Archive for category: ስብከት

ጥቅምት ፲፰ ቀን ፳፻፱ ዓ.ም

ማኅበረ ቅዱሳን ባዘጋጀው አዲስ ስልታዊ ዕቅድ የስብከተ ወንጌል አገልግሎቱን የበለጠ ለማጠናከርና ከባለድርሻ አካላት ጋር እንዴት በቅንጅት ተቀራርቦ መሥራት እንደሚቻል የሚያመለክቱ ጥናታዊ ጽሑፎች መስከረም ፳፱ ቀን ፳፻፱ ዓ.ም በማኅበሩ አዳራሽ ቀርበው ውይይት ተደርጎባቸዋል፡፡ በጥናቶችም ማኅበራዊ ድረ ገጾችን በስፋት ለስብከተ ወንጌል አገልግሎት መጠቀም እንደሚገባ ተጠቁሟል፡፡

ዲያቆን ያረጋል አበጋዝ

በዐውደ ጥናቱ ‹‹ኦርቶዶክሳዊ አስተምህሮን ለማስፋፋት ፈታኝና ምቹ ኹኔታዎች›› በሚል ርእሰ ጉዳይ ጥናት ያቀረቡት ዲያቆን ያረጋል አበጋዝ የኢትዮጵያ ኦርቶዶክስ ተዋሕዶ ቤተ ክርስቲያን በየዘመናቱ የስብከተ ወንጌል አገልግሎት ስትሰጥ ብትቆይም ከ፲፱፻፹-፲፱፻፺ ዓ.ም የነበራት ሐዋርያዊ አገልግሎት ይበልጥ የተጠናከረ እንደ ነበረ ጠቅሰው ለዚህም በወቅቱ የሰባክያነ ወንጌል ቍጥር መጨመር፣ የሰንበት ትምህርት ቤቶች አገልግሎት መስፋፋትና ምእመናን ስለ ሃይማኖታቸው ለማወቅ ያላቸው ፍላጎት ከፍተኛ መኾን የመሳሰሉት ጉዳዮች ለሐዋርያዊ አገልግሎት መፋጠን ከፍተኛ አስተዋጽኦ እንዳበረከተ ገልጠዋል፡፡

ዲ/ን ያረጋል አያይዘውም ኦርቶዶክሳዊ መንፈስና መረዳት ያላቸውን ሰባክያነ ወንጌል በብዛት በመመደብ ኦርቶዶክሳዊ ትምህርት መስጠት የስብከተ ወንጌል አገልግሎትን ወደተሻለ ደረጃ ለማሸጋገር እንደሚያስችል አስረድተዋል፡፡

ዲያቆን ዶ.ር ቴዎድሮስ

‹‹በስብከተ ወንጌል የአኃት አብያተ ክርስቲያናት ተሞክሮ›› በሚል ርእስ ባዘጋጁት ጥናታቸው የመጀመሪያዎቹን ሦስቱን ዓለም አቀፍ የቤተ ክርስቲያን ጉባኤያት የሚቀበሉ ኦሬንታል (አኀት) አብያተ ክርስቲያናት እንደሚባሉ ያስታወሱት ዲያቆን ዶክተር ቴዎድሮስ በለጠ ደግሞ ስብከተ ወንጌልን አጠናክሮ ለመቀጠል መልካም አጋጣሚዎችንና ተግዳሮቶችንም በጥናታቸው ዘርዝረዋል፡፡

‹‹የስብከተ ወንጌል አገልግሎት ተግዳሮቶችና መልካም አጋጣሚዎች›› በሚል ርእስ ጥናት ያቀረቡት አቶ ፋንታኹን ዋቄ በበኩላቸው እምነታቸውን በሕይወት የሚገልጡ ምእመናን መበራከት፣ የምእመናን መንፈሳዊ ሕይወት መጠናከር፣ የጉባኤ ቤት መምህራን እነሱን አክለውና መስለው የሚያገለግሉ ሊቃውንትን መተካትና የአፅራረ ቤተ ክርስቲያንን እንቅስቃሴ መግታት መቻል የቤተ ክርስቲያን ሐዋርያዊ አገልግሎት መጠናከር መገለጫዎች መኾናቸውን ገልጠዋል፡፡

