ጥር 9/2006 ዓ.ም.

ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ሊቀ ጳጳስ ዘአክሱም ወእጨጌ ዘመንበረ ተክለሃይማኖት ጥር 7 ቀን 2006 ዓ.ም. የቅድስት ሥላሴን ዓመታዊ የንግሥ በዓል በመንበረ ጸባዖት ቅድስት ሥላሴ ካቴድራል በከበረበት ወቅት ቤተ ክርስቲያኗ በለውጥ ላይ በመሆኗ ምእመናንና አገልጋይ ካህናት ለውጡን ተግባራዊ ለማድረግ እንዲተባበሩ ጥሪ አስተላለፉ፡፡

ቅዱስነታቸው የዕለቱን በዓል አስመልከተው ጥልቅ መንፈሳዊ ትምህርት ካስተማሩ በኋላ በትምህርታቸው ማጠቃለያም ቤተ ክርስቲያን የምእመናንንና የካህናት በመሆኗ የሁለቱ አንድነት አገልግሎቱን የተሟላና የሠመረ እንደሚያደርገው ገልጸው በቤተ ክርስቲያን ውስጥ ተንሰራፍቶ ያለው ተገቢ ያልሆነ አሠራር መስተካከል እንደሚኖርበት አሳስበዋል፡፡

ቅዱስነታቸው በተደጋጋሚ ተገቢ ያልሆነ አሠራር መኖሩ እየተነገረ ዝም ብሎ ማለፍ ስለማይገባ የችግሩን አሳሳቢነት ግምት ውስጥ በማስገባት የቤተ ክርስቲያኗን አሠራርና መዋቅር በተመለከተ ለውጥ ላይ ስለምትገኝ ምእመናንም የበኩላቸውን አስተዋጽኦ እንዲያበረክቱ ጠይቀዋል፡፡አስተዋጽኦ እንዲያበረክቱ ጠይቀዋል፡፡

 ጥር 6/2006 ዓ.ም.

በእንዳለ ደምስስ

• ቅዱሰ አባታችን ለልጆቼ ምን ላውርሳቸው? ሙስናን? የምእመናን ተወካይ
• የቤተ ክርስቲያኗን አስተዳደር እናስተካክላለን ብለን ከዚህ ደርሰን ወደኋላ እንመለሳለን ማለት ዘበት ነው፡፡ በጭራሽ አይሞከርም!!! ሐቋንም ይዤ እጓዛለሁ!!!  ብፁዕ ወቅዱስ አቡነ ማትያስ

አዲስ አበባ ሀገረ ስብከት ያስጠናው መዋቅራዊ ለውጥ ቤተ ክርስቲያናችንን ወደ ተሻለ ልማት ያራምዳል፤ ሙስናን ያጠፋል፤ወደ ሌላ በረት የገቡትን በጎች ይመልሳል፤ እኛም የቤተ ክርስቲያን አካል በመሆናችን የተሻለ አገልግሎት እንድንሰጥ የሚያደርገን በመሆኑ በአስቸኳይ ተግባር ላይ እንዲውልልን በማለት በአዲስ አበባ ሀገረ ስብከት የሚገኙ ምእመናን ጥር 5 ቀን 2006 ዓ.ም. በጠቅላይ ቤተ ክህነት ስብከተ ወንጌል አዳራሽ ለቅዱስ ፓትርያርክ ብፁዕ ወቅዱስ አቡነ ማትያስ በንግግርና በእንባ ጠየቁ፡፡

ከቀኑ ዘጠኝ ሰዓት ጀምሮ ምእመናን በጠቅላይ ቤተ ክህነት ግቢ ውስጥ መሰባበሰባቸውን ቀጥለዋል፡፡ የምእመናኑ አስተባባሪ ኮሚቴ አባላት በቅዱስ ፓትርያርኩ ልዩ ጽ/ቤት በመገኘት ምእመናን የሚያቀርቡት ጥያቄ እንዳላቸውና ይህንንም ለማቅረብ እንዲችሉ ፈቀዳቸውን ለመጠየቅ ቀርበዋል፡፡ የቅዱስነታቸው ልዩ ጽ/ቤት በርካታ ምእመናንን ማስተናገድ ስለማይችል 60 ምእመናን ብቻ እንዲገቡ ተፈቀደ፡፡ ሆኖም ግን በግቢው ውስጥ ቁጥራቸው ከ500 በላይ ምእመናንና ምእመናት በመገኘታቸው የጠቅላይ ቤተ ክህነት ስብከተ ወንጌል አዳራሽ እንዲፈቀድ ተደርጎ ምእመናንን ወደ አዳራሹ በመግባት ቦታቸውን ያዙ፡፡

