Archive for category: Uncategorized

በማኅበረ ቅዱሳን በግቢ ጉባኤያት አገልግሎት ማስተባበሪያ አዘጋጅነት ለማእከላት ግቢ ጉባኤያት አገልግሎት ዋና ክፍል ኃላፊዎች፣ ለመደበኛ አስተባባሪዎች እና በዋናው ማእከል ለግቢ ጉባኤያት አገልግሎት ማስተባሪያ አባላት የአቅም ማጎልበቻ ሥልጠና እና የምክክር መርሐ ግብር ከኅዳር ፫-፬ ቀን ፳፻፲፭ ዓ.ም ተካሄደ፡፡

በማኅበሩ መሰብሰቢያ አዳራሽ ለሁለት ቀናት በተካሄደው ሥልጠናም አዲሱን የማኅበሩን ተቋማዊ ለውጥ በተመለከተ በመጋቤ ሀብታት ታደሰ አሰፋ እና አቶ ግዛቸው ሲሳይ ለአንድ ቀን የቆየ የግንዛቤ ማስጨበጫ የዳሰሳ ጥናት ቀርቧል፡፡ በዚህም የግንዛቤ ማስጨበጫ መርሐ ግብር ውጫዊና ውስጣዊ ከባቢያዊ ሁኔታን መሠረት አድርጎ አሁን ቤተ ክርስቲያን ያለችበትን ነባራዊ ሁኔታ በማጤን ተቋማዊ ለውጡ እንደተዘጋጀ ተገልጿል፡፡ የማኅበሩ ለውጥ ከየት ወደ የት ትንተና የቀረበ ሲሆን አዲሱ የማኅበሩ ርእይ፣ ተልእኮ፣ ዕሴት እና ዓላማም በተመለከተ ማብራሪያ ተሰጥቷል፡፡

በቀረበው ገለጻ መነሻነትም ከተሳታፊዎች የተለያዩ ጥያቄዎች ቀርበው ምላሽ የተሰጣቸው ሲሆን፤ የቡድን ውይይት፣ እንዲሁም ከአገልግሎት ጋር ተያይዞ የልምድ ልውውጥ እና የምክክር መርሐ ግብር ተካሂዷል፡፡

እሑድ በነበረው መርሐ ግብርም “ውጤታማ መሪነት እና የመሪነት ችሎታ፤ Effective leadership & leadership skill” በሚል ርእስ በመጋቤ ሀብታት ታደሰ አሰፋ እንዲሁም “ተግባቦት፤ Communication” በሚል ርእስ በዶ/ር ወርቁ ሥልጠና ተሰጥቷል፡፡ በተሰጡት ሥልጠናዎች ላይ ከተሳታፊዎች ጥያቄዎች ቀርበው በጥናት አቅራቢዎቹ ሰፊ ማብራሪያ ተሰጥቶባቸዋል፡፡

በሥልጠናው ላይ ተሳታፊዎች ከነበሩት አባላት መካከል ቆይታቸውን በተመለከተ ሲገልጹ “ከአቀባበሉ ጀምሮ እስከ ፍጻሜው መልካም ጊዜን አሳልፈናል፡፡ ተቋማዊ ለውጡ ላይ ያለንን ብዥታ ያጠራንበት፣ በሌሎቹም በተሰጡን ሥልጠናዎች በቂ ዕውቀት መጨበጥ ችለናል፡፡ በተለይም ያካሄድናቸው የልምድ ልውውጦች ለአገልግሎት እንድሣሣ እና እንድንበረታ የሚያደርጉን ናቸው” በማለት ገልጸዋል፡፡

በዚህ መርሐ ግብር ከ፴፩ ማእከላትና ግቢ ጉባኤያት የተውጣጡ ፵፫ ተሳታፊዎች የተካፍለዋል፡፡

ዲ/ን ኢያሱ መስፍን

የግቢ ጉባኤያት አገልግሎት ወጣቱን ወደ መንፈሳዊ ልዕልና ለማድረስ የሚደረግ ውጣ ውረድ የበዛበት ጉዞ ነው። ለዚህም የጉዞው ተሳታፊዎች እና ጉዞውን የተቃና ለማድረግ ከፊት የሚቀድሙ መሪዎች የአገልግሎት ተነሳሽነትና ቁርጠኝነት ለውጤቱ ማማር ትልቁን ድርሻ ይወስዳሉ፡፡

