Archive for category: ስብከት

ሰኔ ፳፰ ቀን ፳፻፰ ዓ.ም

በዲያቆን ኤፍሬም የኔሰው

እሑድ ሰኔ ፳፮ ቀን ፳፻፰ ዓ.ም በጠቅላይ ቤተ ክህነት አዳራሽ አንድ ልዩ መርሐ ግብር ተካሒዷል፡፡ መርሐ ግብሩን ያዘጋጀው የማኅበረ ቅዱሳን ትምህርትና ሐዋርያዊ አገልግሎት ዋና ክፍል ሲኾን፣ ዓላማውም የቤተ ክርስቲያናችን ብርሃን፣ የአገራችን ጌጥ የኾነውን ቅዱስ ያሬድንና ሥራዎቹን መዘከር ነው፡፡

በዕለቱ *ወሰማዕኩ ድምፀ ብዙኃን መላእክት በዐውዱ ለውእቱ መንበር፤ በዙፋኑም በእንስሶቹም በሽማግሌዎቹም ዙሪያ የብዙ መላእክትን ድምፅ ሰማሁ* /ራእ.፭፥፲፩/ በሚል ኃይለ ቃል ትምህርተ ወንጌል የሰጡት መጋቤ ሐዲስ ምሥጢረ ሥላሴ ማናየ *ቅዱስ ያሬድ ወንጌላዊው ዮሐንስ በራእይና በንባብ የነገረንን ሰማያዊ ማኅሌት በዜማ የተረጐመልን፤ ከጠፈር በላይ ያለውን ምሥጢር ለዓለም የገለጠ፤ ቤተ ክርስቲያንን ለምስጋና ያመቻቸ፤ የመላእክትን ዜማ ከሰው ጋር ያስተዋወቀ በአጠቃላይ በተፈጥሮው ሰው፣ በግብሩ መልአክ ነው* ብለው አስተምረዋል፡፡

*እንደ ቅዱስ ያሬድ ያሉ ቅዱሳን የእግዚአብሔር መመስገኛ ዐውዶች ናቸው* ያሉት መጋቤ ሐዲስ ቅዱስ ያሬድ ትምህርቱን፣ ዜማውን ያገኘው ከሰው ሳይኾን ከእግዚአብሔር መኾኑን ገልጸው *የእግዚአብሔር ጸጋ ያላደረበት ሰው ዜማውን መስማትም መሸከምም አይቻለውም* ሲሉ አስረግጠው ተናግረዋል፡፡ መጋቤ ሐዲስ በመጨረሻም *ከቃል በላይ ትኩረት ለቅዱስ ያሬድ* በማለት የዕለቱን ትምህርት አጠቃለዋል፡፡

በመርሐ ግብሩ የመጽሐፍ ቅዱስና የቅዱስ ያሬድ ሥራዎችን ዝምድና የሚያስገነዝብ ጥናታዊ ጽሑፍ ያቀረቡት መጋቤ ስብሐት ሲሳይ ወጋየሁ በጥናታቸው መጽሐፈ ድጓ ምሥጢሩ ሙሉ በሙሉ የተወሰደው ከመጽሐፍ ቅዱስ መኾኑን ምሳሌዎችን በመጠቀስ አስረድተዋል፡፡

በዕለቱ ቅዱስ ያሬድንና ሥራዎቹን የሚዘክሩ፤ እንደዚሁም ትውልዱ ከውጭው ዓለም ተጽዕኖ ነጻ ወጥቶ እንደ ቅዱስ ያሬድ ያሉ ሊቃውንትን ፈለግ መከተል እንደሚገባው የሚጠቁሙ ቅኔያት በታዕካ ነገሥት በዓታ ለማርያም ደቀ መዝሙር ተበርክተዋል፡፡

