በቃጠሎ የወደመውን ቤተ ክርሰቲያን ለመገንባት እንቅስቃሴ ተጀመረ

 

በእንዳላ ደምስስ

ጥር 15 ቀን 2011 ዓ.ም በቃጠሎ የወደመውን የመጥምቀ መለኮት ቅዱስ ዮሐንስ ቤተ ክርስቲያንን ለመገንባት እንቅስቃሴ መጀመሩን ሊቀ ኅሩያን መ/ር ወጋየሁ ደምሴ የባሌ ሀገረ ስብከት ጽ/ቤት ዋና ጸሐፊ ገለጹ፡፡

“በቃጠሎው ቤተ ክርስቲያኑ ሙሉ ለሙሉ ወድሞ ነው የደረስነው፡፡ ሕዝቡም ከፍተኛ ሐዘን ነው የተሰማው፡፡ ሁላችንም ልባችን ተሰብሮ በዕንባ ስንራጭ ነበር፡፡ ነገር ግን ሕዝቡ አልቅሶ ብቻ አልተበተነም፡፡ዕንባውን አብሶ ገንዘብ የማሰባሰቡን ሥራ በመጀመር የመፍትሔ እርምጃ ነው የወሰደው፡፡” ሲሉ የገለጹት የሀገረ ስብከቱ ዋና ጸሐፊ ናቸው፡፡ሀገረ ስብከቱ ካህናቱን፣ የሰበካ ጉባኤ አባላትን፣ የወረዳ ቤተ ክህነት ተወካዮችንና የሀገር ሽማግሌዎችን በማሰባሰብ ዘጠኝ አባላት ያሉት የሕንጻ አሰሪ ኮሚቴ በማዋቀር ቤተ ክርስቲያኑን በድጋሚ ለመገንባት ገንዘብ የማሰባሰብ ሥራው መጀመሩንና እስከ አንድ ሚሊዮን ብር ማሰባበሰብ መቻሉንም ጠቁመዋል፡፡

ከገንዘብ በተጨማሪም ምእመናን የአንገት ሐብላቻውንና የጣት ቀለበታቸውን በመስጠት፣ እናቶች ከመቀነታቸው እየፈቱ በመንፈሳዊ ስሜትና ቁጭት አቅማቸው የፈቀደውን ያህል ማበርከታቸውን ለዝግጅት ክፍላችን ተናግረዋል፡፡

ሙስሊሙ ኅብረተሰብም በቤተ ክርሰቲያኑ መቃጠል ከፍተኛ ሐዘን እንደተሰማውና በቦታው በመገኘት ገንዘብ በመለገስ፣ እንዲሁም የግንባታ እቃዎችን ለመስጠት ቃል በመግባት መሳተፋቸውን፣ ቤተ ክርስቲያኑን ለማሠራትም በመስጊድ ውስጥ ሙስሊሙን በማስተባበር ገንዘብ ለማሰባበስብ ጥረት እያደረጉ እንደሚገኙ የሀገረ ስብከት ጽ/ቤት ዋና ጸሐፊ ተናግረዋል፡፡

“በዛሬው ውሏችንም ለተቋቋመው የሕንጻ አሰሪ ኮሚቴ እወቅና ለመስጠት ሰበካ ጉባኤው ለወረዳው ቤተ ክህነት፣ የወረዳ ቤተ ክህነቱም ለሀገረ ስብከቱ ደረጃውን ጠብቆ በደብዳቤ በመጠየቅ እውቅና ተሰጥቷቸዋል፡፡” ያሉት ሊቀ ኅሩያን መ/ር ወጋየሁ የባንክ ሒሳብ (አካውንት) በመክፈትም ሕጋዊነት ባለው አሠራር ገቢ የማሰባሰብ ሂደቱ እንደቀጠለ ገልጸዋል፡፡

አገልግሎትን በተመለከተም ቤተ ክርስቲያኑ የስብከተ ወንጌል አዳራሽ ስላለው ከሰበካ ጉባኤውና ከሕንፃ አሰሪ ኮሚቴው ጋር በመመካከር አዳራሹን በማመቻቸት ሙሉ የቤተ ክርስቲያኑ አገልግሎት ማለትም ኪዳንና ቅዳሴ ሳይቋረጥ መቀጠሉንና የቃጠሎውን መንስኤ በተመለከተም የሕግ አካላት እያጣሩ መሆኑን ለዝግጅት ክፍላችን ገልጸዋል፡፡

በባሌ ሀገረ ስብከት የመጥምቀ መለኮት ቅዱስ ዮሐንስ ቤተ ክርስቲያን ተቃጠለ

በእንዳለ  ደምስስ

በባሌ ሀገረ ስብከት ሮቤ ከተማና አካባቢው ወረዳ ቤተ ክህነት ሥር የሚገኘው የመጥምቀ መለኮት ቅዱስ ዮሐንስ ቤተ ክርስቲያን ዛሬ ጥር 15 ቀን 2011 ዓ.ም ከረፋዱ 5፡00 ሰዓት ላይ ለጊዜው ባልታወቀ መንስኤ መቃጠሉን መ/ር ያሬድ ገ/ማርያም የወረዳው ቤተ ክህነት ጸሐፊ ገለጹ፡፡

የቃጠሎው መንስኤና የደረሰውን ጉዳት በተመለከተ በመጣራት ላይ እንደሚገኝ የገለጹት መ/ር ያሬድ፤ ቤተ ክርስቲያኑ በቃጠሎው ምክንያት ሙሉ ለሙሉ መውደሙንና በአገልጋዮችና በአካባቢው ምእመናን ጥረት ታቦቱን ብቻ ማዳን መቻሉን ለዝግጅት ክፍላችን ተናግረዋል፡፡ዝርዝሩን እንደደረሰን እናቀርባለን፡፡

 

በጥምቀት በዓል የሃይማኖት አባቶች የሰላም ጥሪያቸውን አስተላለፉ!

                                                                                                        ሕይወት ሳልለው
የጥምቀት በዓል አከባበር በጃንሜዳ እና በተለያዩ አብያተ ክርስቲያናት በድምቀት በተከበረበት ቀን፤ ብፁዕ ወቅዱስ አቡነ ማትያስ ፓትርያርክ ርእሰ ለቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት ባስተላላፉት መልእክት ላይ ምእመናን በተለይም ወጣቶች በፍቅርና በመቻቻል መኖር እንዳለባቸው አሳሰቡ፡፡“የዛሬ ፵ ዓመት የሆነውን ዓይነት አካሄድና ታሪካዊ ስሕተት እንዳትፈጽሙ ተጠንቀቁ! የምትሹትንና የምትመኙትን ማግኘት የምትችሉት አንድነትና ሰላም እስካለ ብቻ ነው፡፡ አርቆ በማየትና አስተውሎ በመራመድ፤በትዕግሥትና በመቻቻል ሳይሆን በኃይልና በጉልበት የምንፈልገውን ማግኘት እንችላለን ብላችሁ ከሆነ ሁሉንም ልታጡ ትችላላችሁና አስተውሉ!” በማለት ገልጸዋል፡፡

