Archive for category: ስብከት

ሐምሌ ፩ ቀን ፳፻፰ ዓ.ም

በዲያቆን ቴዎድሮስ ኃይሉ

ከአቶ ባይነሳኝ ላቀውና ከወ/ሮ በፍታ ተሾመ ሐምሌ ፲፩ ቀን ፲፱፻፳፰ ዓ.ም በላስታ ደብረ ዘመዶ አካባቢ የተወለዱት፤ የአቋቋም፣ የቅኔ፣ የፍትሐ ነገሥትና የሐዲስ ኪዳን ትርጓሜ መምህሩ መጋቤ ሐዲስ ወልደ ሰንበት፣ ልዩ የትርጓሜ ጸጋ የተሰጣቸው፤ ፍቅረ ነዋይ የራቀላቸውና የሚያስተምሩትን ቃለ እግዚአብሔር በሕይወት የኖሩ አባት ነበሩ፡፡

መጋቤ ሐዲስ ወልደ ሰንበት ከ፲፱፻፷፭ ዓ.ም ጀምሮ በሰሜን ጎንደር ሀገረ ስብከት በመካነ ነገሥት ግምጃ ቤት ማርያም ቤተ ክርስቲያን ለአምስት ዓመታት ያህል በምክትል መምህርነት ያገለገሉ ሲኾን፣ የጉባኤው መምህር የኔታ ክፍሌ ካረፉበት ከ፲፱፻፸ ዓ.ም ጀምሮ እስከ ዕለተ ዕረፍታቸው ድረስም ጉባኤ ተክለው፣ ወንበር ዘርግተው በማስተማር በርካታ ሊቃውንትን አፍርተዋል፡፡

ከመካነ ነገሥት ግምጃ ቤተ ማርያም ቤተ ክርስቲያን ጉባኤ ቤት ደቀ መዛሙርት ያገኘነው መረጃ እንደሚያመለክተው፣ መጋቤ ሐዲስ ወልደ ሰንበት ባደረባቸው ሕመም ምክንያት በሕክምና ሲረዱ ቆይተው በተወለዱ በ፹ ዓመታቸው ሐምሌ ፩ ቀን ፳፻፰ ዓ.ም ከዚህ ዓለም በሞተ ሥጋ ተለይተዋል፡፡

ሥርዓተ ቀብራቸውም ሐምሌ ፪ ቀን ፳፻፰ ዓ.ም በሰሜን ጎንደር ሀገረ ስብከት በመካነ ነገሥት ግምጃ ቤት ማርያም ቤተ ክርስቲያን ይፈጸማል፡፡

የሊቁን የመጋቤ ሐዲስ ወልደ ሰንበትን አጠቃላይ አገልግሎትና ሙሉ የሕይወት ታሪክ ወደ ፊት በስፋት ይዘን እንቀርባለን፡፡

ሐምሌ ፩ ቀን ፳፻፰ ዓ.ም

በዲያቆን ተመስገን ዘገየ

በኢትዮጵያ ኦርቶዶክስ ተዋሕዶ ቤተ ክርስቲያን በደቡብ ጎንደር ሀገረ ስብከት በስማዳ ወረዳ ቤተ ክህነት ሽሜ አዝማቾ ቀበሌ በምትገኘው በሽሜ ማርያም ሕንፃ ቤተ ክርስቲያን ላይ የደረሰው የእሳት ቃጠሎ መንሥኤ በወረዳው ፖሊስ ጽ/ቤት እየተጣራ እንደሚገኝ የወረዳ ቤተ ክህነቱ ሊቀ ካህን ቄስ ሞላ ጌጡ ተናገሩ፡፡

በቃጠሎው በሕንፃ ቤተ ክርስቲያኑ፣ በጥንታውያን የብራና መጻሕፍት፣ በመስቀሎች፣ በአልባሳትና በሌሎችም ንዋያተ ቅድሳት ላይ ከፍተኛ ጉዳት መድረሱን የወረዳ ቤተ ክህነቱ ሊቀ ካህን አስታውቀዋል፡፡

