ስብከት – Page 63 – በኢ/ኦ/ተ/ቤ/ክ/በሰ/ት/ቤቶች ማ/መምሪያ

በንባብ ባሕል ላይ ያተኮሩ ጥናታዊ ጽሑፎች ይቀርባሉ

ሰኔ 23 ቀን 2006 ዓ.ም.

በእንዳለ ደምስስ

የንባብ ባሕልን ለማሳደግ በሚቻልበት ሁኔታ ላይ ያተኮሩ ጥናታዊ ጽሑፎች በማኅበረ ቅዱሳን ጥናትና ምርምር ማእከል አዘጋጅነት ሰኔ 28 ቀን 2006 ዓ.ም ከ8፡00-11፡00 ሰዓት በማኅበሩ ሕንፃ ላይ እንደሚቀርቡ ማእከሉ አስታወቀ፡፡

በአዲስ አበባ ዩኒቨርስቲ ምሁራን የሚቀርቡት ጥናታዊ ጽሑፎች ሁለት ሲሆኑ፤ “ትርጉም ያለው የንባብ ባሕል”፤ እንዲሁም “የንባብ ባሕልን ለማሳደግ የተለያዩ አካላት ሚና” በሚሉ ርእሰ ጉዳዮች ላይ ትኩረት እንደሚያረጉ የጥናትና ምርምር ማእከሉ ምክትል ዳይሬክተር አቶ ሰይፈ አበበ ገልጸዋል፡፡

ትርጉም ያለው ንባብ ምንድን ነው? የንባብ ባሕልን ያሳደጉ አገራት ልምድ ምን ይመስላል? የንባብ ልምድ በሀገራችን እና በኢትዮጵያ ቤተ ክርስቲያን ምን እንደሚመስሉ በጥናቶቹ ይዳሰሳሉ፡፡

የማኅበረ ቅዱሳን ጥናትና ምርምር ማእከል በየዓመቱ በሀገራችን የንባብ ባሕልን ለማበረታታት ከሚያዘጋጀው የመርሐ ግብር አካል አንዱ ሲሆን፤ ጥናቶቹም የንባብ ባሕላችን ምን ላይ እንደሚገኝ የሚዳስሱና የሚያነብ ትውልድን ለመፍጠር ምን መደረግ እንዳለበት የሚያመላክቱ መሆናቸውን አቶ ሰይፈ ጠቁመዋል፡፡

ይህ የንባብ ጉባኤ ለሦስተኛ ጊዜ የተዘጋጀ ሲሆን፤ በመርሐ ግብሩ በንባብ ባሕል ላይ የሚሠሩ አካላት፣ ምሁራን፤ የማኅበረ ቅዱሳን አባላት እና ጥሪ የተደረገላቸው አካላት፤ እንዲሁም ምእመናን ተሳታፊ ይሆናሉ፡፡

የማቴዎስ ወንጌል

ሰኔ 16 ቀን 2006 ዓ.ም.

ምዕራፍ ሁለት

በዚህ ምዕራፍ ውስጥ የምንረዳውና የምንገነዘበው ጌታ በይሁዳ ቤተልሔም በንጉሥ ሄሮድስ ዘመን እንደተወለደ እንረዳለን፡፡ ቤተልሔም ማለት ቤተ ኅብስት ማለት ነው፡፡ ስምዋም የተሰየመው ካሌብ ኤፍራታ የተባለች ሚስት አግብቶ ወንድ ልጅ ከኳ በወለደ ጊዜ እንጀራ እገባ እገባ ብሎት ስለነበር የልጁን ስም ልሔም /ኅብስት/ አለው፡፡ በልሔም ቤተልሔም ተብላለች፡፡

የጥበብ ሰዎች ከሩቅ ምሥራቅ መጥተው የበረከት ሳጥናቸውን ከፍተው ለጌታ ገጸ በረከት አበርክተውለታል፡፡

ወርቅ-ለመንግሥቱ
ዕጣን ለክህነቱ
ከርቤ- ለመራራ ሞቱ፡፡ ምሳሌ ናቸው፡፡

ሰብዓ ሰገል ከሄዱ በኋላ ጌታ ሄሮድስ ሊገድለው ስለሚፈልገው አስቀድሞ በነብያት በተነገረው መሠረት ወደ ግብፅ ተሰደደ ሆሴ.11፡1፡፡

