Archive for category: ስብከት

በተ/ሥላሴ ጸጋ ኪሮስ

ሐምሌ 11፣ 2003 ዓ.ም

የአዲስ አበባ ሰንበት ት/ቤቶች ወቅታዊውን የተሐድሶ መናፍቃንን እንቅስቃሴና ተዛማጅ ጉዳዮችን አስመልክተው መግለጫ አወጡ። በሰ/ት/ቤቶች ማደራጃ መምሪያ ኃላፊ በልዩ ልዩ የመገናኛ ብዙሃን ከመምሪያው ሊቀ ጳጳስ እውቅና ውጭ «ተሐድሶ የሚባል ነገር የለም» በሚል የተሰጠው መግለጫ ሰ/ት/ቤቶች የማይቀበሉት መሆኑን አሳወቁ።

 

ሐምሌ 11 ቀን 2003 ዓ.ም በአድራሻ ለአዲስ አበባ ሀገረ ስብከት፥ በግልባጭ ለሚመለከታቸው የጠቅላይ ቤተ ክህነትና የመንግስት አካላት የተሰራጨው ደብዳቤ፥ ሀገረ ስብከቱ ከቤተ ክርስቲያን የበላይ አካላት ጋር በመመካከር አስቸኳይ እልባት እንዲያመጣና ለሕዝብ፣ ለሀገርና ለቤተ ክርስቲያን የሚበጅ ሥራ እንዲሰራ አጽንኦት ሰጥቶ ያሳስባል።

«የኢትዮጵያ ሀገራችን የአፍሪካ ኩራትነት፥ ለመላው ጥቁር ሕዝብ አለኝታና መመኪያ መሆኗን፥ በዚህም ሠይጣናዊ ቅናት ያደረባቸው ጠብ ያለሽ በዳቦ የሚሉ ምዕራባዊያን ይህችን ለሀገራችን ታላቅ የታሪክ አሻራ ያስቀመጠች ቤተ ክርስቲያን ለማጥፋት የማይፈነቅሉት ድንጋይና የማይቆፍሩት ጉድጓድ የለም።» በማለት የሚያወሳው ደብዳቤው «በየዘመኑ በነበሩና ረድኤተ እግዚአብሔር ባልተለያቸው ቆራጥ ልጆቿ ተጋድሎ ፈተናዎችን በጽናት በማለፍ እስከ ዘመናቸን ደርሳለች» ይላል።

«ቅድስት ቤተ ክርስቲያን የወላድ መካን አይደለችምና፥ ‘ዛሬም ከቤተ ክርስቲያን በፊት እኛን ያስቀድመን፣ የቤተ ክርስቲያንን ጥፋት አያሳየን’ የሚሉ እስከ ሰማዕትነት ራሳቸውን ያዘጋጁ እንደሚኖሩ ማሰቡ ሳይበጅ አይቀርም» በማለት እምነቱን ይገልጻል።

በኢትዮጵያ ኦርቶዶክስ ተዋሕዶ ቤተ ክርስቲያን የስብከተ ወንጌልና ሐዋርያዊ ተልዕኮ መምሪያና አዲስ አበባ ሀገረ ስብከት፥ ሕገ ወጥ ሰባክያንንና ዘማርያንን ለማስቆም ደረጃውን ጠብቆ የጻፉትን ደብዳቤና የሰንበት ትምህርት ቤቶችን አንድነት ለማጠናከር የሚያደርጉትን ጥረት የሚያመሰግነው መግለጫው፤ ከተሾሙ ጊዜ አንስቶ እስከ ዛሬ ድረስ አንዳች የሚጠቀስና የሚጠቅም ሥራ አላበረክቱም ያላቸውን የሰንበት ትምህርት ቤቶች ማደራጃ መምሪያ ኃላፊ አባ ሠረቀ ብርሃን ግንቦት 23 ቀን 2003 ዓ.ም የሰጡትን መግለጫ አስደንጋጭና አሳዛኝ እንደሆነበት ያወሳል።

