Archive for month: May, 2012

ግንቦት 7/2004 ዓ.ም.

የኢትዮጵያ ኦርቶዶክስ ተዋሕዶ ቤተ ክርስቲያን በኦሮሚያ ክልል የምትገኝበት ሁኔታ ላይ ያተኮረ አውደ ጥናት ቅዳሜ ግንቦት 4 ቀን 2004 ዓ.ም. ተካሔደ፡፡ አውደ ጥናቱ በማኅበረ ቅዱሳን የኅትመትና ኤሌክትሮኒክስ ሚዲያ ዋና ክፍል አስተባባሪነት የተዘጋጀ ሲሆን በዋና ክፍሉ ስር ከሚገኙት ዴስኮች መካከል የኦሮምኛ ትርጉም ዴስክ አማካይነት ቀርቧል፡፡

የኦሮምኛ ትርጉም ዴስክ በመደበኛና በኢመደበኛ አባላት የተጠናከረ ክፍል እንደመሆኑ በኦሮሚያ ክልል ቤተ ክርስቲያናችን ምን ላይ እንደምትገኝ የሚያሳይ ጥናት ይዞ እንዲቀርብ በተሰጠው ሓላፊነት መሠረት ጥናቱን ይዞ መቅረቡን የኅትመትና ኤሌክትሮኒክስ ሚዲያ ዋና ክፍል ሓላፊ ዲ/ን ዶ/ር መርሻ አለኸኝ ገልጸዋል፡፡ የጥናቱ ዋነኛ ዓላማን አስመልክተው ቤተ ክርስቲያናችን በኦሮሚያ ክልል ያለችበት ተጨባጭ ሁኔታ መዳሰስ፤ ችግሮቹን ለመፍታት ምን መደረግ እንደሚገባና ምዕመናን በአንዳንድ እምነቶች እንዳይወሰዱ በመረጃ የተደገፈ ምላሾችን መስጠት የሚያስችል ጥናት እንደሆነ ዲ/ን ዶ/ር መርሻ አለኸኝ ጨምረው ገልጸዋል፡፡

የኦሮምኛ ትርጉም ዴስክ ሓላፊ የሆኑት ቀሲስ ምስጋናው አገሳ እንደገለጹት ዴስኩ የትርጉም ሥራዎችን በመሥራት ላይ እንደሚገኝ፣ በተለይም ከ2002 ዓ.ም. ጀምሮ በአዲስ አበባ ዙሪያ የሚገኙ ወንድሞችና እኅቶችን በማሰባሰብ ቅዱሳት መጻሕፍትን ከአማርኛ ወደ ኦሮምኛ በመተርጎም ላይ እንደሚገኙ አብራርተዋል፡፡ በዚህ ዓመትም 5 መፃሕፍትን ተርጉመው ለምእመናን ለማድረስ ጥረት እየተደረገ እንደሚገኝና ይህ ጥናት በእነዚሁ አባላት አማካይነት የተዘጋጀ መሆኑን ገልጸዋል፡፡

ጥናት አቅራቢዎቹ በኦሮሚያ ክልል ያሉ ዋና ዋና የቤተ ክርስቲያን ችግሮች ያሏቸውን የሚያሳይ የመነሻ ጽሑፍ ያቀረቡ ሲሆን ክልሉ ሰፊ እንደመሆኑ ችግሮቹም ስፋት ያላቸው ስለሆነ ተጨማሪ ጥናቶች እንደሚያስፈልጉ ገልጸዋል፡፡ ዋና ዋና ችግሮች ናቸው ያሏቸውንም በሁለት በመክፈል ውስጣዊ ችግሮችና ውጫዊ ችግሮች በማለት በዝርዝር አቅርበዋል፡፡

ውስጣዊና ውጫዊ ችግሮች ናቸው ተብለው ከተጠቀሱት ውስጥ ምዕመናን ከኦሮምኛ ቋንቋ በቀር መስማትና መናገር ባለመቻላቸው በቋንቋቸው የሚገባውን አገልግሎት መስጠትና ማግኘት ያለመቻሉ፤ ንስሐ ለመግባት በአስተርጓሚ እስከማከናወን መድረሱ፣ በቋንቋው የተዘጋጁ የቤተ ክርስቲያን ቅዱሳት መጻሕፍትና የቋንቋው ተናጋሪ አገልጋይ ያለመኖር፣ የምዕመናን ባህልና አኗኗር ማዕከል ያደረገ ሐዋርያዊ አገልግሎት መስጠት ያለመቻሉ፤ በተለያዩ እምነቶችና ባዕድ አምልኮዎች መጠመዱ…. የመሳሰሉት እንደሆኑ በጥናት አቅራቢዎቹ ተዳስሰዋል፡፡