ንጉሡ ሄሮድስም ጌታን ያገኘ መስሎት 144ሺ የቤተልሔም ሕፃናትን አስፈጅቷል፡፡ ከሔሮድስ ሞት በኋላ ጌታ ከስደት ተመለሰ የስደት ዘመኑ 3 ዓመት ከመንፈቅ ነበር፡፡ ራዕይ 12፡7፡፡

እድገቱንም በነቢያት አስቀድሞ እንደተነገረው በናዝሬት ከተማ አደረገ፡፡ ናዝሬት የወንበዴዎች የቀማኞች የተናቁ ሰዎች ከተማ ነበረች፡፡ ጌታም ወደ ተዋረድነው ወደ እኛ መጥቶ ከውርደት ሊያድነን መሆኑን ሊያስገነዝበን በናዝሬት ኖረ፡፡

ምንጭ፡- ስምዐ ጽድቅ ጋዜጣ 3ኛ ዓመት ቁጥር 1 ታኅሥሥ 1988 ዓ.ም.

ማኅበረ ቅዱሳን በኦሮምኛ ቋንቋ የድረ – ገጽ አገልግሎት ሊጀምር ነው

ሰኔ 13 ቀን 2006 ዓ.ም

በእንዳለ ደምስስ

በማኅበረ ቅዱሳን የኅትመትና ኤሌክትሮኒክስ ሚዲያ ዋና ክፍል የኦሮምኛ ድረ ገጽ አገልግሎት በቅርቡ እንደሚጀምር የዋና ክፍሉ ሓላፊ ዲያቆን ዶ/ር መርሻ አለኸኝ ገለጹ፡፡

ማኅበረ ቅዱሳን የኢትዮጵያ ኦርቶዶክስ ተዋሕዶ ቤተ ክርስቲያንን ዶግማ፤ ቀኖና እና ትውፊት የጠበቁ ትምህርቶችን በኦሮምኛ ቋንቋ በተለያዩ የመገናኛ ብዙኀን ዘዴዎች ለምእመናን ለማሰራጨት እቅድ ከያዘ መቆየቱን የገለጹት ዲያቆን ዶ/ር መርሻ፤ የድረ ገጽ አገልግሎቱ ቅድሚያ ተሰጥቶት ለምእመናን ተደራሽ እንደሚሆን አስታውቀዋል፡፡

በዚህም መሠረት “በጥቂት ሳምንታት ውስጥ የኦሮምኛ ድረ ገጽ አገልግሎት መስጠት የሚጀምር ሲሆን፤ ወደፊት የኅትመትና የብሮድካስት ዝግጅቶችን ለምእመናን ለማዳረስ ማኅበሩ ፕሮጀክቶችን ቀርጾ ተግባራዊ ያደርጋል” ብለዋል፡፡

የኦሮምኛ ዝግጅት ንዑስ ክፍል አስተባባሪ ዲ/ን መዝገቡ ከፍያለው ለኦሮምኛ ድረ ገጽ መከፈት ምክንያት ናቸው ያሏቸውን ሲገልጹ “በኦሮሚያ ክልል ምእመናን ስለ እምነታቸው በቋንቋቸው መማር አለመቻላቸው፤ በቋንቋው የተዘጋጁ ሃይማኖታዊ የኅትመትና የኤሌክትሮኒክስ ሚዲያ ውጤቶች አለመኖር እና ምእመናን በሌሎች የእምነት ተቋማት መወሰዳቸው ነው” በማለት ጠቅሰዋል፡፡

እነዚህን ዘርፈ ብዙ ችግሮች ለመፍታት እና ያሉትን ምእመናን ለማጽናት፤ የጠፉትንም ለመመለስ እንዲቻል ከዐውደ ምሕረት ስብከት በተጨማሪ በመገናኛ ብዙኀን ዘዴዎች ወደ ምእመናን ለመድረስ አዲስ የተዘጋጀው ማኅበራዊ ድረ ገጹ አስተዋጽኦ ከፍተኛ እንደሆነ ታምኖበታል፡፡

በድረ ገጹም ትምህርተ ሃይማኖት፤ የቤተ ክርስቲያን ታሪክ፤ ነገረ ቅዱሳን፤ ስብከት፤ ለጥያቄዎች ምላሽ /ከምእመናን ለሚጠየቁ ጥያቄዎች ምላሽ የሚሰጥበት/፤ መዝሙር እና ኪነጥበብ ወዘተ. . . የተካተቱበት ሥራዎች እንደሚቀርቡ ዲ/ መዝገቡ ጨምረው ገልጸዋል፡፡