አቶ ፋንታኹን ዋቄ

‹‹የኦርቶዶክሳዊ ምእመን ተልእኮ ራስን መጠበቅ፣ ሌሎችን መጠበቅና በሌሎች ለመጠበቅ ፈቃደኛ መኾን ነው›› ያሉት አቶ ፋንታኹን አያያይዘውም የዓለም የዕውቀት ዐውድ ኢክርስቲያናዊ በኾኑ አካላት እንደተቃኘና ቴክኖሎጂውን ለጥፋትም ኾነ ለልማት መጠቀም እንደሚቻል ጠቅሰው ጊዜውን በቍሳዊ ነገር መለካትና ለመንፈሳዊ ሕይወት ትኵረት አለመስጠት በብዙዎች ዘንድ እንደሚስተዋል ተናግረዋል፡፡ ለዚህም መፍትሔው የስብከተ ወንጌል አገልጋዮችን በብዛትም በጥራትም በማፍራት ምእመናንን ከጥፋት መጠበቅ መኾኑን በጥናታቸው ጠቁመዋል፡፡

‹‹ስብከተ ወንጌልን ከማስፋፋት አንጻር የማኅበራዊ ድረ ገጾች አስተዋጽዖ›› የሚለው ጥናታዊ ጽሑፍ አቅራቢ አቶ ነጻነት ተስፋዬም ማኅበራዊ ድረ ገጾች የቤተ ክርስቲያን ሊቃውንት ከቦታ ቦታ ሳይንቀሳቀሱ ወንጌልን እንዲያስተምሩ፤ ምእመናንም ባሉበት ቦታ ኾነው እንዲማሩ የሚያስችሉ መሣሪያዎች መኾናቸውን አስገንዝበዋል፡፡

አቶ ነጻነት ጥንታዊቷና ታሪካዊቷ የኢትዮጵያ ኦርቶዶክስ ተዋሕዶ ቤተ ክርስቲያን ማኅበራዊ ድረ ገጾችን በተፈለገው መጠን እየተጠቀመች አለመኾኗን በማስታዎስ ማኅበራዊ ድረ ገጾችን በመጠቀም ለቤተ ክርስቲያን ተቆርቋሪና ለአገር አሳቢ ትውልድ ማፍራት እንደሚቻል አመላክተዋል፡፡

አቶ ነጻነት ተስፋዬ

በቤተ ክርስቲያን ወጥ የኾነ የድረ ገጽ አጠቃቀምና ተቋማዊ አደረጃጀት አለመኖር፣ የሃይማኖት አባቶች በማኅበራዊ ሚዲያ ላይ ያላቸው ግንዛቤ አነስተኛ መኾን፤ የአፅራረ ቤተ ክርስቲያን የቅሰጣ መልእክት፤ ማኅበራዊ ሚዲያውን የጥፋት መሣሪያ ብቻ አድርጎ ማሰብና የመሳሰሉት ችግሮች ማኅበራዊ ድረ ገጾችን ስንጠቀም ከሚገጥሙን መሰናክሎች መካከል እንደሚጠቀሱ አቶ ነጻነት አስገንዝበው የማኅበራዊ ድረ ገጾችን አጠቃቀም ከፍ ለማድረግም የአስተሳሰብ ለውጥ ማምጣት፤ የሌሎች አብያተ ክርስቲያናትን ልምድ መውሰድ፤ በስብከተ ወንጌል ላይ ብቻ ያተኰረ ትምህርት መስጠት፤ ሰባክያነ ወንጌል፣ የቤተ ክርስቲያን አባቶችና የሰንበት ትምህርት ቤት ወጣቶች የራሳቸው ድረ ገጽ እንዲኖራቸውና የእርስ በእርስ ግንኙነት እንዲፈጥሩ ማድረግ አስፈላጊ መኾኑን አስገንዝበዋል፡፡

በመጨረሻም ማኅበራዊ ድረ ገጾች ስብከተ ወንጌልን ለማስፋፋት ዓይነተኛ ሚና እንዳላቸው ኹሉ በአግባቡ ካልተጠቀምንባቸው ደግሞ የሚያስከትሉት ጉዳት ከፍተኛ ስለሚኾን ጉዳታቸውን ከጥቅማቸው በመለየት መጠቀም እንደሚገባ አቶ ነጻነት አስታውሰዋል፡፡

ምንጭ፡- ስምዐ ጽድቅ ጋዜጣ፣ ከጥቅምት ፲፮-፴ ቀን ፳፻፱ ዓ.ም፤ ገጽ ፩ – ፪፡፡

በዲያቆን ኤፍሬም የኔሰው

ጥቅምት ፲ ቀን ፳፻፱ ዓ.ም

የጉባኤው ተሳታፊዎች በከፊል

በኢትዮጵያ ኦርቶዶክስ ተዋሕዶ ቤተ ክርስቲያን በጠቅላይ ቤተ ክህነት የስብከተ ወንጌል አዳራሽ ከጥቅምት ፯ – ፲ ቀን ፳፻፱ ዓ.ም ለአራት ቀናት ሲካሔድ የቆየው ፴፭ኛው የሰበካ መንፈሳዊ አጠቃላይ መደበኛ ጉባኤ ተፈጸመ፡፡