ከተለያዩ ዋና ዋና ክፍሎች የተገኙት የማኅበሩ አባላት በጥናቱ ላይ ጥያቄዎችንና አስተያየቶችን እንዲሁም የመፍትሔ ዐሳቦችን አቅርበዋል፡፡ ከጥናቱ አቅራቢዎችም ምላሾች ተሰጥተዋል፡፡ በመጨረሻም መፍትሔዎቹን በዝርዝር ያቀረቡ ሲሆን ከእነዚህም  መካከል በክልሉ ምዕመናን በቋንቋቸው የሚገለገሉበትን ሁኔታ ማመቻቸት፣ በተወላጆቹ /በቋንቋው ተናጋሪ አገልጋዮች/ አገልግሎት እንዲያገኝ ማስቻል፣ በኦሮምኛ ቋንቋ ቅዱሳት መጻሕፍትን ማዘጋጀትና ማሰራጨት፣ አገልጋዮችን ለማፍራት ማሠልጠኛ ተቋም  መክፈት፣ በግቢ ጉባኤያት ለሚገኙ ተማሪዎች የአብነት ትምህርት መስጠት፣ ተጨባጭ ጥናቶችን በተጠናከረ ሁኔታ ማካሔድ…… የመሳሰሉትን በዝርዝር አቅርበዋል፡፡

የተገለጹት ችግሮችና ከአውደ ጥናቱ ተሳታፊዎች የቀረቡ ጥያቄዎችና የመፍትሔ ዐሳቦችን በማጠናከር ከማኅበረ ቅዱሳን ሥራ አስፈጻሚ ጋር ተነጋግሮና አጽድቆ በአፋጣኝ ወደ ትግበራ እንደሚሸጋገር ዲ/ን ዶ/ር መርሻ አለኸኝ የገለጹ ሲሆን ጥናት አቅራቢዎቹንና የየክፍሉ ተወካዩችን በአውደ ጥናቱ በመገኘታቸው አመስግነዋል፡፡

ግንቦት 3/2004 ዓ.ም.

በኢትዮጵያ ኦርቶዶክስ ተዋሕዶ ቤተ ክርስቲያን የጽርሐ ጽዮን ዘተዋሕዶ የአንድነት ኑሮ ማኅበር በ14ኛው ዙር ለ3 ወራት ያሰለጠናቸውን 47 ሰባኪያነ ወንጌልን ሚያዚያ 21 ቀን 2004 ዓ.ም. አስመረቀ፡፡ በማኅበሩ የተመሠረተው የቅዱስ ተክለ ሃይማኖት የስብከተ ወንጌል ማሰልጠኛ ተቋም በ12 የትምህርት ዓይነቶች ከጥር 21 ቀን 2004 ዓ.ም. ጀምሮ ከ16 ሀገረ ስብከቶች በተለይም ከገጠሪቱ ኢትዮጵያ ተውጣጥተው የተመረጡና እያንዳንዳቸው ከሁለት እስከ ሦስት ቋንቋ መናገር የሚችሉ ሰባኪያነ ወንጌልን ቡራዩ አካባቢ በሚገኘው በተቋሙ ግቢ ውስጥ በደመቀ መንፈሳዊ መርሐ ግብር አስመርቋል፡፡ ከተመራቂ ደቀ መዛሙርት መካከል መነኮሳት፣ ካህናት፣ መሪጌቶች፣ ዲያቆናትና የሰንበት ትምህርት ቤቶች አባላት ያካተተ ሲሆን ‹‹ለቤተ ክርስቲያናችን እጣን፣ ጧፍና ንዋያተ ቅድሳት ብቻ ሳይሆን ሰውም እንስጥ›› የሚል መመሪያ ይዞ በመነሣት በተለይም በገጠሪቱ ኢትዮጵያ እየታየ ያለውን የመምህራን እጥረት ለመቅረፍ ጥረት እያደረገ እንደሚገኝ አቶ ማናዬ አባተ የማኅበሩ መንፈሳዊ አገልግሎት መምሪያ ሓላፊ በሪፖርታቸው ገልጸዋል፡፡