በተጨማሪም *ብፅዕት ከርሥ እንተ ጾረተከ ወብፁዓት አጥባዕት እለ ኀፀናከ አልቦ ዘየዐብዮ ወዘይሤንዮ ለላሕይከ ያሬድ ካህን* የሚል ቅዱስ ያሬድን የተሸከመችውን ማኅፀንና የጠባቸውን ጡቶች የሚያደንቅ፤ እንደዚሁም የካህኑ ያሬድን ላሕየ ዜማ (የዜማውን ማማር) የሚያሞግስ ዝማሬ በዋናው ማእከልና የአዲስ አበባ ማእከል ዘማርያን ቀርቧል፡፡

በተመሳሳይ መልኩ የውሉደ ያሬድ ሰንበት ትምህርት ቤት መዘምራን *አሠርገዋ ለኢትዮጵያ በስብሐት ወበሃሌ ሉያ ያሬድ ካህን ፀሐያ ለቤተ ክርስቲያን* በማለት ቅዱስ ያሬድ ኢትዮጵያን በምስጋና ማስጌጡን የሚያስረዳና የቤተ ክርስቲያን ፀሐይ መኾኑን የሚገልጽ ጣዕመ ዝማሬ አሰምተዋል፡፡

የማኅበረ ቅዱሳን መዝሙርና ኪነ ጥበብ አባላትም የቤተ ክርስቲያንን አስተምህሮ የጠበቀና የቅዱስ ያሬድን ዜማ መሠረት ያደረገ መዝሙር ማጥናትና መዘመር እንደሚገባ የሚያስገነዝብ ተውኔት አሳይተዋል፡፡

ቅዱስ ያሬድንና ሥራዎቹን ለመዘከር የተዘጋጀው ይህ መርሐ ግብር በጸሎት ተጀምሮ በጸሎት ተጠናቋል፡፡

ሰኔ ፳፯ ቀን ፳፻፰ ዓ.ም

በዲያቆን ኤፍሬም የኔሰው

የኢትዮጵያ ኦርቶዶክስ ተዋሕዶ ቤተ ክርስቲያን ሦስቱም መንፈሳውያን ኮሌጆች የዘር ወቅት በኾነው በወርኃ ሰኔ ደቀ መዛሙርታቸውን አስመርቀዋል፡፡

ከእነዚህ ኮሌጆች አንዱ በኾነው በቅድስት ሥላሴ መንፈሳዊ ኮሌጅ በልዩ ልዩ ትምህርት ክፍሎችና መርሐ ግብራት ሲማሩ የቆዩ ደቀ መዛሙርት ሰኔ ፳፭ ቀን ፳፻፰ ዓ.ም የተመረቁ ሲኾን፣ የምረቃ ሥርዓቱም ብፁዕ ወቅዱስ አቡነ ማትያስ ቀዳማዊ ፓትርያርክ፣ ብፁዓን ሊቃነ ጳጳሳት፣ የጠቅላይ ቤተ ክህነትና የአዲስ አበባ ሀገረ ስብከት የየመምሪያ ሓላፊዎች፣ የክፍለ ከተሞች ወረዳ ቤተ ክህነት ሠራተኞች፣ የአድባራትና የገዳማት አስተዳዳሪዎች፣ የኮሌጁ ሥራ አመራር አባላትና የምሩቃን ቤተሰቦች በተገኙበት በጠቅላይ ቤተ ክህነት አዳራሽ ተከናውኗል፡፡

የኮሌጁ አካዳሚክ ምክትል ዲን መምህር ግርማ ባቱ እንዳስታወቁት የቅድስት ሥላሴ መንፈሳዊ ኮሌጅ በካህናት ማሠልጠኛነት ከተፈተበት ከ፲፱፻፴፮ ዓ.ም ጀምሮ በነገረ ሃይማኖት ትምህርት በርካታ መምህራንን እያፈራ የሚገኝ ሲኾን፣ ለወደፊቱም በሦስተኛ ዲግሪና በዶክሬት መርሐ ግብር ለማስተማር ዝግጅት በማድረግ ላይ ነው፡፡ በአሁኑ ሰዓት በአጠቃላይ ከ፲፰፻ (አንድ ሺሕ ስምንት መቶ) በላይ ደቀ መዛሙርትን እያስተማረ የሚገኘው ኮሌጁ በዘንድሮው የምረቃ ሥርዓቱ የግእዝ ቋንቋን ጨምሮ በልዩ ልዩ የትምህርት ክፍሎችና መርሐ ግብራት በድምሩ ፫፳፬ ዕጩ መምህራንን አስመርቋል፡፡