ብፁዕ ወቅዱስ አቡነ ማትያስ

ብፁዕ ወቅዱስ አቡነ መርቆሬዎስ፤ብፁዕ አቡነ ኒቆዲሞስ ፤ብፁዓን ሊቃነ ጳጳሳትን ጨምሮ፤እንዲሁም የባሕልና ቱሪዝም ሚኒስቴር ሚኒስትር ዶክተር ኂሩት ካሣው፤ ረ/ፕሮፌሰር ነቢዩ ባዬ የአዲስ አበባ ከተማ ባሕልና ቱሪዝም ጽሕፈት ቤት ኃላፊ እና ከተለያዩ ሥፍራዋች ለመጡ ምእመናን መልካም የጥምቀት በዓልን የተመኙት ፓትርያኩ፤ይህ በዓል የንስሓ ጥሪ መሆኑንም አስታውሰዋል፡፡“መንግሥተ ሰማያት ቀርባለችና ንስሓ ግቡ”፤ብሎ መጥምቀ መለኮት ቅዱስ ዮሐንስ እንዳስተማረን፤በዚህ አስከፊ ዘመን የንስሓን አስፈላጊነት መረዳትና መተግበር እንዳለብን አሳስበዋል፡፡
በዓለ ጥምቀት በዋነኛ የመዳን ሥርዓት መጀመሪያ መሆኑና ጌታችን መድኀኒታችን ኢየሱስ ክርስቶስ ጥር ፲፩ ቀን በዮርዳኖስ ወንዝ ተጠምቆ እኛ እንድንጠመቅ እንዳስተማረን “ወውእቱ ያጠምቀክሙ በመንፈስ ቅዱስ ወበእሳት፤ እርሱ በመንፈስ ቅዱስና በእሳት ያጠምቃችኋል፤”ተብሎ በሉቃስ ወንጌል ምዕራፍ ፫ ቁጥር ፲፮ ላይ እንደ ተገለፀውም ለእኛ ድኅነት ሆኖልናል፡፡

“ጥምቀት ማለት ሰፋ ያለ ትርጒም ቢኖረውም ምሥጢራዊ ትርጒሙን ጠቅለል አድርገን ስንመለከተው መንፃት፤መለወጥ፤ መሻገር፤ አዲስ ሕይወት፤ አዲስ ልደት፤ አዲስ ምሕረት የሚሉትን ሐሳቦች ያመሰጥራል” በማለትም ቅዱስ ፓትርያርኩ አብራርተዋል፡፡ብፁዕ ወቅዱስ አቡነ ጳውሎስ ማርቶማ የሕንድ ማላንካራ ኦርቶዶክስ ሶርያ ቤተ ክርስቲያን ፓትርያርክ፤የቅዱስነታቸውን ሐሳብ በመደገፍ እንዲህ በማለት መልካም ምኞታቸውን አስተላልፈዋል፡፡

ብፁዕ ወቅዱስ አቡነ ጳውሎስ ማርቶማ

“ይህ በዓል የብርሃን በዓል ቢሆንም እኛ እንደምናውቀው ዓለማችን በድቅድቅ ጨለማ የምትገኝ ሲሆን ለዚህ ጨለማ ብርሃን ያስፈልገዋል፡፡ የኢትዮጵያ ኦርቶዶክስ ተዋሕዶ ቤተ ክርስቲያን ለዓለም ተስፋ ናት፡፡ ምክንያቱም ይህን የመሰለ በዓል በየትኛውም ዓለም አይከበርምና፡፡እኛም በዚህ ታላቅ በዓል ወቅት በጸሎት ከእናንት ጋር ነን፤”በማለት ከማጽናናታቸውም በተጨማሪ በክርስቲያኖች መካከል መልካም የሆነና የጠነከረ ግንኙነት ሰላም እንዲኖር ያደረገ እግዚአብሔርን ዘወትር እንደሚያመሰግኑና እግዚአብሔር የኢትዮጵያ ኦርቶዶክስ ተዋሕዶ ቤተ ክርስቲያን እንዲጠብቅልንና ኢትዮጵያን እንዲባርክ በመመኘት መልእክታቸውን አስተላልፈዋል፡፡

የሊቃውንቱ ምንጭ እንዳይደርቅ ደቀ መዛሙርትን ማፍራት እንደሚገባ ተገለጸ

 

ተመራቂ ደቀ መዛሙርት

ዲ/ን ዘአማኑኤል አንተነህ

     የሊቃውንቱ ምንጭ እንዳይደርቅ ደቀ መዛሙርትን ማፍራት እንደሚገባ ብፁዕ አቡነ ኤልሳዕ በኢትዮጵያ ኦርቶዶክስ ተዋሕዶ ቤተ ክርሰቲያን የሰሜን ጎንደር ሀገረ ስብከት ሊቀ ጳጳስ ገለጹ፡፡

ብፁዕነታቸው ይህንን ቃል የተናገሩት በኢትዮጵያ ኦርቶዶክስ ተዋሕዶ ቤተ ክርስቲያን በሰሜን ጎንደር ሀገረ ስብከት በጎንደር ከተማ የደብረ ኃይል ወደብረ ጥበብ በዓታ ለማርያም ቤተ ክርስቲያን ለሦስት ተከታታይ ዓመታት የአቋቋም ትምህርት ሲከታተሉ የቆዩ ፶፬ ደቀ መዛሙርት ጥር ፫ ቀን ፳፻፲፩ ዓ.ም. ሲያስመርቅ ባስተላለፉት መልእከት ነው፡፡

በምርቃት መርሐ ግብሩ ላይ ብፁዕ አቡነ ኤልሳዕ የሰሜን ጎንደር ሀገረ ስብከት ሊቀ ጳጳስን ጨምሮ ብፁዕ አቡነ ዮሐንስ የብፁዕ አቡነ ኤልሳዕ ረዳት ሊቀ ጳጳስ የተገኙ ሲሆን፣ደቀ መዛሙርቱ ከብፁዓን ሊቃነ ጳጳሳቱ እጅ የአቋቋም የምስክር ወረቀት ተቀብለዋል፡፡

ብፁዕ አቡነ ኤልሳዕ ለደቀ መዛሙርቱ ባስተላለፉት መልእክት “እናንተ የምድር ጨው ናችሁ! ተመርቃችሁ ስትወጡ ብዙ ነገር ይጠበቅባችኋል፡፡ ጨው ሁናችሁ ዓለሙን የማጣፈጥ ኃላፊነት አለባችሁ” በማለት ተመራቂ ደቀ መዛሙርቱ በተማሩት ትምህርት ወንበር ዘርግተው በማስተማርና ለምእመናን ትምህርተ ወንጌልን በመስጠት በተለይም ለገጠሪቱ ቤተ ክርስቲያን በመድረስ የተጣለባቸውን አደራ እንዲወጡ አሳስበዋል፡፡

    ብፁዕነታቸው አያይዘውም “አሁን በዝታችሁ ትታያላችሁ፡፡ነገር ግን በአብያተ ክርስቲያናት ስትከፋፈሉ ቊጥራችሁ አነስተኛ ነው፡፡አሁንም ብዙ መሥራት፣መማር፣ ማስተማር እና የሊቃውንቱ ምንጭ እንዳይደርቅ ደቀ መዛሙርትን ማፍራት ይገባችኋል” ብለዋል፡፡

