Archive for category: ስብከት

ታኅሣሥ ፱ ቀን ፳፻፲ ዓ.ም

የኦርቶዶክሳዊት ተዋሕዶ ቤተ ክርስቲያንን ከነጣቂ ተኩላዎች መጠበቅ እንደሚገባ ብፁዕ አቡነ ኤልያስ የጋሞ ጎፋ ሀገረ ስብከት ሊቀ ጳጳስ አሳሰቡ፡፡

ብፁዕነታቸው ይህን መልእክት ያስተላለፉት በጋሞ ጎፋ ሀገረ ስብከት በዐርባ ምንጭ ከተማ በደብረ ኃይል ቅዱስ ገብርኤል ቤተ ክርስቲያን በተካሔደው የፀረ ተሐድሶ ጉባኤ ላይ ተገኝተው ‹‹እናንተ ግን ክፉውን ከመካከላችሁ አውጡ፡፡ በውጭ ባሉት ግን እግዚአብሔር ይፈርድባቸዋል›› (፩ኛ ቆሮ. ፭፥፲፫) በሚል ኃይለ ቃል ትምህርተ ወንጌል በሰጡበት ወቅት ነው፡፡

የተሐድሶ መናፍቃን ሴራ በቅድስት ቤተ ክርስቲያናችን ላይ እየፈጠረ ያለው መለያየት ከፍተኛ መኾኑን የጠቆሙት ብፁዕነታቸው የቤተ ክርስቲያን አገልጋዮችም ኾኑ ምእመናን ስልታዊ እንቅስቃሴያችንን አጠናክረን በትጋት መቀጠል እንዳለብን አስገንዝበዋል፡፡

የቤተ ክርስቲያንን አስተምህሮ ለማፋለስ፣ የአገርን አንድነትና የምእመናንን ሰላም ለማደፍረስ የሚንቀሳቀሱ መናፍቃንን አውግዛ በመለየት ቤተ ክርስቲያን ሓላፊነቷን በመወጣት ላይ እንደምትገኝ ያስታወሱት ብፁዕነታቸው መናፍቃኑ ከስሕተታቸው የሚመለሱ ከኾነ መክራ፣ አስተምራ እንደምትቀበላቸውም አስረድተዋል፡፡

ምንጭ፡- ስምዐ ጽድቅ ጋዜጣ፣ ከኅዳር ፩-፲፭ ቀን ፳፻፲ ዓ.ም፤ ገጽ ፩፡፡

በእንግሊዝ ንዑስ ማእከል

ኅዳር ፲፫ ቀን ፳፻፲ ዓ.ም

በኢትዮጵያ ኦርቶዶክስ ተዋሕዶ ቤተ ክርስቲያን ሰ/ት/ቤ/ማ/መ/ ማኅበረ ቅዱሳን አውሮፓ ማእከል የተተኪ ትውልድ ሥልጠና ክፍል አስተባባሪነት የተዘጋጀ ከኢትዮጵያ ውጪ የሚኖሩ ሕፃናት እና ታዳጊዎችን ለማስተማር የሚያግዝ ሥርዓተ ትምህርት በእንግሊዝ አገር በለንደን ከተማ በደብረ ገነት ቅድስት ሥላሴ ቤተ ክርስቲያን ኅዳር ፫ ቀን ፳፻፲ ዓ.ም ተመረቀ፡፡

በምረቃ ሥርዓቱ ላይ የሰሜን ምዕራብ አውሮፓ ሀገረ ስብከት ሠራተኞች፣ ከየአብያተ ክርስቲያናት የመጡ ካህናት፣ የሰንበት ት/ቤት አባላት፣ የየአብያተ ክርስቲያናት ተወካዮች፣ የአካባቢው ምእመናንና በማኅበረ ቅዱሳን አውሮፓ ማእከል የእንግሊዝ ንዑስ ማእከል አባላት ተገኝተዋል፡፡

መርሐ ግብሩ በሊቀ አእላፍ ቆሞስ አባ አሮን ሳሙኤል በሰሜን ምዕራብ አውሮፓ ሀገረ ስብከት የሰ/ት/ቤ/ማደራጃ ክፍል ሓላፊ በጸሎት የተከፈተ ሲኾን፣ የሀገረ ስብከቱ ዋና ጸሐፊ ቀሲስ በለጠ የእንኳን ደኅና መጣችሁ መልእክት አስተላልፈው የሥርዓተ ትምህርቱን ምረቃና አጠቃላይ ዝግጅት አስተዋውቀዋል፡፡

