አገልግሎትን መፈጸም እንዴት ይቻላል?›› በሚል ርእስ በዲያቆን ብርሃኑ አድማስ፤ ከቤተ ክርስቲያን አባቶች፣ ከማኅበራትና በጎ አድራጊ ምእመናን ጋር በመስማማት እንዴት ማገልገል እንደሚቻል የሚያስገነዝብ ‹‹የባለ ድርሻና አጋር አካላት ውጤታማነትና ስኬታማነት›› በሚል ርእስ በማኅበሩ ዋና ጸሐፊ በአቶ ተሰፋዬ ቢኾነኝ የቀረቡት ጥናቶች ይጠቀሳሉ፡፡

በጠቅላላ ጉባኤው ማኅበሩን የሚመሩ ሥራ አመራሮች ተመርጠዋል፡፡ ማኅበሩ በ፳፻፯ እና በ፳፻፰ ዓ.ም በሁለት ዓመታት ውስጥ ያከናወናቸው ዘርፈ ብዙ ተግባራት፤ የማኅበሩ አጠቃላይ የገቢ መጠንና ለአገልግሎት ማስፈጸሚያ ያወጣው ገንዘብ፤ ማኅበሩ አገልግሎቱን ለመፈጸም በሚያደርገው እንቅስቃሴ ያጋጠሙት ልዩ ልዩ ችግሮችና የተወሰዱ መፍትሔዎች በዝርዝር ለጉባኤው ቀርበዋል፡፡ እንደዚሁም የሁለት ዓመቱ አጠቃላይ የሒሳብ ሪፖርት በተመሰከረላቸውና ሕጋዊ ዕውቅና በተሰጣቸው የውጪ ኦዲተሮች ሪፖርት ተደርጓል፡፡ ሪፖርቱም የማኅበሩን ጥንቃቄ የተሞላበትና አርአያነት ያለው ዘመናዊ የሒሳብ አጠቃቀም ዘዴ የሚያመላክት መኾኑ በኦዲተሮቹ ተገልጿል፡፡

ከጉባኤው አዳዲስ ክሥተቶች ውስጥ በጠቅላላ ጉባኤው ማጠቃለያ ነሐሴ ፳፱ ቀን ፳፻፰ ዓ.ም በዕለተ እሑድ ምሽት የብፁዓን ሊቃነ ጳጳሳትና የሰባክያነ ወንጌል ምክርና የአደራ ቃል ያለበት የ፳ ደቂቃ ዘጋቢ ፊልም የጉባኤውን ተሳታፊዎች አስለቅሷል፡፡ በተለይ ብፁዕ አቡነ ቀውስጦስ ቤተ ክርስቲያን ችግር ውስጥ መኾኗንና ለአገር የዋለችው ውለታ ተረስቶ ምንም እንዳልሠራች መቈጠሯን ሲያስረዱ፤ እንደዚሁም ‹‹ምንም ብትበሳጩ ቤተ ክርስቲያንን በጠላትነት እንዳታዩአት በእግዚአብሔር አደራ እላችኋለሁ›› እያሉ ለወጣቶች መልእክት ሲያስተላልፉ አረጋዊው ጳጳስ ያሰሙት የነበረው የለቅሶ ድምፅና እርጅና ባደከመው ፊታቸው የሚፈሰው ዕንባቸው፤ እንደዚሁም በፊልሙ ላይ የብፁዕነታቸውን ቃለ ምዕዳን የሚቀበሉ ምእመናን ሰቆቃ የጠቅላላ ጉባኤውን መንፈስ ሙሉ በሙሉ ወደ ኀዘን ለውጦታል፡፡

ፊልሙ ከተጠናቀቀ በኋላ ሳይቀር የመርሐ ግብር መሪው ዕንባውን መቈጣጠር ሲያዳግተው ተስተውሏል፡፡ ‹‹ማርያም ኀዘነ ልቡና ታቀልል፤ ማርያም የልብን ኀዘን ታቀላለች›› የሚለው ዝማሬ ከተዘመረ በኋላ ነበር በመጠኑም ቢኾን የጉባኤው የኀዘን መንፈስ ወደ ውይይት ሊመለስ የቻለው፡፡ ዘጋቢ ፊልሙ የጉባኤውን ተሳታፊዎች ከማስለቀሱ ባለፈ ኹሉም የራሱን ድርሻ ዐውቆ ቤተ ክርስቲያንን በትጋት ለማገልገል እንዲነሣሣ ጭምር ማድረጉን አስተያየት ከሰጡ አባቶች፣ ወንድሞችና እኅቶች ስሜት ለመረዳት ተችሏል፡፡