የምረቃ ሥርዓቱ በጸሎተ ወንጌል ከተከፈተ በኋላ በመንበረ ጸባዖት ቅድስት ሥላሴ ካቴድራል ሰ/ት/ቤት መዘምራን ያሬዳዊ ዝማሬ የቀረበ ሲኾን፣ ምሩቃኑም ልዩ ልዩ መልእክት ያዘሉ ቅኔያትን አበርክተዋል፡፡ በመቀጠልም ከፍተኛ ውጤት ያስመዘገቡ፤ እንደዚሁም ከኹሉም መርሐ ግብራትና ትምህርት ክፍሎች ተመዝነው ከ፩ኛ እስከ ፭ኛ ደረጃ ያገኙ ሴት ምሩቃን ከቅዱስ ፓትርያርኩና ከኮሌጁ የበላይ ሓላፊ ከብፁዕ አቡነ ጢሞቴዎስ እጅ የምስክር ወረቀትና ሽልማት ተቀብለዋል፡፡

ቅዱስ ፓትርያርኩ በዕለቱ *መከሩስ ብዙ ነው፤ ሠራተኞች ግን ጥቂቶች ናቸው፡፡ እንግዲህ የመከሩን ጌታ ወደ መከሩ ሠራተኞችን እንዲልክ ለምኑት፤* /ማቴ.፱፥፴፯-፴፰/ የሚለውን ኃይለ ቃል መነሻ በማድረግ ቃለ ምዕዳን በሰጡበት ወቅት *እኛ መክረን አስተምረን ዐሥራት በኵራት እንዲከፍሉ ባናደርጋቸውም ምእመናን ልጆቻችን ያላቸውን ከመስጠት ወደ ኋላ አይሉም፡፡ በመኾኑም በቤተ ክርስቲያናችን በተለይ በዐበይት ከተሞች የገንዘብ እጥረት የለም፤ ነገር ግን ገንዘብ አያያዛችን በደንብ ያልተደራጀ ስለኾነና ሙስና ስለበዛ በአግባቡ አገልግሎት ላይ እየዋለ አይደለም፡፡ ስለዚህም በምትሰማሩበት ቦታ ኹሉ ሙስና እንዲጠፋ፣ መልካም አስተዳደር እንዲሰፍን፣ ሐቀኞች እንድንኾን፣ የቤተ ክርስቲያናችን ንጽሕናና ቅድስና እንዲጠበቅ ልታስተምሩ ይገባል* በማለት ለምሩቃኑ አባታዊ መመሪያ ሰጥተዋል፡፡

*በሦስቱም ኮሌጆቻችን የምትመረቁ ልጆቻችን የቤተ ክርስቲያናችን ብርሃን ናችሁ!* በማለት ምሩቃኑን ያወደሱት ቅዱስነታቸው ስብከተ ወንጌል ትልቁ የቤተ ክርስቲያን ተግባር መኾኑን ገልጸው *እናንተ ብርሃን ኾናችሁ ጨለማውን ዓለም እንድታበሩ፤ ወደ ሌላ ሃይማኖት የገቡትን አስተምራችሁ እንድትመልሱ፤ እምነታችሁን አጥብቃችሁ ሌሎችንም እንድታጠነክሩ፤ በየቦታው በመናፍቃን የተዘረፉ ምእመናንም እንድታስመልሱና ከዘረፋ እንድትታደጉ፤ ሕይወቱንና ጤንነቱን ይጠብቅ ዘንድ፤ ከሱስ፣ ከአደንዛዥ ዕፅ፣ ከስካርና ከመሳሰሉት እኩያን ምግባራት ይርቅ ዘንድ ወጣቱን እንድታስተምሩ ቤተ ክርስቲያናችን አደራዋን ታስላልፋለች* ብለዋል፡፡