ብፁዕ አቡነ ዮሐንስ በበኩላቸው “ህየንተ አበዊኪ ተወልዱ ለኪ ደቂቅ፣ በአባቶችስ ፈንታ ልጆች ተወለዱልሽ” በማለት የቅዱስ ዳዊትን ቃል መነሻ በማድረግ ለደቀ መዛሙርቱ ባስተላለፉት መልእክት “እናንተ ደቀ መዛሙርት የዓለም ብርሃን ናችሁ፣ከዚህ ወጥታችሁ  አብያተ ክርስቲያናትን ሀገራችሁን በቅንነት በተሰጣችሁ አደራ እንድታገለግሉ አደራ እንላለን” ሲሉ መልእክታቸውን አስተላልፈዋል፡፡

የአቋቋም ምስክር ጉባኤ ቤቱ መምህር መጋቤ አእላፍ ክቡር ጥላሁን ያፈሯቸው ደቀ መዛሙርት የተማሩትን ትምህርት በተግባር ይተረጉሙ ዘንድ ከቤተ ክርስቲያን አባቶች ድጋፍ ሊደረግላቸው እንደሚገባ በመግለጽ “እነዚህ ደቀ መዛሙርት ዛሬ ተመርቀዋል፤ነገር ግን እየለመኑ ተምረው እየለመኑ መኖር የለባቸውም፡፡በርካታ ደቀ መዛሙርት ከትምህርት ገበታቸው የሚሰደዱት ሥራ አላገኝም እያሉ ነውና እንደ ዩኒቨርስቲ ተማሪዎች ሁሉ ቅዱስ ሲኖዶስ በየቤተ ክርስቲያኑ የሚመደቡበትን መንገድ ቢያመቻች ጥሩ ነው” ሲሉ አሳስበዋል፡፡

ክቡር መምህር መጋቤ አእላፍ  በጉባኤ ቤቱ የሚታየውን ችግር ሲያስረዱም “ማኀበረ ቅዱሳን ለጉባኤ ቤቱ ዘመናዊ ቤት ሰርቶልናል ነገር ግን አሁንም የሠርከ ኀብስቱ እጥረት አሳሳቢ ስለሆነ ለተማሪው ፍልሰት ምክንያት እየሆነብን ነውና መፍትሄ እንሻለን፡፡ደቀ መዛሙርቱ የሚማሩት ከየሀገራቸው ትንንሽ ልጆችን እያስመጡ ልጆቹ በየመንደሩ በመንቀሳቀስ “በእንተ ስማ ለማርያም”ብለው ምግብ ያመጡላቸዋል፡፡እነሱ ደግሞ እነዚህን ልጆች ያስተምሯቸዋል፡፡ አብያተ ክርስቲያናት ለአብነት ትምህርት ቤቶች ከዚህ በላይ ትኩረት ሰጥታ መሥራት አለባቸው ”ሲሉ ገልጸዋል፡፡

 ማኀበረ ቅዱሳን ለጉባኤ ቤቱ ባለ ሁለት ፎቅ ሕንፃ በ፳፻፰ ዓ.ም ሠርቶ ያስረከበ ሲሆን፣ ከሕንፃው በተጨማሪ ለ፶፭ ተማሪዎች ለእያንዳንዳቸው በየወሩ የ፫፻፹፭ ብር ድጋፍ ያደርጋል፤ ቤተ ክህነትም ለ፴ ተማሪዎች ለእያንዳንዳቸው ፹፬ ብር በየወሩ ይደጉማል፡፡ ማኅበረ ቅዱሳን ለጉባኤ ቤቱ ያሠራው ሕንፃም ቤተ መጻሕፍት፣ ክሊኒክ፣ የመምህር ቢሮ፣ ምግብ ቤት፣ መማሪያ ክፍልና መኖሪያ ለደቀ መዛሙርቱ ማሟላቱም በደቀ መዛመርቱ የምርቃት መርሐ ግብር ላይ ተገልጿል፡፡

ጉባኤ ቤቱ በርካታ ሊቃውንተ ቤተ ክርስቲያንን ያፈራ ሲሆን፤ ለአብነት ያህል አለቃ ገብረ ሐና፣መሪጌታ ሐሴት፣መሪጌታ ገብረ ማርያም፣ መሪጌታ ገብረ ዮሐንስ፣ መሪጌታ አሚር እሸቱ፣ መሪጌታ ላቀው፣ መምህር ክፍሌ ወልደ ፃድቅ፣ መጋቤ አእላፍ ሄኖክ ወልደ ሚካኤል እና አሁን በማስተማር ላይ የሚገኙት መጋቤ አእላፍ ክቡር ጥላሁን እና ሌሎችም ይጠቀሳሉ፡፡ በጉባኤ ቤቱም ማኅተሙን ለማግኘት ከሁለት እስከ ሦስት ዓመት ይፈጃል፡፡ በጉባኤ ቤቱ ከ፪፻ ያላነሡ ደቀ መዛሙርት በትምህርት ገበታ ላይ የሚገኙ ሲሆን፣ በየዓመቱም የደቀመዛሙርቱ ምርቃት አይቋረጥም፡፡

አሁን በማስተማር ላይ የሚገኑኙት መጋቤ አእላፍ ክቡር ጥላሁን ከመጋቤ እእላፍ ሄኖክ ወልደ ሚካኤል በ፲፱፻፺፯ ዓ.ም ወንበሩን በመረከብ እስከ አሁን ድረስ ከ፲፻ በላይ የሚሆኑ የአቋቋም መምህራንን አፍርተዋል፡፡

በብፁዕ አቡነ ኤልሳዕ እና በብፁዕ አቡነ ዮሐንስ ትምህርተ ወንጌል እና ቃለ ምዕዳን፣ በተጨማሪም በደቀ መዛሙርቱ ቅኔ እና ያሬዳዊ ወረብ ቀርቧል፡፡ በመርሐ ግብሩ ላይም የሀገረ ስብከቱ የመምሪያ ሓላፊዎች፣ የአብነት መምህራን እና ምእመናንም ተገኝተዋል፡፡

 