ጉባኤው ከኀዘኑ ሲረጋጋም በልዩ ልዩ የአገልግሎት ዘርፍ ባስመዘገቡት ውጤት በአርአያነት የተመረጡ ከአገር ውስጥ ደብረ ማርቆስ፣ ጎንደር፣ ደሴና ጅንካ፤ ከውጪ አገር ደግሞ አሜሪካ በድምሩ ፭ ማእከላት በተወካዮቻቸው አማካይነት የልምድ ተሞክሯቸውን አቅርበዋል፡፡ ከተሞክሮው መካከልም የአሜሪካ ማእከል የአካባቢውን ምእመናን በማስተባበር ሕፃናት የአብነት ትምህርት እንዲማሩ ማድረጉና ሕፃናቱ ከንባብ ጀምሮ እስከ መጽሐፍ ቤት ድረስ ያለውን የአብነት ሥርዓተ ትምህርት ሲያቀርቡ የሚያስቃኘው ዘጋቢ ፊልም የማእከሉን ጥረት ከማስደነቁ ባሻገር ኢትዮጵያውያን ወላጆች ‹‹እኛስ ምን ሠራን?›› እንዲሉ አድርጓቸዋል፡፡ በተመሳሳይ መልኩ ዋናው ማእከል በሁለት ዓመታት የአገልግሎት ጊዜው ያጋጠሙትን ችግሮች ያለፈበት መንገድና የወሰዳቸውን የመፈትሔ ርምጃዎች የሚያመለክት የልምድ ተሞክሮም በማኅበሩ ሰብሳቢ ለጉባኤው ቀርቧል፡፡

ተሳታፊዎች የቡድን ውይይት ሲያደርጉ

በመቀጠል የጠቅላላ ጉባኤው ዐቢይ ኰሚቴ ሰብሳቢ አቶ ዳንኤል ገብረ መድኅን በማጠቃለያ ሪፖርታቸው የጉባኤው ተሳታፊዎች ላሳዩት ታዛዥነት፣ ትሕትናና ቅንነት፤ እንደዚሁም በውይይትና አስተያየት በመስጠት ላደረጉት የነቃ ተሳትፎ፤ በተጨማሪም ድርጅቶችን ጨምሮ ድጋፍ ሰጪ ክፍሎችና በጎ አድራጊ ምእመናን በዐሳብ፣ በጉልበት፣ በገንዘብ፣ በቁሳቁስ አቅርቦት፣ በጽዳት ሥራ፣ የሕክምና አገልግሎት በመስጠትና በመስተንግዶ ላበረከቱት ልዩ ልዩ አስተዋጽዖ አቶ ዳንኤል በኰሚቴው ስም መንፈሳዊ ምስጋናቸውን አቅርበዋል፡፡

የጠቅላላ ጉባኤው ዐቢይ ኰሚቴ አባላት

በመጨረሻም የማኅበሩ ሰብሳቢ የማጠቃለያ ንግግር ሲያደርጉ በመጀመሪያ ጉባኤው በሰላም ተጀምሮ በሰላም እንዲፈጸም ያደረገውን ልዑል እግዚአብሔርን አመስግነው ለ፲፫ኛው ጉባኤ በሰላም እንዲያደርሳቸው መልካም ምኞታቸውን ከገለጹ በኋላ በጠቅላላ ጉባኤው ለተገኙ ብፁዓን ሊቃነ ጳጳሳት፣ ለተጋባዥ እንግዶችና ከመላው ዓለም ለመጡ የጉባኤው ተሳታፊዎች፤ እንደዚሁም አዳራሹን ለፈቀደው ለጠቅላይ ቤተ ክህነት ጽ/ቤት፣ ጠቅላላ ጉባኤው በአግባቡ እንዲከናወን ላደረገው ለዐቢይ ኰሚቴውና ለጉባኤው መሳካት ልዩ ልዩ ድጋፍ ላደረጉ አካላት ኹሉ በማኅበሩ ስም መንፈሳዊ ምስጋናቸውን ካቀረቡ በኋላ ከምሽቱ 7፡30 በአባቶች ጸሎት ፲፪ኛው ጠቅላላ ጉባኤ ተፈጸሟል፡፡ ተሳታፊዎችም በከበሮና በጭብጨባ ‹‹ንሴብሖ ለእግዚአብሔር ስቡሐ ዘተሰብሐ›› እያሉ ጉባኤውን እግዚአብሔርን በዝማሬ አመስግነዋል፡፡