ዶ/ር በላቸው ጨከነ በማኅበረ ቅዱሳን የአውሮፓ ማእከል ምክትል ሰብሳቢ እና የሥርዓተ ትምህርቱ ዝግጅት አስተባባሪም የሥርዓተ ትምህርቱ የዝግጅት ሒደት፣ ዓላማ፣ አስፈላጊነት፣ ይዘት እና ቀጣይ ሥራዎችን በተመለከተ ባቀረቡት ገለጻ በሥርዓተ ትምህርት ዝግጅቱ ከሠላሳ የሚበልጡ የቤተ ክርስቲያን ልጆች መሳተፋቸውን አመላክተዋል፡፡

ዶ/ር በላቸው እንዳብራሩት በኢትዮጵያ ኦርቶዶክስ ተዋሕዶ ቤተ ክርስቲያን የሰሜን ምዕራብ አውሮፓ ሀገረ ስብከት ፈቃድ የተጀመረው የሕፃናትና ታዳጊዎች የሥርዓተ ትምህርት ዝግጅት ከሁለት ዓመታት በላይ የወሰደ ሲኾን፣ ዝግጅቱ ከመጀመሩ አስቀድሞም ከሦስት መቶ በላይ የሚኾኑ በእንግሊዝ አገር የሚኖሩ ምእመናን የተሳተፉበት የየአብያተ ክርስቲያናት ተሞክሮ፣ የልጆች የቋንቋ ክህሎት እና የቤተ ክርስቲያን ትምህርት ደረጃ፣ እንደዚሁም ወላጆች የተሳተፉበት በችግሮች እና የመፍትሔ አቅጠጫዎች ዙሪያ ያተኮረ የመነሻ ጥናት ተደርጓል፡፡

ጥናቱን መሠረት በማድረግም ለወደፊት የሚመለከታቸውን አካላት ዅሉ ለማሳተፍ የሚያስችል ጥናትና ምክረ ሐሳብ (ፕሮፖዛል) ለሰሜን ምዕራብ አውሮፓ ሀገረ ስብከት ቀርቦ የነበረ ሲኾን፣ የሀገረ ስብከቱ አስተዳደር ጉባኤም የቀረበውን ጥናትና ምክረ ሐሳብ ተቀብሎ በሀገረ ስብከቱ ሥር በሚገኙ አገሮች የወላጆች ኮሚቴ እንዲዋቀር ወስኗል፡፡ ለዚህም የሥራ መመሪያ ተዘጋጅቶ ለየአጥቢያ አብያተ ክርስቲያናት መላኩ ተገልጿል፡፡

እንደ ዶ/ር በላቸው ጨከነ ገለጻ ወጥ የኾነ ሥርዓተ ትምህርት አለመኖር በአውሮፓ የሚኖሩ ታዳጊ ሕፃናትን ለማስተማር ከባድ ከሚያደርጉት ኹኔታዎች ዐቢይ ምክንያት ሲኾን፣ ይህን በመገንዘብ የሰሜን ምዕራብ አውሮፓ ሀገረ ስብከት ባወጣው የሥራ መመሪያ መሠረት በማኅበረ ቅዱሳን አውሮፓ ማእከል የተተኪ ትውልድ ሥልጠና ክፍል ባለሙያዎችን በመመደብ ሥራውን እንዲጀምር ተደርጓል፡፡

ከአምስት እስከ ዘጠኝ ዓመት የዕድሜ ክልል ውስጥ ለሚገኙ ሕፃናትና ታዳጊዎች ታስቦ የተዘጋጀው ሥርዓተ ትምህርቱ የመጽሐፍ ቅዱስ ጥናት፣ ትምህርተ ሃይማኖት፣ ሥርዓተ ቤተ ክርስቲያን፣ የአማርኛ ቋንቋ እና የመዝሙር ጥናት የተሰኙ አምስት የትምህርት ዘርፎችን ያካተተ ሲኾን፣ የትምህርቶቹ አርእስትና ይዘቶችም በቤተ ክርስቲያን የሚከበሩ በዓላትንና ወቅቶችን መሠረት በማድረግ የተዘጋጁ ናቸው፡፡

በቀጣይነትም በአውሮፓ ማእከል አስተባባሪነት የሕፃናት እና ታዳጊዎች ክፍልን በመላው አውሮፓ በሚገኙ አብያተ ክርስቲያናት ለማቋቋምና ለማጠናከር፣ ለመምህራን ሥልጠና ለመስጠት፣ በየአገሩ የወላጆች ኮሚቴን ለማቋቋም እና ሥርዓተ ትምህርቱን በየአጥቢያው ለማዳረስ መታቀዱን ዶ/ር በላቸው ጨከነ አስረድተዋል፡፡

‹‹የእኛ ትወልድ፣ ነገ በመላው ዓለም ለምትኖረው ቤተ ክርስቲያን ድልድይ ነው፤›› ያሉት ዶ/ር በላቸው ጨከነ ለሥርዓተ ትምህርቱና ለሌሎችም ዕቅዶች ተግባራዊነት የሚመለከታቸው የቤተ ክርስቲያን አካላትና ምእመናን በትጋት ሊሠሩ እንደሚገባ በማሳሰብ መልእክታቸውን አጠቃለዋል፡፡

