Archive for category: ስብከት

ጥር 11 ቀን 2006 ዓ.ም.                                                                                                                                                        

እንዳለ ደምስስ

የማኅበረ ቅዱሳን የመዝሙር ክፍል አባላትና የአቡነ ጎርጎርዮስ የትምህርትና ሥልጠና ማእከል በበገና ድርደራ የሠለጠኑ 250 ወጣቶችን የከተራ በዓልን ለማክበር የመንበረ ፓትርያርክ ቅድስተ ቅዱሳን ማርያም ገዳምን በዝማሬ አጅበው ወደ ጃንሜዳ ሰልፋቸውን ይዘው በገናቸውን እየደረደሩ ይጓዛሉ፡፡ አሰላለፋቸውና ብዛታቸው እንዲሁም ጸዓዳ አለባበሳቸው ለዓይን ይማርካሉ፤ እንደ ምንጭ ውኃ ኮለል እያለ የሚፈሰው ዝማሬ ነፍስን ያለመልማል፡፡ ምእመናን በትኩትና በተመስጦ፤ ጎብኚዎች ባዩት ነገር በመገረም የፎቶ ግራፍና የቪዲዮ ካሜራቸውን አነጣጥረው የቻሉትን ያህል ያነሳሉ፡፡

በመካከላቸው አንድ በገና ከሁሉም ቁመት በላይ ረዝሞ ይታያል፡፡ ሰልፉ ቆም ሲል ጠጋ ብዬ ተመለከትኩት፡፡ ከዚህ በፊት እንዲህ አይነት ትልቅ በገና አይቼ እንደማላውቅ እርግጠኛ ነኝ፡፡ በገናውን የያዙት ልጆች መገረሜን አስተውለው “ይህ በገና በዓለማችን ከሚገኙ በገናዎች ትልቁ ነው፡፡ በገና እግዚአብሔርን ለማመስገን የምትጠቀመው የኢትዮጵያ ኦርቶዶክስ ተዋሕዶ ቤተ ክርሰቲያን ብቻ ናት፡፡ እስከ ዛሬ ኢትዮጵያ ውስጥም ይህንን በገና በትልቅነቱ የሚስተካከለው የለም” አሉኝ፡፡ በገናውን እንደ ሕፃን ልጅ በፍቅር እንደሚያሻሽ አባት ዳሰስኩት፡፡

በገናው ሁለት ሜትር ከሃያ ሳንቲ ሜትር ይረዝማል፡፡ አሥር አውታሮች ሲኖሩት እያንዳንዱ አውታር በስምንት በጎች አንጀት የተሠራ ነው፡፡ አሥሩ አውታሮች በአጠቃላይ በ80 በጎች አንጀት ተዘጋጅተዋል፡፡ ከላይ ያለው ብርኩማ ስልሳ ሳንቲ ሜትር ይረዝማል፡፡ በተጨማሪም በገናውን ለማዘጋጀት የአንድ ትልቅ በሬ ቆዳ ፈጅቷል፡፡

ማኅበረ ቅዱሳን በየዓመቱ በጥምቀት በዓል ላይ ለታቦታት ክብር ሲባል፤ እንዲሁም ሊጠፋ ተቀርቦ የነበረውን የቤተ ክርስቲያናችን ቅርስ ቀድሞ ወደነበረበት ለመመለስና ለትውልድ ለማስተላለፍ በአቡነ ጎርጎርዮስ ሥልጠና ማእከል ወጣቶችን በማሰልጠን ላይ ይገኛል፡፡

  ጥር 10/2006 ዓ.ም.

