ሐምሌ ፳ ቀን፣ ፳፻፰ ዓ.ም

በዲያቆን ኤፍሬም የኔሰው

ይህ ‹‹ያለ ደግ ልጆች ያላስቀረን እግዚአብሔር ይመስገን!›› የሚለው ኃይለ ቃል ከብፁዕ አቡነ ሉቃስ ቃለ ምዕዳን የተወሰደ ሲኾን፣ ይኸውም ማኅበረ ቅዱሳን በጀት በመመደብና ምእመናንን በማስተባበር ለገዳማትና አብነት ትምህርት ቤቶች ያደረገውን ድጋፍና ያመጣውን ውጤት ለቤተ ክርስቲያን አባቶችና ለበጎ አድራጊ ምእመናን ለማሳወቅ ሐምሌ ፲፯ ቀን ፳፻፰ ዓ.ም በአዲስ አበባ ከተማ በግዮን ሆቴል በንግሥት ሳባ አዳራሽ ባዘጋጀው ልዩ መርሐ ግብር የተናገሩት ነው፡፡

በመርሐ ግብሩ ላይ ብፁዕ አቡነ ሉቃስ የሰቲት ሑመራ፣ የሰሜን ሱዳንና የግብጽ አህጉረ ስብከት ሊቀ ጳጳስ፣ የትንሣኤ ዘጉባኤ ማሳተሚያ ድርጅት የበላይ ሓላፊ፤ የዐሥር ገዳማት አበ ምኔቶችና እመ ምኔቶች፤ የአብነት መምህራንና ደቀ መዛሙርት፤ የማኅበሩ ሥራ አስፈጻሚዎችና የልዩ ልዩ ክፍሎች አገልጋዮች፤ በጎ አድራጊ ምእመናንና ጥሪ የተደረገላቸው እንግዶች ተገኝተዋል፡፡

ብፁዕ አቡነ ሉቃስ በዕለቱ ቃለ ምዕዳን ሲሰጡ “ጸግወኒ እግዚኦ ውሉደ ቡሩካነ ወኄራነ እለ ይትኤዘዙ ለከ፤ አቤቱ ለአንተ የሚታዘዙ፣ የተባረኩ፣ ቸር የኾኑ ልጆችን ስጠኝ፤” የሚል ኃይለ ቃል ጠቅሰው “ያለ ልጆች ያላስቀረን፤ ታዛዥና ቤተ ክርስቲያንን የሚያገለግሉ ልጆችን የሰጠን እግዚአብሔር አምላክ የተመሰገነ ይኹን!” በማለት በየገዳማቱ በጾም በጸሎት ተወስነው፣ በሥራ ተጠምደው የሚኖሩ አባቶች መነኮሳትንና መነኮሳይያትን፤ ለገዳማትና ለአብነት ት/ቤቶች መስፋፋት ልዩ ልዩ ድጋፍ በማድረግ ላይ የሚገኙ ምእመናንንና ይህንን አገልግሎት የሚያስተባብረውን ማኅበረ ቅዱሳንን አመስግነዋል፡፡

መርሐ ግብሩ በብፁዕነታቸው ጸሎት ከተከፈተ በኋላ በማኅበረ ቅዱሳን የአዲስ አበባ ማእከል መዘምራንና በመምህር ወልደ ገብርኤል ይታይ ወቅታዊ ይዘት ያላቸው ያሬዳውያን ዝማሬያት ቀርበዋል፡፡

ዲያቆን ብርሃኑ አድማስም “ንገሩ” በሚል ኃይለ ቃል የቤተ ክርስቲያንን አስተምህሮና ታሪክ፤ የቅዱሳት መካናትን ጠቀሜታና አስተዋጽኦ፤ እንደዚሁም ያሉባቸውን ችግሮች ለሌሎች በማስረዳት ቤተ ክርስቲያናችንን ከልዩ ልዩ ችግር ነጻ ማድረግና የገዳማትንና የአብነት ትምህርት ቤቶችን ህልውና ማስጠበቅ እንደሚገባ የሚያስገነዝብ ትምህርተ ወንጌል ሰጥተዋል፡፡

በመርሐ ግብሩ በማኅበረ ቅዱሳን የቅዱሳት መካናት ልማትና ማኅበራዊ አገልግሎት ዋና ክፍል ‹ምርጥ ተሞክሮ› በሚል ርእስ ያሳተመው፤ ልዩ ልዩ ጉዳዮችን የሚዳስሰው የኤሌክትሮኒክስ ጋዜጣም በብፁዕ አቡነ ሉቃስ ቡራኬ ተመርቋል፡፡

ከዐሥሩ ገዳማት ከመጡ አበ ምኔቶችና እመ ምኔቶች መካከልም ከፊሎቹ ስለየገዳሞቻቸው ኹኔታና አገልግሎት እንደዚሁም ስለሚያከናውኗቸው ልማታዊ ሥራዎች የልምድ ተሞክሯቸውን አካፍለዋል፡፡

ማኅበሩ ምእመናንን በማስተባበር ካሠራቸው ተግባራት መካከልም በደብረ ሐይዳ አቡነ ቶማስ ገዳም የተገነባው የመጠጥ ውሃ ፕሮጀክት በውሃ እጥረት ምክንያት የተበተኑ መነኮሳትና የአብነት ተማሪዎች  ወደ ገዳሙ እንዲመለሱና ቍጥራቸውም እንዲጨምር ማድረጉን  የገዳሙ አባቶች መስክረዋል፡፡

ለደብረ ገሪዛን ካስዋ ጕንዳጕንዶ ማርያም ገዳም ገቢ ማስገኛ ይኾን ዘንድ በአዲግራት ከተማ የተገነባው ሕንፃም ሌላው የማኅበረ ቅዱሳንና የበጎ አድራጊ ምእመናን ተሳትፎ ውጤት ሲኾን፣ ይህም በመቅኑን እጥረትና በልዩ ልዩ ችግር የቀዘቀዘው ገዳም ተመልሶ እንዲሰፋ ማስቻሉንና የአብነት ትምህርት ለመስጠት መልካም አጋጣሚ ማስገኘቱን የገዳሙ አበ ምኔት ተናግረዋል፡፡

የሚዛን ደብረ ከዋክብት አቡነ ተክለ ሃይማኖት የሴቶች ገዳም እመ ምኔትም ገዳሙ ከባንክ ፩.፰ (1.8) ሚሊዮን ብር ተበድሮ ባስገነባው ሕንፃ ከ፩ኛ – ፱ኛ (ከ1ኛ – 9ኛ) ክፍል ድረስ ዘመናዊ ትምህርት እያስተማረ እንደኾነና ሌሎችንም የልማት ሥራዎችን በማከናወን ላይ እንደሚገኝ፤ ማኅበረ ቅዱሳንም የሕንፃውን ዲዛይን ከመሥራት ጀምሮ ድጋፍ እንዳደረገላቸው ገልጸዋል፡፡ አያይዘውም በገንዘብ እጥረት ምክንያት ያልተጠናቀቁ ሕንፃዎች መኖራቸውንና ከተበደሩት ገንዘብም አብዛኛው አለመመለሱን አስታውሰው ለዚህም የምእመናን ድጋፍ እንዳይለያቸው ጥሪያቸውን አስተላልፈዋል፡፡

የአቃቂ ደብረ ገነት አቡነ ሳሙኤል ገዳምም በማኅበሩ ድጋፍ የልብስ ስፌት መኪናና ጣቃ ጨርቅ፤ አንድ ተሽከርካሪ፣ እንደዚሁም ላሞችና የቤት ክዳን ቆርቆሮ ርዳታ ማግኘቱን፤ የገዳሙ መነኮሳይያትም በዘማናዊ ልብስ ስፌትና በእንስሳት ርባታ በሚያገኙት ገቢ ወላጅ የሌላቸውንና ረዳት ያጡ ልጆችን በመከባከብና በማስተማር ላይ እንደሚገኙ እመ ምኔቷ አስረድተዋል፡፡