ምሩቃኑም ጌታችን መድኀኒታችን ኢየሱስ ክርስቶስ የሠራውን፤ ሐዋርያት ያስተማሩትን ሕገ ወንጌል እንደዚሁም በሦስቱ የቤተ ክርስቲያን ጉባኤያት የተወሰኑ ቀኖናዎችን እንደሚጠብቁና እንደሚያስጠብቁ፤ የእመቤታችንን የቅድስት ድንግል ማርያምን፣ የመላእክትንና የቅዱሳንን አማላጅነት እንደሚያስተምሩ፤ የኢትዮጵያ ኦርቶዶክስ ተዋሕዶ ቤተ ክርስቲያን ሥርዓቷን፣ ቀኖናዋን፣ እምነቷን፣ አስተምህሮዋንና ዶግማዋን እንደሚፈጽሙና እንደሚያስፈጽሙ፤ በተመደቡበት ቦታ ኹሉ በታማኝነት እንደሚያገለግሉ ቃል ገብተዋል፡፡

በመጨረሻም በቅዱስ ፓትርያርኩ ጸሎተ ቡራኬ የምረቃው ሥርዓት ተፈጽሟል፡፡

በተያያዘ ዜና በኢትዮጵያ ኦርቶዶክስ ተዋሕዶ ቤተ ክርስቲያን የከሣቴ ብርሃን ፍሬምናጦስ መንፈሳዊ ኮሌጅ በልዩ ልዩ ትምህርት ክፍሎችና መርሐ ግብራት ያስተማራቸውን ደቀ መዛሙርት ሰኔ ፲፱ ቀን ፳፻፰ ዓ.ም ማስመረቁ ይታወሳል፡፡

ሰኔ ፳፭ ቀን ፳፻፰ ዓ.ም

በዲያቆን ኤፍሬም የኔሰው

ወንጌል ባልተዳረሰባቸው ፳፫ ገጠርና ጠረፋማ አህጉረ ስብከት ላይ ትኩረት አድርጎ ከአህጉረ ስብከት፣ ከወረዳ ቤተ ክህነቶች፣ ከማእከላትና ወረዳ ማእከላት ጋር በመተባበር አዳዲስ አማንያንን በማስጠመቅ ላይ የሚገኘው በማኅበረ ቅዱሳን ትምህርትና ሐዋርያዊ አገልግሎት ዋና ክፍል የስብከተ ወንጌል ማስፋፊያ መርሐ ግብር በ፳፻፰ ዓ.ም የአገልግሎት ዘመን ዐሥራ አንድ ሺሕ አማንያንን ለማስጠመቅ ዐቅዶ ቢነሣም በእግዚአብሔር ቸርነት ከሃያ ሺሕ በላይ አዳዲስ አማንያን የሥላሴ ልጅነትን እንዲያገኙ አድርጓል፡፡

የስብከተ ወንጌል ማስፋፊያ መርሐ ግብሩ አስተባባሪ አቶ ጌትነት ወርቁ ለዝግጅት ክፍላችን እንደ ገለጹት በቅርቡ ሰኔ ፲፪ እና ሰኔ ፲፱ ቀን ፳፻፰ ዓ.ም በጋሞ ጎፋ ሀገረ ስብከት በዳራማሎ ወረዳ ቤተ ክህነት በሌፌ እና በጐጌ ቀበሌዎች በተደረገው የጥምቀት መርሐ ግብር በሌፌ ሁለት ሺሕ ሰባ፤ በጐጌ ደግሞ ሰባት መቶ ሃያ አምስት በድምሩ ሁለት ሺሕ ሰባት መቶ ዘጠና አምስት ሰዎች የሥላሴ ልጅነትን አግኝተዋል፡፡

