Archive for category: ስብከት

ነሐሴ ፳፫ ቀን ፳፻፰ ዓ.ም

በዲያቆን ኤፍሬም የኔሰው

ብፁዕ አቡነ ዲዮስቆሮስ

‹‹ለቤተ ክርስቲያናችን ንዋያተ ቅድሳትን ብቻ ሳይኾን ሰውም እንስጥ›› በሚለው መሪ ቃሉ የሚታወቀው ጽርሐ ጽዮን ዘተዋሕዶ የአንድነት ኑሮ ማኅበር ብፁዓን ሊቃነ ጳጳሳት፣ ካህናትና በርካታ ምእመናን በተገኙበት ነሐሴ ፳፪ ቀን ፳፻፰ ዓ.ም በገነተ ጽጌ ቅዱስ ጊዮርጊስ ስብከተ ወንጌል አዳራሽ የገቢ ማሰባሰቢያ ጉባኤ አካሒዷል፡፡

በዕለቱ በኢትዮጵያ ኦርቶዶክስ ተዋሕዶ ቤተ ክርስቲያን የመንበረ ፓትርያርክ ጠቅላይ ጽ/ቤት ዋና ሥራ አስኪያጅ፤ በክልል ትግራይ ደቡባዊ ዞን ማይጨው፣ ደቡባዊ ምሥራቅ ትግራይና የምሥራቃዊ ዞን አዲግራት አህጉረ ስብከት ሊቀ ጳጳስ ብፁዕ አቡነ ዲዮስቆሮስ የአንድነት ኑሮው ከየብሔረሰቡ የተውጣጣጡ ሰባክያንን በማሠልጠን ለስብከተ ወንጌል መስፋፋት የሚያደርገውን አስተዋጽዖ አድንቀው ‹‹በዚህ አገልግሎታችሁ በርቱ፤ እኛም ከጎናችሁ ነን›› ሲሉ የአንድነት ኑሮውን አበረታተዋል፡፡

ብፁዕ አቡነ ሰላማ የምሥራቅ ሐረርጌ ሀገረ ስብከት ሊቀ ጳጳስ በበኩላቸው ‹‹እግዚአብሔር ንጹሕ ልብ፣ ንጹሕ ሰውነት ይፈልጋልና በንጽሕና ኾናችሁ እንድታገለግሉ እግዚአብሔር ይርዳችሁ፤ ማኅበራችሁን ያስፋላችሁ›› የሚል አባታዊ ቡራኬ ሰጥተዋል፡፡

ብፁዕ አቡነ ሰላማ

በተመሳሳይ መልኩ የምዕራብ ሸዋ ሀገረ ስብከት ምክትል ሥራ አስኪያጅ ሊቀ ኅሩያን ቀሲስ ታምሩ እሸቱ የሀገረ ስብከቱን ሊቀ ጳጳስ ብፁዕ አቡነ ኤጲፋንዮስን ወክለው ‹‹እኛም ከጎናችሁ ኾነን የምንችለውን ኹሉ እናደርጋለን›› ብለዋል፡፡

በዕለቱ በቀሲስ እሸቱ ታደሰና በዲያቆን ሄኖክ ኃይሌ ትምህርተ ወንጌል የተሰጠ ሲኾን፣ በተጨማሪም የገነተ ጽጌ ቅዱስ ጊዮርጊስ ሰንበት ት/ቤትና የአንድነት ኑሮው መዘምራን፣ እንደዚሁም የአንድነት ኑሮው ሠልጣኞች ያሬዳውያን ዝማሬያትን አቅርበዋል፡፡

በመቀጠልም የአንድነት ኑሮው መግለጫ በስብከተ ወንጌል ሥልጠና ኰሚቴው አባል በአቶ ማናየ አባተ የቀረበ ሲኾን በመግለጫውም ከአዲስ አበባ ከተማ በ፻፶ ኪሎ ሜትር ርቀት ላይ በሚገኝ የገጠር ቤተ ክርስቲያን ቆመው መሔድ የማይቻላቸው ካህን ታቦቱን አክብረው፤ ሌላ ጐልማሳ ደግሞ እርሳቸውን ተሸክሟቸው በበዓለ ጥምቀት ወደ ባሕረ ጥምቀት ሲወርዱ መታየታቸውን አስመልክቶ የቀረበው ዘገባ የጉባኤውን ተሳታፊዎች ያሳዘነ ነበር፡፡