በምረቃ መርሐ ግብሩ ላይ ብፁዕ አቡነ ኤጲፋንዮስ የምዕራብ ሸዋ ሀገረ ስብከት ሊቀ ጳጳስና የቅዱስ ሲኖዶስ አባል እንዲሁም ሊቀ ካህናት ክንፈ ገብርኤል አልታዬ የሊቃውንት ጉባኤ አባል ተገኝተዋል፡፡ ብፁዕ አቡነ ኤጲፋንዮስ ባስተላለፉት ቃለ ምዕዳን ‹‹ማኅበሩ እያደረገ ያለውን ጥረት ለሌሎች አርአያ የሚሆንና ቅድስት ቤተ ክርስቲያናችን ደጋፊ አገኘች የምንልበት ነው” በማለት ገልጸዋል፡፡ ለተመራቂ ደቀ መዛሙርትም “ጽርሐ ጽዮን ዘተዋሕዶ የአንድነት ኑሮ ማኅበር እናንተን በወንጌሉ ቃል እንዳስታጠቃችሁ በሔዳችሁበትና በደረሳችሁበት ስፍራ ሁሉ የጠፉትን ወገኖቻችን የተበተኑትን አንድ በማድረግ ለቅድስት ቤተ ክርስቲያን ውለታ ለትመልሱ ይገባል” በማለት አደራቸውን አስተላልፈዋል፡፡ ሊቀ ካህናት ክንፈ ገብርኤል አልታዬ ተመራቂ ደቀ መዛሙርቱን ካስተማሩ አባቶች መካከል አንዱ ሲሆኑ ባስተላለፉት መልእክት “ግራኝ መሐመድ እንደተሸነፈ ልክ እንደዛሬው ማኅበረ ቅዱሳንና ማኅበረ ጽርሐ ጽዮን ዘተዋሕዶ ኖረው ቢሆን ኖሮ ኢትዮጵያ እስከ ዛሬ አፍሪካን ታጠምቅ ነበር፡፡” በማለት የማኅበሩን ጥረት አበረታተዋል፡፡

የማኅበሩ አባላት ልጆቻቸው ሃይማኖታቸውን ጠንቅቀው እንዲያውቁ በማድረግ ረገድ በየሰንበት ትምህርት ቤቶች አገልግሎት ላይ የሚሳተፉ ሲሆን በዕለቱ በመድረክ ላይ ያሬዳዊ ዝማሬን አቅርበዋል፡፡ ተመራቂ ደቀ መዛሙርትም አስር በሚደርሱ ቋንቋዎች ያሬዳዊ ዝማሬ ያቀረቡ ሲሆን የተማሩትን ትምህርት በተግባር ላይ እያዋሉ ስለመሆናቸው ምስክር ይሆን ዘንድ በአንድ ተመራቂ ደቀ መዝሙር ትምህርተ ወንጌል ተሰጠቷል፡፡

የጽርሐ ጽዮን ዘተዋሕዶ የአንድነት ኑሮ ማኅበር ከሰንበት ትምህርት ቤቶች የተወጣጡና በአንድነት በመኖር ስብከተ ወንጌልን ለማስፋፊት ጽኑ አላማ ባላቸው ምእመናን የካቲት 23 ቀን 1980 ዓ.ም. የተመሠረተ ሲሆን በኢትዮጵያ ኦርቶዶክስ ተዋሕዶ ቤተ ክርስቲያን መንበረ ፓትርያርክ ጠቅላይ ቤተ ክህነት ጽ/ቤትና ቀደም ሲል ከፍትህ ሚኒስቴር አሁን ደግሞ ከፌደራል ጉዳዮች ሚኒስቴር ሕጋዊ እውቅና አግኝቶ በመንቀሳቀስ ላይ የሚገኝ መንፈሳዊ ማኅበር ነው፡፡ ከ1984 ዓ.ም. ጀምሮ የመለከት መጽሔትን በማሣተምና በማሰራጨት፤ በአካባቢው ለሚገኙ ረዳት ለሌላቸው አረጋውያንና ወላጅ አልባ ለሆኑ ሕፃናት የዕለት ምግብ በመስጠት፤ የትምህርት ቤት የደንብ ልብስና የትምህርት መሣሪያዎች ድጋፍ በማድረግ ፤አቅም ለሌላቸው በማኅበሩ ዘመናዊ ት/ቤት በአነስተኛ ክፍያ በማስተማር ላይ ይገኛል፡፡