በምረቃ ሥርዓቱ ላይ የተገኙ ካህናትና ምእመናንም በዚህ ዝግጅት የተሳተፉ ወገኖችን ከማመስገን ጀምሮ ብዙ ጠቃሚ አስተያየት ሰጥተዋል፡፡ ለአብነትም ሊቀ አእላፍ ቆሞስ አባ አሮን ሳሙኤል በሰሜን ምዕራብ አውሮፓ ሀገረ ስብከት የሰ/ት/ቤ/ማደራጃ ክፍል ሓላፊ ዝግጅቱ አስፈላጊና ወቅታዊ መኾኑን ጠቅሰው በሕፃናት ላይ የሚሠራ ሥራ መሠረታዊ ለውጥ ለማምጣት የላቀ ጠቀሜታ እንዳለው ተናግረዋል፡፡

‹‹ይህ ሥራ ችግኝ ተከላ ነው›› ያሉት የለንደን ደብረ ገነት ቅድስት ሥላሴ ቤተ ክርስቲያን አስተዳዳሪ መልአከ ገነት ቀሲስ ከፍያለው አስቻለው በበኩላቸው ሕፃናትን የማስተማር አገልግሎት ለበርካታ ዓመታት በአእምሯቸው ሲመላለስ እንደ ቆየ አውስተው ‹‹ዝግጅቱ የልጆቻችንን ጥያቄ የሚመልስልን በመኾኑ ከአሁን በኋላ ዅላችንም በሓላፊነት ልንሠራበት ይገባል›› ሲሉ አሳስበዋል፡፡

‹‹በውጪ አገር ይህን ያህል ዓመት ስንኖር ዛሬ ገና ስለ ልጆቻችንን ማሰብ በመጀመራችን ደስ ብሎኛል›› በማለት ደስታቸውን የገለጹት ሊቀ ሊቃውንት ገብረ ሥላሴ ዓባይም በሰሜን ምዕራብ አውሮፓ ሀገረ ስብከት የስብከተ ወንጌል ክፍል ሓላፊ፣ ይህ ዝግጅት እንዲፈጸም ላደረገው ለእግዚአብሔር ምስጋና ካቀረቡ በኋላ ለሥራው ተግባራዊነትም ዅሉም ጠንክሮ መሥራት እንደሚገባው አስገንዝበዋል፡፡

በሊቨርፑል ከተማ የመካነ ቅዱሳን አቡነ ተክለ ሃይማኖት ቤተ ክርስቲያን አስተዳዳሪ ሊቀ ትጉሃን ቀሲስ ብርሃኑ ደሳለኝ ደግሞ ቤተ ክርስቲያናችን ያላትን ብዙ ሀብት በሚገባ እየተጠቀምንበት እንዳልኾነ አስታውሰው ዝግጅቱ ተጠናቆ ለምረቃ በመብቃቱም ‹‹ቤተ ክርስቲያናችን እንኳን ደስ ያላት! እናንተም እንኳን ደስ ያላችሁ!›› በማለት የተሰማቸውን ደስታ ገልጸዋል፡፡

መጋቤ ሐዲስ ክብረት የለንደን ደብረ ገነት ቅድስት ሥላሴ ቤተ ክርስቲያን አገልጋይም እንደዚሁ ይህ ዝግጅት ለሕፃናት መንፈሳዊ ሕይወት ከሚኖረው ጠቀሜታ ባሻገር ሕፃናት ከወላጆች ጋር እንዲግባቡ የሚያግዝ ሥራ መኾኑንም መስክረዋል፡፡ በተመሳሳይ መልኩ አንዳንድ ምእመናንም ለሥራው ውጤታማነት የሚጠቅሙ ገንቢ አስተያየቶችን ሰጥተዋል፡፡

በመጨረሻም የተዘጋጁት የመምህራን መምሪያ እና የሥርዓተ ትምህርት መድብሎች ከየአጥቢያው ለመጡ የሰበካ ጉባኤ ተወካዮች ከተሰጡ በኋላ በሰሜን ምዕራብ አውሮፓ ሀገረ ስብከት ዋና ጸሐፊ ቀሲስ በለጠ መርዕድ የማጠቃለያ መልእክትና ጸሎተ ቡራኬ የምረቃ ሥርዓቱ ተጠናቋል፡፡