በጉባኤው ብፁዕ ወቅዱስ ፓትርያርኩ፣ ብፁዕ ጠቅላይ ሥራ አስኪያጁ፣ ብፁዓን ሊቃነ ጳጳሳት፣ የጠቅላይ ቤተ ክህነት ምክትል ሥራ አስኪያጅና የየመምሪያ ሓላፊዎች፣ በመላው ዓለም የሚገኙ የኢትዮጵያ ኦርቶዶክስ ተዋሕዶ አብያተ ክርስቲያናት አህጉረ ስብከት ተወካዮች፣ የአድባራና ገዳማት አስተዳዳዎች፣ የማኅበረ ቅዱሳን አባላት፣ የመንግሥትና የግል መገናኛ ብዙኃን ጋዜጠኞች፣ እንደዚሁም ጥሪ የተደረገላቸው የአገር ውስጥና የውጪ አገር እንግዶች ተገኝተዋል፡፡

በፓትርያርኩ ርእሰ መንበርነት፣ በብፁዕ ጠቅላይ ሥራ አስኪያጁ መሪነት የተካሔደው ይህ ታላቅ የቤተ ክርስቲያን ጉባኤ ጥቅምት ፯ ቀን ፳፻፱ ዓ.ም በቅዱስ ፓትርያርኩና በብፁዓን ሊቃነ ጳጳሳት ጸሎተ ቡራኬ ከተከፈተበት ጊዜ ጀምሮ በቅዱስ ፓትርያርኩና በብፁዓን ሊቃነ ጳጳሳት ቃለ በረከት ተሰጥቷል፤ እንደዚሁም የኹሉም አህጉረ ስብከትና በጠቅላይ ቤተ ክህነት የልዩ ልዩ ክፍሎች ሪፖርቶች ቀርበዋል፡፡

በጉባኤው መክፈቻ ዕለት ‹‹እንዘ አልብነ ኵሉ ብነ፤ ምንም የሌለን ስንኾን ኹሉ የእኛ ነው፤›› /፪ኛ ቆሮ.፮፥፲/ የሚለውን ኃይለ ቃል መነሻ በማድረግ ቃለ በረከት የሰጡት ብፁዕ ወቅዱስ አቡነ ማትያስ ‹‹… እኛ ካህናት ኹሌም መጨነቅ ያለብን ስለ ሀብት ሳይኾን ስለ ምእመናን ጥበቃ ነው፡፡ ምእመናን ካሉ ሀብቱ አለና፡፡ ከኀምሳ ሚሊዮን በላይ ምእመናን ካሉንና በእነርሱ ላይ ተገቢ ጥበቃና አገልግሎት ካበረከትን የሚጐድልብን አንዳች ነገር አይኖርም፡፡ የሰበካ ጉባኤ ዐቢይ ተልእኮም ይኸው ነው፡፡ ሰበካ ጉባኤ እኛ ካህናት ሀብታሞች መኾናችንን ያረጋገጠ ወንጌላዊ መሣሪያ እንደ ኾነ ከቶዉኑ ልንዘነጋ አይገባም …›› ብለዋል፡፡

ቃለ ቡራኬያቸውን ሲያጠቃልሉም ‹‹… ሌት ተቀን በመሥራት ምእመናንን እንደ እግዚአብሔር ቃል በመጠበቅና በመንከባከብ እንደዚሁም የሚጠበቅብንን መልካም ሥነ ምግባር ኹሉ ለምእመናን በማድረግ የቤተ ክርስቲያናችንን ዕድገትና ሉዓላዊ ክብር እስከ መጨረሻው እንድናረጋግጥ መልእክታችንን በእግዚአብሔር ስም እናስተላልፋለን›› ሲሉ አባታዊ መመሪያ ሰጥተዋል፡፡

የመንበረ ፓትርያርክ ዋና ሥራ አስኪያጅ ብፁዕ አቡነ ዲዮስቆሮስ የጠቅላይ ቤተ ክህነት፣ የመምሪያዎችንና የድርጅቶችን የ፳፻፰ ዓ.ም የሥራ ዘመን ሪፖርት ለጉባኤው ያቀረቡ ሲኾን በድምፅ የተዘጋጀው መጽሐፍ ቅዱስ በቅዱስ ፓትርያኩ ቡራኬ መመረቁ፣ በአፋን ኦሮሞ የተዘጋጀው መጽሐፈ ቅዳሴ አገልግሎት ላይ መዋሉ፣ የ፳፬ ሰዓት የቴሌቭዥን ሥርጭት መጀመሩና በልዩ ልዩ የዓለም ክፍሎች አብያተ ክርስቲያናት መታነጻቸው በሪፖርቱ ውስጥ ከተካተቱ ተግባራት መካከል ይጠቀሳሉ፡፡

