Archive for category: Uncategorized

በቀሲስ ዐቢይ ሙሉቀን

“ምክር ሠናይት ለኵሉ ዘይገብራ፤ ለሚያደርጋት ሁሉ ምክር መልካም ናት” በማለት ነቢየ እግዚአብሔር ዳዊት እንደተናገረው ነቢያት፣ ሐዋርያት፣ ሊቃውንት በአጠቃላይ እግዚአብሔር ድንቅ ሥራውን የሚሠራባቸው ቅዱሳን አባቶቻችን እኛ ከእግዚአብሔር ጋር ሊኖረን የሚገባው ኅብረት መሰናክል እንዳይገጥመውና በአግባቡ ጸንተን እንድንኖር ይመክሩናል። የአበው ምክር እኛ ላሰብነው ዓላማ ታማኝ እንድንሆን፣ በዚች ውጣ ውረድ በበዛባት ዓለም ስንኖር ሊደርስብን በሚችለው መከራ ሳንሸነፍ በዓላማችን ጸንተን ልንደርስበት ካሰብነው ግብ መድረስ እንዳለብን ነው።

በዓላማ መጽናት ማለት ምክንያት እየፈለጉ ያቀዱትንና ሊያከናውኑት ያሰቡትን ከመተው መቆጠብ ነው። ሰዎች በዓላማቸው ሲጸኑ ዓላማቸውን ሊያሰናክል የሚመጣባቸውን መሰናክል ሁሉ ጥበበኛው ሰሎሞን “ትዕግሥት ታላቁን ኃጢአት ያስተሠርያልና የገዢ ቁጣ የተነሣብህ እንደሆነ ሥፍራህን አትልቀቅ” በማለት እንደገለጸው በትዕግሥት ያልፉታል። (መክ. ፲፣፬) የገዢ ቁጣ ከባድ ነው፤ ይሁን እንጂ በትዕግሥት ሲያልፉት ሥርየተ ኃጢአትን፣ በክብር ላይ ክብርን፣ በጸጋ ላይ ጸጋን ያጎናጽፋልና ጥበበኛው በዓላማህ ጽና፣ ስፍራህን አትልቀቅ እያለ ይመክረናል።

ሐዋርያው ያዕቆብም “መከራን የሚታገሥ ሰው ብፁዕ ነው፤ ተፈትኖ እግዚአብሔር ለሚወዱት ተስፋ ያደረገላቸውን የሕይወት አክሊል ይቀበላልና።” በማለት በዓላማ ብንጸናና የሚመጣውን መከራ ብንታግሥ ልናገኘው የምንችለውን የሕይወት አክሊል እንደሚሰጠን ያስረዳናል። (ያዕ. ፩፥፲፪)

ከዓላማ ጽናት ጋር ተያይዞ መልካም አርአያ የሚሆኑን ታሪኮች በመጽሐፍ ቅዱስ በስፋት የተጠቀሱ ሲሆን ጥቂቶቹን እንመልከት፡-

“ጌታችን ኢየሱስም በቢታንያ በለምጻሙ በስምኦን ቤት ሳለ ዋጋው እጅግ ብዙ የሆነ ሽቱ የሞላበት የአልባስጥሮስ ብርሌ የያዘች ሴት ወደ እርሱ መጣች፤ ጌታችን ኢየሱስም በማዕድ ተቀምጦ ሳለ በራሱ ላይ አፈሰሰችው፡፡ ደቀ መዛሙርቱ ይህን ባዩ ጊዜ ተቆጥተው እንዲህ አሉ፡፡ ይህች ሴት ይህን ያህል ሽቱ አጠፋች ይህ በብዙ ዋጋ ተሸጦ ለድኾች ምጽዋት ይሰጥ ዘንድ ይቻል ነበርና፡፡ ጌታችን ኢየሱስም ዐወቀባቸውና እንዲህ አላቸው “ይህችን ሴት ለምን ታዳክሟታላችሁ ለእኔ መልካም ሥራን ሠርታልኛለችና፤ ድሆችንስ ዘወትር ታገኟቸዋላችሁ በወደዳችሁም ጊዜ በጎ ታደርጉላቸዋላችሁ፤ እኔን ግን ዘወትር የምታገኙኝ አይደለም፡፡ እርሷ ይህን በራሴ ላይ ያፈሰሰችውን ሽቱ ለቀብሬ አደረገችው፡፡ እውነት እላችኋለሁ ይህ ወንጌል በዓለሙ ሁሉ በሚሰበክበት ቦታ ይህች ሴት ያደረገችው ለእርሷ መታሰቢያ ሆኖ ይነገራል፡፡” (ማቴ.፳፮፥፮-፲፫)፤ (ማር.፲፬፥፫-፱)፤ (ዮሐ. ፲፪፥፩-፰)

ይህች ሴት ያሰበችውን ዓላማ ለማሳካት እጅግ የሚደንቅ ጽናት የሚታይባት ናት፡፡ የተጠራችው በክብር ነው “ኃጥኣንን ወደ ንስሓ እንጂ ጻድቃንን ልጠራ አልመጣሁም” እንዲል። (ሉቃ. ፭፥፴፪) ስለዚህ ሰው ደግሞ በክብር ሲጠራ “ጠሪዬ አክባሪዬ” እንዲሉ አበው አክባሪዋን ሰማያዊውን ሙሽራ ሊያከብር የሚችል ዋጋው እጅግ ውድ የሆነ ሽቱ ይዛ ሄደች፡፡

ይህች ሴት ወደ ጌታችን መድኀኒታችን ኢየሱስ ክርስቶስ ከመሄዷ በፊት ግን ዲያብሎስ ያዘጋጃቸውን መሰናከያ ፈተናዎችን አልፋለች፡፡

በመጀመሪያ ደረጃ ይህች ሴት ዘማ የነበረችና ዝሙትን መተዳደሪያዋ ያደረገች ነበረች፡፡ ውበቷና ደም ግባቷ ብዙዎችን ያንበረከከ፣ ፈላጊዋ ስፍር ቁጥር የሌለው ሆኖ ሳለ ወደ ልቧ ስትመለስ ስትሠራ የነበረው ሥራ ጸያፍና በሰውም በእግዚአብሔርም ዘንድ የተጠላ እንደነ ተረዳች፡፡ የዘወትር መተዳደሪያዋን ዘግታ፤ ዳግም ወደ ዝሙት ሥራዋ ላለመመለስ የወሰነችው ውሳኔ ጽናቷን ያለመክታል፡፡ ዓላማና ፍላጎቷ ያንን የተጠላና ነውር የሆነውን ሥራ መተውና ወደ ፈጣሪዋ መመለስ ነበርና ወሰነች፡፡

ቀጥላ ያደረገችው ግን የሚገርም ነው፡፡ ስትፈጽመው የነበረው የዝሙት ሥራ ከእግዚአብሔር እንደለያት ስትረዳ በዝሙት ያጠራቀመችውን ገንዘብ ሰብስባ ውድ ሽቱ ገዝታ ለጌታችን መድኀኒታችን ኢየሱስ ክርስቶስ ትቀባው ዘንድ ወደ ገበያ ወጣች፡፡ መውጣቷ መልካም ቢሆንም በመንገድ የጠበቃት ግን እጅግ ፈታኝ ባላጋራ ስለነበር በዓላማዋ ጸንታ ማለፍን ከእርሷ ይጠበቅ ነበር፡፡

ዲያብሎስ በለመደችው ወንድ መልክ ተገልጦ በመንገድ ጠብቆ ዝም ብሎ አላሳለፋትም፡፡ “እንግዳ ወንድ መጥቶብሽ ለእርሱ ልትቀቢው ሽቱ ልትገዢ ትሄጃለሽ?” አላት፡፡ እርሷም “አዎን፡፡ ከዚህ ዓለም ልዩ የሚሆን ጌታ መጥቷል” በማለት መለሰችለት፡፡ ዲያብሎስ በመልሷ እየተናደደ ሌላ ጥያቄ ደግሞ እንዲህ ሲል አቀረበላት “ፍቅሩ ያላለቀለት ወንድ መጥቶብሽ ለዚያ ልትቀቢው ሽቱ ልትገዢ ትሄጃለሽ?” አላት፡፡ እርሷም መልሳ “አዎን፡፡ ፍቅር ሰሐቦ ለወልድ ኃያል እመንበሩ ወአብጽሆ እስከ ለሞት፤ የሰው ፍቅር አገብሮት ሊሞት መጥቷል” ስትል መለሰች፡፡ ለሦስተኛ ጊዜ ተስፋ ሳይቆርጥ ”በጥቂት ገንዘብ ብዙ ገንዘብ የሚሰጥ ነጋዴ መጥቶብሽ ለእርሱ የምትቀቢው ሽቱ ልትገዢ ትሄጃለሽ?” ሲል ጠየቃት፡፡ እርሷም መልሷ “አዎን፡፡ በጥቂት ትሩፋት ብዙ ክብር የሚሰጥ ኢየሱስ ክርስቶስ መጥቷልና ለእርሱ የምቀባው ሽቱ ልገዛ እሄዳለሁ” ብላ ስሙን ስትጠራበት እንደ ትቢያ በኖ፣ እንደ ጢስ ተኖ ጠፍቶላታል፡፡