በአጠቃላይ ለሦስት ቀናት የተካሔደው የማኅበረ ቅዱሳን ፲፪ኛው ጠቅላላ ጉባኤ የእግዚአብሔር ጥበቃ ያልተለየው ጉባኤ ነበር፤ ማለትም ማኅበሩ የጉባኤውን ተሳታፊዎች የሚጠብቅ ኃይል አላሰማራም፡፡ ነገር ግን በእግዚአብሔር ቸርነት፣ በቅዱሳን መላእክት ተራዳኢነት ያለምንም መሰናክል በሰላም ሊጠናቀቅ ችሏል፡፡ ይህ ጉባኤ ከዚህ በፊት ከተካሔዱት ጉባኤያቱ በተለየ መልኩ ብፁዓን አበው የተገኙበት፤ በርካታ የጠቅላይ ቤተ ክህነት መምሪያ ሓላፊዎችና ጥሪ የተደረገላቸው እንግዶች የተሳተፉበት፤ ብዙ ቁም ነገሮች የተዳሰሱበትና አባላቱ የተደሰቱበት ልዩ ጉባኤ ነበር፡፡ ጠቅላላ ጉባኤው ውበት እንደኖረው ካደረጉት ነጥቦች መካከል እርስበርስ መደማመጥ፣ የተሳታፊዎቹ የነቃ ተሳትፎና ትሕትና፣ የአንድነት መንፈስና የምልዓተ ጉባኤው ጥንቃቄ የተሞላበት ውሳኔ ዋነኞቹ ሲኾኑ ለጉባኤው አስደሳች ክሥተት ከኾኑት መርሐ ግብራት ደግሞ በዘመናዊው ትምህርታቸው ከፍተኛ ውጤት አስመዝግበው የተሸለሙ የከፍተኛ ትምህርት ተቋማት ተማሪዎች ሜዳልያዎቻቸውን ለማኅበሩ ማስረከባቸው አንደኛው ነው፡፡

ወስብሐት ለእግዚአብሔር፡፡

ነሐሴ ፳፭ ቀን ፳፻፰ ዓ.ም

በአዳማ ማእከል

አባቶች በሥልጠና ላይ

በማኅበረ ቅዱሳን አዳማ ማእከል ከምሥራቅ ሸዋ ሀገረ ስብከት፣ ከሙያ አገልግሎትና ዓቅም ማጐልበቻ ዋና ክፍል ጋር በመተባበር ለሀገረ ስብከቱ የየመምሪያ ሓላፊዎች፣ ለወረዳ ቤተ ክህነት ሥራ አስኪያጆች፣ ለገዳማትና አድባራት አስተዳዳሪዎች በአጠቃላይ ፵ ለሚኾኑ አባቶች ከነሐሴ ፳፩-፳፪ ቀን ፳፻፰ ዓ.ም ለሁለት ቀናት በሀገረ ስብከቱ የመሰብሰቢያ አዳራሽ የዓቅም ማጎልበቻ ሥልጠና ሰጠ፡፡

በሥልጠናውም የሥራ አመራር ጥበብ፤ የውሳኔ አሰጣጥና የግጭት አፈታት ዘዴ፤ ሕግጋተ ቤተ ክርስቲያንና ቃለ ዓዋዲ ከሥራ አመራር አንጻር፤ እንደዚሁም የፋይናንስ አስተዳደርና ሒሳብ አያያዝ የሚሉ አርእስት የተካተቱ ሲኾን በተጨማሪም የተሐድሶ መናፍቃን እንቅስቃሴን የተመለከተ የግንዛቤ ማስጨበጫ ገለጻ ለሠልጣኞቹ ተደርጎላቸዋል፡፡

በሥልጠናው ማጠናቀቂያ መርሐ ግብር ላይ የሀገረ ስብከቱ ዋና ሥራ አስኪያጅ መጋቤ ትፍሥሕት ሙሉጌታ ቸርነት ሥልጠናው ልምድ ባላቸው ባለሙያዎች መሰጠቱን አድንቀው ሥልጠናውን ያዘጋጀውን ማኅበረ ቅዱሳንን ካመሰገኑ በኋላ ‹‹ያገኛችሁትን ዕውቀት በተግባር ላይ በማዋል ብቁና ዘመናዊ አሠራርን የተላበሰ የሓላፊነት ሥራችሁን እንድትወጡ›› ሲሉ ለሠልጣኞቹ መልእክት አስተላልፈዋል፡፡

የሥልጠናው ተሳታፊዎች በበኩላቸው ‹‹የወሰድነው ሥልጠና መንፈሳዊውን አስተዳደር ከዘመናዊ የሥራ አመራር ጥበብ ጋር በማጣጣም ቤተ ክርስቲያናችንን በአግባቡ ማገልገል እንደምንችል የተረዳንበት ሥልጠና ነው፡፡ በተሐድሶ መናፍቃን እንቅስቃሴ ዙሪያ የተሰጠው የግንዛቤ ማስጨበጫ ገለጻም ቤተ ክርስቲያናችንን ነቅተን እንድንጠብቅና የስብከተ ወንጌል አገልግሎቱን በስፋት ለማዳረስ እንድንፋጠን አድርጎናል›› ብለዋል፡፡

የአዳማ ማእከል ሰብሳቢ መ/ር ጌትነት ዐሥራት ደግሞ ለቤተ ክርስቲያን ኹለንተናዊ ዕድገት በአንድነት ማገልገል የሚኖረውን ጠቀሜታ በመጥቀስ ማኅበሩ የራሳቸው መኾኑን ተገንዝበው በሚያስፈልገው ኹሉ ከማኅበሩ ጎን እንዲቆሙ፤ በምክርና በዐሳብም ድጋፍ እንዲያደርጉ አባቶችን አሳስበዋል፡፡