የጉባኤው ተሳፊዎች በከፊል

‹‹የአንድነት ኑሮው ዓላማና ተልእኮ ከመላው የኢትዮጵያ ክፍሎች የተውጣጡ በልዩ ልዩ ቋንቋዎች ማስተማር የሚችሉ ሰባክያነ ወንጌልን በማሠልጠን ወንጌልን ማዳረስና የአብነት ትምህርት በማስተማር በአገልጋይ ካህን እጦት ምክንያት የተዘጉ አብያተ ክርስቲያናት አገልግሎት እንዲሰጡ ማድረግ ነው›› ያሉት የቦርድ ሰብሳቢው ዲያቆን ሙሉጌታ ምትኩ የጉባኤው ዓላማም ለዚህ አገልግሎት ማስፈጸሚያ የሚውል ገንዘብ ለማሰባሰብ መኾኑን አስታውቀዋል፡፡ አክለውም ኹሉም ሕዝበ ክርስቲያን ከአንድነት ኑሮው ጋር በመኾን ለቤተ ክርስቲያን አገልግሎት መጠናከር የበኩሉን ድርሻ እንዲወጣ ጥሪያቸውን አስተላልፈዋል፡፡

በመጨረሻም በብፁዕ አቡነ ሰላማ ቃለ ምዕዳንና ጸሎተ ቡራኬ የጉባኤው ፍጻሜ ኾኗል፡፡

ነሐሴ ፳ ቀን ፳፻፰ ዓ.ም

በዲያቆን ኤፍሬም የኔሰው

መጋቤ ካህናት ኃይለ ሥላሴ ዘማርያም

የኢትዮጵያ ኦርቶዶክስ ተዋሕዶ ቤተ ክርስቲያን በራሷ ወጪ ካስገነባቻቸውና በደርግ ዘመነ መንግሥት በግፍ ከተወረሱባት በርካታ ቤቶቿ መካከል ፳፰ቱን ማስመለሷን የሕንጻዎችና ቤቶች አስመላሽ ኰሚቴ ሰብሳቢ አስታወቁ፡፡

በጠቅላይ ቤተ ክህነት የካህናት አስተዳደር መምሪያ ሓላፊ፣ የሕንጻዎችና ቤቶች አስመላሽ ኰሚቴ ሰብሳቢ መጋቤ ካህናት ኃይለ ሥላሴ ዘማርያም ለዝግጅት ክፍላችን እንደ ገለጹት አስመላሽ ኰሚቴው ባደረገው ያለሰለሰ ጥረት በሦስት ክፍለ ከተሞች ማለትም በልደታ ፲፰፤ በየካ ፭ እና በቂርቆስ ፭ በድምሩ ፳፰ ቤቶች ነሐሴ ፲፱ ቀን ፳፻፰ ዓ.ም ለባለንብረቷ ለቤተ ክርስቲያን መመለሳቸው ተረጋግጧል፡፡

አስመላሽ ኰሚቴው ባደረገው የማጣራት ሥራ በአዲስ አበባ ከተማ በየክፍለ ከተሞች በደርግ መንግሥት እንደ ተወረሱ የቀሩ ሁለት መቶ ሰማንያ ሦስት ሕንጻዎችና ቤቶች እንደሚገኙ፤ ከእነዚህ መካከልም አንድ መቶ ሠላሳ ሰባቱ ሕጋዊ ማረጋገጫ እንደ ተገኘላቸው የጠቆሙት የኰሚቴው ሰብሳቢ በአሁኑ ሰዓት ፳፰ቱ ቤቶች መመለሳቸውን አድንቀው ቀሪዎቹ አንድ መቶ ዘጠኙ ደግሞ እስከ ነሐሴ ወር ፳፻፰ ዓ.ም መጨረሻ ድረስ ተመላሽ እንደሚኾኑ ጠቁመዋል፡፡