ቅዱስነታቸው ምእመናኑን ለማነጋገር ፈጠን ፈጠን እያሉ ወደ ጠቅላይ ቤተ ክህነት ስብከተ ወንጌል አዳራሽ ገብተው በመምጣት በግራም፤ በቀኝም የሚገኙትን ምእመናንን እየባረኩ ቦታቸውን ከያዙ በኋላ መርሐ ግብሩን በጸሎት ከፍተዋል፡፡
ከጸሎት በኋላ የምእመናን ተወካዮች ለቅዱስነታቸው ጥያቄዎቻቸውን በጽሑፍ ማቅረባቸውን ቀጠሉ፡፡

“በአኩሪ ታሪክና ምግባር የምትታወቀው ቤተክርስቲያናችን የዘመናት ስሟንና ክብሯን የማይመጥን እኩይ ተግባራት የሚፈጸምባት ቦታ፤ ከሃይማኖት ይልቅ ግላዊ ጥቅም በሚያስቀድሙ የውስጥ አርበኞች ብልሹ አሠራር፤ ዘረኝነት፤ ሙስና እና የሥነምግባር ጉድለት ጎልቶ የሚታይባትና ተከታዮቿን የሚያሸማቅቅ ተግባር የሚፈጽሙባት እየሆነች መጥታለች” በማለት በእድሜ ገፋ ያሉ አዛውንት በንባብ ገለጹ፡፡

የውስጥ የቤተክርስቲያን ጠላቶች ያሏቸውንም መለያቸውን ሲገልጹ፡- “ዘመናዊ የፋይናንስ ሥርዓት ኃላፊነትና ተጠያቂነት ሥራ ላይ እንዳይውል በጥብቅ ይከላከላሉ፤ ከአጥቢያ ጀምሮ እስከ ሀገረ ስብከት እንዲሁም ጠቅላይ ቤተ ክህነት ድረስ በተዘረጋ የሙስና መረብ ከሕጋዊ መዋቅሩ በበለጠ እርስ በእርስ በመደጋገፍ፤ የተፈጸሙ ጥፋቶችን ይሸፋፈናሉ፤የሥራ ዕድገት በሙያና በትምህርት ብቃት ላይ የተመሠረተ ሳይሆን በዘመድና በጉቦ እንዲፈጸም ያደርጋሉ፣ ጥፋተኛነቱ የተረጋገጠ የደብር አለቃ ወይም ኃላፊ ላይ ተገቢውን የሥነ ሥርዓት ዕርምጃ በመውሰድ ፋንታ ወደ ሌላ የተሻለ ቦታ እንዲዘዋወሩ ይደረጋል” በማለት በቤተ ክርስቲያን ውስጥ እየተካሔደ ያለውን ብልሹ አሠራር ተቃውመዋል፡፡

አዛውንቱ ቀጥለውም በአሁኑ ወቅት በሰፊው የሚስተዋለው የሥነ ምግባር ግድፈቶች፣ ጎጣዊ/ዘረኛ አሠራሮችና የሙስና መንሰራፋት ለመምዕመናን ወደ መናፍቃን ጎራ መጉረፍ ምክንያት ከመሆናቸውም ባሻገር ፤በቁጥራቸው ጥቂት የማይባሉ የቤተክርስቲያን አገልጋዮች የተጠናና የተደራጀ በሚመስል ሁኔታ የሚፈጽሙትን የሥነ ምግባር ጉድለቶች በማየት አንዳንድ ምዕመናን ከቤተክርስቲያን እየራቁ እንደሚገኙ ጠቁመዋል፡፡