በየጊዜው የግቢ ጉባኤያትን አገልግሎት የሚረከቡ ወጣቶች በሚኖራቸው ዕውቀት፣ መረዳት እና ትጋት ልክ አገልግሎቱን ለማስኬድ እንዲሁም ከታለመለት ግብ ለማድረስ መጣራቸው አያጠራጥርም። እነዚህ ወጣቶች ዕቅዶቻቸውን ለማስፈጸም ከሚደረግላቸው መዋቅራዊ ድጋፍ ባለፈ ጽኑ የሆነ መንፈሳዊ እገዛ ያስፈልጋቸዋል። ይህንን እገዛ ደግሞ መስጠት የሚችሉት የንስሓ አባቶች ናቸው

ወደ አንድ ተራራ የሚወጣ ሰው መውጫ መንገዱን በሚገባ የሚያውቅ መሪ ማግኘት ግድ ይለዋል። የንስሓ አባቶችም ድርሻ ይህን የመሪነት እና የመንገድ ጠቋሚነት ሚና መጫወት ነው፡፡ ከዚህ ማስተዋል እንደሚቻለው በንስሓ አባትነት የሚሾሙ ካህናት ኑዛዜ ተቀብለው የኃጢአት ሥርየትን ከማሰጠት ባለፈ የመንፈስ ልጆቻቸውን በምግባር እና በሃይማኖት ወደ ድኅነት ጎዳና የመምራት ሥራን ይሠራሉ።

ማንኛውም መንፈሳዊ ሥራ በዕውቀትና በችሎታ ላይ በተመሠረተ የራስ መተማመን መነሻነት ብቻ ሊከወን አይችልም፡፡ “እግዚአብሔር ቢፈቅድ ብንኖርም ያን ወይም ይህን እናደርጋለን” ተብሎ የታቀደን ዕቅድ ለመፈጸም በሚደረግ ጥረት ውስጥ የእግዚአብሔርን እገዛ ትልቅ መሣሪያ አድርጎ መጠቀም ግድ ይላል። (ያዕ. ፬፥፲፭)

የንስሓ አባቶችም ይህ አገልግሎት ከእግዚአብሔር ፈቃድ ውጪ የሚፈጸም እንዳይሆን የመምራትና የማስፈጸም ትልቅ ድርሻ አላቸው። ከእነዚህም ውስጥ ጥቂቶቹን ለመቃኘት ያህል፦

፩. ከመንፈሳዊ ዝለት ማንቃት

የግቢ ጉባኤያት አገልግሎት ኦርቶዶክሳውያን ተማሪዎች ከትምህርታቸው ጎን ለጎን በሚኖራቸው ጊዜ በጋራ የሚፈጽሙት አገልግሎት እንደመሆኑ ትዕግሥትን እና ብዙ ጥረትን ይጠይቃል። ነገሮች በተፈለገው ልክ እና ሁኔታ ያለመሄድ ዕድላቸው ሰፊ ከመሆኑ የተነሣ በግለሰቦች ላይ በሚኖር የአገልግሎት ጫና፣ በመርሐ ግብሮች አለመሳካት፣ በቦታ፣ በጊዜ እና በመሳሰሉ ሁኔታዎች አለመመቻቸት ምክንያት በግቢ ጉባኤ አገልግሎት ተሳታፊ በሆኑ ተማሪዎች ዘንድ መባከንን ልናስተውል እንችላለን፡፡ ይህም እንደ አልዓዛር እኅት ማርታ ከአገልግሎት መብዛት የተነሣ መባከን (ሉቃ.፲፥፵) እና ከቃለ እግዚአብሔር እንዲሁም ምሥጢራትን ከመካፈል መራቅ ሊያጋጥሙ የሚችሉ ችግሮች ናቸው።

እነዚህን ችግሮች በመፍታት በኩል ከንስሓ አባት የተሻለ አቅም ያለው አካል ማግኘት አይቻልም። በግቢ ጉባኤው ውስጥ አገልግሎት በመስጠት ላይ ያሉ አባቶች የንስሓ ልጆቻቸው ያሉባቸውን ፈተናዎች ከማንም በተሻለ ያውቃሉና ችግሮቹ ላይ ያተኮሩ የመፍትሔ ሥራዎችን ለመሥራት ትልቁን ድርሻ የመወጣት አቅም አላቸው። በአገልግሎት ላይ ያሉ ተማሪዎች ተስፋ እንዳይቆርጡ በማጽናት፣ በአገልግሎት በመባከን ከሚመጣ መንፈሳዊ ዝለት ከምሥጢራት ሲርቁ እግዚአብሔርን አብነት አድርገው ‘ወዴት አለህ’ (ዘፍ. ፫፥፱) ብሎ መጥራት፣ መፈለግና ማጽናት ይጠበቅባቸዋል፡፡