ለወደፊቱም ኹሉም ሕንፃዎችና ቤቶች ወደ ቤተ ክርስቲያን እንዲመለሱ ለማድረግ አስመላሽ ኰሚቴው ተግቶ እየሠራ መኾኑን ያስገነዘቡት ሰብሳቢው የተወረሱ ሕንፃዎችንና ቤቶችን ወደ ቤተ ክርስቲያን ለማስመለስ በሚደረገው ጥረት ልዩ ልዩ አስተዋጽዖ ላበረከቱ አካላት ኹሉ በቤተ ክርስቲያንና በአስመላሽ ኰሚቴው ስም ምስጋናቸውን አቅርበዋል፡፡

በተያያዘ ዜና በዐሥር ሚሊዮን ዐርባ ዘጠኝ ሺሕ ብር ወጪ የተገዙ ዐሥር ዘመናዊ መኪኖች ሥራ መጀመራቸውን መጋቤ ካህናት ኃይለ ሥላሴ ዘማርያም ለዝግጅት ክፍላችን ተናግረዋል፡፡

የመኪኖቹ ሙሉ ወጪ የቤተ ክርስቲያኗ መኾኑን የጠቀሱት መጋቤ ካህናት ዐሥሩም መኪኖች የመጓጓዣ እጥረት ላለባቸው አህጉረ ስብከትና የጠቅላይ ቤተ ክህነት መምሪያዎች አገልግሎት እንዲሰጡ መደረጋቸውን አስታውሰው መኪኖቹ በአፋጣኝ ሥራ እንዲጀምሩ መደረጉም የስብከተ ወንጌል አገልግሎት ከዚህ ቀደሙ በተሻለ ኹኔታ እንዲከናወን ያደርጋል ብለዋል፡፡

በመጨረሻም መኪኖቹ በፍጥነት ወደ አገር ውስጥ እንዲገቡ ድጋፍ ላደረጉ የመንግሥት መሥሪያ ቤቶች መጋቤ ካህናት ኃይለ ሥላሴ በቤተ ክርስቲያኗ ስም ምስጋናቸውን ካቀረቡ በኋላ ለወደፊቱ ቤተ ክርስቲያን ስብከተ ወንጌልን ለማስፋፋት ለምታከናውናቸው ተግባራትና ንብረቶቿን ለማስመለስ ለምታደርጋቸው እንቅስቃሴዎች ውጤታማነት ‹‹መላው ሕዝበ ክርስቲያን በጸሎታቸውና በዐሳባቸው ድጋፍ ሊያደርጉ ይገባል›› ሲሉ ለምእመናን ጥሪያቸውን አስተላልፈዋል፡፡

ነሐሴ ፲፩ ቀን ፳፻፰ ዓ.ም

በይብረሁ ይጥና

ኹሉም ሕዝበ ክርስቲያን የድርሻውን ተወጥቶ የአብነት ትምህርት ቤቶች ተጠናክረው እንዲቀጥሉ ማድረግ ካልተቻለ የቤተ ክርስቲያንን አገልግሎት ለማስቀጠል አሳሳቢ መኾኑ ተገለጠ፡፡

በደቡብ ጎንደር ሀገረ ስብከት የሚገኙ የአብነት ት/ቤቶችን ጉዳይ በሚመለከት ሐምሌ ፳፬ ቀን ፳፻፰ ዓ.ም በዮድ አቢሲኒያ የምግብ አዳራሽ በተካሔደው ውይይት የአብነት ትምህርት ቤቶች ችግር ካልተቀረፈ ወደፊት የቤተ ክርስቲያን አገልጋዮችን ማግኘት አስቸጋሪ ነው ተብሏል፡፡