“የአደረጃጀትና የአሠራር ማሻሻያ ጥናቱ ተግባራዊ ሆኖ ቤተክርስቲያኒቱን ሰንገው አላንቀሳቅስ ያሏት ሙስናና ጎጠኝነት ተወግደው፤ ምዕመናን ለቤተክርስቲያን የሚሰጡት ገንዘብ ለታለመለት ዓላማ ለማዋል ያስችላል ተብሎ በጉጉት ሲጠበቅ፤ በጥናቱ ያልተደሰቱ የተወሰኑ ግለሰቦች ባቀረቡት ቅሬታ ጥናቱ ተግባራዊ ከመሆን ታግዶ እንደገና ባዲስ መልክ እንዲታይ መወሰኑን በከፍተኛ ድንጋጤ ነው የሰማነው፡፡ በቤተክርስቲያኒቱ ውስጥ ተንሠራፍቶ የቆየው ሙስናና ብልሹ አሠራር ጊዜ ሊሠጠው የማይገባ ለነገ ሊባል የማይችል ባስቸኳይ ርምጃ መወሰድ ያለበት ስለሆነ የቤተክርስቲያቱን ሥር የሰደደና የተከማቸ ችግር ያስወግዳል ተብሎ ተስፋ የተጣለበትና የቤተክርስቲያኒቱ የበላይ አካል በሆነው በቅዱስ ሲኖዶስ የጸደቀው ጥናት ባስቸኳይ ተግባራዊ እንዲደረግ በአጽንኦት እንጠይቃለን” ብለዋል፡፡

የተቋማዊ ለውጡ ጥናት በቅዱስ ሲኖዶስ ተቀባይነት ማግኘቱ በራሱ ከፍተኛ ውጤት ቢሆንም አስፈላጊው የአፈጻጸም ስልትና በቁርጠኝነት ሥራ ላይ ሊያውል የሚችል ቅን ታታሪ ታማኝ ተግዳሮቶችን በከፍተኛ ጽናት መቋቋም የሚችል የሰው ኃይል ካልተመደበለት ብልጣብልጦቹ እጅ ወድቆ የታሰበውን ውጤት ሳያስገኝ ሊከሽፍ እንደሚችል የጠቆመው መግለጫው፤ ተቋማዊ ለውጡን በተሟላና በተሳካ ሁኔታ ሥራ ላይ ለማዋልና ዘለቄታማነቱን ለማረጋገጥ ይቻል ዘንድ ትኩረት ያስፈልጋቸዋል ያሏቸውን ነጥቦች በዝርዝር አቅርበዋል፡፡

1. በጥናቱ ላይ ጥያቄ ያለው ግለሰብ ወይም ቡድን ቢኖር ጥያቄውን በዝርዝር አቅርቦ በጥናት ቡድኑ ታይቶ በቅዱስ ሲኖዶስ የሚታመንበት ነገር ካለ አስፈላጊው ማሻሻያ ከሚደረግበት በስተቀር በጉጉት የምንጠብቀው የጥናት ውጤት ቢቻል ለማስቆም ካልተቻለም ለማዘግየት እንደገና በአዲስ መልክ እንዲታይ እየተደረገ ያለው አካሄድ ቆሞ የቅዱስ ሲኖዶስ ውሳኔ ልዕልና ተጠብቆ በውሳኔው መሠረት እንዲፈጸም እንዲደረግ፤
2. የተጠናውን የአሠራርና የአደረጃጀት ጥናት የሚገመግም አዲስ ኮሚቴ በተመለከተም ጥናቱን ሊያዳብር በሚችል መልኩ በፍጥነት ሰርተው ያቀርባሉ ብሎ ለማሰብ ከኮሚቴው አባላት መካከል ከአሁን ቀደም በሀገረ ስብከቱም ሆነ በጠቅላይ ቤተክህነት ውስጥ በተመሳሳይ ችግር ተጠቃሽ የሚሆኑ ሰዎች መካተታቸው ያሳሰበን በመሆኑ እንደገና እንዲታይልን እንዲደረግ
3. ተቋማዊ ለውጡን አስመልክቶ ቅዱስ ሲኖዶስ ያስተላለፈው ውሳኔ እንዳይፈጸም በሚያውኩና በሚቃወሙ ላይ ሌሎችን ሊያስተምር የሚችል ጥብቅ የሥነ ሥርዓት ርምጃ እንዲወሰድ እንዲደረግ፤
4. ከቅን የቤተክርስቲያን አገልጋይ ካህናትና ሠራተኞች፣ ከሰንበት ት/ቤት እንዲሁም ከምዕመናን የተውጣጣ ተጠሪነቱ ለቅዱስ ሲኖዶስ የሆነ የተቋማዊ ለውጥ አስፈጸሚ አካል እንዲቋቋም፤
5. ከዚህ ቀደም በቤተክርስቲያን ሀብትና ንብረት ላይ ከፍተኛ ምዝበራ የፈጸሙ ሁሉ ጉዳያቸው ተጣርቶ ተገቢው ሕጋዊ እርምጃ እንዲወሰድልን፣
6. ስለ ጎጠኝነትና ሙስና አስከፊነት የሥልጠናና ትምህርት መርሃ ግብር ቀርጾ ተግባራዊ እንዲደረግ፣
7. ከሙስና የጸዱትንና የላቀ መልካም ተግባር የሚፈጸሙትን አገልጋዮች በመሸለም እንዲበረታቱ እንዲደረግ፣
8. ቤተክርስቲያኒቱ ከወቅታዊ ሁኔታዎች አንጻር እራሷን እየፈተሸች፣ ችግሮቿን እየለየች መፍትሔ በማስቀመጥ ተግባራዊ እርምጃ ለመውሰድ የሚያስችላት የጥናትና ምርምር ማዕከል እንዲቋቋም እንዲደረግ፣
9. ከመንግሥት አሠራር ልምድ በመቅሰም በስፋት የተንሰራፋውን የሙስና ተግባር መቋቋም ይቻል ዘንድ የሥነ ምግባርና ጸረ ሙስና አካል ከጠቅላይ ቤተክህነት እስከ አጥቢያ ቤተክርስቲያን እንዲቋቋም እንዲደረግ በቅድስት ቤተክርስቲያናቸን ስም አበከረን እንጠይቃለን በማለት በመግለጫቸው አቅርበዋል፡፡

