Tserha Tsion Sebakian wongel

የጽርሐ ጽዮን ዘተዋሕዶ የአንድነት ኑሮ ማኅበር ሰባኪያነ ወንጌልን አስመረቀ

ግንቦት 3/2004 ዓ.ም.

በእንዳለ ደምስስ

በኢትዮጵያ ኦርቶዶክስ ተዋሕዶ ቤተ ክርስቲያን የጽርሐ ጽዮን ዘተዋሕዶ የአንድነት ኑሮ ማኅበር በ14ኛው ዙር ለ3 ወራት ያሰለጠናቸውን 47 ሰባኪያነ ወንጌልን ሚያዚያ 21 ቀን 2004 ዓ.ም. አስመረቀ፡፡ በማኅበሩ የተመሠረተው የቅዱስ ተክለ ሃይማኖት የስብከተ ወንጌልTserha Tsion Sebakian wongel ማሰልጠኛ ተቋም በ12 የትምህርት ዓይነቶች ከጥር 21 ቀን 2004 ዓ.ም. ጀምሮ ከ16 ሀገረ ስብከቶች በተለይም ከገጠሪቱ ኢትዮጵያ ተውጣጥተው የተመረጡና እያንዳንዳቸው ከሁለት እስከ ሦስት ቋንቋ መናገር የሚችሉ ሰባኪያነ ወንጌልን ቡራዩ አካባቢ በሚገኘው በተቋሙ ግቢ ውስጥ በደመቀ መንፈሳዊ መርሐ ግብር አስመርቋል፡፡ ከተመራቂ ደቀ መዛሙርት መካከል መነኮሳት፣ ካህናት፣ መሪጌቶች፣ ዲያቆናትና የሰንበት ትምህርት ቤቶች አባላት ያካተተ ሲሆን ‹‹ለቤተ ክርስቲያናችን እጣን፣ ጧፍና ንዋያተ ቅድሳት ብቻ ሳይሆን ሰውም እንስጥ›› የሚል መመሪያ ይዞ በመነሣት በተለይም በገጠሪቱ ኢትዮጵያ እየታየ ያለውን የመምህራን እጥረት ለመቅረፍ ጥረት እያደረገ እንደሚገኝ አቶ ማናዬ አባተ የማኅበሩ መንፈሳዊ አገልግሎት መምሪያ ሓላፊ በሪፖርታቸው ገልጸዋል፡፡

በምረቃ መርሐ ግብሩ ላይ ብፁዕ አቡነ ኤጲፋንዮስ የምዕራብ ሸዋ ሀገረ ስብከት ሊቀ ጳጳስና የቅዱስ ሲኖዶስ አባል እንዲሁም ሊቀ ካህናት ክንፈ ገብርኤል አልታዬ የሊቃውንት ጉባኤ አባል ተገኝተዋል፡፡ ብፁዕ አቡነ ኤጲፋንዮስ ባስተላለፉት ቃለ ምዕዳን ‹‹ማኅበሩ እያደረገ ያለውን ጥረት ለሌሎች አርአያ የሚሆንና ቅድስት ቤተ ክርስቲያናችን ደጋፊ አገኘች የምንልበት ነው” በማለት ገልጸዋል፡፡ ለተመራቂ ደቀBitsu Abune Epiphanios መዛሙርትም “ጽርሐ ጽዮን ዘተዋሕዶ የአንድነት ኑሮ ማኅበር እናንተን በወንጌሉ ቃል እንዳስታጠቃችሁ በሔዳችሁበትና በደረሳችሁበት ስፍራ ሁሉ የጠፉትን ወገኖቻችን የተበተኑትን አንድ በማድረግ ለቅድስት ቤተ ክርስቲያን ውለታ ለትመልሱ ይገባል” በማለት አደራቸውን አስተላልፈዋል፡፡ ሊቀ ካህናት ክንፈ ገብርኤል አልታዬ ተመራቂ ደቀ መዛሙርቱን ካስተማሩ አባቶች መካከል አንዱ ሲሆኑ ባስተላለፉት መልእክት “ግራኝ መሐመድ እንደተሸነፈ ልክ እንደዛሬው ማኅበረ ቅዱሳንና ማኅበረ ጽርሐ ጽዮን ዘተዋሕዶ ኖረው ቢሆን ኖሮ ኢትዮጵያ እስከ ዛሬ አፍሪካን ታጠምቅ ነበር፡፡” በማለት የማኅበሩን ጥረት አበረታተዋል፡፡

የማኅበሩ አባላት ልጆቻቸው ሃይማኖታቸውን ጠንቅቀው እንዲያውቁ በማድረግ ረገድ በየሰንበት ትምህርት ቤቶች አገልግሎት ላይ የሚሳተፉ ሲሆን በዕለቱ በመድረክ ላይ ያሬዳዊ ዝማሬን አቅርበዋል፡፡ ተመራቂ ደቀ መዛሙርትም አስር በሚደርሱ ቋንቋዎች ያሬዳዊ ዝማሬ ያቀረቡ ሲሆን የተማሩትን ትምህርት በተግባር ላይ እያዋሉ ስለመሆናቸው ምስክር ይሆን ዘንድ በአንድ ተመራቂ ደቀ መዝሙር ትምህርተ ወንጌል ተሰጠቷል፡፡

የጽርሐ ጽዮን ዘተዋሕዶ የአንድነት ኑሮ ማኅበር ከሰንበት ትምህርት ቤቶች የተወጣጡና በአንድነት በመኖር ስብከተ ወንጌልን ለማስፋፊት ጽኑ አላማ ባላቸው ምእመናን የካቲት 23 ቀን 1980 ዓ.ም. የተመሠረተ ሲሆን በኢትዮጵያ ኦርቶዶክስ ተዋሕዶ ቤተ ክርስቲያን መንበረ ፓትርያርክ ጠቅላይ ቤተ ክህነት ጽ/ቤትና ቀደም ሲል ከፍትህ ሚኒስቴር አሁን ደግሞ ከፌደራል ጉዳዮች ሚኒስቴር ሕጋዊ እውቅና አግኝቶ በመንቀሳቀስ ላይ የሚገኝ መንፈሳዊ ማኅበር ነው፡፡ ከ1984 ዓ.ም. ጀምሮ የመለከት መጽሔትን በማሣተምና በማሰራጨት፤ በአካባቢው ለሚገኙ ረዳት ለሌላቸው አረጋውያንና ወላጅ አልባ ለሆኑ ሕፃናት የዕለት ምግብ በመስጠት፤ የትምህርት ቤት የደንብ ልብስና የትምህርት መሣሪያዎች ድጋፍ በማድረግ ፤አቅም ለሌላቸው በማኅበሩ ዘመናዊ ት/ቤት በአነስተኛ ክፍያ በማስተማር ላይ ይገኛል፡፡