የቀበሌው ዋና አስተዳዳሪ አቶ ሲሳይ በየነ እንደ ተናገሩት የአካባቢው ሕዝበ ክርስቲያን እሳቱን ለማጥፋት ከፍተኛ ጥረት ቢያደርግም የእሳት ቃጠሎው የደረሰው በሌሊት በመኾኑ አዳጋውን ለመቀነስ የተደረገው ጥረት ሳይሳካ ቀርቷል፡፡

ሰኔ ፯ ቀን ፳፻፰ ዓ.ም መንሥኤው ባልታወቀ ምክንያት በሽሜ ማርያም ሕንፃ ቤተ ክርስቲያን ላይ የእሳት ቃጠሎ አደጋ መድረሱ ይታወሳል፡፡ የቃጠሎው መንሥኤም በወረዳው ፖሊስ ጽ/ቤት እየተጣራ ይገኛል፡፡

ሰኔ ፳፯ ቀን ፳፻፰ ዓ.ም

በዲያቆን ኤፍሬም የኔሰው

የማኅበረ ቅዱሳን ጥናትና ምርምር ማእከል ሰኔ ፳፬ ቀን ፳፻፰ ዓ.ም በማኅበሩ ሕንፃ ሦስተኛ ፎቅ አዳራሽ የጥናት ጉባኤ አዘጋጅቶ ነበር፡፡

በዕለቱ *ሥነ ምግባርና ግብረ ገብነት* በሚል ርእስ በአቶ ዓለማየሁ ተክለ ማርያም (በአዲስ አበባ ዩኒቨርሲቲ ትምህርትና ሥነ ባሕርይ ጥናት ኮሌጅ ተባባሪ ፕሮፌሰር) በቀረበው ጥናታዊ ጽሑፍ በአሁኑ ጊዜ በተለይ በከተማ አካባቢዎች በአብዛኞቹ ወጣቶች ዘንድ የሥነ ምግባር ጉድለት ማለትም ሰውን አለማክበር፣ ወላጆችንና መምህራንን መሳደብ፣ ከውጪው ዓለም የተወሰዱ ኢ-ግብረገባዊ የኾኑ ተግባራትን መፈጸም ወዘተ ዓይነት ጎጂ ባህሎች እየተለመዱ መምጣታቸው፤ ይህም የአገራችንን መልካም ገጽታ እያጠፋ እንደሚገኝ፤ ወጣቱ ትውልድ ቃለ እግዚአብሔርን ቢማርና ቅዱሳት መጻሕፍትን ቢመረምር የጠባይ ለውጥ እንደሚያመጣና የመልካም ምግባር ባለቤት መኾን እንደሚችል ተገልጿል፡፡

የአቶ ዓለማየሁ ጥናት ከዓለም ዐቀፋዊው ግብረ ገብነት አንጻር ስትቃኝ አገራችን ኢትዮጵያ የተሻለች ብትኾንም፣ ከጊዜ ወደጊዜ ግን የዜጎቿ መልካም ባህል ማለትም መተሳሰብ፣ መከባበር፣ መጠያየቅ፣ መቻቻል፣ የአገር ፍቅር፣ ወዘተ የመሳሰለው ጥሩ ልምድ እየቀነሰ መምጣቱን፤ እንደዚሁም አብዛኛው ወጣት በተለይ በከተማዎች ኢ-ገብረገባዊ ባልኾኑ እንደ ሱስ፣ ስካር፣ ዝሙት፣ ትዕቢት፣ ሥርዓት አልባ አለባበስ፣ ወዘተ የመሳሰሉ ተግባራት መያዙን በማስረጃ አቅርቦ ለዚህም ዋነኛው ምክንያት በትውልዱ አእምሮ ውሰጥ የሥነ ምግባር ትምህርት አለመሥረጹና በተጨማሪም ወጣቱ ትውልድ በዘመናዊ አስተሳሰብ መማረኩ፤ እንደዚሁም አስነዋሪ መረጃዎችንና ምስሎችን በሚያስተላልፉ ሚድያዎች ተፅዕኖ ሥር መውደቅ መኾኑን አትቷል፡፡