፪. ከእግዚአብሔር ዘንድ ተቀባይነት ያለው አገልግሎት እንዲፈጽሙ ማስቻል

ቃየን ወንድሙን በመግደል በደል በፈጸመ ጊዜ ፈታሔ በጽድቅ ከሆነ እግዚአብሔር የተፈረደበት ፍርድ ተቅበዝባዥ መሆን ነው። (ዘፍ. ፬፥፲፪) ሊቃውንት አባቶቻችን “ምድርንም ባረስክ ጊዜ እንግዲህ ኃይሏን አትሰጥህም” የሚለውን ኃይለ ቃል መነሻ አድርገው   ተቅበዝባዥነትን በከንቱ መድከም፣ ጀምሮ አለመፈጸም፣ ዘርቶ ፍሬ ማጣት መሆኑን በትርጓሜአቸው አስረድተውናል። የግቢ ጉባኤ አገልጋዮች ድካማቸው ከንቱ አገልግሎታቸውም ፍሬ አልባ እንዳይሆን ዘወትር ራሳቸውን በጸሎት በማነጽ፣ በንስሓ ማንጻት እና ማዘጋጀት ግድ ይላቸዋል።

የንስሓ አባቶች ንስሓን የመቀበል እና የመናዘዝ አገልግሎት ደግሞ በሌላ በማንም ሊተካ የማይችል ነው። በመሆኑም በግቢ ጉባኤ አገልግሎት ተሳታፊ የሆኑ ተማሪዎችን በመናዘዝ እና ከኃጢአት እንዲነጹ በማድረግ ለአገልግሎቱ መሳካት የበኩላቸውን አባታዊ ኃላፊነት ሊወጡ  ይገባቸዋል።

፫. የአገልግሎቱን ቀጣይነት ማረጋገጥ

የግቢ ጉባኤ አገልጋዮች በእያንዳንዱ የአገልግሎት እርምጃቸው የንስሓ አባቶቻቸውን ተሳታፊዎች ቢያደረጓቸው ከአገልግሎታቸው መሳካት ባለፈ ከእነርሱ በተጨማሪ ሌሎች አገልጋዮች በሚመጡበት ጊዜ የግቢ ጉባኤን አገልግሎት የተረዱ እና አዲሶቹን አገልጋዮች በተሻለ ጎዳና መምራት የሚችሉ አባቶችን ማፍራት ይቻላል። ይህም የማእከላትን ጫና ከመቀነስ ባሻገር አዳዲስ አገልጋዮች አገልግሎቱን ከታች ከመጀመር ይልቅ በየአጥቢያቸው ያሉ የንስሓ አባቶቻቸውን በማማከር ከነበረበት የማስቀጠል እና የማሳደግ ዕድል እንዲያገኙ ያደርጋል።

ተግዳሮቶች

የግቢ ጉባኤያትን አገልግሎት መረዳት የሚችሉ እና ወርደው ከተማሪዎች ጋር ለመሥራት የመንፈስ ዝግጁነት ያላቸው የንስሓ አባቶች ያስፈልጉናል። የንስሓ አባቶች እና የግቢ ጉባኤያት ተማሪዎች ቁጥር አለመመጣጠን፣ እስከ አለመግባባት የሚያደርስ ሰፊ የዕድሜ ልዩነት መኖር፣ ለረጅም ጊዜ በገዳማዊ ሕይወት ያለፉ መነኮሳት ለግቢ ጉባኤ ተማሪዎች አባት ሆነው መመደባቸው፣ የቋንቋ ክፍተት መኖሩ፣ ዘመኑን ዋጅቶ በሚገባው ልክ ወጣቱን ለማስተማር እና ወደ ቤተ ክርስቲያን ለማቅረብ የሚያስችል የትምህርት ዝግጅት የሌላቸው አባቶች በንስሓ አባትነት መመደባቸው እና የመሳሰሉት ምክንያቶች የንስሓ አባቶች በሚፈለገው መጠን በግቢ ጉባኤያት አገልግሎት ውስጥ የሚጠበቅባቸውን በጎ አስተዋጽኦ እንዳያበረክቱ እንቅፋት ሆነዋል።