ጥቅምት ፲፭ ቀን ፳፻፲ ዓ.ም

በኢትዮጵያ ኦርቶዶክስ ተዋሕዶ ቤተ ክርስቲያን በጋሞ ጎፋ ሀገረ ስብከት በዐርባ ምንጭ ዙሪያ ወረዳ ቤተ ክህነት በዝጊቲ ደብረ ሰላም አቡነ ገብረ መንፈስ ቅዱስ ገዳም ከሁለት ሺሕ በላይ አዳዲስ አማንያን ጥቅምት ፬ ቀን ፳፻፲ ዓ.ም ተጠምቀው የሥላሴን ልጅነት አገኙ፡፡

‹‹ይህን ያህል አዳዲስ ምእመናንን ማግኘታችን ለቅድስት ቤተ ክርስቲያን ታላቅ ድል ነው›› ያሉት የጋሞ ጎፋ ሀገረ ስብከት ሥራ አስኪያጅ ሊቀ ኅሩያን ገሪማ ጌታነህ የጥምቀት መርሐ ግብሩ ቤተ ክርስቲያናችን መሥራት የሚገባትን ያህል ብትሠራ ከዚህ የበለጠ ድል አድራጊ እንደምትኾን ያመላከተ እንደ ነበረና ሀገረ ስብከቱ በቀጣይ ለሚሠራው ሥራ ከፍተኛ መነሣሣትን እንደ ፈጠረ አስረድተዋል፡፡

ተጠማቂዎቹ በሃይማኖታቸው ጸንተው እንዲኖሩ፣ ሥጋ ወደሙ እንዲቀበሉና ከቅድስት ቤተ ክርስቲያን እንዳይለዩ ለማትጋት ሰባክያነ ወንጌልን መመደብ እና የንስሐ አባት እንዲኖራቸው ማድረግ በቀጣይ ሊሠራ የሚገባው ተግባር መኾኑንም ጨምረው ገልጸዋል፡፡

የሀገረ ስብከቱ ሥራ አስኪያጅ እንደ ተናገሩት እነዚህ አዳዲስ አማንያን ወንጌልን ተምረው የክርስትና ጥምቀትን እንዲጠመቁና የሥላሴ ልጅነትን እንዲያገኙ ልዩ ልዩ ድጋፍ ካደረጉ ምእመናን መካከል ወለተ ማርያም እና ባለቤታቸው ኃይለ ኢየሱስ ከፍተኛውን ድርሻ ይወስዳሉ፡፡

በ፳፻፱ ዓ.ም በሀገረ ስብከቱ በደራሼና ኮንሶ አካባቢዎች የሚኖሩ በርካታ አዳዲስ አማንያን የክርስትና ጥምቀትን መጠመቃቸውን ያስታወሱት ሊቀ ኅሩያን ገሪማ ጌታነህ አሁንም እናት ቤተ ክርስቲያንን ተቀበይን በማለት የሚጣሩ ነፍሳት ከጊዜ ወደ ጊዜ መብዛታቸውን ተከትሎ በሀገረ ስብከቱ በሚገኙ ዐሥራ ዘጠኝ ወረዳ ቤተ ክህነቶች የጥምቀት መርሐ ግብሩ ተጠናክሮ እንደሚቀጥል ተናግረዋል፡፡

የጥምቀት መርሐ ግብሩን በስፋት ለማስቀጠልና ተጨማሪ ምእመናንን ወደ ቤተ ክርስቲያን ለማምጣት ይቻል ዘንድም በመላው ዓለም የሚገኙ ኦርቶዶክሳውያን ምእመናን በተቻላቸው አቅም ዂሉ ድጋፍ እንዲያደርጉ ሊቀ ኅሩያን ገሪማ ጌታነህ መንፈሳዊ ጥሪ አቅርበዋል፡፡

በጋሞ ጎፋ ሀገረ ስብከት የዐርባ ምንጭ ዙሪያ ወረዳ ቤተ ክህነት ሥራ አስኪያጅ መልአከ ሰላም አበባው ጌታኹን እንደ ገለጹት በአካባቢው ከፊሉ ኅብረተሰብ ሕይወቱን በአሕዛብነት የሚመራ ቢኾንም ከቅርብ ጊዜ ወዲህ በሀገረ ስብከቱ፣ በወረዳ ቤተ ክህነቶችና በማኅበረ ቅዱሳን የጋራ ጥረት ከፍተኛ ቊጥር ያላቸውን ወገኖች የቤተ ክርስቲያን አባላት ለማድረግ ተችሏል፡፡

በወረዳው የሚገኙ ኢ አማንያንን በማስጠመቅ የቤተ ክርስያናችን አባል ለማድረግ አንዱ መሰናክል በአማንያኑ ቋንቋ ወንጌልን ማስተማር የሚችሉ ሰባክያነ ወንጌል እጥረት መኾኑን የጠቆሙት መልአከ ሰላም አበባው ወረዳ ቤተ ክህነቱ ከማኅበረ ቅዱሳን ጋር በጋራ በመኾን ከሃያ በላይ ጋሞኛ ቋንቋ መናገር የሚችሉ ሰባክያነ ወንልን ማሠልጠኑንና በዚህም ፍሬያማ ሥራ መሠራቱን ገልጸዋል፡፡