በመርሐ ግብሩ ላይ በጎንደር አቡን ቤት ቅዱስ ገብርኤል የቅኔ ጉባኤ ቤት የቅኔ ደቀ መዝሙር የኾነው፤ ከዩኒቨርሲቲ በዲግሪ መርሐ ግብር ከተመረቀ በኋላ ማኅበሩ ባዘጋጀው የአባ ጊዮርጊስ ዘጋሥጫ ነጻ የትምህርት ዕድል በማግኘቱ ሥራውን ትቶ ወደ አብነት ትምህርት ቤት የገባው ዲያቆን እንዳልካቸው ንዋይና ከኢትዮጵያ የሁለት ዓመት ሕፃን እያለ ከወላጆቹ ጋር ወደ ካናዳ አገር የሔደው፤ የቅዱሳት መካናት ልማትና ማኅበራዊ አገልግሎት ዋና ክፍል ያዘጋጀውን የአብነት ትምህርት ቤት ሥርዓተ ትምህርት የሚያሳይ ዘጋቢ ፊልም በፌስ ቡክ ተመልክቶ በትምህርቱ በመማረኩ ወደ ዩኒቨርሲቲ መግባቱን ትቶ ወደ ኢትዮጵያ በመመለስ የአብነት ትምህርት መከታተል የጀመረው የቀድሞው ሔርሞን ተስፋዬ የአሁኑ ዘድንግል በመርሐ ግብሩ ላይ ተገኝተው ቅኔ አበርክተዋል፡፡

ባለዲግሪው የቅኔ ተማሪ ዲያቆን እንዳልካቸው ስሜቱን ሲገልጽም “ከአሁን በፊት አነጋጋሪ የነበረው የእኔ ወደ አብነት ትምህርት ቤት መግባት ዜና በወንድሜ በሔርሞን ታሪክ ተሸፍኗል፤ ለወደፊትም ወደ አብነት ትምህርት ቤት የሚገቡና የሁለታችንንም ታሪክ የሚያስረሱ ሌሎች ወንድሞቻችንም እንደሚበዙ ተስፋ አደርጋለሁ” ሲል አስተያየት ሰጥቷል፡፡

የአፍ መፍቻ ቋንቋው እንግሊዝኛ የኾነውና በጥረቱ የአማርኛም የግእዝም ቋንቋዎች ተናጋሪ መኾን የቻለው የቀድሞው ዘመናዊ ተማሪ የአሁኑ የቅኔ ደቀ መዝሙር ኢትዮ ካናዳዊው ዘድንግል ደግሞ ለአማርኛ አዲስ መኾኑን በሚመሰክሩ ቃላቱ “እግዚአብሔር ቢፈቅድልኝና ቢሳካልኝ ቅኔ ካስመሰከርሁ በኋላ አቋቋም ተምሬ በውጭው ዓለም በማኅሌት ለማገልገልና በካናዳና በአካባቢው የሚኖሩ ወጣቶችን የአብነት ትምህርት ለማስተማር ዐሳብ አለኝ” በማለት የወደፊት ርእዩን አስገንዝቧል፡፡

በመርሐ ግብሩ ማጠቃለያም የቅዱሳት መካናት ልማትና ማኅበራዊ አገልግሎት ምክትል የቦርድ ሰብሳቢ ወይዘሮ ዓለም ፀሐይ መሠረት ማኅበረ ቅዱሳን ገዳማትና አብነት ትምህርት ቤቶች ካለባቸው ችግር አኳያ ከፍተኛ ትኵረት ሰጥቶ ምእመናንን በማስተባበር በሚገኘው ድጋፍና በተፈጥሮ ሀብቶች በመታገዝ ቅዱሳት መካናቱ ራሳቸውን እንዲችሉ ለማድረግ ልዩ ልዩ አገልግሎት በመስጠት ላይ እንደሚገኝ ጠቅሰው “በቤተ ክርስቲያናችን ከሚገኙ ብዙ ሺሕ ገዳማትና የአብነት ትምህርት ቤቶች ቍጥር አንጻር ኹሉንም ተደራሽ ለማድረግ አልተቻለም፤ በአሁኑ ሰዓትም የዕለት ጕርስ እንኳን የማያገኙ አባቶችና እናቶች ያሉባቸው ገዳማትና የአብነት ትምህርት ቤቶች ይገኛሉ፡፡ ስለዚህም ለወደፊቱ ከማኅበሩና ከምእመናን ከዚህ የበለጠ አገልግሎት ይጠበቃል” ብለዋል፡፡

በመጨረሻም በአባታዊ ምክራቸውና በጸሎታቸው ከማኅበሩ ጎን የማይለዩትን ብፁዕ አቡነ ሉቃስንና ሌሎችንም የቤተ ክህነትና የየገዳማት አባቶችን፤ በጎ አድራጊ ምእመናንን፤ በየጊዜው ርዳታ የሚያደርገውን የአሜሪካ ማእከልን፤ እንደዚሁም ለመርሐ ግብሩ መሳካት ልዩ ልዩ አስተዋጽኦ ያበረከቱ የማኅበረ ቅዱሳን ልዩ ልዩ ማእከል አባላትን፤ በዕለቱ የተገኙ የዐሥሩን ገዳማት አበ ምኔቶችንና እመ ምኔቶችችን ወ/ሮ ዓለምፀሐይ መሠረት ማኅበሩን ወክለው ምስጋና ካቀረቡ በኋላ በብፁዕ አቡነ ሉቃስ ጸሎተ ቡራኬ የመርሐ ግብሩ ፍጻሜ ኾኗል፡፡

በተያያዘ ዜና ዋና ክፍሉ በደቡብ ምሥራቅ ትግራይ ሀገረ ስብከት ለሚገኙት ለደብረ ገነት ቀቀማ ቅድስት ማርያም እና ደብረ ዓሣ አባ ዮሐኒ ገዳማት የምግብ ድጋፍ ማድረጉን የመቀሌ ማእከል ለዝግጅት ክፍላችን አስታውቋል፡፡

በድጋፍ መርሐ ግብሩም የገዳማቱ መነኮሳት፣ የዋናው ማእከልና የመቀሌ ማእከል አባላት ተገኝተዋል፡፡

የመቀሌ ማእከል ዋና ጸሐፊ አቶ ሐጋዚ አብርሃ እንደ ገለጹት ሁለቱ ጥንታውያን ገዳማት ካለባቸው የምግብ ችግር አኳያ ቅድሚያ የተሰጣቸው ሲኾን፣ ለሁለቱ ገዳማትም በአጠቃላይ የሃያ ኩንታል ጤፍ እና ሥንዴ ድጋፍ ተደርጎላቸዋል፡፡

ከዚህ በፊትም በዚሁ ሀገረ ስብከት በሕንጣሎ ውጅራት ወረዳ ለምትገኘው ቅድስት አርሴማ ገዳም ተመሳሳይ ድጋፍ መደረጉን አቶ ሐጋዚ ጨምረው ገልጸዋል፡፡

በአካባቢው በተከሠተው ድርቅ ምክንያት የገዳማቱ መነኮሳት በደረሰባቸው ረኃብ በዓለ ትንሣኤን ሳይቀር ጥሬ ቆርጥመው ማሳለፋቸውንና የዕለት ጕርስ ለማግኘት በመቸገራቸውም በዓታቸውን ለቀው ለመውጣት መገደዳቸውን የቀቀማ ቅድስት ማርያም ገዳም አበምኔት መምህር አባ ሠርፀ ድንግል እና የደብረ ዓሣ አባ ዮሐኒ ገዳም አበ ምኔት መምህር አባ ተክለ አብ አብርሀ ይናገራሉ፡፡

በዚህ ዓመት የተከበረውን የትንሣኤ በዓልን አስመልክቶ በኢትዮጵያ ብሮድካስቲንግ ኮርፖሬሽን በተዘጋጀው መርሐ ግብርም ይህ የገዳሙ ኹኔታ መዘገቡን የመቀሌ ማእከል አስታውሷል፡፡