ቅዱስ ዮሐንስ አፈወርቅ የእረኝነት ሥራን የሚሠሩ እነዚህ ካህናት ትሩፋትን እና ትጋትን ገንዘብ ያደረጉ፣ በመንፈስ ብርታት፣ በትምህርተ ሃይማኖት ብስለት እና በተቀደሰ ሕይወት ይጠብቋቸው ዘንድ ከተሾሙላቸው ሰዎች እጅግ ተሽለው መገኘት እንዳለባቸው ሲያስረዳ “በካህኑና በምእመናኑ መካከል ሊኖር የሚገባው ልዩነት አእምሮ ባለው ሰው እና ደመ ነፍሳዊ በኾኑ እንስሳት መካከል ያለውን ያህል የሰፋ ሊሆን ይገባል። የጉዳዩ ክብደት እና አሳሳቢነት እጅግ ታላቅ ነውና” ይላል። የዚህ ዓይነት ጥንቃቄ በተለይ ዘመን በወለዳቸው አምላክ የለሽ እሳቤዎች እና ፍልስፍናዎች፣ በምንፍቅና ትምህርቶች፣ በሰፋፊ የኃጢአት ልምምዶች እና በመሳሰሉት ለመነጠቅ የሰፋ ዕድል ላላቸው የግቢ ጉባኤያት ተማሪዎች አባት ሆነው የሚሾሙ ካህናትን በተመለከተ ሲሆን ይበልጥ ምክንያታዊ ይሆናል።

የመፍትሔ ሐሳቦች

የንስሓ አባቶች ኑዛዜን ተቀብሎ ከኃጢአት እሥራት ከመፍታት ባለፈ በግቢ ጉባኤ አግልግሎት ውስጥ ጠለቅ ያለ ተሳትፎ እና የእረኝነት ድርሻ እንዳላቸው መረዳት ይገባቸዋል፡፡ በግቢ ጉባኤያት አገልግሎት ላይ ያሉ ወጣቶችም ዝግጅት ያላቸውን የንስሓ አባቶች የመንፈስ ልጆቻቸውን በተመለከተ በሚወሰኑ ውሳኔዎች እና በሚሠሩ ሥራዎች ላይ ንቁ ተሳታፊዎች እንዲሆኑ ሁኔታዎችን ማመቻቸት ያስፈልጋል። በመሆኑም በንስሓ አባቶችና በልጆቻቸው መካከል ያለውን ግንኙነት የተከሳሽ እና የዳኛ አስመስሎ የሚያሳየውን ምዕራባዊ ነጽሮት በማራቅ ኦርቶዶክሳዊ በሆነው የሐኪም እና ታካሚ ዓይነት ግንኙነት እሳቤ መነሻነት ጥብቅ የሆነ መረዳዳት እና መግባባት ላይ የተመሠረተ ግንኙነት መፍጠር መቻል ያስፈልጋል፡

ማእከላት እና የሚመለከታቸው የቤተ ክርስቲያን አካላትም ግቢ ጉባኤያቱ በያሉባቸው አካባቢዎች የሚነገሩ ቋንቋዎችን እና የአካባቢውን ባህል የተረዱ ካህናትን ከዚያው አካባቢ እንዲገኙ በማድረግ በየደረጃው ያሉ መሠረታዊ ችግሮችን ለመቅረፍ ሊሠሩ ይገባል። በተጨማሪም አገልግሎታቸው ንስሓን ከመቀበል ያለፈ እና ሁለንተናዊ የመንፈሳዊ አባትነት አገልግሎት መሆኑን ተረድተው በግቢ ጉባኤያት አገልግሎቶች ውስጥ የበኩላቸውን እንዲወጡ ማንቃትና ይህንን ማድረግ እንዲችሉ ሥልጠናዎችን እንዲያገኙ ማድረግ ተገቢ ነው፡፡