የአባ ሠረቀ መግለጫ ሰንበት ትምህርት ቤቶችን የማይወክል ከመሆኑም በላይ፥ በአሁኑ ወቅት በየአድባራቱና በየገዳማቱ ተፋፍሞ የቤተ ክርስቲያኗን ሰላምና አንድነት በመፈታተን ላይ የሚገኘውን የመናፍቃን ሴራ ጆሮ ዳባ ልበስ እንደማለት አለዚያም እንደመደገፍ ይቆጠራል፤ በዚህም በሰንበት ትምህርት ቤቶች ማደራጃ መምሪያ ኃላፊ ላይ የነበረን እምነትም እንዲጠፋ ሆኗል ይላል።

ለዚህ የተሐድሶ መናፍቃን እንቅስቃሴ እየሰጡት ያለው ሽፋን ምእመናንን በከፍተኛ ሁኔታ በማስቆጣቱ በየቦታው ሁከት እየተፈጠረ ይገኛል በማለት የሚጠቁመው መግለጫው፥ በተለያዩ አካባቢዎች ለተከሰተው ችግር ተዋንያን በመሆን የሚታወቁ ግለሰቦችን በተለያዩ የጠቅላይ ቤተ ክህነት መምሪያዎች ላይ በኃላፊነት የማስቀመጥ ሂደት እየተካሄደ መሆኑን መረጃዎች እንደሚያመለክቱ ጠቅሶ፥ የከፋ ችግር ሊያመጣ እንደሚችልና ትኩረት ሊሰጠው እንደሚገባ ያስገነዝባል።

በአሁኑ ሰዓት የተሐድሶ መናፍቃንን እንቅስቃሴ ለመግታት ብሎም ከቤተ ክርስቲያን ለማጽዳት ባለድርሻ አካላትና ሰንበት ትምህርት ቤቶች እያደረጉ ያለውን ጥረት የሚያደናቅፉት የማደራጃ መምሪያው ኃላፊ የቤተ ክርስቲያንን መዋቅር/የእዝ ሰንሰለት/ ሳይጥብቁ ለአጥቢያ አብያተ ክርስቲያናት የሚሰጡት አደናጋሪ መመሪያዎች፥ ሰ/ት/ቤቶች የተሃድሶ መናፍቃንን ዘመቻ ለመግታት የሚያደርጉትን እንቅስቃሴ አስቸጋሪ እንዳደረገባቸው ይገልጻል።

የተሐድሶ መናፍቃን የዘመቻ ምልክቶች የሆኑት የቤተ ክርስቲያናችንን ሥርዓት ያልጠበቁ ስብከቶችና ዝማሬዎች በተለያዩ አብያተ ክርስቲያናት በከፍተኛ ሁኔታ በመስፋፋት ሥርዓተ ቤተ ክርስቲያንንና የሰ/ት/ቤቶችን ህልዉና በመፈታተን ላይ ይገኛል እንደሚገኝ የሚያሳስበው መግለጫው፥ ችግሩን በሰላማዊ መንገድ ለመፍታት የአቋም መግለጫ አውጥተናል በማለት ይገልጻል።