ስብከተ ወንጌል ማስፋፊያ መርሐ ግብሩ በአምስት አካባቢዎች ማለትም በግልገል በለስ፣ ያቤሎ፣ ጂንካ፣ ዐርባ ምንጭና ከፋ የጥምቀት አገልግሎት ለመስጠት እየሠራ የሚገኝ ሲኾን፣ የሰኔውን ወር ጨምሮ በአራት አመታት ውስጥ በእነዚህ ቦታዎች ስድሳ ዘጠኝ ሺህ አዳዲስ አማንያንን በማስተማር እንዲጠመቁ አድርጓል፡፡

ኾኖም ግን የበጀት ማነስ፣ በአካባቢው ቋንቋ የሚያስተምሩ ሰባክያነ ወንጌልና ካህናት እጥረት፣ እንደዚሁም ምእመናኑ ከተጠመቁ በኋላ ትምህርተ ወንጌል የሚያገኙበት፣ ልጆቻቸዉን ክርስትና የሚያስነሡበትና ቅዱስ ሥጋውን ክቡር ደሙን የሚቀበሉበት ቤተ ክርስቲያን በቅርብ አለመኖር የሥላሴ ልጅነትን ያገኙት ምእመናን እንዲበተኑና በመናፍቃን እንዲነጠቁ እያደረጋቸው መኾኑን አስተባባሪው አቶ ጌትነት ተናግረዋል፡፡

ከዚህ በላይ ቍጥር ያላቸው አማንያንን ለማስጠመቅና ተዋሕዶ ሃይማኖታችንን ይበልጥ ለማስፋፋት ይቻል ዘንድ መላው ሕዝበ ክርስቲያን ከማኅበሩ ጎን በመቆም የድርሻቸዉን አስተዋጽዖ ቢያበረክቱ የበለጠ ውጤት ማምጣት እንደሚቻል የገለጹት አቶ ጌትነት ስብከተ ወንጌል ማስፋፊያው የተለያዩ ፕሮጀክቶችን አዘጋጅቶ እየሠራ መኾኑን ጠቅሰው ለፕሮጀክቶቹ መሳካትም የበጎ አድራጊ ምእመናን ድጋፍ እንዳይለየን ሲሉ ጥሪያቸውን ያስተላልፋሉ፡፡

በመጨረሻም መርሐ ግብሩን በገንዘብ መደገፍ የሚፈልጉ ምእመናን፣ ለማኅበረ ቅዱሳን ስብከተ ወንጌል ማስፋፊያ መርሐ ግብር በአዋሽ ባንክ ሒሳብ ቍጥር 0130 4024 2244 00 ገቢ በማድረግ እንዲተባበሩ ጠቁመው በተጨማሪም በስልክ ቍጥር 0913 57 48 15 /0911 63 95 52 ስልክ ቢደዉሉ ስለ መርሐ ግብሩ የበለጠ መረጃ ማግኘት እንደሚችሉ አስተባባሪው አስታውቀዋል፡፡

ሰኔ ፳፫ ቀን ፳፻፰ ዓ.ም

በደብረ ማርቆስ ማእከልና በዝግጅት ክፍሉ

ይህ ኃይለ ቃል የብፁዕ አቡነ ማርቆስ የምሥራቅ ጐጃም ሀገረ ስብከት ሊቀ ጳጳስና በጠቅላይ ቤተ ክህነት የስብከተ ወንጌልና ሐዋርያዊ ተልእኮ መምሪያ የበላይ ሓላፊ ንግግር ሲኾን፣ ኃይለ ቃሉን የተናገሩትም በደብረ ማርቆስ ከተማ ሰኔ ፲፪ ቀን ፳፻፰ ዓ.ም የባሕረ ጥምቀት ግንባታ የመሠረት ድንጋይ በተቀመጠበት ዕለት ነው፡፡