በመጨረሻም ለሥልጠናው መሳካት አስተዋጽዖና ድጋፍ ላደረጉት ለሀገረ ስብከቱ ሊቀ ጳጳስ ለብፁዕ አቡነ ጎርጎርዮስ፤ ለሀገረ ስብከቱ ዋና ሥራ አስኪያጅ መጋቤ ትፍሥሕት ሙሉጌታ ቸርነትና የየመምሪያ ሓላፊዎች፤ ለወረዳ ቤተ ክህነት፣ ለአድባራትና ገዳማት አስተዳዳሪዎች፤ እንደዚሁም ለአሠልጣኞችና ለበጎ አድራጊ ምእመናን መ/ር ጌትነት መንፈሳዊ ምስጋናቸውን በማኅበሩ ስም አቅርበዋል፡፡

ነሐሴ ፳፬ ቀን ፳፻፰ ዓ.ም

በሐዋሳ ማእከል

በማኅበረ ቅዱሳን የደቡብ ማእከላት ማስተባበሪያ ከልዩ ልዩ ግቢ ጉባኤያት በመመልመል ለአንድ ወር ያሠለጠናቸውን ፶፮ የደረጃ ሁለት ተተኪ መምህራን የሲዳማ፣ ጌድዮ፣ አማሮና ቡርጂ አህጉረ ስብከት ሥራ አስኪያጅ፣ የሐዋሳ ማእከል አባላት፣ የቤተ ክርስቲያን አባቶችና ምእመናን በተገኙበት በሐዋሳ ደብረ ታቦር ቅዱስ ሩፋኤል የካህናት ማሠልጠኛ ተቋም ነሐሴ ፳፩ ቀን ፳፻፰ ዓ.ም አስመረቀ፡፡

በምረቃ መርሐ ግብሩ ላይ የሀገረ ስብከቱ ሥራ አስኪያጅ ሊቀ ጉባኤ አባ ሀብተ ማርያም ‹‹እግዚአብሔር የላከው የእግዚአብሔርን ቃል ይናገራል›› /ዮሐ.፫፥ ፴፬ / በሚል ኃይለ ቃል ትምህርተ ወንጌል ሰጥተዋል፡፡

የዋናው ማእከል ተወካይ ዲ/ን ሙሉጌታ  ኃይለ ማርያም ባስተላለፉት መልእክት ምሩቃኑ ለአገልግሎት እንዲተጉና የተጣለባቸውን አደራ በትጋት እንዲወጡ አሳስበዋል፡፡

ሠልጣኞቹ ከወሰዷቸው ኮርሶች መካከል ትምህርተ ሃይማኖት፣ የቤተ ክርስቲያን ታሪክ፣ የመጽሐፍ ቅዱስ ጥናት፣ ሥርዓትና ምሥጢራተ ቤተ ክርስቲያን፣ ነገረ ቅዱሳን፣ ትምህርተ ክርስትና፣ ክርስቲያናዊ ሥነ ምግባር፣ ሐዋርያዊ ተልእኮ፣ ትምህርተ አበው፣ ነገረ ማርያምና ኦርቶዶክሳዊ የጾታ ትምህርት የሚገኙ ሲኾን በተጨማሪም ስለ ኦርቶዶክሳውያን መዝሙራትና ሐራ ጥቃዎች በቅድስት ቤተ ክርስቲያናችን ላይ እያደረሱት ያለውን የተሐድሶ እንቅስቃሴ የሚመለከት የግንዛቤ ማስጨበጫ ገለጻ ተደርጎላቸዋል፡፡

ሚዲያ ክፍላችን ያነጋገራቸው አንዳድ ምሩቃን በሥልጠናው ጠቃሚ ዕውቀት እንደቀሰሙበትና በርካታ ቁም ነገሮችን እንዳገኙበት ገልጸው ለወደፊቱም ‹‹የየማእከላቱ ክትትልና ድጋፍ እንዳይለየን›› ሲሉ አስተያየት ሰጥተዋል፡፡

በመጨረሻም የደቡብ ማእከላት ማስተባበሪያ ሓላፊ አቶ ዘሪሁን ከበደ የሀገረ ስብከቱን ሊቀ ጳጳስ ብፁዕ አቡነ ገብርኤልን፣ የሀገረ ስብከቱና የወረዳ ቤተ ክህነቱ ሓላፊዎችን፣ የሐዋሳ ደብረ ታቦር ቅዱስ ሩፋኤል አስተደዳሪና ካህናትን፣ መምህራንን እንደዚሁም ሥልጠናው እንዲሳካ ልዩ ልዩ ድጋፍ ያደረጉ አካላትን በማኅበሩ ስም ካመሰገኑ በኋላ መርሐ ግብሩ በአባቶች ጸሎት ተጠናቋል፡፡