በጎ አድራጊ ምዕመናንን በማስተባበር ባለ ሁለት ፎቅ ዘመናዊ ሕንፃ በማጠናቀቅ ላይ የሚገኝ ሲሆን በዓመት ሁለት ጊዜ የሚካሔደውን የሰባኪያነ ወንጌል ሥልጠናን በአንደኛው ፎቅ ላይ በመስጠት ላይ ይገኛል፡፡ አስር የማደሪያ ክፍሎች ሲኖሩት በአንድ ዓመት በ2 ዙር እስከ 120 ደቀ መዛሙርትን ማሰልጠን ያስችላል፡፡ የመጸዳጃ ቤት፣ የገላ መታጠቢያ፣ የምግብ ማብሰያና በአንድ ጊዜ ከ500 ሰው በላይ ማስተናገድ የሚያስችል አዳራሽ የያዘ ነው፡፡ ስልጣገኞቹ ሙሉ የሕክምና ወጪ፤ የትምህርት መሣሪያዎች ድጋፍ በቀን 3 ጊዜያት የሚመገቡት ምግብ በማኅበሩ ይሸፈናል፡፡ ሕንፃው ሙሉ ለሙሉ ሲጠናቀቅ የቅዱስ ተክለ ሃይማኖት የሰባኪነ ወንጌል ማሰልጠኛ ተቋም በዓመት በ3 ዙር የሰባኪያነ ወንጌል ሥልጠና ለመስጠት እንቅስቃሴ በማድረግ ላይ እንደሚገኝና ማኅበሩ እስከ አሁን ድረስ በ14 ዙር ሥልጠናዎች 612 ሰባኪያነ ወንጌል ማሰልጠኑን መንፈሳዊ አገልግሎት መምሪያ ሓላፊው አቶ ማናዬ አባተ በሪፖርታቸው ገልጸዋል፡፡ ሠልጣናቹ የዘመናዊ ትምህርት ተማሪ ከሆኑ 10ኛ ክፍልና ከዚያ በላይ፣ የአብነት ተማሪ ከሆኑ በዘመናዊው ትምህርት ስድስተኛ ክፍልና ከዚያ በላይ የሆኑትን ከየሀገረ ስብከቱ የሚመረጡበት መስፈርት ሲሆን በተጨማሪም ቅድስት ቤተ ክርስቲያንን ለማገልገል የወሰኑና የአካባቢውን ቋንቋ መስማትና መናገር የሚችሉ መሆን አለባቸው፡፡

ከደቡብ ኦሞ ጂንካ ሀገረ ስብከት አንቀጸ ብጹአን አቡነ ተክለ ሃይማሃት ቤተ ክርስቲያን የመጡት አባ ኃ/ሚካኤል በድሉ ከተመራቂ ደቀ መዛሙርት መካከል አንዱ ናቸው፡፡ “አካባቢያችን በመናፍቃን የተከበበ ነው፡፡ ምዕመናንም ሆኑ ካህናት ብዙ እውቀት የለንም፡፡ መናፍቃንን የምናሸንፍበት ትምህርት አጥተን ብዙዎች ተወስደውብናል፡፡ በሥልጠናው በነፃ የተቀበልነውን እውቀት በነፃ ለወገኖቻችን እናስተምራለን” በማለት አስተያየታቸውን ሰጥተዋል፡፡

ከምዕመናን መካከል ከጉጂ ቦረናና ሊበን ሀገረ ስብከት ሜጋ ቅዱስ ሚካኤል ሰበካ ጉባኤ አባል የሆኑት አቶ ከበደ ተሰማ ርቀት ሳይገድባቸው እዚህ ድረስ የመጡት ከሚያገለግሉበት ቤተ ክርስቲያን ተመርጠው ለሰልጠናው የመጡትን ተመራቂ ደቀ መዛሙርትን ለመቀበል እንደሆነና አካባቢያቸውን አስመልክተው ባደረጉት ገለፃ “ያለንበት አካባቢ እጅግ ኋላ ቀር ነው፡፡ ኬንያ ድንበር ላይ ነው የምንገኘው፡፡ የአገልጋዮች እጥረት ያለበትና ቦታውም አመቺ ያልሆነ ነው፡፡ የጽርሐ ጽዮን ዘተዋሕዶ የአንድነት ኑሮ ማኅበር ደርሶልን ከጭንቅ እየገላገለን ነው፡፡ ወደፊትም ትብብራችሁ እንዳይለየን” በማለት ተማጽነዋል፡፡