በሥርዓቱ ላይም ብፁዕነታቸውን ጨምሮ የሀገረ ስብከቱ የየመምሪያ ሓላፊዎች፣ በከተማው የልዩ ልዩ አብያተ ክርስቲያናት አገልጋይ ካህናትና የአካባቢው ሕዝበ ክርስቲያን ታቦተ ሕግ በማክበር፤ እንደዚሁም የምሥራቅ ጐጃም ዞን አስተዳደር፣ የደብረ ማርቆስ ከተማ ከንቲባና ሌሎችም የመንግሥት ባለሥልጣናት ተገኝተዋል፡፡

ብፁዕ አቡነ ማርቆስ በዕለቱ ቃለ ምዕዳን ሲሰጡ የባሕረ ጥምቀቱ የመሠረት ድንጋይ በቤተ ክርስቲያን የልደት ቀን (በበዓለ ኀምሳ) መቀመጡ የእግዚአብሔርን ድንቅ ሥራ የሚያሳይ መኾኑን ጠቅሰው *የቀድሞ አባቶቻችን ቤታቸዉ ሳይቀር ቤተ ክርስቲያን ነበር፤ በአሁኑ ሰዓት ግን ሕንፃ ቤተ ክርስቲያን እየገነባን እኛ ከቤቱ ርቀናል፡፡ ስለኾነም ከኹሉም አስቀድሞ ራሳችንን ወደ ቤተ ክርስቲያን ማቅረብ ያስፈልጋል* ሲሉ አባታዊ መልእክታቸዉን አስተላልፈዋል፡፡

ብፁዕነታቸው አያይዘውም በባሕረ ጥምቀቱ ቦታ ላይ የጸበል መጠመቂያ ገንዳ፣ ዐዉደ ምሕረት፣ አጥርና የተለያዩ የግንባታ ሥራዎች እንደሚከናወኑና የግንባታዉ ጠቅላላ ወጪም ከ፲፰ እስከ ፳ ሚሊዮን ብር እንደሚጠይቅ የባለሙያዎችን ጥናት መነሻ በማድረግ ጠቁመዋል፡፡ በተጨማሪም ለቦታዉ መከበርና ለግንባታዉ መፋጠን ኹሉም ምእመናን ሃይማኖታዊ ሓላፊታቸዉን መወጣት እንደሚገባቸው አባታዊ ምክራቸዉን ለግሰዋል፡፡

የምሥራቅ ጐጃም ሀገረ ስብከት ሥራ አስኪያጅ ሊቀ ማእምራን ቆሞስ አባ እንባቆም ጫኔ የባሕረ ጥምቀቱን ቦታ አስመልክቶ ሪፖርት ባቀረቡበት ወቅት ከኰሚቴው ጎን በመሰለፍ ቦታውን ለማስከበር ልዩ ልዩ ድጋፍ ሲያደርግ የነበረውን የደብረ ማርቆስ ሕዝብ አመስግነው *ይህንን ታሪካዊና ሃይማኖታዊ ሥራ በመፈጸም ለትውልድ ለማስተላለፍ እንዲቻል መላው ሕዝበ ክርስቲያን በጸሎቱ፣ በዐሳቡ፣ በዕውቀቱ፣ በገንዘቡና በጉልበቱ ድጋፉ እንዳይለየን* ሲሉ በእግዚአብሔር ስም ጥሪያቸውን አስተላልፈዋል፡፡

የምሥራቅ ጐጃም ዞን አስተዳዳሪ አቶ ምግባሩ ከበደ በዕለቱ ንግግር ሲያደርጉ *ጥያቄያችሁ መልስ በማግኘቱ እንኳን ደስ አላችሁ* ካሉ በኋላ ባሕረ ጥምቀቱን *ቤተ ክርስቲያን ለረዥም ጊዜ ጠብቃ ያቆየችዉን ወርቃማ የሥነ ምግባር፣ የሰላምና የፍቅር አስተምህሮ የማስጠበቂያ ቦታ ማድረግ ይገባል* ብለዋል፡፡