በዕለቱ የሰሜንና ደቡብ ጎንደር አህጉረ ስብከት ሊቀ ጳጳስ ብፁዕ አቡነ ኤልሳዕ እና የምዕራብና ደቡብ ምዕራብ አውሮፓ አህጉረ ስብከት ሊቀ ጳጳስ ብፁዕ አቡነ ሙሴ የአብነት ትምህርት ቤቶችን መከባከብ የኢትዮጵያ ኦርቶዶክስ ተዋሕዶ ቤተ ክርስቲያንን አገልግሎት ማስቀጠል መኾኑን በማስረዳት በመላው ዓለም የሚኖሩ ምእመናን በአንድነት ኾነው ለአብነት ት/ቤቶች መጠናከር የድርሻቸውን ሊወጡ እንደሚገባ መልእክት አስተላልፈዋል፡፡

በመርሐ ግብሩ ላይ የአብነት ትምህርት ቤቶችን ኹኔታ የሚዳስስ ጥናታዊ ጽሑፍ ያቀረቡት ዶ/ር አበባው ምናዬ የአብነት ትምህርት ቤቶችን ምንነትና ያሉባቸውን የምግብ፣ የቁሳቁስና የአልባሳት እጥረት፣ ወዘተ. የመሳሰሉ ችግሮች በመጥቀስ ችግሮቹ በዚህ ከቀጠሉ የቤተ ክርስቲያንን አገልግሎት እንደሚያደናቅፉ በጥናታቸው ጠቁመው የግንዛቤ ማስጨበጫ መርሐ ግብራትን ማዘጋጀትና የገቢ ማስገኛ ሥራዎችን ማከናወን ከችግሮቹ መፍትሔዎች መካከል የሚጠቀሱ ተግባራት መኾናቸውን አመላክተዋል፡፡

የጥናቱ አወያይ ዲ/ን ብርሃኑ አድማስ በበኩላቸው ‹‹ቤተ ክርስቲያን የምትጠበቀው ገዳማትና የአብነት ትምህርት ቤቶች ቀጣይነት ሲኖራቸው ነው፡፡ እስካሁን የት ነበርን ብሎ ወደ ኋላ ከማሰብ ይልቅ ዛሬም ጊዜው ገና ነውና በመላው የአገራችን ክፍሎች ለሚገኙ የአብነት ትምህርት ቤቶች ተግባራዊ የኾነ ሥራ በመሥራት ዘለቄታዊ መፍትሔ ማምጣት ይኖርብናል›› ብለዋል፡፡

በመጨረሻም የአብነት ትምህርት ቤቶች የሚረዱበትን ኹኔታ የሚያመቻች ሰባት አባላት የተካተቱበት ዐቢይ ኰሚቴ ከተዋቀረ በኋላ የውይይት መርሐ ግብሩ በበብፁዓን ሊቃነ ጳጳሳቱ ጸሎት ተፈጽሟል፡፡

ነሐሴ ፲ ቀን ፳፻፰ ዓ.ም

በዐርባ ምንጭ ማእከል

በኢትዮጵያ ኦርቶዶክስ ተዋሕዶ ቤተ ክርስቲያን ማኅበረ ቅዱሳን የዐርባ ምንጭ ማእከል ከጋሞ ጎፋ ሀገረ ስብከት፣ ከኮንሶ ወረዳ ቤተ ክህነትና ከወረዳ ማእከሉ ጋር በመተባበር ለ፴ ቀናት ያሠለጠናቸውን፤ በአካባቢው ቋንቋዎች ወንጌልን ማስተማር የሚችሉ ከኮንሶ እና ከደራ ማሎ ወረዳዎች የተውጣጡ ፴፫ ተተኪ ሰባክያንን ሲቀላ ደብረ ኃይል ቅዱስ ገብርኤል ደብር ቅፅር በሚገኘው የማኅበሩ ስብከተ ወንጌል አዳራሽ ነሐሴ ፯ ቀን ፳፻፰ አስመርቋል፡፡