ጥናቱ ግብረ ገብነት፣ ፈሪሃ እግዚአብሔር፣ ዐሥርቱ ትእዛዛት፣ ከክፉ ምግባር መራቅ፣ ሰውን መውደድና ማክበር፣ የአገር ፍቅር፣ ወዘተ የሚያስረዱ የቤተ ክርስቲያን ትምህርቶች በዘመናዊው ሥርዓተ ትምህርት ተካተው ለተማሪዎች ይሰጡ በነበሩበት ዘመን የማኅበረሰቡ የመከባበር፣ የመፈቃቀርና የመተሳሰብ ባህሉ ከፍተኛ እንደነበረና ይህ ባህል እየቀነሰ መምጣቱን አውስቶ በአሁኑ ሥርዓተ ትምህርትም ምንም እንኳን ከአምስተኛ ክፍል ጀምሮ እስከ ዐሥራ ሁለተኛ ክፍል ድረስ የሥነ ዜጋና ሥነ ምግባር ትምህርት ተዘጋጅቶ መሰጠቱ ቢበረታታም በተማሪዎች ዘንድ የሚታየው መምህራንን አለማክበር፣ ፈተና ከሌሎች ተማሪዎች መስረቅ፣ ሥርዓት የሌለው አነጋገርና አለባበስ፣ ወዘተ የመሰሳሰለውን ኢ-ግብረገባዊ ድርጊት ለማስተካከልና ትውልዱን የመልካም ሥነ ምግባር ባለቤት ለማድረግ ግን ከዚህ የበለጠ መሥራት እንደሚገባ አሳስቧል፡፡

ወጣቱ ትውልድ ቃለ እግዚአብሔር ቢማር እንደሚለወጥ ሲመሰክሩ *ዛሬ የተማራችሁት መጽሐፍ ቅዱስ የነገ ሕይወታችሁ ስንቅ ነው* ያሉት የጥናቱ ባለቤት አቶ ዓለማየሁ በመጨረሻም *ምን እናድርግ?* በሚለው የጥናታቸው መደምደሚያ የሰው ልጅ ሦስት የጠባይ መገለጫዎች እንዳሉት፣ እነዚህም አንደኛ የሚያደርገውን የማያውቅ፤ ሁለተኛ የሚያደርገውን የሚያውቅና ሕግን የሚፈራ ነገር ግን ኢ-ግብረገባዊ፤ ሦስተኛ ግብረ ገባዊ ሰው መኾናቸውን ጠቅሰው ኹሉም ሰው *በእግዚአብሔር ፊት ኀጢአት አልሠራም* እንዳለው እንደ ዮሴፍ ሦስተኛውን ጠባይ ገንዘብ ካደረገ የሥነ ምግባር ለውጥ ማምጣት እንደሚቻል ገልጸው የቤተ ክርስቲያን ትምህርት መማር፤ ግብረ ገባዊ ሕይወትን ማጠናከር፤ ታማኝትን፣ እውነትንና ፍቅርን ማሥረጽ፤ አእምሮን ከክፉ አስተሳሰብ ማጽዳትና የመሳሰሉ ተግባራት ለመልካም ምግባር መሠረቶች መኾናቸውን ጠቁመዋል፡፡

ሰኔ ፳፭ ቀን ፳፻፰ ዓ.ም

በዲያቆን ኤፍሬም የኔሰው

የኦርቶዶክሳዊት ተዋሕዶ ቤተ ክርስቲያንን አስተምህሮዋን እንጠንቅቅ፤ ድርሻችንን እንወቅ በሚል መሪ ቃል የአዳማ ማእከል በምሥራቅ ሸዋ ሀገረ ስብከት ሊቀ ጳጳስ በብፁዕ አቡነ ጎርጎርዮስ መልካም ፈቃድ በአዳማ ከተማ በደብረ ናዝሬት ኢየሱስ ደብር ያዘጋጀው ዐውደ ርእይ ከሰኔ ፲፯ ቀን ፳፻፰ ዓ.ም ጀምሮ በሺሕ በሚቈጠሩ የናዝሬት (የአዳማ) ከተማና የአካባቢው ምእመናን እየተጐበኘ ይገኛል፡፡