በእንዳለ ደምስስ 

የከተራ በዓል በጃን ሜዳ ቅዱስ ፓትርያርኩና ብፁዓን ሊቀነ ጳጳሳት፤ ሊቃውንተ ቤተ ክርስቲያን፤ የሰንበት ትምህርት ቤቶች መዘምራንና ምእመናን እንዲሁም የተለያዩ የውጭ ሀገራት አምባሳደሮችችና ሀገር ጎብኚዎች በተገኙበት በድምቀት ተከበረ፡፡

ከአሥራ አንድ ታቦታት በላይ ከየአብያተ

ክርስቲያናት በክብር በመውጣት በዝማሬና በእልልታ እንደታጀቡ ወደ ጃንሜዳ አምርተዋል፡፡ የእለቱ ተረኛ አዘጋጅ የሆነው የደብረ ነጎድጓድ ቅዱስ ዮሐንስ ቤተ ክርስቲያን ሊቃውንተ ቤተ ክርስቲያን “ወረደ ወልድ እምሰማያት ውስተ ምጥማቃት፤ በፍስሐ ወበሰላም” በማለት እለቱን በማስመልከት ያሬዳዊ ወረብ አቅርበዋል፡፡ የደብሩ ፍቁረ እግዚእ ሰንበት ትምህርት ቤት አባላትም “በሰላም አስተርዐየ፡ አስተርዐየ ወልደ አምላክ፤ ወተወልደ በሀገረ ዳዊት ተወልደ፤ በዮርዳኖስ ተጠምቀ ከመይቤ ዘወነ” እያሉ ዝማሬ በማቅረብ በዓሉን አድምቀውታል፡፡

ስለበዓሉ አከባበር ከሰሜን አሜሪካ የመጣችው ሀገር ጎብኚ በዓሉን አስመልከተን ላቀረብንላት ጥያቄ ስትመልስ “ከዚህ በፊት ለአንድ ጊዜ የመስቀልን በዓል አከባበር ተመልክቼ ነበር፡፡ እሰከዛሬም ከምደነቅባቸው ሃይማኖታዊ በዓላት አንዱና ዋነኛው ነው፡፡ የጥምቀት በዓላችሁ ደግሞ የተለየ ነው፡፡ ልታከብሩትና ልትኮሩበት ይገባችኋል” ስትል አስተያየቷን ሰጥታለች፡፡

በመጨረሻም ቅዱስነታቸው በሰጡት ቃለ ምእዳን “ጌታን መድኀኒታችን ኢየሱስ ክርስቶስ በፈለገ ዮርዳኖስ በዮሐንስ እጅ ለመጠመቅ መጣ፡፡ ለአምስት ሺሕ አምስት መቶ ዘመናት በላያችን ተጭኖ የነበረውን መርገመ ነፍስ መርገመ ሥጋን አስወግዶ በረከተ ነፍስ በረከተ ሥጋን ለማደል በዮርዳኖስ ተጠመቀ፡፡ ኃጢዓታችንንም አስወገደ፡፡ ከዲያብሎስ ቁራኝነትም አላቀቀን፡፡ ወደ ወገኖቹ መጣ ወገኖቹ ግን አልተቀበሉትም፡፡ ነገር ግን ለተቀበሉት የእግዚአብሔር ልጅ መባልን ሰጣቸው፡፡ የእግዚአብሔር ልጆች ተብለን የመንግሥቱ ወራሾች እንድንሆን የተጠራነው በጥምቀት ነው” ብለዋል፡፡ 

የጥምቀት በዓል በኢትጵያ ኦርቶዶክስ ቤተ ክርስቲያን በታላቅ ድምቀት ይከበራል፡፡ የጥምቀት በዓልን በአደባባይ በማክበር የኢትዮጵያ ኦርቶዶክስ ቤተ ክርስቲያን ብቸኛዋ ቤተክርስቲያን  ስትሆን ከተለያዩ ዓለማት የበዓሉ ታዳሚ ለመሆን የእምነቱ ተከታዮችና ቱሪስቶች ወደ ኢትዮጵያ በመምጣት ወደ ጥምቀት በዓል ማክበሪያ ቦታዎች ይሄዳሉ፡፡ ከበዓሉ ቀደም ብሎ ለታቦታቱ ማረፊያና ለበዓሉ ማክበሪያ የተለያዩ ዝግጅቶች ይከናወናሉ፡፡
 ካህናትና ምእመናን  ለበዓሉ የሚስማማ ልብስ በመልበስ ታቦታቱን በማጀብ  ከከተራ ጀምሮ በዝማሬና በእልልታ እስከ ቃና ዘገሊላ ድረስ በታላቅ ድምቀት ያከብራሉ፡፡
ሰሞኑንም በሀገራችን የጥምቀት በዓል ማክበሪያ ቦታዎችና ታቦታቱ የሚጓዙበት መንገዶች ሲጸዱና ሲያሸበርቁ ሰንብተዋል፡፡ ጥቂት ቦታዎችን ለመጎብኘት ሞክረናል፡፡