የድረ ገጹ አድራሻ፡- www.eotcmk.org/afaanoromo

በተያያዘ ዜና ከዚህ ቀደም ተቋርጦ የነበረው የእንግሊዝኛ ድረ ገጽ በቅርቡ የሚጀምር ሲሆን፤ የድረ ገጹ አድራሻ፡- www.eotcmk.org/site-en መጎብኘት ይቻላል፡፡

ለማእከላት ሓላፊዎች የአቅም ማጎልበቻ ሥልጠና ተሰጠ

ሰኔ 12 ቀን 2006 ዓ.ም.

በሕዝብ ግንኙነት አገልግሎት

ማኅበረ ቅዱሳን ለማእከላት፤ ለማስተባበሪያ ጽ/ቤት ሓላፊዎችና አስተባባሪዎች ከሰኔ 10- 11 ቀን 2006 ዓ.ም. ሁለት ቀናት የቆየ የአቅም ማጎልበቻ ሥልጠና ሰጠ፡፡

በሥልጠናው ከሀገር ውስጥና ከውጪ የተውጣጡ የ25 ማእከላት ጸሐፊዎች፤ የማስተባበሪያ ጽ/ቤት ሓላፊዎች፤ የግቢ ጉባኤያት አስተባባሪዎችና መምህራን መካፈላቸውን የማኅበረ ቅዱሳን የሰው ሀብት ሥራ አመራርና ጠቅላላ አገልግሎት ክፍል ሓላፊ አቶ ዳንኤል ተስፋዬ ገልጸዋል፡፡

ለሁለት ቀናት የቆየው ሥልጠና የግንኙነት ክህሎትን ማዳበር፤ የመረጃ አያያዝና አጠቃቀም እና የሕዝብ ግንኙነት አገልግሎትን ያካተተ ሲሆን፤ ሠልጣኞች የተሻለ አገልግሎት ለማበርከት እንደሚረዳቸው አቶ ዳንኤል ተናግረዋል፡፡
ሠልጣኞቹ በበኩላቸው ለሁለት ቀናት የተሰጣቸው ሥልጠና በአገልግሎት ላይ የሚታዩ ክፍተቶችን የሚሞላ ከመሆኑም ባሻገር፤ ከአባቶችና ከምእመናን ጋር ያላቸውን ግንኙነት ለማጠናከር እንደሚያግዛቸው ጠቁመዋል፡፡

ከሥልጠናው ጋር በተያያዘም የልምድ ልውውጥና ውይይት ተደርጓል፡፡

ሥልጠናውን በማኅበረ ቅዱሳን የሰው ሀብት ሥራ አመራርና ጠቅላላ አገልግሎት፤ የሀገር ውስጥ ማእከላትና የግቢ ጉባኤያት ማደራጃና ማስተባበሪያ ዋና ክፍል አዘጋጅተውታል፡፡

ለማእከላት ሓላፊዎች የአቅም ማጎልበቻ ሥልጠና ተሰጠ

ሰኔ 12 ቀን 2006 ዓ.ም.

በሕዝብ ግንኙነት አገልግሎት

ማኅበረ ቅዱሳን ለማእከላት፤ ለማስተባበሪያ ጽ/ቤት ሓላፊዎችና አስተባባሪዎች ከሰኔ 10- 11 ቀን 2006 ዓ.ም. ሁለት ቀናት የቆየ የአቅም ማጎልበቻ ሥልጠና ሰጠ፡፡

በሥልጠናው ከሀገር ውስጥና ከውጪ የተውጣጡ የ25 ማእከላት ጸሐፊዎች፤ የማስተባበሪያ ጽ/ቤት ሓላፊዎች፤ የግቢ ጉባኤያት አስተባባሪዎችና መምህራን መካፈላቸውን የማኅበረ ቅዱሳን የሰው ሀብት ሥራ አመራርና ጠቅላላ አገልግሎት ክፍል ሓላፊ አቶ ዳንኤል ተስፋዬ ገልጸዋል፡፡

ለሁለት ቀናት የቆየው ሥልጠና የግንኙነት ክህሎትን ማዳበር፤ የመረጃ አያያዝና አጠቃቀም እና የሕዝብ ግንኙነት አገልግሎትን ያካተተ ሲሆን፤ ሠልጣኞች የተሻለ አገልግሎት ለማበርከት እንደሚረዳቸው አቶ ዳንኤል ተናግረዋል፡፡