ዲያብሎስ ከአንድም ሦስት ጊዜ ሊያሰናክላት ጥረት አድርጓል፡፡ ነገር ግን ዓላማዋ ጌታችን መድኀኒታችን ኢየሱስ ክርስቶስን ማግኘት፣ በፊቱም መንበርከክና ስለ ኃጢአቷ እያለቀሰች ሽቱውን ትቀባው ዘንድ ነውና ዲያብሎስ ያቀረበላትን የማሰናከያ መንገዶችን ሁሉ በዓላማዋ በመጽናት በአምላኳ በጌታዋ ስም ድል ነሳችው፡፡

ስጦታውንም ስንመለከት ውድ የሚያደርገው ከእሷ ጥረትና ቅንነት አንጻር እንጂ ለጌታችን መድኀኒታችን ኢየሱስ ክርስቶስ ይህ የሚመጥን ሆኖ አይደለም፡፡ ዙፋኑ እንኳ በሰማያውያን ሱራፌል በሰማያዊው ማዕጠንት የሚታጠን ጌታ ምድራዊ ሽቱ እንዴት ሊመጥነው ይችላል? ሊሆንም አይችልም፡፡ ሃያ አራት ሰዓት ሙሉ ከምስጋና የማይለዩ ንጹሐን፣ ቅዱሳን፣ ትጉኃንና ሰማያውያን መላእክት በሚያቀርቡት ሰማያዊ ሽቱ የሚታጠን አምላክ ዕድሜ ዘመኗን በሙሉ በዝሙት የኖረች ሴት በምታቀርበው ሽቱ ለዚያውም በዝሙት በተሰበሰበ ብር በተገዛ ሽቱ እንዴት ሊወሰን ይችላል?  ግን እሷ መሐሪነቱን ተረድታለች፤ የኃጢአተኛን መመለሱን እንጂ ሞቱን የማይሻ ቸርና ይቅር ባይ አምላክ እንደሆነ ዐውቃለች፤ የዛሬ መመለሷን እንጂ የትናንትና ማንነቷን እየተመለከተ እሷን የማያሸማቅቅ ይልቁንም ቸር አባት እንደሆነ አምናለች ፡፡ ስለዚህ አደረገችው፤ ጌታችን መድኀኒታችን ኢየሱስ ክርስቶስም የአመጣችለትን ሽቱ ደስ ብሎት ተቀበላት፡፡

እጅግ የሚገርመው ግን እሷ ያልተቆጨችበትን ውድ ሽቱ ተመልካቾችን አላስደሰታቸውም ነበር፡፡ ይህ እኮ ተሸጦ ለድኾች ቢሰጥ ይቻል ነበር በማለት አጉል ተቆርቋሪ መሰሉ፡፡ ግን ለምን ተቃወሟት የሚለውን በተወሰነ መንገድ ማየቱ የተሻለ ነው፡፡ ከተቃዋሚዎች አንዱና ዋነኛው ይሁዳ ነበር፡፡ ይሁዳ ደግሞ በዚያን ሰዓት ገንዘብ ቤት ነበርና ወደ ከረጢቱ ከሚገባው ሁሉ ከዐሥር አንድ ይደርሰው ነበር፡፡ ሽቶው የተገዛበት ዋጋ ሦስት መቶ ወቄት ወርቅ ነው፡፡ ስለዚህ ሠላሳ ወቄት ወርቅ ይደርሰው ነበር ግን ስጦታው በብር ሳይሆን በዓይነት ስለቀረበ ያን ድርሻ ማግኘት አልቻለም፡፡ በዚህ ምክንያት ለድኾች ያዘነ በመምሰል ለሱ የቀረበትን ድርሻ እያሰላሰለ ተቃውሞውን አቅርቧል፡፡

ጊዜው መልካም ነገር የሚደረግበት፣ ሰዎች ከኃጢአት ወደ ሥርየት የሚመለሱበት፣ ለበጎ ሥራ የሚነሳሱበት ነበር፡፡ በአንጻሩ ደግሞ መንፈሳዊውን ቅናት የሚያደበዝዝና ተስፋ የሚያስቆርጥ፣ ተቃውሞ የበዛበትና ሰይጣናዊው ቅናት የሰፈነበትም ነበር፡፡ በመሆኑም እግዚአብሔር የፈቀደላቸው ያላቸውን ሁሉ የሚሰጡበት፣ ለገንዘባቸው ቀርቶ ለሰውነታቸው የማይሳሱበት፣ በአንጻሩ ደግሞ ሰዎች ስለ ሰጡ የሚናደዱበት “ነጋዴ አያዝንም እሱ ስለ ከሰረ ወንድሙ እንጂ ስለ ቀረ” እንዲሉ ይህ ዓይነት ከንቱ ምኞት የሰፈነበት ነበርና በጎ በሚያደርጉት ላይ ተቃዋሚዎች በዝተው ነበር፡፡ መድኅን ዓለም ኢየሱስ ክርስቶስ ግን ሁሉን አዋቂ ነው ምን ለምን እንደሚሆን ያውቃልና በመሆኑም አክብሮ ተቀበላት። ነገር ግን ሰዎች ሲቃወሙ እሱ እንዲህ አክብሮ የተቀበለበት ምክንያት ምን ይሆን ስንል የሚከተሉትን ምክንያቶች ማየት ይቻላል፡፡

በመጀመሪያ ደረጃ እርሱ የሚገኘው በዚያ ዕለት ብቻ ነው፡፡ ኢየሱስ ክርስቶስ “ድሆችንስ ዘወትር ታገኟቸዋላችሁ በወደዳችሁም ጊዜ በጎ ታደርጉላቸዋላችሁ እኔን ግን ዘወትር የምታገኙኝ አይደለም፡፡” በማለት እንደተናገረው በአካለ ሥጋ ሆኖ ሽቱ የሚረበረብለት የሚጨበጥ የሚዳሰስ ሆኖ የምታገኝበት ጊዜ ያን ጊዜ ብቻ ነው፡፡ እዚህ ላይ ጥንቃቄ ማድረግ ያለብን ከዚያ በኋላ ከሥጋው ይለያል ማለት አይደለም፡፡ በአይሁድ እጅ ተይዞ ወደ ፍርድ የሚቀርብበት፣ ወደ መስቀል የሚወጣበት ጊዜ እንደ ደረሰና እሷ የማታገኝበት ቀን እንደሚመጣ ለማመልከት ነው፡፡

በሁለተኛ ደረጃ እሷ ወጣኒ ናትና እንዳትሰናከል ነው፡፡ በጀማሪነት ደረጃ ያለን ሰው የሚያስተምሩትን ሊመጥኑለት፣ ምን ማድረግ እንደሚገባ የቅደም ተከተል ጉዳይ ላይ ማተኮር እንደሚገባ፣ ቀስ እያለ ወደ ምን መሄድ እንዳለበት ሲያስተምር ነው፡፡ ምክንያቱም ክርስትና ቀስ በቀስ የሚለማመዱት ሕይወት ነውና፡፡ ብርሃነ ዓለም ሐዋርያው ቅዱስ ጳውሎስ “ወንድሞቼ ሆይ እኔስ የሥጋና የደም እንደ መሆናችሁ ክርስቶስንም በማመን ሕፃናት እንደ መሆናችሁ እንጂ እንደ መንፈሳውያን ላስተምራችሁ አልቻልሁም፤ ወተትን ጋትኋችሁ ጽኑዕ መብልም ያበላኋችሁ አይደለም፤ ገና አልጠነከራችሁና፡፡” (፩ቆሮ ፫፥፩-፪) በማለት እንዳስተማረን በጀማሪነት ያለን ሰው በለመደው፣ በሚችለውና በሚወደው ነገር መሳብ ተገቢ ስለሆነ ሰማያዊው ሙሽራ ኢየሱስ ክርስቶስም የአመጣችውን ስጦታ በደስታና በአክብሮት ተቀበላት፡፡

በሦስተኛ ደረጃ አንድ ሰው ቀድሞ ምን ማድረግ እንዳለበት የሚያማክር ከሆነ እዲህ አድርግ ሊሉት ይገባል ከሆነ በኋላ ግን እንዲህ ማለት ያሰናክላልና ተዉዋት አላቸው፡፡ ተዉዋት ብቻም አይደል ያላቸው ለምን ታሰናክሏታላችሁ ነበር ያላቸው፡፡ ይህም ማለት በትርጓሜ ወንጌል እንደተጻፈው አንድ ሰው ምጽዋት መስጠት ቢፈልግና ለቤተ ክርስቲያን ልስጥ ወይስ ለነዳያን ልስጥ ብሎ ቢያማክር ሕንፃ እግዚአብሔር የሆነው የሰው ልጅ በርኀብ በጥም እየተሠቃየ ሕንፃ ቤተ ክርስቲያንን ገንባ ከማለት ቅድሚያ ለሰው ልጅ መስጠት እንዳለበት ማስገንዘብ ይገባል፡፡ ሰውየው በራሱ ተነሳሽነት ካደረገው በኋላ ግን እንዲህ ማድረግ አልነበረብህም ቢሉት ጭራሽ በጎ ሥራ በመሥራቱም ተጸጽቶ ለወደፊቱም መልካም ነገርን ከማድረግ ሊቆጠብ ስለሚችል የሠራውን መልካም ሥራ ጥሩ እንዳደረገ ማበረታታት ይገባል፡፡ እንግዲህ ይህን ሁሉ ምሥጢር የሚያውቀው ማዕምረ ኅቡአት ኢየሱስ ክርስቶስ የመጣለትን ክቡር ስጦታ አክብሮ ተቀብሏል፡፡