በጥበበ ሲሎንዲስ

ቅዱስ ዮሐንስ “ጐልማሶች ሆይ፥ ክፉውን ድል ነሥታችሁታልና እጽፍላችኋለሁ” በማለት ክፉውን ዓለም ድል የነሡትን ጐልማሶች ያሞግሳቸዋል፡፡ ይህም በክፉ ዓለም እየኖሩ ክፉውን ማሸነፍ መንፈሳዊ ጥንካሬንና ድል መንሣትን ያመለክታል፡፡ አንዳንድ ወጣቶች ‘በወጣትነት ዘመን ላይ እየኖሩ ቅዱስ መሆን እንዴት ይታሰባል? በዓለም እየኖሩ ጻድቅ መሆን እንዴት ይሞከራል?’ ይላሉ፡፡ ነገር ግን በክፉው ዓለም ኖረው ዓለምን ድል መንሣት እንደሚቻል ከጐልማሳው (ወጣቱ) ዮሴፍ ታሪክ እንማራለን፡፡

ዮሴፍ በገዛ ወንድሞቹ ተሸጦ፣ ከሀገሩ ከነዓን ርቆ በግብፅ ባርነት ሲኖር የመጣበትን ፈተና በመቋቋም ክፉን ድል ነሥቷል፡፡ መጽሐፍ ቅዱስ “የጌታው ሚስት ዐይኗን ጣለችበት፤ አፍ አውጥታም፣ ‘አብረኸኝ ተኛ’ አለችው”(ዘፍ. ፴፱፥፯)፡፡  ልትይዘውም በሞከረች ጊዜ ዮሴፍ  “እንዴት ይህን ትልቅ ክፉ ነገር አደርጋለሁ? በእግዚአብሔር ፊት እንዴት ኃጢአትን እሠራለሁ?” በማለት ልብሱን ጥሎላት እንደሸሸ መጽሐፍ ቅዱስ ይነግረናል፡፡ /ዘፍ. ፴፱፥፰-፱/፡፡

ዮሴፍ እንዲህ ዓይነት እርምጃ መውሰዱ ከፍተኛ ዋጋ አስከፍሎታል። የጲጥፋራ ሚስት ልትበቀለው ፈለገች። በመሆኑም ወዲያውኑ እየጮኸች አገልጋዮቹን መጣራት ጀመረች። ዮሴፍ ሊደፍራት እንደሞከረና እርሷ ስትጮኽ ሸሽቶ እንዳመለጠ ነገረቻቸው። ዮሴፍን ለመወንጀል ባሏ እስኪመለስ ድረስ ልብሱን ይዛ ቆየች። ጲጥፋራ ወደ ቤት ተመልሶ ሲመጣ ያንኑ ውሸት ደግማ ተናገረች፤ ጲጥፋራ ይህን ባዕድ ሰው ወደ ቤት በማምጣቱ ለደረሰባት ነገር ተጠያቂው እርሱ እንደሆነ በተዘዋዋሪ ገለጸች። ጲጥፋራም ተቆጣ፡፡ ዮሴፍም ወደ ወኅኒ ተጣለ፡፡ የጲጥፋራ ሚስት አሳዛኝ ታሪክ እንዲህ ያለውን ክፋት አስከትሎአል፡፡

ዮሴፍ ግን ለራሱም፣ ለአለቃውም፣ ለፈጣሪውም የታመነ መሆኑን በተግባር አስመሠከረ፡፡ የዛሬ ወጣቶች ለምንሠራበት ተቋም፣ ለአለቃችን፣ ለጓደኛችን ታማኞች ነን? የአደራ ጥብቅነት ከሰማይ ርቀት ጋር ተነጻጽሮ በሚነገርበት ማኅበረሰብ መካከል አድገን ታማኞች መሆን አለመቻላችን ምክንያቱ ምን ይሆን? ዮሴፍ ዓለም በኃጢአት ስትፈትነው በወጥመዷ ላለመያዝ እግዚአብሔርን አስቧልና በሐሰት ወንጅለውና ወደ ወህኒ እንዲጣል አድርገው ለመከራ በዳረጉት ጊዜ እግዚአብሔር እርሱን አሰበው፡፡ ስደተኛው ዮሴፍ የግብፅ ሹመኛ ሆነ፡፡ እኛም “መንገዴንና አካሄዴን እንደ ቃልህ አቅና፤ ኀጢአትም ሁሉ ድል አይንሳኝ፡፡” ብለን እንጸልይ /መዝ.፻፲፰፥፻፴፫/፡፡

