Archive for category: ስብከት

ጳጉሜን 5 ቀን 2004 ዓ.ም.

የኢትዮጵያ ኦርቶዶክስ ተዋሕዶ ቤተ ክርስቲያን ዐቃቤ መንበረ ፓትርያርክና የአርሲ ሀገረ ስብከት ሊቀ ጳጳስ ብፁዕ አቡነ ናትናኤል ለመላው ኢትዮጵያውያንና ኢትዮጵያውያት ባስተላለፉት መልእክት፡- “የዘመናት ጌታ እግዚአብሔር አምላካችን እንኳን ከዘመነ ዮሐንስ 2004 ዓ.ም. ወደ ዘመነ ማቴዎስ 2005 ዓ.ም. በሰላም አደረሳችሁ፤ ለሚቀጥለውም ዘመን በቸርነቱ ጠብቆ በሰላምና በጤና እንዲያደርሳችሁ ቤተ ክርስቲያናችን ዘወትር ያለ ማቋረጥ ጸሎቷን ወደ ፈጣሪ ታቀርባለች” ካሉ በኋላ ሁሉም ኅብረተሰብ መልካም ታሪክን ለማስመዝገብ በተሰለፈበት ዓላማ የሚጠበቅበትን ድርሻ ማበርከት እንደሚገባው አሳስበዋል፡፡

የመግለጫውን ሙሉ ቃል ከዚህ በታች ያንብቡ፡፡

ጳጉሜን 1 ቀን 2004 ዓ.ም.

የማኅበረ ቅዱሳን 10ኛ ጠቅላላ ጉባኤ በመንበረ ፓትርያርክ ጠቅላይ ቤተክህነት ስብከተ ወንጌል አዳራሽ ብፁዐን ሊቃነ ጳጳሳት፤ የጠቅላይ ቤተ ክህነት፤ የመምሪያ ሓላፊዎች፤ ቀሳውስትና ካህናት፤ በሬዴራል ጉዳዮች የሃይማኖት ተወካዮች ነሐሴ 30 ቀን 2004 ዓ.ም. ተጀምሯል፡፡

በዋዜማው ነሐሴ 29 ቀን 2004 ዓ.ም. ከተለያዩ የሀገሪቱ አካባቢዎች የመጡ የማኅበሩ አባላት ከምሽቱ 12፤00 ስዓት ጀምሮ የጠቅላላ ጉባኤው አስተባባሪ ኮሚቴ ባዘጋጀው ትራንስፖርት ከማኅበሩ ዋናው ማእከል አቧሬ ወደሚገኘው አቡነ ጎርጎርዮስ የትምህርትና ሥልጠና ማእከል በመጓዝ የእንኳን ደህና መጣችሁ መልእክት፤ የመርሐ ግብር ትውውቅ፤  ሕጽበተ እግርና የእራት መርሐ ግብር ተከናውኗል፡፡

ነሐሴ 30 ቀን 2004 ዓ.ም. ጠዋት የማኅበረ ቅዱሳን 10ኛ ጠቅላላ ጉባኤ በኢትዮጵያ ኦርቶዶክስ ተዋሕዶ ቤተክርስቲያን ዐቃቤ መንበረ ፓትርያርክና የአርሲ ሀገረስብከት ሊቀ ጳጳስ በመመራት በመንበረ ልዑል ቅዱስ ማርቆስ ቤተክርስቲያን በተጋበዙ ቀሳውስትና ካህናት ጸሎተ ወንጌል የተካሄደ ሲሆን በብፁዕነታቸው ጸሎትና ቡራኬ ተከፍቷል፡፡

የማኅበረ ቅዱሳን የሁለት ዓመት የአገልግሎት ክንውን ሪፖርት በማኅበሩ ሰብሳቢ ቀሲስ ዶ/ር ሙሉጌታ ስዩም አማካይነት የቀረበ ሲሆን ሪፖርቱም በሚዲያ አገልግሎት በግቢ ጉባኤያት፤ በስብከተ ወንጌል አገልግሎት፤ በቅዱሳት መካናትና የአብነት ትምህርት ቤቶች ላይ የተሠሩ ከፍተኛና አነስተኛ ፕሮጀክቶች፤ ስለ ቤተ ክርስቲያናችን የተደረጉ የጥናትና ምርምር ሥራዎች፤ የቤተ ክርስቲያንና የምእመናን ማኅበራዊ አገልግሎት፤ አጽራረ ቤተ ክርስቲያን በቤተ ክርስቲያን ላይ የሚያደርሱትን ጥቃትና የተወሰዱ እርምጃዎች፤ ወዘተ የተከናወኑ ተግባራት በዝርዝር ቀርቧል፡፡