በምረቃ ሥርዓቱ ላይም የጋሞ ጎፋ ሀገረ ስብከትና የኮንሶ ወረዳ ቤተ ክህነት ተወካዮች፣ የደብረ ኃይል ቅዱስ ገብርኤል እና የደብረ መንክራት ቅዱስ ሚካኤል አስተዳዳሪ ቆሞስ አባ ኃይለ ጊዮርጊስ ማሕጸንተ፣ ድጋፍ አድራጊ ምእመናንና የማእከሉ አባላት ተገኝተዋል፡፡

የሀገረ ስብከቱ ተወካይ መምህር ዮሐንስ አሻግሬ ‹‹ጌታችን መድኃኒታችን ኢየሱስ ክርስቶስ ሐዋርያትን በመላው ዓለም ዞረው ወንጌልን እንዲያስተምሩ እንደላካቸው ኹሉ፤ እናንተም በየአካባቢው ቋንቋ ወንጌልን በማስተማር አሕዛብን ከምእመናን ማኅበር እንድትጨምሯቸው አደራችንን እናስተላልፋለን›› ብለዋል፡፡

‹‹ምሩቃኑ ለስብከተ ወንጌል በምተሰማሩባቸው አካባቢዎች ኹሉ በሰበካ ጉባኤያት፣ በወረዳ ማእከላትና በሰ/ት/ቤቶች በአባልነት በመሳተፍ፣ ከካህናትና ከምእመናን ጋር በመግባባት ማገልገል ይጠበቅባችኋል›› ያሉት የማእከሉ ሰብሳቢ አቶ ደመላሽ ወንድማገኘሁ በበኩላቸው ለሰባክያኑ አገልግሎት ውጤታማነትም የሀገረ ስብከቱ፣ የወረዳ ቤተ ክህነቶችና የየአጥቢያ ሰበካ ጉባኤያት ክትትልና ድጋፍ እንዳይለያቸው አባቶችን አሳስበዋል፡፡

ሰብሳቢው አያይዘውም የጋሞ ጎፋ ሀገረ ስብከትን፣ የኮንሶ ወረዳ ቤተ ክህነትን፣ የደብረ ኃይል ቅዱስ ገብርኤል ሰበካ ጉባኤ ጽ/ቤትንና በጎ አድራጊ ምእመናንን ለሥልጠናው መሳካት ላበረከቱት አስተዋጽዖ በማእከሉ ስም ምስጋና አቅርበዋል፡፡

የማእከሉ ትምህርትና ሐዋርያዊ አገልግሎት ክፍል ሓላፊ አቶ እያያ ፍቃዴ በበኩላቸው ለሠልጣኞቹ በቤተ ክርስቲያን ታሪክ፣ ሥርዓተ ቤተ ክርስቲያን፣ ሐዋርያዊ ተልእኮ፣ የመጽሐፍ ቅዱስ ጥናት፣ ነገረ ማርያም፣ ነገረ ቅዱሳን፣ ነገረ ሃይማኖት እና የቤተ ክርስቲያን አስተዳደራዊ መዋቅር ላይ ትኩረት ያደረገ ሥልጠና ከመሰጠቱ ባሻገር በተሐድሶ መናፍቃን እንቅስቃሴ ዙሪያም የግንዛቤ ማስጨበጫ ትምህርት እንዲያገኙ መደረጉን አስታውቀዋል፡፡

በመጨረሻም መጽሐፍ ቅዱስን ጨምሮ ልዩ ልዩ የትምህርተ ሃይማኖት መጻሕፍት ለምሩቃኑ ከተበረከቱ በኋላ በአባቶች ጸሎት የምረቃ ሥርዓቱ ተፈጽሟል፡፡

የዐርባ ምንጭ ማእከል በ፳፻፯ ዓ.ም በተመሳሳይ አርእስት ፳፮ ተተኪ ሰባክያንን አሠልጥኖ ለአገልግሎት እንዲሰማሩ ማድረጉ የሚታወስ ነው፡፡