ሠልጣኞቹ በበኩላቸው ለሁለት ቀናት የተሰጣቸው ሥልጠና በአገልግሎት ላይ የሚታዩ ክፍተቶችን የሚሞላ ከመሆኑም ባሻገር፤ ከአባቶችና ከምእመናን ጋር ያላቸውን ግንኙነት ለማጠናከር እንደሚያግዛቸው ጠቁመዋል፡፡

ከሥልጠናው ጋር በተያያዘም የልምድ ልውውጥና ውይይት ተደርጓል፡፡

ሥልጠናውን በማኅበረ ቅዱሳን የሰው ሀብት ሥራ አመራርና ጠቅላላ አገልግሎት፤ የሀገር ውስጥ ማእከላትና የግቢ ጉባኤያት ማደራጃና ማስተባበሪያ ዋና ክፍል አዘጋጅተውታል፡፡

ጉባኤ ቃና

የደብረ ሊባኖስ ገዳምን ለመታደግ ጥሪ ቀረበ

ሰኔ 10 ቀን 2006 ዓ.ም.

በእንዳለ ደምስስ

የደብረ ሊባኖስ አቡነ ተክለ ሃይማኖት አንድነት ገዳም ያጋጠሙትን በርካታ ችግሮች ለመታደግ ዘላቂ መፍትሔ መሻት እንደሚገባ ሰኔ 8 ቀን 2006 ዓ.ም. በጠቅላይ ቤተ ክህነት ስብከተ ወንጌል አዳራሽ በተካሔደ የገቢ ማሰባሰቢያ መርሐ ግብር ጥሪ ቀረበ፡፡

ብፁዕ አቡነ ቀውስጦስ የሰሜን ሸዋ ሰላሌ ሀገረ ስብከት ሊቀ ጳጳስ ገዳሙ ያለበትን ችግር አስመልክቶ ሲገልጹ “የደብረ ሊባኖስ ገዳም የኢትዮጵያዊያን ሁሉ ገዳምና ሀብት ነው፡፡ ገዳምነቱን ሊሸረሽሩ የሚችሉ በርካታ ችግሮች አጋጥመውታል፡፡ እነዚህን ችግሮች ለመፍታትና የአባቶች የጸሎት ቦታ ተጠብቆ እንዲቆይ በርካታ ሥራዎች እየተሠሩ ስለሆነ ምእመናን ድጋፍ ማድረግ ይጠበቅባቸዋል” ብለዋል፡፡

የገዳሙ አስተዳዳሪ ፀባቴ አባ ወልደ ማርያም አድማሱ የጉዳዩ አሳሳቢነትና ሊወሰድ ስለሚገባው አፋጣኝ መፍትሔ ሲያብራሩ “ገዳሙ ጊዜ የማይሰጥ፤ የቤተ ክርስቲያኑን ሕልውና የሚፈታተኑ በርካታ ችግሮች ከፊት ለፊት ተደቅነውበታል፡፡ ከተራራማው አካባቢ ወደ ታች በሚወርደው ጎርፍ መሬቱ እየተንሸራተተና እየተሰነጠቀ ነው፡፡ የገዳማውያኑና የምእመናን ቦታዎች ያለመለየት፤ ሕገ ወጥ የመሬት ወረራ፤ የገዳሙ ወደ ከተማነት እየተቀየረ መምጣት፤ የአካባቢያዊ ንጽሕና መጓደልና ሌሎችም ችግሮች አሉብን” ሲሉ ገልጸዋል፡፡፡

ገዳሙ ገዳማዊ ሕይወቱን ጠብቆ እንዲዘልቅ በማኅበረ ቅዱሳን ባለሙያዎች ጥናት ተካሒዶ፤ ፕሮጀክቶች ተቀርጸው ሥራዎች እየተሠሩ እንደሚገኙ የሚናገሩት ፀባቴ አባ ወልደ ማርያም፤ በተዘጋጀው ፕሮጀክት መሠረት የመጸዳጃ ቤትና የጎርፍ መከለያ ግንባታ በማከናወን ላይ እንደሚገኙ ያስረዳሉ፡፡ ምእመናን ይህንን በመረዳት የታቀዱት ፕሮጀክቶች ጊዜያቸውን ጠብቀው እንዲተገበሩም የበኩላቸውን ድጋፍ እንዲያደርጉ ጥሪያቸውን አስተላልፈዋል፡፡