ከዚሁ ኹሉ ጋርም ማኅበረ ቅዱሳን ለአብነት መምህራንና ተማሪዎች ወርኃዊ የገንዘብ ድጎማና የቀለብ ድጋፍ ማድረጉ፤ በልዩ ልዩ አህጉረ ስብከት የአብነት ት/ቤቶችን፣ ዘመናዊ ት/ቤቶችንና የገቢ ማስገኛ ሕንጻዎችን ማስገነባቱ፤ እንደዚሁም በኢትዮጵያ በሚገኙ ፬፻፮ ከፍተኛ የትምህርት ተቋማት የሚማሩ የግቢ ጉባኤ ተማሪዎችን በትምህርተ ወንጌል አሠልጥኖ ማስመረቁ፤ በደቡብ ኦሞ፣ በመተከልና በጋሞ ጎፋ አህጉረ ስብከት በድምሩ ዐሥራ ስምንት ሺሕ አምስት መቶ ሰባ ስምንት አዳዲስ አማንያንን አስተምሮ የሥላሴ ልጅነትን ማሰጠቱ፤ አዳዲስና ነባር የኅትመት ውጤቶችን አሳትሞ ማሠራጨቱ፤ በተጨማሪም ማኅበሩ በበጀት ዓመቱ በዕቅድ ያከናወነው ተግባርና ያኘው ገቢ ከነወጪና ቀሪው በብፁዕ ጠቅላይ ሥራ አስኪያጁ ሪፖርት ተገልጿል፡፡

ከአህጉረ ስብከት ሪፖርች መካከል የጋምቤላ ሀገረ ስብከት በአካባቢው ቋንቋ ወንጌልን በማስተማር የሥላሴን ልጅነት እንዲያገኙ ያደረጋቸውን የአካባቢው ተወላጅ የኾኑ የመንግሥት ሠራተኞችን በጉባኤው እንዲሳተፉ ማድረጉ በጉባኤው ተሳታፊዎች ዘንድ የተደነቀና እንደ ተሞክሮ የሚወሰድ ተግባር መኾኑ ታውቋል፡፡

የሰበካ መንፈሳዊ ጉባኤው በተከፈተበት ዕለት በብፁዕ ጠቅላይ ሥራ አስኪያጁ አቅራቢነት በምልአተ ጉባኤው በተመረጡ ቃለ ጉባኤ አርቃቂ አባላት አማካይነት ባለ ፳ ነጥብ የጋራ ዓቋም መግለጫ የተዘጋጀ ሲኾን በቅዱስ ሲኖዶስና በቅዱስ ፓትርያኩ የሚወጡ ልዩ ልዩ ድንጋጌዎችን መተግበር፣ በሕገ ቤተ ክርስቲያን መመራትና ሕግጋቱን ማስፈጸም፣ መንፈሳዊ አስተዳርን በማስፈንና ዘመናዊ ሒሳብ አያያዝን በመጠቀም ቤተ ክርስቲያንን ማገልገል፣ የሕገ ወጥ ሰባክያንንና የተሐድሶ መናፍቃንን እንቅስቃሴ መግታት፣ ለአብነት ት.ቤቶች ትኩረት መስጠት፣ ወጣቱ ትውልድ ቤተ ክርስቲያንን እንዲረከብ በትምህርተ ወንጌል አእምሮውን መገንባት፣ የተማረ የሰው ኀይልን የሚያካትቱ ተቋማትን ማስፋፋት፣ ወዘተ የመሳሰሉት ተግባራት በዓቋም መግለጨው ውስጥ ከተጠቀሱ ነጥቦች መካከል የሚጠቀሱ ናቸው፡፡

በጉባኤው ማጠቃለያ ጥቅምት ፲ ቀን ፳፻፱ ዓ.ም ቅዱስነታቸውን ጨምሮ ብፁዕ አቡነ ዲዮስቆሮስና ብፁዕ አቡነ ሕዝቅኤል ቃለ በረከትና ትምህርተ ወንጌል ከሰጡ በኋላ ላለፉት ሦስት ዓመታት ጠቅላይ ቤተ ክህነትን በዋና ሥራ አስኪያጅነት፣ ቅዱስ ሲኖዶስን በዋና ጸሐፊነት ለመሩት ለብፁዕ አቡነ ማቴዎስና ለብፁዕ አቡነ ሉቃስ፤ እንደዚሁም በበጀት ዓመቱ የተሻለ አፈጻጸም ላስመዘገቡ አህጉረ ስብከት የምስጋና የምስክር ወረቀትና ሽልማት ከቅዱስ ፓትርያርኩ ተበርክቶላቸዋል፡፡