ሁለት አገልጋዮች በድንገተኛ የመኪና አደጋ ሕይወታቸው ዐለፈ

በካሣሁን ለምለሙ
የነቀምቴ ማእከል አገልጋይ የነበሩት ዲ/ን መልካሙ ረጋሳ እና ዲ/ን ሽፈራው ከበደ በገተማ ወረዳ ለአገልግሎት ሲፋጠኑ መስከረም ፳ቀን ፳፻፲፩ ዓ.ም በደረሰባቸው ድንገተኛ የመኪና አደጋ ሕይወታቸው ዐለፈ፡፡
ዘማሪ ዲ/ን መልካሙ ረጋሳ የነቀምቴ ማእከል ጸሐፊ የነበረ ሲሆን በ፲፱፻፹፮ ዓ.ም ከእናቱ ከወ/ሮ አሙሴ ተፈራ እና ከአባቱ አቶ ረጋሳ ተወለደ፡፡፡ ዘማሪ ዲ/ን መልካሙ ገና በልጅነቱ የብዙ ሙያዎች ባለቤት የነበረና የተለያዩ ጽሑፎችን፣ መንፈሳዊ ግጥሞችን እንዲሁም ዋሽትና ሌሎች መንፈሳዊ የዜማ መሣሪያዎችን ጭምር መጫወት የሚችል ነበረ፡፡ወንጌልን እየተዘዋወረ ከማስተማሩ በተጨማሪ በርካታ የመዝሙር ካሴቶችን አውጥቶ ለአገልግሎት አውሏል፡፡ ከልጅነቱ ጀምሮም ከቤተ ክርስቲያን ያልተለየና ዘወትር ቤተ ክርስቲያንን በዲቁናና በዝማሬ ሲያገለግል ቆይቷል፡፡
በ፳፻፭ ዓ.ም 12ኛ ክፍልን ካጠናቀቀ በኋላ መንፈሳዊ ሥዕላትን ይሥል ነበር፡፡ በአፋን ኦሮሞ የመዝሙር ካሴቶችን አበርክቷል፡፡ ዘማሪ ዲ/ን መልካሙ በትሕትና የሚታወቅና ያለ አባት ያሳደጉትን እናቱንና አያቱን በቻለው መጠን የሚረዳ ሲሆን በሰንበት ትምህርት ቤት ውስጥ ያሉ ሕፃናትን ዘወትር ነገረ ሃይማኖት የሚያስተምርና የዕድሜ እኩዮቹን የሚመክር በመሆኑ ለሁሉም ምሳሌ የሆነ ወጣት አገልጋይ ነበር፡፡
ዘማሪ ዲ/ን መልካሙ ለቅድስት ቤተ ክርስቲያን አገልግሎት ወደ ገተማ ደብረ ገነት ቅዱስ ጊዮርጊስ ቤተ ክርስቲያን ከአገልጋይ ወንድሙ ከዲ/ን ሽፈራው ከበደ ጋር እየሔዱ ሳለ መስከረም ፳ ቀን ፳፻፲፩ ዓ.ም በደረሰባቸው ድንገተኛ የመኪና አደጋ ከጠዋቱ አንድ ሰዓት አካባቢ በተወለደ በ፳፬ ዓመቱ ሕይወቱ ዐልፏል፡፡

ዘማሪ ዲ/ን መልካሙ ረጋሳ

ለሰንበት ትምህርት ቤት ወጣቶችና ጽዋ ማኅበራት የተሐድሶ መናፍቃንን ጥፋት በተመለከተ ሥልጠና ለመስጠት እንዲሁም የገተማ ወረዳ ማእከል አባላትን ለመቃኘት እየሔዱ በነበረበት ወቅት አደጋው እንደደረሰባቸው የነቀምቴ ማእከል ያደረሰን መረጃ ያመለክታል፡፡
ሌላኛው ድንገተኛ የመኪና አደጋ ደረሰበት ዘማሪ ዲ/ን ሽፈራው ከበደ ኢትቻ ሲሆን ከአባቱ ከአቶ ከበደ ኢትቻ እና ከእናቱ ከወ/ሮ እየሩስ አለቃ በ፲፱፻፹፫ ዓ.ም በምሥራቅ ወለጋ ኪራሙ ወረዳ ሶምቦ ቀበሌ ገበሬ ማኅበር ተወለደ፡፡
ከ፩-፲ኛ ክፍል በኪረሙ አንደኛ እና ሁለተኛ ደረጃ ትምህርት ቤት ትምህርቱን የተከታተለ ሲሆን ኤልፓ ኮሌጅ ጂማ ድስትሪክት የኮሌጅ ትምርቱን በጥሩ ውጤት አጠናቅቋል፡፡ በ፲፱፻፺፱ ዓ.ም በኪረሙ ቅድስት ሥላሴ ቤተ ክርስቲያን ዲቁናን ተቀብሎ ሲያገለግል ቆይቷል፡፡
በምዕራብ ወለጋ ባቦ ጋምቤላ ወረዳ፣ ህዳሴ ቴሌኮም ጋምቤላ፣ ነጆ ህዳሴ ተሌኮም እንዲሁም በነቀምቴ ከተማ ህዳሴ ቴሌኮም ውስጥ ከቤተ ክርስቲያን አገልግሎት በተጨማሪ ሀገሩን አገልግሏል፡፡
በኪረሙ ቅድስት ሥላሴ ሰንበት ትምህርት ቤት አባል እና ሥራ አስፈጻሚ የነበረ ሲሆን በማኅበረ ቅዱሳንም ከመደበኛ አባልነት ጀምሮ እስከ ሥራ አስፋጻሚነት አገልግሏል፡፡ በነጆ ወረዳ ማእከል ሒሳብና ንብረት ክፍል ሓላፊ እንዲሁም በነቀምቴ ማእከል ደግሞ የሰው ኃይል ልማት እና አስተዳደር በመሆን ሠርቷል፡፡
ዲ/ን ሽፈራው ከበደ የተሐድሶ መናፍቃን እንቅስቃሴ በተመለከተ ለምእመናንና ለአገልጋዮች በደብረ ገነት ቅዱስ ጊዮርጊስ ቤተ ክርስቲያን ሥልጠና ይሰጥ እንደነበር ተገልጧል፡፡በሕይወቱ ትሑት፣ ታዛዥ እና በሕዝበ ክርስቲያኑ ዘንድ የሚወደድና በአገልግሎቱም አርአያ የሆነ ወጣት አገልጋይ ነበረ፡፡ ዲ/ን ሽፈራው ከበደ ባለ ትዳር እና የአንድ ወንድ ልጅ አባት ነበረ፡፡
ለአገልግሎት እየሔደ እያለ መስከረም ፳ ቀን ፳፻፲፩ ዓ.ም በደረሰበት ድንገተኛ የመኪና አደጋ በተወለደ በ፳፯ ዓመቱ ከዚህ ዓለም በሞት ተለይቷል፡፡ ዝግጅት ክፍሉም ለቤተሰቦቻቸውና ለመላው ሕዝበ ክርስቲያን መጽናናትን እየተመኘን እግዚአብሔር አምላክ የሟቾቹን ነፍስ በአፀደ ገነት እንዲያኖር እንጸልያለን፡፡

ዲ/ን ሽፈራው ከበደ

ምንጭ፤ስምዐ ጽድቅ ጋዜጣ ፳፮ኛዓመት ቁ፪/ቅጽ ፳፮ ቁጥር ፫፻፺፭ ከጥቅምት፩-፲፭ ቀን፳፻፲ወ፩ ዓ.ም

“ከእንግዲህ በኋላ አብያተ ክርስቲያናትን ማቃጠልና ክርስቲያኖችን በጭካኔ መግደል በዝምታ አይታይም” ብፁዕ ሥራ አስኪያጅ

 