በተያዘው መርሐ ግብር የኦዲት ሪፖርት ቀርበዋል፡፡ የማኅበሩ ሒሳብ የ2003 ሪፓርት የውጪ ኦዲተር ሀብተ ወልድ መንክርና ጓደኞቹ በቻርተር የተመሰከረላቸው የሂሳብ አዋቂዎች የኦዲት ሪፖርቶች ቀርበዋል፡፡ በዚህም ሂሳቡ ትክክለኛ እና የማኅበሩን ገጽታ የሚያሳይ መሆኑን አረጋግጠዋል፡፡

በቀረበው የማኅበሩ የሁለት ዓመታት ክንውን እንዲሁም አጠቃላይ አስተያየት እንዲሰጡ በኢትዮጵያ ኦርቶዶክስ ተዋሕዶ ቤተ ክርስቲያን ዐቃቤ መንበረ ፓትርያርክና የአርሲ ሀገረ ስብከት ሊቀ ጳጳስ ብፁዕ አቡነ ናትናኤል መልካም ፈቃድ ከብፁዐን ሊቃ ነጳጳሳት ተጋብዘዋል፡፡ በተጨማሪም ጥሪ የተደረገላቸው እንግዶችም ከበጎ አድራጊ ምእመናን፤ ከነገረ መለኮት ምሩቃን ማኅበር፤ ከፀረ ተሐድሶ ጥምረት የተወከሉ እንግዶች በማኅበረ ቅዱሳን አገልግሎት ዙሪያ አስተያየታቸውን ሰጥተዋል፡፡

አስተያየታቸውን ከሰጡ ብፁዐን ሊቃነ ጳጳሳት መካከል ብፁዕ አቡነ ጎርጎርዮስ ሣልሳዊ የምስራቅ ሸዋ ሀገረ ስብከት ሊቀ ጳጳስ “በገሊላ አውራጃ ጌታ አሥራሁለት ሐዋርያትን እንደ መረጠ ብፁዕ አቡነ ጎርጎርዮስም በምሳሌነት ይህች ቤተ ክርስቲያን የተማረ የሰው ኀይል ያስፈልጋታል በማለት 12 የዩኒቨርስቲ ተማሪዎችን ይዘው ነው በዝዋይ ሥራ የጀመሩት፡፡ ማኅበሩ ማኅበራችን ነው” በማለት የማኅበረ ቅዱሳንን አመሠራረት አስታውሰዋል፡፡

ብፁዕ አቡነ ማትያስ የካናዳ ሀገረ ስብከት ሊቀ ጳጳስ በሰጡት አስተያት “ማኅበረ ቅዱሳን ብዙ ምሁራንና አዋቂዎች የተሰባሰቡበት ነው፡፡ ማኅበረ ቅዱሳን የቅዱስ ሲኖዶስ ቋሚ ተጠሪ ነው” በማለት ነበር የገለጹት፡፡

ብፁዕ አቡነ ኤልሳዕ የሰሜን ጎንደር ሀገረ ስብከት ሊቀ ጳጳስ “ማኅበረ ቅዱሳን በ20 ዓመት ውስጥ ያከናወነው አገልግሎት እኛ የማኅበረ ቅዱሳን ደጋፊዎች ብቻ ሳንሆን ተቃራኒዎችም የሚመሰክሩት ነው” በማለት ተናግረዋል፡፡

ሊቀ ካህናት ኃ/ሥላሴ ዓለማየሁ የዴንቨር ደብረ ሰላም መድኀኔዓለም አስተዳዳሪና የካሊፎርኒያ  አካባቢ ሀገረ ስብከት ሥራ አስኪያጅ በሰጡት አስተያየት ”ከማኅበሩ ጋር በግጭትም፤ በፍቅርም ተገናኝተናል፡፡ ማኅበሩን ከማወቄ በፊት የተቀበልኩት በበጎ መንፈስ አልነበረም፡፡ ነገር ግን በሚያስደንቅ ሁኔታ እኔን የሚያሳምኑ ነገሮች የተፈጠሩት ውስጣችን ገብተህ አገልግሎታችንን ተመልክተህ ፍረድ የሚል ጥያቄ አቀረቡልኝ፡፡ አላቅማማሁም ገባሁ፡፡ የማኅበሩን ማንነት ውስጡን ሕይወቱን ለማየት በምሞክርበት ጊዜ በትክክል የቤተ ክርስቲያኒቱ የጀርባ አጥንት ሆኖ እያገለገለ መሆኑን ለማወቅ እድል አገኘሁ” በማለት ከማኅበሩ ጋር ያላቸውን ቅርበት ገልጸዋል፡፡