ሰ/ት/ቤቶቹ ባወጡት ባለ 6 ነጥብ መግለጫ፥ ቅዱስ ሲኖዶስ በተለያዩ ጉባኤያት ያስተላለፈውና የሚያስተላልፋቸው ውሳኔዎች ያለምንም ቅድመ ሁኔታ እንዲከበሩና እንዲተገበሩ፥ በሰ/ት/ቤቶች ማደራጃ መምሪያ ኃላፊ በልዩ ልዩ የመገናኛ ብዙኃን ከመምሪያው ሊቀ ጳጳስ እውቅና ውጭ «ተሐድሶ የሚባል ነገር የለም» በሚል የተሰጠው መግለጫ ሰ/ት/ቤቶች የማይቀበሉት መሆኑን እያሳወቅን ተገቢው እርማት በመገናኛ ብዙኃን እንዲሰጥበት፥ አውቀውም ሆነ ሳያውቁ የተሐድሶ መናፍቃንን ጉዳይ በማስፈጸም ላይ የሚገኙ ሕገ-ወጥ ሰባክያንና ዘማርያን በየትናውም የቤተ ክርስቲያናችን ዓውደ ምሕረት ላይ እንዳይቆሙ ለተመሳሳይ ዓላማ በሚንቀሳቀሱትም ተጣርቶ የማያዳግም እርምጃ እንዲወሰድ፥ የተሐድሶ መናፍቃንን ሴራ የማጋለጥ የምእመኑን በቅድስት ተዋሕዶ እምነቱ የማጽናት ሥራ ተጠናክሮ እንዲሠራ፥ ከቤተ ክርስቲያን እውቅና ውጭ በቤተ ክርስቲያኗ ስም የሚተላልፉ የቴሌቪዥን ፕሮግራም፣ የቤተ ክርስቲያንን አስተምሮ የሚያፋልሱና በኑፋቄ የታጀቡ መጻሕፍት ጋዜጦች፣ ካሴቶችና ቪሲዲዎች እንዲሁም መካነ-ድሮች የቤተ ክርስቲያንን ስም እንዳይጠቀሙ፣ ተጠቅመው ከተገኙ በሕግ እንዲጠየቁ የሚሉና ሌሎች ነጥቦችንም አካትቷል።

መግለጫው በማጠቃለያው እነዚህን ችግሮች ጊዜውን የጠበቀ መፍትሔ ሳይሰጣቸው ቢቀርና ተዳፍነው ቢቆዩ የምእመናንና የሰ/ት/ቤቶች አባላት ቁጣ ውስጥ ውስጡን ሲቀጣጠል ቆይቶ ድንገት ከፈነዳ አደጋው በቤተ ክርስቲያንና በሀገር ላይ የከፋ ጉዳት ስለሚያደርስ ሳይቃጠል በቅጠል እንዲሉ ዛሬ ነገ ሳይባል የእርምት እርምጃ መውሰድ ይበጃል በማለት ይገልጻል።

  በዲ/ን ቴዎድሮስ ኃይሉ 

ሰኔ 29፣ 2003 ዓ.ም

 

በማኅበረ ቅዱሳን የአዲስ አበባ ማዕከል ትምህርትና ሐዋርያዊ አገልግሎት የመዝሙር ንዑስ ክፍል የተዘጋጀ የመዝሙር ዐውደ ርዕይ ሰኔ 28/2003 ዓ.ም በሊቀ ትጉኃን ቀሲስ ዶክተር ሙሉጌታ ስዩም እና በመዝገበ ጥበባት ጌትነት በማኅበረ ቅዱሳን ሕንጻ ላይ ተከፈተ፡፡  

 

የመዝሙሩ ዐውደ ርዕይ የኢትዮጵያ ኦርቶዶክስ ተዋህዶ ቤተ ክርስቲያን ጸዋትወ ዜማ፤ የዜማ ይትበሃል፤ የዜማ (የመዝሙር) መሣሪያዎችና ምሥጢራዊ ምሳሌነታቸውን፤ የአማርኛ መዝሙራት እንዲሁም ማኅበረ ቅዱሳን በመዝሙር ዙርያ ያከናወናቸው ተግባራትን ያስቃኛል፡፡