በተጨማሪም በቅዱስነታቸው ፈቃድ የምእመናን ተወካዮች ጥናቱን አስመልከቶ ሀሳባቸውን ከገለጹት መካከል፡-

“ይህ አዲስ መዋቅር ቤተ ክርስቲያናችን ውስጥ ብዝበዛን፤ የአስተዳደር ብልሹነትን፤ ግማሹ እያለቀሰ ሌላው እየተደሰተ እንደፈለገ እየሆነ ያለበት አስቸጋሪ ሁኔታን የሚያስተካክል ነው፡፡ የዚህ መዋቅር መውጣት የሚያስደነግጣቸው ይኖራሉ፡፡ ምክንያቱም የገንዘብ ብዝበዛን፤ ብልሹ አስተዳደርን ስለሚያስቆም በዚህ ሕይወት ውስጥ የበለጸጉና ከፍተኛ ጥቅማጥቅሞችን ያገኙ የነበሩ ግለሰቦች የለመዱት ሲቋረጥባቸው ሊደነግጡ ይችላሉ፡፡ እንኳን ቤተ ክህነት በቤተ መንግሥት ውስጥ አዳዲስ አሠራሮች ለሀገርና ለሕዝብ የሚጠቅሙ ጉዳዮች ሲነሱ ሁሉም እልል ብሎ አይቀበልም፡፡ ይህ የመዋቅር ጥናት በቤተ ክርስቲያናችን ታሪክ ውስጥ ታላቅ ምእራፍ የከፈተ ነውና እርስዎ ጀምረውታል፤ ለስምዎ፤ ለታሪክዎና ለቤተ ክርስቲያኗ ሕልውና ሲሉ ያስፈጽሙት፡፡ ቤተ ክርስቲያንን ከብዝበዛ ያድኗት፤ ከፍጻሜም ያድርሱት” በማለት የእድሜ ባለጸጋና ቀድሞ ቃለ ዓዋዲን ካረቀቁ ሊቃውንት መካካል የነበሩ አባት እንባ እየተናነቃቸው ተናግረዋል፡፡