በቀጣይም በልዩ ልዩ ቋንቋዎች ማስተማር የሚችሉ ሰባክያነ ወንጌልን አሠልጥኖ በመመደብ በወረዳው የሚገኙ ያልተጠመቁ ወገኖች በየቋንቋቸው ተምረው የኦርቶዶክስ ተዋሕዶ ቤተ ክርስቲያን አባላት እንዲኾኑ የማድረጉ ተልእኮ ተጠናክሮ እንደሚቀጥል አስገንዝበዋል፡፡

በዛሬው ዕለት ሀብተ ወልድና ስመ ክርስትና ያገኙ ከሁለት ሺሕ በላይ አዳዲስ አማንያን በሃይማኖታቸው እንዲጸኑ ለማበረታታትም ጋሞኛ ቋንቋን መናገር የሚችሉ ወጣቶችን በመመደብ የክትትልና የማስተማር ሥራቸውን እንደሚቀጥሉ መልአከ ሰላም አበባው ጌታኹን አስረድተዋል፡፡

‹‹የጠፉትን በጎች ለመፈለግ ከታቀደ ቆይቷል፡፡ በአካባቢው የክረምቱ ወራት በመግባቱ መርሐ ግብሩ ለተወሰነ ጊዜ ቢጓተትም በእግዚአብሔር ተራዳኢነት፣ በበጎ አድራጊ ምእመናን ጥረት ዕቅዳችን በዛሬው ዕለት እውን ኾኖ በርካታ የጠፉ በጎችን ፈልገን ለማግኘት ችለናል›› ያሉት ደግሞ የዝጊቲ ደብረ ሰላም አቡነ ገብረ መንፈስ ቅዱስ ገዳም አስተዳዳሪ መምህር ቀለመ ወርቅ በላይ ናቸው፡፡

መምህር ቀለመ ወርቅ አያይዘውም ‹‹እነዚህ ጠፍተው የተገኙ፣ ሀብተ ወልድና ስመ ክርስትና ያገኙ በጎች ተመልሰው በተኵላ እንዳይነጠቁ በአካባቢያቸው በርካታ የስብከት ኬላዎችን በማዘጋጀት ምእመናኑ አምልኮተ እግዚአብሔርን እንዲፈጽሙ፣ በእምነታቸው እንዲጸኑና አቅማቸውን አጎልብተው የራሳቸውን ሕንጻ ቤተ ክርስቲያን እንዲገነቡ የማስቻል ሥራ ሊሠራ ይገባል›› ሲሉ አሳስበዋል፡፡

ከተጠማቂዎቹ መካከል አንዱ የኾኑት በዝጊቲ ባቆሌ ቀበሌ ነዋሪና የሌላ እምነት ተከታይ የነበሩት አቶ ዘሪኹን ቱሎ ‹‹የኢትዮጵያ ኦርቶዶክስ ተዋሕዶ ቤተ ክርስቲያን የክርስቶስ አምላክነት የሚሰበክባት፣ በጠበልና በእምነት ከሕመም መዳን የሚቻልባት እውነተኛ ሃይማኖት እንደኾነች በእኛ አካባቢ የሚኖሩ ሰዎች ይነግሩኝ ነበር፡፡ ይህ ነገር ምን ያህል እውነት ነው እያልኹ ከራሴ ጋር ስሟገት ዓመታት ቢያልፉም ባለቤቴ ‹ወደ እናት ቤተ ክርስቲያን ተመለሱ› የሚል መልእክት በራእይ በመስማቷ ማንም ወደ ጥምቀቱ ሳያመጣን አምነን ተጠምቀን በዛሬዋ ዕለት የሥላሴን ልጅነት አግኝተናል›› በማለት የቤተ ክርስቲያን አባል የኾኑበትን ምሥጢር አስረድተዋል፡፡

አቶ ዘሪኹን የቤተ ክርስቲያን አባል ከመኾናቸው በፊት በገጠማቸው የጤና እክል ከዐሥር ዓመታት በላይ ሲሰቃዩ ኖረው በዝጊቲ አቡነ ገብረ መንፈስ ቅዱስ ጠበል ተጠምቀው ከያዛቸው ደዌ እንደ ተፈወሱ፤ ከዚያም የተዋሕዶ ሃይማኖት አባል እንዲኾኑ ከተገለጠላቸው ራእይ ባሻገር መሠረት በጻድቁ አማላጅነት በተደረገላቸው ድንቅ ሥራ በመማረካቸው ከባለቤታቸው ጋር በኢየሱስ ክርስቶስ አምነው፣ ንስሐ ገብተው የክርስትና ጥምቀትን ተጠምቀው የቅድስት ቤተ ክርስቲያን አባል ለመኾን መብቃታቸውን ተናግረዋል፡፡

