የጥያቄዎቻችሁ መልስ:- ከሱስ መላቀቅ አቃተኝ

የሁለተኛ ዓመት የከፍተኛ ትምህርት ተቋም ተማሪ ነኝ፤ ተወልጄ ያደግሁት በአነስተኛ የገጠር ከተማ ነው፡፡ በመንደራችን ጫት የሚቅም ሰው አይደለም ጫት ምን እንደሆነ በተግባር አይታወቅም ማለት ይቻላል፡፡ ወደ ከፍተኛ ትምህርት ተቋም በገባሁ አንድ ዓመት ባልሞላ ጊዜ ውስጥ በጓደኞቼ ግፊት ጫት መቃም ለንባብ ይረዳል በሚል ሰበብ የጫት ተጠቃሚ ሆንኩ፡፡ አሁን ከጫት ቃሚነት አልፌ በተለያዩ ሱሶች ተይዣለሁ፡፡ ከእነዚህ ሱሰሶች ለመላቀቅ በተለያዩ ጊዜያት ሞክሬአለሁ፤ ነገር ግን አልተሳካልኝም፡፡ ይህ የሁል ጊዜ ጭንቀቴ ነውና ምን ትመክሩኛላችሁ?

ገብሬ (ከሐዋሳ ዩኒቨርሲቲ ግቢ ጉባኤ)

የወንድማችን ጥያቄ ብዙዎች እየተቸገሩበት ከሚገኙ ጉዳዮች አንዱ መሆኑን በተለያዩ ጊዜያት ለዝግጅት ክፍላችን በሚደርሱን መልእክቶች ተረድተናል፡፡ በዚህም መሠረት ለጥያቄው ምላሽ ይሰጡን ዘንድ መ/ር ፍቃዱ ሳህሌን ጋብዘናል፣ እነሆ ምላሹ፡፡

በቅድሚያ የዘወትር ጭንቀትህ ገልጸህ መልስ እንድንሰጥህ በመጠየቅህ ልናመሰግንህ እንወዳለን፡፡ ይህ በመንፈሳዊ ሕይወት መስመር ለመጓዝና ከእግዚአብሔር ጋር ለመኖር ያለህን ጉጉት ያሳየናል፡፡ የችግሩን አደገኛነትና ነውርነት ከመገንዘብም በተጨማሪ ለመላቀቅ ያደረግሃቸው ተደጋጋሚ ሙከራዎች የጭንቀትህን ደረጃዎችና ከሱስ ለመውጣት ያለህን የመሻት ጥልቀት ያመለክታል፡፡

ሱስ ክፉ ልማድ ነው፡፡ ብዙ ሰዎች እንደ ቀልድ (ጨዋታ) እየጀመሩት በደጋገሙት ቁጥር ኅሊናቸው እየተቆጣጠራቸው ከሕዋሳቶቻቸው ጋር ክፉኛ የሚቆራኝ የሕይወት እንቅፋት ነው፡፡ ከዚያም ራስን የመግዛት ኃይልን ከሰዎች በመቀማት በልጓምነት ሸብቦ ወደፈለገው የጥፋት አቅጣጫ የሚወስድ የክርስቲያናዊ ሕይወት ብቻ ሳይሆን የሰብአዊነትም ጠንቅ ነው፡፡ ሰይጣን ሰዎችን እንዳሻው የሚጋልብበትና የወደደውን የሚሠራበት ፈረስ ነው፡፡

በምድራችን ላይ ብዙ ዓይነት ሱሶች አሉ፡፡ ለምሳሌ ያህል፡- የወሬ ሱስ፣ የአልኮል መጠጦች፣ የሲጋራ፣ የቡና፣ አንተ እንደተቀስከው የጫት፣ የተለያዩ አደንዛዥ ዕፆችና ልዩ ልዩ የሱስ ዓይነቶችን መዘርዘር ይቻላል፡፡ አብዛኞቹ ሌሎች የሱስ ተጠቂዎችን በማየት እስቲ እኔም ልሞክረው ተብለው እንደ ቀልድ የተጀመሩ ቀስ በቀስ አእምሮን የተቆጣጠሩና መሽገው የቀሩ ናቸው፡፡ ጥቂቶቹ ደግሞ በብስጭትና በሌሎች አስገዳጅ ሁኔታዎች ተጀምረው የሰውን ኅሊና አሥረው የተቀመጡ ናቸው፡፡ ከዚህም በተጨማሪ አንዱ የሱስ ዓይነት ብቻውን የሚኖር ሳይሆን ሌላውን እየጋበዘ በአንድ ሰው ሕይወት ተደብለው መውጫ መግቢያ እያሳጡ ነው የሚኖሩት፡፡ እንዲህ እየተጠራሩ ኅሊናውንና ሕዋሳቱን ሁሉ በመቆጣጠር ወደ ቀደመ ሕይወቱና ማንነቱ እንዳይመለከትና እንዳይመለስ ለማድረግ ያለ ምንም ዕረፍት በኅብረት የሰውን አእምሮ ይቆጣጠራሉ፡፡