በመጀመሪያው ትዕይንት የኢትዮጵያ ኦርቶዶክስ ተዋህዶ ቤተ ክርስቲያን ጸዋትወ ዜማ በሚል÷ በውስጡ የቅዱስ ያሬድን የዜማ ስልት(ዓይነት)፤ የቅዱስ ያሬድን የዜማ ድርስቶች እና የዜማ ምልክቶች እንዲሁም ቅዱስ ያሬድ ለኢትዮጵያ ኦርቶዶክስ ተዋህዶ ቤተ ክርስቲያን ያደረገው አስተዋጽኦ የቀረበበት ነው፡፡ ሁለተኛው ትዕይንት በውስጡ ስለ የዜማ ይትበሃል፣ ምንነትና ታሪካዊ አመጣጥ ያስቃኛል፡፡ የሦስተኛው ትዕይንት የኢትዮጵያ ኦርቶዶክስ ተዋህዶ ቤተ ክርስቲያን የዜማ (የመዝሙር) መሣሪያዎችና ምስጢራዊ ምሳሌነታቸውን የሚቀርብበት ነው፡፡ አራተኛው ትዕይንት ስለ አማርኛ መዝሙር ምንነትን ፣ የመዝሙር ጥቅምን ፣ የአማርኛ መዝሙር አጀማመርና መስፈርቶች ፣ አሁን ያለበት ሁኔታ እና መዝሙርን ሁሉ እንዳገኘን ብንዘምር ምን ችግር ያስከትላል የሚሉ ንዑሳን ርዕሶች ተካተዋል፡፡ የመጨረሻው ትዕይንት ማኅበረ ቅዱሳን በመዝሙር ዙርያ ያከናወናቸውን ተግባራት ያስቃኛል፡፡

ዐውደ ርዕዩ አባቶቻችን ያቆዩልንን የቤተ ክርስቲያን አሻራ የሆነውን ዜማችንን የሚያሳውቅ፣ የሰንበት ት/ቤቶች መዝሙር አሁን ያለበትን ደረጃ የሚያሳይ እንዲሁም በመዝሙር ዙሪያ ላሉ ችግሮች የመፍትሔ ሐሳብ የሚወሰድበት ነው፡፡

በዕለቱ አንዳንድ እንግዶች አስተያየት የሰጡ ሲሆን ከነዚህ መሀል መዝገበ ጥበባት ጌትነት እንዳሉት ‹‹ያየሁት ለሰሚ ድንቅ ነው፡፡ ብዙዎች ቢያዩት መልካም ነው›› ሲሉ ሊቀ መዘምራን ኪነጥበብ ወልደ ቂርቆስ በበኩላቸው ‹‹ያለው የነበረው የቀረበበት›› ዐውደ ርዕይ ነው ብለዋል፡፡

 

ከዝግጅቱ አስተባባሪ ወ/ት ገነት አባተ እንደተረዳነው ዝግጅቱ ከሰኔ 29/2003 ዓ.ም እስከ ሐምሌ 3/2003 ዓ.ም ከጠዋቱ 2፡30 እስከ ምሽቱ 2፡30 ለምዕመናን ክፍት ሆኖ የሚቆይ ሲሆን÷ በመዝጊያው ዕለት ሐምሌ 3/2003 ዓ.ም ከ7፡30 እስከ 11፡30 ለየት ያለ ዝግጅት እንደሚኖር ነግረውናል ፡፡

ማኅበረ ቅዱሳን በመዝሙር ዙሪያ ዐውደ ርዕይ ሲያዘጋጅ ይህ የመጀመሪያው ነው፡፡
                                                           

ዲ/ን ቴዎድሮስ ኃይሉ

 

በኢትዮጵያ ኦርቶዶክስ ተዋሕዶ ቤተ ክርስቲያን በሰንበት ትምህርት ቤቶች ማደራጃ መምሪያ ማኅበረ ቅዱሳን ጥናትና ምርምር ማዕከል “የኢትዮጵያ ቤተ ክርስቲያን ሚና በአየር ንብረት ለውጥ“ በሚል መሪ ቃል ሰኔ 18 ቀን 2003 ዓ.ም በኢትዮጵያ ብሔራዊ ሙዝየም መሰብሰቢያ አዳራሽ ጥናታዊ የውይይት መድረክ ተካሄደ፡፡

 