ለወደፊቱም “ገዳማት ለቤተ ክርስቲያን ህልውና መሠረት ናቸው፤ ጳጳሳቱ፣ መነኮሳቱ፣ ቀሳውስቱና ዲያቆናቱ ምንጫቸው ገዳማት ናቸው፡፡ ከኹሉም በላይ ገዳማት ከእግዚአብሔር ምሕረትን የሚለምኑ፣ ዘወትር በጾም በጸሎት የሚተጉ አባቶች መኖሪያዎች ናቸውና ኹሉም ሕዝበ ክርስቲያን ገዳማትን ቢደግፍ መልካም ነው” ሲሉ የገዳሙ አባቶችና እናቶች ጥሪያቸውን ያስተላልፋሉ፡፡

ሐምሌ ፲፭ ቀን ፳፻፰ ዓ.ም

በአውሮፓ ማእከል

በኢትዮጵያ ኦርቶዶክስ ተዋሕዶ ቤተ ክርስቲያን በሰንበት ት/ቤቶች ማደራጃ መምሪያ ማኅበረ ቅዱሳን የአውሮፓ ማእከል ፲፮ኛ ጠቅላላ ጉባኤ ከሐምሌ ፩-፫ ቀን ፳፻፰ ዓ.ም በስዊድን አገር ስቶክሆልም ከተማ ተካሔደ።

በጠቅላላ ጉባኤው በተለያዩ የአውሮፓ አገሮች የሚኖሩ ከሰባ በላይ የማእከሉ አባላት፤ የዋናው ማእከልና የሰሜን አሜሪካ ማእከል ተወካዮች፤ እንደዚሁም ጥሪ የተደረገላቸው ካህናትና ምእመናን ተሳትፈዋል።

በስቶክሆልም መንበረ ጸባዖት ቅድስት ሥላሴ ቤተ ክርስቲያን አስተዳዳሪ በመልአከ ብርሃን አባ ገብረ ጊዮርጊስ ካሣዬና በአውሮፓ ማእከል ሰብሳቢ በቀሲስ ዶ/ር ያብባል ሙሉዓለም የእንኳን አደረሳችሁ መልእክት ተላልፏል።

“እስክመጣ ድረስ ያላችሁን ጠብቁ” /ራእ.፪፥፳፭/ በሚል ኃይለ ቃል በመምህር ፍቃዱ ሣህሌ ትምህርተ ወንጌል ተሰጥቷል።

የዋናው ማእከል መልእክትም በተወካዩ በአቶ ታምሩ ለጋ አማካይነት ለጉባኤው ቀርቧል።

በጉባኤው የመገናኛ ብዙኃን አጠቃቀምንና መንፈሳዊ ሕይወትን የሚዳስሱ ጥናቶች የቀረቡ ሲኾን፣ እንደዚህ ዓይነት ጥናቶች ለመንፈሳዊ ሕይወት መጠንከር ጠቃሚ በመኾናቸው ለወደፊቱም በተሻለና በተጠናከረ መልኩ እንዲቀርቡ የሚል አስተያየት በጉባኤው ተሳታፊዎች ተሰጥቷል፡፡

በተመሳሳይ መልኩ “ልጆችን በቤተ ክርስቲያን በተቀናጀ መልኩ ለማስተማር የእኛ ድርሻ” በሚል ርእስ አጭር የግንዛቤ ማስጨበጫ ጽሑፍ በተተኪ ትውልድ ሥልጠና አገልግሎት ክፍል ቀርቧል።

በተጨማሪም የሰሜን አሜሪካ ማእከል ተወካይ አቶ ትእዛዙ ካሣ “የውጭ አገር የማኅበረ ቅዱሳን አገልግሎት ተግዳሮቶችና ዕድሎች” በሚል ርእስ በውጭ አገር ያለውን የአገልግሎት ኹኔታና የማእከሉን ተሞክሮ የሚያስገነዝብ ጽሑፍ አቅርበዋል፡፡

የማእከሉ የ፳፻፰ ዓ.ም የሥራ አፈጻጸም ዘገባ ቀርቦ በጉባኤው ተሳታፊዎች ሰፊ ውይይት ተደርጎበታል፡፡

የቀጣይ ስድስት ዓመት ስልታዊ ዕቅድ አቅጣጫዎችም በዋናው ማእከል ተወካይ በአቶ ታምሩ ለጋና በአውሮፓ ማእከል ምክትል ሰብሳቢ በዶ/ር ታጠቅ ፈቃዱ አማካይነት ለጉባኤው ቀርበዋል፡፡

ለሚቀጥሉት ሁለት ዓመታት ማእከሉን በሥራ አስፈጻሚነት የሚመሩ አባላትም በአባቶች ጸሎት በዕጣ ተመርጠዋል፡፡ የኦዲት እና ኢንስፔክሽን ክፍል ሓላፊም በጉባኤው ተሰይሟል።

የ፳፻፱ ዓ.ም የማእከሉ እና ኦዲትና ኢንስፔክሽን ክፍል የአገልግሎት ዕቅድም ለጉባኤው ቀርቦ ውይይት ከተደረገበት በኋላ በምልዓተ ጉባኤው ጸድቋል፡፡

በመጨረሻም ለጉባኤው መሳካት አስተዋጽኦ ላደረጉ ለመንበረ ጸባዖት ቅድስት ሥላሴ ቤተ ክርስቲያን ካህናት፣ ለስዊድን ንዑስ ማእከል አባላት፣ ለሰንበት ት/ቤት ወጣቶችና ለአካባቢው ምእመናን የማእከሉ ሰብሳቢ ቀሲስ ዶ/ር ያብባል ሙሉዓለምና የጉባኤው አዘጋጅ ኰሚቴ ሰብሳቢ አቶ ሳምሶን መለሰ ምስጋና ካቀረቡ በኋላ ጠቅላላ ጉባኤው በአባቶች ጸሎት ተጠናቋል።

ሐምሌ ፲፩ ቀን ፳፻፰ ዓ.ም

በዲያቆን ኤፍሬም የኔሰው

ጌታችን መድኀኒታችን ኢየሱስ ክርስቶስ “ሒዱና አሕዛብን ኹሉ በአብ በወልድና በመንፈስ ቅዱስ ስም እያጠመቃችኋቸው ያዘዝኋችሁንም ኹሉ እንዲጠብቁ እያስተማራችኋቸው ደቀ መዛሙርት አድርጓቸው” ሲል በአምላካዊ ቃሉ ያዘዘውን መሠረት በማድረግና የቅዱሳን ሐዋርያትን ፈለግ በመከተል ቅድስት ቤተ ክርስቲያናችን በርካታ ሰባክያንን እያስተማረች በየቦታው ስታሰማራ ኖራለች፤ ወደፊትም ይህንን ተልእኮዋን ትቀጥላለች፡፡

ምክንያቱም ስብከተ ወንጌል ቃለ እግዚአብሔርን ለማስተማር ብቻ ሳይኾን የሰውን አእምሮ ለማልማት (መልካም አስተሳሰብን ለመገንባት) የሚያስችል ዋነኛው የቤተ ክርስቲያን መሣሪያ ነውና፡፡ ስለዚህም ነው ቤተ ክርስቲያናችን ከየመጻሕፍት ቤቱና ከመንፈሳውያን ኮሌጆች በየጊዜው መምህራንን እያስመረቀች ለስብከተ ወንጌል አገልግሎት የምታሰልፋቸው፡፡

የቤተ ክርስቲያንን ተልእኮ ለማስፈጸም የተቋቋመው ማኅበረ ቅዱሳንም በየግቢ ጉባኤያቱ ትምህርተ ሃይማኖትን ከሚያስተምራቸው ወንድሞችና እኅቶች በተጨማሪ ከአባቶችና ከሚመለከታቸው አካላት ጋር በመመካከር በልዩ ልዩ የአገራችን ክፍሎች የሚገኙ በርካታ ሰባክያንን በየቋንቋው እያሠለጠነና በአባቶች ቡራኬ እያስመረቀ ለስብከተ ወንጌል አገልግሎት እንዲሠማሩ በማድረግ ላይ ይገኛል፡፡