የማኅበረ ቅዱሳን ዋና ጸሐፊ አቶ ተስፋዬ ቢኾነኝ፣ ምክትል ዋና ጸሐፊው አቶ ሰይፈ ዓለማየሁ እና የኅትመትና ኤሌክሮኒክስ ሚድያ ዋና ክፍል ምክትል ሓላፊ አቶ አክሊሉ ለገሠ ሰኔ ፳፬ ቀን ፳፻፰ ዓ.ም በአዳማ ከተማ በደብረ ናዝሬት ኢየሱስ በመገኘት የአዳማ ማእከል ያዘጋጀውን ዐውደ ርእይ የጐብኙ ሲኾን፣ ዝግጅት ክፍላችንም በዕለቱ በቦታው በመገኘት ይህንን ዘገባ አጠናቅሯል፡፡

አቶ ተስፋዬ ቢኾነኝ የዐውደ ርእዩን ዓላማ ለዝግጅት ክፍላችን ሲገልጹ ማኅበረ ቅዱሳን ይህንን ዐውደ ርእይ ያዘጋጀው ቤተ ክርስቲያን በመንፈሳዊ ዕውቀት የበለጸጉና ዕውቀታቸውንም በተግባር መለወጥ የሚችሉ፤ ከውጪ ኾነው የሚመለከቱና የሚተቹ ሳይኾኑ የቤተ ክርስቲያኗ አገልግሎት የኔ ነው የሚሉና ክርስትናን በሕይወት የሚኖሩ ምእመናንን ለማፍራትና የድርሻቸውንም እንዲወጡ ለማስገንዘብ መኾኑን ተናግረዋል፡፡

አቶ ሰይፈ ዓለማየሁ በበኩላቸው ይህ ዐውደ ርእይ በየማእከላቱ እንዲታይ ማኅበሩ አቅጣጫ መስጠቱንና የአምቦ ማእከል በቀዳሚነት ዐውደ ርእዩን ማስጐብኘቱን ገልጸው፣ *እንደ አዳማ ማእከል ኹሉ ሌሎች ማእከላትም ይህንን ተሞክሮ በመውሰድ በ፳፻፱ ዓ.ም የአገልግሎት ዘመን የዕቅዳቸው አካል በማድረግ ይህንን ዐውደ ርእይ ለምእመናን ማስጐብኘት ይጠበቅባቸዋል* ሲሉ መልእክታቸውን አስተላልፈዋል፡፡

አቶ ሰይፈ አያይዘውም የአዳማ ከተማና የአካባቢው ምእመናን ዐውደ ርእዩን እየጐበኙ የሚገኙት ያለምንም ክፍያ መኾኑን ጠቅሰው *ማኅበራችን የተቋቋመው ለአገልግሎት እንጂ ለትርፍ አይደለምና በኪሳራም ቢኾን ሕዝበ ክርስቲያኑን ማስተማር ይገባናል፡፡ ምእመናኑ በገንዘብ ምክንያት የቤተ ከርስቲያን አስተምህሮ ሊያመልጣቸው ስለማይገባ፤ ደግሞም የዐውደ ርእዩ ዓላማ ማስተማር እንጂ ገንዘብ መሰብሰብ ስላልኾነ ዐውደ ርእዩ በነጻ እንዲታይ አድርገናል ሲሉ ዐውደ ርእዩ ያለ ክፍያ እንዲታይ የተደረገበትን ምክንያት አስረድተዋል፡፡

የአዳማ ማእከል ሰብሳቢ መምህር ጌትነት ዐሥራትም የዐውደ ርእዩ ዓላማ ምእመናን የቤተ ክርስቲያንን አስተምህሮ በማወቅና የቤተ ክርስቲያንን ወቅታዊ ችግሮች በመገንዘብ የድርሻቸውን እንዲወጡ ለማነሣሣት መኾኑን ገልጸው ቦታውን ከመፍቀድ ጀምሮ ለዐውደ ርእዩ መሳካት አስተዋጽኦ ላበረከቱ ለሀገረ ስብከቱ ሊቀ ጳጳስ ለብፁዕ አቡነ ጎርጎርዮስ፣ ለሀገረ ስብከቱ ሥራ አስኪያጅ ለመጋቤ ትፍሥሕት ሙሉጌታ ቸርነት፣ ለየመምሪያ ሓላፊዎች፣ ለደብረ ናዝሬት ኢየሱስ እና ደብረ ፀሐይ ቅድስት ማርያም ካቴድራል አስተዳዳሪ ሊቀ ጉባኤ አባ ተክለ ሃይማኖት ወልዱ፣ ለደብሩ ሰበካ ጉባኤ ጽ/ቤትና አገልጋይ ካህናት፣ ለሰንበት ት/ቤት ወጣቶች፣ እንደዚሁም ለመንፈሳውያን ማኅበራትና ለበጎ አድራጊ ምእመናን ማእከሉንና የዐውደ ርእይ ዝግጅት ኰሚቴውን ወክለው ምስጋና አቅርበዋል፡፡