በመጨረሻም የሰበካ መንፈሳዊ አጠቃላይ ጉባኤው በብፁዕ ወቅዱስ ፓትርያኩ ጸሎተ ቡራኬ ተፈጽሟል፡፡

መስከረም ፯ ቀን ፳፻፱ ዓ.ም

በዲያቆን ኤፍሬም የኔሰው

እግዚአብሔር አምላካችን በዕድሜ ላይ ዕድሜን እየጨመረ፣ በየጊዜያቱ ዘመናትን እያፈራረቀ አዲስ ዓመትን ያመጣልናል፡፡ አሁንም በእርሱ ቸርነት ለ፳፻፱ ዓመተ ምሕረት ደርሰናል፡፡ ወንጌላዊው ዮሐንስ በራእዩ ‹‹እነሆ ኹሉን አዲስ አደርጋለሁ … አዲስ ሰማይንና አዲስ ምድርንም አየሁ፤ ፊተኛው ሰማይና ፊተኛይቱ ምድር አልፈዋልና፡፡ ባሕርም ወደ ፊት የለም›› በማለት እንደ ተናገረው /ራእ.፳፩፥፩-፭/ በየጊዜው ዘመን እያለፈ አዲስ ዘመን ይተካል፡፡ እኛም ዘመን በመጣ ቊጥር ‹‹እንኳን አደረሳችሁ!›› እንባባላለን፡፡ ስለ ትናንትና እንጂ ስለ ነገ ባናውቅም እስከ ዛሬ ድረስ በመቆየታችን እንደሰታለን፡፡

ነገን በጉጉት ለሚናፍቅ ሰው በእውነትም ዓመት አልፎ ዓመት ሲተካ በጣም ያስደስታል፡፡ ነገር ግን ያለፈውን ዓመት ስንዋሽ፣ ስንሰርቅ፣ ስንዘሙት፣ ስንጣላ፣ ስንተማማ፣ ስንደባደብ፣ ስንሰክር አሳልፈን ከኾነ ‹‹እንኳን አደረሳችሁ!›› የሚለው ቃል ርግማን ይኾንብናል፡፡ በመኾኑም ስለ ተለወጠው ዘመን ሳይኾን ስላልተቀየረው ሰብእናችን፤ ስላልተለወጠው ማንነታችን፤ ስላልታደሰው ሥጋችን ማሰብ ይኖርብናል፡፡ በኀጢአት እየኖሩ ዐውደ ዓመትን ማክበር ራስን ያለ ለውጥ እንዲቀጥል ማበረታት ነውና ከምንቀበለው ዘመን ይልቅ መጪውን ዘመን ለንስሐ ለማድረግ መዘጋጀት ይጠበቅብናል፡፡ ያሳለፍነውን የኀጢአት ጊዜ እያሰብን እስከ ዛሬ ድረስ የጠበቀንን እግዚአብሔርን እያመሰገንን ሕይወታችንን በጽድቅ ልናድስ ይገባናል፡፡ በንስሐ ባልታደሰ ሕይወታችን በዕድሜ ላይ ዕድሜ ቢጨመርልን ለእኛም ለዘመኑም አይበጅምና፡፡ ‹‹ባረጀ ልብስ አዲስ እራፊ የሚያኖር የለም፤ መጣፊያው ልብሱን ይቦጭቀዋልና፡፡ መቀደዱም የባሰ ይኾናል›› እንዳለ ጌታችን በወንጌል /ማቴ.፱፥፲፯/፡፡

ስለዚህም ያለፈውን ዓመት በምን ኹኔታ አሳለፍሁት? በመጭው ዓመትስ ምን ማድረግ ይጠበቅብኛል? ልንል ይገባል፡፡ ያለ ክርስቲያናዊ ምግባር እየኖርን ዘመንን ብቻ የምንቈጥር ከኾነ ሕይወታችንን ከሰብኣዊነት ክብር ብሎም ከክርስቲያናዊ ሕይወት በታች እናደርገዋለን፡፡ ራስን ከጊዜ ጋር ማወዳደር መቻል ክርስቲያናዊ ሓላፊነት ነው፡፡ ይኸውም ጊዜ ሳይቀድመኝ ልቅደመው ብሎ ማሰብ መቻል ነው፡፡ በአሮጌ ሕይወት ውስጥ ኾነን ዓመቱን አዲስ ከማለት ይልቅ ከኀጢአት ወደ ጽድቅ በመሸጋገር ራሳችንን በጽድቅ ሥራ ማደስ ይበልጣል፡፡