ነሐሴ ፳፫ ቀን ፳፻፰ ዓ.ም

በዝግጅት ክፍሉ

አቡነ ተክለ ሃይማኖት

በዛሬው ዝግጅታችን ነሐሴ ፳፬ ቀን የሚከበረውን በዓለ ዕረፍታቸውን ምክንያት በማድረግ ከቅዱሳን ጻድቃን መካከል አንዱ የኾኑትን፣ ‹‹ሐዲስ ሐዋርያ›› እየተባሉ የሚጠሩትን የቅዱስ ተክለ ሃይማኖትን ዜና ሕይወት በአጭሩ ይዘን ቀርበናል፤

አቡነ ተክለ ሃይማኖት በእግዚአብሔር መልካም ፈቃድ፣ በሊቀ መላእክት ቅዱስ ሚካኤል ብሥራት፤ ከአባታቸው ከካህኑ ጸጋ ዘአብና ከእናታቸው ከቅድስት እግዚእ ኀረያ ታኅሣሥ ፳፬ ቀን ፲፪፲፪ ዓ.ም. በቡልጋ አውራጃ በደብረ ጽላልሽ ኢቲሳ ተወለዱ፡፡ በተወለዱ በሦስተኛውም ቀን እሑድ ከጠዋቱ ሦስት ሰዓት ከእናታቸው ዕቅፍ ወርደው ‹‹አሐዱ አብ ቅዱስ፤ አሐዱ ወልድ ቅዱስ፤ አሐዱ ውእቱ መንፈስ ቅዱስ፡- አንዱ አብ ቅዱስ ነው፤ አንዱ ወልድ ቅዱስ ነው፤ አንዱ መንፈስ ቅዱስ ቅዱስ ነው›› በማለት ሥላሴን አመስግነዋል፡፡ ወላጆቻቸውም ስማቸውን ‹‹ፍሥሐ ጽዮን›› ብለዋቸዋል፡፡ በተወለዱ በ፲፭ ዓመታቸው ዲቊናን፤ በ፳፪ ዓመታቸው ቅስናን ከግብፃዊው ጳጳስ ከአባ ጌርሎስ /ቄርሎስ/ ተቀብለዋል፡፡

አንድ ቀን ወደ ጫካ ለአደን በሔዱበት ዕለት ጌታችን መድኀኒታችን ኢየሱ ክርስቶስ ተገልጦላቸው ጸጋ መንፈስ ቅዱን ካሰደረባቸው፤ እንደዚሁም ‹ሐዲስ ሐዋርያ› ብሎ ወንጌል ወዳተዳረሰበት ቦታ እንደሚልካቸው ከነገራቸው፤ ቅዱስ ሚካኤልም ከአውሬ አዳኝነት ሰውን ወደ እግዚአብሔር መንግሥት ለመመለስ እንደ ተመረጡና አጋንንትን የማውጣት፣ ተአምራትን የማድረግ ሥልጣን እንደ ተሰጣቸው፤ ስማቸውም ‹ተክለ ሃይማኖት› እንደሚባልና ትርጓሜውም ተክለ አብ፣ ተክለ ወልድ፣ ተክለ መንፈስ ቅዱስ ማለት ነው›› እንደ ኾነ ካስረዳቸው በኋላ ወደ ቤታቸው ተመልሰው ያላቸውን ንብረት ኹሉ ለቤተ ክርስቲያንና ለነዳያን ሰጥተው ‹‹አቤቱ ጌታዬ ኢየሱስ ክርስቶስ ሆይ! የመንግሥተ ሰማያትን በር ትከፍትልኝ ዘንድ እነሆ ቤቴን እንደ ተከፈተ ተውኩልህ›› በማለት ቤታቸውን ትተው ወንጌልን ለማስተማር ፈጥነው ወጡ፡፡ ከዚያ ጊዜ ጀምረው በመላው ኢትዮጵያ እየተዘዋወሩ ወንጌልን በመስበክና ተአምራትን በማድረግ ብዙ አሕዛብን ከአምልኮተ ጣዖት ወደ አምልኮተ እግዚአብሔር፤ ከገቢረ ኀጢአት ወደ ገቢረ ጽድቅ መልሰዋል፡፡ ቤተ ክርስቲያንንም አንጸዋል፡፡

ከዚህ በኋላ በደብረ ሊባኖስ (ገዳመ አስቦ) ዋሻ በመግባትም ሁለቱን በፊት፣ ሁለቱን በኋላ ሁለቱን በቀኝ፣ ሁለቱን በግራ ስምንት ጦሮችን ተክለው እጆቻቸውን በትእምርተ መስቀል በመዘርጋት የክርስቶስን ሕማም፣ ሞትና ነገረ መስቀል በማሰብ በተመስጦ ሌሊትና ቀን ያለማቋረጥ በጾም፣ በጸሎት ተወስነው ሲጋደሉ፤ ከቊመት ብዛት የተነሣ በ፺፪ኛ ዓመታቸው ጥር ፬ ቀን ፲፪፹፱ ዓ.ም አንዲቱ የእግራቸው አገዳ ተሰብራለች፡፡ ደቀ መዛሙርቱም የመንፈሳዊ አባታቸውን ስባረ ዐፅም አክብረው በሥርዓት አኑረዋታል፡፡ እግራቸው እስኪሰበር የቆዩባቸው ዓመታትም ፳፪ ናቸው፡፡ ለሰባት ዓመታት በአንድ እግራቸው ቆመው ያለ ምግብና ያለ ውኃ በትኅርምት ሌሊትና ቀን እንደ ምሰሶ ጸንተው በትጋት ለሰው ዘር ኹሉ ድኅነትን ሲለምኑ ኖረዋል፡፡