በጎ አድራጊ ምዕመናንን በማስተባበር ባለ ሁለት ፎቅ ዘመናዊ ሕንፃ በማጠናቀቅ ላይ የሚገኝ ሲሆን በዓመት ሁለት ጊዜ የሚካሔደውን የሰባኪያነ ወንጌል ሥልጠናን በአንደኛው ፎቅ ላይ በመስጠት ላይ ይገኛል፡፡ አስር የማደሪያ ክፍሎች ሲኖሩት በአንድ ዓመት በ2 ዙር እስከ 120 ደቀ መዛሙርትን ማሰልጠን ያስችላል፡፡ የመጸዳጃ ቤት፣ የገላ መታጠቢያ፣ የምግብ ማብሰያና በአንድ ጊዜ ከ500 ሰው በላይ ማስተናገድ የሚያስችል አዳራሽ የያዘ ነው፡፡ ስልጣገኞቹ ሙሉ የሕክምና ወጪ፤ የትምህርት መሣሪያዎች ድጋፍ በቀን 3 ጊዜያት የሚመገቡት ምግብ በማኅበሩ ይሸፈናል፡፡ ሕንፃው ሙሉ ለሙሉ ሲጠናቀቅ የቅዱስ ተክለ ሃይማኖት የሰባኪነ ወንጌል ማሰልጠኛ ተቋም በዓመት በ3 ዙር የሰባኪያነ ወንጌል ሥልጠና ለመስጠት እንቅስቃሴ በማድረግ ላይ እንደሚገኝና ማኅበሩ እስከ አሁን ድረስ በ14 ዙር ሥልጠናዎች 612 ሰባኪያነ ወንጌል ማሰልጠኑን መንፈሳዊ አገልግሎት መምሪያ ሓላፊው አቶ ማናዬ አባተ በሪፖርታቸው ገልጸዋል፡፡ ሠልጣናቹ የዘመናዊ ትምህርት ተማሪ ከሆኑ 10ኛ ክፍልና ከዚያ በላይ፣ የአብነት ተማሪ ከሆኑ በዘመናዊው ትምህርት ስድስተኛ ክፍልና ከዚያ በላይ የሆኑትን ከየሀገረ ስብከቱ የሚመረጡበት መስፈርት ሲሆን በተጨማሪም ቅድስት ቤተ ክርስቲያንን ለማገልገል የወሰኑና የአካባቢውን ቋንቋ መስማትና መናገር የሚችሉ መሆን አለባቸው፡፡

ከደቡብ ኦሞ ጂንካ ሀገረ ስብከት አንቀጸ ብጹአን አቡነ ተክለ ሃይማሃት ቤተ ክርስቲያን የመጡት አባ ኃ/ሚካኤል በድሉ ከተመራቂ ደቀ መዛሙርት መካከል አንዱ ናቸው፡፡ “አካባቢያችን በመናፍቃን የተከበበ ነው፡፡ ምዕመናንም ሆኑ ካህናት ብዙ እውቀት የለንም፡፡ መናፍቃንን የምናሸንፍበት ትምህርት አጥተን ብዙዎች ተወስደውብናል፡፡ በሥልጠናው በነፃ የተቀበልነውን እውቀት በነፃ ለወገኖቻችን እናስተምራለን” በማለት አስተያየታቸውን ሰጥተዋል፡፡

ከምዕመናን መካከል ከጉጂ ቦረናና ሊበን ሀገረ ስብከት ሜጋ ቅዱስ ሚካኤል ሰበካ ጉባኤ አባል የሆኑት አቶ ከበደ ተሰማ ርቀት ሳይገድባቸው እዚህ ድረስ የመጡት ከሚያገለግሉበት ቤተ ክርስቲያን ተመርጠው ለሰልጠናው የመጡትን ተመራቂ ደቀ መዛሙርትን ለመቀበል እንደሆነና አካባቢያቸውን አስመልክተው ባደረጉት ገለፃ “ያለንበት አካባቢ እጅግ ኋላ ቀር ነው፡፡ ኬንያ ድንበር ላይ ነው የምንገኘው፡፡ የአገልጋዮች እጥረት ያለበትና ቦታውም አመቺ ያልሆነ ነው፡፡ የጽርሐ ጽዮን ዘተዋሕዶ የአንድነት ኑሮ ማኅበር ደርሶልን ከጭንቅ እየገላገለን ነው፡፡ ወደፊትም ትብብራችሁ እንዳይለየን” በማለት ተማጽነዋል፡፡

ተመራቂ ደቀ መዛሙርት ከብፁዕ አቡነ ኤጲፋንዮስ እጅ የምስክር ወረቀትና መጽሐፍ ቅዱስ ተቀብለዋል፡፡ የመጽሐፍ ቅዱስ ስጦታ የደብረ አሚን ተክለ ሃይማኖት ቤተ ክርስቲያን ምክሐ ደናግል ማርያም ሰንበት ትምህርት ቤት በስጦታ የተገኘ ስለመሆኑ ከሓላፊዎቹ የተገለጸ ሲሆን  ደቀ መዛሙርቱን ለማፍራት በተደረገ ጥረት ውስጥ ደከመን ሰለቸን ሳይሉ ሥልጠናውን ለሰጡ አካላት ማኅበሩ ምስጋናውን በእግዚአብሔር ስም አቅርቧል፡፡

የእግር ጉዞው መርሐ ግብር ተራዘመ

ግንቦት 3/2004 ዓ.ም.

በእንዳለ ደምስስ

በኢትዮጵያ ኦርቶዶክስ ተዋሕዶ ቤተ ክርስቲያን ሰንበት ትምህርት ቤቶች ማደራጃ መምሪያ  የማኅበረ ቅዱሳን 20ኛ ዓመት ምስረታን ምክንት በማድረግ ለሚያዚያ 27 ቀን 2004 ዓ.ም ተዘጋጅቶ የነበረው የእግር ጉዞ መርሐ ግብር ወደ ግንቦት 26 ቀን 2004 ዓ.ም. ተራዘመ፡፡ የመርሐ ግበሩ አስተባባሪ ሰብሳቢ ዲ/ን ዋሲሁን በላይ ቀኑ የተቀየረበትን ምክንያት እንደገለጹት የእግር ጉዞው በታቀደለት ጊዜ ለማካሔድ ከፍተኛ ጥረቶች መደረጋቸውን፤ በርካታ ቲኬቶችና ካናቴራዎችን ማሰራጨታቸውን፤ ነገር ግን ከምእመናን በተደጋጋሚ በቀረቡ ሁለት መሰረታዊ ጥያቄዎች አንደኛ ከሰሙነ ሕማማት ጀምሮ በትንሳኤ በአል ምክንያት ምእመናን የተለያዩ ወጪዎችን ማውጣታቸውንና በጉዞው ላይ ለመሳተፍ ትኬቱን መግዛት ያለመቻላቸው ሲሆን ሁለተኛው ደግሞ ከትንሳኤ በአል በኋላ የቀኑ ማጠር፤ እንዲሁም በበአለ ሃምሳ ምክንያት የተለያ የማኅበራዊ ሕይወት ተሳትፎ ጎልቶ የሚታበት ወቅት በመሆኑ ቀኑ እንዲቀየርላቸው ከፍተኛ ግፊት በማድረጋቸው  ጥያቄያቸውን ተቀብለን የእግር ጉዞው መርሐ ግብር ግንቦት 26 ቀን 2004 ዓ.ም. እንዲሆን ተወስኗል ብለዋል፡፡ ግንቦት 26 ቀን 2004 ዓ.ም የተመረጠበትን ምክንያት ሲያብራሩ፤ ምእመናን ከትንሣኤ በአል ጋር ተያይዞ ከማኅበራዊ ሕይወት ፋታ ያገኙበታል ተብሎ መታሰቡና ቅድስት ቤተክርስቲያን ከምታከብራቸው በዓላት አንዱ የጰራቅሊጦስ ዕለት በመሆኑ ቀኑን በአንድነት ሆነን እግዚአብሔርን እያመሰገንን እንድንውል በማሰብ ነው ብለዋል፡፡