በደብረ ሊባኖስ አቡነ ተክለ ሃይማኖት አንድነት ገዳም ሊተገበሩ የታቀዱት 11 ፕሮጀክቶች መሆናቸውን በመጥቀስ ለጉባኤው በዝርዝር ያቀረቡት ኢንጂነር ዮናስ ምናሉ እስካሁን ድረስ ኣፋጣኝ እርምጃ ባለመወሰዱም በጎርፍ ዐራቱ ተግባር ቤቶች፤ የመናንያኑ መኖሪያዎች፤ እንዲሁም ድልድዩ ጉዳት እንደደረሰባቸውና፤ የቤተ ክርስቲያኑንም መሠረት እየቦረቦረው እንደሚገኝ ገልጸዋል፡፡

በገቢ ማሰባሰቢያ መርሐ ግብሩ ላይ ብፁዓን ሊቃነ ጳጳሳት፤ የአድባራት አስተዳዳሪዎች ተገኝተው የገንዘብ ድጋፍ ያደረጉ ሲሆን፤ ምእመናን የድጋፍ ማድረጊያ ቅጽ እንዲሞሉ ተደርጓል፤ ጨረታም ተካሒዷል፡፡ ይህ ጉባኤ የመጀመሪያ መሆኑንና በቀጣይነት የሚካሄዱ የገቢ ማሰባሰቢያና ሌሎች ዝግጅቶች እንደሚኖሩም ተጠቅሷል፡፡

የማኅበረ ቅዱሳን መዝሙር ክፍል አባላትና የገነተ ጽጌ ቅዱስ ጊዮርጊስ ሰንበት ትምህርት ቤት መዘምራን ያሬዳዊ ዝማሬ፤ እንዲሁም በገጣሚያን ግጥም ቀርቧል፡፡

የደብረ ሊባኖስ ገዳም የልማት ፕሮጀክት ትግበራ በመፋጠን ላይ ይገኛል

ሰኔ 5 ቀን 2006 ዓ.ም.

በእንዳለ ደምስስ

ሰኔ 8 ቀን 2006 ዓ.ም. በጠቅላይ ቤተ ክህነት አዳራሽ የገቢ ማሰባሰቢያ ጉባኤ ይካሔዳል፡፡

በደብረ ሊባኖስ አቡነ ተክለ ሃይማኖት አንድነት ገዳም በ2004 ዓ.ም. በገዳሙና በማኅበረ ቅዱሳን ባለሙያዎች ተጠንቶ የቀረበው የገዳሙ ሁለንተናዊ የልማት ፕሮጀክት ተግባራዊ በመሆን ላይ እንደሚገኝ የገዳሙ የልማት ኮሚቴ ገለጸ፡፡

የጥናት ቡድኑ በገዳሙ የሚታዩትን ዋና ዋና ችግሮች በመለየትና ጥናት በማካሔድ፤ የፕሮጀክት ሰነድ በማዘጋጀት ወደ ተግባር ለመሸጋገር በርካታ ሥራዎችን ሲሠራ ቆይቷል፡፡

በጥናቱ ተለይተው የተያዙትን ችግሮች ለመቅረፍ በሦስት ዙር የተከፈሉ ሲሆን፤ በመጀመሪያው ዙር የብዝኀ ሕይወት ጥበቃ፤ የአፈርና የውኃ ጥበቃ፤ የመነኮሳት መኖሪያ ግንባታ፤ የመጸዳጃ ቤትና የአካባቢ ጽዳት ፕሮጀክቶች ተግባራዊ ይደረጋሉ፡፡ በሁለተኛው ዙር የአብነት ትምህርት ቤት ግንባታ (የተማሪዎች መኖሪያና መመገቢያ፤ የመምህራን መኖሪያ፤ ቤተ መጻሕፍትና የምርምር ማእከል) የያዘ ነው፡፡ በሦስተኛ ዙር የጤና ጣቢያ፤ የሁለገብ ሕንፃ፤ የዘመናዊ ትምህርት ቤት ግንባታ ፕሮጀክቶች ተግባራዊ የሚደረጉበት መሆኑ የፕሮጀክት ሰነዱ ያመለክታል፡፡