ነሐሴ ፬ ቀን ፳፻፰ ዓ.ም

በአሜሪካ፣ በአውሮፓና በጎንደር ማእከላት

በኢትዮጵያ ኦርቶዶክስ ተዋሕዶ ቤተ ክርስቲያን የሰንበት ትምህርት ቤቶች ማደራጃ መምሪያ ማኅበረ ቅዱሳን የአሜሪካ ማእከል በፕሪንስተን ዩኒቨርሲቲ ልዩ ዐውደ ጥናት እንደሚያካሒድ ሐምሌ ፮ ቀን ፳፻፰ ዓ.ም ባወጣነው ዘገባ ማስነበባችን ይታወሳል፡፡

በዚህ መሠረት ማእከሉ ከፕሪንስተን ዩኒቨርሲቲ እና የሴሜቲክና የአፍሮ እስያ ከፍተኛ ምርምርና ጥናት ተቋም (The Institute for Advanced Semitic Studies and Afro Asiatic Studies) ክፍል ጋር በመተባበር ባዘጋጀው መርሐ ግብር ‹‹የኢትዮጵያ ኦርቶዶክስ ተዋሕዶ ቤተ ክርስቲያን አስተዋጽዖ›› በሚል ርእስ ሐምሌ ፳፬ ቀን ፳፻፰ ዓ.ም በፕሪንስተን ዩኒቨርሲቲ ልዩ ዐውደ ጥናት ተካሒዷል።

በዐውደ ጥናቱ በጥናት አቅራቢነት የተሳተፉትን ፕሮፌሰር ኤፍሬም ይስሐቅን ጨምሮ የኢትዮጵያ ኦርቶዶክስ ተዋሕዶ ቤተ ክርስቲያን መምህራንና ካህናት፣ የማኅበረ ቅዱሳን አባላት፣ የሰንበት ት/ቤት ወጣቶች፣ የፕሪንስተን ዩኒቨርሲቲ ምሁራንና ጥሪ የተደረገላቸው የውጭ አገር ዜጎች ተገኝተዋል፡፡

በአማርኛ እና በእንግሊዝኛ ቋንቋዎች በተካሔደው በዚህ ዐውደ ጥናት የኢትዮጵያ ኦርቶዶክስ ተዋሕዶ ቤተ ክርስቲያን ሰላምና ልማትን በማጠናከር፤ የተለያዩ የእምነት ተቋማትና የኅብረተሰብ ክፍሎች ተቻችለውና ተከባብረው ለዘመናት እንዲኖሩ በማስቻል፤ እንደዚሁም በሥነ ጽሑፍ፣ በቋንቋ፣ በዜማ ጥበብ እና ልዩ ልዩ ዘርፎች ለዓለም ያበረከተችውን አስተዋጽዖ የሚዳስሱ ዝግጅቶች ቀርበው ውይይት ተደርጎባቸዋል።

አንዳንድ የዐውደ ጥናቱ ተሳታፊዎች በሰጡት አስተያየት ቅድስት ቤተ ክርስቲያንን ለዓለም የማስተዋወቁን ሥራ ማኅበሩ አጠናክሮ እንዲቀጥል አሳስበው እንደዚህ ዓይነቱ የዓውደ ጥናት መርሐ ግብር ለቤተ ክርስቲያን ብቻ ሳይኾን በመላው ዓለም ለሚኖሩ ኢትዮጵያውያን ኹሉ ትልቅ ርካታን እንደሚሰጥና የአገራችንን ታሪክ ለዓለም ለማስተዋወቅም ከፍተኛ ጥቅም እንደሚኖረው ጠቁመዋል።

በመጨረሻም ለዐውደ ጥናቱ መሳካት ቦታ በማመቻቸት፣ ቁሳቁስ በማሟላትና አስተርጓሚ ባለሙያዎችን በመመደብ የፕሪንስተን ዩኒቨርሲቲ ላደረገው ከፍተኛ ትብብር እንዲሁም ለጥናት አቅራቢዎችና ተሳታፊዎች የማኅበሩ ተወካይ ምስጋናቸውን አቅርበው ወደፊትም ይህን መሰል ዓውደ ጥናቶችን ማእከሉ በዓለም አቀፍ ደረጃ ዕውቅና ካላቸው ዩኒቨርሲቲዎችና ተቋማት ጋር በተጠናከረ ኹኔታ እንደሚያካሒድ አስታውቀዋል፡፡