የወጣትነት ዘመን የብርታት ዘመን ነው፡፡ አባቶቻችን ‘በወጣትነት የለቀሙትን እንጨት በስተርጅና ይሞቁታል’ ይላሉ፡፡ የወጣትነት ዕድሜ ሰው ሠርቶ ማግኘት፣ ወድቆ መነሣት የሚችልበት ወቅት ነው፡፡ “አንተ ጐበዝ፥ በጒብዝናህ ደስ ይበልህ፥ በጒብዝናህም ወራት ልብህን ደስ ይበለው፥ በልብህም መንገድ፥ ዐይኖችህም በሚያዩት ሂድ፤ ዳሩ ግን ስለዚህ ነገር ሁሉ እግዚአብሔር ወደ ፍርድ እንዲያመጣህ ዕወቅ፡፡ ሕፃንነትና ጒብዝና፥ አለማወቅም ከንቱ ናቸውና ከልብህ ቊጣን አርቅ፥ ከሰውነትህም ክፉ ነገርን አስወግድ፡፡” እንዲል (መክ. ፲፩፥፱-፲)፡፡

ወጣትነት ብዙ ተስፋ ያለው የሕይወት ክፍል ነው፡፡ በአንድ ዕድል አለመሳካት እንደገና ከመሞከር አይቆጠብም፡፡ ወጣትነት ደስ ይላል፤ ሲያዩት ያምራል፡፡ ምንም ዓይነት ሰው ሠራሽ መዋቢያዎችን ባይጠቀሙም ወጣትነት ውበት ነው፡፡ ደግነትና ክፋት ግን ምርጫ ነው፡፡ ኃጢአትን የሚያስጥለን ዕድሜ ሳይሆን የእግዚአብሔር ፍቅር ነው፡፡ ራስን፣ ታሪክን፣ ሀገርን፣ ሕዝብን ለመለወጥ የሚያስፈልገው ትልቅ ዕድሜ ሳይሆን ትልቅ ልብ ነው፡፡ ዋናው ብዙ ዘመን መቆየታችን ሳይሆን እንደ እግዚአብሔር ፈቃድ መኖራችን ነው፡፡ ባለን ጥቂት ዘመን ለዘመን የሚተርፍ፣ ለትውልድ የሚነገር ነገር መሥራት ይቻላል፡፡

ወጣትነት እንደ እሳት ብርቱ ነው፡፡ ይህ እሳት በአዎንታዊ መንገድ ሲገለጥ ተነሣሽነትን፣ ትኩስነትን፣ ባለ ራእይነትን ያመለክታል፡፡ ይህ እሳት በአሉታዊ መንገድ ሲገለጥ ደግሞ ቍጣን፣ ችኩልነትን፣ አለመታገሥን፣ ስሜታዊነትን፣ ንዴትን ማለትን ያመለክታል፡፡

እሳት በረከት እንደሆነ ጥፋትም ሊሆን ይችላል፡፡ የሚጠቅሙ ነገሮች በአግባቡ ካልተያዙ የሚያጠፉት የጥቅማቸውን ያህል ነው፡፡ እሳት ሆነው ለመጡብን ውኃ ሆነን ማብረድ ይገባል፡፡ በሥጋ መሻት፣ በፍትወት ልብ ሲመጡብን በቅድስና፣ በፈሪሃ እግዚአብሔር ማብረድና ወደ ንስሓ መጋበዝ ይገባናል፡፡ እሳትነታችን የሚያበስል እንጂ የሚያሳርር እንዳይሆን ውኃነታችንም የሚያመጣጥን እንጂ የሚያጠፋ እንዳይሆን መገምገም አለብን፡፡ “እንግዲህ እንደ ባለ አእምሮ አስቡ ትጸልዩም ዘንድ በመጠን ኑሩ” እንዲል (፩ኛ ጴጥ. ፬፥፯)፡፡

በመጠን መኖር የኦርቶዶክሳውያን ወጣቶች ጠባይ ነው፡፡ ይኸውም “የጭንቀት ቀን ሳይመጣ በጉብዝናህ ወራት ፈጣህን ዐስብ” የሚለውን መመሪያ ለመጠበቅ ይጠቅማል (መክ.፲፪፥፩)፡፡ ፈጣሪው እግዚአብሔርን የሚያስብ ኦርቶዶክሳዊ ወጣት ሰው የሚከፋበትን አይናገርም፣ በሰዎች መካከል መለያየትን አይፈጥርም፣ ወላጆቹን አያሳዝንም፣ ጎረቤቶቹን አያውክም፣ ምስኪኖችን አያሳቅቅም፣ የሰዎችንም ክብር አይነካም፡፡