                                                       ቅድስት ኪዳነ ምሕረት ቤተ ክርስቲያን

በካሣሁን ለምለሙ

በአንዳንድ የሀገራችን ክፍሎች በተለየ መልኩ በኢትዮጵያ ኦርቶዶክስ ተዋሕዶ አብያተ ክርስቲያናት ላይ ያነጣጠረ ቃጠሎ፣ ዝርፊያ፣ እንዲሁም በክርስቲያኖች ላይ የሚካሔደው ጭካኔ የተሞላበት ግድያ ከእንግዲህ በኋላ በዝምታ ሊታይ እንደማይገባ የጠቅላይ ቤተ ክህነት ሥራ አስኪያጁ ብፁዕ አቡነ ዲዮስቆሮስ ገለጡ፡፡
ለሀገር ብዙ ዋጋ በከፈለችው ቅድስት ቤተ ክርስቲያንና በአማኞቿ ላይ ለበርካታ ዓመታት አረመናዊ ድርጊት በተደጋጋሚ ሲፈጸም ቆይቷል፡፡ እምነትን ትኵረት በማድረግ በአብያተ ክርስቲያናት ላይ ከፍተኛ በደል መፈጸሙን የጠቀሱት ብፁዕነታቸው በተለይም በጅማ፣ በጅግጅጋ፣ በኢሊባቡር እንዲሁም በባሌ ጎባ ችግሩ እጅግ በጣም የከፋ ከመሆኑ የተነሣ በርካታ አብያተ ክርስቲያናት ተቃጥለዋል፤ ምእመናን በጭካኔ በስለት ታርደዋል ካህናትም ተገድለዋል ብለዋል፡፡
በእነዚህ አካባቢዎች ዘግናኝ በደሎች ለወደፊቱ የሚፈጸሙ ከሆነ ወደ ፈጣሪ መጮኽ እንደተጠበቀ ሆኖ ከእንግዲህ በኋላ ግን በቤተ ክርስቲያኗም ሆነ በአማኞቿ ላይ የሚፈጸምን ጥቃት ለመመከት የምንገደድ ይሆናል፡፡ ቤተ ክርስቲኗም የሚሰማት ካገኘች መጮኽ እስካለባት አካል ድረስ ጩኾቷን ታሰማለች፡፡ ቤተ ክርስቲያናቸው እየተቃጠለ፤ እምነታቸው እየጠፋ መሆኑን ምእመናን በመገንዘብ ከእንግዲህ በኋላ የተከፈለው ሁሉ መሥዋዕት ተከፍሎ እራሳቸውንና ቤተ ክርስቲያናቸውን ሊጠብቁ እንደሚገባ ብፁዕነታቸው መልእክት አስተላልፈዋል፡፡
ሥጋ ወደሙ የሚፈተትባት ቅድስት ቤተ ክርስቲያን ስትቃጠል፤ ካህናትና ምእመናን እንደ ከብት ሲታረዱ ከእንግዲህ በኋላ ዝም ብሎ የሚያይ ምእመን ሊኖር እንደማይገባ ሥራ አስኪያጁ ገልጠው የእስከ አሁኑ ትዕግሥትና ዝምታ ቤተ ክርስቲያንን፣ ምእመናንንና ሃይማኖታችንን በእጅጉ እየጎዳ እንደሆነ ተናግረዋል፡፡
ለሀገርና ለወገን ባለውለታ የሆነች ቅድስትና ዓለም አቀፋዊት ቤተ ክርስቲያን እንደዚህ በዐደባባይ ክብሯ ዝቅ ብሎ የጥፋት ዱላ ሲያርፋባት በጣም ልብ ይነካል፡፡ በመሆኑም ቤተ ክርስቲያኗ ለሀገር ምሶሶ መሆኗ ለመንግሥት ያልተሰወረ በመሆኑ በቤተ ክርስቲያኗና በአማኞቿ ላይ የተቃጣውን እኵይና አርመኔዊ ተግባር በአፋጣኝ መፍትሔ ሊበጅለት እንደሚገባ አሳስበው፤ ካልሆነ ግን እየታረደና እየተቃጠለ ዝም የሚል ስለማይኖር የከፋ እልቂት እንዳይከተል ስጋታቸውን ተናግረዋል፡፡
መንግሥት፣ ሕዝብና ሕግ ባለበት ሀገር ኦርቶዶክሳዊ ክርስቲያኖችና ካህናት እንደ አውሬ ታድነው በጭካኔ መታረድ የለባቸውም፤ አብያተ ክርስቲያናት እንዲሁ መቃጠል የለባቸውም፤ ምእመናንም ከቤት ንብረታቸው መፈናቀል የለባቸውም በማለት ብፁዕነታቸው አሳስበዋል፡፡
ሐምሌ ፳፰ ቀን ፳፻፲ ዓ.ም በኢትዮጵያ ሶማሌ ክልል ጅግጅጋ ከተማ በተፈጸመው ሃይማኖት ተኮር ጥቃት አሥር አብያተ ክርስቲያናት መቃጠላቸው፣ ካህናትና ምእመናን መታረዳቸው እንዲሁም ሀብት ንብረታቸው መውደሙና መዘረፉ ይታወቃል፡፡ ስለሆነም የተቃጠሉ አብያተ ክርስቲያናትን መልሶ ለመገንባትና ሀብት ንብረታቸው የተዘረፈባቸውን ምእመናን እንደ ገና ለማቋቋም የተቋቋመ ኮሚቴ እንዳለ የገለጡት ብፁዕነታቸው በሀገር ውስጥና በውጭ ሀገር የሚኖሩ ምእመናን እጃቸውን በመዘርጋት የበረከቱ ተካፋይና የቤተ ክርስቲያኗ የቁርጥ ቀን ልጅ መሆናቸውን ሊያሳዩ እንደሚገባ ተናግረዋል፡፡
በውጭ ሀገር የሚገኙ ምእመናንም በቤተ ክርስቲያንና በአማኞቿ ላይ እየተፈጸመ ያለውን ጭካኔ የተሞላበት ዘግናኝ ድርጊት እግዚአብሔር እንዲያርቀው በጸሎት ከማሳሰብ በተጨማሪ በተገኘው አጋጣሚ ሁሉ ድምፃቸውን እንዲያሰሙ ብፁዕ ሥራ አስኪያጁ ጥሪ አቅርበዋል፡፡