አንድ እናትም ንግግራቸውን ቀጠሉ “የእግዚአብሔር ዓላማ የጠፉትን ወደ ቤቱ ለመመለስ ነው፡፡ የቤተ ክርስቲያናችን ትንሣኤ ደርሷል ብለን እናምናለን፡፡ የቤተ ክርስቲያናችን ችግር በሚገባ አውቀናል፤አዝነናል፤ አልቅሰናል፤ ዋጋችንንም አግኝተናል፤ ተቀጥተናል ይበቃናል፡፡ ልጆቻችን ቤተ ክርስቲያናችንንና እምነታችንን ይረከቡ ዘንድ እኛ ወላጆች ድልድዮች ነን፡፡ቤተ ክርስቲያናችንን ለልጆቻችን ለማስረከብ እንድንችል ይርዱን፡፡ቅዱስ አባታችን ለልጆቼ ምን ላውርሳቸው? ሙስናን??? ቅዱስ አባታችን ቤተ ክርስቲያን አሁን በሌላ በረት ያሉ ልጆቿን የምትሰበስብበት ሰዓት ደርሷል፡፡ይህ ጥናት ተግባራዊ ቢሆን የጠፉ ልጆቿ በሕይወት ይኖራሉ፡፡በቤተ ክርስቲያን ውስጥ የተሰበሰብነው ምእመናንን እንዳንበተን ይህ መዋቅር በቶሎ ተግባራዊ ይደረግልን” በማለት እያለቀሱ ተማጽነዋል፡፡

ቅዱስነታቸውም ለቀረቡት የምእመናንን ጥያቄዎች በማረጋጋት ምላሽ ሰጥተዋል፡፡ “ይህንን ጉዳይ ገና ከመግባቴ ያወጅኩት እኔ ነኝ፡፡ሙስና፤ የገንዘብ ብክነት፤ ሓላፊነት የጎደለው አስተዳደር እንዲጠፋና መልካም አስተዳደር፤ ሓላፊነትና ተጠያቂነት ያለው አሠራር እንዲሰፍን መሥራት አለብን፡፡ አንድ ጥናት የተወሰኑ ሰዎች ያጠኑታል፡፡ ከዚያም ሊቃውንተ ቤተ ክርስቲያን እንዲያዩት ይደረጋል፡፡ ሊቃውንተ ቤተ ክርስቲያን የቤተ ክርስቲያንን ቋንቋ፤ ባሕል ተመርኩዘው ቢያጠኑት ይጠነክራል፡፡ ለቅዱስ ሲኖዶስም ቀርቦ ይጸድቃል፡፡ በፍጹም ስጋት አይግባችሁ፤ ጩኸቱ የእኔ ነው፡፡ ተጠናክሮ እንጂ ተዳክሞ አይመጣም፡፡

ቤተ ክርስቲያን ትክክለኛ መስመሯን እንድትይዝ ነው ፍላጎታችን፡፡ የቤተ ክርስቲያኗን አስተዳደር እናጠራለን፤ እናስተካክላለን ብለን ከዚህ ደርሰን ወደኋላ እንመለሳለን ማለት ዘበት ነው፡፡ በጭራሽ አይሞከርም!!! ሐቋን ይዤ እጓዛለሁ!!! እናንተም ደግፋችሁን ቤተ ክርስቲያናችን የቀድሞ ቅድስናዋን መመለስ አለብን፡፡ ስለዚህ የቤተ ክርስቲኗ ሊቃውንትና የዘመናዊውን የአስተዳደር ትምህርት የተማሩ ምሁራን ተቀናጅተው፤ አይተውት ጠርቶ እንዲመጣ ይደረጋል፡፡ ችግር ካለበት ያኔ ሀሳብ ልንሰጥበት እንችላለን፡፡አይዟችሁ አትፍሩ” በማለት ምእመናንን በማረጋጋት ባርከው የመርሐ ግብሩ ፍጻሜ ሆኗል፡፡ ምእመናንም እግዚአብሔር ይመስገን ይህችን ቀን ቀድሶ ለሰጠን እያሉ በመዘመር ቅዱስነታቸውን ሸኝተዋል፡፡