አዲስ አበባ
በአዲስ አበባ ከተማ 46 የጥምቀት በዓል ማክበሪያ ቦታዎች አሉ፡፡ ወደነዚህ ቦታዎች የሚወስዱ መንገዶች ሁሉ እየጸዱ በኢትዮጵያ ባንዲራ፣ በዘንባባና በቄጤማ እያሸበረቁ ይገኛሉ፡፡
በአራዳና በጉለሌ ክፍለ ከተማ ቤተ ክህነቶች ያገኘነው መረጃ እንደሚገልጸው፡-
1.    በጃንሜዳ የጥምቀት በዓል ማክበሪያ ከአስራ አንድ ባላይ ታቦታት የሚያድሩ ሲሆን እነሱም መንበረ ፓትርያርክ ቅ/ቅ/ማርያም ገዳም፣ ታዕካ ነገሥት በዓታ ለማርያም፣ መ/ፀ/ቅ/ሥላሴ፣ መ/መ/ቅ/ገብርኤል፣ ገነተ ጽጌ ቅ/ጊዮርጊስ፣ ቀጨኔ ደ/ሰ መድኃኔዓለም፣ መንበረ ልዑል ቅ/ማርቆስ፣ ወ/ነጎድጓድ ቅ/ዮሐንስ ፣ገነተ ኢየሱስ፣ መ/ህ አቡነ ገብረ መንፈስ ቅዱስ፣ አንቀጸ ምሕረት ቅ/ሚካኤል ሲሆን የ2006 ዓ.ም በዓል መንፈሳዊ አገልግሎት አቅራቢ ተረኛ የወ/ነጎድጓድ ቅ/ዮሐንስ ቤተ ክርስቲያን ነው፡፡