ማኅበሩ በዚህ ዓመትም ይህንን ተልእኮውን በመቀጠል አሠልጥኖ ያስመረቃቸው ሰባክያነ ወንጌል ከመኖራቸውም ባሻገር በአሁኑ ሰዓት እየሠለጠኑ የሚገኙ ወንድሞችም በርካታ ናቸው፡፡

ለዚህም በአዳማ ከተማ በአፋን ኦሮሞ ሠልጥነው የተመረቁ ሰባክያን፤ እንደዚሁም በአዲስ አበባና በሐሮ እየሠለጠኑ የሚገኙ ወንድሞች ማስረጃዎች ናቸው፡፡

በማኅበረ ቅዱሳን የአዳማ ማእከል ከበጎ አድራዎች በተገኘ ድጋፍ ከልዩ ልዩ ገጠራማ ሥፍራዎች የተውጣጡ ፳፰ ሰባክያንን በአፋን ኦሮሞ አሠልጥኖ ሐምሌ ፰ ቀን ፳፻፰ ዓ.ም አስመርቋል፡፡

በምረቃ ሥርዓቱም የምሥራቅ ሸዋ ሀገረ ስብከት ሥራ አስኪያጅ መጋቤ ትፍሥሕት ሙሉጌታ ቸርነት፣ የሀገረ ስብከቱ ሠራተኞችና የየአድባራቱ አገልጋይ ካህናት፣ የአገር ሽማግሎች፣ በጎ አድራጊ ምእመናንና የማእከሉ ሥራ አስፈጻሚ አባላት ተገኝተዋል፡፡

በምረቃ መርሐ ግብሩ ትምህርተ ወንጌልና ዝማሬ የቀረበ ሲኾን፣ ምሩቃኑ በማእከሉ የተዘጋጀላቸውን የምስክር ወረቀት፣ የመጽሐፍ ቅዱስና የነጠላ ስጦታ ከአባቶች እጅ ተቀብለዋል፡፡ እንደዚሁም ምሩቃኑ ሥልጠናውን እንዲያገኙ ላደረጓቸው የማእከሉ ሥራ አስፈጻሚ አባላት ልዩ ልዩ ስጦታ አበርክተዋል፡፡

ለሠልጣኞቹ የማኅበሩ ሥራ አስፈጻሚዎችና የዝግጅት ክፍላችን አባላት በተገኙበት ሰኔ ፳፬ ቀን ፳፻፰ ዓ.ም ለሠልጣኞቹ የእንኳን ደኅና መጣችሁ አቀባበል የተደረገ ሲኾን፣ በዕለቱ የማኅበረ ቅዱሳን ዋና ጸሐፊ አቶ ተስፋዬ ቢኾነኝ፡- “ይህንን ሥልጠና ካጠናቀቃችሁ በኋላ ስብከተ ወንጌል መስጠት ብቻ ሳይኾን የአብነት ትምህርት በመማር ሥልጣነ ክህነት ተቀብላችሁ የሚያጠምቃቸውና ቀድሶ የሚያቈርባቸው ካህን ላላገኙ ወገኖቻችን ልትደርሱላቸው ይገባል በማለት መልእክታቸውን አስተላልፈዋል፡፡

የማኅበሩ ምክትል ዋና ጸሐፊ አቶ ሰይፈ ዓለማየሁ በበኩላቸው፡- “የስብከተ ወንጌል አገልግሎት በቃል ብቻ ሳይኾን በሕይወትም የሚሰበክ ተልእኮ መኾኑን ሳትዘነጉ በምትሔዱበት ስፍራ ኹሉ ለምታስተምሯቸው ምእመናንም ኾነ ለሌሎች ወጣቶች መልካም ምሳሌ ልትኾኑ ይገባል” ሲሉ ምክራቸውን ለግሰዋል፡፡

የአዳማ ማእከል ሰብሳቢ መ/ር ጌትነት ዐሥራት ደግሞ ሥልጠናው ሌሊትና ቀን ሲሰጥ መቆየቱን ጠቅሰው፣ ከትምህርተ ሃይማኖት በተጨማሪ የሥራ አመራር፣ የጊዜ አጠቃቀም፣ የስብከት ዘዴ፣ ወቅታዊ ኹኔታ፣ አገልግሎት፣ የሕይወት ተሞክሮና ተዛማጅ መርሐ ግብራት በሥልጠናው መካተታቸውን ገልጸዋል፡፡

ሰብሳቢው በመጨረሻም ለሥልጠናው መሳካት አስተዋጽኦ ላበረከቱ አባቶችና በጎ አድራጊ ምእመናን በማእከሉ ስም ምስጋናቸውን አቅርበዋል፡፡

በተያያዘ ዜና በማኅበረ ቅዱሳን ትምህርትና ሐዋርያዊ አገልግሎት ዋና ክፍል የስብከተ ወንጌል ማስፋፊያ መርሐ ግብር ከ፳፫ ጠረፋማ አህጉረ ስብከት የተውጣጡ ሰባክያንን በማሠልጠን ላይ ይገኛል፡፡

የስብከተ ወንጌል ማስፋፊያ መርሐ ግብሩ አስተባባሪ አቶ ጌትነት ወርቁ ለዝግጅት ክፍላችን እንደ ገለጹት ከሰኔ ፳፮ ቀን እስከ ሐምሌ ፳፰ ቀን ፳፻፰ ዓ.ም ለአንድ ወር በሚቆየው በዚህ ሥልጠና የሚሳተፉ ሠልጣኞች ብዛት ፻፴ ሲኾን፣ ከእነዚህ መካከል ፵ዎቹ የዓቅም ማጎልበቻ፤ ፺ዎቹ ደግሞ የስብከተ ወንጌል ሥልጠና የሚወስዱ ወንድሞች ናቸው፡፡

ሥልጠናው የዓቅም ማጎልበቻ እና የስብከተ ወንጌል ሥልጠና በሚሉ አርእስት ለሁለት ተከፍሎ የሚሰጥ ሲኾን፣ የዓቅም ማጎልበቻው በአዲስ አበባ ሀገረ ስብከት በለቡ አቡነ ጎርጎርዮስ ትምህርት ቤት፤ የስብከተ ወንጌል ሥልጠናው ደግሞ በደቡብ ምዕራብ ሸዋ ሀገረ ስብከት በሶዶ ዳጪ ወረዳ ቤተ ክህነት በሐሮ ደብረ ጽጌ ቅዱስ በዓለ ወልድ ወቅዱስ ዑራኤል ገዳም የስብከተ ወንጌል አዳራሽ በመሰጠት ላይ ነው፡፡

የዓቅም ማጎልበቻ ሥልጠናው ከዚህ በፊት የስብከተ ወንጌል ሥልጠና ወስደው በየቋንቋቸው ሲሰብኩ ለነበሩ ወንድሞች እንደተዘጋጀና ዓላማውም ሠልጣኞቹ እንደ እነርሱ ያሉ ብዙ ሰባክያነ ወንጌልን እንዲያፈሩ፤ እንደዚሁም የተጠመቁ ወገኖችን በማጽናት በየቦታው የጽዋ ማኅበራትንና ሰንበት ት/ቤቶችን እንዲመሠርቱ፤ የተመሠረቱትንም እንዲያጠናክሩ ለማድረግ ለመጀመሪያ ጊዜ እንደ ተዘጋጀ፤ የስብከተ ወንጌል ሥልጠናው ደግሞ በልዩ ልዩ ቋንቋ የሚያስተምሩ ሰባክያነ ወንጌልን ለማፍራት የሚሠጥ ሥልጠና እንደ ኾነ አቶ ጌትነት አስታውቀዋል፡፡