 አቶ ተስፋዬ ቢሆነኝ የማኅበረ ቅዱሳን ዋና ጸሐፊ

የአዲስ አበባ ሀገረ ስብከት በቤተ ክርስቲያን ያሉትን ብልሹ አሠራሮች ለማስተካከል፤ የሰው ኃይል ምጣኔ፤ የንብረት አጠቃቀምና አያያዝ፤ በሌሎችም ዘርፎች እየታዩ ያሉትን ችግሮች ይፈታል ተብሎ የታሰበ ጥናት በማስጠናት ከቅዱስ ሲኖዶስ እስከ አጥቢያ አብያተ ክርስቲያናት ድረስ በማቅረብ እንዲተችና ገንቢ አስተያየቶች እየተሰጡት ይገኛሉ፡፡ ሆኖም በአንዳንድ የቤተ ክርስቲያኒቱ አገልጋዮች ተቃውሞ ሲገጥመው ተስተውሏል፡፡ ይህም ጥናቱን ያጠናው ማኅበረ ቅዱሳን ነው በማለት በአገልጋዮችና ምእመናን ላይ ብዥታን ሲፈጥር ተመልክተናል፡፡ ይህንን ጥናት ማኅበረ ቅዱሳን አጥንቶታል? ቢያጠናስ ችግሩ ምንድነው? ለሚሉና ተያያዥ ጥያቄዎች ምላሽ እንዲሰጡን የማኅበረ ቅዱሳን ዋና ጸሐፊ የሆኑትን አቶ ተስፋዬ ቢሆነኝን አነጋግረናል፡፡

የአዲስ አበባ ሀገረ ስብከት ያስጠናውን የመዋቅር ጥናት ማኅበረ ቅዱሳን እንዴት ይመለከተዋል?
አቶ ተስፋዬ ቢሆነኝ፡- ማኅበረ ቅዱሳን ጥናቱን በዝርዝር አያውቀውም፡፡ ነገር ግን ዘመኑን የዋጀ አሠራር ሀገረ ስብከቱ እንደሚያስፈልገው እናምናለን፡፡ የሀገረ ስብከቱን አገልግሎት ጠንካራ እና የበለጠ ተደራሽ ለማድረግ የሚያስችሉ አሠራሮች ሁልጊዜም እየተተገበሩ መሄድ አለባቸው፡፡ ከዚህ አንጻር ማኅበረ ቅዱሳን የዚህ ጥናት ዝርዝር መረጃ ባይኖረውም ይደግፈዋል፡፡ ለቤተ ክርስቲያናችንም ያስፈልጋታል ብሎ ያምናል፡፡

አንዳንዶች የመዋቅር ጥናቱን ያጠናው ማኅበረ ቅዱሳን ነው ይላሉ፡፡ ይህ ምን ያህል እውነት ነው?
አቶ ተስፋዬ ቢሆነኝ፡- ይህን ጥናት በተመለከተ ማኅበሩ እንዲያዘጋጅ ከሀገረ ስብከቱ የተጻፈለት ደብዳቤ አልደረሰውም፡፡ አልተጠየቀም፡፡ ከዚህ በፊት አንዳንድ ጥናቶች ሲያስፈልጉ ማኅበሩ በደብዳቤ ይጋበዛል፡፡ አዘጋጅቶ ያስረክባልም፡፡ይህንን የመዋቅር ለውጥ ግን እንዲያጠና አልተጋበዘም፡፡

ማኅበሩ ተጋብዞ ባያጠናም ከአጥኚዎቹ መካከል የማኅበሩ አባላት የሉም?
አቶ ተስፋዬ ቢሆነኝ፡- ማኅበረ ቅዱሳን ዋናው ዓላማ የተማረውን ወጣት ትውልድ ወደ ቤተ ክርስቲያን እንዲቀርብ ማድረግ፤ ለቤተ ክርስቲያን ጥሩ አመለካከት እንዲኖረው ማድረግ፤ ለማገልገል ክህሎት እንዲኖረው ማስቻል ስለሆነ በመንግሥትም ሆነ በግል ዩኒቨርሲቲዎች በሚገኙ ግቢ ጉባኤያት ተማሪዎችንእያስተማረ ያስመርቃል፡፡ ከዚህ አንጻር በግቢ ጉባኤያት ተምረው፤ በማኅበሩ አባልነት ተመዝግበው በተለያዩ የቤተ ክርሰቲያን መዋቅር የሚያገለግሉ ባለሙያዎች ከያሉበት አጥቢያ ተጠርተው ይህንን የመዋቅርና የአሠራር ለውጥ ካዘጋጁትና ከሠሩት መካከል አብዛኛዎቹ የማኅበረ ቅዱሳን አባላት ናቸው፡፡ እነዚህ አባላት ጥናቱን ለመሥራት ሲጋበዙ ከማኅበረ ቅዱሳን ደብዳቤ ተጽፎላቸው ወይም ማኅበሩ ወክሏቸው አይደለም፡፡