2.    ወረዳ 13 ቀበሌ 16 ቀበና ሼል አካባቢ ቀበና መድኃኔዓለምና ቀበና ኪዳነምሕረት
3.    በጉለሌ እንጦጦ ተራራ  መ/ፀ ር/አድባራት ቅ/ማርያም እና እንጦጦ ደ/ኃ/ቅ/ራጉኤል
4.    ሽሮ ሜዳ አካባቢ
መንበረ ስብሐት ቅ/ሥላሴ፣ ሐመረ ኖህ ቅ/ኪዳነ ምሕረት
5.    ወረዳ 11 ቀ. 27 ቁስቋም አካባቢ መ/ንግሥት ቁስቋም ማርያም
6.    አዲሱ ገበያ በላይ ዘለቀ መንገድ አካባቢ ደ/ሲና እግዚአብሔር አብ፣ መንበረ ክብር ቅ/ሚካኤል እና አቡነ ተክለሃይማኖት
7.    ጉለሌ አምባ ቅ/ኪዳነ ምሕረትና ድልበር መድኃኔዓለም ቤተ ክርስቲያን
8.   ወረዳ 11 ቀበሌ 20 ፡-ገርጂ ቅዱስ ጊዮርጊስ ቤተ ክርስቲያን፤ የረር ቅዱስ ኡራኤል ቤተ ክርስቲያን፤ ቦሌ ቅድስት ማርያም ቤተ ክርስቲያን
9.   ወረዳ 17 ቀበለሌ 24 /ለምለም ሜዳ/፡-ደብረ ምጽላል እግዚአብሔር አብ ቤተ ክርስቲያን፤
10.  ወረዳ 17 ቀበሌ 2 ወንድራይድ ት/ቤት አካባቢ፡- 7 አብያተ ክርሰቲያናት
11.  ወረዳ 28፡- ሰዓሊተ ምሕረት ቅድስት ማርያም፤ አቡነ አረጋዊ፤ ቅዱስ ኡራኤል
12.  ወረዳ 16/17 ቀበሌ 1፡- ደብረ እንቁ ልደታ ለማርያም፤
13.  ሎቄ ገበሬ ማኅበር፡- ሎቄ አቡነ ገብረ መንፈስ ቅዱስ
14.  ወረዳ 17 ገበሬ ማኅበር፡- ቦሌ ቡልቡላ ቅዱስ ጊዮርጊስ
15.  ወረዳ 28 ገበሬ ማኅበር ቀበሌ 14/15 ሲኤም ሲ፡- ሰሚት ኪዳነ ምሕረት፤ ቀሬ ቅዱስ ጊዮርጊስ፤  ወጂ መድኀኔዓለም
16.  ቦሌ 14 /15፡- መካነ ሰላም ቅዱስ ሚካኤል፤ የረር ቅዱስ ገብርኤል፤ የረር ጽርሐ አርያም ቅድስት ሥላሴ
17.  ወረዳ 28 ገበሬ ማኅበር፡-  ደብረ ኢያሪኮ እግዚአብሔር አብ
18.  ራስ ኃይሉ ሜዳ/ መድኀኔዓለም ትምህርት ቤት አካባቢ፡- ደብረ ኃይል ቅዱስ ራጉኤል፤ ደብረ መዊዕ ቅዱስ ሚካኤል፤ ጽርሐ አርያም ሩፋኤል፤ ብርሃናተ ዓለም ቅዱስ ጼጥሮስ ወጳውሎስ፤ ጠሮ ሥላሴ
19.  ትንሹ አቃቂ ወንዝ/ ገዳመ ኢየሱስ/፡- ቀራንዮ መድኀኔዓለም፤ ደብረ ገሊላ ቅዱስ አማኑኤል፤ ቅዱስ ጳውሎስ፤ ገዳመ ኢየሱስ፤ ደብረ ምጥማቅ ቅዱስ ፊልጶስ፤ ደብረ ጽዮን ቅድስት ማርያም፤ ፊሊዶር አቡነ ተክለ ሃማኖት
20.  አስኮ ጫማ ፋብሪካ / ሳንሱሲ አካባቢ፡- አስኮ ደብረ ገነት ቅዱስ ገብርኤል፤ ኩርፎ ቅዱስ ጊዮርጊስ
21.  ወረዳ 25 ቀበሌ 25 አካባቢ፡- ደብረ ከዋክብት አቡነ አረጋዊና ገብረ ክርስቶስ፤ ደብረ ይድራስ ቅዱስ ጊዮርጊስ፤ አውጉስታ ቅድስት ማርያም፤ ዳግማዊት ጸድቃኔ ማርያም፤
22.  ወረዳ 24 ቀበሌ 15፡- አየር ጤና ኪዳነ ምሕረት፤ ጀሞ ሥላሴ፤ ደብረ ራማ ቅዱስ ገብርኤል
23.  ቃሌ 15 ቀበሌ፡- ቃሉ ተራራ አቡነ ሃብተ ማርያም፤ ፍኖተ ሎዛ ቅድስት ማርያም
24.  አያት ቤተ ሥራዎች ድርጅት፡- መሪ አቡ ገብረ መንፈስ ቅዱስ፡- መሪ ቅድስት ኪዳነ ምሕረት፤ ቅዱስ ሩፋኤል፤ መሪ ቅድስት ሥላሴ
25.  ወረዳ 28 ገበሮ ማኅበር፡- ኢያሪኮ እግዚአብሔር አብ
26.  ቤተል ኳስ ሜዳ፡- ደብረ ኢዮር ቅዱስ ሚካኤል፤ አንፎ ቅዱስ ኡራኤል
27.  ወረዳ 18 ቀበሌ 26፡- ቅዱስ እስጢፋኖስ፤ ደብረ ይባቤ ቅዱስ ያሬድ
28.  ወረዳ 16 ቀበሌ 11 ኳስ ሜዳ፡- ደብረ ጽጌ ቅዱስ ኡራኤል፤ የካ ቅዱስ ሚካኤል
29.  አድዋ ፓርክ፡-ቦሌ ደብረ ሰላም መድኀኔዓለም