ለሠልጣኞቹም የሶዶ ዳጪ ወረዳ ቤተ ክህነት ሊቀ ካህንና ሠራተኞች፣ የገዳሙ አበ ምኔትና ካህናት፣ የወረዳው አስተዳዳሪና ሠራተኞች፣ የማኅበረ ቅዱሳን ልዩ ልዩ ክፍሎች አገልጋዮችና በጎ አድራጊ ምእመናን በተገኙበት ሐምሌ ፪ ቀን ፳፻፰ ዓ.ም በሐሮ ደብረ ጽጌ ቅዱስ በዓለ ወልድ ወቅዱስ ዑራኤል ገዳም የእንኳን ደኅና መጣችሁ አቀባበል ተደርጎላቸዋል፡፡

በዕለቱ በቦታው ተገኝተን ቃለ መጠይቅ ያደርግንላቸው የወረዳው ቤተ ክህነት ሊቀ ካህን መልአከ ኃይል ቀሲስ ጀምበር ደበላ “ሥልጠናው በሐሮ ገዳም መሰጠቱ የአካባቢውን ምእመናን ከእኛስ ምን ይጠበቃል? እንዲሉና ወረዳ ቤተ ክህነቱም ለተሻለ አገልግሎት እንዲተጋ ያደርገዋል” ካሉ በኋላ ሥልጠናው እስኪጠናቀቅ ድረስ ዓቅማቸው በሚፈቅደው ኹሉ ለሠልጣኞቹ ድጋፍ እንደሚያደርጉ ቃል ገብተዋል፡፡

የገዳሙ አስተዳዳሪ ሊቀ ጉባኤ አባ ኤልያስ ወልደ ሥላሴ ደግሞ “ሠልጣኞቹ ከ፳፫ አህጉረ ስብከት የተውጣጡ የልዩ ልዩ ብሔረሰብ አባላት ናቸው፡፡ ስለዚህም ኢትዮጵያ ሐሮ ላይ ተሰብስባለች ማለት ይቻላል፡፡ እኛም በሠልጣኞቹ ፊት ስንገኝ በአበባ መካከል ላይ የቆምን ያህል ይሰማናል” ብለዋል፡፡ አያይዘውም “እግዚአብሔር ማኅበሩን ይጠብቅልን” ሲሉ ማኅበረ ቅዱሳንን መርቀዋል፡፡

የሶዶ ዳጪ ወረዳ አስተዳዳሪ አቶ ባጫ ኮምቦሌ በበኩላቸው “እንደዚህ ዓይነት ሥልጠና በእኛ ቀበሌ መሰጠቱ ለወረዳው ብቻ ሳይኾን ለአገር ሰላምና ልማትም የጎላ አስተዋጽኦ ይኖረዋል፡፡ ምክንያቱም ሃይማኖት ሰላም ነው፤ ሃይማኖት ልማት ነው፡፡ ዛሬ የተካሔደው የችግኝ ተከላ መርሐ ግብርም አንዱ የልማት ማሳያ ነው” ሲሉ አስተያየት ሰጥተዋል፡፡

ከአቀባበሉ ሥርዓት ቀጥሎም በቢትወደድ ባሕሩ አብርሃም አስተባባሪነት ጥሪ በተደረገላቸው እንግዶችና በሠልጣኞቹ የችግኝ ተከላ መርሐ ግብር ተከናውኗል፡፡ የችግኝ ተከላው ዓላማም ቤተ ክርስቲያን ወንጌልን ብቻ ሳይኾን ልማትንም እንደምታስተምር ለማመልከት መኾኑን ቢትወደድ ባሕሩ ተናግረዋል፡፡

በመጨረሻም ለዚህ ሥልጠና ልዩ ልዩ አስተዋጽኦ ላበረከቱ አባቶች፤ ከአራት መቶ ሺሕ ብር በላይ በማውጣት የሥልጠናውን ሙሉ ወጪ ለሸፈኑት አንድ በጎ አድራጊ ወንድም፤ እንደዚሁም በአዳራሽ፣ በቁሳቁስ አቅርቦትና በመስተንግዶ በማገዝ ላይ ለሚገኙ ምእመናን የስብከተ ወንጌል ማስፋፊያው አስተባባሪ ማኅበሩን በመወከል ምስጋናቸውን አቅርበዋል፡፡

ሐምሌ ፮ ቀን ፳፻፰ ዓ.ም

በዲያቆን ኤፍሬም የኔሰው

ሐምሌ ፭ ቀን በአንድ በኩል የብርሃናተ ዓለም ቅዱስ ጴጥሮስና ቅዱስ ጳውሎስ በዓለ ዕረፍት የሚዘከርበት ዕለት ሲኾን፣ በሌላ በኩል ደግሞ የጾመ ሐዋርያት ፋሲካ የሚከበረውም በዚሁ ዕለት ነው፡፡ በዛሬው ዝግጅታችን የእነዚህን ቅዱሳን ታሪክ በአጭሩ ይዘንላችሁ ቀርበናል፤

ቅዱስ ጴጥሮስ

ጴጥሮስ ማለት በግሪክ ቋንቋ ዓለት (መሠረት) ማለት ነው፡፡ ወላጆቹ ስምዖን ይሉት ነበር፡፡ በአባቱ የሮቤል፣ በእናቱ የስምዖን ነገድ ሲኾን፣ የተወለደውም በገሊላ አውራጃ በቤተ ሳይዳ ነው፡፡ ሰዎችን በወንጌል መረብ እያጠመደ ወደ ክርስትና ሕይወት ይመልስ ዘንድ ጌታችን ከዓሣ አጥማጅነት ለሐዋርያነት ጠርቶታል /ሉቃ.፭፥፲፤ ማር.፩፥፲፮/፡፡ በመንፈሳዊ ቅንዓቱና ለጌታችን በነበረው ፍቅር የሐዋርያት አለቃ ኾኖ ተሹሟል፡፡ ለአገልግሎት ከተጠራበት ጊዜ ጀምሮም በእስያ፣ በሮም፣ በሰማርያ፣ በልዳ፣ በኢዮጴ፣ በአንጾኪያ፣ በገላትያና በሌሎችም አገሮች እየተዘዋወረ ወንጌልን ሰብኳል፡፡ በስብከቱ ምክንያትም ልዩ ልዩ መከራን ተቀብሏል፡፡ በቃል ካስተማረው ትምህርት በተጨማሪ በመጽሐፍ ቅዱስ በስሙ የተመዘገቡ ሁለት መልእክታትን ጽፏል፡፡

በመጨረሻም የክርስቲያኖች ጠላት የነበረው የሮም ንጉሥ ወደ አካይያ ዘምቶ ድል አድርጎ በደስታ ወደ ሮሜ ሲመለስ መኳንንቱን ለማስደሰት፤ ጣዖታቱንም ለማክበር ሲል በቅዱስ ጴጥሮስና በሌሎችም ክርስቲያኖች ላይ የሞት ፍርድ ዐወጀ፡፡ ቅዱስ ጴጥሮስ በሮም ሲያስተምር ቆይቶ የሮም መኳንንት እንዳይገድሉት ትጥቁን ለውጦ ከሮም ሲወጣ ጌታችን መስቀል ተሸክሞ ተገለጸለት፤ በዚህ ጊዜ *አቤቱ ጌታ ሆይ ወዴት ትሔዳለህ? ሲል ቢጠይቀው ጌታችንም *ልሰቀል ወደ ሮም እሔዳለሁ* አለው፡፡ *ዳግመኛ ትሰቀላለህን?* ባለው ጊዜም *አንተ ሰትፈራ ጊዜ ነው እንጂ* አለው፡፡ ያን ጊዜም *ጐልማሳ ሳለህ ወገብህን ታጥቀህ ወደ ወደድኸው ትሔድ ነበር፡፡ ስትሸመግል ግን እጅህን ታነሣና ሌላ ሰው ያስታጥቅሃል፤ ወደማትወደውም ይወስድሃል፤* /ዮሐ.፳፩፥፲፰/ በማለት ጌታችን የነገረው ቃል ትዝ አለውና አሟሟቱን የሚያመለክት መኾኑን አስታውሶ ወደ ሮም ተመልሶ ወንጌልን መስበኩን ቀጠለ፡፡