ከዝጊቲ ባቆሌ ማላላ መንደር የተገኘችው ወጣት ስመኝሽ አዦ በበኩሏ ‹‹እኔ በዛሬው ዕለት ለመጠመቅ የመጣሁት ማንም ሰው ቀስቅሶኝ ወይም ሒጂ ብሎኝ አልነበረም፡፡ ኦርቶዶክስ ተዋሕዶ፣ አባል እንድኾንባት ስመኛት የኖርኋት ሃይማኖት በመኾኗና የዛሬውን የጥምቀት መርሐ ግብርም ዳግመኛ የማገኘው ስላልመሰለኝ ይህን መልካም አጋጣሚ በመጠቀም ከመላ ቤተሰቦቼ ጋር ተጠምቀን የቅድስት ቤተ ክርስቲያን አባል ኾነናል›› በማለት ወደ ክርስትና የመጣችበትን መንገድ ተናግራለች፡፡

ወጣት ስመኝሽ አዦ አይይዛም ‹‹ወደፊትም በሃይማኖቴ ጸንቼ እኖራለሁ፤ ቃለ እግዚአብሔር በመማርም በአካባቢዬ የሚኖሩ መናፍቃንና አሕዛብ ለሚጠይቁኝ ጥያቄ ምላሽ የሚኾን ስንቅን እቋጥራለሁ፤ እንደዚሁም በዝጊቲ አካባቢ የሚኖሩ የኅብረተሰብ ክፍሎችን በየቋንቋቸው እየተዟዟርኹ በማስተማር ቀጥተኛውንና እውነተኛውን መንገድ አሳያቸዋለሁ›› በማለት መንፈሳዊ ዕቅዷን ገልጻለች፡፡

በጋሞ ጎፋ ሀገረ ስብከት በዝጊቲ አቡነ ገብረ መንፈስ ቅዱስ ገዳም ጥቅምት ፬ ቀን ፳፻፲ ዓ.ም በተከናወነው የጥምቀት መርሐ ግብር የጋሞ ጎፋ ሀገረ ስብከት ሥራ አስኪያጅ፣ የሀገረ ስብከቱ ዋና ጸሐፊና የትምህርት ክፍሉ ሓላፊ፤ የየወረዳ ቤተ ክህነት ሥራ አስኪያጆችና ሠራተኞች፤ በጎ አድራጊ ምእመናን፤ ከአዲስ አበባና ከዐርባ ምንጭ የመጡ መምህራንና ዘማርያን፤ የማኅበረ ቅዱሳን አባላትና የዐርባ ምንጭ ዩኒቨርሲቲ ግቢ ጉባኤ ተማሪዎች፤ የዝጊቲና የአካባቢው ቀሳውስት፣ ዲያቆናትና ምእመናን በልዩ ልዩ የአገልግሎት ዘርፍ ተሳትፎ አድርገዋል፡፡

መረጃውን ያደረሰን የስምዐ ጽድቅ ጋዜጣ ሪፖርተር ካሣኹን ለምለሙ ነው፡፡

በዲያቆን ኤፍሬም የኔሰው

መስከረም ፲፰ ቀን ፳፻፲ ዓ.ም

የሕንድ ኦርቶዶክስ ተዋሕዶ ቤተ ክርስቲያን ፓትርያርክ ብፁዕ ወቅዱስ አቡነ ባስልዮስ ማርቶማ ጳውሎስ ካልዕ የመስቀል ደመራ በዓልን በአዲስ አበባ ከተማ በመስቀል ዐደባባይ አከበሩ፡፡

ቅዱስነታቸው በዓለ መስቀልን በአዲስ አበባ ያከበሩት የኢትዮጵያ ኦርቶዶክስ ተዋሕዶ ቤተ ክርስቲያን ፓትርያርክ ብፁዕ ወቅዱስ አቡነ ማትያስ ያቀረቡላቸውን መንፈሳዊ ግብዣ ተቀብለው ነው፡፡

ፓትርያርኩ በዕለቱ በሰጡት ቃለ ምዕዳን ከብፁዕ ወቅዱስ አቡነ ማትያስ በቀረበላቸው መንፈሳዊ ጥሪ መሠረት ወደ ኢትዮጵያ መጥተው ሐዋርያዊ ጉብኝት በማድረጋቸውና በዓለ መስቀልን በአዲስ አበባ ከተማ በማክበራቸው መላው የሕንድ ኦርቶዶክስ ተዋሕዶ ምእመናን እንደተባረኩ፣ በዚህም ከፍተኛ ደስታ እንደተሰማቸው ገልጸዋል፡፡