ከሰባቱ ዓመታት ውስጥ ጥቂት ውኃ የቀመሱት በአራተኛው ዓመት ብቻ እንደ ነበረ መጽሐፈ ገድላቸው ይናገራል፡፡ ጻድቁ አባታችን ምድራዊ ሕይወታቸውን በተጋድሎና በሐዋርያዊ አገልግሎት ከፈጸሙ በኋላ ከዚህ ዓለም ውጣ ውረድ የሚያልፉበት ቀን በተቃረበ ጊዜ ጌታችን መድኀኒታችን ኢየሱስ ክርስቶስ ከእናቱ ከቅድስት ድንግል ማርያም፣ ከቅዱሳን መላእክት፣ ከቅዱሳን ነቢያትና ከቅዱሳን ሐዋርያት ጋር ወደእርሳቸው በመምጣት የሚያርፉበት ዕለት መድረሱን ነግሯቸው የተጋድሏቸውን ጽናት አድንቆ በስማቸው መታሰቢያ ለሚያደርጉ፣ ለነዳያን ለሚመጸዉቱ ቤተ ክርስቲያን ለሚያሠሩ የምሕረት ቃል ኪዳን ሰጥቷቸው በክብር በምስጋና ወደ ሰማይ ዐረገ፡፡ ስለ ተጋድሏቸው ጽናትም ‹‹በሰው እጅ የማይለካውን ይህንን የመንግሥት አዳራሽ ውሰድ›› በማለት የመለኮትን ነገር የሚናገር የእሳት አንደበት ያለው የጸጋ ልብስ አልብሷቸዋል፤ በመስቀል ምልክት ያጌጡ ሰባት የሕይወት አክሊላትንም አቀዳጅቷቸዋል፡፡

አቡነ ተክለ ሃይማኖትም የዕረፍታቸው ጊዜ መቃረቡን ባወቁ ጊዜ የመንፈስ ልጆቻቸውን ጠርተው ጌታችን የነገራቸውን ሁሉ አስረድተው አባታዊ ምክርና ተግሣፅ ከሰጧቸው በኋላ ነሐሴ ፳፬ ቀን ከዚህ ዓለም ድካም ዐረፉ፡፡ የመንፈስ ልጆቻቸውም ለአንድ ቅዱስ አባትና ካህን በሚገባ ሥርዓት በማኅሌት፣ በዝማሬና በምስጋና ቀበሯቸው፡፡ ጌታችንም ከእመቤታችንና ከቅዱሳን መላእክት ጋር ተገልጾ ታያቸው፤ ነፍሳቸውንም ‹‹የጠራሽ፣ ንጽሕት ነፍስ ሆይ ወደእኔ ነዪ›› ብሎ በክብር ተቀብሏታል፡፡ በመጽሐፈ ገድላቸው እንደተጠቀሰው ቅዱስ አባታችን አቡነ ተክለ ሃይማኖት በዚህ ዓለም የኖሩበት ዕድሜ ዘጠና ዘጠኝ ዓመት ከዐሥር ወር ከዐሥር ቀን ነው፡፡ ገድላቸው ዕድሜያቸውን በመከፋፈል፡- በእናት አባታቸው ቤት ፳፪ ዓመት፤ በከተታ ፫ ዓመት፤ በይፋት ፱ ወር፤ በዳሞት ፲፪ ዓመት፤ በአማራ ፲ ዓመት፤ በሐይቅ ፲ ዓመት፤ በደብረ ዳሞ ፲፪ ዓመት፤ በትግራይ ገዳማት በመዘዋወርና ወደ ኢየሩሳሌም በመመላለስ ፩ ዓመት፤ ዳዳ በሚባል አገር ፩ ወር፤ በደብረ አስቦ ገዳም ፳፱ ዓመት ከ፲ ቀን መቆየታቸውን ይናገራል /ገ.ተ.ሃ.፶፱፥፲፬-፲፭/፡፡