ከማርያም እንተ እፍረት የምንማራቸው በርካታ ቁም ነገሮች አሉን፡፡ እነርሱም፡- ለበጎ ነገር መሽቀዳደምን፣ የዓላማ ጽናትን ይልቁንም ለንስሓ መዘናጋት እንደሌለብን መረዳት እንችላለን፡፡ ትርጓሜ ወንጌል እንደሚነግረን ማርያም እንተ እፍረት ይህ ቀረሽ የማትባል መልከ መልካም ነበረች፡፡ ከዕለታት አንድ ቀን መላ ሰውነቷን በሚያሳይ በቁም መስተዋት ራሷን እየተመለከተች ግን ያን የሚመስል ውበት እንደሚያልፍ እንደሚረግፍ ተረዳች፡፡ ለዚህ መድኃኒቱ ደግሞ ንስሓ መግባት እንደ ሆነ ተረዳችና ዘመኗን ሙሉ በዝሙት የአጠራቀመችውን ገንዘብ በመያዝ ሥርየትን ለሚያድለው፣ ኃጢአትህ/ሽ ተሰርዮልሃል/ሻል ለሚለው ሊቀ ካህናት መድኅን ዓለም ኢየሱስ ክርስቶስ የሚገባውን ሽቱ ገዝታ ወደ እሱ ሄደችና ማድረግ የሚገባትን አደረገች፡፡

ማርያም እንተ እፍረት ወደ ልቧ በተመለሰች ጊዜ ሳትውል ሳታድር ፈጥና ነው ንስሓን ወደሚቀበለው ሊቀ ካህናት የሄደችው፡፡ ይህ ብቻ አይደለም በመንገድ ላይ የዲያብሎስን ፈተና በድል ብትወጣውም ወደ ጌታችን መድኀኒታችን ኢየሱስ ክርስቶስ ከደረሰችም በኋላ በደቀ መዛሙርቱ በተለም በአስቆርቱ ይሁዳ መሰናክሎች ገጥመዋታል፡፡

ከደቀ መዘሙርቱ መካከል አዛኝ ለድሆች በጎ አሳቢ በመምሰል ይህ ተሸጦ ለድሆች ሊሰጥ በተገባ ነበር በማለት ያደረገችውን ሥራ እንደ ጥፋት ቆጥረውት ነበር፡፡ ነገር ግን በፈጣሪዋ ፊት ተንበርክካለችና የዓላማዋን ጽናት፣ የልቧን መሻት ጌታችን መድኀኒታችን ኢየሱስ ክርስቶስ አውቋልና እርሷ ሳትሆን ስለ እርሷ ክርስቶስ “መልካም አደረገች ለምን ታሰናክሏታላችሁ” በማለት ሥራዋን አደነቀላት፡፡ እንዲያውም ይህ የእሷ ሥራ በአራቱም ወንጌላውያን ሲነገር እንደሚኖር በመግለጽ አስረዳቸው፡፡ ማሰናከያዎቹንም ሁሉ አስወገደላት፡፡

ስለዚህ እኛም ወደ መልካም ነገር ስንሄድ በየመንገዱ እየጠበቀ ለዚያውም በምናውቀውና በምንወደው አካል ዲያብሎስ እያደረ እንዳያሰናክለን ትጥቃችንን ልናጠብቅ፣ በዓላማችንም ልንጸና ይገባል፡፡

በተጨማሪም በመጽሐፍ ቅዱስ በዓላማቸው ጸንተው በእግዚአብሔር የተመሰከረላቸው፣ በክብር ላይ ክብር የታደላቸው፣ በርካታ ሰዎችን መጥቀስ ይቻላል።

ዮሴፍ በምድረ ግብፅ ያውም በስደት ላይ ሳለ በዓላማው በመጽናቱና በወጣትነት ዘመን እያለ እንኳን የወጣትነት ስሜት ሳያሸንፈው በፈርዖን ሚስት የቀረበለትን የዝሙት ጥያቄ ሳያመነታ በድል ተወጥቶታል፤ በንጉሡ ፈርዖን ዘንድም እንዲከበር፣ ቤተሰቦቹን ከነበረው ረኀብ እንዲታደግ ዛሬም ሕያውና ዘለዓለማዊ ስም ከፈጣሪው ዘንድ ተሰጥቶት በመልካም አርዓያነቱ ስንጠራው እንኖራለን። ይህ ማለት ግን መከራውን በትዕግሥት አልፎት እንጂ ምንም ዓይነት ፈተና ሳይገጥመው ስለ ኖረ አልነበረም።

ሌላው በዓላማ ስለ መጽናት ከሚያስገነዝቡን ታሪኮች መካከል የፃድቁ የኢዮብ ሕይወት ነው፡፡ ዲያብሎስ ለእግዚአብሔር ያለውን ፍቅር አስጥሎ ልጆቹን በሞት፣ ሀብት ንብረቱን በማውደም፣ እርሱንም ከራስ ጠጉሩ እስከ እግር ጥፍሩ በደዌ ቢመታም፤ ሚስቱንና ወዳጆቹን ቢያስነሳበትም እግዚአብሔርን ረግሞ እንዲሞት ቢገፋፉትም በዓላማው በመጽናት “እግዚአብሔር ሰጠ እግዚአብሔር ነሣ፤ የእግዚአብሔር ስም የተመሰገነ ይሁን” በማለት ከዲያብሎስ ወጥመድ አምልጧል፡፡

ከላይ የተጠቀሱት ባለ ታሪኮችና ታሪካቸውን ጠቀስን እንጂ ጌታችን መድኀኒታችን መድኀኒታችን ኢየሱስ ክርስቶስም  ወደዚህ ምድር የመጣበት ዋናው ዓላማ የሰውን ልጅ ወደ ቀደመ ክብሩ ለመመስና የገባውን ቃል ለመፈጸም ሲሆን በሥጋው በዲያብሎስ ተፈትኗል፡፡ ዲያብሎስ ሦስት ዋና ዋና ፈተናዎችንም አቅርቦለታል፡፡ ጌታችን መድኀኒታችን ኢየሱስ ክርስቶስ ወደ ምድረ በዳ ሄዶ ዐርባ ቀንና ዐርባ ሌሊት ጾመና ከጸለየ በኋላ ተራበ፡፡ የሚፈታተነውም ዲያብሎስ ቀርቦ “አንተ የእግዚአብሔር ልጅ ከሆንህስ እነዚህን ድንጋዮች ዳቦ እንዲሆኑ እዘዝ” አለው፡፡ ጌታችን መድኀኒታችን ኢየሱስ ክርስቶስም መልሶ ሰው የሚኖረው ከእግዚአብሔር አፍ በሚወጣው ቃል ሁሉ እንጂ በእንጀራ ብቻ እንዳይደለ ተጽፏል፡፡” በማለት ድል ነስቶታል፡፡ ነገር ግን ዲያብሎስ ስልቱን በመቀየር በሌላ ፈተና ደግሞ መጣበት፡፡ ወደ ቅድስት ከተማ ወስዶ በቤተ መቅደሱ ጫፍ ላይ አቁሞት “አንተ በእውነት የእግዚአብሔር ልጅ ከሆንህስ ከዚህ መር ብለህ ወደ ታች ውረድ ይጠብቁህ ዘንድ ስለ አንተ መላእክቱን ያዝዝልሃል፤ እግርህም በድንጋይ እንዳትሰነካከል በእጃቸው ያነሱሃል ተብሎ ተጽፏልና” አለው፡፡ ጌታችንም “አምላክህ እግዚአብሔርን አትፈታተነው ተብሎ ደግሞ ተጽፏል” ሲል ድል ነሣው፡፡ ዲያብሎስ ለሦስተኛ ጊዜ እጅግ ረጅም ወደ ሆነ ተራራ አውጥቶት “የዓለሙን ሁሉ መንግሥታት ክብራቸውንም ሁሉ አሳየው፡፡ ብትሰግድልኝ እጅ ብትነሳኝም ይህን ሁሉ እሰጥሃለሁ” አለው፡፡ ከዚህም በኋላ ጌታችን ኢየሱስ “አንተ ሰይጣን ከአጠገቤ ሂድ ለጌታህ ለእግዚአብሔር ስገድ እርሱንም ብቻ አምልክ ተብሎ ተጽፋል” አለው፡፡ ከዚህም በኋላ ዲያብሎስ ተወው እነሆም መላእክት ሊያገለግሉት መጡ ይለናል መጽሐፍ ቅዱስ፡፡ (ማቴ.፬፥፩-፲፩)፡፡