ውድ ወንድማችን ከተያዝክባቸው ልዩ ልዩ ሱሶች በቁርጠኝነት መውጣት እንድትችል የሚከተሉትን መሠረታዊ ነጥቦች ማስተዋልና መተግበር ይጠበቅብሃል፡፡

፩. ምክንያቱን በሚገባ መመርመር

ሰዎች በእነዚህና መሰል ሱሶች የሚጠመዱበትን ምክንያት ውስጣዊና ውጫዊ በማለት መከፋፈል ይቻላል፡፡ እንደ አጠቃላይ ሲዘረዘሩ ግን የግል ፍላጎትና ተነሣሽነት፣ የቤተሰብ አኗኗርና አስተዳደግ፣ ማኅበረሰባዊ የባህል ተጽእኖ አጉል ጓደኛ፣ ሥራ ፈትነት፣ ብስጭትና ሌሎችም እንደ መነሻዎች ማየት ይቻላል፡፡ አንተም “ለንባብና ለትምህርት ውጤታማነት ጫት መቃም ጥሩ ነው” የሚል የጓደኞችህ አሉታዊ ግፊት ለዚህ እንዳበቃህ ገልጸህልናል፡፡ ብዙ ወንድሞቻችንና እኅቶቻችን እንዳንተው ተታለው በሱስ የተያዙና መውጣት አቅቷቸው የተቸገሩ ሆነው ይታያሉ፡፡ ምንም እንኳ ብዙ ምክንያቶች ቢኖሩትም የአንበሳውን ድርሻ የሚወስደው የራሳችን ስንፍና መሆኑን መዘንጋት የለብህም፡፡

፪. የሚያስከትለውን ጉዳት ማጤን

በጠቀስናቸውና በመሳሰሉት ሱሶች መያዝ ምንም ዓይነት ጥቅም የሌላቸው ከመሆኑም በላይ ልዩ ልዩ ጉዳቶችን በሰዎች ላይ በማድረስ ይታወቃሉ፡፡ አካላዊ ጉዳትን ለምሳሌ ያህል ብንመለከት፡- የጥርስና የንግግር አካላት በሽታን፣ የካንሰር በሽታን፣ በግብረ ሥጋ ግንኙነት የሚተላለፉ ኤች አይ ቪ እና የመሳሰሉት ተላላፊ በሽታዎችን የመሳሰሉትን መጥቀስ ይቻላል፡፡ የሥነ ልቡናዊ አለመረጋጋትና ራስን መጣል፣ ራስን ከሌሎች ማግለልና ራስንም ወደ ማጥፋት መድረስ፣ በማኅበረሰቡ መገለል፣ ሱስን ለማርካት ሲባል የገንዘብ ፍለጋ ልዩ ልዩ ወንጀሎችን መፈጸምና በወንጀሉ የመጠየቅ አደጋዎች ሁሉ ሊታሰቡ የሚገባቸው  ከሱስ ጋር የሚያያዙ ችግሮች ናቸው፡፡ ውጤታቸውም ክቡር የሆነውን የሰው ልጅ የሁለት ዓለም ስደተኛ ማድረግ ነው፡፡ ውድ ወንድማችን የአንተም ጥያቄ ከእነዚህ ሱሶች ጉዳትና ውጤት ለመዳን በመሆኑ ከዚህ በመቀጠል ደግሞ ልትወስዳቸው የሚገቡ ርምጃዎችን በአጭሩ እናቀርብ፡፡

ይቆየን

የ

Y