ለምእመናን ባስተላለፉት መልእክት ዋናው የጉዞው ዓላማ የማኅበራችን 20ኛ ዓመት ምሥረታ ነው፡፡ በ20 ዓመታት ውስጥ ማኅበረ ቅዱሳን ብቻውን ያደረገው ምንም ነገር የለም፡፡ ከቅዱስ ፓትርርኩ ጀምሮ ብፁዓን ሊቃነ ጳጳሳት፤ ከቤተ ክርስቲያኒቱ የተለያዩ አካላትና ጽ/ቤቶች፤ ከሠራተኛ ጉባኤያት፤ ከሰ/ት/ቤቶች፤ በተለይም ከምእመናን ጋር በኅብረት ሰርተናል፡፡ አብረን ከተጓዝናቸው እሰካሁንም ደከመን ሰለቸን ሳይሉ በምክራቸው፤ በጸሎታቸው፤ በእውቀታቸው፤ በገንዘባቸውና በጉልበታቸው እያገለገሉ ካሉ አካላትና ምእመናን ጋር በኅብረት እግዚአብሔርን የምናመሰግንበት ቀን ነው፡፡ ቀጣይ ጊዜያችን ደግሞ እንደ እግዚአብሔር ፈቃድ ጠንክረን አብረን ተያይዘን ቅድስት ቤተክርስቲያናችን ከእኛ የምትፈልገውን አገልግሎት የምንፈጽምበት እንዲሆን ቃል የምንገባበት ዕለት ስለሆነ ምእመናን የተዘጋጀውን ቲኬት በመግዛት በእግር ጉዞው እንዲሳተፉና የበረከቱ ተሳታፊ እንዲሆኑ ጥሪያቸውን አስተላልፈዋል፡፡

 

በእግር ጉዞው ብፁዓን ሊቃነ ጳጳሳት፤ የመምሪያ ሓላፊዎች፤ የአድባራትና ገዳማት አስተዳዳሪዎች፤ ሰበካ ጉባኤያት፤ ሰንበት ትምህርት ቤቶችና ምእመናን ይገኛሉ፡፡ የተለያዩ መንፈሳዊና ምእመናንን ሊያስተምሩ የሚችሉ መርሐ ግብሮች ተዘጋጅተዋል፡፡

 

ጉዞው የሚደረገው፤ ወደ መንበረ ክብር ደብረ ታቦር ቅዱስ ሚካኤልና አቡነ ተክለ ሃይማኖት ገዳም ነው፡፡ የጉዞው መነሻ ቦታዎች፤ ገነተ ጽጌ ቅዱስ ጊዮርጊስ ቤተ ክርስቲያን፤ ማኅበረ ቅዱሳን ዋናው ማዕከል /አምስት ኪሎ/ እና ሰሜን ማዘጋጃ ቶታል ናቸው፡፡

 

የጉዞው መነሻ ስዓት፤ ከጠዋቱ 1፡00 ስዓት ሲሆን ከምእመናን የሚጠበቁ ጉዳዮች በተመለከተ ለመንፈሳዊ ቦታዎች የሚመች አለባበስ መልበስ ይጠበቅባቸዋል፡፡

የሩስያው ፕሬዝዳንት ለሀገራቸው የኦርቶዶክስ ቤተ ክርስቲያን ምስጋና አቀረቡ

ግንቦት 3/2004 ዓ.ም.

በስንሻው ወንድሙ

የሩስያ ፕሬዝዳንት ዴሚትሪ ሜድቬዴቭ የሩስያ ኦርቶዶክስ ቤተ ክርስቲያን በሀገሪቱ ዜጎች ዘንድ መንፈሳዊ ሥርዐት እንዲጐለብት ለምታደርገው እንቅስቃሴ ከሁለት ሳምንት በፊት ምስጋና ማቅረባቸውን ዘ-ጋርዲያን ጋዜጣ ዘግቧል፡፡

 

የፋሲካ በዓልን ምክንያት በማድረግ ሚያዝያ 7 ባደረጉት ንግግራቸው የሩስያ ኦርቶዶክስ ቤተ ክርስቲያን የሀገሪቱ ሕዝቦች ባሕልና ወጋቸውን ከሃይማኖት ሥርዐት ጋር ጠብቀው እንዲቆዩ ለአደረገችው አስተዋጽኦ ምስጋና ማቅረባቸውን ዘገባው አመልክቶ ፕሬዝዳንቱ «ይህን የሐሴት ቀን ከእናንተ ጋር በማሳለፌ ደስታ ተሰምቶኛል፤ በሀገሪቱ ውስጥ ሃይማኖታዊ ሥርዐት እንዲሰፍን ለምታደርጉት እንዲሁም በሕዝቡ ዘንድ ሰላም እንዲሰፍንና መጪውን ትውልድ በበጐ ሥነ ምግባር ለመቅረጽ ለምታካሂዱት እንቅስቃሴ እንኳን ደስ አላችሁ ማለት እወዳለሁ» ሲሉ መናገራቸውንም ዘግቧል፡፡

 

ፕሬዝዳንቱ አክለው የበዓሉ መከበርና ሥርዐቱን የጠበቀ መሆን ለሰላምና ለመቻቻል እንዲሁም መንፈሳዊ እሴቶችን ከማጎልበት አንፃር አርአያ የሚሆን ተግባር ነው ማለታቸውን የዘገበው ጋዜጣ የሩስያ ኦርቶዶክስ ቤተ ክርስቲያን የሀገሪቱ ሕዝቦች ጠባቂ ናት ያሉት ፕሬዝዳንቱ ላለፉት በርካታ መቶ ዓመታት ጠብቃ ያቆየችውን የሀገር አንድነትን የመጠበቅ ሓላፊነት አሁንም አጠናክራ እንድትቀጥል መጠየቃቸውን ዘገባው አስፍሯል፡፡ በጉዳዩ ላይ ከቤተ ክርስቲያኗ የተሰጠ ምላሽ አልተካተተም፡፡

ለሩስያና ቡልጋርያ ግንኙነት ኦርቶዶክስ ቤተ ክርስቲያን የበኩሏን እንድትወጣ ተጠየቀ፡፡

ግንቦት 3/2004 ዓ.ም.

በስንሻው ወንድሙ

ሩስያ ከቡልጋርያ ጋር ያላትን ዘርፈ ብዙ ግንኙነቶች በኦርቶዶክስ እምነት አባቶች በኩል ለማጠንከር የሀገሪቱ ኦርቶዶክስ ቤተ ክርስቲያን ፓትርያርክ በቡልጋርያ ለሁለት ቀናት ጉብኝት ማድረጋቸው ተገለጸ፡፡

 

እንደ ዘጋርድያን ጋዜጣ ዘገባ ፓትርያርክ ብፁዕ ወቅዱስ አቡነ ክሪል ከቡልጋርያው አቻቸው ፓትርያርክ ብፁዕ ወቅዱስ አቡነ ማክሲም ጋር ተገናኘተው ሁለቱ አብያተ ክርስቲያናት ያላቸውን መልካም ግንኙነት በማጠንከር በሁለቱ ሀገራት መካከል የተፈጠረውን የማኅበራዊ፣ ኢኮኖሚያዊና ፖለቲካዊ ጉዳዮችን ወደ ላቀ ደረጃ ለማድረስ በድልድይነት በሚያገለግሉበት ላይ ውይይት አካሂደዋል፡፡