ዛሬም እኛ በእግዚአብሔር ቸርነት ፈተናውን ሁሉ እናልፋለን እንጂ ሰው በራሱ ምንም ማድረግ እንደማይችል ጌታችን መድኀኒታችን ኢየሱስ በመዋዕለ ሥጋዌው ሳለ “እኔ የወይን ግንድ ነኝ፤ ቅርንጫፎቹም እናንተ ናችሁ፤ በእኔ የሚኖር እኔም በእርሱ ብዙ ፍሬ የሚያፈራ እርሱ ነው፤ ያለ እኔ ምንም ልታደርጉ አትችሉምና” ብሎ እንዳስተማረን ፈተናውን ያርቅልን ዘንድ እየተማጸንን በሥራም እየገለጥን እርሱን መስለን ልንኖር ይገባናል፡፡ እንደ ቃሉ ተመላልሰን፣ የሚፈታተነን ዲያብሎስ በመንፈሳዊ ጦር ማለትም በጾም፣ በጸሎት እና በስግደት እንዲሁም መንፈሳዊ ትሩፋትን በመሥራት ንስሓ ገብተን እግዚአብሔር አምላካችንም ንስሓችንን ተቀብሎ መሰናክሎችን ሁሉ የምናልፍበትን ኃይል እንደሚሰጠን አምነን እስከ መጨረሻው በዓላማችን ጸንተን መንግሥቱን እንወርስ ዘንድ መበርታት ይገባናል፡፡ ለዚህም የእግዚአብሔር ቸርነት፣ የድንግል ማርያም አማላጅነት፣ የቅዳሳን ቃል ኪዳንና በረከት አይለየን፡፡ አሜን፡፡

ወስብሐት ለእግዚአብሔር

እንኳን ለእመቤታችን የትንሣኤና ዕርገት በዓል በሰላም አደረሳችሁ – አደረሰን፡፡

በእንዳለ ደምስስ

ከነሐሴ አንድ ቀን ጀምሮ ኦርቶዶክሳውያን ሁሉ ከእመቤታችን ቅድስት ድንግል ማርያም በረከት እናገኝ ዘንድ ቅድስት ቤተ ክርስቲያን ከደነገገቻቸው ሰባቱ አጽዋማት መካከል ፍልሰታ ለማርያም ጾምን ስንጾም ቆይተናል፡፡ ከጾሙ ጋር ተያይዞ አንዳንድ ሥርዓት ሊበጅላቸውና “ሳይቃጠል በቅጠል” እንዲሉ አበው ሊስተካከል ይገባል ያልኩትን በሐመር መጽሔት ፳፻፲፩ ዓ.ም መንገደኛው ዓምድ ላይ ያሰፈርሁትን ጽሑፍ ለዛሬ ለድረ ገጹ ቢሆን ብዬ አቅርቤዋለሁ፡፡ መልካም ንባብ፡፡

እንደምን ሰነበታችሁ? መንገደኛው ነኝ፡፡ እነሆ ከእመቤታችን ቅድስተ ቅዱሳን ድንግል ማርያም በረከትን በመሻት በፍልሰታ ለማርያም ሱባዔ ለመያዝ በእመቤታችን ቅድስት ድንግል ማርያም ስም በታነጸውና በቤተ ክርስቲያናችን ከሚታወቁ ታላላቅ ገዳማት በአንዱ ከዋዜማው ጀምሮ ተገኝቻለሁ፡፡

ለሱባኤ የሚያስፈልጉኝን የጸሎት መጻሕፍትና አልባሳት በቦርሳ አድርጌ በጀርባዬ አዝዬ፣ የጸበል መቅጃ አነስተኛ ጀሪካን፣ ሽንብራና በሶ በፌስታል አንጠልጥዬ ወደ ቤተ ክርስቲያኑ ሔጄ ተሳለምኩ፡፡ በሺዎች የሚቆጠሩ ምእመናን እንደ እኔ በረከት ፍለጋ፣ በጾም በጸሎት ተወስነው ከአምላካቸው ከእግዚአብሔር ለመገናኘት፣ የልቦናቸውን መሻት ይፈጽምላቸው ዘንድ ለመማጸን ያለማቋረጥ ወደ ገዳሙ ይጎርፋሉ፡፡

በበጎ አድራጊ ምእመናን እንደታነጹ የሚታወቁት የወንዶችና የሴቶች የሱባዔ መያዣ በአቶች(አዳራሾች) ከቤተ ክርስቲያኑ ቅጥር ውጪ በስተ ምሥራቅና በስተ ምዕራብ ሽንጣቸውን አርዝመው ለመስተንግዶ በራቸውን ከፍተዋል፡፡ በበሮቹ መግቢያና መውጫዎች የሚገቡና የሚወጡ ምእመናን ግርግር አካባቢውን የገበያ ውሎ አስመስሎታል፡፡ ሁሉም ይጣደፋል፡፡ ግርግሩን እየታዘብኩ ለሱባዔ ወደ ገዳሙ መምጣቴን ለማሳወቅና ቦታ እንዲሰጠኝ ለመጠየቅ ወደ አስተናጋጆቹ ሔድኩ፡፡ ማንነቴን የሚገልጽ መታወቂያ በማቅረብ አስመዝግቤ ወደተመደብኩበት የወንዶች አዳራሽ አመራሁ፡፡

ገና ከቀኑ ስምንት ሰዓት ቢሆን ነው፡፡ አዳራሹ በመጋረጃ መሐል ለመሐል ተከፍሎ በርካታ ምእመናን እንዲያስተናግድ ተደርጎ ተዘጋጅቷል፡፡ ወለሉ ሙሉ ለሙሉ ምንጣፍ ተነጥፎበታል፣ ቀድመውኝ የመጡ ምእመናን የራሳቸውን ምንጣፍ፣ ካርቶን፣ ከምንጣፉ በላይ ደርበው አንጥፈዋል፡፡ አብዛኛው የአዳራሹ ሥፍራ ተይዟል፡፡ ቦታ ፍለጋ ዓይኖቼን አንከራተትኳቸው፡፡ ቢያንስ አምስት ሰው ሊያስተናግድ የሚችል ቦታ እንዳለ አስተዋልኩ፡፡ የሚመቸኝን ቦታ ከመረጥኩ በኋላ ጓዜን አስቀምጬ ምንጣፍ ዘረጋሁ፡፡

ራሴን ካረጋጋሁ በኋላ አዳራሹን ከላይ እስከ ታች በዐይኖቼ ቃኘሁት፡፡ አብዛኛው በአዳራሹ ቦታ ይዘው ያሉት ወጣቶች ናቸው፡፡ አልፎ አልፎ ግን በጎልማሳነት ዕድሜ ላይ ያሉ፣ በሕመም ምክንያት በአስታማሚ የሚረዱ ሰዎችም አብረውን አሉ፡፡ ከሁሉም ግን ትኩረቴን የሳበው  በስተቀኝ በኩል ግድግዳውን ተደግፈው ከአንድ ሱባዔ ከሚይዝ ሰው የማይጠበቅ ፌዝና ቀልድ ላይ ያተኮረ የወጣቶቹ ድርጊት ነው፡፡ ገና ከዋዜማው እንዲህ ከሆነ ጥቂት ሲቆይ ለጸሎትም እንኳን እንደምንቸገር መገመት አላዳገተኝም፡፡ እኔም አላርፍም እነሱን መከታታል ጀመርኩ፡፡ እየተቀላለዱ ይሳሳቃሉ፡፡

የልጆቹ ሁኔታ ስላላማረኝ ነጠላዬን መስቀልያ ለብሼ ወደ ቤተ ክርስቲያኑ ሔድኩ፡፡ አሁንም የቤተ ክርስቲያኑ ቅጥር በጸበልተኛና ሱባኤ በሚገቡ ምእመናን ግርግር እንደተሞላ ነው፡፡ ያሰብኩትን ሱባዔ በሰላም አስጀምሮ በሰላም እንዲያስፈጽመኝ ተማጸንኩ፡፡ ጠዋት የጸበል መጠመቂያ ቦታውን በመፈለግ እንዳልደናበር ወደ አንድ ጸበልተኛ ጠጋ ብዬ “ጸበል መጠመቂያው የት ነው?” ብዬ ጠየቅሁት፡፡

በጣቱ ወደ ምሥራቅ አቅጣጫ እያመለከተኝ “በዚህ በኩል ነው፡፡ ቢያንስ አራት ወይም አምስት ደቂቃ ብቻ ቢወስድ ነው” አለኝ፡፡ በደንብ ሲያስተውለኝ እንግዳ መሆኔን በመረዳት “ለመጀመሪያ ጊዜ ነው የመጣኸው?” አለኝ፡፡

“አዎ፡፡” አልኩት፡፡

“ወንድሜ ራስህን በደንብ መጠበቅ አለብህ፡፡ በእግዚአብሔር ወይም በእመቤታችን እንዳታማርር፡፡ የሰው ፍላጎቱ ብዙ ነው፡፡ ለበረከት የሚመጣ እንዳለ ሁሉ ለስርቆትና ለክፉ ነገር የሚመጣም አለ፡፡ ጸበል ስትጠመቅ ያወለቅኸውን ልብስ ይዞብህ፣ ወይም ለብሶብህ የሚሔድም አይጠፋም፡፡ ንብረትህን በደንብ መጠበቅ አለብህ፡፡ እንዲህ ስልህ ለነፍሳቸው ያደሩ፣ ራሳቸውን ለእግዚአብሔር ያስገዙና ስለሌሎች የሚኖሩ የሉም እያልኩህ አይደለም፡፡ ሥፍራው ታላላቅ ተአምራት የሚከናወንበት የጽድቅ ሥፍራ ነው፡፡ ጠንክሮ መጸለይ ነው” አለኝ በትሕትና፡፡