የጎርፍና የመሬት መንሸራተት፤ የቀብር ቦታና የቀብር ሐውልት መስፋፋት፤ የውስጥ ለውስጥ መንገዶችና የአውቶቡስ መናኸሪያ መስፋፋት በጥናቱ የተካተቱና እንደችግር የታዩ በመሆናቸው በፕሮጀክቱ ተካተዋል፡፡ የመጀመሪያው ዙር ትግበራም በተያዘለት ጊዜ ለማጠናቀቅ ከፍተኛ ጥረት እየተደረገ ሲሆን፤ የመጸዳጃና የገላ መታጠቢያ ቤቶች ግንባታቸው 60% መድረሱን የገዳሙ የልማት ኮሚቴ አስታውቋል፡፡ በሦስት ዙር የሚጠናቀቀው የልማት ፕሮጀክት ከሁለት ዓመት በፊት በተጠናው ጥናት መሠረት 65,925,976 ብር (ስልሳ አምስት ሚሊዮን ዘጠኝ መቶ ሃያ አምስት ሺህ ዘጠኝ መቶ ሰባ ስድስት ብር) ይፈጃል ተብሎ ይገመታል፡፡

ፕሮጀክቱ ሲጠናቀቅ የገዳሙንና የምእመናን መንደር፤ የአባቶችና የእናቶች መኖሪያ ይለያሉ፤ መናንያን ለጸሎትና ለአገልግሎት የሚመች በዓት ይኖራቸዋል፡፡ ሱባኤ ለመያዝ በሚመጡ ምእመናንና በገዳሙ አባቶች መካከል ያለው ግንኙነት ሥርዓቱን የጠበቀ ምቹ ሁኔታን ይፈጥራል ተብሎ ይጠበቃል፡፡

በጥናቱ የተካተቱትን ችግሮች በዘላቂነት ለመፍታት እንዲቻል የልማት ኮሚቴው የተለያየ የገቢ ማሰባሰቢያ መርሐ ግብር በመንደፍና በማዘጋጀት ፕሮጅክቱን በታቀደለት ሁኔታ ለማጠናቀቅ እየሠራ ይገኛል፡፡ በዚህም መሠረት ሰኔ 8 ቀን 2006 ዓ.ም. ከቀኑ 7፡30 በጠቅላይ ቤተ ክህነት ስብከተ ወንጌል አዳራሽ የገቢ ማሰባሰቢያ መርሐ ግብር ተዘጋጅቷል፡፡ ምእመናን በሥፍራው ተገኝተው ድጋፍ እንዲያደርጉ የገዳሙ ፀባቴ አባ ወልደ ማርያም አድማሱ ጥሪያቸውን አስተላልፈዋል፡፡

በደብረ ሊባኖስ አቡነ ተክለ ሃይማኖት አንድነት ገዳም ከ2500 በላይ የአብነት ተማሪዎችና ከ800 በላይ ማኅበረ መነኮሳት እንደሚኖሩ መረጃዎች ይጠቁማሉ፡፡

ብፁዕ አቡነ አብርሃም አዲሱን መንበረ ጵጵስና ተረከቡ

ሰኔ 3 ቀን 2006 ዓ.ም.

ሊ/ዲ/ ኤፍሬም የኔሰው

የምሥራቅ ሐረርጌ ሀገረ ስብከት ሊቀ ጳጳስ የነበሩት ብፁዕ አቡነ አብርሃም በግንቦት ወር 2006 ዓ.ም. የቅዱስ ሲኖዶስ ምልአተ ጉባኤ ባስተላለፈው ውሳኔ መሠረት የምዕራብ ጎጃም ሀገረ ስብከት ሊቀ ጳጳስ ሆነው በመዛወራቸው አዲሱን መንበረ ጵጵስና ተረክበዋል፡፡

ሰኔ1 ቀን 2006 ዓ.ም. የሀገረ ስብከቱ ርእሰ ከተማ በሆነችው ፍኖተ ሰላም፣ በፍኖተ ሰላም ቅዱስ ጊዮርጊስ ደብር አቀባበል ተደርጐላቸዋል፡፡ በበዓሉ ላይ ብፁዕ አቡነ ማርቆስ የምሥራቅ ጎጃም ሀገረ ስብከት ሊቀ ጳጳስና ብፁዕ አቡነ ዲዮስቆሮስ የማይጨው ሀገረ ስብከት ሊቀ ጳጳስ ተገኝተዋል፡፡