ፓትርያርክ ክሪል የቡልጋርያ ሁለተኛ ታላቅ ከተማ ፕሎቭዲቭ ሲደርሱ በሺዎች የሚቆጠሩ ምእመናን የተቀበሏቸው ሲሆን ከሀገሪቱ ፕሬዝዳንት ሮዜን ፕሌቭንሊቭና ጠቅላይ ሚኒስትሩ ቦይብ በሪስቭን ጋር ውይይት አድርገዋል፡፡ ፓትርያርኩ በከተማዋ ቅድስት ማርያም ካቴድራል ባደረጉት ንግግር «ከቡልጋርያ ቤተ ክርስቲያን መልእክተኞች ጋር ተገናኝተናል፡፡ ቀደም ሲል የኛ መልእክተኞችን ቡልጋርያ ለመላክ ችለናል፡፡ በዚህ የጠበቀ ኦርቶዶክሳዊ ወንድማማችነት በመፍጠር ችግሮችን ለማስወገድ ጥረት ላይ ነን» ሲሉ ፓትርያርክ ክሪል መናገራቸው ተጠቁሟል፡፡

 

በጉብኝታቸውም በደቡብ ቡልጋርያ የሚገኘውንና እ.ኤ.አ ከ1877-1878 በሩስያ ቱርክ ጦርነት እንዲሁም በሁለተኛው የዓለም ጦርነት ወቅት ለሀገራቸው የተሰውትን ሩስያውያን መካነ መቃብርን ጎብኝተዋል፡፡ ፓትርያርክ ክሪል በቡልጋርያ ብሔራዊ ቴሌቪዥን ቀርበው ጉብኝታቸውን አስመልክቶና የሀገሪቱ ግንኙነት በሚጠናከርበት ላይ የሁለቱ ሃይማኖት አባቶች ሊያደርጉቸው የሚገቡ መሠረታዊ ነጥቦችን መጥቀሳቸውን ዘገባው ማስፈሩን ለማወቅ ተችሏል፡፡

 

የሩስያ ኦርቶዶክስ ቤተ ክርስቲያን ሀገሪቱ ከተለያዩ ሀገራት ጋር የምታደርገውን እንቅስቃሴ መሠረት በማድረግ የሩስያ ኦርቶዶክስ በዓለም መድረክ ሊኖራት የሚገባውን ሥፍራ ለማጠንከርና የእምነቱ ተከታዮችን ለማጽናት ትልቅ እንቅስቃሴ ታደርጋለች፡፡ ቀደም ሲል ከሩስያው ፕሬዝዳንት ዴሞትሪ ሜድቬዴቭ ጋር በመሆን በኢየሩሳሌም የሚገኘውን የሩስያ ቤተ ክርስቲያን ይዞታ በመጎብኘት ቅርሳቸውን በሚጠብቁበት ላይ ውይይት ማድረጋቸው ይታወሳል፡፡

የእመቤታችን በዓለ ልደት ተከበረ፡፡

ግንቦት 2/2004 ዓ.ም.

በዲ/ን ዮሴፍ ይኖአምላክ

በየዓመቱ ግንቦት አንድ ቀን በልዩ መንፈሳዊ ድምቀት የሚከበረው የእመቤታችን ቅድስት ድንግል ማርያም የልደት በዓል ትናንት በመላው ዓለም በሚገኙ የኢትዮጵያ ኦርቶዶክስ ተዋሕዶ አብያተ ክርስቲያናት ተከብሮ ዋለ፡፡

 

በማኅበረ ቅዱሳን የአዲስ አበባ ማዕከል አስተባባሪነት በማኅበሩ ሕንፃ የአባ ጊዮርጊስ ዘጋስጫ አዳራሽ በተከናወነው የእመቤታችን የልደት በዓል መርሐ ግብር ከስድስት መቶ በላይ የሚሆኑ የማኅበሩ አባላትና ሌሎች ተጋባዥ ምእመናንም ተገኝተዋል፡፡ የእመቤታችንን በዓል ምክንያት በማድረግ የተዘጋጀውን መልእክት የአዲስ አበባ ማዕከል ሰብሳቢ ዲ/ን አንዱ ዓለም ኀይሉ አቅርበዋል፡፡

“የእመቤታችንን በዓል መንፈሳዊ ትውፊቱን በጠበቀ መልኩ በማክበር ከእመቤታችን በረከተ ረድኤትን ለማግኘት፣ ለመማማር ለመመካከርና አገልግሎታችንም የተቃና እንዲሆን በጸሎት ለማሳሰብ እንዲረዳን ጭምር ነው፡- በዓለ ልደታን እንዲህ ባለ መልኩ ያከበርነው” ሲሉ የገለጹት የአዲስ አበባ ማዕከል ጸሓፊ አቶ ካሳሁን ኀይሌ ናቸው፡፡

 

በጸሎተ ኪዳንና በመዝሙረ ዳዊት በተከፈተው ጉባኤ ላይ ትምህርት፣ የግንቦት ልደታን እንዴት እናክብር? በሚል ምክርና ማኅበሩ ከተመሠረተበት ጊዜ ጀምሮ ከአገልግሎት ባልተለዩ  አባላት አማካኝነት የሕይወት ተሞክሮ የቀረበ ሲሆን በዓሉን ምክንያት በማድረግ በእመቤታችን ስም የተዘከረ ጸበል ጸዲቅ ቀርቧል፡፡

 

የማኅበረ ቅዱሳንን ሃያኛ ዓመት ምሥረታና የእመቤታችንን በዓል በጋራ እያከበርን በምንገኝበት በዚህ ወቅት ለአባላት የሚያስተላልፉት መልእክት ምንድር ነው? የሚል ጥያቄ ያቀረብንላቸው አቶ ካሳሁን፡- የቅድስት ቤተ ክርስቲያንን አስተምህሮና መንፈሳዊ ይዘቱን የጠበቀ የበዓል አከባበር እሴታችንን በመጠበቅ ወደፊትም ማዕከሉ ተመሳሳይ መርሐ ግብራትን እንደሚያዘጋጅ ገልጸው፥ ምእመናንም በያሉበት ይህንኑ በጎ ትውፊት እንዲጠብቁ አሳስበዋል፡፡

001

የደቡብ ክፍለ ከተማ ሰንበት ትምህርት ቤቶች አንድነት ጉባኤ ተካሄደ

ግንቦት 2/2004 ዓ.ም.

በዲ/ን ዮሴፍ ይኩኖአምላክ

001በአዲስ አበባ ሀገረ ስብከት የደቡብ ክ/ከተማ ሰንበት ትምህርት ቤቶች አንድነት ዓመታዊ ጉባኤውን ሚያዚያ 23 ቀን 2004 ዓ.ም. አካሂዷል፡፡ በጠቅላይ ቤተ ክህነት የመሰብሰቢያ አዳራሽ በተከናወነው በዚሁ መንፈሳዊ መርሐ ግብር ላይ፡- በክፍለ ከተማው የሚገኙ 32 ሰንበት ትምህርት ቤቶች ተሳታፊ ሆነዋል፡፡ በጉባኤው ላይ ተገኝተው ትምህርተ ወንጌል የሰጡት የሰንበት ትምህርት ቤቶች ማደራጃ መምሪያ ሓላፊ ክቡር ቆሞስ መልአከ ጽዮን አባ ኅሩይ ወንድይፍራው ናቸው፡፡