የጠዋቱ መርሐ ግብር በዐቃቤ መንበረ ፓትርያርክና በአርሲ ሀገረ ስብከት ሊቀ ጳጳስ በብፁዕ አቡነ ናትናኤል ቃለ ምዕዳንና ቡራኬ ተጠናቋል፡፡

ከስዓት በኋላ በነበረው መርሐ ግብር የማኅበሩ ኦዲትና ኢንስፔክሽን አገልግሎት ሓላፊ ዲ/ን ንጋቱ ባልቻ ሪፖርት የቀረበ ሲሆን በሪፖርቱም የማኅበሩ ስልታዊ ዕቅድ አፈጻጸም፤ የማኅበሩ ሥራ አመራር አፈጻጸም፤ የጠቅላላ ጉባኤያት ውሳኔ በተመለከተ ያልተተገበሩ፤ የሂሳብ ሪፖርት ላይ ታይተዋል ያሏቸውን ክፍተቶች አቅርበዋል፡፡በተጨማሪም የጠቅላላ ጉበኤ ውሳኔ ወይም አቅጣጫ የሚሹ ጉዳዮች ተለይተው ጠቅላላ ጉባኤው ቀጣዩን ስልታዊ እቅድ እና የማኅበሩ መተዳደሪያ ደንብ ሲከለስ እንዲካተቱ ትኩረት እንዲሰጣቸው አሳስበዋል፡፡ በኦዲትና ኢንስፔክሽን በቀረበው ሪፖርት ላይና ሌሎች ተያያዥ ጉዳዮች እንዲሁም ከአባላት በተነሱ ጥያቄዎችና አስተያየቶች ማኅበሩን ወደ ፊት ሊጠቅሙ በሚችሉ ጉዳዮች ላይ ሰፊ ውይይት ተደርጓል፡፡

በመጨረሻም የሚቀጥሉትን አራት ዓመታት ማኅበሩን የሚመሩ የሥራ አመራር አባላትን የሚያስመርጥ 5 አባላትን ያቀፈ አስመራጭ ኮሚቴ ለመምረጥ አስተያየት ከተሰጠባቸው በኋላ በብፁዕ አቡነ ዮናስ የአፋር ሀገረ ስብከት ሊቀ ጳጳስ መሪነት ጸሎተ እግዝእትነ ማርያምና አቡነ ዘበሰማያትን በማድረስ አምስቱን አስመራጭ ኮሚቴ አባላትን በእጣ እንዲለዩ ተደርጓል፡፡ በዚሁ መሠረት የዕለቱ መርሐ ግብር በብፁዕ አቡነ ዮናስ ቡራኬ ተጠናቋል፡፡

የጠቅላላ ጉባኤው እስከ አርብ ጳጉሜ 2 ቀን የሚቀጥል ሲሆን የተለያዩ ጥናታዊ ጽሑፎች የሚቀርቡበትና ለቀጣዩ አራት ዓመታት ማኅበሩን የሚመለከት ስልታዊ ዕቅድ ላይ እንደሚወያዩ ይጠበቃል፡፡

ነሐሴ 28 ቀን 2004 ዓ.ም.

በማኅበረ ቅዱሳን የአዲስ አበባ ማእከል ትምህርትና ሐዋርያዊ አገልግሎት ክፍል ከሐምሌ 24 እስከ ነሐሴ 24 ቀን 2004 ዓ.ም. በዝዋይ ሐመረ ኖኅ ቅዱስ ገብርኤል ገዳም ያሠለጠናቸውን ተተኪ ሰባክያነ ወንጌል አስመረቀ፡፡