በሀገረ ስብከቱ ከተለያዩ አድባራትና ገዳማት የመጡ ካህናት፣ ሊቃውንተ ቤተ ክርስቲያንና ምእመናን፣ ከከተማዋ መግቢያ በር ጀምሮ ብፁዕነታቸውን ደመቅ ባለ መንፈሳዊ ሥነ – ሥርዓት ተቀብለዋቸዋል፡፡

ብፁዕ አቡነ አብርሃም በአቀባበል መርሐ ግብሩ ላይ ባስተላለፉት መልእክት “በእንተ ስማ ለማርያም ብዬ የተማርኩበትን አካባቢ ለማገልገል ዝግጁ ነኝ፡፡ ስለሆነም በርካታ መንፈሳዊ የልማት ሥራዎችን በጋራ እንሠራለን” ብለዋል፡፡ መንበረ ጵጵስናው በብፁዕ አቡነ ቶማስ ዕረፍት ምክንያት ለሁለት ወር ክፍት ሆኖ መቆየቱ ይታወሳል፡፡

በተመሳሳይ ዜና ብፁዕ አቡነ ሰላማ የታዕካ ነገሥት በዓታ ለማርያምና የመንበረ መንግሥት ቅዱስ ገብርኤል ገዳም የበላይ ጠባቂ ወደ ምሥራቅ ሐረርጌ ሀገረ ስብከት ተዘዋውረዋል፡፡ መንበረ ጵጵስናቸውንም ግንቦት 29 ቀን 2006 ዓ.ም. ተረክበዋል፡፡

የሀገር አቀፍ የሰንበት ትምህርት ቤቶች አንድነት ጠቅላላ ጉባኤ ተጠናቀቀ

ሰኔ 2 ቀን 2006 ዓ.ም.

ከግንቦት 30 ቀን 2006 ዓ.ም. ጀምሮ ለሁለት ቀናት በመንበረ ፓትርያርክ ጠቅላይ ቤተ ክህነት ስብከተ ወንጌል አዳራሽ ሲካሔድ የቆየው በኢትዮጵያ ኦርቶዶክስ ተዋሕዶ ቤተ ክርስቲያን የሰንበት ትምህርት ቤቶች ማደራጃ መምሪያ ሀገር አቀፍ የሰንበት ትምህርት ቤቶች አንድነት 3ኛ ጠቅላላ ጉባኤ ሰኔ 1 ቀን 2006 ዓ.ም. የአቋም መግለጫ በማውጣት ተጠናቋል፡፡

ጉባኤው በመጨረሻ ቀን ውሎው በየአኅጉረ ስብከቱ የሚታዩ እንቅስቃሴዎችንና ችግሮች አስመልክቶ ተሳታፊዎቹ በቡድን ውይይት በማድረግ ለጉባኤው አቅርበዋል፡፡ የግጭት አፈታት ዘዴን አስመልክቶ በመምህር በለጠ ብርሃኑ ጥናታዊ ጽሑፍ የቀረበ ሲሆን፤ በቀጣይ አንድ ዓመት ተፈጻሚ የሚሆኑ እቅዶች ላይ ውይይት ተካሒዶባቸዋል፡፡

በጉባኤው ማጠናቀቂያ ብፁዕ አቡነ ቀሌምንጦስ የሰንበት ትምህርት ቤቶች ማደራጃ መምሪያ የበላይ ሓላፊ የስልጤ፤ ጉራጌና ሃዲያ አኅጉረ ስብከት ሊቀ ጳጳስ ለሁለት ቀናት በጉባኤው ለተገኙና ጉባኤው የተሳካ እንዲሆን ትብብር ላደረጉ አካላት ምስጋናቸውን አቅርበዋል፡፡

ብፁዕ አቡነ ማቴዎስ የጠቅላይ ቤተ ክህነት ዋና ሥራ አስኪያጅ የወላይታ ኮንታና ዳውሮ አኅጉረ ስብከት ሊቀ ጳጳስ በሰጡት ቃለ ምእዳን በሰንበት ትምህርት ቤቶች ውስጥ በርካታ ችግሮች እንዳሉ በመግለጽ፤ በቅድሚያ ሰንበት ትምህርት ቤቶች ራሳቸውን መመልከት እንደሚገባቸው አሳስበዋል፡፡ ሁሉም የየራሱን ድርሻ ከተወጣ አሁን እየታዩ ያሉ ችግሮች እንደሚወገዱ በመጠቆም ጠንክሮ መሥራት እንደሚያስፈልግ ገልጸዋል፡፡