“እሺ ወንድሜ፡፡ እግዚአብሔር ይስጥልኝ፡፡ የመጣሁት ከእመቤታችን በረከት ለማግኘት ነው፤ ለዚህም እግዚአብሔር ይረዳኛል፡፡” በማለት አመስግኜ ተሰናበትኩት፡፡ “ብዙ ኃጢአት ባለችበት የእግዚአብሔር ጸጋ ትበዛለች” የሚለው የቅዱስ ኤፍሬም የሰኞ ውዳሴ ማርያም ጸሎት ትዝ ብሎኝ እየተገረምኩ አንድ ጥግ ድንጋይ ላይ ተቀመጥኩ፡፡

ሰርክ ላይ ጸሎት፣ የወንጌል ትምህርት እንዲሁም ምሕላ ተደረገ፡፡ ሱባዔው ተጀምሮ እስኪያልቅ ድረስ ምእመናን ሥነ ምግባር በተሞላበት ሁኔታ የመጡበትን ዓላማ አሳክተው እንዲመለሱ፣ የበረከቱ ተሳታፊም እንዲሆኑ በመምህራን ማሳሰቢያ ተሰጠ፡፡

የሰዓታት ጸሎት መርሐ ግብር እስኪጀመር ድረስ ሁሉም ወደየበአቱ በማምራት በሶውን በጥብጦ፣ ቆሎውን፣ ሽምብራውን ቆርጥሞ የበረታ በጸሎት ሲጠመድ ሌላው ዕረፍት አደረገ፡፡ አንዳንዶች ከአሁኑ አርምሞ ጀምረዋል፡፡ አዳራሹ ውስጥ በቡድን ሆነው የመጡት ጓደኛማቾች ድምጻቸውን ይቀንሱ እንጂ መቀላለዳቸውን አላቋረጡም፡፡ በጸሎት ለተጠመደ ኅሊናን ይሰርቃሉ፡፡

ከሌሊቱ ዐራት ሰዓት ሲሆን የቤተ ክርስቲያኑ ደወል ተደወለ፡፡ አንዱ አንዱን እየቀሰቀሰ ተያይዘን ወደ ቤተ መቅደሱ አመራን፡፡ ካህናት አባቶች ሰዓታት ቆመዋል፡፡

ቤተ መቅደሱ የቻለውን ያህል ምእመናንን አስተናግዶ ሌላው ውጪ ሆኖ ብርዱን ተቋቁሞ ይጸልያል፡፡ ሰዓታት እንደ ተጠናቀቀ ንጋት ላይ የኪዳን ጸሎት፣ ስብሐተ ነግህ ቀጠሉ፡፡ ጨለማው ለብርሃን ሥፍራውን ሲለቅ ውዳሴ ማርያምና ቅዳሴ ማርያም ትርጓሜ እንደ ቅደም ተከተላቸው ቀርበው የቅዳሴ ሰዓት እስኪደርስ ጸበል ለመጠመቅ እሽቅድድም በሚመስል ፍጥነት ይራወጣሉ፡፡

ጸበል መያዣ ባለ አምስት ሊትር ጀሪካን ይዤ ወደ ጸበሉ ስፍራ ሰዎችን ተከትዬ ሔድኩ፡፡ ግርግሩ ዕረፍት ይነሣል፡፡ እንደማንኛውም ሰው ወረፋ ያዝኩ ነገር ግን በጉልበታቸው የተመኩ ወጣቶች እየተጋፉ፣ የዕድሜ ባለጠጋ የሆኑትን አረጋውያንን እየገፉ ተጠምቀው ለመውጣት ይጣደፋሉ፡፡ ሰልፉ ተረበሸ፡፡ ችግሩ ከሚያስተናግዱ ወንድሞች በላይ ሆነ፡፡ በሴቶችም በኩል መጠነኛ ግርግሩ ቀጥሏል፡፡ በዚህ መካከል የሚወድቅ፣ ንብረቱ የሚዘረፍ ቁጥሩ በርካታ ነው፡፡ የምእመናን ቁጥር ከፍተኛ ቢሆንም እስከ ስድስት ሰዓት ሳይጠመቅ የተመለሰ አልነበረም፡፡

ከቅዳሴ በኋላ ዕረፍት የሚያደርጉ እንዳሉ ሁሉ ተፈትተው የተለቀቁ ይመስል ከበአታቸው እየወጡ በቡድን፣ በቡድን እየሆኑ በየጫካው ለፌዝና ለቀልድ ጊዜያቸውን የሰጡ ምእመናንም አሉ፡፡ ነገር ግን የመጡት ለሱባዔ ነው፡፡

እንዲህ እንዲህ እያልን ነሐሴ ፲፮ ቀን ድረስ ቆየን፡፡ የእመቤታችን ትንሣኤ ተበሠረ፡፡ ከቅዳሴ በኋላ መምህራነ ቤተ ክርስቲያን የእመቤታችንን ትንሣኤ እንደ ልጇ ትንሣኤ ያክብሩት ብላ ቅድስት ቤተ ክርስቲያናችን ሥርዓት እንደ ሠራች በስፋት አስተማሩ፡፡ የሱባዔውንም መጠናቀቅ አወጁ፡፡

ቤተ ክርስቲያኗ ከጥሉላት ምግቦች ተከልክሎ የቆየውን ምእመን የጾም መፍቻ ብላ ያዘጋጀችው ማዕድ በየአዳራሹና በድንኳኑ ታደለ፡፡ እኔ ካለሁበት አዳራሽ ውስጥ ካሉት ምእመናን መካከል “አንበላም እስከ ነሐሴ ፳፩ ቀን ጾማችንን እንቀጥላለን” በማለት የመለሱት ይበዛሉ፡፡ ግራ ተጋባሁ፡፡ የቀረበላቸውን ተቃምሰው ጓዛችን ሸክፈው ወደወጡበት ቤታቸው ለመመለስ የሚጣደፉ ምእመናንም ቁጥር ብዙ ነው፡፡ እኔ ግን አንድ ቀን እረፍት አድርጌ በማግስቱ ለመሔድ ስለወሰንኩ የቀረበልኝን ማዕድ በላሁ፡፡

የቤተ ክርስቲያን ሥርዓት በመጣሱ ቅር ተሰኘሁ፡፡ ቤተ ክርስቲያን “የእመቤታችንን ትንሣኤ እንደ ልጇ ትንሣኤ አክብሩ” እያለች ይህንን ተላልፈው የእመቤታችን ትንሣኤ በሚከበርበት ወቅት እጾማለሁ ማለት ምን ማለት እንደሆነ አልገባኝም፡፡ “ቤተ ክርስቲያን ሁለት ዓይነት ሥርዓት አላት እንዴ?” እያልኩ ከራሴ ጋር ሙግት ገጠምኩ፡፡ አንድ ነገር ወሰንኩ፡፡ አባቶችን ማማከር፡፡

ጥቂት ዕረፍት አድርጌ ወደ ቤተ ክርስቲያኑ ቅጥር በመግባት አባቶችን ፈለግሁ፡፡ ውዳሴ ማርያምና ቅዳሴ ማርያም ትርጓሜን ላለፉት ቀናት በጣፋጭ አንደበታቸው ሲተረጉሙ የነበሩት አባት ከቤተ መቅደስ ሲወጡ አገኘኋቸው፡፡ ቀረብ ብዬ ሰላምታ ከሰጠኋቸው በኋላ ጥያቄዬን አቀረብኩ፡፡

በትኩረት እየቃኙኝ “ልጄ ቤተ ክርስቲያን የሠራችው ሥርዓት ማፋለስ ኃጢአት ነው፡፡ እውነት ነው ቤተ ክርስቲያን የእመቤታችን ትንሣኤ እንደ ልጇ ትንሣኤ ያክብሩት ብላ ሠርታለች፡፡ ነገር ግን ምእመናን ሲጥሱት እንመለከታለን፡፡ ከዚህ በፊትም በስፋት አስተምረናል፡፡ የበለጠ በረከት ለማግኘት ነው” እያሉ የሚጾሙ ምእመናን ቁጥር በርካታ ነው፡፡ ይህ ትክክል አይደለም፡፡ አንዳንድ ምእመናን ቢነገራቸውም አይሰሙም፡፡ ግዝት አይደለም መጾም እንችላለን ይሉሃል፡፡ አንዳንድ አባቶችንም ስታነጋግር ምን ችግር አለው ይሉሃል፡፡ ነሐሴ ፳፩ ቀንም ታቦት አውጥተው ያከብራሉ፡፡ ይህ ትክክል አይደለም፡፡” አሉኝ ጥያቄው የእኔ ብቻ ሳይሆን የእሳቸውም ጥያቄ እንደሆነ በሚገልጽ ምላሽ፡፡

“ታዲያ ሥርዓት የሚሽሩትን ከገዳሙ ለምን አታስወጡም” አልኳቸው፡፡

ለጥቂት ሰከንዶች በመገረም እያዩኝ፡፡ “ልጄ እኔ የዚህ ሥልጣን የለኝም፡፡ በተቻለኝ አቅም ልጆቼን በሔዱበት ሁሉ የቤተ ክርስቲያንን ሥርዓት እንዳይጥሱ አስተምሬአቸዋለሁ፡፡ ካለ እኔ ፈቃድም አያደርጉትም፡፡ አሁን አንተ የምትለኝን ገዳሙ የራሱ አስተዳደር አለውና እነሱን ጠይቅ” ብለው መንገዳቸውን ቀጠሉ፡፡ አስተዳደሩን ለማግኘት ያደረግሁት ጥረት ሳይሳከ ቀረ፡፡