ልበ አምላክ ዳዊት “ጐልማሳ መንገዱን በምን ያቀናል? ቃልህን በመጠበቅ ነው፡፡” በማለት እንደተናገረ (መዝ. ፻፲፰፥፱) ጐልማሶችን በቃለ እግዚአብሔር እንዲበረቱ ማስተማርና መንገድ መምራት ያስፈልጋል፡፡ ወጣቶች ንግግር ስለተማሩ፣ ገንዘብ አያያዝ ስላወቁ፣ የምስክር ወረቀት ስለያዙ ብቻ የሕይወት ብስለት አላቸው ማለት አይደለም፡፡ በታላላቅ ተቋማት ስለሠሩም ታላቅ ሆኑ ማለት አይደለም፡፡ ስለዚህ ታዋቂዎች ብቻ እንዲሆኑ ጥረት ከማድረግ ይልቅ አዋቂዎች እንዲሆኑ ማገዝ ይገባል፡፡ ለዚህም ሐዋርያው ቅዱስ ዮሐንስ “የእግዚአብሔር ቃልም በእናንተ ዘንድ ጸንቶ ይኖራልና” በማለት እንደተናገረው ከሥጋዊ አስተሳሰብና ድርጊት ርቀው የእግዚአብሔርን ቃል የሕይወት መመሪያቸው አድርገው እንዲጓዙ መርዳት ያስፈልጋል፡፡

በልጅነታችን ጭቃ አቡክተን እንጫወት ነበር፡፡ በዚያም ደስ ይለን ነበር፡፡ ካደግን በኋላ ግን ጭቃን እንኳን በእጃችን ልንነካው በእግራችን ልንረግጠው እንጸየፈዋለን፡፡ ምክንያቱም ማደግ ያስገኘልን ዕውቀት ከጭቃ ከመቆሸሽ በቀር ምንም አይገኝም የሚል ነው፡፡ እንዲሁም በአእምሮ ሕፃን በነበርንበት ዘመን በኃጢአት ለመደሰት ሞክረናል፡፡ ተደልለንም አልፈናል፡፡ ለመንፈሳዊ አካለ መጠን ስንደርስ ግን ከኃጢአት ከመርከስ በቀር ምንም እንደማይገኝ ይገባናል፡፡ ደግሞም ኃጢአትን ልንተው የሚገባን ቅጣቱን ማለትም በሥጋ እስር ቤትን፣ በነፍስ ገሀነመ እሳትን ፈርተን ብቻ ሳይሆን የንጹሐ ባሕርይ እግዚአብሔር ክቡር ፍጥረት ነኝ፣ የክርስቶስ ተከታይ ክርስቲያን ነኝ፣ የመንፈስ ቅዱስ ማደሪያ ቤተ መቅደስ ነኝ ብለን መሆን አለበት፡፡

በተረፈ ወጣቶች ሆይ! እናንተ ያወቃችሁት በዓለም ላይ ያለው ብቸኛ ዕውቀት አይደለምና፣ ደግሞም ዕውቀት በየዘመኑ ያድጋልና ሌሎችን ለመስማት ፈቃደኛ ሁኑ፡፡ እስከ ዘለዓለም የምንማር ነንና በሃያና በሠላሳ ዓመት ዕውቀትን ጠነቀቅናት ብላችሁ አታስቡ፡፡ በኃይል ሁሉን እቀይራለሁ ከሚል አስተሳሰብ ውጡ፡፡ ይህች ዓለም የወጣቶች ብቻ ሳትሆን የሕፃናትም፣ የጎልማሶችም፣ የአረጋውያንም ዓለም ናትና ለሌላው ዕድል ስጡ፡፡ ሕይወት ረጅም መንገድ እንጂ በአንድ ትንፋሽ የምትጠናቀቅ አይደለችምና በእርጋታና በማስተዋል መጓዝን አትርሱ፡፡ ያን ጊዜ “ጐልማሶች ሆይ፥ ክፉውን ድል ነሥታችሁታልና እጽፍላችኋለሁ” የሚለው መልእክተ ጽድቅ ይደርሳችኋል፤ የድል አክሊል ይዘጋጅላችኋል፤ የመንግሥተ ሰማያት በር ክፍት ይሆንላችኋል፡፡

ወስብሐት ለእግዚአብሔር