በመሠረቱ ዘመን ራሱን እየደገመ ይሔዳል እንጂ አዲስ ዓመት የለም፡፡ ሰዓታትም ዕለታትም እየተመላለሱ በድግግሞሽ ይመጣሉ እንጂ ከዚህ በፊት ያልነበረ ሰዓት ወይም ቀን ወይም ደግሞ ወር አለዚያም ዓመት የለም፡፡ ወርኀ መስከረምም ለብዙ ሺሕ ዓመታት ራሱን እየደገመ በየዓመቱ አዲስ ሲባል ይኖራል እንጂ ሌላ መስከረም የለም፡፡ ‹‹የኾነው ነገር እርሱ የሚኾን ነው፤ የተደረገውም ነገር እርሱ የሚደረግ ነው፡፡ ከፀሐይም በታች አዲስ ነገር የለም፡፡ ማንም ‹እነሆ ይህ ነገር አዲስ ነው› ይል ዘንድ ይችላልን? እርሱ ከእኛ በፊት በነበሩት ዘመናት ተደርጎአል›› እንዳለ ጠቢቡ ሰሎሞን /መክ.፩፥፱-፲/፡፡

ስለ ኾነም ምንም እንኳን ሕይወታቸውን በሙሉ በጽድቅ የሚያሳልፉ ወይም በንስሐ የሚኖሩ ብዙ ጻድቃን ቢገኙም ሰውነታችንን ጥለን የምንኖር ኀጥኣን ግን በኀጢአት ያሳለፍነውን ዘመን በማሰብ መጭውን ዘመን ለመልካም ሥነ ምግባር ልናውለው፤ አንድም ለንስሐ መግቢያ ልናደርገው ያስፈልጋል፡፡ ቅዱስ ጴጥሮስ ‹‹የአሕዛብን ፈቃድ ያደረጋችሁበት፤ በመዳራትና በሥጋ ምኞትም፣ በስካርም፣ በዘፈንም፣ ያለ ልክም በመጠጣት፣ ነውርም ባለበት፣ በጣዖት ማምለክ የተመላለሳችሁበት ያለፈው ዘመን ይበቃል›› በማለት አስተምሮናልና /፩ኛጴጥ.፬፥፫/፡፡

ስለዚህም በዚህ አዲስ ዓመት ከክፉ ምግባር ኹሉ ተለይተን፣ ከዚህ በፊት በሠራነው ኀጢአታችን ንስሐ ገብተን ለወደፊቱ በጽድቅ ሥራ ኖረን እግዚአብሔርን ልናስደስት ይገባናል፡፡ ‹‹ይደልወነ ከመ ንግበር በዓለ ዐቢየ በኵሉ ንጽሕና እስመ ይእቲ ዕለት ቅድስት ወቡርክት፡፡ ወንርኀቅ እምኵሉ ምግባራት እኩያት፡፡ ወንወጥን ምግባራተ ሠናያተ ወሐዲሳተ በዘቦቶን ይሠምር እግዚአብሔር፤ አሁንም በፍጹም ንጽሕና ታላቅ በዓልን አድርገን ልናከብር ይገባናል፡፡ ይህቺ ዕለት ከሌሎች ዕለታት ተለይታ የተባረከች ናትና፡፡ ከክፉ ሥራዎችም ኹሉ ተለይተን እግዚአብሔር ደስ የሚሰኝባቸውን አዳዲስ የኾኑ በጎ ሥራዎችን እንሥራ›› ተብሎ እንደ ተጻፈ /መጽሐፈ ስንክሳር፣ መስከረም ፩ ቀን/፡፡

ዘመን አዲስ የሚባለው እኛ ሰዎች (ክርስቲያኖች) ሕይወታችንን በጽድቅ ስናድስ ነው፡፡ ያለ መልካም ሥራ የሚመጣ ዓመት፤ ከክፉ ግብር ጋር የምንቀበለው ዘመን አዲስ ሊባልም፣ ሊኾንም አይችልም፡፡ የሰው ልጅ መንፈሳዊ ሕይወት በመልካም ሥራ ሲዳብር ግን መጭው ዘመን ብቻ ሳይኾን ያለፈውም አዲስ ነው፡፡ ለአዲስ ዓመት አዲስ ሕይወት እንደሚያስፈልግ በመረዳት ራሳችንን በንስሐ ሳሙና አሳጥበን በንጽሕና ልንኖር ያስፈልጋል፡፡ ‹‹ታጠቡ፤ ሰውነታችሁንም አንጹ፡፡ የሥራችሁን ክፋት ከዓይኔ ፊት አስወግዱ፡፡ ክፉ ማድረግን ተዉ፡፡ አንጽሑ ነፍሰክሙ ወነጽሩ ነፍስተክሙ፤ ልባችሁን አንጹ፤ ሰውነታችሁንም ንጹሕ አድርጉ›› ተብለን ታዝዘናልና /ኢሳ.፩፥፲፮፤ መጽሐፈ ኪዳን/፡፡