በሮማውያን ሕግ ቅጣት የተፈረደበት ወንጀለኛ የሮም አገር ተወላጅ ከኾነ የወንጀሉ ክብደትና ቅለት እየታየ ግርፋት ወይም ሞት ይፈረድበት ነበር እንጂ በአንድ ወንጀል ሁለት ቅጣት አይቀጣም ነበር፡፡ ወንጀለኛው የውጪ አገር ዜጋ (ከሮም ውጪ) ከኾነ ግን ለምሳሌ ቅጣቱ ግርፋት ከኾነ ከተገረፈ በኋላ እስራት ይጨመርበታል፤ ቅጣቱ ሞት ከኾነም ከገረፉት በኋላ በመስቀል ወይም በሌላ መሣሪያ ይገድሉት ነበር፡፡ ቅዱስ ጴጥሮስ ዜግነቱ ሮማዊ አልነበረምና በግርፋትም፣ በእስራትም በሞትም እንዲቀጣ ተፈረደበት፡፡

እንደ ሥርዓታቸውም አስቀድመው ከገረፉት በኋላ ሊሰቅሉት ሲሉ ወታደሮቹን *እንደ ክብር ንጉሥ እንደ ጌታዬ ኢየሱስ ክርስቶስ አቁማችሁ ሳይኾን፣ ዘቅዝቃችሁ ስቀሉኝ* አላቸው፡፡ እነርሱም እንዳላቸው አድርገው ሐምሌ ፭ ቀን ዘቅዝቀው ሰቅለውታል፡፡ በመስቀል ላይ ሳለም ተከታዮቹን በሃይማኖታቸው እንዲጸኑ ካዘዛቸው በኋላ ነፍሱን ለእግዚአብሔር ሰጠ፡፡ ሥጋውንም ደቀ መዝሙሩ መርቄሎስ ሽቱ ቀብቶ፣ በነጭ ሐር ገንዞ ዛሬ ቫቲካን በምትባለዋ ስፍራ በክብር ቀብሮታል፡፡

ቅዱስ ጳውሎስ

ቅዱስ ጳውሎስ ለአገልግሎት ከመጠራቱ በፊት ሳውል ይባል ነበር፡፡ ከኦሪቱ ምሁር ከገማልያል ሕገ ኦሪትንና መጻሕፍተ ነቢያትን ተምሯል፡፡ ለሕገ ኦሪት ቀናኢ ከመኾኑ የተነሣም የክርስቶስ ተከታዮችን ኹሉ ያሳድድ ነበር፡፡ ቅዱስ እስጢፋኖስ በድንጋይ ተደብድቦ ሲገደልም የገዳዮቹ ልብስ ጠባቂ ነበር /ሐዋ.፯፥፶፰፤ ፳፪፥፳/፡፡ ክርስቲያኖችን ለማሳደድ ወደ ደማስቆ ሲሔድ ለሐዋርያነት ተጠርቷል /ሐዋ.፱፥፩-፴፩፤ ፳፪፥፩-፳፩/፡፡ ለሐዋርያነት ከተጠራበት ጊዜ ጀምሮ በመላው ዓለም እየተዘዋወረ ወንጌልን በመስበክ ብዙዎችን በኢየሱስ ክርስቶስ ስም አሳምኗል፡፡

ሲሰብክም ጣዖት አምላኪ፣ ሕመምተኛ፣ ችግረኛ፣ አረማዊና አይሁዳዊ እየመሰለ ብዙዎችን አስተምሮ ለእግዚአብሔር መንግሥት አቅርቧል /፩ኛቆሮ.፱፥፲፱-፳፫/፡፡ ወንጌልን በመስበኩ ምክንያትም ከአይሁድና ከአረማውያን ዘንድ ብዙ መከራና ስቃይ ደርሶበታል፡፡ ዐረብ፣ አንጾኪያ፣ እልዋሪቆን፣ ሊቃኦንያ፣ ሦርያ፣ ግሪክና ልስጥራን ካስተማረባቸው አገሮች ጥቂቶቹ ናቸው፡፡ በቃል ካስተማረው ሌላ በመጽሐፍ ቅዱስ በስሙ የተመዘገቡ ፲፬ መልእክታት አሉት፡፡

አገልግሎቱን ሊፈጽም ሲልም የሮም ንጉሥ ኔሮን ቄሣር የክርስቲያኖች ቍጥር እየጨመረ የመጣው በቅዱስ ጳውሎስ ትምህርት በመማረካቸው ምክንያት መኾኑን ተረድቶ፤ ይልቁንም የቤተ መንግሥቱ ሰዎች ሳይቀር በቅዱስ ጳውሎስ በመማረካቸው ተቈጥቶ ቅዱስ ጳውሎስን ወደ ፍርድ ሸንጎው አስቀረበው፡፡ ቅዱስ ጳውሎስም በቀኝ እጁ ከሰንሰለቱ ጋር መስቀሉን ይዞ ንጉሡንና ወታሮቹን ሳይፋራ የኢየሱስ ክርስቶስን የእግዚአብሔር ልጅነትና አምላካዊ ሥልጣኑን ይመሰክር ነበር፡፡ ንጉሡም በቍጣ ይሙት በቃ ፈረደበት፡፡

ከላይ እንደ ተገለጸው ሮማውያን የሞት ፍርድ ሲፈርዱ የሚቀጣው ሰው የሌላ አገር ዜጋ ከኾነ ከፍርዱ ውጪ ተጨማሪ ቅጣት ይቀጡትና ይገድሉት ነበር፡፡

ቅዱስ ጳውሎስ ግን የሮም ዜግነት ስለ ነበረው ሳይገርፉ በአንድ ቅጣት ብቻ በሰይፍ እንዲገደል ወስነውበታል፡፡ ወደሚገደልበት ስፍራ ሲወስዱትም በንግግሩና በአስተያየቱ ኹሉ ምንም ፍርኀት አይታይበትም ነበር፡፡ እንዲያውም በጦርነት ድል አድርጎና ማርኮ እንደ ተመለሰ ወታደር ይደሰት ነበር እንጂ፡፡ ለሚገድሉትም ይቅርታን ይለምን ነበር፡፡ በገዳዮቹና በተከታዮቹ ፊትም የክርስትና ሽልማቱ የእግዚአብሔር መንግሥት መኾኑን የሚያስገነዝብ ቃል እያስተማረ እግዚአብሔር የሚሰጠውን የጽድቅ አክሊል ለመቀበል ይቻኮል ነበር /፪ኛቆሮ.፬፥፮-፲፰/፡፡

ሊገድሉት ሲወስዱትም ከንጉሥ ኔሮን ወገን የኾነችውን የአንዲት ብላቴና መጐናጸፊያ *ዛሬ እመልስልሻለሁ* ብሎ ከተቀበላት በኋላ *መልካሙን ገድል ተጋድያለሁ፤ ሩጫዬን ጨርሻለሁ፡፡ ሃይማኖቴን ጠብቄአለሁ፤ ወደፊትም የጽድቅ አክሊል ተዘጋጅቶልኛል፤* በማለት በመልእክቱ እንደ ተናገረው /፪ኞጢሞ.፬፥፯-፰/፣ ፊቱን በንጉሡ ልጅ መጐናጸፊያ ተሸፍኖ አንገቱን በሰይፍ ተቀልቶ አገልግሎቱን በሰማዕትነት ፈጽሟል፡፡ ደቀ መዛሙርቱም ራሱን ከአንገቱ ጋር ቢያደርጉት እንደ ቀድሞው ደኅና ኾኖላቸው በክብር ገንዘው ቀብረውታል፡፡