ማኅበሩ እንደ ቤተ ክርስቲያን ልጅነቱ ተጋብዞ የማጥናት መብት የለውም?
አቶ ተስፋዬ ቢሆነኝ፡- ማኅበረ ቅዱሳን የቤተ ክርስቲያን አካል በመሆኑ መብት አለው፡፡ ይህ ሁሉ ባለሙያ ወደ ማኅበረ ቅዱሳን መጥቶ አባል ቤተ ክርስቲያንን የበለጠ ለማገልገልና አባቶቻችንን ለማገዝ ነው፡፡ ማኅበረ ቅዱሳንም የቤተ ክርስቲያንን ክፍተት እሞላለሁ፤ አግዛለሁ ብሎ የተመሠረተ በመሆኑ ካለው የተማረ የሰው ኃይል አንጻር ሙያዊ ሥራዎችን ይሠራል፡፡ መሥራትም አለበት፡፡ ከዚህ በፊትም በተለይ በምህንድስናው ዘርፍ ዘርፈ ብዙ ሥራዎችን በመስራት ከፍተኛ የሆነ ወጭን ቤተክርስቲያኗ አንዳታወጣ አድርጓል፡፡ አባለቱም የማኅበረ ቅዱሳን አባል ስለሆኑ አያገባቸውም፤ አይመለከታቸውም ሊባል አይችልም፡፡ አባላት የቤተ ክርስቲያን ልጆች መሆናቸው መዘንጋት የለበትም፡፡ ስለሆነም አባላቱ በየአጥቢያ አብያተ ክርስቲያናት ተመዝግበው ማገልገል እንዲሁም ማኅበሩ በሚያዛቸው ሁሉ መትጋት ይጠበቅባቸዋል፡፡ እያገለገሉም ነው፡፡

እየተነሱ ያሉት ተቃውሞዎች ጥናቱ ላይ ነው ወይስ ማኅበሩ ላይ ነው?
አቶ ተስፋዬ ቢሆነኝ፡- ጥናቱን አስመልክቶ ለተለያዩ የቤተ ክርስቲያኒቱ አካላት ገለጻ በማድረግ ውይይት ተካሒዶበታል፡፡ በዚህም ወቅት በጥናቱ ላይ የቀረቡ ትችቶች አሉ፡፡ ገንቢ አስተያየቶችም ተሰጥተዋል፡፡ ይህ እንግዲህ ተገቢ እና ጤናማ ነው፡፡ ይህ በእንዲህ እንዳለ ጥናቱ ይቅር ብለው የሚንቀሳቀሱ አካላት መነሳታቸውን ሰምተናል፡፡ ተቃውሟቸው ይሄ ችግር አለበት፤ ያ ደግሞ ቢስተካከል ጥሩ ነው በሚል አይደለም፡፡ ሰነዱ ላይ ያቀረቡት ክፍተት የለም፡፡ ተቃውሟቸው ጥናቱ ላይ ሳይሆን አዘጋጀው ብለው በሚያስቡት ማኅበረ ቅዱሳን ላይ ነው፡፡ እነዚህ ጥቂት አካላት በማኅበሩ ላይ የተለያዩ ትችቶችና የስም የማጥፋት ዘመቻ እያካሄዱ ነው፡፡ ይህ ሥህተትም ወንጀልም ነው፡፡ ጥናቱን ካዘጋጁት ባለሙያዎች መካከል የማኅበረ ቅዱሳን አባላት ቢገኙበትም የተመረጡት በየአጥቢያቸው ባላቸው የቤተ ክርስቲያን አገልግሎት መነሻነት ነው፡፡ ትችቱም ሆነ ስም ማጥፋቱ ማኅበሩ ላይ ነው፡፡ ይህ ተገቢ ነው ብለን አናስብም፡፡ ጥናቱ ላይ አያስኬድም፤ ይህ ግድፈት አለበት ብለው ያቀረቡት ነገር የለም፡፡