በመጨረሻም በብፁዕ አቡነ ማርቆስ ቃለ ምዕዳንና ቡራኬ የዕለቱ መርሐ ግብር ተፈጽሟል፡፡

የምሥራቅ ጐጃም ሀገረ ስብከት በብፁዕ አቡነ ማርቆስ መመሪያ ሰጭነት መስከረም ፳፰ ቀን ፳፻፰ ዓ.ም በተቋቋመው ኰሚቴ ጥያቄ መሠረት ግንቦት ፲፱ ቀን ፳፻፰ ዓ.ም ለባሕረ ጥምቀት አገልግሎት የሚዉል ፶ ሺሕ ካሬ ሜትር ቦታ መረከቡን ከደብረ ማርቆስ ማእከል የደረሰን ዘገባ ያመለክታል፡፡

ሰኔ ፲፯ ቀን ፳፻፰ ዓ.ም

በዲያቆን ኤፍሬም የኔሰው

መንፈስ ቅዱስ ማለት ከሦስቱ አካላት (ከቅድስት ሥላሴ) አንዱ፤ የእግዚአብሔር አብ፣ የእግዚአብሔር ወልድና የራሱም አካላዊ እስትንፋስ የኾነው እግዚአብሔር መንፈስ ቅዱስ ነው፡፡

*ወረደ መንፈስ ቅዱስ* የሚለው የግእዝ ዓረፍተ ነገርም *መንፈስ ቅዱስ ወረደ* የሚል ትርጕም ያለው ሲኾን፣ ይህ ሲባልም በሰዉኛ ቋንቋ ከከፍታ ወደ ዝቅታ፣ ከሩቅ ወደ ቅርብ መምጣቱን ወይም መውረዱን ሳይኾን የእግዚአብሔር መንፈስ በሐዋርያት ላይ አድሮ ሰማያዊ ሀብትን፣ ዕውቀትን፣ ጥበብን መግለጹንና ልዩ ልዩ ጸጋን ማደሉን ያመላክታል፡፡

ይህ የመንፈስ ቅዱስ ጸጋ ለጊዜው ለሐዋርያት ቢሰጥም፣ በእነርሱ ላይ ብቻ ሳይገደብ እስከ ዕለተ ምጽአት ድረስ በምእመናን ላይም አድሮ ይኖራል፡፡

ስለዚህ መንፈስ ቅዱስ ወረደ የሚለው ትምህርት መንፈስ ቅዱስን በቦታ፣ በጊዜና በወሰን መገደቡን አያመለክትም፡፡ የእግዚአብሔር መንፈስ በዓለሙ ኹሉ የሞላ ነውና፡፡ በሰው ላይ አድሮ ጥበብን ሲገልጽ ግን ሞላ፤ አደረ፤ ወረደ ተብሎ ይነገራል፡፡ ይኸውም ሥራዉን በሰው ላይ መግለጡን፣ ጸጋዉንም ማብዛቱን ለማመልከት የሚያገለግል ቋንቋ ነው፡፡

ከላይ እንደ ተገለጸው እግዚአብሔር በቅዱሳን ሐዋርያት ላይ ፍርኃትን አስወግዶ ጥብዓትን (ጭካኔን)፣ ስጋትን አጥፍቶ ቈራጥነትን (ድፍረትን) ማሳደሩን፤ እንደዚሁም ሰማያዊ ሀብትን፣ ዕውቀትን፣ ጥበብንና ጸጋን እንዲያገኙ ማድረጉን፤ በዚህም ሐዋርያት ለስብከተ ወንጌልና ለሰማዕትነት የሚያበቃ ቅድስና ላይ መድረሳቸዉን ያመለክታል፡፡