ሁላችንም ምክንያት የምናደርገው ሌሎችን ነው፡፡ ለምን ብለን ግን አንጠይቅም፡፡ ፈቃጁ ማነው? ማን እንደሆነ አይታወቅም፡፡ አንዱ ወደ አንዱ ያሻግርሃል፡፡ በጣም ተበሳጨሁ፡፡ ወደ አዳራሹ ተመለስኩ፡፡ ብዙ ሰዎች ሱባኤያቸውን ቀጥለዋል፡፡ በመብላቴ እኔን እንደ ደካማና ኃጢአተኛ አድረገው የቆጠሩኝ መሰለኝ፡፡ ሕሊናዬ አላርፍ አለኝ፡፡

አዳራሹ ውስጥ ካሉት መካከል ለረጅም ሰዓት ቆሞ በመጸለይና በመስገድ መንፈሳዊ ቅናት ወደ ቀናሁበት ወንድም ጠጋ ብዬ ጥያቄዬን አቀረብኩለት፡፡ “ጾሙ አልተጠናቀቀም ወይ?” ነበር ጥያቄዬ፡፡

“በረከት ለማግኘት ስል እስከ እመቤታችን ዕረፍት መታሰቢያ ቀን ድረስ እቆያለሁ፡፡” አለኝ፡፡

“ለምን? ሥርዓት መጣስ አይሆንብህም?” አልኩት፡፡

“መብቴ እኮ ነው፡፡ ከመብላት አለመብላት ይሻላል፡፡” አለኝ፡፡

“እንዴት እንዴት አድርገህ ነው የምትተረጉመው? ቤተ ክርስቲያን የእመቤታችንን ትንሣኤ ከነሐሴ ፲፮-፳፩ ቀን እንደ በዓለ ሃምሳ ያክብሩት በማለት መደንገጓን ምነው ዘነጋህ? ለመሆኑ ሱባኤው እስከ ነሐሴ ፳፩ ቀን መቆየት የተጀመረው መቼ ነው?” አልኩት፡፡

“በቅርብ ይመስለኛል፡፡ ግን ምን ችግር አለው? ቀኖና ነው፡፡ ቀኖና ደግሞ ይሻራል፣ ይስተካከላል፡፡ አባታችን ይህንን ሲናገሩ ሰምቻለሁ” አለ በድፍረት፡፡

“ማናቸው አባትህ?” አልኩት ዐይን ዐይኑን እየተመለከትኩ፡፡

“ባሕታዊ እከሌ ናቸዋ” አለኝ፡፡

በጣም አዘንኩ፡፡ ቅዱስ ሲኖዶስ ተዘንግቶ፣ ቀድሞ አባቶች የሠሩትን ሥርዓት በባህታዊ ነኝ ባዮች ሲሻር ያሳዝናል፡፡

“ለመሆኑ ማነው የሚሽረውና፣ የሚያስተካክለው?” አልኩት እልህ እየተናነቀኝ፡፡

“ቤተ ክርስቲያን ናታ፡፡”

“የቤተ ክርስቲያን መብት ከሆነ አንድ ባሕታዊ ይህንን የመሻር ምን ሥልጣን አለው? ለምእመኖችዋ ውሳኔውን ማሳወቅ ያለባት ቤተ ክርስቲያን ናት፡፡ እሷ ደግሞ አባቶች የሠሩትን ሥርዓት የምታጸና እንጂ የምታፈርስ አደለችም፡፡” አልኩት በንዴት፡፡

“አንተ እንደፈለግህ፡፡ እኔ ግን የባሕታዊ አባቴን ድምጽ እሰማለሁ፡፡ በቃ አትጨቅጭቀኝ፡፡” በማለት በኩርፊያ ጥሎኝ ሄደ፡፡

ለመሆኑ የቤተ ክርስቲያን ሥርዓት ሲጣስ አደብ የሚያስገዛው ማነው? ለማንስ አቤት እንበል? ሱባኤያችን በረከት የሚያሰጥ ይሆን ዘንድ ምን እናድርግ? ሱባኤ ሔጄ ይህንን ታዘብኩ፡፡ እናንተስ ምን ትላላችሁ?

በእንዳለ ደምስስ

ማኅበረ ቅዱሳን ላለፉት ሠላሳ ዓመታት በመላው ዓለም በሚገኙ ከፍተኛ ትምህርት ተቋማት የግቢ ጉባኤያትን በመመሥረት ኦርቶዶክሳውያን ወጣቶች ስለ ቅድስት ቤተ ክርስቲያን አስተምህሮ፣ ዶግማ እና ቀኖና እንዲሁም ሥርዓት እንዲያውቁ፣ ራሳቸውንም ከከፉ በመጠበቅ መንፈሳዊ ሕይወታቸውን ማነጽ እንዲችሉ አገልገሎቱን በማጠናከር ከፍተኛ ሥራ ሲሠራ ቆይቷል፡፡

በእነዚህም ዘመናት በመቶ ሺዎች የሚቆጠሩ ተማሪዎችን አስተምሮ በአባቶች ቡራኬ ማስመረቅ የቻለ ሲሆን፤ ተመርቀው ሲወጡም በመንፈሳዊ ሕይወታቸው ጠንክረው በሚሄዱበት ሁሉ በተሰማሩበት የሥራ መስክ ሀገራቸውን፣ እንዲሁም በተማሩት የቤተ ክርስቲያን ትምህርት እንደ ጸጋቸው መልሰው ቤተ ክርስቲያንን እንዲያገለግሉ መመሪያ ይሰጣቸዋል፡፡ በተጣለባቸው ኃላፊነት መሠረት በርካቶች ቤተ ክርስቲያን ውስጥ በሚገኙ መዋቅሮች ማለትም በማኅበረ ቅዱሳን ማእከላትና ወረዳ ማእከላት፣ በሰንበት ትምህርት ቤቶች፣ በሰበካ ጉባኤያት፣ በተለያዩ የጉዞና የጽዋ ማኅበራት በመሳተፍ አገልግሎት ሲሰጡ ማየት የተለመደ ነው፡፡

በከፍተኛ ትምህርት ተቋማት ውስጥ በነበሩበት ወቅት ራሳቸውን ከኃጢአት ሥራና አልባሌ ሥፍራ በማራቅ በትምህርታቸው ውጤታማ ሆነው ሜዳልያና ዋንጫ በመሸለም ለሌሎች ምሳሌ በመሆንም ይታወቃሉ፡፡ ከመደበኛ ትምህርታቸው በተጨማሪም ማኅበረ ቅዱሳን የሚሰጠውን ተከታታይ የቤተ ክርስቲያን ትምህርት ከመማር አልፈው የአብነት ትምህርትን በመከታተል ዲያቆን፣ መሪጌታ እየሆኑ መውጣትም እንደሚቻል በተግባር ያሳዩ በርካቶች ናቸው፡፡

በግቢ ጉባኤ ቆይታቸው ከትምህርታቸው በተጨማሪ በመንፈሳዊ ሕይወታቸውም ለማደግ የሚያደርጉት ጥረት ከፍተኛ በመሆኑ ሲወጡም ቤተ ክርስቲያንና ሀገራቸውን በማገልግል ላይ የሚገኙ በሄዱበት ሁሉ በአገልግሎት በማሳተፍ በልዩ ልዩ ሙያዊ ዘርፎች ለቅድስት ቤተ ክርስቲያን ዕድገት ዘመኑን የዋጀ አገልግሎት ያበረክታሉ፡፡

በተቃራኒው ደግሞ በግቢ ጉባኤ ውስጥ እያሉ በአገልግሎትም ሆነ በመንፈሳዊ ሕይወታቸው እንዳልበረቱ ሁሉ ትምህርታቸውን አጠናቀው ሲወጡ ግን ያንን ጥንካሬአቸውን ይዘው መቀጠል ይቸገራሉ፡፡ ጌታችን መድኃኒታችን ኢየሱስ ክርስቶስ “በዓለም ግን መከራ ትቀበላላችሁ፤ ነገር ግን ጽኑ፤  እኔ ዓለምን ድል ነስቼዋለሁና” ብሎ እንዳስተማረው በጽናት ዲያብሎስ ያዘጋጀውን ወጥመድ ሁሉ ሰባብሮ ከማለፍ ይልቅ በቀላሉ ዓለም ባዘጋጀላቸው ወጥመድ ውስጥ ይወድቃሉ፡፡ (ዮሐ.፲፮፥፴፫)፡፡

ነገር ግን ለተጠሩበት ዓላማ መታመን ከእያንዳንዳቸው ይጠበቃልና ለሚገጥሟቸው ፈተናዎች ሁሉ ከመንበርከክ በጽናት ማለፍ ይገባል፡፡ በተለያዩ ሰንካላ ምክንያቶችም በማመካኘት ከአገልግሎትና ከመንፈሳዊነት መራቅ አያድናቸውምና፡፡

