በጥናትና ምርምር ማእከል አዘጋጅነት የጥናት ጉባኤ ተካሔደ

ነሐሴ ፳፬ ቀን ፳፻፰ ዓ.ም

በካሣኹን ለምለሙ

በማኅበረ ቅዱሳን ጥናትና ምርምር ማእከል አዘጋጅነት ‹‹ጥናትና ምርምር ለቤተ ክርስቲያን ኹለንተናዊ አገልግሎት መጠናከር›› በሚል መሪ ቃል ፰ኛው ዓመታዊ የጥናት ጉባኤ ከነሐሴ ፳፩-፳፪ ቀን ፳፻፰ ዓ.ም በማኅበሩ ሕንጻ ፫ኛ ፎቅ አዳራሽ ተካሔደ፡፡

በጉባኤው ከቀረቡት ጥናቶች መካከልም ‹‹በኢትዮጵያ ኦርቶዶክስ ተዋሕዶ ቤተ ክርስቲያን የአብነት ትምህርት ቤት ተማሪዎች የአስኳላ ትምህርት መማር አስፈላጊነት››፤ ‹‹የኢትዮጵያ ኦርቶዶክስ ተዋሕዶ ቤተ ክርስቲያን መንፈሳዊ ፍርድ ቤቶች የማቋቋም ሒደት›› እና ‹‹የግእዝ ቋንቋ ለኢትዮጵያ ቋንቋዎች ዕድገት ያበረከተው አስተዋጽዖ› የሚሉት ርእሰ ጉዳዮች ይገኙባቸዋል፡፡

‹‹የአብነት ትምህርት ቤት ተማሪዎች የአስኳላ ትምህርት የመማር አስፈላጊነት›› በሚል ርእስ በማኅበረ ቅዱሳን ጥናትና ምርምር ማእከል የተዘጋጀውን ጥናታዊ ጽሑፍ ያቀረቡት የክፍሉ አባል የኾኑት አቶ ጌትነት ለወየው የአብነት ተማሪዎች ዘመናዊውን ትምህርት ቢማሩ ለቤተ ክርስቲያን ከሚሰጡት ውጤታማ አገልግሎት ባሻገር በታማኝነትና በሓላፊነት ከሙስና የጻዳ ሥራ በመሥራት ለአገር ዕድገትም የሚኖራቸው ኹለንተናዊ አስተዋጽዖ ከፍተኛ መኾኑን በጥናታቸው አመላክተዋል፡፡

‹‹የኢትዮጵያ ኦርቶዶክስ ተዋሕዶ ቤተ ክርስቲያን መንፈሳዊ ፍርድ ቤቶች የማቋቋም ሒደት›› በሚለው ርእስ ላይ ጥናት ያቀረቡት ጠበቃና የሕግ አማካሪ ዲ/ን ፊልጶስ ዓይናለም በበኩላቸው የኢትዮጵያ ኦርቶዶክስ ተዋሕዶ ቤተ ክርስቲያን በአሁኑ ወቅት መንፈሳዊና ማኅበራዊ ግዴታዋን ከመወጣት አንጻር ዘርፈ ብዙ ተግባራትን እያከናወነች እንደምትገኝ ጠቅሰው በሥሯ የሚገኙ አገልጋዮችንና ምእመናንን ለማስተዳደር ያመች ዘንድ የራሷ የኾነ መደበኛ መንፈሳዊ ፍርድ ቤት ሊኖራት እንደሚገባ አስረድተዋል፡፡

‹‹የግእዝ ቋንቋ ለኢትዮጵያ ቋንቋዎች ዕድገት ያበረከተው አስተዋጽዖ›› በሚል ርእሰ ጉዳይ ጥናታዊ ጽሑፍ ያቀረቡት በአዲስ አበባ ዩኒቨርሲቲ የባህልና ቋንቋዎች አካዳሚ ሓላፊና የሥነ ልሳን ረዳት ፕሮፌሰር ቀሲስ ዶ/ር ሙሉጌታ ሥዩም ደግሞ የግእዝ ቋንቋ ጥንታዊ መኾኑና በፊደል ቀረፃ፣ በትርጕም ሥራ፣ በቃላት ስያሜ፣ በመዝገበ ቃላት አገልግሎትና በመሳሰሉት ዘርፎች ለሌሎች ቋንቋዎች ሥነ ጽሑፍ ዕድገት ከፍተኛ አስተዋጽዖ ማበርከቱ በኢትዮጵያ ከሚገኙ ቋንቋዎች ልዩ እንደሚያደርገው ተናግረዋል፡፡

በጥናት ጉባኤው ‹‹የክርስቶስ የማዳን ትምህርት በኢትዮጵያ ኦርቶዶክስ ተዋሕዶ ቤተ ክርስቲያን አማኞች ዘንድ ያለው ግንዛቤና የቅዱሳት መጻሕፍት ምስክርነት››፤ ‹‹አውጣኪ፣ ቅዱስ ዲዮስቆሮስና የኬልቄዶን ጉባኤ››፤ ‹‹የመጽሐፈ መዋሥዕት ይዘት ትንታኔ››፤ ‹‹ባሕረ ሐሳብ ጥንታዊው የኢትዮጵያውያን ትምህርት፣ በዘመን አቈጣጠር፣ በሥነ ከዋክብት ጥናትና በአየር ትንበያ›› በሚሉ ርእሰ ጉዳዮችም በዘርፉ ምሁራን ተመሳሳይ ጥናቶች ቀርበው ሰፊ ውይይት ተደርጎባቸዋል፡፡

በመጨረሻም የመርሐ ግብሩ ተሳታፊዎች ላነሧቸው ልዩ ልዩ ጥያቄዎችና አስተያየቶች በጥናት አቅራቢዎቹ ምላሾች ከተሰጡ በኋላ የጥናት ጉባኤው በጸሎት ተፈጽሟል፡፡