ተመራቂ ደቀ መዛሙርት ከብፁዕ አቡነ ኤጲፋንዮስ እጅ የምስክር ወረቀትና መጽሐፍ ቅዱስ ተቀብለዋል፡፡ የመጽሐፍ ቅዱስ ስጦታ የደብረ አሚን ተክለ ሃይማኖት ቤተ ክርስቲያን ምክሐ ደናግል ማርያም ሰንበት ትምህርት ቤት በስጦታ የተገኘ ስለመሆኑ ከሓላፊዎቹ የተገለጸ ሲሆን  ደቀ መዛሙርቱን ለማፍራት በተደረገ ጥረት ውስጥ ደከመን ሰለቸን ሳይሉ ሥልጠናውን ለሰጡ አካላት ማኅበሩ ምስጋናውን በእግዚአብሔር ስም አቅርቧል፡፡

ግንቦት 2/2004 ዓ.ም.

በ እንዳለ ደምስስ

የእመቤታችን ቅድስት ድንግል ማርያም በዓለ ልደትና የማኅበረ ቅዱሳን 20ኛ ዓመት ምሥረታ እሑድ ሚያዚያ 28 ቀን 2004 ዓ.ም. በጠቅላይ ቤተ ክህነት ስብከተ ወንጌል አዳራሽ በድምቀት ተከበረ፡፡ “ለሁለንተናዊ የቤተ ክርስቲያን እድገት አብረን እንሥራ በሚል መሪ ቃል በማኅበረ ቅዱሳን ህዝብ ግንኙነት ክፍል የተዘጋጀው መርሐ ግብር በብፁዓን ሊቃነ ጳጳሳት በጸሎት ተጀምሮ በዝማሬ በስብከተ ወንጌል አገልግሎትና በብፁዓን ሊቃነ ጳጳሳት ምክር ተካሒዷል፡፡

በመርሐ ግብሩ ላይ ብፁዕ አቡነ ሉቃስ የምዕራብ ትግራይ ሴቲት ሁመራ ሀገረ ስብከት ሊቀ ጳጳስ፣ ብፁዕ አቡነ ቀውስጦስ የአዲስ አበባና የሰሜን ሸዋ ሰላሌ ሀገረ ስብከት ሊቀ ጳጳስ፣ ብፁዕ አቡነ ኤልያስ የጋሞ ጎፋ ሀገረ ስብከት ሊቀ ጳጳስ፣ ብፁዕ አቡነ ሔኖክ የምዕራብ ወለጋ ጊምቢና አሶሳ ሀገረ ስብከት ሊቀ ጳጳስ፣ ብፁዕ አቡነ ዲዮስቆሮስ የደቡብ ትግራይ ማይጨው ሀገረ ስብከት ሊቀ ጳጳስ ተገኝተዋል፡፡

 

በዕለቱ የተጉኙት ሊቃነ ጳጳሳት ማኅበረ ቅዱሳን አስመልክቶ እንዲህ በማለት ገልጸው ነበር፡፡ “የፈተና ጊዜ ነው ፈተናውን የምናልፈው በእግዚአብሔር ረድኤት ነው እግዚአብሔርን በመከተል ነው፡፡ ሌላ ኀይል የለንም፡፡…. እናንተ እግዚአብሔርን መከተል መርጣችኋልና መጨረሻችሁን እግዚመብሔር ያሳመርላችሁ፡፡ በርቱ፡፡” ብፁዕ አቡነ ቀውስጦስ፡፡/

 

“የዚህ ታላቅ፣ ታሪካዊ፣ ሃይማኖታዊ፣ ሥርዓታዊ፣ መንፈሳዊና ሰዋዊ ማኅበር አካላት ሁሉ ሥራ እየሠራችሁ ነው እዚህ የደረሳችሁት ምርት እያመረታችሁ ያላችሁባቸው ዓመታት ምርታችሁንም እያያችሁና እየተጠቀማችሁበት የምትገኙበት ዕለት ነውና እንኳን አደረሳችሁ” /ብፁዕ አቡነ ሉቃስ/