በዕለቱ አምስት ጥናታዊ ጽሑፎች ቀርበው ውይይት ተደርጎባቸዋል፡፡ ከነዚህም ጥናታዊ ጽሑፎች በጠዋቱ ክፍለ ጊዜ “የዓባይ ወንዝና የኢትዮጵያ ቤተ ክርስቲያን” የሚል ጥናታዊ ጽሑፍ በአቶ ዘሪሁን አበበ ቀርቧል፡፡ አቶ ዘሪሁን በጥናታቸው በዋናነት የውኃ ፖለቲካ ከምሥራቅ አባይ ተፋሰስ/ናይል/ አንጻር፣ በዚህም መሠረት ኢትዮጵያ ኦርቶዶክስ ተዋሕዶ ቤተ ክርስቲያን ምን ዓይነት ቁርኝት አላት? የውሃው ፖለቲካ እንዴት ነው ተጽዕኖ ሊፈጥርባት የሚችለው? ምን ዓይነት የራሷ የሆነ ጥቅም አላት?  የሚለውን በማሳየት ሰፋ ያለ የጥናት ማብራሪያ ሰጥተዋል፡፡

በመቀጠል በአቶ ወንድወሰን ሚቻጎ “የአየር ንብረት ለውጥና ሃይማኖታዊ እሳቤ” በሚል ጥናታዊ ጽሑፍ ቀርቧል፡፡ አቶ ወንድወሰን በጥናታቸው የኢትዮጵያ ኦርቶዶከስ ቤተ ክርስቲያን በአየር ለውጥ ላይ ምን ዓይነት ሚና አላት? ዕውቀት በአየር ንብረት ለውጥ ላይ ያለው አስተዋጽኦና የሃይማኖት እሳቤ በአየር ንብረት ለውጥ ላይ አስተዋጽኦ የሚያመጣው ምንድን ነው? በሚል ሰፋ ያለ የጥናታዊ ጽሑፍ መነሻቸውን አቅርበው ጥያቄዎችና አስተያየቶች ከተሰጡ በኋላ የጠዋቱ ክፍለ ጊዜ ተጠናቋል፡፡

ከሰዓት በኋላ በነበረው ክፍለ ጊዜ ሦስት ጥናታዊ ጽሑፎች የቀረቡ ሲሆን በመጀመሪያው ክፍለ ጊዜ “የኢትዮጵያ ቤተ ክርስቲያን አስተዋጽኦ የካርቦን ልቀትን ለመከላከል “በሚል በዲያቆን ቱሉ ቶላ ቀርቧል፡፡ ዲያቆን ቱሉ በአዲስ አበባ በሚገኙ ሰባት ቀደምት አድባራትና ገዳማት ላይ ተመርኩዘው የሠሩትን ጥናት አቅርበዋል፤ በመቀጠል በአቶ ተስፋዬ አራጌ “የኢትዮጵያ ቤተ ክርስቲያን ሚና ለተፈጥሮ ደን ጥበቃና እንክብካቤ” በሚል በደቡብ ጎንደር በሚገኝ ሦስት በተመረጡ ወረዳዎች ባሉ አስር አብያተ ክርስቲያናት ስለ ደንና አጠባበቅ የተደረገ ጥናት አቅርበዋል፣ በመጨረሻም በአቶ ብርሃኑ በላይ “የቅብዓ ሜሮን ዕፅዋት የዳሰሳ ጥናት” በሚል ጥናት፣ ሜሮንን ለማዘጋጀት የምንጠቀምባቸው ዕፅዋት እነማን ናቸው? በቀጣይስ እነዚህ ዕፅዋቶች እንዴት ነው? ማሳደግና መንከባከብ የምንችለው? በሚል መነሻ ጥናታቸውን አቅርበዋል፡፡

ከጥናታዊ ጽሑፎች ጋር ተያያዥነት ካላቸው ከአዲስ አባባ ዩኒቨርሲቲ፣ መንግሥታዊና መንግሥታዊ ካልሆኑ ተቋማት እንዲሁም በግል የተጋበዙ ከ300 በላይ እንግዶች የተገኘበት ሲሆን፣ በመጨረሻም የጥናትና ምርምር ማዕከሉ አማካሪ፣ የሰቲት ሁመራ ሀገረ ስብከት ሊቀ ጳጳስ በብፁዕ አቡነ ሉቃስ “ጊዜ ገቢር ለእግዚአብሔር” በሚል ርዕስ ቃለ ምዕዳንና ቡራኬ ተሰጥቶ የመርሐ ግብሩ ፍጻሜ ሆኗል፡፡

