‹‹በእኛ ቤተ ክርስቲያን ሰላም የዘወትር መልእክት ነው፡፡››  ብፁዕ ወቅዱስ አቡነ ማትያስ

 

በዲያቆን ኤፍሬም የኔሰው

የካቲት ፯ ቀን ፳፻፱ ዓ.ም

ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት ከየካቲት ፩ – ፬ ቀን ፳፻፱ ዓ.ም በስዊዘርላንድ ጄኔቭ የአራት ቀናት ፓትርያርካዊ ጉብኝት አካሔዱ፡፡

በአራት ቀናት ቆይታቸውም በስዊዘርላንድ የሚገኘው የኦርቶዶክስ ማእከልን ጐብኝተዋል፤ ቦሲ በሚገኘው የሃይማኖት ተቋም ለሚማሩ ተማሪዎችና ሠራተኞች አባታዊ ምክር አስተላልፈዋል፤ ከዓለም አብያተ ክርስቲያናት ምክር ቤት ከፍተኛ አመራሮች ጋርም ተገናኝተዋል፡፡

ቅዱስ ፓትርያርኩ የካቲት ፫ ቀን ፳፻፱ ዓ.ም በጄኔቭ ከተማ በሚገኘው ዓለማቀፋዊ የሃይማኖት ጉባኤ ማእከል ቃለ ምዕዳን በሰጡበት ወቅት ከ፶ ሚሊዮን በላይ የሚኾኑ የኢትዮጵያ ኦርቶዶክስ ተዋሕዶ ቤተ ክርስቲያን ምእመናንን በመወከል ለጉባኤው ሰላምታ ካቀረቡ በኋላ ዓለምን እርስበርስ የከፋፈለው ልዩነትን ከመቀነስ አኳያ ዓለም አቀፉ የአብያተ ክርስቲያናት ጉባኤ ያደረገውን ከፍተኛ ጥረት አድንቀዋል፡፡

የዓለም አቀፉ የአብያተ ክርስቲያናት ጉባኤ ሥራ ከመቼውም ጊዜ በላይ በዚህ ዘመን አስፈላጊ መኾኑን የገለጹት ቅዱስነታቸው ዛሬ በዓለም ዙሪያ የሚገኙ ክርስቲያኖች ለጥቃት፣ ለፈተና እና ለግጭት መጋለጣቸውን ጠቁመው የጉባኤው መርሖችና እና ዓላማዎች ከዚህ ቀደሙ በበለጠ መልኩ በአሁኑ ሰዓት በተግባር መተርጐም ይገባቸዋል ብለዋል፡፡

በተጨማሪም በዓለም ማኅበረሰብ መካከል ሰላምን ለማስፈን የሚሠራውን ዓለም አቀፉ የአብያተ ክርስቲያናት ጉባኤን እስካሁን ድረስ ለፈጸመው ስኬታማ ተግባር ምስጋናቸውን አቅርበው ጉባኤው ከተመሠረተበት ዓላማ አኳያ የሚጠበቁበት ቀሪ ሥራዎችን እንዲያከናውን የአደራ መልእክት አስተላለፈዋል፡፡

‹‹በእኛ ቤተ ክርስቲያን ሰላም የዘወትር መልእክት ነው›› ያሉት ቅዱስ ፓትርያርኩ የፍትሕ መጓደል፣ ጦርነት፣ ጠብ፣ ድህነት እና ጠባብ ብሔርተኝነት ዓለምን እርበርስ እንደ ከፋፈሏት ጠቅሰው ከእግዚአብሔር ቃል በስተቀር ሰብአዊ ፍልስፍናዎች፣ ከፍተኛ የምርምር ውጤቶች፣ ወይም የጦር መሣሪያዎች ሰላምን እና እርቅን ማስፈን እንደማይችሉ በቃለ ምዕዳናቸው አስታውቀዋል፡፡

ብፁዕ ወቅዱስ አቡነ ማትያስ ጉብኝታቸውን አጠናቀው የካቲት ፮ ቀን ፳፻፱ ዓ.ም  ወደ መንበረ ፓትርያርካቸው ወደ ኢትዮጵያ ተመልሰዋል፡፡

ምንጮች፡-

• http://christiannewswire.com/news/7655779096.html
• http://www.oikoumene.org/en/press-centre/news/patriarch-matthias-201cpeace-is-the-message-of-every-day201d