የመምሪያ ሓላፊው “ልጄ ሆይ ሰው ሁን” በሚል ርዕስ ባስተማሩት ትምህርት ላይ “ የሰንበት ትምህርት ቤቶች የአንድነት ጉባኤ በየዓመቱ ሊደረግ ይገባዋል፡፡ ይህንን ጉባኤ ማካሄዳችን በየሰንበት ትምህርት ቤቶቻችን ያሉብንን ችግሮች ለማስወገድና በቤተ ክርስቲያን ሁለንተናዊ የልማት እንቅስቃሴ የበኩላችንን እገዛ ልናደርግ እድል ይፈጥርልናል፡፡ በየሰንበት ት/ቤቱ የሚገኙ ልጆቻችንም ከቅዱስ ፓትርያርኩና ከብፁአን አባቶቻችን ቡራኬና ትምህርት የሚቀበሉበት መርሐ ግብር ይሆናል በአጠቃላይም ይህን ጉብኤ ለማዘጋጀት የማደራጃ መምሪያው ድጋፍ አይለየውም” ብለዋል፡፡

 

የክፍለ ከተማው ሰንበት ትምህርት ቤቶች ምክትል ሰብሳቢ የሆነው ወጣት ዘሪሁን መኮንን በጉባኤው ላይ ባቀረበው ሪፖርት ሰንበት002 ትምህርት ቤቶቻችን በየዓመቱ የደመራ በዓልን ለማክበር በአደባባይ ከመሰባሰብ ውጪ መንፈሳዊ አንድነት ፈጥረው እንደ ቤተ ክርስቲያን ልጅነት ሊያበረክቱት የሚገባቸውን ጉልህ አስተዋጽኦ ማበርከት ሳይቻላቸው በርካታ ጊዜያት ማለፋቸውን አስታውሶ ከአምስት ዓመታት ወዲህ ግን የተጠናከረና ሰንበት ትምህርት ቤቶችን በእኩል ሊያሳትፍ የሚችል መተዳደሪያ ደንብ መዘጋጀቱን አስታውቋል፡፡

 

ከዚህ በተጨማሪ በክፍለ ከተማው የሚገኙ ሰንበት ትምህርት ቤቶች ኅብረታቸውን በመጠበቅ የጋራ ዕቅዳቸውን ለማሳካት አገልግሎታቸውን አጠናክረው መቀጠላቸውን ገልጿአል፡፡ ም/ሰብሳቢው በክፍለ ከተማው የተሠሩ ሥራዎችን ሳያብራራ፡- በሁሉም ሰንበት ትምህርት ቤቶች ያሬዳዊ ዝማሬን ለማስጠናት የሚችሉ የአሰልጣኞች ሥልጠና ለሦስት ዓመታት ተካሂዷል” ብሏል፡፡ ከዚህ በተጨማሪ መምህራንን በማፍራቱና በማሰልጠን ረገድ በ3 ጊዜያት ቁጥራቸው ከ146 በላይ አባላትን ማስተማሩንና በተመሳሳይ መልኩ ከልዩ ልዩ አድባራት የተውጣጡ መምህራን የሰጡትን የአብነት ትምህርት በሚገባ የተከተሉ የሰንበት ትምህርት ቤት አባላት ሥልጣነ-ክህነት እንዲቀበሉ ማድረጉን አስረድቷል፡፡ የአዲስ አበባ ሰንበት ትምህርት ቤቶችን አንድነት ለመመሥረት የበኩሉን አስተዋጽኦ በማበርከት ላይ የሚገኘው ክፍለ ከተማው የተሃድሶ መናፍቃን እንቅስቃሴን የመከታተል ቤተ ክርስቲያንን የመጠበቅ፣ እንዲሁም ለሰንበት ትምህርት ቤቶች የአስተዳደርና ሒሳብ አያያዝ ሥልጠና መስጠቱን ገልጿል፡፡ በመርሐ ግብሩ ላይ “ድንግል ሆይ ብረሳሽ” የተሰኘ መነባንብ፣ እንዲሁም “ሰንበት ት/ቤት” የሚል ግጥም ቀርቧል፡፡

 

ከጉባኤው በኋላ የክፍለ ከተማው ሰንበት ትምህርት ቤቶች ሰብሳቢ የሆነው ወጣት ሳሙኤል እሸቴን “የደቡብ ክፍለ ከተማ ሰንበት ትምህርት ቤቶች ማኅበር አወቃቀሩ ምን ይመስላል?” ስንል ላቀረብንለት ጥያቄ ምላሽ ሲጠጥ “….በሥራ አስፈፃሚ ደረጃ የተዋቀረ ተጠሪነቱም ለአዲስ አበባ ሰንበት ትምህርት ቤቶች አንድነት የሆነ የአገልግሎት ክፍል አለ፡፡ ከዚህ በተጨማሪ ዘጠኝ የአገልግሎት ክፍሎች አሉ፡፡ እነኚህን ለማገዝ በክፍለ ከተማችን የሚገኙ 32 ሰንበት ትምህርት ቤቶችን በ4 ምድብ በመክፈል እየተናበቡ ተግባራትን እንዲያስፈጽሙ እያደረግን እንገኛለን፡፡ ይህንንም ለማገዝ በማደራጃ መምሪያው መልካም ፈቃድና እገዛ በመካነ ሰማዕት ቅዱስ ቂርቆስ ቤተ ክርስቲያን አንድ ቢሮ ተሰጥቶናል” ብሎናል፡፡

 

003ወጣት ሳሙኤል ከዚሁ ጋር አያይዞ ሚያዝያ 23 ቀን 2004 ዓ.ም. ስለተከናወነው መርሐ ግብር በተመለከተ ሲናገር “የሰንበት ትምህርት ቤቶች ቀን በሚል ርእስ በየዓመቱ የሚከናወነው መርሐ ግብር ዘንድሮ ለ4ኛ ጊዜ የተከናወነ ነው፡፡ ሰንበት ትምህርት ቤቶች በአንድነት በአንድ ጉባኤ ተሰብስበው የመማራቸው ፋይዳው፡-

 

የሰንበት ትምህርት ቤት አባላት ለእናት ቤተ ክርስቲያን ሊያበረክቱ የሚገባቸውን አስተዋጽኦ እንዲያስቡ ያደርጋቸዋል፤ በቅርቡም በዝቋላ የአቡነ ገ/መንፈስ ቅዱስ ገዳም ላይ የደረሰውን ቃጠሎ ለማጥፋት እርስ በርስ ተጠራርተው መሄዳቸውና ያንን የመሰለ አስደናቂ ተግባር ፈጽመው መመለሳቸው የመገናኘቱ ውጤት ነው፡፡ በሌላ በኩል የማደራጃ መምሪያችን ሓላፊ ቆሞስ አባ ኅሩይ ወንድ ይፍራው በጉባኤያችን ላይ ተገኝተው በየክፍለ ከተማው የሚገኙ ሰንበት ትምህርት ቤቶች ቢያንስ  በዓመት ሁለት ጊዜ ትምህርትና ቡራኬን ከብፁዓን አባቶች መቀበል እንደሚገባ አስገንዝበዋል፡፡ በሰላሳ ሁለቱ ሰንበት ትምህርት ቤቶች ምን ያህል አባላት አሉ? የሚል ጥያቄ ያቀረብንለት ወጣት ሳሙኤል “በግምት ከ20 እስከ 30ሺ የሚደርሱ አባላት አሉን፡፡ በቅርቡ ግን በእያንዳንዱ ሰንበት ትምህርት ቤት ምን ያህል አባላት እንደሚገኙ በዕድሜአቸው በትምህርታቸው /በሙያቸው/ እንዲሁም በሌላ አስፈላጊ መረጃዎች የተጠናከረ መረጃ /ዳታ/ የማሰባሰብ ሥራ እንጀምራለን፡፡ ይህም ከፍተኛ ጥቅም አለው፡፡ ምክንያቱም ቤተ ክርስቲያን ምን ያህል ያልተነካ የሰው ኃይል በሰንበት ትምህርት ቤቶቿ እንዳላት መረጃ ይሰጣልና፡፡”