ከአዲስ አበባ ወጪ የሚገኙ አኅጉረ ስብከት በከፊል
  የበዓለ ጥምቀት ዝግጅት በጎንደር – ፋሲለደስ፡-
ቀሃ ኢየሱስ፤ ዮሐንስ መጥምቅ፤ አባ ጃሌ ተክለ ሃማኖት፤ እልፍኝ ቀዱስ ጊዮርጊስ፤ ፊት ሚካኤል፤ አጣጣሚ ሚካኤል፤ መንበረ መንግሥት መድኀኔዓለም
ፋሲለድስ መዋኛ ፡- 8 ታቦታት
ልደታ ለማርያም
በዓታ ለማርያም
   አቡነ ሐራ – ሩፋኤልን ዞሮ ይገባል
በጎንደር ዙሪያ በሚገኙ 13 ቀበሌዎች፤ 13 ክፍለ ከተማዎችና የገጠር ቀበሌዎች

በሐዋሳ  የበዓለ ጥምቀት ዝግጅት
ፒያሳ ሔቁ አካባቢ፡- ደብረ ምጥማቅ መድኃኔዓለም
ቅዱስ ገብርኤል
ቅድስት ሥላሴ
ፋኑኤል
በዓለ ወልድ
ዳቶ ኪዳነ ምሕረት
ሐዋሳ መግቢ በይርጋለም ሞኖፖል አካባቢ፡- ደብረ ምጥማቅ መድኃኔዓለም፤ አቡነ ተክለ ሃማኖት፤ ቅዱስ ጊዮርጊስ

የበዓለ ጥምቀት ዝግጅት በሚዛን ተፈሪ
በሚዛን ተፈሪ ከተማ በሚዛንና አማን ክፍለ ከተማ ለሚከበረው  በዓል ከከተራው  ጀምሮ የከተማዋን ዋና መንገድ በአረንጓዴ ቢጫ ቀይ ሰንደቅ ዓላማ  የማስዋብ ስራ በከተማው የእምነቱ ተከታይ ወጣቶች ተሰርቷል:: በከተማው የዘንድሮው የበዓሉን ዝግጅት ተረኛ የሆኑት የአቡነ ተክለሀይማኖት የእናቶች አንድነት ገዳምና የቅዱስ እስጢፋኖስ ቤተ ክርስትያን ለታቦታት ማደርያና እንዲሁም ለስርኣተ ማኅሌቱና ቅዳሴው የሚከናወንበት ድንኳን በሰበካ ጉባኤያት አስተባባሪነት፣ በወጣት ሰንበት ተማሪዎች ፣ በሚዛን መዕከል አባላት፣ በሚዛን ግቢ ጉባኤያት ተማሪዎችና በአካባቢው የሚገኙ የእምነቱ ተከታይ ወጣቶች ተባባሪነት የጥምቀተ ባህር ማክበርያ ቦታ ጽዳት ከተደረገ በኋላ ድንኳንና ሌሎች አስፈላጊ ቁሳቁሶችን በማቅረብ በዓሉን ለማድመቅ ተዘጋጅተዋል::
በዓሉ የሚከበረው በሁለት የጥምቀተ ባህር ስፍራዎች ኮሶኮልና አማን ጥምቀተ ባህር ናቸው፡፡  በሚዛን ክፍለ ከተማ ከሾርሹ በዓለ ወልድ አንድ ታቦት፣ ከሚዛን ደብረ ብስራት ቅዱስ ገብርኤል ሁለት ታቦታት፣ ከሚዛን ደብረ ገነት ቅድስት ማርያም ቤተ ክርስቲያን ሁለት ታቦታት፣ ከሚዛን ማረሚያ ቤት ቅዱስ ሚካኤል  አንድ ታቦት በተለምዶ ኮሶኮል ወደሚባለው ጥምቀተ ባህር ጉዟቸውን የሚያደርጉ ሲሆን ፣ በአማን ክፍለ ከተማ ደግሞ ከደብረ መድኀኒት ቅዱስ ጊዮርጊስ ቤተ ክርስቲያን ሁለት ታቦታት፣ ከቅድስት ልደታ ለማርያም ቤተ ክርስቲያን አንድ ታቦት፣ ከደብረ ሰላም ቅድስት ኪዳነ ምህረት ቤተ ክርስቲያን ሁለት ታቦታት፣ ከዛሚቃ አባ ሳሙኤል ገዳም አንድ ታቦት፣ ከቅዱስ እስጢፋኖስ ቤተ ክርስቲያን አንድ ታቦት ፣ ከመንበረ ንግስት ቅድስት ቁስቋም ቤተ ክርስቲያን አንድ ታቦት ወደ አማን ጥምቀተ ባህር እንደሚዎጡና በአጠቃላይ ቁጥራቸው አስራ አራት የሚሆኑ ታቦታት ወደ ሁለቱ ጥምቀተ ባህር እንደሚያመሩ መረጃዎች ይጠቁማሉ::
ወጣቶች እንደተለመደው ዘንድሮም ሕዝቡ በግፍያ እንዳይጎዳና መጨናነቅ እንዳይፈጠር ታቦታት በሚያልፉበት መንገድ ላይ ምንጣፍ እየተሸከሙ በማንጠፍ ባለፉት ጊዜያት ያሳዩት የነበረው አገልግሎት ዘንድሮም ለቤተ ክርስቲያናቸውና ለእምነታቸው ያላቸውን ፍቅርና ክብር ለማሳየት ተዘጋጅተዋል፡፡ /ከሚዛን ማዕከል ሚድያ ክፍል/