ምንጭ  ስምዐ ጽድቅ ጋዜጣ ከነሐሴ16-ጳጉሜ5ቀን 2010ዓ.ም

በአሜሪካ የዲሲ ንዑስ ማእከል አቡነ ጎርጎርዮስ ትምህርት ቤት ተማሪዎችን አስመረቀ

ከአሜሪካ ማእከል
በማኅበረ ቅዱሳን በአሜሪካ የዲሲ ንዑስ ማእከል አቡነ ጎርጎርዮስ ትምህርት ቤት ነሐሴ ፲፪ ቀን ፳፻፲ ዓ.ም ለሰባት ወራት ያስተማራቸውን 64 ተማሪዎችን የተማሪ ወላጆችና የማኅበሩ አመራር አባላት በተገኙበት በሜሪላንድ ግዛት አስመረቀ፡፡
በምረቃው መርሐ ግብር ላይ የትምህርት ቤቱ አስተባባሪ ዲ/ን ሙሉጌታ ኃይለ ማርያም የማኅበሩን መልእክትና የአቡነ ጎርጎርዮስ ትምህርት ቤትን የ፳፻፲ ዓ.ም ሪፖርት አቅርበዋል፡፡
ዲ/ን ሙሉጌታ ኃይለ ማርያም “ከማኅበረ ቅዱሳን ዓላማዎች ልጆች የኢትዮጵያ ኦርቶዶክስ ተዋሕዶ ቤተ ክርስቲያንን ትምህርት፣ ሥርዓትና ትውፊት በመማር፣ ለአባቶቹ ተተኪ እንደሆን ማድረግ በመሆኑ ላለፉት ፳፯ ዓመታት ወደ ከፍተኛ የትምህርት ተቋማት በገቡ ወጣቶች ላይ ልዩ ትኩረት ሰጥቶ ሲሠራ ቆይቷል፤አሁንም እየሠራ ይገኛል” ብለዋል፡፡
አያይዘውም “ሥራው ብዙ ውጤት ያስገኘ ቢሆንም በሀገር ውስጥም ሆነ በውጭ ሀገር ከሚገኘው ወጣት የተተኪ ትውልድ ቊጥር አንጻር ሲታይ እጅግ በጣም አነስተኛ በመሆኑ አጥቢያ አብያተ ክርስቲያናትና ሰንበት ትምህርት ቤቶች ከሕፃናት በመጀመር ሲያስተምር ቆይቷል፡፡ ከመዋዕለ ሕፃናት ጀምሮ ማስተማር አስፈላጊ መሆኑን በመገንዘብ ከ፲፱፻፺፩ ዓ.ም ጀምሮ ሕፃናትና ወጣቶችን ተቀብሎ በማስተማር ላይ ይገኛል፡፡ በርካታ አብያተ ክርስቲያናትም ትምህርት ቤት በመክፈት በማኅበሩ የሥርዓተ ትምህርትና የሙያ እገዛ እየተደረገላቸው በማስተማር ላይ ይገኛሉ” በማለት የማኅበሩን አገልግሎት ገልጠዋል፡፡

“በዲሲ ንዑስ ማእከልም ከ፳፻፲ ዓ.ም በመጀመር አሁን ያለንበት ደረጃ ደርሰናል፡፡ 64 ተማሪዎችን ተቀብለን በሳምንት አንድ ቀን ቅዳሜ ለሰባት ወራት በማስተማር ቆይተናል” ብለዋል፡፡ በቋንቋ ክፍል ስድስት በቃል ትምህርት አንድ፣ ሦስት ረዳት፣ እንዲሁም በመጽሐፍ ቅዱስ ጥናት አንድና አንድ ተጨማሪ በአጠቃላይ 11 መምህራን ተሳታፊ እንደነበሩ ገልጠዋል፡፡
በምረቃው የተማሪ ወላጆች ማእከሉ ተማሪ የመቀበል አቅሙን ማሳደግ እንዳለበትና ያለውን ልምድ ለአጥቢያ አብያተ ክርስቲያናት ማካፈል የሚችልበትን መንገድ እንዲያመቻች ጠቁመዋል፡፡