ሠልጣኞች በቆይታቸው የጥናትና ምርምር፣ የቅዱሳት መጻሕፍት ጥናት፣ ነገረ አበው፣ የተመረጡ ነገረ ሃይማኖት ርእሰ ጉዳዮች፣ የመማር ማስተማር ዘዴ፣ የታሪክ አጠናን ሂደት፣ የተግባቦት ሥልጠና፣ ሥርዓተ ጾታ፣ ወቅታዊ የቤተ ክርስቲያን ተግዳሮት በሚሉ ርዕሰ ጉዳዮች ሥልጠና ወስደዋል፡፡

የሐመረ ብርሃን ቅዱስ ገብርኤል ገዳም አስተዳዳሪ የኔታ ሐረገ ወይን ለተመራቂ ተማሪዎች ቃለ ምእዳን አስተላልፈዋል፡፡

የተማሪዎቹ ተወካይ ወጣት ግርማ አብደታ ማኅበረ ቅዱሳን ስብከተ ወንጌልን ለማስፋፋት የሚያደርገው እንደዚህ ዓይነት ሥልጠና ለመንፈሳዊ አገልግሎታችን ብቻ ሳይሆን ለዓለማዊም ትምህርታችን ጠቅሞናል በማለት ገልጸዋል፡፡

አያይዘውም ከወሰድናቸው የሥልጠና ርዕሶች አንዱ ነገረ አበው ትምህርት አባቶችን ለዚህች ሃይማኖት የከፈሉትን መሥዋእት በአጠቃላይ የሰዓት አጠቃቀምን የሥራ ፍቅርንና የጸሎት ሕይወትን የተረዳንበት ነው በማለት ገልጸዋል፡፡

በምርቃት መርሐ ግብሩ ላይ የገዳሙ አስተዳዳሪ የኔታ ሐረገ ወይንና የገዳሙ ርዕሰ መምህር አባ ገ/ሕይወት አባቶች መነኮሳት የማኅበረ ቅዱሳን ተወካዮችና መዘምራን ተገኝተዋል፡፡

ነሐሴ 28 ቀን 2004 ዓ.ም.

የከምባታ፣ ሀዲያ፣ ስልጤና ጉራጌ አህጉረ ስብከት በሆሳዕና ከተማ በደብረ ገነት ቅድስት ማርያም ቤተ ክርስቲያን ቀደም ሲል አገልግሎት ሲሰጥ የነበረው የንባብና የቅዳሴ የአብነት ትምህርት ቤት የጥገና እና የግንባታ እንዲሁም የውስጥ ቁሳቁስ የማሟላት ሥራ ተጠናቆ እሑድ ነሐሴ 20 ቀን 2004 ዓ.ም ተመረቀ፡፡

የአብነት ትምህርት ቤቱን በማጠናከር በሀገረ ስብከቱ ለሚገኙ አብያተ ክርስቲያናት አገልጋይ ካህናትና ዲያቆናት ማፍራት የሚቻልበት ሁኔታ ለማመቻቸት በማኅበረ ቅዱሳን ሆሳዕና ማእከል ፕሮጀክቱ ተቀርጾ በማኅበረ ቅዱሳን ከአሜሪካ ማእከል በተገኘ የገንዘብ ድጋፍ፣ በዋናው ማእከል በቅዱሳት መካናት ልማትና ማኅበራዊ አገልግሎት ዋና ክፍል አስተባባሪነት ተሠርቶ ለመመረቅ በቅቷል፡፡

“በተደረገው ጥገናና ግንባታ የሰባት ክፍሎች የውኃ ልክ፤ የወለል ሊሾ፤ የግድግዳ ግርፍ ሥራ፤ የኮርኒስና ቀለም ቅብ የተሠራ ሲሆን ከእነዚህ ክፍሎች ውስጥ  አምስቱ ለተማሪዎች ማደሪያ፣ አንድ ክፍል ለመምህራን፣ አንድ ክፍል ለተማሪዎች መማሪያ፣ አንድ መመገቢያ አዳራሽ ታድሰዋል፡፡ አንድ ክፍል ሙሉ ለሙሉ በመፍረሱ በአዲስ መልክ ተገንብቷል፡፡ በተጨማሪም አንድ መቀጸያ ክፍል፣ አራት መጸዳጃ ቤቶች፣ ሁለት ገላ መታጠቢያ ቤቶች፣ አንድ ምግብ ማብሰያ ክፍል አዲስ ግንባታ መከናወኑንና ሙሉ የውስጥ መገልገያ ቁሳቁስ አልጋ፣ ፍራሽ፣ የመማሪያ ወንበር፣ ጠረጴዛ፣ የምግብ ማብሰያና መመገቢያ ቁሳቁስ ተሟልቶለታል፡፡” በማለት ዲ/ን አእምሮ ይሔይስ የቅዱሳት መካናት የልማትና ማኅበራዊ አገልግሎት ዋና ክፍል ዳይሬክተር በምረቃው ላይ ባሰሙት ሪፖርት ገልጸዋል፡፡