ከምረቃ በኋላ የሚያጋጥሟቸውን የሕይወት ጉዞዎች በመንፈሳዊ ሕይወት መመዘን፡-

የግቢ ጉባኤያት ተማሪዎች ከምረቃ በኋላ ወደ ማኅበረሰቡ የመቀላቀል ዕድል ስለሚያገኙ በትምህርት ላይ ካሳለፉት ሕይወት በተለየ መልኩ ዓለም በሯን ከፍታ ትቀበላቸዋለች፡፡ ራሳቸውን ችለው የሚቆሙበት ጊዜ ደርሷልና በበርካታ ጉዳዮች የመሳተፍ ዕድል ይገጥማቸዋል፡፡ ከእነዚህም ውስጥ፡-

• ሥራ
• አገልግሎት
• ማኅበራዊ ሕይወት
• ጋብቻ

ከላይ ከተጠቀሱት በተጨማሪ ሌሎችም ጉዳዮች ቢኖሩም እነዚህን አንድ በአንድ እንመለከታቸዋለን፡፡

፩. ሥራ፡-

የግቢ ጉባኤያት ተማሪዎች ገና ከከፍተኛ ትምህርት ተቋም እንደወጡ ሥራ ማግኘት ትልቁና ከባዱ ፈተና ነው፡፡ ነገር ግን ብዙ ውጣ ውረድ ቢኖረውም ይህንን ተቋቁመው ሥራ የማግኘት ዕድል ይገጥማቸዋል፡፡ ከሥራ ጋር ተያይዞ ደግሞ የሥራውን ባሕርይ፣ የመሥሪያ ቤቱን ባህል ለመልመድ ጥረት ያደርጋሉ፤ ይህን ሲያደርጉ በተለይም ከአገልግሎት፣ ከጸሎት፣ በአጠቃላይ ከመንፈሳዊ ሕይወት የመዘናጋት ሁኔታ ሊያጋጥማቸው ይችላል፡፡ ነገር ግን በግቢ ጉባኤ ውስጥ እያሉ ያገኙት ዕውቀት፣ የቀሰሙት ልምድ፣ እንዲሁም የጸሎት ሕይወት ስለሚናፍቃቸው ከሥራቸው በተጨማሪ እግዚአብሔርን አጋዥ አድርጎ ለመጓዝ አይቸገሩም፡፡

ሥራ ለማንኛውም የሰው ልጅ መሠረታዊ ጉዳይ ስለሆነ ራስን በራስ የማስተዳደር፣ ቤተሰብን የመርዳት ዓላማ ተግባራዊ የሚያደርጉበት ወቅት ስለሆነ ይበልጥ ኃላፊነት እንዲሰማቸው ያደርጋቸዋል፡፡ ሥራ መያዛቸው በርካታ ጥያቄዎችን የሚፈታላቸው በመሆኑ ቀስ በቀስ ወደ አቋረጡት አገልግሎት በመመለስ በቅድስት ቤተ ክርስቲያን መዋቅር ማለትም በማኅበረ ቅዱሳን፣ በሰንበት ትምህርት ቤት፣ በሰበካ ጉባኤ፣ በአገልልገሎትና በጽዋ ማኅበራት ውስጥ ሲሳተፉ መመልከትም የተለመደ ነው፡፡ በተለይም ለአገልግሎት የሚያበቃቸውን ሥልጠና ማኅበረ ቅዱሳን ባሉት መዋቅሮቹ አማካይነት በመስጠት መምህራን በሌሉባቸው ቦታዎች በመሸፈን፣ ክህነትም ካላቸው በጎደለው ቦታ ሁሉ ገብተው ያገልግላሉ፡፡ ይህም ባይቻል ግን ራሳቸውን አርአያ ያለው ክርስቲያን ይሆኑ ዘንድ በማብቃት መልካም ቤተሰብን ያፈራሉ፡፡

አንዳንዶቹም ገና ከከፍተኛ ትምህርት ተመርቀው ሲወጡ ወደ ቤተሰቦቻቸው ሲመለሱ ወደ አገልግሎት መመለስ እንኳን ባይችሉ በአጥቢያቸው በሚገኝ ቤተ ክርስቲያን ኪዳን የማድረስ፣ ቅዳሴ የማስቀደስ፣ ራሳቸውንም ከመንፈሳዊ ሕይወት ጋር ማቆራኘቱ ላይ ይተጋሉ፡፡ ሥራ ቢያገኙም ባያገኙም በመንፈሳዊ ሕይወታቸው ዙሪያ የሚመጣባቸውን ፈተና ሁሉ ይጋፈጣሉ፡፡ የንስሓ አባት የመያዝ፣ የምሥጢራት ተካፋይ የመሆን፣ በጸሎት የመበርታት ዕድላቸውም ከፍተኛ ነው፡፡

በሌላ በኩል ደግሞ ከሥራ ማግኘት ጋር ከሚያጋጥሟቸው ፈተናዎች መካከል ዋነኛው የኢኮኖሚ ጉዳይ ከሞላ ጎደል በመመለሱ ለሌሎች ፍላጎቶች የመጋለጥ ዕድላቸውም ከፍተኛ መሆን ነው፡፡ መንፈሳዊ ፍሬን ከማፍራት ይልቅ አንቱ አንቱ እንዲባሉ ይተጋሉ፡፡ መንፈሳዊነትን እርግፍ አድርገው በመተዋቸውም የበላቸው ጅብ አልጮህ ይላል፤ ጠፍተውም ይቀራሉ፡፡ ይህ ከፍተኛ ጥንቃቄ የሚፈልግ ጉዳይ በመሆኑ በመንፈሳዊ ሕይወት አልፈዋልና መፍትሔውን ሁሉ ከእግዚአብሔር ጋር በመነጋገር በሰከነ መንፈስ ማየትና መፍታትን ይጠይቃል፡፡

ግባቸው ሥራ ማግኘት ላይ ብቻ ገድበው ዓላማቸው ሲሳካ የመጡበትንና ያለፉበትን ሕይወት በመርሳት ለአልባሌ ነገር ይጋለጣሉ፡፡ በተለይም ገንዘብ ማግኘታቸው ሁሉን ማድረግ እንደሚችሉ አድርጎ ዲያብሎስ ስለሚያተጋቸው ይህንን ተቋቁመው ማለፍ ባለመቻላቸው ወድቀውና ባክነው ይቀራሉ፡፡ ለቤተሰብ ያለመታዘዝ፣ ክፉንና ደጉን አለመለየት፣ ሁሉንም ነገር ሞክሬ ካላየሁ የሚል ስሜት ውስጥ በመግባት ሕይወታቸውን ያበላሻሉ፡፡ አንድ ጊዜ ከገቡ መውጣት ስለሚቸገሩም ከቤተ ክርስቲያንም ከአገልግሎትም ይርቃሉ፤ መንፈሳዊነታቸውንም እርግፍ አድርገው ይጥላሉ፡፡

እነዚህ ከላይ ያየናቸው ሁለት ገጽታዎች ጎልተው የሚታዩ ሲሆን ይህንን ችግር ለመፍታት ቤተሰብ ትልቁን ድርሻ ቢወስድም እንደ ተቋም ማኅበረ ቅዱሳን ቅድስት ቤተ ክርስቲያን በሰጠችው ኃላፊነት መሠረት በግቢ ጉባኤ ውስጥ አልፈው የተመረቁ ተማሪዎችን ባለው መዋቅር የመከታተል ግዴት አለበት፡፡ በተለይም ከማእከላትና ወረዳ ማእከላት ብዙ ይጠበቃል፡፡

፪. አገልግሎት፡-

አገልግሎት በአንድ ወቅት ብቻ በሕይወት ተተግብሮ የሚጠናቀቅ ጉዳይ አይደለም፡፡ የአባቶቻችንም ሕይወት እንዲሚያስተምረን እስከ ሕይወት ፍጻሜአቸው ድረስ የሚገጥማቸውን ፈተና ሁሉ እግዚአብሔርን አጋዥ በማድረግ  ማለፋቸውን ነው፤ ቅዱሳት መጻሕፍትም የሚያስተምሩን ይህንኑ ነው፡፡  “እስከ መጨረሻ የሚጸና ግን እርሱ ይድናል” እንዲል፡፡(ማቴ. ፳፬፥፲፫)

አገልግሎት ከራስ ይጀምራል፤ ራስን በመንፈሳዊ ሕይወት በማነጽ ለሌሎች ብርሃን መሆንን የሚጠይቅ ነው፡፡ ራስን በመንፈሳዊ ሕይወት ከማነጽ ጀምሮ ቤተሰብን፣ ጎረቤትን፣ ማኅበረሰብን፣ ቤተ ክርስቲያንን ማገልገል ከአንድ መንፈሳዊ ሰው የሚጠበቅ መሠረታዊ ጉዳይ ነው፡፡ በመንፈሳዊ ሕይወት ባደግን ቁጥር ለአገልግሎት መፋጠናችንም እያደገ ይመጣል፡፡  ከዚህ አንጻር ከግቢ ጉባኤያት ተመርቀው ሲወጡ በሄዱበት ሁሉ ለአገልግሎት ራሳቸውን ማዘጋጀት፣ ከዚህ,ያም አልፎ በጎደለው በኩል በመቆም ክርስቲያናዊ ግዴታቸውን መወጣት ይጠበቅባቸዋል፡፡ በተለይም ቤተ ክርስቲያን ብዙ ትጠብቅባቸዋለች፡፡