መንፈስ ቅዱስ በሐዋርያት ላይ የወረደው ጌታችን መድኀኒታችን ኢየሱስ ክርስቶስ በተወለደባት፣ በተጠመቀባትና ከሞታን ተለይቶ በተነሣባት በዕለተ ሰንበት (በሰንበት ክርስቲያን) ሲኾን፣ መንፈስ ቅዱስ ከወረደበት ሰንበት (ከኀምሳኛው ቀን) ጀምሮ እስከሚቀጥለው ሰንበት ያለው ጊዜም (ስምንቱ ቀናት) ዘመነ ጰራቅሊጦስ ወይም ሰሙነ ጰራቅሊጦስ ይባላል፡፡ ይህም መንፈስ ቅዱስ በሐዋርያት ላይ ስለ መውረዱና በምእመናን ላይ ስለ ማደሩ የሚነገርበት ወቅት ነው፡፡

በዚህ ሰሙን በቤተ ክርስቲያን የሚነገረው ቃለ እግዚአብሔር፣ የሚሰጠውም ትምህርት የመንፈስ ቅዱስን በሐዋርያት ላይ መውረድ የሚመለከት ነው፡፡ ስለዚህም ከኀምሳኛው ቀን (ከበዓለ ጰራቅሊጦስ) ቀጥሎ በሚመጣው እሑድ (በስምንተኛው ቀን) በሌሊት በሊቃውንቱ የሚዘመረው መዝሙር፡- *ወረደ መንፈስ ቅዱስ ላዕለ ሐዋርያት ከመ ዘእሳት ወተናገሩ በነገረ ኵሉ በሐውርት* የሚል ሲኾን፣ ትርጕሙም መንፈስ ቅዱስ በእሳት አምሳል በሐዋርያት ላይ መውረዱንና በእርሱ ኃይል በዓለሙ ኹሉ ቋንቋዎች መናገራቸዉን የሚያስረዳ ነው፡፡

በዚህ ዕለት በቅዳሴ ጊዜ የሚነበቡ የመጽሐፍ ቅዱስ ክፍሎችም፡- የሚከተሉት ናቸው፤ ኤፌ.፬፥፩-፲፯፤ ፩ኛዮሐ.፪፥፩-፲፰፤ ሐዋ.፪፥፩-፲፰፤ መዝ.፷፯፥፲፰ (ምስባክ)፤ ዮሐ.፲፬፥፩-፳፪ (ወንጌል)፡፡

የምንባባቱ ፍሬ ዐሳብም የጳውሎስ መልእክት፡- እያንዳንዳችን መንፈስ ቅዱስ በገለጸልን መጠን የየራሳችን ልዩ ልዩ ጸጋ እንዳለን፤ የዮሐንስ መልእክት፡- የእግዚአብሔርን ፈቃድ የሚፈጽም ለዘለዓለም ሕያው እንደ ኾነ፤ የሐዋርያት ሥራ፡- መንፈስ ቅዱስ በሐዋርያት ላይ እንደ ወረደና በዓለሙ ኹሉ ቋንቋዎች መናገር እንደቻሉ፤ መዝሙረ ዳዊት (ምስባኩ)፡- እግዚአብሔር ለሰው ልጅ ልዩ ልዩ ጸጋን እንደሚሰጥ፤ የዮሐንስ ወንጌል፡- እግዚአብሔር እኛን ልጆቹን እንደ ወላጅ አልባ እንደማይተወን ያስረዳሉ፡፡

ቅዳሴውም ቅዳሴ ዲዮስቆሮስ ሲኾን፣ ይህም ምሥጢረ ሥላሴን፣ የጌታችንን ሰው መኾን፣ ሕማሙን፣ ሞቱን፣ ትንሣኤዉን፣ ዕርገቱንና መንፈስ ቅዱስን መላኩን ይናገራል፡፡

ቅድስት በኾነች በጽርሐ ጽዮን በሐዋርያት ላይ የወረደው የእግዚአብሔር አብ ጸጋ፣ የእግዚአብሔር ወልድ ፍቅር፣ የእግዚአብሔር መንፈስ ቅዱስ አንድነት በኹላችን ላይ ይደር፤ እጽፍ ድርብም ይኹን፡፡

ወስብሐት ለእግዚአብሔር፡፡