ከመገልገያው አገልጋዩ መቅደም እንዳለበት ተነገረ

ብፁዕ አቡነ ቄርሎስና ብፁዕ አቡነ ኤርምያስ

                                                                                                                                                                 በካሳሁን ለምለሙ
በኢትዮጵያ ኦርቶዶክስ ተዋሕዶ ቤተ ክርስቲያን መቄት ወረዳ አሰፋ ገነተ ጽጌ ቅዱስ ጊዮርጊስ ቤተ ክርስቲያን የተገነባው የአብነት ትምህርት ቤት ሕንፃ ሚያዝያ ፳፩ ቀን ፳፻፲ ዓ.ም በተመረቀበት ወቅት ከመገልገያው አገልጋዩ መቅደም እንዳለበት የሰሜን ወሎ ሀገረ ስብከት ጳጳስ ብፁዕ አቡነ ኤርምያስ ተናገሩ፡፡
እንደ ብፁዕ አቡነ ኤርምያስ ገለፃ አብነት ትምህርት ቤቶች የቤተ ክርስቲያን የዕውቀት ማእከል በመሆናቸው ከተዳከሙ የቤተ ክርስቲያን አገልግሎት ሊኖር የማይችል መሆኑን ገልጠዋል፡፡ አብነት ትምህርት ቤቶች ትኩረት ከተሰጣቸውና ዘመኑን የዋጁ ካህናት ማውጣት ከተቻለ የቤተ ክርስቲያን ህልውናን ማስቀጠል እንደሚቻል ብፁዕነታቸው አስገንዝበዋል፡፡
“በሰዋስወ ብርሃን ቅዱስ ጳውሎስ መንፈሳዊ ኮሌጅ አስተምር በነበረበት ወቅት የንስሓ አባት ሆኜ አገለግላቸው የነበሩ ገንዘብ አሰባስበው በዛሬው ዕለት ለምርቃት የበቃውን የአብነት ትምህርት ቤት ሕንፃ በአጭር ጊዜ ውስጥ ገንብተው አስረክበዋል” ብለዋል፡፡
የተገነባው ሕንፃ ሙሉ በሙሉ የአብነት ትምህርት ቤቶችን ችግር ባይፈታም እንደ ጅምር መልካም መሆኑን የገለጡት ብፁዕነታቸው ትልልቅ ካቴድራሎችን ከመሥራት አስቀድመን                በካቴድራሎች ሊያገለግሉ የሚችሉ ዘመኑን የዋጁ አገልጋዮችን አስተምረን ማውጣት የምንችልባቸውን የትምህርት ተቋማት ማጠናከር ይኖርብናል “ብለዋል፡፡
ከዚህ ቀደም የአብነት ተማሪዎች ቁራሽ ለምነው ይማሩ እንደነበር ብፁዕነታቸው አስታውሰው ተማሪዎቹ ትምህርታቸውን ብቻ እያሳቡ እንዲማሩ ለማድረግ በገቢ የሚደጉሙ ተዛማጅ የልማት ሥራዎች እየተሠሩ እንደሆነ ተናግረዋል፡፡
የአብነት ትምህርት ቤቱን በዘላቂነት ለመደገፍ አራት የእህል ወፍጮ እና የወተት ሀብት ልማት ፕሮጅክት በመተግበር ላይ ይገኛል፡፡ ከፕሮጅክቶች ከሚገኘው ገቢ 40 በመቶው ለአብነት ትምህርት ቤቱ አገልግሎት የሚውል ይሆናል፡፡ በተለይ መንግሥት በሰጠው 6.6 ሄክታር መሬት በተቋቋመው የወተት ሀብት ልማት ፕሮጀክት የሚገኘው ገቢ ለተማሪዎቹ ልብስ ቀለብና የንጽሕና መጠበቂያ የሚያስፈልጉ ግብዓቶችን ለሟሟላት እንደሚውል ብፁዕነታቸው ገልጸዋል፡፡
በምረቃ ሥነ-ሥርዓቱ ተገኝተው ቡራኬ የሰጡት የሰሜን ወሎ ሀገረ ስብከት ሊቀ ጳጳስና የደብረ ሮሐ ቅዱስ ላሊበላ ገዳም የበላይ ጠባቂ ብፁዕ አቡነ ቄርሎስ “መኖር ለመሥራት፣ መሥራት፣ ደግሞ ለመኖር ሊሆን ይገባል፡፡ ለመኖር መሥራት ያስፈልጋል፡፡ በዚህ የአብነት ትምህርት ቤት ሕንፃ ግንባታ ላይ የተሳተፋችሁ በመሉ ለመኖር የሚያበቃችሁን ሥራ ሠርታችኋልና ደስ ይበላችሁ” ብለዋል፡፡
የአማራ ብሔራዊ ክልላዊ መንግሥት ባህልና ቱሪዝም ቢሮ ሓላፊ ዶክተር ኂሩት ካሳው በበኩላቸው የኢትዮጵያ ኦርቶዶክስ ተዋሕዶ ቤተ ክርስቲያን ኢትዮጵያን የገነባችና እየገነባች ያለች መሆኗን ገልጠው ቀለም በጥብጣ፣ ብራና ዳምጣ፣ ብዕር ቀርጻ ትውልድ ስታስተምር መኖሯን አስረድተዋል፡፡
“ቤተ ክርስቲያን የራሷ ፊደል ባይኖራት ኖሮ ኢትዮጵያውያን ተለይተን የምንታወቅበት ማንነት ባልኖረን ነበር፡፡ ሀገር ሊገነባ የሚችለውም በዕውቀት፣ በጥበብና በትምህርት ብቻ ነው” ብሏል፡፡ ኢትዮጵያ ሀገራችን ስትመራባቸው የኖሩ ሕግጋት የተወሰዱት ከቤተ ክርስቲያን ነው፡፡ ቤተ ክርስቲያን ሀገርን እንደ ሀገር ለመምራት እንዲሁም ሕግ ለማውጣት መነሻ፣ የዕውቀትና የጥበብ መፍለቂያ መሆኗን ሓላፊዋ ገልጠዋል፡፡
“ለሀገራችን የዕውቀትና የጥበብ መነሻና የልህቀት ማእከል የሆኑት የአብነት ትምህርት ቤቶች በአደገኛ ሁኔታ ላይ እንዲገኙ ቸል ብለናቸዋል ያሉት ዶክተር ኂሩት የሀገራችንን ህልውናና ጥበብ የምናስቀጥልባቸውን የአብነት ትምህርት ቤቶች ልንደርስላቸው ይገባል በማለት አሳሳበዋል፡፡
የመቄት ወረዳ አስተዳዳሪ አቶ ሃይማኖት ጋሹ “መቄት ወረዳ የታላላቅ ገዳማትና የበርካታ ጥንታዊ ቅርሶች መገኛ ናት፡፡ በአባታችን ብፁዕ አቡነ ኤርምያስ ያስተማሯቸው ምእመናን ዘመናዊና ሁሉን አቀፍ የአብነት ትምህርት ቤት ሕንፃ ገንብተው ለመቄት ወረዳ ሕዝበ ክርስቲያን ማበርከት በመቻላቸው የተሰማኝ ደስታ የላቀ ነው፡፡ የአብነት ትምህርት ቤቱ፣ የወተት ሀብት ልማት ፕሮጀክቱና የእህል ወፍጮ ልማቱ ዘላቂና አስተማማኝ እንዲሆን ወረዳው ክትትልና ድጋፍ ያደርጋል” ብለዋል፡፡
የአብነት ትምህርት ቤቱ ወደሚቀጥለው ትውልድ እንዲተላለፍ የምንችለውን ሁሉ እናደርጋለን፡፡ የአካባቢውም ሆነ የአብነት ትምህርት ቤቱ ተቀብሎት ለሚያስተምራቸው 70 ተማሪዎች መቀመጫ ወንበሮች እንዲሁም መብራትና ውሃ ለማስገባት በቅርቡ በወረዳ አስተዳዳሩ ስም ቃል እገባለሁ ብለዋል፡፡
የልማት ማኅበሩ ጸሐፊ አቶ ቻለው እንደሻው “የልማት ማኅበሩ በአባታችን በብፁዕ አቡነ ኤርምያስ የተመሠረተ ሲሆን በመንፈሳዊ ትምህርት ቤቶች አገልግሎት ላይ እንድንሳትፍ አባታችን ባቀረቡልን ጥያቄ መሠረት በየወሩ ገንዘባችን በማውጣትና፣ ከበጎ አድራጊ ድርጅቶች ጋር በመነጋገር፣ ለቤተ ክርስቲያን አሳቢ አባቶችን በማነጋገርና ገቢ በማሰባሰብ ይህንን የመሰለ የአብነት ትምህርት ቤት ሕንፃ ለመገንባት ችለናል ብለዋል፡፡
ጥር ፲፰ ቀን ፳፻፱ ዓ.ም በብፁዕ አቡነ ቄርሎስ የመሠረት ድንጋይ ተቀምጦ በእግዚአብሔር ፈቃድ ግንባታው ተፈጽሞ በዛሬው ዕለት ለምርቃት በቅቷል፡፡ ማኅበሩ በቀጣይ የአብነት ትምህርት ቤት የሚያስፈልጋቸውን አካባቢዎች በመለየት ትምህርት ቤት ይሠራል፡፡ ድጋፍ የሚያስፈልጋቸውን አጥቢያዎችና ገዳማት ይደግፋል ያሉት ጸሐፊው አጠቃላይ ፕሮጀክቱ ከ6.7 ሚሊዮን ብር በላይ መፍጀቱን ተናግረዋል፡፡
                              ምንጭ ፤ስምዐ ጽድቅ ጋዜጣ ቁጥር 14/ቅጽ25 ቁጥር 388 ከሰኔ16-30/ቀን2010ዓ.ም

 

ማእከሉ ያስገነባው G+5 ሕንፃ ተመረቀ

                                             

                                                                                                                                                              በጎንደር ማእከል

በኢትዮጵያ ኦርቶዶክስ ተዋሕዶ ቤተ ክርስቲያን ሰንበት ት/ቤቶች ማደራጃ መምሪያ ማኅበረ ቅዱሳን ጎንደር ማእከል ያስገነባው  G+5  ዘመናዊ ሕንፃ ሊቃውንተ ቤተ ክርስቲያን ጥሪ የተደረገላቸው እንግዶች እና የማኀበሩ አባላት በተገኙበት ግንቦት18 ቀን2010 ዓ.ም ተመረቀ፡፡

የጎንደር ማእከል አገልግሎቱን  የጀመረው  በቤተ ክርስቲያን ግቢ በሚገኙ መቃበር ቤቶች እና በግለሰቦች ቤት ሲሆን አገልግሎቱ እየጠነከረ ሲሔድ  ግን ጎንደር  ከተማ ቀበሌ 17 የጣውላ ቤት በመከራየት አገልግሎት ሲሰጥ ቆይቷል፡፡ ከ1994-1999 ዓ.ም ሰፋ ያለ ቤት በመከራየት አገልግሎቱን  ሲያከናውን ቆይቶ  አባጃሌ ተክለ ሃይማኖት ቤተ ክርስቲያን አካባቢ  ሰፊ ቤት በመከራየት አገልግሎት ሲሰጥ ቆይቷል፡፡ከ1999 ዓ.ም በኋላ አዲሱ ሕንፃ ከተገነባበት ቦታ ላይ ቆርቆሮ በቆርቆሮ ቢሮ እና አዳራሽ በመሥራት ከኪራይ ተላቆ አገልግሎቱን ለማስቀጠል በቅቷል፡፡