ዐውደ ርእዩ በትዕይንት ገላጮች ብቻ ሳይኾን በድምፅ ወምስል በታገዙ መረጃዎች እንደሚቀርብ፤ እንደዚሁም የአብነት መምህራንና ደቀ መዛሙርቱ ሥርዓተ ትምህርት፣ የዋናው ማእከልና የአዳማ ማእከል ሥራዎች የትዕይንቱ አካላት እንደ ኾኑ የገለጹት የዐውደ ርእይ ዝግጅት ኰሚቴው ሰብሳቢ መምህር ኃይለ ኢየሱስ ከበረ ደግሞ በአባቶች ጸሎት ከተከፈተበት ዕለት ጀምሮ እስከ ሰኔ ፳፬ ቀን ፳፻፰ ዓ.ም ድረስ ከአምስት ሺሕ በላይ ምእመናን እንደ ጐበኙት ጠቅሰው በቀን በአማካይ እስከ ስምንት መቶ የሚደርሱ ጐብኚዎች መታደማቸውን አስታውቀዋል፡፡

ዝግጅት ክፍላችን ካነጋገራቸው ከትዕይንት ገላጮች መካከል አቶ ፍሬ ሰንበት ተክለ ሚካኤል የተባሉ ወንድም ሃይማኖታዊ ድርሻቸውን ለመወጣትና እርሳቸው የሚያውቁትን ለሌሎች ለማካፈል በማሰብ በትዕይንት ገላጭነት በማገልገል ላይ እንደሚገኙ ነግረውናል፡፡

በዐውደ ርእዩ ከታደሙ ምእመናን መካከልም አንዳንዶቹ በዐውደ ርእዩ ብዙ ቁም ነገር መጨበጣቸውን ጠቅሰው በአንጻሩ ግን በተለይ በጠረፋማ አካባቢዎች በባዕድ አምልኮ ውስጥ የሚኖሩ ወገኖች ለመጠመቅ እየፈለጉ ነገር ግን በሰባክያንና በካህናት እጥረት ምክንያት የቤተ ክርስቲያን አባላት ሳይኾኑ በመቅረታቸው ማዘናቸውን ገልጸውልናል፡፡

ሌሎቹ ደግሞ ዐውደ ርእዩ ተዋሕዶ ሃይማኖታችንን ይበልጥ እንድንወዳትና የቤተ ክርስቲያንን ወቅታዊ ችግሮችንም እንድንገነዘብ አድርጎናል፤ ከዚህ በኋላ የሚጠበቅብንን ኹሉ ለማድረግ ዝግጁ ነን ብለዋል፡፡ አክለውም ይህንን ዐውደ ርእይ እስከ ማእከል ድረስ እንዲታይ በማድረጉ ማኅበረ ቅዱሳንን አመስግነዋል፡፡

በመጨረሻም የአዳማ ማእከልና የዐውደ ርእዩ ዝግጅት ኰሚቴው አባላት ከኹሉም በላይ በአገልግሎታቸው ኹሉ ላልተለያቸው ለልዑል እግዚአብሔር ምስጋና ካቀረቡ በኋላ ዐውደ ርእዩ ሰኔ ፳፮ ቀን ፳፻፰ ዓ.ም እንደሚጠናቀቅ ገልጸው አሁንም ምእመናኑ መጐብኘታቸውን እንዲቀጥሉ ሲሉ መንፈሳዊ ጥሪያቸውን አስተላልፈዋል፡፡