በአጠቃላይ አባታችን ተክለ ሃይማኖት ሕይወታቸዉን ሙሉ ለእግዚአብሔር በመስጠት፣ እንደ በሬ ተጠምደው፣ እንደገበሬ ታጥቀው ይህንን ዓለም ንቀው በጾም በጸሎት ተወስነው በብሕትውና ከመኖራቸው በተጨማሪ እንደቅዱሳን ሐዋርያት ወንጌልን በመላው ኢትዮጵያ እየተዘዋወሩ የሰበኩ፣ በጌታችን በመድኀኒታችን በኢየሱስ ክርስቶስ ስም ድውያነ ሥጋን በተአምራት፣ ድውያነ ነፍስን በትምህርት የፈወሱ ሐዋርያ ናቸው፡፡

ቅድስት ቤተ ክርስቲያችንም ጌታችን መድኀኒታችን ኢየሱስ ክርስቶስ ለደቀ መዛሙርቱ ‹‹እናንተን የሚቀበል እኔን ይቀበላል፤ እኔንም የሚቀበል የላከኝን ይቀበላል፡፡ ነቢይን በነቢይ ስም የሚቀበል የነቢይን ዋጋ ያገኛል፡፡ ጻድቅንም በጻድቅ ስም የሚቀበል የጻድቁን ዋጋ ያገኛል፡፡ ማንም ከእነዚህ ከተናናሾቹ ለአንዱ ቀዝቃዛ ጽዋ ብቻ በደቀ መዝሙር ስም የሚያጠጣ እውነት እላችኋለሁ፤ ዋጋው አይጠፋበትም›› /ማቴ.፲፥፵-፵፪/ በማለት የተናገረውን መለኮታዊ ቃል ኪዳን መሠረት አድርጋ መጋቢት ፳፬ ቀን ፅንሰታቸውን፤ ታኅሣሥ ፳፬ ቀን ልደታቸውን፤ ጥር ፳፬ ቀን ስባረ ዐፅማቸውን፤ ግንቦት ፲፪ ቀን ፍልሰተ ዐፅማቸውን ነሐሴ ፳፬ ቀን ዕረፍታቸውን በትላቅ ደስታ ታከብራለች፡፡

ቅዱሳን ጻድቃን በመንፈሳዊ አርአያነታቸው፣ በጸሎታቸውና በትምህርታቸው ከከበቡን የነፍስ ጠላቶች፤ ከርኲሳን መናፍስትና ከጨለማው ልጆች፣ ከክፉ ሰዎች ሽንገላና ተንኰል ለመሰወርና ለመጠበቅ ከእግዚአብሔር የተቀበሉት ሥልጣን ምን ጊዜም ይሠራል፡፡ በጻድቃን መኖር ሀገር ከጥፋት ትድናለች፡፡ የጻድቃንን ስም ጠርቶ እግዚአብሔርን በመለመን በረከትና ረድኤት ይገኛል፡፡ ስለ ጻድቃን ብሎ እግዚአብሔርም ምሕረቱን ያድላል፡፡ ጻድቃንን ማሰብ ሥራቸውን መዘከር ክርስቲያናዊ ሕይወታችንን ያጐለምሳል፡፡ በነፍስ በሥጋ ይታደገናል፤ ይረባናል፤ ይጠቅመናል፡፡ ስለዚህም ነው ቤተ ክርስቲያናችን ጻድቃንን እንድናስባቸው፣ በስማቸውም ለድሆችና ለጦም አዳሮች እንድንመጸውት መታሰቢያቸውን እንድናደርግ የምትመክረን፤ የምታስተምረን /ማቴ.፲፥፵፩-፵፪/፡፡ ጻድቃንን በሕይወተ ሥጋ ሳሉም ቢኾን፤ ከሞቱም በኋላ በዐጸደ ነፍስ በጸሎታቸው ለሚታመኑ፣ በቃል ኪዳናቸው ለሚማጸኑ፣ የድኅነተ ሥጋ፣ የድኅነት ነፍስ ምክንያቶች ናቸው፡፡

የአቡነ ተክለ ሃይማኖትና የኹሉም ጻድቃን ጸሎትና በረከት ረድኤትና ምልጃ በመላው ሕዝበ ክርስቲያን ላይ ጸንቶ ይኑር፡፡

ወስብሐት ለእግዚአብሔር፡፡

ምንጭ፡-

መለከት መጽሔት ፲፰ኛ ዓመት፣ ቍጥር ፱፡፡

መጽሐፈ ስንክሳር፣ ነሐሴ ፳፬ ቀን፡፡

ገድለ ተክለ ሃይማኖት፡፡

ነሐሴ ፳፫ ቀን ፳፻፰ ዓ.ም

በዝግጅት ክፍሉ

በማበኅረ ቅዱሳን የቅዱሳት መካናት ልማትና ማኅራዊ አገልግሎት ዋና ክፍል አዘጋጅነት ‹‹ትርጓሜ ያሐዩ፤ ትርጓሜ ያድናል›› በሚል ኃይለ ቃል ነሐሴ ፳፩ ቀን ፳፻፰ ዓ.ም በአዲስ አበባ ከተማ በግዮን ሆቴል ብሉ ሳሎን አዳራሽ የውይይት መርሐ ግብር ተካሔደ፡፡