ከጥናቱ ጋር በተያያዘ የማኅበሩን ስም የሚያጠፉና የተለያዩ ቅስቀሳዎችን የሚያደርጉ አሉና ከማኅበሩ ምን ይጠበቃል?
አቶ ተስፋዬ ቢሆነኝ፡- እንዲህ ያሉ ትችቶች መስመራቸውን የለቀቁ ናቸው፡፡ ማኅበረ ቅዱሳን ተጠይቆ ያዘጋጀው ጥናት እንዳልሆነ ገልጸናል፡፡ እንቃወማለን የሚሉ ሰዎች በሰነዱ ላይ ምንም ዓይነት ትችት እያቀረቡ አይደለም፡፡ በሰነዱ ላይ ትችት የሚያቀርብ ሰው ሀሳቡ ጠቃሚ ቢሆንም ባይሆንም ለቤተ ክርስቲያን ጠቃሚ ነገር እንዳደረገ ይቆጠራል፡፡ አንድ ሰነድ በሆነ አካል ሊዘጋጅ ይችላል፡፡ በሚመለከታቸው አካላትም ይተቻል፤ ይታሻል፤ ከዚያ በኋላ ተግባራዊ ይደረጋል፡፡ እንዲህ ሲሆን ሰነዱ ሙሉ ይሆናል፡፡ ተግባራዊ ለማድረግም አያስቸግርም፡፡

እንቃወማለን የሚሉት አካላት ተቃውሟቸው ሰነዱ ላይ ሳይሆን አዘጋጀ ብለው የሚያስቡትንማኅበረ ቅዱሳንን ነው:: እነዚህ አካላት የተለየ ዓላማ ይዘው እየተንቀሳቀሱ ነው ብሎ መደምደም ይቻላል፡፡ ለቤተ ክርስቲያን ጥሩ አገልግሎት እየሰጠ ያለን ማኅበር ያለ ምንም ማስረጃ መተቸት አግባብ ነው ብለን አናምንም፡፡ እነዚህ አካላት የተለየ አጀንዳ ከሌላቸው በስተቀር ለቤተ ክርስቲያናችን የሚጠቅም ሰነድን ዝም ብሎ ገንቢ ባልሆነ መልኩ መቃወም ተገቢ አይደለም፡፡
ማኅበሩ እነዚህን አካላት አባቶች እንዲያርሟቸውና እንዲያስተካክሏቸው ይጠይቃል፡፡ ከዚህ በላይ እየገፋ ከሔደ በሕግ ይጠይቃል፡፡ ምክንያቱም በማኅበሩ ላይ ከፍተኛ የስም ማጥፋት ወንጀል እየፈጸሙ ናቸው፡፡ ከሁሉም በፊት አባቶቻችን እና የሚመለከታቸው አካላት እነዚህን ሰዎች ትክክለኛ አቋም እንዲይዙ አስፈላጊውን ሁሉ ያደርጋሉ ብለን እናምናለን፡፡

ጥናቱ ተግባራዊ እንዲደረግ የማኅበሩ ሱታፌ ምን ሊሆን ይችላል?
አቶ ተስፋዬ ቢሆነኝ፡- ሰነዱን ተግባራዊ የሚያደርገው በባለቤትነት ያዘጋጀው የአዲስ አበባ ሀገረ ስብከት ነው፡፡ ይህንን የአሠራርና የአደረጃጀት ለውጥ ባለቤትም ሀገረ ስብከቱ ስለሆነ የሚያስፈጽመውም ራሱ ነው፡፡ መመሪያው ተግባራዊ እንዲሆን ቅዱስ ሲኖዶስ ወስኗል፡፡ ቅዱስ ፓትርያርኩም በተደጋጋሚ አቅጣጫ ሰጥተውበታል፡፡ ማኅበራችንም የሚታዘዘውን የመሥራት ግዴታ አለበት፡፡ ሙያዊ በሆኑ ጉዳዮች ላይ በአባቶች አሳሳቢነት አግዝ፤ ፈጽም ሲባል አልችልም ማለት አይችልም፡፡ ለውጥ እንዲሁ በቀላሉ አይመጣም፡፡ ብዙ ተቃውሞዎች ሊኖሩ ይችላሉ፡፡ ነገር ግን ተቃውሞው በርትቶ የተጀመሩት የአሠራር ለውጦች ወረቀት ላይ ሰፍረው እንዳይቀሩ ማኅበሩ በአባቶች የሚታዘዘውንና የሚጠየቀውን ሁሉ ለመተግበር ዝግጁ ነው፡፡