መስቀልን ማክበር ማለት ራስን መፈለግና የመስቀሉን ክብር ከፍ ከፍ ማድረግ ማለት እንደኾነ የጠቀሱት ቅዱስነታቸው ኢትዮጵያውያን ምእመናን በመንፈሳዊ ሥርዓት ብቻ ሳይኾን በሕይወታቸው ጭምር የመስቀሉን ክብር እንደሚገልጹት መስክረዋል፡፡

የኢትዮጵያ የመስቀል በዓል አከባበር ሥርዓት በዓለም አቀፉ የትምህርት፣ የሳይንስ እና የባህል ድርጅት በቅርስነት በመመዝገቡ መደሰታቸውንም ተናግረዋል፡፡

መላው ሕዝበ ክርስቲያን ጌታችን አምላካችንና መድኀኒታችን ኢየሱስ ክርስቶስ የማዳን ሥራውን ወደፈጸመበት መስቀል ሊመለከት እንደሚገባው ያስረዱት ቅዱስነታቸው በመልእክታቸው ማጠቃለያም በአብ በወልድ በመንፈስ ቅዱስ ስም ለመላው ምእመናን አባታዊ ቡራኬ ሰጥተዋል፡፡

በሐዋርያው ቅዱስ ቶማስ የተመሠረተችው የሕንድ ኦርቶዶክስ ተዋሕዶ ቤተ ክርስቲያን ከአምስቱ አኃት አብያተ ክርስቲያናት አንዷ ስትኾን፣ በርካታ ሊቃነ ጳጳሳት፣ ሰባክያነ ወንጌልና ካህናት እንደዚሁም ወደሦስት ሚሊዮን የሚደርሱ ምእመናን እንዳሏትና ሠላሳ በሚኾኑ አህጉረ ስብከቷ ሐዋርያዊ ተልእኮዋን በመወጣት ላይ እንደምትገኝ ታሪኳ ያስረዳል፡፡

በ፳፻፲ ዓ.ም የሚከበረውን በዓለ መስቀል በማስመልከት በጠቅላይ ቤተ ክህነት ጽ/ቤት በተዘጋጀው ልዩ ዕትም መጽሔት በገጽ 12 – 13 እንደተጠቀሰው፣ ብፁዕ ወቅዱስ አቡነ ባስልዮስ ማርቶማ ጳውሎስ ካልዕ በሕንድ ምሥራቅና ማላንካራ ኦርቶዶክስ ተዋሕዶ ቤተ ክርስቲያን በቅዱስ ቶማስ መንበረ ፓትርያርክ ሰባተኛውን ፓትርያርክ ብፁዕ ወቅዱስ አቡነ ማርቶማ ዲዲሞስ ቀዳማዊን በመተካት ከስምንት ዓመታት በፊት ስምንተኛው ፓትርያርክ ኾነው ተሹመዋል፡፡

በዘመነ ፓትርያርክነታቸውም ሐዋርያዊ ጉብኝት በማድረግ በኦሪየንታል አኃት አብያተ ክርስቲያናት መካከል ያለው ሃይማኖታዊ ግንኙነት እንዲጠናከር ከፍ ያለ መንፈሳዊ ተግባር በመፈጸም ላይ ይገኛሉ፡፡

ቅዱስነታቸው መስከረም ፲፭ ቀን ፳፻፲ ዓ.ም ወደኢትዮጵያ በመጡ ጊዜም ከቦሌ ዓለም አቀፍ አየር መንገድ ጀምሮ ብፁዕ ወቅዱስ አቡነ ማትያስ እና ብፁዓን አበው ሊቃነ ጳጳሳት በተገኙበት በመንበረ ጸባዖት ቅድስት ሥላሴ ካቴድራል መንፈሳዊ አቀባበል ተደርጎላቸዋል፡፡

ፓትርያርኩ በኢትዮጵያ በሚኖራቸው ቆይታም በዓለ መስቀልን ከማክበራቸው በተጨማሪ የቅዱስ ላሊበላ ፍልፍል አብያተ ክርስቲያናትን፣ ደብረ ሊባኖስን፣ ሰበታ ቤተ ደናግል የሴት መነኮሳይያት ገዳምን እና ሌሎችም ቅዱሳት መካናትን እንደሚጎበኙ፤ በሁለቱ አብያተ ክርስቲያናት መካከል ያለውን ሃይማኖታዊ ግንኙነት በሚመለከትም የመግባቢያ ሰነድ እንደሚፈራረሙ ለመረዳት ተችሏል፡፡