በተያያዘ ዜና የእንግሊዝ ንዑስ ማእከል ‹‹መዝሙሮቻችን ከየት ወዴት›› በሚል ርእስ ሐምሌ ፳፬ ቀን ፳፻፰ ዓ.ም የኖቲንግሃምና የአቅራቢያ ከተሞች ካህናትና ምእመናን፣ የሰንበት ት/ቤት መዘምራንና የንዑስ ማእከሉ አባላት በተገኙበት በኖቲንግሃም ከተማ የግንዛቤ ማስጨበጫ መርሐ ግብር ማካሔዱን የአውሮፓ ማእከል አስታውቋል።

የመርሐ ግብሩ ዋና ዓላማም በኢትዮጵያ ኦርቶዶክስ ተዋሕዶ ቤተ ክርስቲያን ስም እየታተሙ ገበያ ላይ የሚዉሉ የአማርኛ መዝሙራት ከያሬዳዊ ዜማ ጋር ያላቸውን ግንኙነት ማጥናትና የመፍትሔ አቅጣጫዎችን ማመላከት ሲኾን በዕለቱ በሦስት ዋና ዋና አርእስት ላይ ያተኮሩ ጥናታዊ ጽሑፎች ቀርበዋል፡፡ በእያንዳንዱ ገለጻ ላይም በአራቱ ወንጌላውያን ስም የተሰየሙ የቡድን ውይይቶች ተካሒደዋል።

በመርሐ ግብሩ በኢትዮጵያ ኦርቶዶክስ ተዋሕዶ ቤተ ክርስቲያን ዜማ፤ በአማርኛ መዝሙራት የይዘት ችግሮችና በቅዱስ ያሬድ ታሪክና ዜማዎቹ ላይ ያተኮረ ጥናታዊ ዘገባ በሊቀ ዲያቆናት ልዩ ወዳጅ፤ ‹‹የአማርኛ መዝሙራት በተለያዩ አዝማናት›› በሚል ርእስ በመጋቤ ሠናይ ሳምሶን ሰይፈ፤ ‹‹በኢትዮጵያ ኦርቶዶክስ ተዋሕዶ ቤተ ክርስቲያን ስም የወጡ መዝሙራት፣ የመናፍቃን መዝሙራት ተመሳሳይነትና ምን እናድርግ›› በሚል ርእስ በዲ/ን ዶ/ር አዳነ ካሣ ጥናታዊ ጽሑፎች ቀርበዋል።

የመጀመሪያዉ ዙር የግንዛቤ ማስጨበጫ መርሐ ግብር በጥር ወር ፳፻፰ ዓ.ም በበዓለ ጥምቀት ዋዜማ በበርሚንግሃም ከተማ ተዘጋጅቶ የነበረ ሲኾን በኖቲንግሃም ከተማ የተዘጋጀው ይህ መርሐ ግብር ሁለተኛው ዙር መኾኑን ከእንግሊዝ ንዑስ ማእከል የተላከልን መረጃ ያመለክታል።

በጉባኤው ላይ የተገኙ ምእመናን በማጠቃለያዉ ላይ በሰጡት አስተያየት መሠረትም በ፳፻፱ ዓ.ም ሦስተኛ ዙር መርሐ ግብር በለንደን ከተማ ለማካሔድ ዕቅድ መያዙንም ንዑስ ማእከሉ ጨምሮ ገልጾልናል።

በመጨረሻም የአዉሮፓ ማእከል ትምህርትና ሐዋርያዊ አገልግሎት ክፍል፤ የእንግሊዝ ንዑስ ማእከል አባላት፤ የልዩ ልዩ አብያተ ክርስቲያናት አገልጋይ ካህናትና ምእመናን ለመርሐ ግብሩ መሳካት ላበረከቱት ልዩ ልዩ አስተዋጽዖ ንዑስ ማእከሉ በእግዚአብሔር ስም ከፍ ያለ ምስጋና አቅርቧል።