ሰያፊው ቅዱስ ጳውሎስን እንደ ገደለው ለመናገር ወደ ንጉሡ ሲመለስም ያቺ መጐናጸፊያዋን የሰጠችው ብላቴና *ጳውሎስ ወዴት አለ?* አለችው፡፡ እርሱም *ራሱን ተቈርጦ በመጐናጸፊያሽ ተሸፍኖ ወድቋል* ሲላት *ዋሽተሃል፤ እነሆ ጴጥሮስና ጳውሎስ በእኔ በኩል አልፈው ሔዱ፡፡ እነርሱም የመንግሥት ልብስ ለብሰዋል፡፡ በራሳቸውም በዕንቍ ያጌጡ አክሊላትን አድርገዋል፡፡ መጐናጸፊያዬንም ሰጡኝ፡፡ ይህችውም እነኋት፤ ተመልከታት* ብላ ሰጠቸው፡፡ ከእርሱ ጋራ ለነበሩትም አሳየቻቸው፡፡ አይተውም አደነቁ፤ ስለዚህም በጌታቻን በኢየሱስ ክርስቶስ አመኑ፡፡

እኛም ቅዱሳን ሐዋርያት ያቆዩልንን የቤተ ክርስቲያን አስተምህሮ ጠብቀን፣ በክርስቲያናዊ ምግባር ጸንተን እንድንኖርና በመጨረሻም የእግዚአብሔርን መንግሥት ለመውረስ እንድንበቃ የቅዱሳኑ ጸሎት ይርዳን፡፡

ወስብሐት ለእግዚአብሔር፡፡

ምንጭ፡-

መጽሐፈ ስንክሳር፣ ሐምሌ ፭ ቀን፤

ዜና ሐዋርያት፡፡

በዲያቆን ኤፍሬም የኔሰው

ሐምሌ ፩ ቀን ፳፻፰ ዓ.ም

ሐምሌ ፪ ቀን ከ፲፪ቱ ሐዋርያት አንዱ የኾው የቅዱስ ታዴዎስ የዕረፍቱ መታሰቢያ በዓል ነው፡፡ ከመጽሐፈ ስንክሳርና ከገድለ ሐዋርያት ያገኘነውን የሐዋርያው ታዴዎስን ታሪክ በአጭሩ እነሆ፤

ቅዱስ ታዴዎስ አባቱ እልፍዮስ ይባላል /ማቴ.፲፥፫/፡፡ ሐዋርያው *ታዴዎስ ልብድዮስ*፣ *የያዕቆብ ልጅ ይሁዳ* እየተባለም ይጠራል /ሉቃ.፮፥፲፮፤ ዮሐ.፲፵፥፳፪፤ ሐዋ.፩፥፲፫፤ የመጽሐፍ ቅዱስ መዝገበ ቃላት/፡፡ ጌታችን መድኀኒታችን ኢየሱስ ክርስቶስ ከሐዋርያት አስቀድሞ ቅዱስ ታዴዎስን እንደ መረጠው መጽሐፈ ስንክሳር ይናገራል፡፡

ቅዱስ ታዴዎስ በየአገሩ እየተዘዋወረ ወንጌልን በመስበክ ከአይሁድና ከአረማውያን ወገን ብዙዎችን በክርስትና ሃይማኖት አሳምኖ አስጠምቋል፡፡ አንድ ቀን ወደ ሀገረ ስብከቱ ወደ ሦርያ ለስብከተ ወንጌል ሲሔድ ጌታችን መድኀኒታችን ኢየሱስ ክርስቶስ በጐልማሳ አምሳል ተገልጦ *ወዳጄ ታዴዎስ ሆይ፣ እኔ ከአንተ ጋር ነኝና አትፍራ* ብሎ ሰላምታ ሰጥቶት ወደ ሰማይ ዐረገ፡፡

ቅዱስ ጴጥሮስም የሐዋርያት አለቃ ነውና እንደ አባትነቱ ወደ ሦርያ ለማድረስ አብሮት ሔዶ ነበረ፡፡ ከከተማዋ አጠገብ ሲደርሱም አንድ ሽማግሌ በሮችን ጠምደው ሲያርሱ አገኙ፡፡

ቅዱስ ጴጥሮስም ሽማግሌውን ምግብ በለመናቸው ጊዜ *በሮቼን ጠብቁ* ብላዋቸው ምግብ ሊያመጡላቸው ወደ ቤታቸው ሔዱ፡፡

ሽማግሌው እስኪመለሱ ድረስም ቅዱስ ጴጥሮስ በሮችን ጠምዶ ሠላሳ ትልም ካረሰ በኋላ ቅዱስ ታዴዎስም በዚያ የነበረውን የሥንዴ ዘር መዝራት ጀመረ፡፡ የተዘራው ዘርም ወዲያዉኑ በቅሎ፣ አድጎ፣ እሸት ኾነ፡፡

ሽማግሌው ምግብ ይዘው ከቤታቸው ሲመለሱም ሐዋርያት ያደረጉትን ተአምር አይተው ደነገጡ፡፡ ከእግራቸው ሥር ወድቀው ለሐዋርያት ከሰገዱላቸው በኋላም *እናንተ ከሰማይ የወረዳችሁ አማልክት ናችሁን?* አሏቸው፡፡ እነርሱም *እኛ የእግዚአብሔር ባሮች እንጂ አማልክት አይደለንም* አሉ፡፡

ሽማግሌውም *ስላደረጋችሁልኝ በጎ ሥራ በምትሔዱበት ቦታ ኹሉ ልከተላችሁን?* ባላቸው ጊዜ *ይህንን ልታደርግ አይገባም፤ ነገር ግን በሮችን ለጌታቸው መልስና በቤትህ የምንበላውን ታዘጋጅልን ዘንድ ለባለቤትህ ንገራት፡፡ እኛ ወደዚህች ከተማ ገብተን እግዚአብሔር እስከሚጠራን ጊዜ ድረስ እንቆያለንና* አሏቸው፡፡

ሽማግሌውም ከሥንዴው እሸት ይዘው፣ በሮችን እየነዱ ወደ ከተማ ሲሔዱ የከተማው ሰዎች ወቅቱ የእርሻ እንጂ የእሸት ጊዜ አልነበረምና እየተገረሙ *ይህንን እሸት ከወዴት አገኘኸው?* አሏቸው፡፡ ሽማግሌው ግን ምላሽ አልሰጧቸውም ነበር፡፡

ሽማግሌው ሐዋርያት እንደዘዟቸው በሮችን ለጌታቸው መልሰው ቤታቸውን አዘጋጅተው ራት እንድታዘጋጅላቸው ለሚስታቸው ነገሩ፡፡

ወሬውን የከተማው መኳንንት በሰሙ ጊዜም ሽማግሌውን *በክፉ አሟሟት እንዳትሞት እሸቱን ከወዴት እንዳገኘኸው ንገረን* ብለው መልእክተኞችን ላኩባቸው፡፡ ሽማግሌውም *ሕይወት ከእኔ ጋራ ሳለ ሞትን አልፈራም* ካሉ በኋላ ሐዋርያት ያደረጉትን ኹሉ ነገሯቸው፡፡

መኳንንቱ *ሐዋርያቱን አምጣቸው* ሲሏቸውም ሽማግሌው ወደ እርሳቸው ቤት ሲመጡ ማግኘት እንደሚችሉ ነገሯቸው፡፡

መኳንንቱም ሰይጣን ልቡናቸዉን ስለ ለወጠው ሐዋርያቱን ለመግደል ተነሳሡ፡፡ እኩሌቶቹ ግን *አምላካቸው ኢየሱስ የሚሹትን ኹሉ እንደሚያደርግላቸው ሰምተናልና ልንገድላቸው አንችልም፡፡ ነገር ግን አመንዝራ ሴት ወስደን በከተማው በር ርቃኗን እናስቀምጣት፡፡ እርሷን ሲያዩ ወደ ከተማችን አይገቡም፤* አሉ፡፡

እንደተባባሉትም ሴትዮዋን በከተማው በር ርቃኗን አስቀመጧት፡፡ ሐዋርያው ታዴዎስ ባያት ጊዜም *ጌታዬ ኢየሱስ ክርስቶስ ሆይ ወደ ከተማው ገብተን በከበረ ስምህ እስክንሰብክ ድረስ ይህቺን ሴት በአየር ላይ ይሰቅላት ዘንድ የመላእክት አለቃ ቅዱስ ሚካኤልን ላክልን* ብሎ ጸለየ፡፡