የጥምቀት በዓል ዝግጅት በወልድያ
በወልድያ ከተማ የጥምቀት በዓል ከዋዜማው ጥር 10 ቀን 2006 ዓ.ም ጀምሮ በድምቀት እንደሚከበር ተገለፀ፡፡
የሰሜን ወሎ ሃገረ ስብከት የሰበካ ጉባኤ ማደራጃ ክፍል ኃላፊና የወልድያ ወረዳ ቤተ ክህነት ሥራ አስኪያጅ መልአከ ኃይል ስጦታው ሞላ የበዓሉን አከባበር አስመልክተው በሰጡት መረጃ በከተማው ውስጥ ያሉ አድባራትና በዙሪያው የገጠር አብያተ ክርስቲያናት የከተራ በዓሉን በወልድያ ታቦት ማደሪያ በአንድ ላይ ያከብራሉ፡፡
በከተማውና በዙሪያው ያሉ የ10 አብያተ ክርስቲያናት 15 ታቦታት ከቀኑ 7፡00 ጀምሮ ወደ ታቦት ማደሪያው እንደሚንቀሳቀሱና ምዕመናንም በሰዓቱ ተገኝተው የሚከብሩ ሲሆን፤ ምዕመናን በዓሉን በሰላምና በፍቅር እንዲሁም ጧሪ የሌላችውን አረጋዊያንና አሳዳጊ የሌላቸው ህፃናትን በመርዳት እንድያከብሩ ሥራ አስኪያጁ ገልፀዋል፡፡
ከባለፉት ሁለትና ሦስት ዓመታት ወዲህ በበዓላት አከባበር ወጣቱ እያሳየው ያለው ተሳትፎና ሥነ-ስርዓት እጅግ የሚያስደስት በመሆኑ በዚህ ዓመትም ተጠናክሮ እንደሚቀጥል የሚጠበቅ ሲሆን፤
ታቦታቱ ጉዞ የሚያደርጉበትን ጎዳናዎች በማፅዳት፣ ሠንደቅ ዓላማዎችን በመስቀል፣ ምንጣፍ በማንጠፍና ቄጤማ በመጎዝጎዝ ለእግዚአብሔር ያላቸውን ፍቅር እየገለፁ ይገኛሉ፡፡ በዓሉን ለማክበር ሰ/ት/ቤቶች፣ ማኅበራትና ወጣቶች ዝግጅት በማድረግ ላይ ናቸው፡፡
በአጠቃላይ በዕለቱ መዝሙር፣ ዕለቱን የተመለከተ ስብከተ ወንጌልና ልዩ ልዩ መርሐ ግብሮች ከተካሄዱ በኋላ 11፡30 ላይ ታቦታቱ ወደ ተዘጋጀላቸው ማረፊያ ይገባሉ፡፡ በዚሁ የዋዜማ በዓሉ ፍፃሜ ይሆናል፡፡ /ወልድያ ማዕከል  ሚድያ ክፍል/