የማኅበረ ቅዱሳን ጥናትና ምርምር ማዕከል ከተመሠረተ ጀምሮ በርካታ ጥናታዊ የውይይት መድረኮችን ያካሄደ ሲሆን ባለፈው ዓመትም የመጀመሪያውን የኢትዮጵያ ቤተ ክርስቲያን ጥናት መጽሔት አሳትሞ አበርክቷል፡፡

 ዲ/ን ቴዎድሮስ ኃይሉ

 

ከ2000 ዓ.ም ጀምሮ እየተከናወነ ያለውን የግቢ ጉባኤያት የሥርዓተ ትምህርት ክለሳ በተመለከተ ከማዕከላትና ግቢ ጉባኤያት ተወካዮች ጋር ውይይት ተደረገ፡፡ ሥርዓተ ትምህርቱም ከ2004 ዓ.ም ጀምሮ ተግባራዊ እንደሚደረግ በማኅበረ ቅዱሳን የትምህርትና ሐዋረያዊ አገልግሎት ዋና ክፍል አስታወቀ፡፡

ከግንቦት 26 እስከ ግንቦት 27 ቀን 2003 ዓ.ም በተደረገው የውይይትና የምክክር መርሐ ግብር ከ11 ማዕከላት የመጡ የትምህርትና ሐዋርያዊ አገልግሎት ክፍል ኃላፊዎችና ከ15 ግቢ ጉባኤያት የተወከሉ ተማሪዎች የተሳተፉ ሲሆን ተወካዮቹ ከዚህ በፊት ይነሡ የነበሩ ችግሮች በክለሳውና በዳሰሳ ጥናቱ መታየቱ እንዳስደሰታቸው ገልጸው ለተግባራዊነቱ መፋጠን ይኖርብናል ሲሉ አስተያየት ሰጥተዋል፡፡

የክፍሉ አስተባባሪ ቀሲስ ታደሰ ጌታሁን እንደገለጡት ክለሳው የተሠራው በ2000 ዓ.ም የተካሄደውን የዳሰሳ ጥናት መሠረት በማድረግ መሆኑን ገልጸው፣ ይህም የዳሰሣ ጥናት ለግቢ ጉባኤያት ተማሪዎች፣ ለመምህራን ለክፍሉ አባላት መጠይቆችን በመበተን፣ ቃለ መጠይቅ በማድረግ፣ በአካል ቅኝት በማድረግና በመሳሰሉት እንደተከናወነ አስታውቀዋል፡፡

እስከ አሁን ሲተገበር የነበረው ሥርዓተ ትምህርት ለማኅበሩ የመጀመሪያ በመሆኑ ወጥነትና አንዳንድ መሟላት ያለባቸው ነገሮች ሳይሟሉ ተግባራዊ እንደሆነ የገለጹት አስተባባሪው አሁን እየተከለሰ ባለው ግን አንድ ሥርዓተ ትምህርት ሊያሟላ የሚገባውን አሟልቷል ብለን እናምናለን፡፡ ማኅበሩም ለግቢ ጉባኤያት ተማሪዎች ምን ዓይነት ፍልስፍና መከተል አለበት የሚለው ግንዛቤ ውስጥ ገብቷል፡፡ በተለይም ወደ ግቢ ጉባኤያት እየገባ ካለው ትውልድ አንጻር ሥርዓተ ትምህርቱ ሰፊ ፍተሻ እንደተደረገበትና ለሙከራም ከሚቀጥለው ዓመት ጀምሮ እንደሚተገበር አጽንኦት ሰጥተው ተናግረዋል፡፡