የመርሐ ግብሩ ታዳሚዎች በከፊል

በመርሐ ግብሩ ላይ ሊቃውንተ ቤተ ክርስቲያን፣ የመንግሥት ባለ ሥልጣናት፣ የዩኒቨርሲቲ መምህራን፣ የኪነ ጥበብ ባለሙያዎችና ጥሪ የተደረገላቸው ምእመናን የተገኙ ሲኾን የዋና ክፍሉ ምክትል የቦርድ ሰብሳቢ ወ/ሮ ዓለም ፀሐይ መሠረት ለተሳታፊዎች የእንኳን ደኅና መጣችሁ ንግግር ባደረጉበት ወቅት የመርሐ ግብሩ ዓላማ የመጻሕፍት ትርጓሜ ቤቶችን አስተዋጽዖ በማስገንዘብ ጉባኤ ቤቶችን ለማስፋፋትና ተተኪ ሊቃውንትን ለማፍራት የሚያስችል ግንዛቤ ለማስጨበጥ መኾኑን አስታውቀዋል፡፡

ሊቀ ሊቃውንት ዕዝራ ሐዲስ

በዕለቱ የጎንደር መንበረ መንግሥት መድኀኔ ዓለም የአራቱ ጉባኤያት ምስክር መምህርና የቤተ ክርስቲያኑ አስተዳዳሪ ሊቀ ሊቃውንት ዕዝራ ሐዲስ በአንድምታ ትርጕም ያዘጋጇቸው ትንቢተ ኢሳይያስ፣ ሃይማኖተ አበውና ድርሳነ ቄርሎስ ወጰላድዮስ ምስለ ተረፈ ቄርሎስ ተመርቀዋል፡፡

ሊቀ ሊቃውንት ዕዝራ መጻሕፍቱ ለጉባኤ ቤት መምህራንና ለደቀ መዛሙርት እንደዚሁም ለምእመናን የሚኖራቸው ጠቀሜታ የጎላ መኾኑን ጠቅሰው ‹‹መጻሕፍቱ በስሜ ቢዘጋጁም የመጻሕፍቱ ባለቤት ግን ጉባኤ ቤቱ ነው እንጂ እኔ አይደለሁም›› ብለዋል፡፡ ከመጻሕፍቱ ሽያጭ የሚገኘውም ገቢም ሙሉ በሙሉ ለጉባኤ ቤታቸው መኾኑን ተናግረዋል፡፡

በተጨማሪም በቀሲስ ዶ/ር ምክረ ሥላሴ ገብረ አማኑኤልና በዲያቆን ያረጋል አበጋዝ የትርጓሜ መጻሕፍትን ትውፊትና አስተዋጽዖ የሚዳስስ ጥናታዊ ጽሑፍ፤ እንደዚሁም የትርጓሜ መጻሕፍትን ታሪካዊ አመጣጥና የጉባኤ ቤቶችን ችግር የሚያስቃኝ ዘጋቢ ፊልም ከቀረበ በኋላ ሊቃውንቱንና ተጋባዥ እንግዶችን ያሳተፈ ጠቃሚ ውይይት ተካሒዷል፡፡

ከሰዓት በኋላ በዮድ አቢሲንያ የምግብ አዳራሽ በቀጠለው የገቢ ማሰባሰቢያ መርሐ ግብርም ሊቀ ሊቃውንት ዕዝራ ‹‹የታቦር ጉባኤ›› በሚል ኃይለ ቃል ትምህርተ ወንጌል የሰጡ ሲኾን በትምህርታቸውም ከደብረ ታቦር ምሳሌዎች አንደኛው የመጻሕፍት ትርጓሜ ጉባኤ ቤት መኾኑን አስረድተዋል፡፡

በዮድ አቢሲንያ አዳራሽ የተገኙ ሊቃውንትና ምእመናን በከፊል

ሊቀ ሊቃውንት በመቀጠልም የጎንደር መንበረ መንግሥት መድኀኔ ዓለም የትርጓሜ መጻሕፍት ምስክር ቤት ደቀ መዛሙርትን እያስተማረ የሚገኘው በመቃብር ቤት መኾኑ ለሥርዓተ ትምህርቱ መሰናክል እንደ ኾነባቸው ገልጸዋል፡፡ አያይዘውም ለጉባኤ ቤቱ አገልግሎት የሚሰጥ ኹለ ገብ ዘመናዊ ሕንጻ በጎንደር ከተማ ለመገንባት በ፳፻፰ ዓ.ም የመሠረት ድንጋይ ቢቀመጥም በገንዘብ እጥረት ምክንያት ሕንጻው እስከ አሁን ድረስ አለመገንባቱን አስታውሰው ይህን ሕንጻ ለመገንባት መላው ሕዝበ ክርስቲያን ከጎናቸው እንዲቆም ጥሪያቸውን አስተላልፈዋል፡፡

በመጨረሻም በአባቶች ጸሎት የውይይት መርሐ ግብሩ ተፈጸሟል፡፡