 

ይህ ማኅበር 20 ዓመታት ሲጓዝ እግዚአብሔር ስለረዳው እግዚአብሔር ከማኅበሩ ጋር ስለሆነ እንደ ኤማሁስ መንገደኞች እግዚአብሔር ስለመራው ነው ዛሬ 20ኛውን ዓመት ለማክበር የበቃው በርቱ፡፡ /ብፁዕ አቡነ ዲዮስቆሮስ/

 

ብፁዕ አባታችን አቡነ ጎርጎርዮስ ሊሞቱ ሲሉ ካስተማሯቸው ተማሪዎቻቸው /ማኅበረ ቅዱሳንን ከመሠረቱት/ መካከል ሁለቱን፣ አንዱን በቀኝ አንዱን በግራ አቅፈው፣ ጸሎት አድርገው የሁለቱን ራስ አጋጭተው በመያዝ” በሉ ልጆቼ መቃብሬ ላይ እናንተ ናችሁ የምታለቅሱት እኔ ለኩሼዋለሁ እናንተ አንድዱት አሏቸው ለአትክልተ ጎርጎርዮስ፡፡ የቤተ ክርስቲያናችን መሠረታዊ ምንጭና ግንድ ኢየሱስ ክርስቶስ ቢሆንም የማኅበረ ቅዱሳን ግንድ ደግሞ አቡነ ጎርጎርዮስ ናቸው፡፡ ቅዱስ ሲኖዶስ የሚገባውን ምግብ እያበላና እያጠጣ እዚህ ያደረሰው ማኅበር ነው፡፡” /ብፁዕ አቡነ ኤልያስ/

 

የማኅበሩ ሰብሳቢ  ሊቀትጉሃን ቀሲስ ዶ/ር ሙሉጌታ ስዮም እንደገለጹት ከ1980 ዓ.ም. ጀምሮ በብፁዕ አቡነ ጎርጎርዮስ ካልዕ በዝዋይ ካህናት ማሠልጠኛ ተተኪ ሰባኪያንን ለማፍራት ባደረጉት ጥረት ለመጀመሪያ ጊዜ ከግቢ ጉባኤያት 12 ተማሪዎችን በማሠልጠን ጀመረ፡፡ ዛሬ ይህ ጥረት አድጎ በጅማ፣ በአዋሳ፣ በድሬዳዋ፣ በባሕርዳርና በማይጨው ሥልጠናው ተጠናክሮ በመቀጠል በሺዎች የሚቆጠሩ መምህራንን ማፍራት ተችሏል፡፡ ብለዋል፡፡ አያይዘውም በመላው ዓለም በአገር ውስጥና በውጪ  የማኅበረ ቅዱሳንን እንቅስቃሴ ሲገልጹ ማኅበረ ቅዱሳን 44 ማዕከላት፣ 333 ወረዳ ማዕከላት 181 ግንኙነት ጣቢያዎች 325 የከፍተኛ ትምህርት ተቋማት ግቢ ጉባኤያትን በማስተባበርና በመምራት ላይ እንደሚገኝ ገልጸዋል፡፡ ከምዕመናን ማኅበረ ቅዱሳንን አስመልክቶ ለተጠየቁ ጥየቄዎች የማኅበሩ ዋና ጸሓፊ ዲ/ን ሙሉጌታ ኃ/ማርያም ምላሽ ሰጥተዋል፡፡

 

በመርሐ ግብሩ ላይ ከመምህር ቀሲስ እሸቱ ታደሰ ትምህርተ ወንጌል የተሰጠ ሲሆን  የማኅበሩ መዝሙር ክፍል አባላት የአቡነ ጎርጎርዮስ የትምህርት ማዕከል ሕፃናት ተማሪዎች፣ እንዲሁም የከፍተኛ ትምህርት ተቋማት ግቢ ጉባኤያት መዘምራን ያሬዳዊ ዝማሬ በየተራ አቅርበዋል፡፡ በመጨረሻም በብፁዕ አቡነ ኤልያስ ቡራኬ የመርሐ ግብሩ ፍፃሜ ሆኗል፡፡