ጌታችን ጸሎቱን ተቀብሎት ሴትዮዋ በተሰቀለች ጊዜም የከተማው ሰዎችና መኳኳንንቱ ኹሉ እያዩአት *አቤቱ ፍረድልኝ* እያለች ትጮኽ ጀመር፡: መኳንንቱ ግን ሰይጣን ልቡናቸውን አጽንቶታልና የሐዋርያትን ትምህርት አልተቀበሉም፡፡

ቅዱስ ጴጥሮስና ቅዱስ ታዴዎስ ወደ እግዚአብሔር በጸለዩ ጊዜም ሊቀ መላእክት ቅዱስ ሚካኤልን ልኮ የሰዎቹን ልቡና የማረኩ መናፍስትን ርኩሳንን አባረረላቸው፡፡ ሰዎቹም የሐዋርያትን ትምህርት ተቀብለው በጌታችን በመድኀኒታችን በኢየሱስ ክርስቶስ አመኑ፡፡

ሐዋርያው ታዴዎስም በአብ በወልድ በመንፈስ ቅዱስ ስም ካጠመቃቸው በኋላ ኤጰስ ቆጶሳትን፣ ቀሳውስትንና ዲያቆናትን ሾመላቸው፡፡ በአየር ላይ የተሰቀለችውን ሴትም አውርዶ ዲያቆናዪት አደርጎ ሾማት፡፡

በሐዋርያት እጅም ብዙ ድንቆችና ተአምራት ተደረጉ፡፡ ዕውሮች አዩ፤ ሐንካሶች ቆመው ሔዱ፤ ዲዳዎች ተናገሩ፤ ደንቆሮዎች ሰሙ፤ ለምጻሞች ነጹ፤ አጋንንትም ካደሩባቸው ሰዎች እየወጡ ተሰደዱ፤ ሙታንም ተነሡ፡፡ የከተማው ሰዎችም ይህንን ተአምር አይተው በቅዱሳን ሐዋርያት አምላክ በእግዚአብሔር አመኑ፡፡

አንድ ሰይጣን ያደረበትና ገንዘብ የሚወድ ጐልማሳ ባለጸጋም ወደ ሐዋርያው ታዴዎስ መጥቶ ሰገደለትና *የእግዚአብሔር አገልጋይ ሆይ እድን ዘንድ ምን ላድርግ?* ሲል ጠየቀው፡፡

ሐዋርያው ታዴዎስም *እግዚአብሔርን በፍጹም ልብህ፣ በፍጹም ኀይልህ ውደደው፡፡ አትግደል፤ አትስረቅ፤ አታመንዝር፡፡ በአንተ ሊደረግብህ የማትሻውን በሌላው ላይ አታድርግ፡፡ ደግሞም ገንዘብህን ሸጠህ ለድኆችና ለምስኪኖች ብትሰጥ በሰማያት ለዘለዓለም የሚኖር ድልብ ታገኛለህ* አለው፡፡

ጐልማሳውም ይህንን በሰማ ጊዜ ተቈጥቶ ሐዋርያውን አነቀው፡፡ የእግዚአብሔር ኀይል በይረዳው ኖሮ ሐዋርያው ከመታነቁ ጽናት የተነሣ ዓይኖቹ ሊወጡ ነበር፡፡

ቅዱስ ጴጥሮስም *የክርስቶስን አገልጋይ እንዴት ደፍረህ ታንቃለህ?* ባለው ጊዜ ጐልማሳው ቅዱስ ታዴዎስን ለቀቀው፡፡

ያን ጊዜም ቅዱስ ታዴዎስ *ጌታችን ሀብታም መንግሥተ ሰማያት ከሚገባ ይልቅ ግመል በመርፌ ቀዳዳ ቢያልፍ ይቀላል ሲል በእውነት የተናገረው እንዳንተ ላለው ሀብታም ነው* አለው፡፡

ጐልማሳውም *ይህ ሊኾን አይችልም* ባለ ጊዜ ሐዋርያው ታዴዎስ በመንገድ ሲያልፍ ያገኘውን ባለ ግመል አስቁሞ መርፌ ገዝቶ ሊያሳየው ወደደ፡፡ መርፌ ሻጩም ሐዋርያውን ለመርዳት ፈልጎ ቀዳዳው ሰፊ የኾነ መርፌ አመጣለት፡፡

ቅዱስ ታዴዎስም *እግዚአብሔር ዋጋህን ይክፈልህ፤ ነገር ግን በዚህች አገር የእግዚአብሔር ክብር ይገለጥ ዘንድ ቀዳዳው ጠባብ የኾነ መርፌ አምጣልን* አለው፡፡

ሐዋርያው ቀዳዳው ጠባብ የኾነውን መርፌ ተቀብሎም *ኀይልህን ግለጥ* ብሎ ወደ ጌታችን ጸለየ፡፡ እጁንም ዘርግቶ ባለ ግመሉን *በጌታችን በኢየሱስ ክርስቶስ ስም ከግመልህ ጋር በመርፌ ቀዳዳው ውስጥ እለፍ* አለው፡፡ ሰውየውም እስከ ግመሉ ድረስ በመርፌ ቀዳዳው አለፈ፡፡

ዳግመኛም *ሕዝቡ የፈጣሪያችንን የክርስቶስን ኀይል ይረዱ ዘንድ ዳግመኛ ገብተህ እለፍ* አለውና ሦስት ጊዜ በመርፌ ቀዳዳው አለፈ፡፡

ሕዝቡም ይህንን ተአምር አይተው *ከቅዱሳን ሐዋርያት አምላክ ከሕያው እግዚአብሔር ልጅ ከኢየሱስ በቀር ሌላ አምላክ የለም* እያሉ ድምፃቸውን ከፍ አድርገው ተናገሩ፡፡

ያ ጐልማሳ ባለጸጋም ከሐዋርያው ታዴዎስ እግር በታች ወድቆ ሰገደና *ኀጢአቴን ኹሉ ይቅር በለኝ፡፡ ገንዘቤንም ኹሉ ወስደህ ለድኆችና ለምስኪኖች አከፋፍልኝ* አለው፡፡ ሐዋርያውም እንደ ለመነው አደረገለት፡፡

የክርስትናን ሃይማኖትን ሕግ አስተምሮም አጠመቀውና ሥጋውንና ደሙን አቀበለው፡፡ ኹሉንም በቀናች የክርስትና ሃይማኖት አጸናቸው፡፡ ከዚያ በኋላም ቅዱስ ጴጥሮስና ቅዱስ ታዴዎስ ከዚያች ከተማ ወጡ፤ ሕዝቡም በሰላም ሸኟቸው፡፡

ቅዱስ ታዴዎስ በየአገሩ እየተዘዋወረ ወንጌልን ሲሰብክ ቆይቶ ከአይሁድና ከአረማውያን ዘንድ ብዙ መከራ ከደረሰበት በኋላ አገልግሎቱን ፈጽሞ ሐምሌ ፪ ቀን በሰላም ዐርፏል፡፡

በንጉሥ ቈስጠንጢኖስ ዘመንም ሐምሌ ፳፱ ቀን የከበረ ዐፅሙ ከሦርያ ወደ ቍስጥንጥንያ ከተማ ፈልሷል፡፡ በዚያች ዕለትም ቤተ ክርስቲያን ሠርተው የቅዱሱን ዐፅም በውስጧ አስቀምጠውታል፡፡ ከዐፅሙም ብዙ ድንቆችና ተአምራት ተገልጠዋል፡፡

ኹላችንንም የሐዋርያው ጸሎት ይጠብቀን፤ በረከቱም ይደርብን፡፡

ወስብሐት ለእግዚአብሔር፡፡

ምንጭ፡-

መጽሐፈ ስንክሳር፣ ሐምሌ ፪ እና ፳፱ ቀን፤

ገድለ ሐዋርያት፣ ፲፱፻፺፬ ዓ.ም፤ አዲስ አበባ፣ ገጽ ፻፷፭-፻፸፩፡፡