 

በስተመጨረሻ የደቡብ ክፍለ ከተማ ሰንበት ትምህርት ቤቶችን በመወከል ማስተላለፍ የምትፈልገው ነገር ካለህ? ተብሎ የተጠየቀው ወጣት ሳሙኤል፡፡

 

“የሰንበት ትምህርት ቤቶቻችን በአብነት ትምህርት ላይ ትኩረት አድርገው መሥራት ይጠበቅባቸዋል፡፡ የአብነት ትምህርት ጉዳይ ለነገ የሚባል ሳይሆን ቅድሚያ የሚሰጠው ነገር ነው፡፡ ሰንበት ትምህርት ቤቶች የነገ የሀገርና የቤተ ክርስቲያን ተረካቢ ትውልድ የሚፈሩባቸው ከመሆናቸው አንፃር በትክክል የቤተ ክርስቲያኒቱ ትምህርት ሊሰጥባቸው ይገባል፡፡ ከዚህ በተጨማሪ በተናጠል ከመሥራት ወጥተን /የአንዲት ርትዕት ቅድስት ሐዋርያዊት ቤተ ክርስቲያን ልጆች በመሆናችን/ በአንድነት የቤተ ክርስቲያንን አገልግሎት ለማፋጠን መሥራት ይኖርብናል፡፡ በመጨረሻ በሰንበት ትምህርት ቤቶች የምንገኝ ወጣቶች ሁላችን ሀገራዊ ራእይ ሃይማኖታዊ አቋምን አጠናክረን ልንይዝ ይገባናል” ብሏል፡፡

01

የሕገወጥ ሕግ አስከባሪዎችን ሴራ ያከሸፈ ደብዳቤ

ሚያዚያ 26/2004 ዓ.ም.

ሚያዚያ 24 ቀን 2004 ዓ.ም. ሕገወጥ ሕግ አስከባሪዎች በሚል ርዕስ ሰሞኑን በጠቅላይ ቤተ ክህነት ስለተፈጸመ ድርጊት ማኅበረ ቅዱሳን መግለጫ ማውጣቱ ይታወሳል፡፡

 

የሰንበት ትምህርት ቤቶች ማደራጃ መምሪያ ሓላፊ የሆኑት ቆሞስ መልአከ ጽዮን አባ ኅሩይ ወንድይፍራው ሳያምኑበትና ሕጋዊ መስመሩን ሳይጠብቅ በጆቢራዎቹ አቀነባባሪነት የተዘጋጀውን ደብዳቤ ወጪ እንዳይሆን የሚገልጥ ትእዛዝ ለሰንበት ትምህርት ቤቶች ማደራጃ መምሪያ መዝገብ ቤት ሹም ለሆኑት ለወ/ት ዓለምፀሐይ ጌታቸው የላኩትን ደብዳቤ ከዚህ በታች አቅርበናል፡፡

 

01

የማኅበረ ቅዱሳን 20ኛ ዓመት የምሥረታ በዓል በደማቅ መርሐ ግብር መከበር ይጀምራል፡፡

ሚያዚያ 20/2004 ዓ.ም.

በእንዳለ ደጀኔ

በኢትዮጵያ ኦርቶዶክስ ተዋሕዶ ቤተ ክርስቲያን በሰንበት ትምህርት ቤቶች ማደራጃ መምሪያ ማኅበረ ቅዱሳን ዓለም አቀፋዊ ማኅበራዊና መንፈሳዊ አገልግሎት የጀመረበትን 20ኛ ዓመት የምስረታ በዓሉን ማክበር ይጀምራል፡፡

የማኅበሩ የሕዝብ ግንኙነት ሓላፊ አቶ አክሊሉ ለገሠ እንደገለጹት ማኅበሩ 20ኛ ዓመት  የበዓል ዝግጅቱን ሚያዝያ 28 ቀን 2004 ዓ.ም. በጠቅላይ ቤተ ክህነት የሚያከብር ሲሆን በዓሉንም በሁሉም ማእከላትና ወረዳ ማእከላት በልዩ ልዩ መርሐ ግብራት ይካሄዳል፡፡

 

በዓሉን የተመለከተ ዘጋቢ ፊልም እና ትራክት የመጽሔተ ተልዕኮ ልዩ እትም መጽሔት መዘጋጅቱን የገለጹት ሓላፊው በዓሉ በአንድ ቀን የሚጠናቀቅ ሳይሆን በቀጣይ ተከታታይ መንፈሳዊ ዝግጅቶች እንደሚከበር ተናግረዋል፡፡

 

ማኅበረ ቅዱሳን “ለሁለንተናዊ የቤተ ክርስቲያን እድገት በጋራ እንሥራ” በሚል መሪ ቃል በሚያከበረው በዓል ቅዱስ ፓትርያርኩን ጨምሮ ሊቃነ ጳጳሳት፤ የጠቅላይ ቤተ ክህነት የመምሪያ ሓላፊዎች፣ የሰንበት ትምህርት ቤቶች ተወካዮች ማኅበራትና ጥሪ የተደረገላቸው እንግዶች የሚገኙ መሆኑን ታውቋል፡፡

Gedamate 3

የጎንደር ደብረ ኀይል ወደብረ ጥበባት በዓታ ለማርያም የአቋቋም ምስክር ትምህርት ቤት ግንባታ ውል ተፈረመ፡፡

ሚያዝያ 18/2004 ዓ.ም.

በእንዳለ ደምስስ

Gedamate 3ማኅበረ ቅዱሳን በሰሜን ጎንደር ሀገረ ስብከት የሚገኘውን የደብረ ኀይል ወደብረ ጥበባት በዓታ ለማርያም የአቋቋም ምስክር ትምህርት ቤትን በ4.6 ሚሊዮን ብር ለመገንባት ሚያዚያ 12 ቀን 2004 ዓ.ም. የግንባታ ውል ስምምነት ከአስማማው አያሌው ሕንጻ ሥራ ተቋራጭ ጋር ተፈራረመ፡፡ በማኅበረ ቅዱሳን የቅዱሳት መካናት ልማትና ማኅበራዊ አገልግሎት ዋና ክፍል አስተባባሪነት የሚከናወነው ይኸው ፕሮጀክት ማኅበረ ቅዱሳንን በመወከል የማኅበሩ ዋና ጸሐፊ ዲ/ን ሙሉጌታ ኀ/ማርያምና የሕንፃ ሥራ ተቋራጩ ባለቤትና ሥራ አስኪያጅ አቶ አስማማው አያሌው አማካይነት የፊርማ መርሐ ግብሩ ተፈጽሟል፡፡