አንዳንዶች ግን በግቢ ጉባኤያት በቂ ዕውቀትን በመቅሰም የጀመሩትን የክርስትና ሕይወት ከምረቃ በኋላ ወደ ቤተሰቦቻቸው ሲመለሱ ሥራ እስኪያገኙ ድረስ አገልግሎት ላይ ሲዘናጉ እንመለከታቸዋለን፡፡ ያለ መሰልቸት በሥራ አስፈጻሚነትና በተለያዩ የአገልግሎት ክፍሎች እንደ ፀጋቸው ሲያገለግሉ እንዳልነበር ከዚያ ሲወጡ ግን ዕረፍት እንደመውሰድ ወደ ኋላ የሚሉ እንዳሉ ይታወቃል፡፡ ብዙውን ጊዜ ከአገልግሎት ያራቃቸው ምን እንደሆነ ሲጠየቁ ሥራ ማጣት እንደ ምክንያት ሲያቀርቡ ቢደመጡም ሥራ ካገኙም በኋላ ከቤተ ክርስቲያን የሚርቁ ብዙዎች ናቸው፡፡

የአገልግሎት ዓላማና ግብ ምን እንደሆነ የገባቸው ግን ከፊት ይልቅ በመትጋት በማኅበረ ቅዱሳን፣ በሰንበት ትምህርት ቤት፣ በአገልግሎት ማኅበራት በመሳተፍ የተሰጣቸውን ፀጋ በተግባር ሲያውሉም እንመለከታለን፡፡ በአጠቃላይ ሕይወት ከምረቃ በኋላ በአገልግሎት ከፊት ይልቅ በመትጋት ለሌሎች ምሳሌ መሆን የሚችሉ አገልጋዮችም ለቤተ ክርስቲያን ማትረፍ ተችሏል፡፡ የማኅበረ ቅዱሳን ተቀዳሚ ዓላማም ራሱን በክርስትና በማነጽ፣ ለአገልሎት በመትጋት ለቤተ ክርስቲያን ተስፋ የሚሆናትን ትውልድ ማፍራት ነውና፡፡

፫. ጋብቻ፡-

“መጋባት በሁሉ ዘንድ ክቡር ነው” እንዲል (ዕብ. ፲፫፥፬) የሰው ልጆች በእግዚአብሔር ከተሰጣቸው ፀጋዎች አንዱ ጋብቻ ነው፡፡ ብዙ ተባዙ ምድርንም ሙሉዋት እንደተባለ ከግቢ ጉባኤ በኋላ ይርዘምም ይጠር ወደ ጋብቻ የመግባት ዕድላቸው ከፍተኛ ነው፡፡ ጊዜአቸውን በአግባቡ በመጠቀም ለትዳራቸው፣ ለቤተሰባቸው፣ ለማኅበራዊ ሕይወት፣ እንዲሁም ለአገልግሎት በመመደብ በሰንበት ትምህርት ቤት፣ በሰበካ ጉባኤና በመሳሰሉት በመሳተፍ የድርሻቸውን ለመወጣት ጥረት ያደርጋሉ፡፡ ሁሉንም በአግባቡና በሥርዓቱ በመምራት ቅድስት ቤተ ክርስቲያን የጣለችባቸውን ኃላፊነት ለመወጣት ከበፊት ይልቅ ይተጋሉ፡፡ ለትውልድም አርአያ ይሆናሉ፡፡

በሌላው አቅጣጫ ደግሞ ትዳርን እንደ ምክንያት በማቅረብ ከአገልግሎት የሚርቁ እንዳሉ ይታወቃል፡፡ ይህ እንዳይሆን ትዳር የመጨረሻ ግባቸው ሆኖ እንዳይቀር፣ በአገልግሎት እንዲጸኑ፣ ራሳቸውንም በትምህርት እንዲያሳድጉ፣ በማኅበራዊ ሕይወትም መሳተፍ እንዲያስችላቸው መንገድ ማመቻቸት አስፈላጊ ነው፡፡

አገልግሎት ቢመችም ባይመችም የዘወትር የሕይወት አንድ አካል አድርጎ መመልከት ለዚህም በታማኝትና በቆራጥነት ማገልግል ተገቢ ነው፡፡ ግቢ ጉባኤን በትምህርት ላይ ሳሉ ከዓላማቸው እንዳይዘናጉ ማድረጊያ መንገድ እንደሆነ ብቻ በማሰብ ለመሳተፍ መወሰን እንደ ግብ አድርገው የሚያገለግሉ እንዳሉ የሚታወቅ ቢሆንም ተመርቀው ሲወጡ ቢያንስ ለራሳቸው ጥሩ ክርስቲያን ሆነው እንዲገኙ ማደረጉ አንዱ መልካም ነገር ነው፡፡

፬. ማኅበራዊ ሕወት፡-

ከትምህርት በኋላ በማኅበራዊ ሕይወት መሳተፍ የማይቀር ጉዳይ ነው፡፡ ከከፍተኛ ትምህርት ተቋማት ሳሉ ትምህርትና አገልግሎት ብቻ ነበር ትኩረት የሚያደርጉት፡፡ ከግቢ ሲወጡ ግን  ከጠባቡ ዓለም ወደ ሰፊው ዓለም የሚሰማሩ በመሆኑ ዓለም በሯን ከፍታ ትጠብቃቸዋለች፡፡ ከእነዚህም ውስጥ አንዱ በማኅበራዊ ሕይወት መሳተፍ ነው፡፡ ከእነዚህም ውስጥ በሠርግ፣ በለቅሶ፣ የተጣላ በማስታረቅ፣ ከወዳጆች ጋር የሕይወት ልምድ መለዋወጥ፣ በአጠቃላይ ያሉበት ማኅበረሰብ የሚኖረውን ኑሮ የመጋራት ሁኔታ ይፈጠራል፡፡

በዚህ ወቅት በተረጋጋና በሰከነ መንፈስ ለእያንዳንዱ ነገር ትኩረት በመስጠት ሕይወትን መምራት ያስፈልጋል፡፡ በእነዚህ ዘርፈ ብዙ ጉዳዮች ምክንያት አገልግሎትን እርግፍ አድርጎ መተው ሳይሆን ቅድሚያ የሚሰጡትን በማስቀደም መትጋት ይገባል፡፡

ዓለም ሰፊ ናት፣ ቀዳዳዎቿም ብዙ ናቸው፡፡ በዚህ ውስጥ ቀልጦ መቅረት ሳይሆን በማስተዋል ሁሉንም በአግባቡና በሥርዓቱ መምራት ተገቢ ነው፡፡

ማጠቃለያ፡-

የግቢ ጉባኤ ተማሪዎች ከተመረቁ በኋላ ሕይወታቸውን እንዴት መምራት እንደሚገባቸው ቆም ብለው ማሰብ ይጠበቅባቸዋል፡፡ በተለይም ለመንፈሳዊ ሕይወት ትልቁን ትኩረት መስጠት ያስፈልጋል፡፡ የሚሠሩት ሥራ፣ የሚመሠርቱት ጋብቻ፣ ማኅበራዊ ሕይወት እና የመሳሰሉ ገዳዮች ከመንፈሳዊነት እንዳያስወጣቸው ጥንቃቄ እንዲያደርጉ ይገባል፡፡ አንድ ጊዜ ከአገልግሎት በተለይም ከቤተ ክርስቲያን ከራቁ በኋላ ለመመለስ ሲቸገሩ ማየት የተለመደ በመሆኑ ወደዚህ የሕይወት አቅጣጫ እንዳያመሩ ማእከላት፣ ወረዳ ማእከላት፣ ግንኙነት ጣቢያዎች ክትትል የመድረግ፣ የግንዛቤ ማስጨበጫ መርሐ ግብር በመፍጠር ማበርታት ይገባል፡፡

ዓለም ከመንፈሳዊ ሕይወት እንድንወጣ በሯ ወለል አድርጋ ስለምትቀበለን የሚያቀርብልንን   ሁሉ ወርቅ መስሎን ለመዝገን ከመሮጥ መቆጠብ፣ ክፉንና ደጉን የምንለይበት አእምሮ ተሰጥቶናልና ልናመዛዝን ይገባል፡፡ ሐዋርያው ቅዱስ ጳውሎስ ደቀ መዝሙሩ ዴማስ ዓለምን ናፍቆ ጥሎት እንደሄደ ሲገልጽ በሐዘን ነው፡፡ “ዴማስ ይህን የዛሬውን ዓለም ወድዶ እኔን ተወኝ ወደ ተሰሎንቄም ሄደ” እንዲል(፪ኛ ተሰ.፬፥፲)፡፡ ለቤተ ክርስቲያን ዋስ ጠበቃ ይሆናሉ ተብለው ታስበው ነገር ግን ዓለም ጠልፋ የጣለቻቸው ብዙዎች እንዳሉ ተገቢ ነው፡፡ ስለዚህ ከግቢ ጉባኤ ተመርቀን ስንወጣ አንደ ክርስቲያን ማሰብ፣ መኖርን፣ በአገልግሎት መሳተፍን እንደ ዓላማ አድርገን ልንወጣ ያስፈልጋል፡፡ ቅድስት ኦርቶዶክሳዊት ቤተ ክርስቲያን ከልጆቿ ብዙ ትጠብቃለችና ድምጿን ለመስማት፣ የሰማነውንም ለመተግበር መፋጠን ከትውልዱ ይጠበቃል፡፡

ወስብሐት ለእግዚአብሔር