የተወደዳችሁ ምእመናን ‹‹ዐዘቅቱ ኹሉ ይሙላ፤ ተራራውና ኮረብታውም ኹሉ ዝቅ ይበል፡፡ ጠማማውም የቀና መንገድ ይኹን፡፡ ሸካራውም መንገድ ትክክል ይኹን፡፡ ሥጋም የለበሰ ኹሉ የእግዚአብሔርን ማዳን ይይ›› ተብሎ እንደ ተነገረው /ሉቃ.፫፥፫-፮/ በኑፋቄ የጎደጎደው ሰውነታችንን በቃለ እግዚአብሔር በመሙላት፤ በትዕቢት የደነደነውን ተራራውን ልቡናችንን በትሕትና በማስገዛት፤ በክፋት የተጣመመው አእምሯችንን በቅንነት በማስጓዝ፤ በኀጢአት የሻከረውን ልቡናችንን በንስሐ በማስተካከል አዲሱን ዓመት የመልካም ምግባር ዘመን እናድርገው፡፡ በተጨማሪም ቅዱስ ጳውሎስ ‹‹እንግዲህ ያለ እርሾ እንዳላችሁ አዲሱን ሊጥ ትኾኑ ዘንድ አሮጌውን እርሾ አስወግዱ›› በማለት እንዳዘዘን /፩ኛቆሮ.፭፥፯/፣ በኀጢአት እርሾ የተበከለውን ሰውነታችንን በጽድቅ ሕይወት እናድሰው፡፡ በአዲሱ ዓመት በክርስቲያናዊ ምግባር መኖር ከቻልን ከጊዜ ጋር የሚጣጣም አዲስ ሕይወት ይኖረናል ማለት ነው፡፡

ወስብሐት ለእግዚአብሔር፡፡

ነሐሴ ፳፱ ቀን ፳፻፰ ዓ.ም

በዲያቆን ኤፍሬም የኔሰው

በኢትዮጵያ ኦርቶዶክስ ተዋሕዶ ቤተ ክርስቲያን ሰንበት ት/ቤቶች ማደራጃ መምሪያ የማኅበረ ቅዱሳን ኛው ጠቅላላ ጉባኤ ከነሐሴ ፳፯ ቀን ፳፻፰ ዓ.ም ጀምሮ በጠቅላይ ቤተ ክህነት ስብከተ ወንጌል አዳራሽና በማኅበሩ ሕንጻ እየተካሔደ ነው፡፡

ብፁዕ አቡነ ገብርኤል እና ብፁዕ አቡነ እንጦንስ

በጠቅላላ ጉባኤው መክፈቻ ዕለት ነሐሴ ፳፰ ቀን ፳፻፰ ዓ.ም ብፁዕ አቡነ ገብርኤል፣ ብፁዕ አቡነ እንጦንስ፣ በጠቅላይ ቤተ ክህነት የየመምሪያ ሓላፊዎች፣ ከአገር ውስጥና ከውጪ አገር ማእከላትና ወረዳ ማእከላት የመጡ የማኅበረ ቅዱሳን አመራር አባላት፣ የግቢ ጉባኤያት ተወካዮችና ተጋባዥ እንግዶች ተገኝተዋል፡፡

የጉባኤው ተሳታፊዎች በከፊል

ጠቅላላ ጉባኤው በብፁዓን ሊቃነ ጳጳሳት ጸሎት ከተከፈተበት ጊዜ ጀምሮ በቀኑ መርሐ ግብር በጠቅላይ ቤተ ክህነት፤ ማታ ደግሞ በማኅበሩ ሕንጻ በከፍተኛ ተሳትፎ በመከናወን ላይ የሚገኝ ሲኾን በጉባኤውም የማኅበሩ የሁለት ዓመታት አጠቃላይ የአገልግሎት ዕቅድ አፈጻጸምና የኦዲትና ኢንስፔክሽን ሪፖርቶች ቀርበው ጉባኤው ተወያይቶባቸዋል፡፡ እንደዚሁም ልዩ ልዩ ጥናታዊ ጽሑፎች በባለሙያዎች ቀርበዋል፡፡

የሥራ አመራር አባላት ዕጣ በብፁዕ አቡነ ሉቃስ ሲወጣ

በዛሬው ዕለትም የማኅበሩ ቀጣይ ስልታዊ ዕቅድ በተሳታፊዎች የቡድን ውይይት ተደርጎበታል፡፡ በመቀጠልም በሚቀጥሉት አራት ዓመታት ማኅበሩን የሚመሩ የሥራ አመራር አባላት በምልዓተ ጉባኤው በተሰየመው አስመራጭ ኰሚቴ አቅራቢነት በብፁዕ አቡነ ሉቃስ ቡራኬ በጸሎትና በዕጣ ተመርጠዋል፡፡