በተመሳሳይ የአገር ውስጥ ዜና የጎንደር ማእከል ሙያ አገልግሎት ክፍል ከሰሜን ጎንደር ሀገረ ስብከት እና ከጎንደር ከተማ አስተዳደር ባህል እና ቱሪዝም መምሪያ ጋር በመተባበር በጎንደር ከተማ ሲኒማ አዳራሽ ሐምሌ ፩ ቀን ፳፻፰ ዓ.ም የዐውደ ጥናት መርሐ ግብር ማካሔዱን የጎንደር ማእከል ዘግቧል፡፡

ማእከሉ ለዝግጅት ክፍላችን እንዳስታወቀው በዐውደ ጥናቱ ሊቃውንተ ቤተ ክርስቲያን፣ የዩኒቨርሲቲ መምህራን እና የማኅበሩ አባላት የተገኙ ሲኾን የዐውደ ጥናቱ ዓላማም መልካም እና መልካም ያልኾኑ ጉዳዮችን በመመርመር ለቤተ ክርስቲያን ውስጣዊ እና ውጫዊ ችግሮች መፍትሔዎችን ለመጠቆም መኾኑን የጎንደር ማእከል የሙያ አገልግሎት ክፍል ሰብሳቢ ዶ/ር አገኘሁ ተስፋ ተናግረዋል፡፡

ጥናት እና ምርምር ለቤተ ክርስቲያን ያለውን ፋይዳ የተመለከተ ጥናታዊ ጽሑፍ ያቀረቡት ዶ/ር መሠረት ካሤ ጥናትና ምርምር የጎደለውን ለመሙላት፣ የተበተነውን ለመሰብሰብ፣ የተጎዳውን ለመጠገን፣ የጠፋውን ለመፈለግ፣ የተቀበረውን ለማውጣት ዓይነተኛ መንገድ መኾኑን ገልጸው ‹‹የአገራችን የኪነ ጥበብ፣ የሕግ፣ የዘመን አቈጣጠር፣ የባህል እና የማኅበራዊ ሕይወት ዕውቀቶች እና ተግባራዊ ልምምዶች በቀደሙት የቤተ ክርስቲያን ሊቃውንት የተቀመሩ የምርምር ውጤቶች ናቸው›› ሲሉ አስረድተዋል፡፡

ሌላኛዋ ጥናት አቅራቢ ወ/ሪት መሠረት ሐሰን ደግሞ ‹‹ሉላዊነት በባህል እና በእምነት ላይ ያለው ተጽዕኖ›› በሚለው ጥናታቸው በአገራችን በኢትዮጵያ እየተለመዱ የመጡት ከትዳር አጋር ውጭ ጾታዊ ግንኙነት መፈጸም፣ ግብረ ሰዶም፣ ሥርዓት ያጣ አለባበስ፣ ወዘተ የመሳሰሉት ተግባራት የሴኪዩላር ሂዩማኒዝም ምልክቶች መኾናውን አስገንዝበዋል፡፡

አቶ ማርሸት ግርማይ በበኩላቸው ‹‹Rethinking Ethiopian Educational System from the Ethiopian Orthodox Church፤ የኢትጵያን ሥርዓተ ትምህርት ከኢትዮጵያ ኦርቶዶክስ ተዋሕዶ ቤተ ክርስቲያን ሥርዓተ ትምህርት አንጻር እንደገና ማየት›› በሚል ርእስ ባቀረቡት ጥናታቸው ዘመናዊው ትምህርት ከቤተ ክርስቲያን ሥርዓተ ትምህርት ተሞክሮ መውሰድ እንደሚገባው ጠቁመዋል፡፡

የጎንደር ማእከልም ለጥናቱ መሳካት ልዩ ልዩ አስተዋጽዖ ያበረከቱትንና ጥናት አቅራቢዎችን በእግዚአብሔር ስም አመስግኗል፡፡

ከየማእከላቱ የደረሱን ዘገባዎች እንዳስታወሱት ኹሉም ዐውደ ጥናቶች በአባቶች ጸሎት ተጀምረው በአባቶች ጸሎት ተፈጽመዋል፡፡