ማኅበረ ቅዱሳን ከ1996 ዓ.ም ጀምሮ በከፍተኛ ትምህርት ተቋማት ለሚያስተምራቸው የገቢ ጉባኤያት ተማሪዎች ሥርዓተ ትምህርት በመቅረጽ 20 መማሪያ መጻሕፍትን በማዘጋጀት እያስተማረ እንደሚገኝ ቀሲስ ታደሰ አስታውሰው በሚሰጡ ትምህርቶች ድግግሞሽና መሳሳብ እንደሚስተዋል፣ ለትምህርቶቹ የተመደበላቸው ሰዓቶች ከሚሰጡት ትምህርቶች አንጻር የማይመጣጠኑ እንደነበር በዳሰሳ ጥናቱ ወቅት እንደችግር ጎልተው እንደታዩ ጠቅሰዋል፡፡ ከክለሳው በኋላ የነበሩት 20 ትምህርቶችም ወደ 8 ዝቅ ማለታቸውን ያወሱት ቀሲስ ታደሰ በተጨማሪም ሦስት አዳዲስ ትምህርቶች ታክለዋል፡፡ እነዚህም ትምህርተ ክርስትና መግቢያ፣ ትምህርተ አበውና ልሳነ ግዕዝ እንደሆኑ ገልጸዋል፡፡

ለግቢ ጉባኤያት ተማሪዎች የሚሰጡ የትምህርት ዓይነቶችም ተማሪዎቹ በከፍተኛ ትምህርት ተቋማት የቆይታ ጊዜያቸው የሚወሰን ሲሆን ለእያንዳንዱ ትምህርት ተመጣጣኝ ሰዓት፣ መለያ ቁጥር፣ ቅደም ተከተል እንዲሁም የትኛው የትምህርት ዓይነት ለማን ይሰጥ የሚሉ ጉዳዮች በቀጣይ የሚወሰኑ ናቸው፡፡

በሥርዓተ ትምህርቱ ክለሳ ፕሮጀክት መሠረት አዲሱ ሥርዓተ ትምህርት በዚህ ዓመት ተግባራዊ መሆን አልነበረበትም ወይ? ተብለው የተጠየቁት ቀሲስ ታደሰ ሲመልሱ ፕሮጀክቱ ከተጠበቀው በላይ ጊዜ የሚጠይቅ መሆኑንና በክለሳው የተሳተፉት ባለሙያዎች በሥራ መደራረብ ምክንያት ወደ ትግበራ መግባት እንዳልተቻለ ተናግረዋል፡፡ ቢሆንም ግን በ2004 ዓ.ም በተመረጡ ግቢ ጉባኤያት የሙከራ ትግበራ እንደሚጀመር አሳውቀዋል፡፡
ይህንን ሥርዓተ ትምህርት ከግብ ለማድረስ የግቢ ጉባኤያትና የማዕከላት ሥራ አስፈጻሚ አካላትን ግንዛቤ ማስጨበጥ እንዲሁም በቂ መምህራንን ለማፍራት ሥራ እየተሠራ መሆኑን ተናግረዋል፡፡

አስተባባሪው እንዳሉት ከሥርዓተ ትምህርት ጋር ተዛማጅ ሙያ ያላቸው አባላት ክለሳውን አጠናቆ ትግበራ ለመጀመር እንዲያስችል በትምህርትና ሐዋረያዊ አገልግሎት ዋና ክፍል በመገኘት በሙያቸው ተሳትፎ እንዲያደርጉ ጠይቀዋል፡፡

ማኅበረ ቅዱሳን በቅዱስ ሲኖዶስ በጸደቀለት መተዳደሪያ ደንብ መሠረት ለግቢ ጉባኤያት ተማሪዎች ሥርዓተ ትምህርት ቀርጾ ተግባራዊ ካደረገ 7 ዓመታት ተቆጥረዋል፡፡ ይህ ሥርዓተ ትምህርት ከተተገበረ ከ4 ዓመት በኋላ የዳሰሳ ጥናት በማድረግ የማኅበሩ ሥራ አስፈጻሚ ጉባኤ 7 አባላት ያሉት ኃይለ ግብር አቋቁሞ ከ2001 ዓ.ም ጀምሮ የክለሳ ሥራው እየተከናወነ ይገኛል፡፡