በማኅበረ ቅዱሳን ዋና ጽ/ቤት በተከናወነው የፊርማ መርሐ ግብር ላይ የማኅበሩ ዋና ጸሐፊ ዲ/ን ሙሉጌታ ኀ/ማርያም ባደረጉት ንግግር ‹‹ 4.6 ሚሊዮን ብር የሚፈጅ ፕሮጀክት ቀርጾ የአቋቋም ምስክር ትምህርት ቤት ለመገንባት ከዚህ በፊት አድርገነው አናውቅም፡፡ ይህ ትልቅ እድገት ነው፡፡ ምእመናንም ማኅበረ ቅዱሳንን ማመን የቻሉበት ነው፡፡ በሚሊዮን የሚቆጠር ገንዘብ አውጥቶ ማኅበረ ቅዱሳን ይሥራው ለማለት መቻል ሙሉ ለሙሉ በማኅበሩ ላይ እምነት እንዳሳደሩ ነው የሚያሳየው፡፡ እኛም በታማኝነት ትኩረት ሰጥተን እንድንሠራ የሚያደርገን ነው፡፡ ጨረታውን ከብዙዎቹ የሕንጻ ሥራ ተቋራጮች ጋር ተወዳድሮ ያሸነፈው ድርጅት በማኅበሩ ውስጥ ከፍተኛ አስተዋጽኦ ያደረገና አብሮ የኖረ ነው፡፡ ሥራውንም በጥራትና ከተያዘለት ጊዜ ቀደም ብሎ በማጠናቀቅ ያስረክባል የሚል እምነት አለኝ፡፡ በማኅበረ ቅዱሳን በኩልም ሥራውን ለማፋጠን አስፈላጊውን ድጋፍ ሁሉ እንደሚያደርግ አረጋግጣለሁ›› በማለት ገልጸዋል፡፡

 

የሕንፃ ሥራ ተቋራጩ ባለቤትና ሥራ አስኪያጅ አቶ አስማማው አያሌው ድርጅታቸውን በመወከል እንደተናገሩት ጨረታውን ስጋበዝ አሸንፋለሁ ብዬ አላሰብኩም፡፡ የገንዘቡ መጠን ከፍ ሲል ደግሞ የማኅበረ ቅዱሳን ጓዳውን ስለማውቀው ከየት አምጥቶ ነው ብዬ ስጋት ነበረኝ፡፡ ለዚህ ደረጃ በመብቃቱ ተደስቻለሁ፡፡ ጨረታውን ለማሸነፍ ካለኝ ጉጉት የተነሣ ማግኘት ከነበረብኝ ትርፍ 7 ፐርሰንት ቀንሼ ነው የተወዳደርኩት፡፡ ለማኅበረ ቅዱሳን ገንዘብ ከመስጠት ገንዘብ መውሰድ መጀመር የጥሩ እድገት ምልክት ነው፡፡ ፕሮጀክቱን ሰርቶ ለማስረከብ ከሚጠበቀው ጊዜ በፊት እንዲሁም ከሚጠበቀው ጥራት በላይ እንደባለቤት ሰርቼ አስረክባለሁ ብለዋል፡፡

 

ሕንፃ ተቋራጩ በ1998 ዓ.ም. እንደተቋቋመና የኮንዶሚኒየም ቤቶች ግንባታዎችን፣ የአንደኛ ደረጃ ት/ቤቶች ግንባታዎችን፣ ጤና ጣቢያዎችንና በአሁኑ ወቅት የጣና በለስ ስኳር ፕሮጀክትን በ6 ሚሊዮን ብር ውል በመገንባትና በማጠናቀቅ ላይ እንደሚገኝ ጨምረው ገልጸዋል፡፡

 

በማኅበረ ቅዱሳን የቅዱሳት መካናት ልማትና ማኅበራዊ አገልግሎት ዋና ክፍል የቦርድ ሰብሳቢ ወ/ሮ ዓለም ፀሐይ መሠረት ፕሮጀክቱን አስመልክቶ እንደገለጹት የአቋቋምGedamate 2 ምስክር ትምህርት ቤቱ ባለሁለት ፎቅ ሕንፃ ሲሆን በምስክር ትምህርት ቤቱ ውስጥ የሚገኝ ማንኛውም ተማሪ ድጋፍና ወርሃዊ ቀለብ እንዲያገኝ ማድረግ የማኅበራዊ ልማት ዋና ክፍሉ ዓላማ ነው፡፡ በተጨማሪም የአቅም ማጎልበቻ ሥልጠና፣ የስብከተ ወንጌል፣ የሐይማኖት ትምህርትና የሥራ ፈጠራ ሥልጠና በመስጠት ላይ ይገኛል፡፡ የተማሪዎቹ ማደሪያ ቤት የምግብ ማብሰያ ቤት፣ መጸዳጃ ቤትና የገላ መታጠቢያ እንዲሁም ጉባኤ ቤት የሚኖረው ሲሆን ለፕሮጀክቱ የገንዘብ ወጪውን 3.5 ሚሊዮን ብር የሸፈኑት በደቡብ አፍሪካ ነዋሪ የሆኑ 3 የቅድስት ቤተ ክርስቲያን ልጆችና በጎ አድራጊዎች ሲሆኑ ፤ በአሁኑ ወቅት 1.7 ሚሊዮን ብር ለማኅበራዊ ልማት ክፍል ገቢ አድርገዋል፡፡ ቀሪውን ደግሞ ወደፊት የሚሸፍኑት ይሆናል፡፡ ተጨማሪውን ወጪ ለመሸፈን ዋና ክፍሉ የራሱን እቅድ በመቀየስ በጎ አድራጊ ምእመናንን  በማስተባበርና እንዲሳተፉ በማድረግ በጋራ ለመሥራት ነው የምናስበው ብለዋል፡፡

 

የምስክር ት/ቤቱ በአሁኑ ጊዜ ከ70 እስከ 80 ተማሪዎችን ብቻ የሚያስተናግድ ሲሆን፣  የአቋቋም ምስክር ት/ቤቱ ሲጠናቀቅ እስከ 170 ተማሪዎችን መቀበል የሚችል ነው፡፡  ተማሪዎቹ በከፍተኛ ሁኔታ የማደሪያ ቤት ችግር ስለሚያጋጥማቸው በሁለት ዓመት መጨረስ የሚገባቸው ወረፋ በመጠበቅ አራት ዓመታት ይፈጅባቸዋል፡፡ የጎጆ ወረፋ በመጠበቅ ረጅም ጊዜ ይቃጠላል፡፡ ማኅበረ ቅዱሳን ዓላማ ያደረገው ይህንን ችግር መቅረፍ ነው፡፡ ይህ ግንባታ ዛሬ ላሉት ተማሪዎች ብቻ ትኩረት ያደረገ ሳይሆን ወደፊት ማማር ለሚፈለጉ ሁሉ ደረጃውን የጠበቀ ጉባኤ ቤቶችን መገንባት ነው በማለት ሰፊ ማብራሪያ ሰጥተዋል፡፡

 

የማኅበሩ መሐንዲስ የሆኑት ኢንጂነር ያሬድ ደመቀ ፕሮጀክቱን በሚመለከት እንደገለጹት የአቋቋም ምስክር ትምህርት ቤቱ ለተማሪዎቹ አገልግሎት የሚሰጡ ቁሳቁሶችን የሚያሟላ ሲሆን ከእነዚህም ውስጥ በየማደሪያ ክፍሎቹ ጠረጴዛና ወንበሮች ፤ ልብስ ማስቀመጫ ቁም ሳጥኖችና አልጋን ያካትታል፡፡ ግንባታው 1 ዓመት ከ6 ወራት እንደሚፈጅ፣ ከሕንፃ ተቋራጩ ጋር ከፊርማው በኋላ ባሉት ሰባት ቀናት ውስጥ የሳይት ርክክብ እንደሚካሄድና በ14 ቀናት ውስጥ ደግሞ ግንባታውን እንደሚጀምር በውሉ ላይ መካተቱን ይህንንም ተግባራዊ ለማድረግ እየሠሩ እንደሚገኙ ገልጸዋል፡፡

 