በማኅበሩ ተቀርጾ ተግባራዊ እየተደረገ ያለው መርሐ ግብር ለተማሪዎችና ለመምህራን በያሉበት ሀገረ ስብከት የምግብ፣ የአልባሳት፣ የመጸሐፍት ድጋፍ በማቅረብ ጉባኤ ቤት፣ የተማሪዎች ማደሪያ ቤቶችን በመሥራት፣ በመጠገን፣ ልዩ ልዩ ሥልጠናዎችን በማካተት ለዘመናት የሚገባ አገልግሎት እንዲያበረክቱ ማድረግ ነው ያሉት ዲ/ን አእምሮ ይሔይስ “የሆሳዕና ደብረ ገነት ቅድስት ማርያም ቤተ ክርስቲያን የአብነት ትምህርት ቤት 40 ተማሪዎችን በአዳሪነት በመቀበል ሙሉ የማደሪና የመመገቢያ አገልግሎት ለመስጠት እንዲችል ተደርጎ ተገንብቷል፡፡ ፕሮጀክቱም የአስተዳደርን ወጪ ጨምሮ በአጠቃላይ ብር 553,779.20 (አምስት መቶ ሃምሳ ሦስት ሺህ ሰባት መቶ ሰባ ዘጠኝ ብር ከሃያ ሣንቲም) ፈጅቷል” ብለዋል፡፡ ሥራውንም በተቀላጠፈ ሁኔታ ለመሥራት የሀገረ ስብከቱ ሊቀ ጳጳስና ሥራ አስኪያጅ ላደረጉት ከፍተኛ ትብብር ምስጋናቸውን አቅርበዋል፡፡

ከሀገረ ስብከቱ በተገኘው  መረጃ መሠረት በጉራጌ፤ ሀዲያና ስልጤ ሀገረ ስብከት ውስጥ ካሉት 121 አብያተ ክርስቲያናት መካከል ከ60 የማያንሱት መንፈሳዊ አገልግሎት በአግባቡ ለመስጠት የማይችሉ ናቸው፡፡ የአብነት ትምህርት ቤቱ ጥገናና እድሳት በማግኘቱ በቀጣይ ካህናትንና ዲያቆናትን ተቀብሎ ለማስተማር የሚያስችለው ሲሆን በሀገረ ስብከቱ የተዘጉ አብያተ ክርስቲናት ተከፍተው ምእመናን መንፈሳዊ አገልግሎት የሚገኙበትንና ስብከተ ወንጌል የሚጠናከርበት ምቹ ሁኔታን ይፈጥራል፡፡

በምረቃው መርሐ ግብር ላይ የሀገረ ስብከቱ ተወካዮች፤ የቤተ ክርስቲያኑ አስተዳደርና አገልጋዮች፤ የማኅበረ ቅዱሳን ሥራ አመራር አባላትና አገልጋዮች፤ እንዲሁም ተማሪዎችና ምእመናን ተገኝተዋል፡፡

በተያያዘም ከማኅበረ ቅዱሳን የቅዱሳት መካናት ልማትና ማኅበራዊ አገልግሎት ዋና ክፍል ባገኘነው መረጃ መሠረት ማኅበረ ቅዱሳን በተለያዩ የሀገሪቱ ክፍሎች ከፍተኛ ችግር ላጋጠማቸው ገዳማትና አድባራት እንዲሁም የአብነት ትምህርት ቤቶች ድጋፍ እያደረገ ሲሆን ግንባታቸው የተጠናቀቁና በመጠናቀቅ ላይ ያሉ ፕሮጀክቶች ይገኛሉ፡፡ ከእነዚህም ውስጥ፡

ማኅበሩ በቀጣይነት የሚያከናውናቸው ሥራዎች እንዳሉና በእንቅስቃሴ ላይ እንደሚገኝ ከቅዱሳት መካናት የልማትና ማኅበራዊ አገልግሎት ዋና ክፍል ያገኘነው መረጃ ያመለክታል፡፡