ከፓትርያርኩ የጉብኝት ዜና ስንወጣ የመስቀል ደመራ በዓል በመላው ዓለም በሚገኙ የኢትዮጵያ ኦርቶዶክስ ተዋሕዶ አብያተ ክርስቲያናት መስከረም ፲፮ ቀን ፳፻፲ ዓ.ም በመንፈሳዊ ሥርዓት ተከብሯል፡፡

በአዲስ አበባ ከተማ መስቀል ዐደባባይ በዓሉ ሲከበርም ብፁዕ ወቅዱስ አቡነ ማትያስ፤ ብፁዓን አበው ሊቃነ ጳጳሳት፤ የጠቅላይ ቤተ ክህነት ጽ/ቤት የየመምሪያ ሓላፊዎች፤ የገዳማት፣ አድባራት አስተዳዳሪዎች እና አገልጋይ ካህናት፤ የየሰንበት ት/ቤቶች እና የማኅበረ ቅዱሳን አባላት፤ የኢፊድሪ ፕሬዚዳንት ዶክተር ሙላቱ ተሾመን ጨምሮ ከፍተኛ የመንግሥት ባለሥልጣናት በአጠቃላይ በመቶ ሺሕ የሚቈጠር ሕዝብ በሥርዓቱ ታድሟል፡፡

በዕለቱ ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት ቃለ ምዕዳን ሰጥተዋል፡፡

በቃለ ምዕዳናቸውም የሕንድ ኦርቶዶክስ ተዋሕዶ ቤተ ክርስቲያን ፓትርያርክ ጥሪያቸውን አክብረው ወደኢትዮጵያ በመምጣት በዓሉን በጋራ በማክበራቸው መደሰታቸውን ገልጸው፣ ‹‹የመስቀል በዓል በየዓመቱ በደማቅ ሥርዓት የሚከበረው መስቀሉ ጌታችን አምላካችንና መድኀኒታችን ኢየሱስ ክርስቶስ የማዳን ሥራውን የፈጸመበት በመኾኑ ነው›› በማለት በዓሉ የሚከበርበትን ምክንያት አስገንዝበዋል፡፡

አያይዘውም መድኀኒታችን ኢየሱስ ክርስቶስ በመስቀል ላይ ተሰቅሎ ሰላምን፣ አንድነትን፣ ፍቅርን እንደሰጠን ዂሉ፣ እኛ ኢትዮጵያውያንም አገራዊ አንድነታችንንና ወንድማማችነታችንን በመጠበቅ በመካከላችን ፍቅርንና ሰላምን ማስፈን፤ ዕድገታችንንም ማስቀጠል እንደሚገባን ቅዱስነታቸው አባታዊ ምክራቸውን ለግሰዋል፡፡

ከዚሁ ዂሉ ጋርም በቅርቡ በኦሮምያ እና ሱማሌ የኢትዮጵያ ክልሎች በተነሣው ግጭት ከዚህ ዓለም በሞት ለተለዩ ወገኖች ዕረፍትን፤ ለወዳጅ ዘመዶቻቸው መጽናናትን፤ ጉዳት ለደረሰባቸውና ሕክምና ላይ ለሚገኙት ደግሞ ፈውስን እግዚአብሔር እንዲሰጣቸው ብፁዕ ወቅዱስ አቡነ ማትያስ ተመኝተዋል፡፡

በዕለቱ መንግሥትን ወክለው መልእክት ያስተላለፉት የአዲስ አበባ ከተማ ከንቲባ አቶ ደሪባ ኩማ በበኩላቸው ሃይማኖትና መንግሥት የተለያዩ ናቸው ማለት አንዳቸው በአንዳቸው አስተዳደር ጣልቃ አይገቡም ማለት እንጂ ለአገር ሰላም በሚጠቅሙ ብሔራዊ ጉዳዮች ላይ በጋራ አይመክሩም ማለት እንዳልኾነ አስታውሰዋል፡፡

የመስቀል በዓል አከባበር ሥርዓት በዓለም አቀፉ የትምህርት፣ የሳይንስ እና የባህል ድርጅት በቅርስነት መመዝገቡ ለቱሪዝም ዕድገት ከሚኖረው አገራዊ ፋይዳ ባሻገር የኢትዮጵያን መልካም ገጽታ ለዓለም በማስተዋወቅ ረገድ ከፍተኛ ድርሻ እንዳለውም አስረድተዋል፡፡

በመጨረሻም ጸሎተ ቡራኬ ተደርጎ በብፁዕ ወቅዱስ አቡነ ማትያስ፣ በብፁዕ ወቅዱስ አቡነ ባስልዮስ ማርቶማ ጳውሎስ እና በዶክተር ሙላቱ ተሾመ የመስቀል ደመራው ከተለኮሰ በኋላ የበዓሉ አከባበር ሥርዓት በሰላም ተፈጽሟል፡፡