የማኅበረ ቅዱሳን ፲፪ኛው ጠቅላላ ጉባኤ ዛሬ ምሽት የሚጠናቀቅ ሲኾን ሙሉ ዘገባውንም በሌላ ዝግጅት ይዘን እንቀርባለን፡፡

ነሐሴ ፳፭ ቀን ፳፻፰ ዓ.ም

በአሜሪካ ማእከል

ዐውደ ርእዩ በአባቶች ቡራኬ ሲከፈት

በኢትዮጵያ ኦርቶዶክስ ተዋሕዶ ቤተ ክርስቲያን ማኅበረ ቅዱሳን በሚኒያ ፖሊስ ንዑስ ማእከል አዘጋጅነት ‹‹ማዕዶት ዘቤተ ጉባኤ ወገዳማት›› በሚል መሪ ቃል ከነሐሴ ፯-፰ ቀን ፳፻፰ ዓ.ም በሚኒያ ፖሊስ  ርእሰ አድባራት ጽርሐ አርያም ቅድስት ሥላሴ ካቴድራል ቅፅር ውስጥ የተካሔደውን ዐውደ ርእይ በርካታ ምእመናን እንደ ጐበኙት የሚኒያ ፖሊስ ንዑስ ማእከል አስታወቀ።

በዐውደ ርእዩ የኢትዮጵያ ኦርቶዶክስ ተዋሕዶ ቤተ ክርስቲያንና የገዳማት ታሪክ፣ የአብነት ትምህርት ቤቶች ሥርዓተ ትምህርትና ችግሮቶች፣ የደቀ መዛሙርቱ የኑሮ ኹኔታ፣ ማኅበሩ በገዳማትና በአብነት ት/ቤቶች ላይ እየሰጠው ያለው አገልግሎትና የተመዘገቡ ውጤቶች፣ እንደዚሁም ወደፊት ምእመናን ምን ማድረግ እንደሚጠበቅባቸው የሚያስገነዝቡ ነጥቦች በ፰ ክፍላተ ትዕይንት ተከፋፍለው ቀርበውበታል፡፡

ዐውደ ርእዩ በሚኒያ ፖሊስ ርእሰ አድባራት ጽርሐ አርያም ቅድስት ሥላሴ ካቴድራልና የሴንት ፖል ደብረ ገነት ቅድስት ማርያም ቤተ ክርስቲያን አስተዳዳሪዎች መልአከ አርያም ቆሞስ አባ ኃይለ ሚካኤል ሙላት እና መልአከ ገነት ቆሞስ አባ ዘርዐ ዳዊት ብርሃኔን ጨምሮ በአጥቢያዎቹ አገልጋይ ካህናትና ዲያቆናትም ተጐብኝቷል፡፡

ካህናትና ዲያቆናት የአብነት ሥርዓተ ትምህርትን ሲያሳዩ

የሚኒያ ፖሊስ ቅድስት ሥላሴ ካህናትና ዲያቆናት የአብነት ት/ት አሰጣጥ ሒደትን በክውን ትዕይንት መልክ ማቅረባቸው ለዐውደ ርእዩ ድምቀት ከመስጠቱ ባሻገር የቤተ ክርስቲያናችን ሊቃውንት በምን ዓይነት ሥርዓተ ት/ት አልፈው ለማዕረግ እንደሚደርሱ ጐብኚዎቹ ግንዛቤ እንዲኖራቸው አድርጓል፡፡

የዐውደ ርእዩ ጐብኚዎች በከፊል

ከጐብኚዎቹ መካከልም ጥቂት የማይባሉ ምእመናን በዐውደ ርእዩ መዘጋጀት የተሰማቸውን ደስታ በዕንባ ሲገልጹ የታዩ ሲኾን በአስተያየቶቻቸውም ማኅበሩ በየአገሩ እንደዚህ ዓይነት አስተማሪነት ያላቸውን መርሐ ግብራት ደጋግሞ እንዲያቀርብ አሳስበው ለዚህም የሚያስፈልገውን ኹሉ ድጋፍ ለማድረግ ፈቃደኛ መኾናቸውን ገልጸዋል፡፡

በመጨረሻም ለዐውደ ርእዩ መሳካት በገለጻ፣ በማስተባበርና ድጋፍ በማድረግ ከፍተኛ አስተዋጽዖ ያበረከቱ አባቶችን፣ የሰበካ ጉባኤ አመራሮችን፣ የሰንበት ት/ቤት ወጣቶችንና በጎ አድራጊ ምእመናንን ንዑስ ማእከሉ በማኅበረ ቅዱሳን ስም መንፈሳዊ ምስጋናውን አቅርቧል፡፡