ለማስተጓጎል ተሞክሮ የነበረው የስምዐ ጽድቅ ጋዜጣ እትም ስርጭት ላይ ዋለ።

የሰንበት ትምህርት ቤቶች ማደራጃ መምሪያ ኃላፊ አባ ሠረቀ ብርሃን ወልደ ሣሙኤል ለማተሚያ ቤቶች በፃፉት ደብዳቤ “የማኅበሩ መጽሔት ጋዜጣ በእናንተ በኩል ኅትመት ላይ እንዳይውሉ” በማለት ጠይቀው ነበር።

የማደራጃ መምሪያ የበላይ ሊቀ ጳጳስ ብፁዕ አቡነ ቀሌምንጦስ በበኩላቸው ይህ የማደራጃ መምሪያው ኃላፊ ደብዳቤ ህጋዊ እንዳልሆነ ለጠቅላይ ቤተ ክህነት ጽ/ቤት በጻፉት ደብዳቤ አሳስበዋል። ይህንን ተከትሎ የጠቅላይ ቤተ ክህነት ዋና ሥራ አስኪያጅ ለማተሚያ ቤቶች የተፃፈውን አግባብነት የሌለው ደብዳቤ ለማንሣት ይጽፋሉ ተብሎ ይጠበቃል።

ማኅበሩ ያሉትን ሚዲያዎች በተመለከተ ከሚመለከታቸው የጠቅላይ ቤተ ክህነት አካላት ጋር ለመስራት ምክክር ከጀመረ ቆይቷል ሲሉ የማኅበረ ቅዱሳን ሰብሳቢ ሊቀ ትጉሃን ቀሲስ ዶ/ር ሙሉጌታ ስዩም ለአማርኛ መካነ ድር ገልጸዋል።