በፊርማ መርሐ ግብሩ ላይ ከተገኙ ወንድሞችና እኅቶች በተሰጡ አስተያየቶችም ዛሬ በማኅበረ ቅዱሳን ታሪክ ታላቅ ነገር የታየበት ነው ብለዋል፡፡ ከ12 ዓመት በፊት ይህ ክፍል ሙያ አገልግሎትና ተራድኦ ክፍል እያለ ለገዳማት ጧፍ በመላክ ነው የጀመረው፡፡ ዛሬ ታላላቅ ቅዱሳት ቦታዎች ላይ በሚሊዮን በሚቆጠር ገንዘብ ወጥቶ ሥራዎችን እንድንሠራ እግዚአብሔር ስለፈቀደልን ወደ ኋላ መመለስ አንችልም፡፡ ወደፊት ከዚህ በላይ የሆኑ ፕሮጀክቶች ይጠብቁናልና ሁላችንም በእግዚአብሔር ፈቃድ ታጥቀን መነሣትና መተባበር ይገባናል፡፡  ገጽታችን ገዘፍ እያለ ሲመጣ ጠላት ይደነግጣል፡፡ ክፉ ለሚያስቡልን ደግ እንዲያስቡ አቅም የሚፈጥር ነው፡፡ በጎ ተጽእኖ መፍጠር ያስችላል በማለት አስተያየታቸውን ሰጥተዋል፡፡

 

ይህ ፕሮጀክት 2ኛው ዙር የአብነት ት/ቤቶች በተለይም የምስክር ት/ቤቶችን ትኩረት ያደረገ መርሐ ግብር ሲሆን በመጀመሪያው ዙር የቅድስት ቤተልሔም የመጻሕፍትና የጉባኤ ቤት ተገንብቶ አገልግሎት በመስጠት ላይ እንደሚገኝ ይታወሳል፡፡

begana

ማእከሉ የበገና ደርዳሪዎችን አስመረቀ

ማእከሉ የበገና ደርዳሪዎችን አስመረቀ
በኢትዮጵያ ኦርቶዶክስ ተዋሕዶ ቤተ ክርስቲያን ሰንበት ትምህርት ቤቶች ማደራጃ መምሪያ የማኅበረ ቅዱሳን የልማት ተቋማት አስተዳደር የአቡነ ጎርጎርዮስ የአብነትና የዜማ መሣሪያዎች ትምህርትና ሥልጠና ማእከል ለስድስት ወራት በበገና ድርደራ ያሰለጠናቸውን ከ175 በላይ የሚሆኑ የበገና ደርዳሪዎች መጋቢት 29 ቀን 2004 ዓ.ም. በቤተ ክህነት አዳራሽ አስመረቀ፡፡
የትምህርት ማእከሉ ሥራ አስኪያጅ የሆኑት አቶ አብዮት እሸቱ ባደረጉት ንግግር ማእከሉ ሲቋቋም በ1996 ዓ.ም. በ12 ተማሪዎች ትምህርቱን እንደጀመረና በአሁኑ ወቅት በርካታ ተማሪዎችን አቅፎ እያስተማረ እንደሚገኝ፣ በአሳሳቢ ሁኔታ እየቀነሰ የመጣውን የበገና ደርዳሪዎች ቁጥር በመጨመር ረገድ የአባቶቻችንን አሻራ ለተተኪ ትውልድ ለማስተላለፍ ማእከሉ ከፍተኛ ጥረት በማድረግ ላይ መሆኑንና በቀጣይነትም በተለያዩ የሀገሪቱ ክፍሎች ለማስፋፋት እቅድ እንዳለው ገልጸዋል፡፡
የበገና ድርደራ ሥልጠናውን ወስዶ በእለቱ ከተመረቁት ወጣቶት መካከል ወጣት ሔኖክ መንግሥቱ ለስድስት ወራት ትምህርቱን እንደተከታተለና “በመማሬ ብዙ ተጠቅሜያለሁ፤ ሥርዐተ ቤተ ክርስቲያንን የጠበቀ መዝሙር እንዳውቅ አድርጎኛል፡፡ ከዚህም ባለፈ ቤተ ክርስቲያን የምትጠቀምባቸው የዜማ መሣሪያዎች የትኞቹ እንደሆኑ፤ በግል ሕይወቴም ትሕትናንና ትእግስትን በመላበስ በቤተ ክርስቲያን አገልግሎት ጥሩ ሥነ ምግባር እንዲኖረኝ አድርጎኛል” በማለት ገልጿል፡፡
በዕለቱም ብጹዐን ሊቃነ ጳጳሳት፣ ሊቃውንተ ቤተ ክርስቲያን፣ የተመራቂ ቤተሰቦች ጥሪ የተደረገላቸው ተጋባዥ እንግዶችና የቅዱስ ዳዊት የበገና ቤተሰብ አባላት ተገኝተዋል፡፡
ሚያዝያ 13 ቀን 2004 ዓ.ም.
በእንዳለ ደምስስ

 

 

በኢትዮጵያ ኦርቶዶክስ ተዋሕዶ ቤተ ክርስቲያን ሰንበት ትምህርት ቤቶች ማደራጃ መምሪያ የማኅበረ ቅዱሳን የልማት ተቋማት አስተዳደር የአቡነ ጎርጎርዮስ የአብነትና የዜማ መሣሪያዎች ትምህርትና ሥልጠና ማእከል ለስድስት ወራት በበገና ድርደራ ያሰለጠናቸውን ከ175 በላይ የሚሆኑ የበገና ደርዳሪዎች መጋቢት 29 ቀን 2004 ዓ.ም. በቤተ ክህነት አዳራሽ አስመረቀ፡፡
begana
የበገና ድርደራ ሥልጠናውን ወስዶ በእለቱ ከተመረቁት ወጣቶት መካከል ወጣት ሔኖክ መንግሥቱ ለስድስት ወራት ትምህርቱን እንደተከታተለና “በመማሬ ብዙ ተጠቅሜያለሁ፤ ሥርዐተ ቤተ ክርስቲያንን የጠበቀ መዝሙር እንዳውቅ አድርጎኛል፡፡ ከዚህም ባለፈ ቤተ ክርስቲያን የምትጠቀምባቸው የዜማ መሣሪያዎች የትኞቹ እንደሆኑ፤ በግል ሕይወቴም ትሕትናንና ትእግስትን በመላበስ በቤተ ክርስቲያን አገልግሎት ጥሩ ሥነ ምግባር እንዲኖረኝ አድርጎኛል” በማለት ገልጿል፡፡

 

የትምህርት ማእከሉ ሥራ አስኪያጅ የሆኑት አቶ አብዮት እሸቱ ባደረጉት ንግግር ማእከሉ ሲቋቋም በ1996 ዓ.ም. በ12 ተማሪዎች ትምህርቱን እንደጀመረና በአሁኑ ወቅት በርካታ ተማሪዎችን አቅፎ እያስተማረ እንደሚገኝ፣ በአሳሳቢ ሁኔታ እየቀነሰ የመጣውን የበገና ደርዳሪዎች ቁጥር በመጨመር ረገድ የአባቶቻችንን አሻራ ለተተኪ ትውልድ ለማስተላለፍ ማእከሉ ከፍተኛ ጥረት በማድረግ ላይ መሆኑንና በቀጣይነትም በተለያዩ የሀገሪቱ ክፍሎች ለማስፋፋት እቅድ እንዳለው ገልጸዋል፡፡

begena graduate

በዕለቱም ብጹዐን ሊቃነ ጳጳሳት፣ ሊቃውንተ ቤተ ክርስቲያን፣ የተመራቂ ቤተሰቦች ጥሪ የተደረገላቸው ተጋባዥ እንግዶችና የቅዱስ ዳዊት የበገና ቤተሰብ አባላት ተገኝተዋል፡፡