ማእከሉ ለቢሮ የሚሆንና  ሌሎች መንፈሳዊ አገልግሎት  የሚሰጥበት ቦታ የሌለው መሆኑን የሚገልጥ በቀን 06/05/1996 ዓ.ም እና 03/01/1997 ዓ.ም ለሰሜን ጎንደር ሀገረ ስብከት በመጻፍ ማዘጋጃ ቤት  ቦታ እንዲሰጠው የጠየቀ ሲሆን ሀገረ ስብከቱም ለጥያቄውን አፋጣኝ ምላሽ በመስጠት ለጎንደር ማዘጋጃ ቤት የቀበሌ ቤት እንዲሰጠው አሳውቋል፡፡በቀን 19/02/1997 ዓ.ም በድጋሜ በተጻፈ ደብዳቤ በአነስተኛ ኪራይ  የቀበሌ ቤት እንዲሰጠው የጎንደር ከተማ  ማዘጋጃ ቤትን ቢጠይቅም መልስ ሳያገኝ ቆይቷል ፡፡

የማእከሉ አዲስ ሕንፃ የተገነባበትን 2000 ካሬ ሜትር ቦታ በሊዝ እንዲሰጣው ጥያቄ አቅርቦ በ02/10/1998 ዓ.ም በ290.40(ሁለት መቶ ዘጠና ብር ከ40 ሣ) በመክፈል  ቦታውን ተረከበ፡፡ ክርስቲን ሻዮ የተባሉ በጎ አድራጊ 20,000.00 ዩሮ ድጋፍ ስላደረጉ የመጀመሪያው ክፍያ ተፈጸመ፡፡

በ02/13/1999 ዓ.ም የዋናው ማእከል ሙያና ማኀበራዊ አገልግሎት ማሰተባበሪያ በበኩሉ 100,000.00 ብር የሚገመት ዲዛይን በነፃ ሠርቷል፡፡ የመሠረት ድንጋይ የተጣለው በ2000 ዓ.ም በአሁኑ ሰዓት ደቡብ ጎንደር ሀገረ ስብከት ሊቀጳጳስ በሆኑት ብፁዕ አቡነ እንድርያስ ሲሆን ግንባታው በይፋ በ23/04/2000 ዓ.ም ፈቃድ አግኝቶ ወደ ሥራ ገብቷል፡፡ሕንፃው ያረፈበት ቦታ 370 ካሬ ሜትር  ነው፡፡

በምረቃው ዕለት  ትምህርተ ወንጌል በየኔታ ዲበ ኩሉ ግርማይ የመካነ ስብሐት ልደታ ለማርያም  ቤተ ክርስቲያን አስተዳዳሪ፣ መዝሙር በማእከሉ መዘምራን፣ሪፖርት በማእከሉ ሰብሳቢ በአቶ ጌትነት መኳንንት የቀረበ ሲሆን  በመጨረሻም ለሕንፃው ከፍተኛ አስተዋጽኦ ላደረጉ በጎ አድራጊ ግለሰቦች የምስጋና የምስክር ወረቀት ተሰጥቷል፡፡አቶ ጌትነት በሪፖርታቸው ለሕንፃው ማስፈጸሚያ  በጎንደር  ከተማ የሚገኙ  የግቢ ጉባኤያት ተማሪዎች የቀን ሥራ ተቀጥረው የሚገኙትን ገንዘብ ለሕንፃ ግንባታው ይሰጡ እንደነበር ተናግረዋል፡፡

የጎንደር  ማእከል  አባላትም  የወር ደመወዛቸውን  ለሕንፃው ግንባታ እንደሰጡ  የገለጡት  ሰብሳቢው  የማእከሉ አባላትና የግቢ ጉባኤያት ተማሪዎች  ጊዜያቸውን፣ ገንዘባቸውን፣ ጉልበታቸውን አበርክተዋል፡፡ በጎ አድራጊ ግለሰቦችም የሚቻላቸውን ሁሉ አድርገዋል ብለዋል፡፡፡፡

 

የቀዳሜ አድባራት አበራ ጊዮርጊስ የቅኔ ጉባኤ ቤት የእሳት ቃጠሎ ደረሰበት

 

የእሳት ቃጠሎ ደረሰበትየቅኔ ጉባኤ ቤቱ

                                                       ዲ.ን ዘአማኑኤል አንተነህ               

በጎንደር ከተማ የሚገኘው የቀዳሜ አድባራት አበራ ጊዮርጊስ ግንቦት 11 ቀን 2010 ዓ.ም ከቀኑ ሰባት ሰዓት የእሳት ቃጠሎ ደረሰበት፡፡ የጉባኤ ቤቱ አለቃ መምህር ናሆም አዝመራው የእሳት ቃጠሎ የተቀሰቀው በኤሌክትሪክ ምክንያት መሆኑን አስረድተው በአደጋው ምክንያት ከ120 በላይ ጎጆዎች መቃጠላቸውንና ፤ ከ30 በላይ ጎጆዎች መፈራረሳቸውን ገልጸዋል፡፡

በቃጠሎው ሳቢያ የተማሪ ጎጆዎች እና ልብሶቻቸው፣የጉባኤ  ቤቱ የማኅበር ቤት ሙሉ ለሙሉ ወድሟል፡፡ ከዚህም በተጨማሪ እንደ  ግስ፣ ዝክረ ቃል፣ መዳልው፣ ዳዊት፣ ሰዓታት፣ ሃይማኖተ አበው፣ ስንክሳር፣ አገባብ፣ መጽሐፍ ቅዱስ፣ መጽሐፈ ታሪክ፣ አንድምታ ወንጌል እና የመሳሰሉት በርካታ መጻሕፍት ተቃጥለዋል፡፡

በአደጋው ምክንያት በርካታ ተማሪዎች ያለ መጠለያ የቀሩ ሲሆን በማኅበረ ቅዱሳን ጎንደር ማእከል ባሠራው ዐሥር የማደሪያ ክፍሎች፣በመቃብር ቤት፣በሰንበት ትምህርት ቤት፣ በሰንበቴ ቤት በጊዜያዊነት  የአብነት ተማሪዎቹ  ተጠልለው ይገኛሉ፡፡

“የተማሪ ቤት መቃጠል የነገይቱን ቤተ ክርስቲያን አገልጋዮች መፍለቂያ ጠፋ ማለት መሆኑን ያስረዱት የጉባኤ ቤቱ መምህር ወላዴ አእላፍ ጌዴዎን አበበ “ሁሉም ክርስቲያን የተቃጠለውን የቅኔ ጉባኤ ቤት ወደነበረበት ለመመለስ የበኩሉን አስተዋጽኦ ሊያደርግ ይገባል”ብለዋል፡፡

በሰሜን ጎንደር ሀገረ ስብከት በጎንደር ከተማ ከሚገኙ የቅኔ ጉባኤ ቤቶች የቀዳሜ አድባራት አበራ ጊዮርጊስ የቅኔ ጉባኤ ቤት አንዱ ሲሆን በጉባኤ ቤቱ ከ500 በላይ ተማሪዎች እና ከ20 በላይ አስነጋሪዎች መኖራቸውን ለማወቅ ተችሏል፡፡

የሊቃውንቱ መፍለቂያ እንዲህ እንደምታዩት ሆነ

በእሳት የወደመው ጉባኤ ቤቱ